சென்னை சூப்பர் கிங்ஸ் அணியின் ஒரு சாதனை கடந்த இரண்டு வருடங்களாக முறியடிக்கப்படாமல் உள்ளது. சென்னை அணி எந்தளவுக்கு வலுவானது என்பதற்கு சாட்சியாக உள்ள சாதனை அது.
கடந்த 2013-ஆம் ஆண்டு நடைபெற்ற ஐபிஎல் போட்டியில் சூதாட்டம் நடைபெற்றதாக புகார் எழுந்தது. அது தொடர்பாக விசாரணை நடத்திய முன்னாள் நீதிபதி முத்கல் தலைமையிலான குழு, தனது அறிக்கையை கடந்த ஆண்டு தாக்கல் செய்தது. அந்த அறிக்கையின் அடிப்படையில், நீதிபதி ஆர்.எம்.லோதா தலைமையிலான மூவர் குழு, சென்னை சூப்பர் கிங்ஸ், ராஜஸ்தான் ராயல்ஸ் ஆகிய அணிகளை ஐபிஎல் போட்டிகளில் இருந்து 2 ஆண்டுகளுக்கு இடைநீக்கம் செய்து உத்தரவிட்டது. தடை இந்த வருட ஐபிஎல்-லுடன் முடிவடைவதால் 2018 ஐபிஎல்-லில் சென்னை சூப்பர் கிங்ஸ் அணி, ராஜஸ்தான் ராயல்ஸ் ஆகிய இரு அணிகளும் மீண்டும் பங்கேற்க வாய்ப்புள்ளது.
இந்நிலையில் சென்னை சூப்பர் கிங்ஸ் அணியின் ஒரு சாதனை கடந்த இரண்டு வருடங்களாக முறியடிக்கப்படாமல் உள்ளது.
சிஎஸ்கே கடைசியாக ஐபிஎல் ஆடிய 2015-ம் வருடம் ஒரு சாதனை செய்தது. அதாவது அந்த ஐபிஎல் முழுக்க சிஎஸ்கே 14 வீரர்களை மட்டுமே பயன்படுத்தியது. அந்தளவுக்குப் பலம் பொருந்திய அணியாக இருந்தது சிஎஸ்கே. அணியில் இடம்பெற்ற பெரும்பாலான வீரர்கள் அருமையாகப் பங்களிப்பு செய்ததால் மற்ற வீரர்களுக்கு வாய்ப்பு கிடைக்காமல் போனது. அந்த வருடத்தின் லீக் சுற்றின் முடிவில் 18 புள்ளிகளுடன் முதல் இடத்தைப் பிடித்தது சிஎஸ்கே. பிறகு இறுதிப் போட்டியில் மும்பை அணியிடம் தோற்றுப்போனது.
எனினும் ஐபிஎல்-லில் ஒரு சீசனில் குறைவான வீரர்களைப் பயன்படுத்திய அணி என்கிற சாதனையை அந்த வருடம் படைத்தது சிஎஸ்கே. இன்றுவரை ஐபிஎல்-லில் அவ்வகையிலான சாதனையில் அதுவே முதல் இடத்தில் உள்ளது.
இந்த வருடம் மும்பை அணி இதுவரை 16 வீரர்களை மட்டுமே பயன்படுத்தியுள்ளது. இந்த வருடம் அந்த அணியே குறைந்த வீரர்களைப் பயன்படுத்தியுள்ளது. எனினும் கடந்த 2 வருடங்களாக உள்ள சிஎஸ்கே-வின் சாதனையை எந்த அணியாலும் வீழ்த்தமுடியவில்லை.