17 வயது வாஷிங்டன் சுந்தர், புணே அணியின் சமீபத்திய தொடர் வெற்றிகளுக்கு ஒரு முக்கிய காரணம். சிக்ஸர் மழை பொழிகிற இந்த ஐபிஎல்-லில் பவர்பிளே-யில் சிறப்பாகப் பந்துவீசுகிறவர் என்கிற முத்திரை சுந்தர் மீது விழுந்துள்ளது.
இவரை அணியில் சேர்ப்பதற்கு முன்பு பவர்பிளே ஓவர்களில் புணே அணி தடுமாறி வந்தது. உதாரணமாக முதல் நான்கு ஆட்டத்தில் புணே அணி, பவர்பிளே-யில் ஒரு ஓவருக்கு 10 ரன்கள் வழங்கியது. இதனால் அந்த முதல் நான்கு ஆட்டங்களில் மூன்றில் தோல்வியடைந்தது. ஆனால் கடைசி 7 ஆட்டங்களில் அந்த அணி பவர்பிளேயில் அசத்திவருகிறது. 7.40 ரன்கள் மட்டுமே வழங்கி எதிரணிகளை அதிக ரன்கள் எடுக்கவிடாமல் தடுத்துள்ளது. இதற்கு முக்கிய காரணம் - உனாட்கட், வாஷிங்டன் சுந்தர், பென் ஸ்டோக்ஸ் ஆகியோரின் பந்துவீச்சு.
வாஷிங்டன் சுந்தர் புணேவின் கடந்த 6 ஆட்டங்களிலும் தவறாமல் இடம்பிடித்துள்ளார். முக்கிய காரணம், பவர்பிளேக்களில் இவருடைய பந்துவீச்சு மிகவும் சிக்கனமாக இருப்பதுதான்.
ஹைதராபாத்துக்கு எதிரான முதல் ஆட்டத்தில் 3 ஓவர்கள் வீசி 19 ரன்கள் மட்டுமே கொடுத்தார் சுந்தர். அந்தப் போட்டியில் புணே அணி வெற்றிபெற்றது. அந்த ஆட்டத்தின்ல் பவர்பிளேயில் பந்துவீசிய வாஷிங்டன் சுந்தர், 2 ஓவர்களில் 11 ரன்கள் மட்டுமே கொடுத்தார். இது அவர்மீது அதிக நம்பிக்கையை வரவழைத்துள்ளது.
இதுவரை 16 ஓவர்கள் வீசி 4 விக்கெட்டுகள் மட்டுமே எடுத்தாலும் சுந்தரின் உபயோகமான பந்துவீச்சு புணே அணிக்கு நல்ல பலன்களை அளித்துவருகிறது. மிகக்குறைந்த எகானமி ரேட் (7.12) அவரை புணே அணியின் முக்கிய வீரராக மாற்றியுள்ளது. புணே கடைசி 7 ஆட்டங்களில் ஆறு ஆட்டங்களை வென்றிருப்பதில் வாஷிங்டன் சுந்தரின் பந்துவீச்சும் ஒரு முக்கிய காரணம். பவர்பிளே-யில் குறைவான ரன்கள் தருகிற (10 ஓவர்கள், எகானமி - 6.9) பந்துவீச்சாளர் என்கிற முத்திரையைப் பெற்றுள்ளார் சுந்தர்.
புணேவின் நட்சத்திர பந்துவீச்சாளர்ரா உனாட்கட் தான். அதேசமயம் அந்த அணியைப் பெரிய சரிவிலிருந்து மீட்டுக்கொண்டுவந்த பந்துவீச்சாளர்களில் வாஷிங்டன் சுந்தரின் பங்களிப்பு மிக முக்கியமானது.
புள்ளிவிவரங்கள்
* ஆறு ஆட்டங்கள், 16 ஓவர்கள், 4 விக்கெட்டுகள், எகானமி - 7.12
* பவர்பிளே: 10 ஓவர்கள்; எகானமி - 6.9
இந்த நிலையில் ஹைதராபாத்தில் இன்று நடைபெறும் ஐபிஎல் கிரிக்கெட் தொடரின் 44-ஆவது லீக் ஆட்டத்தில் சன்ரைஸர்ஸ் ஹைதராபாதும், ரைஸிங் புணே சூப்பர்ஜயன்ட்ஸும் மோதுகின்றன. இது ஒரு முக்கியமான போட்டி.
புணே அணி இதுவரை 11 ஆட்டங்களில் விளையாடி 14 புள்ளிகளுடன் 3-ஆவது இடத்திலும், ஹைதராபாத் 11 ஆட்டங்களில் விளையாடி 13 புள்ளிகளுடன் 4-ஆவது இடத்திலும் உள்ளன. இவ்விரு அணிகளும் பிளே ஆப் சுற்றுக்கு முன்னேறும் முனைப்பில் இந்த ஆட்டத்தில் களம் காணுகின்றன.
சமீபத்திய தொடர் வெற்றிகளால் புணே அணி நம்பமுடியாத அளவுக்கு 3-வது இடத்துக்கு மேலேறி ஹைதராபாத்தைக் கீழே இறக்கியுள்ளது. இதனால் ஹைதராபாத் அணிக்குக் கடும் நெருக்கடி ஏற்பட்டுள்ளது. பிளேஆஃப்-புக்கு நிச்சயம் தகுதி பெறும் என்கிற நிலையில் அந்த அணி திடீர் வீழ்ச்சியைச் சந்தித்துவருகிறது. அதிலிருந்து மீண்டு மீண்டும் 3-வது இடத்தைப் பிடிக்க இன்றைய வெற்றி மிகவும் அவசியமாகிறது.