அமெரிக்க ஓபன் தகுதிச் சுற்று யூகி, பிரஜ்னேஷ் தோல்வி

அமெரிக்க ஓபன் டென்னிஸ் போட்டியின் தகுதிச் சுற்றில் முதல் சுற்று ஆட்டத்தில் இந்தியாவின் யூகி பாம்ப்ரி, பிரஜ்னேஷ் குன்னேஸ்வரன் ஆகியோர் தோல்வியடைந்தனர்.
ஆண்டின் கடைசி கிராண்ட்ஸ்லாம் போட்டியான அமெரிக்க ஓபன் டென்னிஸ் போட்டி வரும் 28-ஆம் தேதி முதல் செப்டம்பர் 10-ஆம் தேதி வரை அமெரிக்காவின் நியூயார்க் நகரில் நடைபெறுகிறது. அதற்கான தகுதிச்சுற்று நியூயார்க்கில் தற்போது நடைபெற்று வருகிறது. அதில் புதன்கிழமை நடைபெற்ற முதல் சுற்று ஆட்டத்தில் இந்தியாவின் முன்னணி வீரரான யூகி பாம்ப்ரி 6-1, 1-6, 3-6 என்ற செட் கணக்கில் ஜப்பானின் கோ சூடாவிடம் தோல்வி கண்டார். மற்றொரு முதல் சுற்று ஆட்டத்தில் பிரஜ்னேஷ் குன்னேஸ்வரன் 1-6, 4-6 என்ற நேர் செட்களில் ஜெர்மனியின் யானிக் ஹன்மானிடம் தோல்வி கண்டார்.