Dinamani - கட்டுரைகள் - https://www.dinamani.com/religion/religion-articles/ https://www.dinamani.com/ RSS Feed from Dinamani en-us Copyright 2016 Dinamani. All rights reserved. 3324853 ஆன்மிகம் கட்டுரைகள் மோட்ச ஏகாதசி என்றால் என்ன? மாலதி சந்திரசேகரன் Monday, January 6, 2020 10:34 AM +0530  

விரதங்களில் ஸ்ரேஷ்டமாகக் கூறப்படுவது ஏகாதசி விரதம். தாயிற் சிறந்த கோயிலுமில்லை. காயத்திரிக்கு மேலான மந்திரம் இல்லை. காசிக்கு உயர்ந்ததான தீர்த்தம் இல்லை. ஏகாதசிக்கு சமமான விரதம் இல்லை விரதோபவாசங்களில் கூறப்பட்டிருக்கிறது.

ந காயத்ர்யா: பரம் மந்த்ரம்   ந மாத; பாரா தைவதம் |
காஸ்யா; பரமம் தீர்த்தம்   நைகாதச்யா; சமம் விரதம் ||

பொதுவாக  ஒரு வருஷத்திற்கு முந்நூற்று அறுபத்து ஐந்து நாட்கள் கணக்கில், இருபத்து நான்கு பட்சத்திற்கு மேல் சில நாட்கள் மீதி இருக்கும். அதனால் சில வருடங்களில் இருபத்தைந்து ஏகாதசிகள்  வந்து விடும். இந்த இருபத்தைந்து ஏகாதசிகளுக்கும் , உத்தர காண்டத்தில் தனித் தனி  பெயர்கள் கொடுக்கப் பட்டுள்ளன. 

  1. மார்கழி மாதத்தில், வரும் கிருஷ்ண பட்ச ஏகாதசிக்கு  உத்பத்தி ஏகாதசி என்று பெயர்.
  2. மார்கழி மாத  சுக்ல பட்ச ஏகாதசிதான் வைகுண்ட  ஏகாதசி. இதற்கு மோட்ச ஏகாதசி என்றும் பெயருண்டு. இந்த ஏகாதசியில்தான் பாற்கடலில் அமிர்தம் கடைந்தெடுக்கப்பட்டது. பகவான் கீதை என்னும் ஞானோபதேசத்தைக் கொடுத்ததும் இந்த நாளில்தான் . அதனால் வைகுண்ட ஏகாதசி , கீதா ஜெயந்தி என்றும் போற்றப்படுகிறது.
  3. தை  கிருஷ்ண பட்சத்தில்  வரும் ஏகாதசி ,ஸபலா ஏகாதசி.
  4. தை  சுக்ல பட்ச ஏகாதசி , புத்ரதா ஏகாதசி.
  5. மாசி கிருஷ்ண  பட்ச ஏகாதசி , ஷட்திலா ஏகாதசி .
  6. மாசி சுக்ல பட்ச ஏகாதசி , ஜயா ஏகாதசி.
  7. பங்குனி கிருஷ்ண பட்ச ஏகாதசி , விஜயா ஏகாதசி.
  8. பங்குனி சுக்ல பட்ச ஏகாதசி , ஆமலகீ ஏகாதசி.
  9. சித்திரை கிருஷ்ண பட்ச ஏகாதசி, பாப மோசனிகா ஏகாதசி.
  10. சித்திரை சுக்ல பட்ச ஏகாதசி , காமதா ஏகாதசி.
  11. வைகாசி கிருஷ்ண பட்ச ஏகாதசி, வரூதிநீ ஏகாதசி.
  12. வைகாசி சுக்ல பட்ச ஏகாதசி, மோஹினி ஏகாதசி.
  13. ஆனி கிருஷ்ண பட்ச ஏகாதசி, அபரா ஏகாதசி.
  14. ஆனி  சுக்ல பட்ச ஏகாதசி, நிர்ஜலா ஏகாதசி. பீமன் வருடத்தில் இந்த ஒரு ஏகாதசியில் மட்டும் சுத்த உபவாசம்       இருப்பாராம்.
  15. ஆடி கிருஷ்ண பட்ச ஏகாதசி, யோகினி ஏகாதசி.
  16. ஆடி சுக்ல பட்ச ஏகாதசி, சயனி ஏகாதசி. இந்த ஏகாதசியில்தான் சாதுர்மாஸ்ய ஆரம்பத்தில், ஸ்ரீ மஹாவிஷ்ணு     சயனிக்கத் தொடங்குவாராம்.
  17. ஆவணி கிருஷ்ண பட்ச ஏகாதசி, ஸாமிகா ஏகாதசி.
  18. ஆவணி சுக்ல பட்ச ஏகாதசி, புத்ரதா ஏகாதசி. [ தை சுக்ல பட்ச ஏகாதசிக்கும் அதே பெயர்தான் ]
  19. புரட்டாசி கிருஷ்ண பட்ச ஏகாதசி, அஜா ஏகாதசி.
  20. புரட்டாசி சுக்ல பட்ச ஏகாதசிக்கு, பத்மநாபா ஏகாதசி.
  21. ஐப்பசி கிருஷ்ண பட்ச ஏகாதசி , இந்திரா ஏகாதசி.
  22. ஐப்பசி சுக்ல பட்ச ஏகாதசி , பாபாங்குசா ஏகாதசி. 
  23. கார்த்திகை கிருஷ்ண பட்ச ஏகாதசி, ரமா ஏகாதசி.
  24. கார்த்திகை சுக்ல பட்ச ஏகாதசி, ப்ரபோதினி ஏகாதசி. இந்த ஏகாதசியில் தான் பகவான் விழித்துக் கொள்கிறார்.

இத்துடன் சாதுர்மாஸ்ய விரதம் பூர்த்தி ஆகிறது. 

25. அதிகப்படியாக வரும் ஏகாதசிக்கு, கமலா ஏகாதசி என்று பெயர்.

அஷ்ட வர்ஷாதிக; மர்த்ய; அபூர்ணாசீதீ வத்ஸர;|
ஏகாதச்யாம் உபவசேத் பக்ஷயோ: உபயோ: அபி ||

அதாவது,  மனிதப் பிறவி என்று எடுத்துவிட்டால், எட்டு வயதிற்கு மேலும், எண்பது வயதிற்கு உட்பட்ட எல்லோரும் இரண்டு பட்சங்களிலும் ஏகாதசி உபவாசம் இருக்க வேண்டும் என்று தர்ம சாஸ்திரம் கூறுகிறது. இப்படிச் சொன்னதால் எட்டு வயதிற்கு கீழ் உள்ளவர்களும், எண்பது வயதிற்கு மேற்பட்டவர்களும் ஏகாதசிக்கு உபவாசம் இருக்கக் கூடாது என்பது அர்த்தமில்லை.சிரமம் இல்லாத பட்சத்தில் யார் வேண்டுமானாலும் உபவாசம் இருக்கலாம்.  வருடத்தில், எல்லா ஏகாதசிகளுக்கும் பூரண உபவாசம் இருக்க முடியாவிட்டாலும், வைகுண்ட ஏகாதசியிலாவது பூரண உபவாசம் இருந்து , ஸ்ரீ மஹாவிஷ்ணுவின் அருட்கடாட்சத்தினைப் பெறுவோம். 

