முடங்கிக் கிடக்கும் திட்டங்களை விரைந்து செயல்படுத்த வேண்டும்

தமிழகத்தில் முடங்கிக் கிடக்கும் வளர்ச்சித் திட்டங்களை விரைந்து செயல்படுத்த அரசு நடவடிக்கை எடுக்க வேண்டும் என பாமக இளைஞரணித் தலைவர் அன்புமணி ராமதாஸ் வலியுறுத்தியுள்ளார்.
இதுதொடர்பாக அவர் சனிக்கிழமை வெளியிட்ட அறிக்கை: தமிழகத்தை இந்தியாவின் முதன்மை மாநிலமாக மாற்றப் போவதாக வாக்குறுதி அளித்து 2011 -ஆம் ஆண்டு தமிழகத்தின் ஆட்சிப் பொறுப்பேற்ற மறைந்த முதல்வர் ஜெயலலிதா, தமிழ்நாடு தொலைநோக்கு - 2023 என்ற பெயரில் திட்டத்தை 2012 -ஆம் ஆண்டு மார்ச் மாதம் வெளியிட்டார். அதன்பின் 5 ஆண்டுகளாகியும் இந்தத் திட்டத்தில் எந்த முன்னேற்றமும் ஏற்படவில்லை.
இந்தத் திட்டத்தின்கீழ் செயல்படுத்தப்பட வேண்டிய 10 முன்னணித் திட்டங்கள் எந்த முன்னேற்றமும் இன்றி முடங்கிக் கிடப்பதை நாளிதழ் ஒன்று தற்போது சுட்டிக்காட்டியுள்ளது.
தமிழகத்தின் முன்னேற்றத்திற்கான 8 திட்டங்கள் இன்னும் தொடங்கப்படாமல் கிடப்பில் போடப்பட்டுள்ளன. அடுத்த சில ஆண்டுகளில் இத்திட்டங்களை தொடங்குவதற்கான அறிகுறியே இல்லை என்பதை அதிகாரிகளே ஒப்புக்கொள்கின்றனர். இதேநிலை தொடர்ந்தால் இந்தியாவின் கடைசி மாநிலம் என்ற அவப்பெயரை தமிழகம் பெறப்போவது உறுதி என அன்புமணி தெரிவித்துள்ளார்.