சண்டிமாலுக்கு அனுமதி இல்லை

மேற்கிந்தியத் தீவுகளுக்கு எதிரான டெஸ்ட் கிரிக்கெட்டில் பந்தை சேதப்படுத்த முயன்றதாக குற்றம்சாட்டப்பட்டுள்ள இலங்கை கேப்டன் தினேஷ் சண்டிமாலின் மேல்முறையீட்டை ஐசிசி நிராகரித்துள்ளது. இதனால், மேற்கிந்தியத் தீவுகளுக்கு எதிரான 3-ஆவது டெஸ்ட் போட்டியில் அவர் விளையாட மாட்டார்.
 முன்னதாக, மேற்கிந்தியத் தீவுகளில் நடைபெற்று வரும் டெஸ்ட் தொடரில், 2-ஆவது போட்டியின்போது சண்டிமால் பந்தின் தன்மையை மாற்ற முயன்றதாக குற்றச்சாட்டு எழுந்தது. இதையடுத்து ஐசிசி போட்டி நடுவர் ஜவகல் ஸ்ரீநாத், ஒரு டெஸ்ட் போட்டியில் விளையாட சண்டிமாலுக்கு தடை விதித்து உத்தரவிட்டார்.
 அதற்கு எதிராக சண்டிமால் மேல் முறையீடு செய்திருந்த நிலையில், அதை நீதித்துறை ஆணையர் மைக்கெல் பெலாஃப் நிராகரித்தார். இதையடுத்து, மேற்கிந்தியத் தீவுகளுக்கு எதிரான 3-ஆவது டெஸ்ட் போட்டியிலிருந்து சண்டிமால் விலக்கப்பட்டுள்ளார்.