வரும் 2019-20 இந்தியன் கால்பந்து லீக் (ஐ-லீக்) சீசனில் அணிகளில் இடம் பெறும் வெளிநாட்டு வீரர்கள் எண்ணிக்கையை 6-இல் இருந்து 5 ஆக குறைக்க இந்திய கால்பந்து சம்மேளனம் (ஏஐஎஃப்எஃப்) லீக் கமிட்டி திட்டமிட்டுள்ளது.
லீக் கமிட்டிக் கூட்டம் புதன்கிழமை தில்லியில் சம்மேளன மூத்த துணைத் தலைவர் சுப்ரதா தத்தா தலைமையில் நடைபெற்றது.
ஐ-லீக் போட்டிகளில் இடம் பெற்றுள்ள அணிகளில் ஒரு ஆசிய வீரர் உள்பட 6 வெளிநாட்டு வீரர்கள் பங்கேற்க அனுமதிக்கப்பட்டுள்ளது. இந்நிலையில் ஆசிய வீரர் இருக்க வேண்டும் என்னும் விதி நீக்கப்பட்டுள்ளது. அதே நேரத்தில் 5 வெளிநாட்டு வீரர்களை அணிகள் வைத்துக் கொள்ளலாம்.
2018-19 சீசனுக்கு மட்டும் ஆசிய வீரர் இல்லாமலேயே 6 வெளிநாட்டு வீரர்களை அணிகள் ஒப்பந்தம் செய்யலாம். மேலும் கூட்டத்தில் ஐ லீக், ஏஐஎஃப்எஃப் யூத் லீக், 2-ஆம் டிவிஷன் லீக் போட்டிகள் குறித்தும் ஆலோசிக்கப்பட்டன. ஐ லீக் போட்டிகளுக்கு முன்பு அந்த அணிகளுக்கு தேவையான அடிப்படை வசதிகளை செய்யவும் முடிவு செய்யப்பட்டது. ஆசியக்கோப்பை சாம்பியன் போட்டிகள் நடக்கும் போதும், ஐ லீக் போட்டிகள் நடக்கும். ஆனால் இந்திய அணி விளையாடும் தேதிகளில் ஐ லீக் போட்டிகள் நடக்காது. ஐ லீக் அணிகள் பங்கேற்புக்காக ரூ.45 லட்சம் மானியம் வழங்கப்படும்.
13, 15 வயது பிரிவுகளிலும் லீக் போட்டிகள் நடத்தப்படும். யூத் லீக் போட்டிகளில் ஓரே உரிமையாளர் பல அணிகளை வைத்துக் கொள்ள அனுமதிப்பதில்லை எனவும் தீர்மானிக்கப்பட்டது.