ஜப்பான் ஓபன் சிந்து, சாய்னா தோல்வி

ஜப்பான் ஓபன் சூப்பர் சீரிஸ் பாட்மிண்டன் போட்டியில் இந்தியாவின் ஸ்ரீகாந்த், எச்.எஸ்.பிரணாய் ஆகியோர் காலிறுதிக்கு முன்னேறியுள்ளனர்.
அதேநேரத்தில் இந்தியாவின் முன்னணி வீராங்கனைகளான பி.வி.சிந்து, சாய்னா நெவால் ஆகியோர் தங்களின் 2-ஆவது சுற்றில் தோல்வி கண்டு போட்டியிலிருந்து வெளியேறினர்.
ஜப்பான் தலைநகர் டோக்கியோவில் இந்தப் போட்டி நடைபெற்று வருகிறது. இதில் வியாழக்கிழமை நடைபெற்ற ஆடவர் ஒற்றையர் 2-ஆவது சுற்றில் உலகின் 8-ஆம் நிலை வீரரான ஸ்ரீகாந்த் 21-12, 21-11 என்ற நேர் செட்களில் ஹாங்காங்கின் ஹூ யூனை வீழ்த்தினார். 
ஸ்ரீகாந்த் தனது காலிறுதியில் டென்மார்க்கின் விக்டர் ஆக்ùஸல்சனை சந்திக்கிறார். ஸ்ரீகாந்தும், விக்டரும் இதுவரை 4 முறை நேருக்கு நேர் மோதியுள்ளனர். அதில் இருவரும் தலா இரு வெற்றிகளைப் பெற்றுள்ளனர். எனினும் கடைசியாக மோதிய 2 ஆட்டங்களிலும் விக்டரே வெற்றி கண்டுள்ளார். 
மற்றொரு 2-ஆவது சுற்றில் இந்தியாவின் சாய் பிரணீத் 21-16, 23-21 என்ற நேர் செட்களில் சீன தைபேவின் சூ ஜென் ஹாவை தோற்கடித்தார். சாய் பிரணீத் தனது காலிறுதியில் போட்டித் தரவரிசையில் 2-ஆவது இடத்தில் இருக்கும் சீனாவின் ஷி யூகியை சந்திக்கிறார்.
சிந்து தோல்வி: மகளிர் ஒற்றையர் 2-ஆவது சுற்றில் இந்தியாவின் பி.வி.சிந்து 18-21, 8-21 என்ற நேர் செட்களில் நடப்பு உலக சாம்பியனான ஜப்பானின் நஜோமி ஒகுஹாராவிடம் தோல்வி கண்டார். இதன்மூலம் கொரிய ஓபனில் சிந்துவிடம் கண்ட தோல்விக்கு பதிலடி கொடுத்துள்ளார் ஒகுஹாரா.
மற்றொரு 2-ஆவது சுற்று ஆட்டத்தில் இந்தியாவின் சாய்னா நெவால் 16-21, 13-21 என்ற நேர் செட்களில் ஒலிம்பிக் சாம்பியனான ஸ்பெயினின் கரோலினா மரினிடம் தோற்று வெளியேறினார்.
கலப்பு இரட்டையர் 2-ஆவது சுற்றில் இந்தியாவின் அஸ்வினி பொன்னப்பா-சாத்விக்சாய்ராஜ் ஜோடி 27-29, 21-16, 12-21 என்ற செட் கணக்கில் இந்தோனேசியாவின் பிரவீண் ஜோர்டான்-டெபி சுசான்டோ ஜோடியிடம் தோல்வி கண்டது.