டேவிஸ் கோப்பை டென்னிஸ் போட்டியில் உஸ்பெகிஸ்தானுக்கு எதிரான ஆசிய-ஓசியானியா குரூப்-1 இரண்டாவது சுற்றில் பங்கேற்கவுள்ள இந்திய அணியில் மூத்த வீரரான லியாண்டர் பயஸ் நீக்கப்பட்டுள்ளார். போட்டியில் களமிறங்கும் நால்வரில் ஒருவராக அவர் இடம்பெறவில்லை.
இந்திய அணியின் புதிய 'நான் பிளேயிங்' கேப்டனான மகேஷ் இம்முடிவுகளை எடுத்துள்ளார்.
ராம்குமார் ராமநாதன், பிரஜ்னேஷ் குன்னேஸ்வரன், ஸ்ரீராம் பாலாஜி, ரோஹன் போபண்ணா ஆகியோர் அணியின் நால்வராகத் தேர்வு செய்யப்பட்டுள்ளார்கள்.
இந்தியா-நியூஸிலாந்து இடையிலான ஆசிய-ஓசியானியா குரூப் 1 டேவிஸ் கோப்பை டென்னிஸ் போட்டி புணேவில் சமீபத்தில் நடைபெற்றது. ஆடவர் இரட்டையர் பிரிவு ஆட்டத்தில் லியாண்டர் பயஸ்-விஷ்ணுவர்தன் ஜோடி, நியூஸிலாந்தின் ஆர்டெம் சிடாக்-மைக்கேல் வீனஸ் ஜோடியுடன் மோதியது. விறுவிறுப்பாக நடைபெற்ற இந்த ஆட்டத்தின் முதல் செட்டை 6-3 என்ற கணக்கில் கைப்பற்றிய பயஸ் ஜோடி, அடுத்த 3 செட்களை 3-6, 6-7 (6), 3-6 என்ற செட் கணக்கில் நியூஸிலாந்து ஜோடியிடம் இழந்து தோற்றது.
55-வது டேவிஸ் கோப்பை போட்டியில் விளையாடிய பயஸ், இந்த ஆட்டத்தில் வென்றிருந்தால், டேவிஸ் கோப்பை வரலாற்றில் அதிக (43) வெற்றிகளை பெற்றவர் என்ற சாதனையை படைத்திருப்பார். ஆனால் தோற்றதால் அந்த சாதனையை தவறவிட்டார்.
இந்தியா - உஸ்பெகிஸ்தான் இடையேயான போட்டி நாளை பெங்களூரில் தொடங்குகிறது. முன்னதாக இந்தியா 4-1 என்ற கணக்கில் நியூஸிலாந்தையும், உஸ்பெகிஸ்தான் 3-1 என்ற கணக்கில் தென் கொரியாவையும் தோற்கடித்ததன. இரண்டரை ஆண்டுகளுக்குப் பிறகு மீண்டும் பெங்களூரில் விளையாடவுள்ளது இந்திய டென்னிஸ் அணி. இதற்கு முன்னர் இங்கு விளையாடியபோது உலக குரூப் பிளே ஆப் சுற்றில் இந்தியா 2-3 என்ற கணக்கில் செர்பியாவிடம் தோல்வி கண்டது குறிப்பிடத்தக்கது.
டேவிஸ் கோப்பை டென்னிஸ் போட்டியில் இந்தியாவும், உஸ்பெகிஸ்தானும் இதுவரை 4 முறை நேருக்கு நேர் மோதியுள்ளன. அதில் இரு அணிகளும் தலா 2 வெற்றிகளைப் பெற்றுள்ளன. கடைசியாக இவ்விரு அணிகளும் 2012 ஏப்ரலில் மோதின. அதில் உஸ்பெகிஸ்தான் 3-2 என்ற கணக்கில் இந்தியாவை தோற்கடித்தது. விளையாடாத கேப்டனான (நான் பிளேயிங் கேப்டன்) மகேஷ் பூபதியின் தலைமையில் இந்திய அணி பங்கேற்கவுள்ள முதல் தொடர் இது. இதில் வெற்றி பெறும் அணி, செப்டம்பரில் நடைபெறவுள்ள உலக குரூப் பிளே ஆப் சுற்றில் விளையாட தகுதி பெறும்.{pagination-pagination}
இந்தியா-உஸ்பெகிஸ்தான் இடையிலான ஆசிய-ஓசியானியா குரூப் 1 டேவிஸ் கோப்பை டென்னிஸ் போட்டியிலிருந்து இந்திய வீரர் யூகி பாம்ப்ரி விலகியுள்ளார். அவர் முழங்கால் காயம் காரணமாக போட்டியிலிருந்து விலகியுள்ளார். அதனால் பெங்களூரில் தொடங்கிய பயிற்சி முகாமுக்கு அவர் வரவில்லை. ஒற்றையர் பிரிவைப் பொறுத்தவரையில் இந்திய அணியின் முக்கிய வீரராக இருக்கும் யூகி பாம்ப்ரி விளையாடாதது இந்திய அணிக்குப் பெரும் பின்னடைவாகும்.
இந்நிலையில் இரட்டையர் போட்டியில் விளையாடும் வீரர்களாக ரோஹன் போபண்ணா, ஸ்ரீராம் பாலாஜி ஆகியோர் தேர்வு செய்யப்பட்டுள்ளார்கள். யுகி பாம்ப்ரிக்குப் பதிலாக பிரஜ்னேஷ் குன்னேஸ்வரன் ஒற்றையர் போட்டியில் பங்கேற்பார். ராம்குமார் நாமநாதன் இதர ஒற்றையர் போட்டியில் விளையாடுவார்.
சமீபத்தில், லியோன் ஏடிபி சேலஞ்சர் டென்னிஸ் போட்டியில் இந்தியாவின் லியாண்டர் பயஸ்-கனடாவின் ஆதில் ஷம்சுதீன் ஜோடி சாம்பியன் பட்டம் வென்றது.
மெக்ஸிகோவின் லியோன் நகரில் நடைபெற்ற இந்தப் போட்டியின் இறுதிச் சுற்றில் பயஸ்-ஆதில் ஜோடி 6-1, 6-4 என்ற நேர் செட்களில் ஸ்விட்சர்லாந்தின் லூகா மர்கரோலி-பிரேசிலின் கேரோ ஜம்பீரி ஜோடியைத் தோற்கடித்தது. இதுதான் இந்த சீசனில் பயஸ் வென்ற முதல் பட்டம். அதேநேரத்தில் ஒட்டுமொத்தமாக அவர் வென்ற 20-ஆவது சேலஞ்சர் பட்டம் இது. கடந்த 26 ஆண்டுகளில் பயஸ் ஒவ்வொரு ஆண்டும் ஏதாவது ஒரு போட்டியில் பட்டம் வென்றிருக்கிறார்.
இந்நிலையில் டேவிஸ் கோப்பையில் பயஸ் நீக்கப்பட்டிருப்பது இந்திய ரசிகர்களிடையே அதிர்ச்சியை ஏற்படுத்தியுள்ளது. 1990-ல் ஜப்பானுக்கு எதிராக டேவிஸ் கோப்பை போட்டியில் அறிமுகமான பயஸ், 27 வருடங்களில் முதல்முறையாக திறமையின் அடிப்படையில் அணியிலிருந்து நீக்கப்பட்டுள்ளார். இதனால் டேவிஸ் கோப்பை வரலாற்றில் அதிக (43) வெற்றிகளை பெற்றவர் என்ற சாதனையை பயஸ் பெற வாய்ப்பில்லை என்றே கருதப்படுகிறது.