ஐசிசி ஒருநாள் தரவரிசையில் நடப்பு உலக சாம்பியனான ஆஸ்திரேலியா, 34 வருடத்தில் இல்லாத பெரும் சரிவை தற்போது சந்தித்துள்ளது.
இங்கிலாந்து சுற்றுப்பயணம் செய்துள்ள ஆஸ்திரேலிய கிரிக்கெட் அணி 5 போட்டிகள் கொண்ட ஒருநாள் தொடரில் பங்கேற்று விளையாடி வருகிறது. இதில் நடைபெற்ற முதல் இரண்டு போட்டிகளிலும் இங்கிலாந்து வெற்றிபெற்று 2-0 என்ற கணக்கில் இந்த தொடரில் முன்னிலை வகிக்கிறது.
இந்நிலையில், ஐசிசி ஒருநாள் தரவரிசையில் கடந்த 34 ஆண்டுகளில் இல்லாத பெரும் சரிவை ஆஸ்திரேலிய அணி கண்டுள்ளது. திங்கள்கிழமை வெளியிடப்பட்ட ஐசிசி ஒருநாள் அணிகளுக்கான தரவரிசையில் 6-ஆம் இடத்துக்கு சரிந்தது. முன்னதாக, 1984-ஆம் ஆண்டு கடைசியாக 6-ஆவது இடத்தில் ஆஸ்திரேலிய அணி இருந்தது குறிப்பிடத்தக்கது.
நடப்பு உலக சாம்பியனாக உள்ள ஆஸ்திரேலியா, கடந்த 2 ஆண்டுகளுக்கு முன்பாக தென் ஆப்பிரிக்காவுக்கு எதிரான ஒருநாள் தொடரை 5-0 என கைப்பற்றி முதலிடத்தில் இருந்தது. பின்னர் நடைபெற்ற 15 ஒருநாள் போட்டிகளில் 13-ல் தோல்வியைத் தழுவியுள்ளது.
அதிலும் குறிப்பாக நியூஸிலாந்து, இந்தியா மற்றும் இங்கிலாந்து உள்ளிட்ட அணிகளுடனான தொடர்களை இழந்தது. மேலும் சாம்பியன்ஸ் டிராஃபியிலும் முதல் சுற்றிலேயே வெளியேறியது.
5 முறை உலக சாம்பியனாக உள்ள ஆஸ்திரேலிய அணிக்கு ஏற்பட்டுள்ள இந்த பெரும் பின்னடைவு அந்த அணியின் ரசிகர்களை பெரும் சோகத்தில் ஆழ்த்தியுள்ளது.
ஐசிசி ஒருநாள் தரவரிசை பின்வருமாறு:
அணி | தரவரிசை | புள்ளிகள் |
இங்கிலாந்து | 1 | 124 |
இந்தியா | 2 | 122 |
தென் ஆப்பிரிக்கா | 3 | 113 |
நியூஸிலாந்து | 4 | 112 |
பாகிஸ்தான் | 5 | 102 |
ஆஸ்திரேலியா | 6 | 102 |
வங்கதேசம் | 7 | 93 |
இலங்கை | 8 | 77 |
மேற்கிந்திய தீவுகள் | 9 | 69 |
ஆப்கானிஸ்தான் | 10 | 63 |