அரிவாள் கத்தி துப்பாக்கி
அகிலம் அழிக்கும் அணுகுண்டு
எரியைக் கக்கும் பீரங்கி
இன்னும் பலவாய் ஆயுதங்கள்
கரியாய் இந்த ஞாலத்தைக்
கணத்துள் அழிக்கும் என்றறிந்தும்
பெரிதாய் இதனைப் போற்றுதலும்
பெருமைக்குரிய செயலாமோ?
வாதம் தன்னில் கடுஞ்சொல்லும்
வளர்த்தும் நாட்டில் வன்முறையை
சேதம் செய்யும் ஆயுதமாய்ச்
சில தீச்சொற்கள் ஆகிடுமே!
பூதமாகும் பொய்யுரையும்
புவியை அழிக்கும் ஆயுதமாம்
பேதம் சொல்லில் வந்துவிட்டால்
பேராபத்தின் ஆயுதம்தான்!
அன்பு, கருணை, அகிம்சைதான்
அகிலம் காக்கும் ஆயுதங்கள்!
துன்பம் செய்ய எண்ணாத
தூய மனித நேயம்தான்
இன்பம் நிறைந்த அமைதியினை
என்றும் உலகில் நிலைப்படுத்தும்!
மன்பதையின் அமைதிக்காய்
மாய்ப்போம் போரின் ஆயுதங்கள்!