விம்பிள்டன் டென்னிஸ் போட்டியில், பிரிட்டன் வீரரும், உலகின் முதல் நிலை வீரருமான ஆன்டி முர்ரே முதல் முறையாக போட்டித் தரவரிசையில் முதலிடம் பிடித்துள்ளார்.
விம்பிள்டன் டென்னிஸ் போட்டி வரும் ஜூலை 3-ஆம் தேதி தொடங்கி 16-ஆம் தேதி வரையில் நடைபெறவுள்ளது. இந்நிலையில், அந்தப் போட்டிக்கான தரவரிசை புதன்கிழமை வெளியிடப்பட்டது.
இதன்படி, நடப்புச் சாம்பியனான ஆன்டி முர்ரே முதல் முறையாக முதலிடம் பிடித்துள்ளார். அவருக்கு அடுத்தபடியாக செர்பியாவின் நோவக் ஜோகோவிச் (2), ஸ்விட்சர்லாந்தின் ரோஜர் ஃபெடரர் (3), ஸ்பெயினின் ரஃபேல் நடால் (4), ஸ்விட்சர்லாந்தின் ஸ்டான் வாவ்ரிங்கா (5) ஆகியோர் அடுத்தடுத்த இடங்களைப் பிடித்துள்ளனர்.
அவர்களைத் தொடர்ந்து கனடாவின் மிலோஸ் ரயோனிச் (6), குரேஷியாவின் மிலோஸ் ரயோனிச் (7), ஆஸ்திரியாவின் டொமினிக் தீம் (8), ஜப்பானின் கெய் நிஷிகோரி (9), ஜெர்மனியின் அலெக்ஸாண்டர் ùஸவரெவ் (10) உள்ளனர்.
மகளிர் பிரிவு: இதனிடையே, மகளிர் பிரிவு தரவரிசையில் உலகின் முதல் நிலை வீராங்கனையான ஜெர்மனியின் ஏஞ்ஜெலிக் கெர்பர் முதலிடத்தில் உள்ளார். ருமேனியாவின் சைமோனா ஹேலப் 2-ஆவது இடத்திலும், செக் குடியரசின் கரோலினா பிலிஸ்கோவா 3-ஆவது இடத்திலும் உள்ளனர்.
உக்ரைனின் எலினா ஸ்விடோலினா (4), டென்மார்கின் கரோலின் வோஸ்னியாக்கி (5), பிரிட்டனின் ஜோஹன்னா கோன்டா (6), ரஷியாவின் ஸ்வெட்லனா குஸ்நெட்சோவா (7), ஸ்லோவேகியாவின் டொமினிகா சிபுல்கோவா (8), போலந்தின் அக்னீஸ்கா ரத்வான்ஸ்கா (9), அமெரிக்காவின் வீனஸ் வில்லியம்ஸ் (10) ஆகியோர் அவர்களுக்கு அடுத்த இடங்களில் உள்ளனர்.