இந்திய-தென் ஆப்பிரிக்க அணிகளுக்கு இடையேயான 3 போட்டிகளைக் கொண்ட டெஸ்ட் கிரிக்கெட் தொடரின் இரண்டாவது போட்டி, தென் ஆப்பிரிக்காவின் செஞ்சுரியன் நகரில் இன்று தொடங்கியுள்ளது.
தென் ஆப்பிரிக்காவில் சுற்றுப் பயணம் மேற்கொண்டுள்ள இந்திய அணி, அந்நாட்டு அணியை 3 டெஸ்ட், 6 ஒரு நாள், 3 டி20 போட்டிகளில் எதிர்கொள்கிறது. டந்த வாரம் வெள்ளிக்கிழமை தொடங்கிய முதலாவது டெஸ்ட் போட்டியில், தென் ஆப்பிரிக்க அணி 72 ரன்கள் வித்தியாசத்தில் இந்திய அணியை வீழ்த்தியது. ஐசிசி டெஸ்ட் தரவரிசையில் முதலிடம் வகிக்கும் இந்தியா, முதல் டெஸ்டில் தோற்றது ரசிகர்களிடையே அதிர்ச்சியை ஏற்படுத்தியது.
இந்நிலையில் இன்று டாஸ் வென்ற தென் ஆப்பிரிக்க அணி பேட்டிங்கைத் தேர்வு செய்துள்ளது. காயம் காரணமாக சஹாவுக்குப் பதிலாக பார்தீவ் படேல் அணியில் இடம்பெற்றுள்ளார். தவனுக்குப் பதிலாக ராகுலும் புவனேஸ்வருக்குப் பதிலாக இஷாந்த் சர்மாவும் இந்திய அணியில் இடம்பெற்றுள்ளார்கள். இதனால் ரோஹித் சர்மா அணியில் மீண்டும் இடம்பிடித்துள்ளார். ரஹானேவுக்கு மீண்டும் வாய்ப்பளிக்கப்படவில்லை.
புவனேஸ்வர் குமார் கடைசியாக விளையாடிய இரு டெஸ்டுகளிலும் பிரமாதமாகப் பங்களிப்பு செய்துள்ளார். கொல்கத்தாவில் இலங்கைக்கு எதிரான டெஸ்டில் 8 விக்கெட்டுகளும் தென் ஆப்பிரிக்காவுக்கு எதிரான முதல் டெஸ்டில் ஆறு விக்கெட்டுகளும் எடுத்தார். எனினும் அவருக்கு இந்திய அணியில் இடம் மறுக்கப்பட்டுள்ளது.
புவனேஸ்வர் குமார், சஹா நீக்கம் கிரிக்கெட் ரசிகர்களிடையே கொந்தளிப்பை உருவாக்கியுள்ளது. சமூகவலைத்தளங்களில் கோலியின் முடிவுகளுக்கு எதிராகப் பலரும் தங்கள் கருத்துகளைத் தெரிவித்துள்ளார்கள். கிரிக்கெட் நிபுணர்களுக்கும் கோலியின் விந்தையான இந்த முடிவுகள் வியப்பை அளித்துள்ளன.
வெளிநாடுகளில் இவர்கள் (ஜூன் 2014 முதல்)
ஷமி - பெளலிங் சராசரி - 32.48, 1 முறை 5 விக்கெட்டுகள் எடுத்துள்ளார்.
இஷாந்த் சர்மா - பெளலிங் சராசரி - 31.90, 2 முறை 5 விக்கெட்டுகள் எடுத்துள்ளார்.
உமேஷ் யாதவ் - பெளலிங் சராசரி - 43.51, ஒருமுறை கூட 5 விக்கெட்டுகள் எடுத்ததில்லை.
புவனேஸ்வர் குமார் - பெளலிங் சராசரி - 26.65, 3 முறை 5 விக்கெட்டுகள் எடுத்துள்ளார்.
இந்த நான்கு பேரில் சிறப்பான பந்துவீச்சு, புவனேஸ்வர் குமாருடையது. ஆனால் வெளிநாடுகளில் இவர்களில் யார் அதிக போட்டிகளில் விளையாடியுள்ளார்கள்?
ஷமி - 15 டெஸ்டுகள்
இஷாந்த் சர்மா - 15 டெஸ்டுகள்
உமேஷ் யாதவ் - 11 டெஸ்டுகள்
புவனேஸ்வர் குமார் - 9 டெஸ்டுகள்
வெளிநாடுகளில் புவனேஸ்வர் குமார் சிறப்பாகவே பந்துவீசியுள்ளார். எனினும் அவரை விடவும் ஷமி, இஷாந்த் சர்மா, உமேஷ் யாதவ் ஆகியோர் அதிக டெஸ்டுகளில் விளையாடியுள்ளார்கள் என்பது மேலும் ஆச்சர்யமளிக்கிறது.
தன் திறமையைத் தொடர்ந்து நிரூபித்து வரும் புவனேஸ்வர் குமாருக்கு ஏன் குறைவான வாய்ப்புகள் தரப்படுகின்றன? கோலி தான் பதில் சொல்லவேண்டும்.