திண்டுக்கல் அருகே வியாழக்கிழமை கார் கவிழ்ந்ததில் , டிடிவி தினகரன் ஆதரவாளர் புகழேந்தி காயமடைந்தார்.
திண்டுக்கல் மாவட்டம் ஒட்டன்சத்திரத்தில் டிடிவி தினகரன் ஆதரவாளர் இல்லத் திருமண விழா வியாழக்கிழமை நடைபெற்றது. அந்த நிகழ்ச்சியில் பங்கேற்பதற்காக புகழேந்தி, பெங்களூரிலிருந்து கார் மூலம் ஒட்டன்சத்திரத்திற்கு வந்து கொண்டிருந்தார். பெங்களூருவைச் சேர்ந்த மேத்யூ என்பவர் காரை ஓட்டியுள்ளார்.
திண்டுக்கல் அஞ்சலி ரவுண்டானா பகுதியில் உள்ள 4 வழிச்சாலை மேம்பாலத்தில் செல்லும்போது ஓட்டுநரின் கட்டுப்பாட்டை இழந்த கார், கவிழ்ந்து விபத்துக்குள்ளானது. இதில் காயமடைந்த புகழேந்தி, சிகிச்சைக்காக திண்டுக்கல் தனியார் மருத்துவமனையில் அனுமதிக்கப்பட்டு, பின்னர் கோவை மருத்துவமனைக்கு கொண்டு செல்லப்பட்டார். விபத்து குறித்து தாடிக்கொம்பு போலீசார் வழக்குப் பதிவு செய்து விசாரித்து வருகின்றனர்.