அன்றைய தினம் விஷ்ணு சஹஸ்ரநாமம் , ஸ்ரீஹரி ஸ்தோத்திரம் , போன்ற மஹாவிஷ்ணு சம்பந்தப்பட்ட ஸ்தோத்திரங்களைப் பாராயணம் செய்யலாம் .முடிந்தவரை விஷ்ணு காயத்ரியை சொல்லலாம். குறைந்த பட்சம் 108 முறைகளாவது விஷ்ணு காயத்ரியைக் கூற வேண்டும். 

விஷ்ணு காயத்ரி

ஓம் நாராயணாய வித்மஹே 
வாஸுதேவாய தீமஹி 
தன்னோ விஷ்ணு ப்ரசோதயாத்

]]>
vaikunda ekadesi https://images.dinamani.com/uploads/user/imagelibrary/2020/1/6/w600X390/srirangam_sorga_vasal_6.jpeg https://www.dinamani.com/religion/religion-articles/2020/jan/06/what-is-the-meaning-of-motcha-ekadesi-3324853.html
3318515 ஆன்மிகம் கட்டுரைகள் ஸ்ரீ ஸ்ரீ விஸ்வேஷ தீா்த்த சுவாமிகளின் ஞான வாழ்வின் சீர்த்திருத்த சாதனைகள்! உமா ஷக்தி Monday, December 30, 2019 08:25 AM +0530
 

இந்திய வேதாந்த தத்துவங்களின் பல கிளைகளில் ஒன்றான துவைத தத்துவப் பள்ளியின் நிறுவனர் ஸ்ரீ மாத்வாச்சார்யர் (கி.பி 1238 ஏ.டி - கி.பி 1317), உடுப்பியில் ஸ்ரீ கிருஷ்ணர் கோயிலை நிறுவினார். அங்கு இறைப்பணியில் ஈடுபட எட்டு இளம் சந்நியாசிகளுக்கு  தீட்சை வழங்கினார். இதன் மூலம் ஸ்ரீ கிருஷ்ணரின் பக்தி மார்க்கத்தைப் பற்றிய சரியான புரிதலை மக்களிடம் ஏற்படுத்த வழிவகுத்தார். இந்த எட்டு சந்நியாசிகளில் பரம்பரைதான் இப்போது பெஜாவா் மடம் என்று அழைக்கப்படுகிறது. 

ஸ்ரீமாத்வாச்சாரியரின் நேரடி சீடர்களில் ஒருவராக இருந்த ஸ்ரீ ஆதோக்ஷஜா தீர்த்தர் பெஜாவர் மடத்தின் நிறுவனர் மற்றும் முதல் பீடாதிபதி ஆவார். புகழ்பெற்ற வைணவ ஒழுக்கங்களில் தேர்ந்த மடாதிபதிகளான ஸ்ரீ விஜயத்வாஜ தீர்த்தர், ஸ்ரீ விஸ்வேஷா தீர்த்தர் மற்றும் ஸ்ரீ விஸ்வபதி தீர்த்தர் போன்றவர்களின்  வழிவந்த, ஸ்ரீ ஸ்ரீ விஸ்வேஷ தீா்த்த சுவாமிகள் பெஜாவா் மடத்தின் 32-வது மடாதிபதியாகப் பரிணமித்தார்.

ஆரம்பக் கல்வி மற்றும் சந்நியாச தீட்சை

ஸ்ரீ ஸ்ரீ விஸ்வேஷ தீர்த்த சுவாமிகள் 1931-ஆம் ஆண்டு ஏப்ரல் 27-ஆம் தேதி, ராமகுஞ்சாவைச் சேர்ந்த இறை சிந்தனைமிகுந்த தம்பதியரான ஸ்ரீ நாராயணாச்சார்யா மற்றும் ஸ்ரீமதி கமலாமாவின் இரண்டாவது குழந்தையாகப் பிறந்தார். பெற்றோர் அவருக்கு வெங்கடரமணன் என்று பெயரிட்டனர். குழந்தையின் சாத்விக தன்மையால் அனைவரும் பெரிதும் ஈர்க்கப்பட்டனர்.

பெஜாவர் மடத்தின் அப்போதைய தலைவரான ஸ்ரீ ஸ்ரீ விஸ்வ மான்ய தீர்த்த சுவாமிகள்  வெங்கடரமணருக்கு 8-வது வயதிலேயே சந்நியாச தீட்சை வழங்கினார். 1938-ஆம் ஆண்டு டிசம்பர் 3-ஆம் தேதி, ஹம்பிக்கு அருகிலுள்ள சக்ரதீர்த்தத்தில் இந்த  தீட்சை வழங்கப்பட்டது. தீட்சைப் பெற்றபின்னர், வெங்கடரமணர் ஸ்ரீ ஸ்ரீ விஸ்வேஷ தீர்த்த சுவாமிகள் ஆனார். இளம் சந்நியாசியின் ஆரம்பக் கல்வி உடுப்பியில் தொடங்கியது. பண்டாரகேரி மடத்தின் தலைவரான ஸ்ரீ ஸ்ரீ வித்யமன்ய தீர்த்த சுவாமிகள் குருவாக அருள் பாலித்து அனைத்து சாஸ்திரங்களையும் இந்த இளம் சந்நியாசிக்கு எட்டு ஆண்டுகளாகக் கற்பித்தார், மேலும் அவரை வேதாந்தம் மற்றும் சாஸ்திரங்களின் அறிவார்ந்த மற்றும் புத்திசாலித்தனமான அறிஞராக மாற்ற உதவினார். பால்ய சுவாமிகள் அதி விரைவில் நியமம், வேதாந்தம் மற்றும் தத்துவத்தின் பிற கிளைகளில் அசாதாரண புலமை பெற்று அறிஞரானார்.

ஸ்ரீ வித்யமன்ய சுவாமிகளின் ஆசீர்வாதத்துடன் சந்நியாச தர்மத்தை தேர்ந்தெடுத்தார் 

குரு மெச்சிப் போற்றும் சீடராக விளங்கினார் சுவாமிகள். ஸ்ரீ ஸ்ரீ விஸ்வேஷ தீர்த்த சுவாமிகளின் சாஸ்திர அறிவு மற்றும் புலமையால் மிகவும் அறிவார்ந்த பண்டிதர்கள் கூட திகைத்துப் போனார்கள் என்பது அனைவரும் அறிந்த உண்மை. இறையருளைப் பரிபூரணமாகப் பெற்றவர் சுவாமிகள். பன்முகத் திறமையுடைய அவர், வேத சாஸ்திரங்களைக் கற்றுணர்ந்த சீலராய் விளங்கினார்.

