ஐசிசியின் ஒருநாள் கிரிக்கெட் போட்டிகளுக்கான தரவரிசையில், அணிகளுக்கான பட்டியலில் இந்தியாவை பின்னுக்குத் தள்ளி தென் ஆப்பிரிக்கா முதலிடத்தைப் பிடித்துள்ளது.
வங்கதேசத்துக்கு எதிரான ஒருநாள் கிரிக்கெட் தொடரின் 2-ஆவது ஆட்டத்தில் 104 ரன்கள் வித்தியாசத்தில் வெற்றி கண்டதை அடுத்து தென் ஆப்பிரிக்கா இந்த முன்னேற்றத்தை அடைந்துள்ளது. தென் ஆப்பிரிக்கா மற்றும் இந்தியா தலா 120 புள்ளிகளுடன் இருந்தாலும், தசம புள்ளிகள் வித்தியாசத்திலேயே இந்தியா 2-ஆவது இடத்தில் உள்ளது.
வரும் 22-ஆம் தேதி நியூஸிலாந்துக்கு எதிரான ஒருநாள் கிரிக்கெட் தொடரில் இந்திய அணி விளையாட உள்ளதால், மீண்டும் முதலிடத்துக்கு வருவதற்கான வாய்ப்பு உள்ளது.
கோலிக்கு பின்னடைவு: இதனிடையே, ஒருநாள் கிரிக்கெட் பேட்ஸ்மேன்களுக்கான பட்டியலில் இந்திய கேப்டன் விராட் கோலி 2-ஆவது இடத்துக்கு இறங்கியுள்ளார். வங்கதேசத்துக்கு எதிரான ஆட்டத்தில் 176 ரன்கள் விளாசிய தென் ஆப்பிரிக்காவின் டி வில்லியர்ஸ், முதலிடத்துக்கு வந்துள்ளார்.
அதேபோல், 5-ஆவது இடத்தில் இருந்த இந்தியாவின் ரோஹித் சர்மா 2 இடங்கள் இறங்கி, 7-ஆவது இடத்துக்கு வந்துள்ளார்.
பந்துவீச்சாளர்கள் பட்டியலில் இந்திய வேகப்பந்து வீச்சாளர் ஜஸ்பிரீத் பூம்ரா, சுழற்பந்துவீச்சாளர் அக்ஸர் படேல் ஆகியோர் தலா ஓரிடம் சறுக்கி, முறையே 6 மற்றும் 8-ஆவது இடத்துக்கு வந்துள்ளனர். பாகிஸ்தானின் ஹசன் அலி, 6 இடங்கள் முன்னேறி பந்துவீச்சாளர்கள் பட்டியலில் முதலிடத்துக்கு வந்துள்ளார்.