ஆசிய கோப்பை மகளிர் டி20 கிரிக்கெட் போட்டியின் இறுதி ஆட்டத்தில் இந்திய அணி 17 ரன்கள் வித்தியாசத்தில் பாகிஸ்தானை தோற்கடித்தது.
இதன்மூலம் ஆசிய கோப்பை போட்டியில் தொடர்ந்து 6-ஆவது முறையாக சாம்பியனாகியுள்ளது இந்திய மகளிர் அணி. இதுவரை 6 முறை மட்டுமே நடைபெற்றுள்ள ஆசிய கோப்பை போட்டியில் இந்தியாவைத் தவிர வேறு எந்த அணியும் சாம்பியன் பட்டம் வென்றதில்லை.
தாய்லாந்து தலைநகர் பாங்காக்கில் ஞாயிற்றுக்கிழமை நடைபெற்ற இறுதி ஆட்டத்தில் முதலில் பேட் செய்த இந்திய அணி 20 ஓவர்களில் 5 விக்கெட் இழப்புக்கு 121 ரன்கள் சேர்த்தது.
இந்திய அணியின் தரப்பில் தொடக்க வீராங்கனை மிதாலி ராஜ் 65 பந்துகளில் 1 சிக்ஸர், 7 பவுண்டரிகளுடன் ஆட்டமிழக்காமல் 73 ரன்கள் குவித்தார். பாகிஸ்தான் தரப்பில் அனாம் அமின் 2 விக்கெட் வீழ்த்தினார்.
பாகிஸ்தான் தோல்வி: இதையடுத்து பேட் செய்த பாகிஸ்தான் அணி 20 ஓவர்களில் 6 விக்கெட் இழப்புக்கு 104 ரன்கள் எடுத்து தோல்வி கண்டது. அந்த அணியில் அதிகபட்சமாக கேப்டன் பிஸ்மா மரூப் 25, தொடக்க வீராங்கனை ஜவேரியா கான் 22, ஆய்ஷா ஜாபர் 15 ரன்கள் எடுத்தனர்.
இந்தியத் தரப்பில் இக்தா பிஸ்த் 2 விக்கெட்டுகளை வீழ்த்தினார். ஆட்டநாயகி மற்றும் தொடர்நாயகி விருதுகளை இந்திய வீராங்கனை மிதாலி ராஜ் தட்டிச் சென்றார். இந்தத் தொடரில் மிதாலி ராஜ் 4 இன்னிங்ஸ்களில் 220 ரன்கள் குவித்தார்.
ஆசிய கோப்பை போட்டியின் இறுதி ஆட்டத்தில் வென்றதன் மூலம் டி20 உலகக் கோப்பையில் பாகிஸ்தானிடம் கண்ட தோல்விக்கு ஆறுதல் தேடிக்கொண்டது இந்திய அணி.
இந்த ஆசிய கோப்பை போட்டியில் இறுதி ஆட்டத்தோடு சேர்த்து மொத்தம் 6 ஆட்டங்களில் விளையாடிய இந்திய அணி, அவையனைத்திலும் வெற்றி கண்டது குறிப்பிடத்தக்கது.
2004 முதல் நடைபெற்று வரும் இந்த ஆசிய கோப்பை போட்டியின் முதல் நான்கு தொடர்கள் 50 ஓவர் முறையில் விளையாடப்பட்டன. அதன்பிறகு நடைபெற்ற இரு தொடர்களும் டி20 முறையில் நடைபெற்றுள்ளன.