சுவாமிகளின் அறிவுக்கூர்மையால் விவாதத்தில் தோற்கடிக்கப்பட்ட அறிஞர்களின் பட்டியல் மிகப் பெரியது. கொச்சி மகாராஜா, புனே பல்கலைக்கழகத்தின் துணைவேந்தர் ஸ்ரீ தத்தோ வாமனா போத்தர், காசி மகாமஹோபாத்யா, ராஜராஜேஸ்வர சாஸ்திரிகள், ராமச்சந்திர சாஸ்திரிகள், கதரிங்கர் ஜாகுங்கா மற்றும் பலருடன் சுவாமிகள் நடத்திய விவாதங்கள் வரலாற்று பதிவு.  ஸ்ரீ ஸ்ரீ விஸ்வேஷ தீர்த்தரின் குரு ஸ்ரீ வித்யாமன்யா தீர்த்த சுவாமிகள் தம் சீடரின் அறிவுத்திறன் கண்டு வியந்தோகினார். குறிப்பாக திருவாரி விஜயேந்திராச்சார்யாந்து மற்றும் ஸ்ரீ மைசூர் ராமச்சந்திர சாஸ்திரியுடனான விவாதத்தின் போது, தம் சீடரின் மொழிப் பிரயோகம் மற்றும் வாக்குத்திறன் கண்டு வியப்படைந்தார்.  சுவாமிகளின் அசாதாரண கல்வியறிவு, படைப்பாற்றல்  மற்றும் கவிதைத் திறன்களால் மக்களின் கவனத்தைப் பெரிதும் கவர்ந்தார். 25 வயதில் “சம்பா விஜயா” என்ற சமஸ்கிருத கவிதை எழுதினார். இளம் வயதிலேயே மைசூர் மகாராஜாவால் உருவாக்கப்பட்ட நஞ்சநாகுட்டில் நடைபெற்ற அகமாத்ரயா மாநாட்டின் தலைவராகப் பொறுப்பேற்றார். இந்த மாநாட்டில்தான் முதல் முதலில் சுவாமிகள் தனது சொற்பொழிவுத் திறன்களால் பார்வையாளர்களை பரவசப்படுத்தினார். “கடவுள் நம் இதயத்தில் இல்லையென்றால், நாம் ஹம்பியின் பாழடைந்த கோவில்களைப் போல ஆகி விடுவோம்” என்று தத்துவார்த்தமாக உரையாற்றினார்.

ஸ்ரீ ஸ்ரீ விஸ்வேஷ தீர்த்த சுவாமிகளின் தீட்சண்யமான தோற்றம்

அகத்தில் மட்டுமல்லாமல் புறத்தோற்றத்திலும் சுவாமிகள் பொலிவானவர். மெலிந்த தேகமும், தீட்சண்யமான முக வடிவும் உடையவர். மேலும் எப்போதும் சுறுசுறுப்பாக இருக்கக் கூடியவர்.  பாரம்பரியமிக்க மடத்துக்குத் தலைமை தாங்கினாலும், எந்தவிதமான ஆடம்பரமும், தலைக்கனமும் இல்லாத எளிய ஆளுமை அவர். எப்போதும் தீட்சண்யமான பார்வையுடனும் குழந்தையைப் போன்ற சிரிப்புடனும் காட்சி தருவார். அன்பும் இரக்கமும் நிறைந்தது அவர் மனம். நாட்டின் பிரதமர் முதல் ஏழையினும் ஏழை வரை யாரொருவரும் சுவாமிகளை ஒருமுறைப் பார்த்துவிட்டால் உடனடியாக ஈர்க்கப்படுவார்கள். யார் வேண்டுமானாலும் தன்னை வந்து சந்திக்கலாம் என்று அனைவரையும் ஒரேபோல் வழிநடத்தியவர். அவரை பின்தொடர்பவர்கள், எப்போது விரும்பினாலும் அவரை சந்திக்க வாய்ப்பு கிடைக்கப் பெற்றவர்கள். சுவாமிகளின் பல ஆண்டுகள் தொடர்ந்து சமூக சேவையிலும் ஆக்கப்பூர்வமாக ஈடுபட்டு வருகிறார். “இந்தச் சமூகம் எனும் கடலில், மடங்கள் மீன்கள் போன்றவை. மீன்கள் தண்ணீர் இல்லாமல் வாழ முடியாது. போலவே மீன்கள் இல்லாமல் நீர் சுத்தமாக இருக்க முடியாது ”- இதுதான் சமுதாயத்தின் மீதான அவரது தத்துவத்தின் சாராம்சம்.

பொறுப்பை திறம்பட நிறைவேற்றுபவர்

காற்று இல்லாத வீட்டில் கூட ஒருவர் வாழ்ந்து விடக் கூடும். ஆனால் காற்று ஒரு அசுரனாகி சூறாவளியாக மாறி வீட்டின் கூரையைப் பிய்த்தெறிந்து வீசினால் என்ன ஆகும்? மேற்கத்திய கலாச்சார, மற்றும் அமைப்புகளைக் கண்மூடித்தனமாக பின்தொடர்தல் என்பதுதான் நம் கலாச்சாரத்திற்கும் ஆன்மிக வேர்களுக்கும் கடும் சூறாவளியாக மாறியுள்ளது. ஸ்ரீ ஸ்ரீ விஸ்வேஷா தீர்த்த சுவாமிகள் இந்த உண்மையையும் அதன் விளைவாக வந்த அச்சுறுத்தலையும் 50 ஆண்டுகளுக்கு முன்னதாகவே உணர்ந்தார்! கல்வியை முடித்த பின்னர் அவர் மேற்கொண்ட குறிக்கோள்களில் முதன்மையான ஒன்று குருகுல கல்வி முறையை நிறுவுவதாகும். 1956-ம் ஆண்டு பெங்களூரில் பூர்ணபிரஜ்னா வித்யாபீடத்தை நிறுவியபோது அவரது கனவு நனவாகியது.

நமது பண்டைய கலாச்சாரத்தைப் பாதுகாத்தல் மற்றும் ஸ்ரீமாத்வாசாரியரின் தத்துவத்தை பரப்புதல் என்ற இரட்டை இலக்குகளுடன் நிறுவப்பட்ட வித்யாபீடம், ஸ்ரீ ஸ்ரீ விஸ்வேஷ தீர்த்த சுவாமிகளின் அர்ப்பணிப்பு மற்றும் கடின உழைப்பால் தழைத்தது. மிக விரைவில் தலைசிறந்த குருகுலமாக வளர்ச்சி அடைந்து அங்கீகாரமும் பெற்றது. வித்யாபீடம் ஒவ்வொரு ஆண்டும் நூற்றுக்கணக்கான அறிஞர்களையும் இளம் சந்நியாசிகளையும் உருவாக்கி வருகிறது, இதன்மூலம் வறண்டு போயிருக்கக் கூடிய தத்துவ அறிஞர்களின் நீரோடை குறையாமல் இன்றளவும் தொடர்கிறது. இன்னும் சில தலைமுறைகளுக்கு அது தொடர்ந்து ஓடும் என்பதும் உறுதி.

