சசிகலாவுக்கு தலைவர்கள் வாழ்த்து

அதிமுக சட்டப் பேரவைக் குழுத் தலைவராகத் தேர்வு செய்யப்பட்டு, முதல்வராக வி.கே.சசிகலா பொறுப்பேற்க உள்ளதையடுத்து, அவருக்கு பல்வேறு அரசியல் கட்சித் தலைவர்கள் வாழ்த்துகளைத் தெரிவித்துள்ளனர்.
மார்க்சிஸ்ட் மாநிலச் செயலாளர் ஜி.ராமகிருஷ்ணன்: வி.கே.சசிகலாவுக்கு வாழ்த்துகள். இந்த மாற்றம் குறித்து மக்கள் மத்தியில் உள்ள கருத்துகளையும் கணக்கில் எடுத்துக்கொண்டு அவர் செயல்படுவார் என நம்புகிறேன்.
அகில இந்திய தேசிய லீக் கட்சி மாநிலத் தலைவர் எஸ்.ஜே. இனாயத்துல்லாஹ்: மகிழ்ச்சி அளிக்கிறது. மறைந்த முதல்வர் ஜெயலலிதாவின் வழியில் விரைவில் முதல்வராக சசிகலா பொறுப்பேற்று தமிழகத்தை வழிநடத்த வேண்டும்.
தமிழர் தேசிய முன்னணி தலைவர் பழ.நெடுமாறன்: சசிகலாவுக்கு வாழ்த்துகள். மறைந்த முதல்வர் ஜெயலலிதா இலங்கைத் தமிழர் பிரச்னைக்கு சட்டப் பேரவையில் நிறைவேற்றிய தீர்மானத்தை சசிகலாவும் செயல்படுத்துவார் என நம்புகிறேன். மறைந்த முதல்வரின் காலத்தில் 500 மதுக்கடைகள் மூடப்பட்டன. இவரும் அதைப் பின்பற்றி எஞ்சிய மதுக்கடைகளையும் மூடவேண்டும். 7 பேர் விடுதலை உள்பட 15 ஆண்டுகளுக்கு மேல் சிறையில் இருப்பவர்கள் அனைவரையும் விடுவிக்க வேண்டும்.