நெல்லை, கோவையில் இருந்து சென்னைக்கு இன்று சிறப்பு ரயில்கள்

விநாயகர் சதுர்த்தியை முன்னிட்டு தொடர் விடுமுறை காரணமாக திருநெல்வேலி, கோவையில் இருந்து சென்னைக்கு வியாழக்கிழமை சிறப்பு ரயில்கள் இயக்கப்படவுள்ளதாக தெற்கு ரயில்வே அறிவித்துள்ளது.
இதுகுறித்து புதன்கிழமை வெளியிட்ட செய்திக் குறிப்பு:
நெல்லை -சென்னை எழும்பூர் சிறப்புக் கட்டண ரயில்
ரயில் எண் 06020: திருநெல்வேலியில் இருந்து வியாழக்கிழமை (ஆக.24) மாலை 4 மணிக்கு புறப்பட்டு மறுநாள் காலை 4 மணிக்கு சென்னை எழும்பூர் வந்தடையும்.
இந்த ரயில் கோவில்பட்டி, விருதுநகர், மதுரை, திண்டுக்கல், திருச்சி, விருத்தாசலம், விழுப்புரம், செங்கல்பட்டு, தாம்பரம் ரயில் நிலையங்களில் நின்று செல்லும்.
கோவை - சென்னை சென்ட்ரல் சிறப்புக் கட்டண ரயில்
ரயில் எண் 06024: கோவையில் இருந்து வியாழக்கிழமை (ஆக.24) இரவு 11.30 மணிக்குப் புறப்பட்டு மறுநாள் காலை 7.40 மணிக்கு சென்னை சென்ட்ரல் வந்தடையும்.
இந்த ரயில் திருப்பூர், ஈரோடு, சேலம், ஜோலார்பேட்டை, காட்பாடி, அரக்கோணம், பெரம்பூர் ரயில் நிலையங்களில் நின்று செல்லும்.