தற்போது, ​​300-க்கும் மேற்பட்ட மாணவர்கள் வித்யாபீடத்தில் வேத சாஸ்திரக் கல்வி பயின்று வருகின்றனர். இந்த மாணவர்களின் தங்குமிடம், உணவு மற்றும் பிற அத்தியாவசியச் செலவுகள் உள்ளிட்ட முழுமையான பொறுப்பு வித்யாபீடத்தினரால் கவனிக்கப்படுகிறது. குருகுலத்தில் 30-க்கும் மேற்பட்ட புகழ்பெற்ற முன்னாள் மாணவர்கள் தற்போது ஆசிரியர்களாக அதே பீடத்தில் பணியாற்றி வருகின்றனர். தத்துவ சாஸ்திரத்தைச் சார்ந்த பல படைப்புகள் நிறுவனத்தால் மொழிபெயர்க்கப்பட்டு அறிவுத் தாகமுள்ள பக்தர்களுக்கு கிடைக்கப் பெறுகின்றன. இந்த குருகுலத்தின் அதிபராக ஸ்ரீ ஸ்ரீ விஸ்வேஷ தீர்த்த சுவாமிகள் தனது கடமைகளை பாராட்டத்தக்க வகையில் நிறைவேற்றியுள்ளார். ஸ்ரீ ஸ்ரீ விஸ்வேஷ தீர்த்த சுவாமிகளின் இத்தகைய பங்களிப்பு மகத்தானது. அடுத்தகட்டமாக, அவர் இதேபோன்ற வித்யாபீடத்தைத் தலைநகரான புதுதில்லியில் நிறுவுவதற்கான முயற்சி எடுத்துக் கொண்டிருந்தார். இதற்காக தில்லி மேம்பாட்டு ஆணையம் ஏற்கனவே ஒரு ஏக்கர் நிலத்தை அனுமதித்துள்ளது. புதுதில்லியில் உள்ள இந்த நிறுவனம், வட இந்தியாவிலுள்ள அனைத்து தத்துவ செயல்பாடுகளுக்கும் மையப் புள்ளியாக மாற வேண்டும் என்பதே ஸ்ரீ ஸ்ரீ விஸ்வேஷ தீர்த்த சுவாமிகளின் தீவிரமான குறிக்கோள். தனது பக்தர்கள் அனைவரின் இதயங்களையும் வென்ற ஒருவருக்கு, சாத்தியமற்ற செயல் என்று எதுவும் இல்லை!

ஸ்ரீ ஸ்ரீ விஸ்வேஷா தீர்த்த சுவாமிகள் உடுப்பி ஸ்ரீ கிருஷ்ணரை வழிபடுதல்

உடுப்பி மடாதிபதி அனைவரும் பரியாயம் செய்தலைக் கடமையாகக் கொள்ள வேண்டும். மேலும் பகவான் கிருஷ்ணரை இரண்டு ஆண்டுகள் வழிபடும் பாக்கியமும் அவர்களுக்குக் கிடைக்கும். இத்தகைய புனிதமான கடமை ஸ்ரீ ஸ்ரீ விஸ்வேஷ தீர்த்த சுவாமிகளுக்கு 1952-ஆம் ஆண்டில் முதன்முறையாக வழங்கப்பட்டது. சுவாமிகளின் முதல் பரியாயம் மகத்துவமானது. அப்போதுதான் மாத்வ கலாச்சாரத்தின் பெருமை வாய்ந்த அகில பாரத மாதவ மகா மண்டலி நிறுவப்பட்டது.  தனது முதல் மாநாட்டை மைசூர் மகாராஜாவின் தலைமையில் நடத்தியது. 1968-ம் ஆண்டில் சுவாமிகளின் இரண்டாவது பரியாயத்தின் போது, ​​உடுப்பியின் முழுப் பகுதியும் உண்மையில் புத்துயிர் பெற்றது. காரணம் ​​விஸ்வ ஹிந்து பரிஷத்தின் பிராந்திய உச்சி மாநாட்டின்போது, சுவாமிகளின் முழக்கம் இதுதான் “இந்துவாஹ சோடரஹ சர்வே ந இந்துஹு பதிதோ பவது” இது பரிஷத்தின் அனைவருக்கும் தாரக மந்திரமாக மாறியது. 1984 -ஆம் ஆண்டில் சுவாமிகளின் மூன்றாவது பரியாயத்தின் போது உடுப்பியின் முழு ஆன்மிக, கலாச்சாரம் புரட்சிகரமான மாற்றங்களுக்கு உள்ளானது என்றால் மிகையில்லை.

சுவாமிகளின் துணிச்சலான முடிவுகள்

தலித்துகளை ஹிந்து சமுதாயத்தின் ஒருங்கிணைந்த பகுதியாக கருதிய முதல் சுவாமிகள் ஸ்ரீ ஸ்ரீ விஸ்வேஷ தீர்த்த சுவாமிகள்தான். தீண்டாமையின் கொடிய நடைமுறையை, மனிதக் கண்ணோட்டத்தில் மறுபரிசீலனை செய்வதற்கான அவரது முடிவும், அதன் விளைவாக அவர் எடுத்த சில நடவடிக்கைகளும் அந்நாட்களில் புரட்சியை ஏற்படுத்தியது. "நம் வீடுகளிலும், பொது இடங்களிலும், கிறிஸ்துவர்களும் முஸ்லிம்களுக்கும் பெறும் அதே வாய்ப்புகளை தலித்துகள் அனுபவிக்கிறார்களா? மதம் மாறிவிட்ட பின்னர் அவர்கள் நம்மை அணுகும்போது, ​​நாம் அவர்களுக்கு எதிராக பாகுபாடு காட்டுவதில்லை. அப்படியானால், மற்ற மதங்கள் தலித்துகளை மனிதநேயத்துடன் நடத்துகின்றன என்பதை நாம் ஒப்புக் கொள்ள வேண்டும்.  அப்படி நாம் செய்கிறோமா? இதைவிட நமது தர்மத்திற்கும் சமூகத்திற்கும் ஒரு பெரிய அவமானம் இருக்கிறதா?” சுவாமிகளின் கூர்மையான தர்க்கரீதியான கேள்விகள் பழமைவாதிகளின் கண்களைத் திறந்தன. தமிழ்நாட்டின் மீனாக்ஷிபுரம் பகுதியில் தலித்துகளை மாற்றுவது தொடர்பான சர்ச்சையில் சுவாமிகளின் தனிப்பட்ட வருகையால் தடுக்கப்பட்டது. சுவாமிகளின் இனிமையான புன்னகையானது கடுமையான எதிரிகளைக் கூட வென்றது.  இந்து சமூகம் ஒன்றிணைந்து வலுவானது.

தன்னலமற்ற கர்ம யோகி

ஜபம் மற்றும் சடங்குகள் மூலம் கட்டுண்டு கிடத்த பழமைவாத மடத்தின் அமைப்பை உடைத்த பெருமை ஸ்ரீ ஸ்ரீ விஸ்வேஷ தீர்த்த சுவாமிகளுக்கு உரியது. தனது அன்றாட நடைமுறைகளுக்கு எவ்விதமான இடையூறும் ஏற்படாமல், தனது பரபரப்பான பயணத்தின் போதும்கூட சொற்பொழிவுகளையும், ஆன்மிக வகுப்புகளையும் நடத்தினார். சீர்திருத்தவாதியான சுவாமிகள், கடந்தகால மரபுக்கும் எதிர்கால நம்பிக்கைக்கும் இடையிலான தங்கப் பாலமாக மாறினார்.

