சான் பிரான்சிஸ்கோ: இளைஞர்களின் மனம் கவர்ந்த 'டிக் டாக்' இசைச் செயலிக்கு போட்டியாக புதிய செயலியை பேஸ்புக் களமிறக்க உள்ளதாக தகவல் வெளியாகியுள்ளது.
இளைஞர்கள் தங்கள் மனம் கவர்ந்த பாடல்களுக்கு நடனம் ஆடவும் அல்லது பிடித்த பாடல்களுக்கு வாயசைத்து பதிவு செய்து ஒளிபரப்பவும் சில இசைச் செயலிகள் உள்ளன.அவற்றில் 'ம்யூசிக்கலி' என்னும் செயலி புகழ் பெற்ற ஒன்றாகும். சமீபத்தில் அந்த செயலியை மற்றொரு இசைச் செயலியான 'டிக் டாக்' விலை கொடுத்து வாங்கி விட்டது. எனவே அந்த செயலிதான் தற்போது இளைஞர்களின் மனம் கவர்ந்த ஒன்றாக விளங்கி வருகிறது.
இந்நிலையில் இளைஞர்களின் மனம் கவர்ந்த 'டிக் டாக்' இசைச் செயலிக்கு போட்டியாக புதிய செயலியை பேஸ்புக் களமிறக்க உள்ளதாக தகவல் வெளியாகியுள்ளது.
இதுதொடர்பாக 'டெக் க்ரஞ்ச்' என்னும் தொழில்நுட்ப இணையதளத்தில் பேஸ்புக் நிறுவன அதிகாரி ஒருவரின் கூற்றை மேற்கோள் காட்டி வெளியாகியுள்ள செய்தி பின்வருமாறு:
பேஸ்புக் அறிமுகப்படுத்த உள்ள செயலிக்கு 'லஸ்ஸோ' எனப் பெயரிட உள்ளதாகத் தெரிகிறது. இது அடிப்படையில் ம்யூசிக்கலி / டிக் டாக் போன்ற ஒன்றாகும். முழு திரையில் இளைஞர்களைக் கவரும் வகையில்,மகிழ்ச்சியூட்டும் அதேநேரத்தில் புதுமைச் சிந்தனைக்கும் இடம் கொடுக்கும் வகையில் வடிவமைக்கப்பட்டுள்ளது.
பிரபலமான பல்வேறு ஆடியோ மற்றும் பாடல்பதிவு நிறுவனங்களுடன் பேஸ்புக் நிறுவனம் ஒப்பந்தம் செய்துள்ளதால், டிக் டாக் செயலியில் உள்ள 15 நொடி பாடல்கள் என்ற எல்லையை விட லஸ்ஸோவில் பாடல்களில் கால அளவு அதிகமாக இருக்கும் என்று தெரிகிறது.
இவ்வாறு அந்த செய்தியில் தெரிவிக்கப்பட்டுள்ளது.
பேஸ்புக் தனது செயலியில் புதிதான சில இசை அம்சங்களை அறிமுகப்படுத்தி இருந்த வியாழன் அன்று இந்த தகவல் வெளியாகியுள்ளது என்பது குறிப்பிடத்தக்கது.