வட கொரியா மீது ஐ.நா. கடுமையான பொருளாதாரத் தடைகள் விதித்துள்ள நிலையில், அந்நாட்டுக்கு ரகசிய இணையதள வசதியை ரஷியா அளித்து வருவது தெரிய வந்துள்ளது.
ஏற்கெனவே ஓர் இணையதள இணைப்பை வட கொரியாவுக்கு சீன நிறுவனமான யூனிகாம் வழங்கியுள்ளது. கடந்த 2010-ஆம் ஆண்டு முதல் அது செயல்பட்டு வருகிறது. அதன் வழியாக மட்டுமே இணையதள உலகுடன் வட கொரியா தொடர்பு கொண்டுள்ளது. ஐ.நா.வின் கடுமையான புதிய பொருளாதாரத் தடைகள் அண்மையில் விதிக்கப்பட்ட நிலையில், தற்போது ரஷியாவும் ஓர் இணையதள இணைப்பை வட கொரியாவுக்கு வழங்கியிருப்பதாக சர்வதேச இணைய கண்காணிப்பு அமைப்பு தெரிவித்திருக்கிறது.
மிகக் குறுகிய அளவு இணையதள வசதி உள்ளபோதிலும் வட கொரியாவில் உள்ள சுமார் 6,800 'இணைய வீரர்கள்' உலகம் முழுவதுமுள்ள இணையதள வசதிகளை ஊடுருவித் தாக்கி வருகின்றனர் என்ற குற்றச்சாட்டு உள்ளது.