“வீடென்பது பொருட்கள் நிறைந்தது. வெவ்வேறு அறைகள் வெவ்வேறு நோக்கங்களுக்காக ஒதுக்கப்பட்டுள்ளன. ஆனால் வெளிச்சத்திற்கு தனி அறை இருக்கிறதா? ”என்று சுவாமிகள் கேட்கிறார். அவரது கறைபடாத பிரம்மச்சரியம் பெரும் தவம். சுவாமிகள் உண்மையான ஒரு கர்ம யோகி, கடவுளை வெறும் கற்சிலைகளில் பார்ப்பதைத் தாண்டி, முழுமையான உலகத்தையே இறைவனின் தங்குமிடமாகப் பார்க்கிறார். அவர் எடுத்த ஒவ்வொரு அடியும் இறைவனை வணங்குவதாகும், ஏனெனில் அவருடைய செயல்களில் சுயநலத்தின் ஒருதுளிக் கூட இல்லை. ஸ்ரீ ஸ்ரீ விஸ்வேஷ தீர்த்த சுவாமிகள் தனிநபர் மட்டுமல்ல; அவர் ஒரு அமைப்பு.

ஸ்ரீ ஸ்ரீ விஸ்வேஷ தீர்த்த சுவாமிகள், தனது ஏழு வயதிலிருந்து 80 ஆண்டுகளில் நிறைவடையும்வரை, சமுதாயத்தின் முன்னேற்றத்திற்காக தன்னை அர்ப்பணித்துள்ளார். சுவாமிகளின் அளப்பரிய செயல்கள் மானுடம் உள்ள வரை நிலைத்திருக்கும்.

]]>
Sri Sri Vishvesha Theertha Swamiji https://images.dinamani.com/uploads/user/imagelibrary/2019/12/29/w600X390/Sri_Sri_Vishvesha_Theertha_Swamiji.jpg https://www.dinamani.com/religion/religion-articles/2019/dec/29/a-brief-introduction-to-his-life-and-achievements-of-sri-sri-vishvesha-theertha-swamiji-3318515.html
3277919 ஆன்மிகம் கட்டுரைகள் பிரதோஷத்தில் நந்திக்கு அபிஷேகம் செய்வதால் கிடைக்கும் பலன்கள்! Tuesday, November 12, 2019 03:57 PM +0530 சிவபக்தர்கள் அனைவருக்கும் உள்ள பொதுவான குணம் என்னவென்றால் எப்படியாவது அடிக்கடி ஆலயத்துக்குச் சென்று சிவனை கண்குளிர மனம் நெகிழ தரிசனம் செய்து விடுவர். சிவனை நினைக்காமல் ஒரு பொழுதும் அவர்களால் இருக்க முடியாது, சிவ சிவ என்று மனத்துக்குள் சொல்லில் கொண்டே சிவ பக்தியில் தங்கள் கவலைகளை மறப்பார்கள். ஆழமான இறைபக்தி இருப்பின்,  மலை போல வந்த பிரச்னைகள் யாவும் பனி போல் கரைந்துவிடும் என்பதை பலர் தங்கள் வாழ்க்கையில் உணர்ந்துள்ளார்கள். 

அவன் அருளாலே அவன் தாள் வணங்கி பல பல நன்மைகளைப் பெறுவோம். சிவன் கோவிலில் நந்தி வழிபாடு என்பது தொன்றுதொட்டு நடந்து வருவது. அதுவும் பிரதோஷத்தில் நந்திக்கு அபிஷேகம் செய்வதால் கிடைக்கும் அளப்பரிய நன்மைகளைப் பார்க்கலாம்.

  • நந்தி தேவனுக்கு பாலில் அபிஷேகம் செய்தால் உடல்நலம் மேம்படும். நீண்ட ஆயுள் கிடைக்கும்
  • சந்தனத்தில் அபிஷேகம் செய்ய அலுவலகத்தில் பதவி உயர்வு கிடைக்கும். செல்வாக்கும், அதிகாரமும் உள்ள பதவி கிடைக்கும்
  • மஞ்சள் பொடியால் அபிஷேகம் செய்தால் திருமணத் தடைப்பட்டு இருப்போருக்கு விரைவில் திருமணம் நிச்சயம் ஆகும்
  • நந்திக்கு பச்சரிசி மாவில் அபிஷேகம் செய்ய கடன் தொல்லை நீங்கும். தீராத வியாதிகள் தீரும், புத்திர பாக்கியம் இல்லாதவர்களுக்கு குழந்தைப் பேறு பாக்கியம் கிடைக்கும்
  • பன்னீர் அபிஷேகம் செய்தால் நாக தோஷம் நீங்கும். சஞ்சலமான மனம் அமைதியடையும். மகிழ்ச்சி பெறுகும். குடும்ப வாழ்க்கை சிறக்கும்.
  • இளநீர் அபிஷேகம் செய்தால் குடும்பப் பிரச்னையால் இழந்த சொத்துக்கள் திரும்பக் கிடைக்கும். நீண்ட நாட்கள் இழுவையில் இருந்த வழக்குகளில் வெற்றி பெறலாம்.
  • வாசனை திரவிய அபிஷேகத்தால் சொந்த வீடு கட்டும் பாக்கியம் கிடைக்கும்.
  • நந்திக்கு பஞ்சாமிர்த அபிஷேகம் செய்தால் உயர்வான கல்வி கிடைக்கும். ஆரோக்கியம் மேம்படும்.

நந்தியை வழிபட்டு சிவபெருமானின் அருளை அனுதினமும் பெறுவோம். ஓம் நமசிவாயா!

]]>
Siva Temple https://images.dinamani.com/uploads/user/imagelibrary/2019/11/12/w600X390/nandhi.jpg nandhi bhagawan https://www.dinamani.com/religion/religion-articles/2019/nov/12/prayers-to-nandi-during-auspecious-pradosham-3277919.html
3247968 ஆன்மிகம் கட்டுரைகள் சரஸ்வதி ஸ்தாபனம்: குழந்தைகள் படிப்பில் சிறக்க நவராத்திரியில் சரஸ்வதியை வரவேற்போம்! - அஸ்ட்ரோ சுந்தரராஜன் Monday, October 7, 2019 11:56 AM +0530 ஆண்டு தோறும் புரட்டாசி மாதத்தில் ஒன்பது நாட்கள் அன்னை பராசக்தியை வீடுகளிலும், ஆலயங்களிலும் பூஜை செய்து வழிபடும் சாரதா நவராத்திரி விழா இவ்வாண்டு புரட்டாசி மாதம் 12ம் தேதி கடந்த ஞாயிற்று கிழமை (29/09/2019)  ஆரம்பமாகியது. 

தக்ஷிணாயன புண்ய காலத்தில் நவக்கிரகங்களில் நாயகமாக உள்ள சூரியன், புரட்டாசி மாதத்தில்  கன்னி இராசியில் சஞ்சரிக்கும் காலம்  தேவர்களுக்கு இராக்காலமாகும்.  கன்னி ராசிக்கு அதிபதியானவன் புதன். வித்யாகாரகன் எனப்படுபவன். கல்வி, புத்தி, தொழில் ஸ்தானம் சரியாக அமைய புதனின் பார்வை முக்கியமானது என்பார். இந்தக் காலத்தில் சாரதா நவராத்திரி கொண்டாடுவது சாலச்சிறந்தது என்று கருதி வந்துள்ளனர். நாளை சாரதா நவராத்திரியின் ஏழாம் நாள் முதல் அடுத்த மூன்று நாட்கள் சரஸ்வதி தேவிக்குறிய நாட்களாகும். அதனை முன்னிட்டு நாளை சனிக்கிழமை (5/10/2019) சரஸ்வதி ஸ்தாபன தினமாக கொண்டாடப்படுகிறது. நவராத்திரியில் வரும் மூல நக்ஷத்திரத்தில் சரஸ்வதி தேவியை ஆவாஹனம் செய்வது விஷேஷமாகும். 

