சென்னை: அதிமுகவின் அடுத்த பொதுச் செயலர் யார் என்பதை இதுவரை முடிவு செய்யவில்லை என்று தேர்தல் ஆணையம் விளக்கம் அளித்துள்ளது.
தகவல் அறியும் உரிமைச் சட்டத்தின் கீழ் சுவாமிநாதன் கல்யாண சுந்தரம் என்பவர் எழுப்பிய கேள்விக்கு தேர்தல் ஆணையம் பதில் அளித்துள்ளது.
அதில், அதிமுக பொதுச் செயலர் யார் என்பது பற்றி இதுவரை முடிவெடுக்கவில்லை. அதிமுகவில் உட்கட்சி பிரச்னை தொடர்ந்து நிலுவையில் இருப்பதால், அதிமுக பொதுச் செயலர் பற்றி இதுவரை தீர்மானிக்கவில்லை என்று தேர்தல் ஆணையம் விளக்கம் அளித்துள்ளது.
அதிமுகவின் பொதுச் செயலராக மறைந்த முதல்வர் ஜெயலலிதாவின் தோழி சசிகலா தேர்வு செய்யப்பட்டார். அதன்பிறகு முதல்வராக இருந்த ஓ. பன்னீர்செல்வம் பதவியை ராஜினாமா செய்தார். தமிழக முதல்வராக சசிகலா பதவியேற்க இருந்த நிலையில், பன்னீர்செல்வம் கட்சியில் இருந்து வெளியேறி, தன்னை மிரட்டியே முதல்வர் பதவியை ராஜினாமா செய்ய வைத்ததாக பகிரங்கமாக பேட்டியளித்தார்.
இதனால், அதிமுக இரண்டாக உடைந்தது. இரு அணிகளும் அதிமுகவின் கட்சியும் சின்னமும் தங்களுக்கே சொந்தம் என்று மனு கொடுத்தனர். இதனால், ஆர்.கே. நகர் இடைத் தேர்தலில் அதிமுக பெயரையும் கட்சி சின்னமும் முடக்கப்பட்டது குறிப்பிடத்தக்கது.