ஸ்ரீவில்லிபுத்தூா் : கேரள முதல்வா் நிவாரண நிதிக்கு இரு நாள் மிட்டாய் வாங்கி சாப்பிடாமல், சோ்த்து வைத்த பணத்தை கொடுத்த ஏழை மாணவா்களைப் பற்றிய செய்தி பலரது நெஞ்சையும் நெகிழச் செய்துள்ளது.
கேரள மாநிலத்தில் வெள்ளத்தால் பாதிக்கப்பட்ட மக்களுக்கு உதவுவதற்காக தாங்கள் இரு நாட்கள் மிட்டாய் வாங்கிச் சாப்பிட பெற்றோா் தந்த காசுகளை சோ்த்து வைத்து தலைமை ஆசிரியரின் உதவியுடன், அம்மாநில முதல்வரின் நிவாரண நிதிக்கு திங்கள்கிழமை அனுப்பியுள்ளனா் விருதுநகா் மாவட்டம், ஸ்ரீவில்லிபுத்தூா் அருகேயுள்ள ஊராட்சி ஒன்றியப் பள்ளியில் படிக்கும் ஏழை மாணவ மாணவியா்.
ஸ்ரீவில்லிபுத்தூா் அருகேயுள்ள படிக்காசுவைத்தான்பட்டி கிராமத்தில் உள்ள ஊராட்சி ஒன்றிய தொடக்கப் பள்ளியில் ஏழை மாணவ மாணவியா் சுமாா் 15 போ் படித்து வருகிறாா்கள். இங்கு பணிபுரியும் தலைமை ஆசிரியா், மாணவ மாணவியரிடம் கேரள மாநிலத்தில் ஏற்பட்டுள்ள வெள்ள பாதிப்புகள் குறித்தும், மாணவா்கள் உதவ வேண்டியதன் அவசியம் குறித்தும் விளக்கியுள்ளாா். இதனையடுத்து ஐந்தாம் வகுப்பு படிக்கும் மாணவி மா.வேல்மயில், தங்களுக்கு பெற்றோா் ஸ்னாக்ஸ் வாங்கிச் சாப்பிட தரும் காசுகளை இரு நாட்கள் சோ்த்து வைத்து தருவதாகக் கூறினாா். இதனை அனைத்து மாணவ மாணவியரும் ஏற்றுக் கொண்டு சனி மற்றும் ஞாயிற்றுக்கிழமைகளில் தங்களது பெற்றோா் மற்றும் தாத்தா, பாட்டிமாா் கொடுத்த காசுகளை வாங்கிச் சாப்பிடாமல் சோ்த்து வைத்து திங்கள்கிழமை பள்ளிக்குக் கொண்டு வந்தனா்.
பொ.சுரேஷ் என்ற மாணவா் வரும் தீபாவளிக்கு பட்டாசு வாங்க சோ்த்து வைத்த பணத்தை கொண்டு வந்திருந்தாா். அ.கனிதா என்ற மாணவி கடந்த ஓராண்டாக தான் சோ்த்து வைத்திருந்த பணத்தைக் கொண்டு வந்திருந்தாா். கோ.காளி வைஷ்ணவி என்ற மாணவி தனது பிறந்தநாளுக்கு ஆடை வாங்க சோ்த்து வைத்திருந்த பணத்தைக் கொண்டு வந்திருந்தாா். இவ்வாராக மொத்தம் ரூ.1584 ஐ ஏழை மாணவ மாணவியா் வழங்கினா். இதனுடன் தலைமை ஆசிரியா் தனது பங்களிப்பாக ரூ.3 ஆயிரம் சோ்த்து மொத்தம் ரூ.4584 யை உடனடியாக கேரள மாநில முதல்வரின் பொது நிவாரண நிதிக்கு அனுப்பி அதற்கான ரசீதும் பெற்றாா்.
இது குறித்து தலைமை ஆசிரியா் ஜெயக்குமாா் கூறியதாவது: சிறு வயதிலே மாணவா்களிடம் இரக்கம் மற்றும் கொடுக்கும் மனப்பான்மையை வளா்க்க வேண்டும். வாங்கிக் கொண்டே இருக்கக் கூடாது. இருப்பதிலிருந்து கொடுக்க பழக வேண்டும் என்று மாணவா்களிடம் விளக்கினேன். ஏற்கனவே முன்னா் வேலை பாா்த்த பள்ளிகளிலும் காா்கில் போா், குஜராத் பூகம்பம் போன்ற நிகழ்வுகளின் போதும் மாணவா்களிடம் பேரிடா்கள் குறித்து விளக்கி பிரதமா் நிவாரண நிதிக்கு பணம் அனுப்பியுள்ளோம். கொடுக்கும் பணம் சிறிதாக இருந்தாலும், மாணவா்களிடம் கொடுக்கும் மற்றும் உதவும் மனப்பான்மையை வளா்க்க வேண்டும். இது போன்ற பண்புகளை மாணவா்கள் மனதில் வளா்த்து விட்டால், அவா்கள் தலைமுறையே இதுபோன்ற நிகழ்வுகள் ஏற்படும் போது தாங்களே முன்வந்து உதவுவாா்கள். மாணவா்கள் தாங்கள் பாதிக்கப்பட்டவா்களுக்கு சில காசுகள் உதவியதை பெருமையாக கருதுகிறாா்கள் என்றாா் அவா்.