சாம்பியன்ஸ் டிராபி கிரிக்கெட் போட்டியில் வாகை சூடியதைத் தொடர்ந்து ஒரு நாள் கிரிக்கெட் தரவரிசையில் பாகிஸ்தான் அணி ஏற்றம் கண்டுள்ளது.
முன்னதாக 8-ஆவது இடத்தில் இருந்த பாகிஸ்தான், இப்போது இரு இடங்கள் முன்னேறி 6-ஆவது இடத்தைப் (95 ரேட்டிங் புள்ளிகள்) பிடித்துள்ளது. இதன்மூலம் 2019 உலகக் கோப்பை போட்டிக்கு நேரடித் தகுதி பெறும் வாய்ப்பை நெருங்கியுள்ளது பாகிஸ்தான்.
2019 உலகக் கோப்பை கிரிக்கெட் போட்டி இங்கிலாந்தில் நடைபெறுகிறது. இதில் மொத்தம் 8 அணிகள் நேரடித் தகுதி பெறும். அதில் போட்டியை நடத்தும் நாடு என்ற அடிப்படையில் இங்கிலாந்து அணி ஏற்கெனவே தகுதி பெற்றது. எஞ்சிய 7 அணிகள் தரவரிசை அடிப்படையில் நேரடித் தகுதி பெறும். அதாவது செப்டம்பர் 30-ஆம் தேதி தரவரிசையில் முன்னணியில் இருக்கும் 7 அணிகள் உலகக் கோப்பை போட்டியில் விளையாட தகுதி பெறும்.
வங்கதேசம், இலங்கை ஆகிய அணிகள் தலா ஒரு இடத்தை இழந்து முறையே 7 மற்றும் 8-ஆவது இடங்களில் உள்ளன. மற்றபடி அணிகள் தரவரிசையில் எந்த மாற்றமும் இல்லை. தென் ஆப்பிரிக்கா, ஆஸ்திரேலியா, இந்தியா ஆகிய அணிகள் முறையே முதல் 3 இடங்களில் உள்ளன. இந்தியா, இங்கிலாந்து ஆகிய அணிகள் சாம்பியன்ஸ் டிராபியில் சிறப்பாக ஆடியபோதும் தலா ஒரு ரேட்டிங் புள்ளியை இழந்துள்ளன.
10-ஆவது இடத்தில் ரோஹித்: பேட்ஸ்மேன்கள் தரவரிசையைப் பொறுத்தவரையில் இந்திய கேப்டன் கோலி தொடர்ந்து முதலிடத்தில் உள்ளார். ஆஸ்திரேலியாவின் டேவிட் வார்னர், தென் ஆப்பிரிக்க கேப்டன் டிவில்லியர்ஸ் ஆகியோர் முறையே 2 மற்றும் 3-ஆவது இடங்களில் உள்ளனர்.
இந்திய அணியின் தொடக்க வீரர்களான ரோஹித் சர்மாவும், ஷிகர் தவனும் 10-ஆவது இடத்தைப் பகிர்ந்துகொண்டுள்ளனர். ரோஹித் சர்மா 3 இடங்கள் முன்னேறியுள்ளார். தோனி 15-ஆவது இடத்தில் உள்ளார். இந்தியர்கள் வேறு யாரும் முதல் இருபது இடங்களில் இல்லை.
சாம்பியன்ஸ் டிராபி கிரிக்கெட் போட்டியின் இறுதி ஆட்டத்தில் இந்தியாவுக்கு எதிராக 114 ரன்கள் குவித்த பாகிஸ்தான் தொடக்க வீரர் ஃபகார் ஸமான் 58 இடங்கள் முன்னேறி 97-ஆவது இடத்தைப் பிடித்துள்ளார். அவர், தான் விளையாடிய முதல் தொடரிலேயே (4 ஆட்டங்களில்) தரவரிசையில் டாப்-100-க்குள் வந்துள்ளார். பாகிஸ்தான் மிடில் ஆர்டர் பேட்ஸ்மேன் பாபர் ஆஸம் 5-ஆவது இடத்தைப் பிடித்துள்ளார். இதுதான் அவருடைய அதிகபட்ச தரவரிசை.
புவனேஸ்வர் குமார் முன்னேற்றம்: பந்துவீச்சாளர்கள் தரவரிசையைப் பொறுத்தவரையில் ஆஸ்திரேலியாவின் ஜோஷ் ஹேஸில்வுட், தென் ஆப்பிரிக்காவின் இம்ரான் தாஹிர், ஆஸ்திரேலியாவின் மிட்செல் ஸ்டார்க் ஆகியோர் முதல் 3 இடங்களில் உள்ளனர்.
இந்திய வீரர்கள் அக்ஷர் படேல் 16-ஆவது இடத்திலும், அமித் மிஸ்ரா 18-ஆவது இடத்திலும் உள்ளனர். சாம்பியன்ஸ் டிராபியில் அசத்தலாக பந்துவீசிய இந்திய வேகப்பந்து வீச்சாளர் புவனேஸ்வர் குமார் 4 இடங்கள் முன்னேறி 19-ஆவது இடத்தைப் பிடித்துள்ளார். ஜஸ்பிரித் பூம்ரா 19 இடங்கள் முன்னேறி 24-ஆவது இடத்தைப் பிடித்துள்ளார்.
சாம்பியன்ஸ் டிராபியில் 13 விக்கெட்டுகளை வீழ்த்தி தொடர் நாயகன் விருதை வென்ற பாகிஸ்தானின் ஹசன் அலி 12 இடங்கள் முன்னேறி 7-ஆவது இடத்தைப் பிடித்துள்ளார். பாகிஸ்தான் வேகப்பந்து வீச்சாளர்களான முகமது ஆமிர் 21-ஆவது இடத்துக்கும், ஜுனைத் கான் 47-ஆவது இடத்துக்கும் முன்னேறியுள்ளனர்.