நவராத்திரி பண்டிகை நாளில் ஒன்பது நாளும் கொலு வைத்து பூஜை செய்ய இயலாதவர்கள் கடைசி மூன்று நாட்களில் கொலு வைத்து சரஸ்வதியை ஆவாஹனம் செய்து,  ஆயுதபூஜை, சரஸ்வதிபூஜை, விஜயதசமி நாளில் வித்யாரம்ப பூஜை செய்து வணங்குவார்கள். கல்விக்கு அதிபதியான சரஸ்வதி தேவியையும், நம் தொழிலுக்கும் ஜீவனத்திற்கும் உதவி செய்யும் கருவிகளையும் பூஜை செய்து வணங்கும் நாளே சரஸ்வதி பூஜை மற்றும் ஆயுதபூஜை நாளாகும்.

நவராத்திரி கொண்டாட்டம்:
நவராத்திரி கொண்டாட்டத்தின் கடைசி மூன்று நாட்களான மஹா சப்தமி, துர்காஷ்டமி எனப்படும் மஹா அஷ்டமி மற்றும் விஜய தசமி எனப்படும் மஹா நவமி ஆகிய மூன்று நாட்களும் சரஸ்வதி தேவிக்கு உரியன. இந்த நாட்களில் தமிழகத்திலுள்ள எல்லா சரஸ்வதி தேவி கோவில்களிலும் சிறப்பு வழிபாடுகள் நடைபெறுகின்றன. 

கூத்தனூர் சரஸ்வதி கோயில்,வேதாரண்யத்தில் வீணையில்லாத சரஸ்வதி, கண்டியூர், உத்திர மேரூர், காஞ்சிபுரம் காமாட்சி, மதுரை மீனாட்சி, லால்குடி, தஞ்சை பெரிய கோயில் கங்கை கொண்ட சோழபுரம், திருப்பூந்துருத்தி, போளூர், நாகூர், சோமநாதபுரம் கேசவர், ஹளபேடு ஆகிய கோயில்களில் சிறப்பு வழிபாடுகள் நடைபெறுகின்றன. கூத்தனூரில் அம்மனின் பாதங்களில் பகதர்கள் மலரிட்டு வணங்கி அருளைப்பெற ஏதுவாக சரஸ்வதி பூஜையன்று அம்மனின் கால்கள் அர்த்த மண்டபம் வரை நீட்டி பக்தர்களுக்கு அருள் பாலிக்கின்றாள். 

சரஸ்வதி ஸ்தாபனம்:
நவராத்திரி தினங்களில் வரும் மூல நட்சத்திரமே சரஸ்வதியின் அவதார தினமாக கொண்டாடப்படுகிறது. அதன்படி இன்று சரஸ்வதியின் அவதார தினம் என்பதால் சரஸ்வதி தேவியை ஆவாஹனம் செய்து பூஜிப்பது வழக்கம். அதற்கு அடுத்த நாள்தான் இந்த ஆண்டு சரஸ்வதி பூஜையும் வருகிறது.  வித்யைகளுக்கு அதிபதியாகிய சரஸ்வதி தேவியை பூஜை, ஜபம், பாராயணம் ஆகியவற்றால் ஆராதித்து நன்மையடைய வேண்டிய நாள் சரஸ்வதீ பூஜை. 

" மூலேன ஆவஹயேத் தேவீம் ச்ரவணேந விஸர்ஜயேத்" 

என்பதாக மூலா நக்ஷத்திரத்தன்று பூஜையில் புத்தகங்கள், வாத்தியங்கள், செய்யும் தொழிலுக்கான உபகரணங்கள் சரஸ்வதி பிரதிமை போன்றவற்றை பூஜை செய்யுமிடத்தில் ஓர் பீடம்/பலகையில் வைத்து பூஜிக்க வேண்டும். இவ்வாறு மூலா நக்ஷத்திரத்தில் சரஸ்வதி ஆவாஹனம் செய்ய இயலாதவர்கள், நவமியன்று விரிவாக பூஜை செய்து, மறுநாள் தசமியன்று புனர்பூஜை செய்து முடிக்க வேண்டும். சரஸ்வதீக்கான இந்த விசேஷ நவமியை மஹா-நவமி என்று கூறப்படுகிறது.

நாளை (05/10/2019) நவராத்திரியின் ஏழாம் நாளாகிய சரஸ்வதி சப்தமி எனப்படும் மஹா சப்தமியில்  சரஸ்வதி தேவிக்குரிய பூஜா மத்திரங்களில் மிக அற்புத சக்திமிக்கதாகவுள்ள வாக்வாஹினிக்குரிய சுலோகங்களை பிலகரி இராகத்தில் பாடி எலுமிச்சம்பழம் சாதம் பிரசாரமாக படைத்து பழங்களில் பேரீச்சையும் புஷ்பங்களில் தாழம்பூவும் பத்திரங்களில் தும்மை இலைகளாலும் அர்சித்து வணங்க நல்ல கல்வி ஞானம் வாக்கு சித்தம், தெளிவு என்பன உண்டாகி ஒரு பூரணத்துவம் மிக்க மனிதராக பிரகாசிக்க முடியும்.

பாற்கடலில் வெண் தாமரையோடும் வேதச் சுவடிகளோடும் தோன்றிய கலைமகளை பிரம்மனே முதலில் பூஜித்து தனக்கு இணையாக்கிக்கொண்டார் என புராணங்கள் கூறுகின்றன. கல்வி, கலைகளின் நாயகியான சரஸ்வதியின் பெருமைகளை பலவாறு கூறுகிறது சரஸ்வதி மகாத்மியம் என்ற நூல். அஞ்ஞான இருளை நீக்கும் இந்த தேவி, எட்டு வடிவங்கள் கொண்டு அன்பர்களை காக்கிறாள் என்று தாரா பூஜை என்ற சாஸ்திரம் தெரிவிக்கிறது. வாகீஸ்வரி, சித்ரேஸ்வதி, துளஜா என்ற சியாமளா, கீர்த்தீஸ்வரி, நீல சரஸ்வதி, கினிசரஸ்வதி, அந்தரிக்ஷ சரஸ்வதி, கடசரஸ்வதி என எட்டு சரஸ்வதி வடிவங்கள் எட்டுவித குணங்களை அளிப்பதாக தெரிவிக்கிறது. 

