சென்னை சூப்பர் கிங்ஸ் அணியை ரசிகர்கள் எந்தளவுக்கு விரும்புகிறார்கள் என்பதற்கு இது ஒரு சாட்சி
சென்னைக்கு வந்திறங்கியுள்ள சென்னை சூப்பர் கிங்ஸ் அணி வீரர்கள், சேப்பாக்கம் மைதானத்தில் தினமும் பயிற்சியில் ஈடுபட்டு வருகிறார்கள். ரசிகர்கள் இதைக் காண அனுமதியளிக்கப்பட்டுள்ளது. இதனால் தோனி மற்றும் சிஎஸ்கே வீரர்கள் வலைப்பயிற்சியில் ஈடுபடுவதைக் காண சேப்பாக்கம் மைதானத்தில் ஆயிரக்கணக்கில் ரசிகர்கள் குவிந்துள்ளார்கள்.
சென்னை சூப்பர் கிங்ஸ் அணி நிர்வாகம் இது தொடர்பாக சமூகவலைத்தளத்தில் காணொளி ஒன்று வெளியிட்டுள்ளது. அதில் மைதானத்தில் ஆயிரக்கணக்கான ரசிகர்கள் முன்னிலையில் சென்னை சூப்பர் கிங்ஸ் அணி வீரர்கள் பயிற்சியில் ஈடுபடும் காட்சி வெளியாகியுள்ளது. நேற்று எப்படியும் பத்தாயிரம் ரசிகர்கள் குவிந்திருக்க வாய்ப்புள்ளதாகக் கூறப்படுகிறது. தோனி பேட்டிங் செய்யும்போதும் பந்துவீச்சில் ஈடுபடும்போதும் ரசிகர்கள் கரகோஷம் மிக அதிகமாக இருந்தது. இரண்டு வருடங்களுக்குப் பிறகு ஐபிஎல் போட்டியில் சென்னை சூப்பர் கிங்ஸ் அணி பங்குபெறுவதால் சென்னை ரசிகர்கள் சிஎஸ்கே போட்டிகளையும் வீரர்களையும் நேரில் காண மிகவும் ஆவலாக உள்ளார்கள்.
ராஜஸ்தானைச் சேர்ந்த தீபக் சஹர், சிஎஸ்கே இணையத்தளத்துக்கு அளித்த பேட்டியில், மிகப்பெரிய ரசிகர்களின் கூட்டம் பயிற்சியைக் காணவே வந்துள்ளது. எனவே பயிற்சியில் ஈடுபடுவதே நிஜமான ஆட்டத்தில் விளையாடுவதுபோல உள்ளது. ரசிகர்களின் ஆர்வம் நம்பமுடியாததாக உள்ளது என்று தன் ஆச்சர்யத்தை வெளிப்படுத்தியுள்ளார்.
