நாளை முதல் நியூஸிலாந்துக்கு எதிரான டி20 தொடர் ஆரம்பமாகிறது. முதல் போட்டி டெல்லியில் நடைபெறவுள்ளது.
இந்தத் தொடரில் இந்திய அணி 3-0 என ஜெயிக்கவேண்டும் என இந்திய ரசிகர்களை விடவும் பாகிஸ்தான் ரசிகர்கள் மிகவும் ஆவலாக உள்ளார்கள்.
விஷயம் இதுதான். டி20யில் அணிகளின் தரவரிசையில் முதலிடத்தில் நியூஸிலாந்தும் 5-ம் இடத்தில் இந்தியாவும் உள்ளன. டி20 தொடரை இந்திய அணி 3-0 என வென்றால் அதிகபட்சமாக 2-ம் இடத்துக்கு முன்னேறமுடியும். அப்படித் தோற்கும்போது முதலிடத்தில் உள்ள நியூஸிலாந்து அணி, 5-ம் இடத்துக்கு இறங்கிவிடும்.
இதனால் லாபம் பாகிஸ்தானுக்குத்தான். தற்போது தரவரிசையில் 2-ம் இடத்தில் உள்ள பாகிஸ்தான், இந்திய அணி டி20 தொடரில் ஆதிக்கம் செலுத்தினால் முதலிடத்தைப் பிடித்துவிடும். அட, 3-0 கூட வேண்டாம். 2-1 என இந்திய அணி ஜெயித்தால் கூட பாகிஸ்தான் முதலிடத்தை அடைந்துவிடும். ஆக, பாகிஸ்தான் டி20 தரவரிசையில் முதலிடத்தைப் பிடிக்க, இந்திய அணி தொடரை வென்றாகவேண்டும். ஒருவேளை தொடரை நியூஸிலாந்து அணி வென்றால், முதலிடத்தைத் தக்கவைத்துக்கொள்ளும்.