கல்வி கடவுள் சரஸ்வதி:
கல்வி அறிவைத் தந்து நம்மை வல்லவர்களாக்கும் சக்தி படைத்தவள் சரஸ்வதி தேவி. கலைவாணியான சரஸ்வதி தேவியை பிரதானமாகக் கருதி, ஆராதனை செய்து வணங்கும் நாள் தான் சரஸ்வதி பூஜை. நாவிற்கரசி, கல்விக்கரசி, கலைவாணி எனப்பல பெயர்களில் போற்றப்படும் சரஸ்வதி தேவியின் மகிமையை பற்றி தெரிந்து கொள்ள வேண்டும். பிரம்மனின் துணைவியாக இருப்பவள் சரஸ்வதி தான்.

சரஸ் என்றால், நீர் மற்றும் ஒளி ஆகியவற்றை தடையின்றி வழங்குபவள் என்று பொருள். கல்வியை வற்றாத உற்றாகவும், ஞான ஒளியாகவும் அள்ளித்தருபவளே சரஸ்வதி. சரஸ்வதியின் கையில் இருக்கும் வீணையின் பெயர் கச்சபி. சிவபெருமானால் உருவாக்கப்பட்டு வழங்கப்பட்டது, வீணா தட்சிணாமூர்த்தியாக இருந்து, நாரதர் முதலானவர்களுக்கு இசை நுணுக்கங்களை உபதேசித்த பிறகு தனது சகோதரியான கலைவாணிக்கு அவர் அளித்ததாய் ஐதீகம்.

ஆயுத பூஜை:
ஆயுத பூஜை அன்று தாங்கள் செய்யும் தொழிலில் நிபுணத்துவம் பெற்று தங்கள் தொழில் நன்கு விருத்தி அடைவதற்காக தங்கள் தொழிலுக்கு பயன்படுத்தப்படும் கருவிகள், இயந்திரங்கள், ஆயுதங்கள், இசை கருவிகள் புத்தகங்கள், பென்சில், பேனா போன்ற பொருட்களை நன்கு சுத்தப்படுத்தி பூஜை செய்வார்கள். இந்த நாளே ஆயுத பூஜை மஹாநவமி என்றும் அழைக்கப்படுகிறது. இந்த பூஜை நவராத்திரியின் 9ம் நாள் கொண்டாடப்படுகிறது. நாடு முழுவதும் இந்த பண்டிகை கொண்டாடப்படுகிறது.

அறுபத்து நான்கு கலைகள்:
கல்வி கடவுளான சரஸ்வதி தேவி தான் ஆயக்கலைகள் அறுபத்து நான்கினிற்கும் தலைவியாகவும், தெய்வமாகவும் திகழ்கிறாள். சரஸ்வதி தேவியின் அருள் பெற்றவர்கள் ஆயகலைகள் அனைத்தினையும் அறிந்திட முடியும் என்பதே உண்மை. கலைமகள் குறித்து கம்பர் பாடிய பாடலான

"ஆய கலைகள் அறுபத்து நான்கினையும்
ஏய உணர்விக்கும் என்னம்மை - தூய
உருப்பளிங்கு போல்வாள் என" உள்ளத்தினுள்ளே
இருப்பளிங்கு வாராது இடர்"

என்றவாறு கலைமகள் வணக்க பாடலை பாடியுள்ளார். இதன் படி பார்க்கும் போது ஆயகலைகள் அறுபத்து நான்கு என்பதும். அதற்குரியவளான சரஸ்வதி தேவியை வணங்கிட அவை நமக்கு கிட்டிடும் என்பதும் புலனாகிறது.

சரஸ்வதிக்கு நாற்பதுக்கும் அதிகமான பெயர்கள் உள்ளன. அவற்றுள் முக்கியமான பெயர்கள். கலைமகள், ஞானவாகினி, தூயாள், பிராமி, இசை மடந்தை, காயத்ரி, சாரதா, வெண்டாமரையாள், ஞானக்கொழுந்து, ஆதிகாரணி, சகலகலாவல்லி, வாணி, பனுவலாட்டி, பாமகள், பாமுதல்வி, பாரதி, நாமகள், பூரவாகினி, சாவித்ரி, ஞான அமிலி நாமகள், கலை மங்கை, வாணி, கலை வாணி, பார்கவி, சரஸ்வதி, பாரதி, சாரதா, சகலகலா வல்லி, பிரம்மதேவி, வேத நாயகி, ராஜ மாதங்கி, நீலதாரா, சித்ர தாரா, சியாமளா, ராஜ சியாமளா, வாக்வாதினி, வாகதீஸ்வரி, நயவுரை நாயகி, ஞான ரூபிணி, வித்யா வித்யா தாரணி ஆகியன ஆகும்.

ஜோதிடத்தில் சரஸ்வதி யோகம்:
தனகாரகன் குரு களத்திரகாரகன் சுக்ரன் வித்யாகாரகன் புதன் ஆகிய மூவரும் லக்ன கேந்திரம், திரிகோணம் அல்லது இரண்டாமிடம் (1,2,4,5,7,9,10) ஆகிய இடங்களில் இருந்தால் சரஸ்வதி யோகம் என பாரம்பரிய ஜோதிட நூல்கள் போற்றுகின்றன. இந்த யோகம் பெற்றவர்கள் ஆயகலைகள் 64ல் குறைந்தது 6,7 கலைகளிலாவது பாண்டித்தியம் பெற்று இருப்பார்கள். மேலும் சுக்கிரன், குரு, புதன் ஆகிய கிரகங்கள் கேந்திர திரிகோணத்திலோ அல்லது 2ம் வீட்டிலோ அமைந்து, குருபகவானும் ஆட்சி அல்லது உச்சம் பெற்றோ நட்பு வீட்டிலோ அமையப் பெற்றால், சரஸ்வதி யோகம் உண்டாகிறது.  பெயரிலேயே சரஸ்வதியிருப்பதால் இந்த யோகத்தால் நல்ல கல்வியாற்றல்  தேவைக்கேற்ற செல்வம், சமுதாயத்தில் ஓர் கௌரவமான நிலையாகவும் உண்டாகும். 

கல்வி தரும் பிற யோகங்கள்:

பத்ர யோகம் 
வித்யாகாரகன், கல்விகாரகன், அறிவுகாரகன் எனப் போற்றப்படும் புதன் பகவான் ஒருவர் ஜாதகத்தில் ஆட்சியோ, உச்சிமோ பெற்று ஜென்ம லக்னத்திற்கோ சந்திரனுக்கோ கேந்திர ஸ்தானங்களில் அமைந்திருந்தால் பத்திர யோகம் உண்டாகிறது. பத்திர யோகம் அமைந்துள்ள ஜாதகருக்கு நல்ல அறிவாற்றல், சிறப்பான ஞாபக சக்தி, புக்தி கூர்மை யாவும் அமையும். கற்றவர்களின் சபையில் ஒரு முக்கியமான பங்கு  வகிப்பவராக இருப்பார். பலருக்கு ஆலோசனை வழங்கும் திறன் இருக்கும். தன்னுடைய பேச்சாற்றலால் அனைவரையும் கவர்ந்து விடுவார், கல்வி அறிவு மிகச் சிறப்பாக இருக்கும், கணிதத்தில் மேதையாக இருப்பார். பேச்சால், வாக்கால் முன்னேற்றம் ஏற்படும். வக்கீல் பணியில் திறமைசாலியாக இருப்பார். சமுதாயத்தில் மற்றவர்களால் மதிக்கப்படக்கூடிய அளவிற்கு உன்னதமான நிலை உண்டாகும். சகல கலைகளையும் கற்று தேறக்கூடிய ஆற்றல் உண்டாகும்.  வாக்கு சாதுர்யமும், கற்பனை திறனும் உண்டாகும் என்பதால் கலைத்துறையில் பெரிய இடத்தை பிடிக்கும் வாய்ப்பு  அமையும். 

