கன்னியாகுமரி அருள்மிகு பகவதியம்மன் கோயிலில் வரும் 29ஆம் தேதி வைகாசி விசாக 10 நாள் திருவிழா தொடங்குகிறது.
முதல்நாள் திருவிழாவையொட்டி அதிகாலை 5 மணிக்கு சிறப்பு அபிஷேகம், காலை 9 மணிக்கு திருக்கொடியேற்றம், 10 மணிக்கு சிறப்பு அபிஷேகம், நண்பகல் 12 மணிக்கு அன்னதானம், மாலை 6 மணிக்கு சமய உரை, இரவு 7 மணிக்கு பக்தி இன்னிசை, இரவு 9 மணிக்கு தேவி பூப்பந்தல் வாகனத்தில் வீதியுலா ஆகியன நடைபெறும்.
விழா நாள்களில் சிறப்பு அபிஷேகம், சமய உரை, அன்னதானம், கலை நிகழ்ச்சிகள், அம்மன் வீதியுலா வருதல் ஆகியன நடைபெறும். 5ஆம் நாள் திருவிழாவான ஜூன் 2ஆம் தேதி இரவு 7 மணிக்கு புஷ்பாபிஷேகம் நடைபெறும்.
தேரோட்டம்:9ஆம் நாள் திருவிழாவான ஜூன் 6ஆம் தேதி அதிகாலை 4 மணிக்கு கோயில் நடைதிறக்கப்பட்டு சிறப்பு அபிஷேகம், காலை 7.30 மணிக்கு மேல் 8.30 மணிக்கு திருத்தேர் வடம் தொட்டு தேரோட்டம் நடைபெறுகிறது. தொடர்ந்து அன்னதானம், மாலை 6 மணிக்கு சமய உரை தொடர்ந்து மண்டகப்படி, இரவு 9 மணிக்கு வெள்ளிக் கலைமான் வாகனத்தில் வீதியுலா வருதல் ஆகியன நடைபெறும்.
தெப்பத் திருவிழா:10ஆம் நாள் திருவிழாவான ஜூன் 7ஆம் தேதி காலை 6.30 மணிக்கு அம்மன் ஆராட்டுக்கு எழுந்தருளல், பிற்பகல் 12 மணிக்கு அன்னதானம், மாலை 5 மணிக்கு மண்டகப்படி, மாலை 6 மணிக்கு ஆன்மிக உரை, இரவு 8 மணிக்கு நர்த்தன பூஜை, இரவு 9 மணிக்கு அம்மன் தெப்பத்துக்கு எழுந்தருளி தெப்பத் திருவிழா நடைபெறுகிறது.
ஏற்பாடுகளை தேவசம் போர்டு இணை ஆணையர் பா. பாரதி, நாகர்கோவில் தேவசம் தொகுதி கண்காணிப்பாளர் வி.என். சிவகுமார், பகவதியம்மன் கோயில் மேலாளர் பி. ஆறுமுகதரன் உள்ளிட்டோர் செய்து வருகின்றனர்.