கடைசியாக 2011-ம் ஆண்டு விம்பிள்டன் காலிறுதிக்குத் தகுதி பெற்றார் ரஃபேல் நடால். அந்த வருடம் இறுதிச்சுற்று வரை முன்னேறிய நடால், ஜோகோவிச்சிடம் தோல்வியடைந்து 2-ம் இடம் பெற்றார்.
7 வருடங்கள் கழித்து மீண்டும் விம்பிள்டன் காலிறுதி ஆட்டத்தில் அவர் விளையாடவுள்ளார்.
செக் குடியரசைச் சேர்ந்த ஜிரி வெஸ்லியை 6-3, 6-3, 6-4 என்ற நேர் செட்களில் வீழ்த்தி காலிறுதிக்கு நுழைந்துள்ளார் நடால்.
2012-ல் இரண்டாவது சுற்றிலும் அடுத்த ஆண்டு முதல் சுற்றிலும் தோல்வியடைந்து வெளியேறினார் நடால். 2014-ல் காலிறுதிக்கு முந்தைய சுற்றுவரை முன்னேறினார். 2015-ல் மீண்டும் இரண்டாவது சுற்றில் தோற்றுப்போனார். அடுத்த ஆண்டு காயம் காரணமாகப் போட்டியிலேயே பங்கேற்கவில்லை. கடந்த வருடமும் காலிறுதிக்கு முந்தைய சுற்றில் தோல்வியடைந்து வெளியேறினார். இந்நிலையில் 2011-க்குப் பிறகு இந்த ஆண்டுதான் காலிறுதிக்குத் தகுதி பெற்றுள்ளார். இதன்மூலம் கிராண்ட்ஸ்லாம் போட்டிகளில் 35-வது முறையாகக் காலிறுதிக்குத் தகுதியடைந்துள்ளார் நடால். கிராண்ட்ஸ்லாம் காலிறுதிகளில் நடாலின் வெற்றி விகிதம் 79%. இதனால் அவர் அரையிறுதிக்குத் தகுதி பெறுவார் என்கிற எதிர்பார்ப்பு ஏற்பட்டுள்ளது.
நடால், இருமுறை விம்பிள்டன் போட்டியை வென்றுள்ளார். இந்த ஆண்டு இதுவரை அவர் ஒரு செட்டைக் கூட இழக்காமல் வெற்றி பவனி வந்துகொண்டிருக்கிறார்.