பாகிஸ்தானுக்கு எதிரான முதல் டெஸ்ட் கிரிக்கெட் போட்டியின் முதல் நாள் ஆட்டநேர முடிவில் மேற்கிந்தியத் தீவுகள் அணி தனது முதல் இன்னிங்ஸில் 81 ஓவர்களில் 7 விக்கெட் இழப்புக்கு 244 ரன்கள் சேர்த்தது.
ஜமைக்காவின் கிங்ஸ்டன் நகரில் வெள்ளிக்கிழமை தொடங்கிய இந்தப் போட்டியில் டாஸ் வென்ற பாகிஸ்தான் பீல்டிங்கை தேர்வு செய்தது. இதையடுத்து பேட் செய்த மேற்கிந்தியத் தீவுகள் அணியில் தொடக்க வீரர் பிரத்வெயிட் ரன் ஏதுமின்றி வெளியேறினார்.
பின்னர் வந்த ஹெட்மியர் 11, ஷாய் ஹோப் 2, விஷால் சிங் 9, மற்றொரு தொடக்க வீரரான பாவெல் 33 என அடுத்தடுத்து வெளியேற, அந்த அணி 26.2 ஓவர்களில் 71 ரன்களுக்கு 5 விக்கெட்டுகளை இழந்து தடுமாறியது. இதையடுத்து 6-ஆவது விக்கெட்டுக்கு இணைந்த ரோஸ்டன் சேஸ்-ஷேன் டெளரிச் ஜோடி 118 ரன்கள் சேர்க்க, மேற்கிந்தியத் தீவுகள் அணி சரிவிலிருந்து மீண்டது. ரோஸ்டன் சேஸ் 151 பந்துகளில் 1 சிக்ஸர், 7 பவுண்டரிகளுடன் 63, ஷேன் டெளரிச் 130 பந்துகளில் 9 பவுண்டரிகளுடன் 56 ரன்கள் சேர்த்து ஆட்டமிழந்தனர்.
மேற்கிந்தியத் தீவுகள் அணி 81 ஓவர்களில் 7 விக்கெட் இழப்புக்கு 244 ரன்கள் குவித்திருந்தபோது போதிய வெளிச்சமின்மை காரணமாக முதல் நாள் ஆட்டம் முடித்துக் கொள்ளப்பட்டது. அப்போது கேப்டன் ஜேசன் ஹோல்டர் 30, தேவேந்திர பிஷூ 23 ரன்களுடன் ஆட்டமிழக்காமல் இருந்தனர்.