சென்னையில் வீட்டு உபயோகத்துக்கான மானியம் அல்லாத சமையல் எரிவாயு உருளை விலை ரூ.47.50 அதிகரிக்கப்பட்டுள்ளது.
மானியம் அல்லாத சமையல் எரிவாயு உருளை விலை கடந்த சனிக்கிழமை (செப்.30) ரூ.609-ஆக இருந்தது; இதன் விலை ஞாயிற்றுக்கிழமை (அக்.1) முதல் ரூ.656.50-ஆக உயர்த்தப்பட்டுள்ளது. அதாவது, ஒரே நாளில் ரூ.47.50 அதிகரிக்கப்பட்டுள்ளது. எனவே ஞாயிற்றுக்கிழமை (அக்.1) முதல் பதிவு செய்தோருக்கு ரூ.656.50-க்கு சமையல் எரிவாயு உருளை விநியோகம் செய்யப்படும் என்று அதிகாரிகள் தெரிவித்தனர்.
வங்கிக் கணக்கில் எவ்வளவு? மானியத்துடன் கூடிய சமையல் எரிவாயு உருளையின் விலை ரூ.476.78-லிருந்து ரூ.479.11-ஆக திங்கள்கிழமை (அக்.1) முதல் அதிகரிக்கப்பட்டுள்ளது; அதாவது ரூ.2.33 அதிகரிக்கப்பட்டுள்ளது. வீட்டு சமையல் எரிவாயு உருளையை ஞாயிற்றுக்கிழமை (அக்.1) முதல் பதிவு செய்து, மானியம் அல்லாத சமையல் எரிவாயு உருளையைப் பெறும் நுகர்வோரின் வங்கிக் கணக்கில் ரூ.177.39 செலுத்தப்படும் என்று அதிகாரிகள் தெரிவித்தனர்.