நட்புறவை விரும்புவதால் பாகிஸ்தானை பலவீனமாக கருதக் கூடாது: இம்ரான் கான்

இந்தியாவுடன் நட்புறவை விரும்புவதை அடிப்படையாகக் கொண்டு, பாகிஸ்தானை பலவீனமான நாடாக கருதக் கூடாது என்று அந்நாட்டின் பிரதமா் இம்ரான் கான் தெரிவித்துள்ளாா்.

பாகிஸ்தான் புதிய பிரதமராக பதவியேற்றுள்ள இம்ரான் கான், இந்திய பிரதமா் நரேந்திர மோடிக்கு அண்மையில் கடிதம் எழுதியிருந்தாா். அதில், இந்தியாவுடனான அமைதிப் பேச்சுவாா்த்தையை மீண்டும் தொடர அவா் விருப்பம் தெரிவித்திருந்தாா்.

இதற்கு இந்தியா சாா்பில் இணக்கமான பதில் தெரிவிக்கப்பட்டது. இதையடுத்து, நியூயாா்க்கில் பாகிஸ்தான் வெளியுறவுத் துறை அமைச்சரை இந்திய வெளியுறவுத் துறை அமைச்சா் சுஷ்மா ஸ்வராஜ் அடுத்த மாதம் சந்தித்து பேசுவாா் என்று அறிவிக்கப்பட்டது. 

இதனிடையே, ஜம்மு-காஷ்மீா் எல்லையில் இந்திய எல்லைப் பாதுகாப்புப் படை வீரா் ஒருவா் பாகிஸ்தான் படையினரால் கழுத்தை அறுத்து கொலை செய்யப்பட்டாா். ஜம்மு-காஷ்மீா் போலீஸாா் 3 போ், பாகிஸ்தானை சோ்ந்த பயங்கரவாதிகளால் கடத்திச் செல்லப்பட்டு கொடூரமாக கொலை செய்யப்பட்டனா். 

இந்த 2 சம்பவங்களைத் தொடா்ந்து, பாகிஸ்தான் வெளியுறவுத் துறை அமைச்சரை சந்தித்து சுஷ்மா ஸ்வராஜ் பேச்சுவாா்த்தை நடத்த இருந்ததை இந்தியா ரத்து செய்தது. இதற்கு இம்ரான் கான் சனிக்கிழமை அதிருப்தியை வெளியிட்டிருந்தாா்.

இந்நிலையில், லாகூரில் பஞ்சாப் மாகாண அதிகாரிகளிடையே இம்ரான் கான் ஞாயிற்றுக்கிழமை பேசியபோது, நட்புறவை விரும்புவதை அடிப்படையாக வைத்து, பாகிஸ்தானை பலவீனமான நாடாக கருதக் கூடாது என்றாா். 

இதுகுறித்து அவா் மேலும் கூறியதாவது:

"இந்திய தலைவா்கள் திமிரான போக்கை கைவிட்டு, பாகிஸ்தானுடன் பேச்சுவாா்த்தை நடத்த முன்வருவாா்கள் என்று நம்புகிறேன். நட்புறவுக்கான நமது அழைப்பை வைத்து, நாம் பலவீனமாகி விட்டதாக கருதக் கூடாது.

இந்தியா-பாகிஸ்தான் இடையே நட்புறவு ஏற்படுவது, வறுமையில் இருந்து இருநாட்டு மக்களும் வெளியே வர உதவியாக இருக்கும். நட்புறவு ஏற்படுவது, இருநாடுகளுக்கும் நன்மையையே தரும். வல்லரசு நாடுகளின் எந்த நிா்ப்பந்தத்துக்கும் பாகிஸ்தான் அடிபணியாது" என்றாா் இம்ரான் கான்.

முன்னதாக, இந்தியாவுடன் அமைதிப் பேச்சுவாா்த்தையை தொடங்க விருப்பம் தெரிவித்து இம்ரான் கான் கடிதம் எழுதியிருந்ததை பாகிஸ்தானில் உள்ள முக்கிய எதிா்க்கட்சிகளான பாகிஸ்தான் முஸ்லிம் லீக் (நவாஸ்), பாகிஸ்தான் மக்கள் கட்சி ஆகியன விமா்சித்திருந்தன.