புத ஆதித்ய யோகம்:
ஒருவரது ஜாதகத்தில் சூரியனும், புதனும் இணைந்து அமையப் பெறுவது புதாத்திய யோகமாகும். இந்த யோகம் அமையப் பெற்றவர்களுக்கு கல்வியில் ஈடுபாடு, பல கலைகளை கற்றுத் தேறும் வாய்ப்பு, நல்ல அறிவாற்றல், பேச்சாற்றல், எழுத்தாற்றல் யாவும் உண்டாகும். அரசு வழியில் அனுகூலம், வியாபாரத்தில் அதிக ஈடுபாடு உண்டாகும். புதன் சூரியனுக்கு பின் அஸ்தங்கமாகாமல் ஏற்படும் புத ஆதித்ய யோகமே சிறந்த பலனளிக்கிறது. மேலும் சூரியனை கடந்து புதன் நிற்கும்போது அது சுபவெசி யோகமாகவும் ஆகிறது.

இந்த சரஸ்வதி பூஜை நன்னாளில் கல்வி கடவுளான சரஸ்வதியை வணங்கி சரஸ்வதி யோகத்தை பெற்று கலை பல கற்று புகழுடன் விளங்குவோமாக!

- Astro Sundara Rajan
Mobile 9498098786
WhatsApp 9841595510
Email: astrosundararajan@gmail.com
Web: www.astrosundararajan.com

]]>
https://images.dinamani.com/uploads/user/imagelibrary/2019/10/4/w600X390/saraswathi7.jpg Saraswati pooja special https://www.dinamani.com/religion/religion-articles/2019/oct/04/saraswati-pooja-special-3247968.html
2690837 ஆன்மிகம் கட்டுரைகள் அட்சய திருதியையும் ஸ்ரீ அன்னபூரணியும் மாலதி சந்திரசேகரன் Friday, April 28, 2017 10:36 AM +0530  

'அட்சயம்’ என்னும் வடமொழிச் சொல்லுக்கு 'அள்ள அள்ளக் குறையாது’ என்பது தான் பொருள். 

சித்திரை மாதம், அமாவாசையைத் தொடர்ந்து வரும் திரிதியை அன்று அட்சய த்ரிதியை அனுசரிக்கப்படுகிறது. 

இந்தப் புண்ணிய தினமான, திரிதியை நாள்,  நமக்குத் தெரிந்ததும், தெரியாததுமான அநேக விஷயங்களை நாம் அறிந்து கொள்ள உதவும் உன்னத நாளாகத் திகழ்கிறது. 

இன்றைய தினத்தில்தான்... 

ஸ்ரீ வேதவியாசர், மகாபாரதம் என்னும் அற்புதமான காவியத்தை எழுதத்தொடங்கினார். 

ஸ்ரீ மகாவிஷ்ணுவின், ஆறாவது அவதாரமான, ஸ்ரீ பரசுராமரின் அவதாரம் நிகழ்ந்தது. 

குபேரன், தான் இழந்த செல்வங்களைத் திரும்பப் பெற்றார். 

ஒரு பிடி அவலுடன், குசேலர், ஸ்ரீ கிருஷ்ண பரமாத்மாவை சந்தித்த நாள். 

ஸ்ரீ கங்காமாதா, பூமியைத் தொட்ட நாள். 

ஸ்ரீ ஆதிசங்கரர், கனகதாரா ஸ்தோத்திரத்தை நமக்கு அருளிய நாள். 

இப்படி பல அம்சங்கள் இந்த நன்னாளில் அமைந்திருந்தாலும், முக்கியமான ஒரு தேவ நிகழ்வை, நாம் மறந்துவிடக்கூடாது. 

அதுதான்,  நம்முடைய அத்யாவசியத் தேவையான உணவை அதாவது அன்னத்தை, நமக்குக் குறைவில்லாமல் அன்றாடம் வழங்கி அருளும் ஸ்ரீ அன்னபூரணி மாதா அவதாரம் செய்த நாள்தான் அது. 

காரியம் என்று ஒன்று இருந்தால், அதற்குக் காரணம் இல்லாமல் இருக்காது அல்லவா? 

ஒருமுறை, கைலாயத்தில், ஸ்ரீ சிவபெருமானும், ஸ்ரீ பார்வதியும் சொக்கட்டான் ஆடிக்கொண்டிருந்தார்கள். ஆடும்பொழுது, பந்தயத்தில், தன்னுடைய சூலாயுதம் முதற்கொண்டு அனைத்தையும், உமாதேவியிடம், மகேசன் இழந்தார். 

செய்வதறியாது, மகேசன், ஸ்ரீ விஷ்ணுவை, அணுகி, உபாயம் கேட்டார். 

மீண்டும் ஒரு முறை சொக்கட்டான் ஆடினால், இழந்ததைப் பெறலாம் என்று பரமாத்மா கூறினார். 

அதன்படி, கங்காதரன், அன்னையுடன், மீண்டும்,  விளையாடத் தொடங்கினார். 

ஸ்ரீ கேசவன் கூறியது போல், கேட்ட விருத்தம் விளையாட்டில் விழ, ஸ்ரீ சிவபெருமானும் இழந்ததை மீட்டுக் கொண்டார். 

ஸ்ரீ பார்வதி தேவி, கணவர் தப்பாட்டம் ஆடி, தன்னை ஏமாற்றி, வெற்றி கண்டார் என்று கோபப்பட்டார். 

அதனால் இருவருக்கும் வாக்குவாதம் ஏற்பட்டது. 

அந்த சமயத்தில், அங்கு, ஸ்ரீ விஷ்ணு வருகை புரிந்தார். 

நடந்தது எல்லாமே மாயைதான் என்பதைக்கூறி இருவரையும் சமாதானப்படுத்தினார். 

ஆனால், எல்லாமே மாயை என்பதில் அன்னைக்கு உடன்பாடு இல்லாமல் இருந்தது.

'பூலோகத்தில், ஒரு ஜீவனின் வாழ்வாதாரத்திற்கு ஆகாரம் என்பது அத்யாவசியமாகிறது. அது கூட மாயை ஆகுமா?’ என்று தன் பதியிடம் தன் சந்தேகத்தைக் கேட்டார், ஸ்ரீ பார்வதி. 

பதியின் 'இதிலென்ன சந்தேகம்?’ என்னும் பதிலைக் கேட்டதும், 'நான் மாயை இல்லை என்பதை நிரூபித்துக் காட்டுகிறேன்’ என்று கூறி, சட்டென்று மறைந்து போனார், உமை. 

அவ்வளவுதான். சக்தியின் தயை இல்லாமல், உணவு பொருட்களின் விளைச்சல், உற்பத்தி நின்றது. 

ஆகாரம் இன்றி ஜீவராசிகள் அவதிப்படுவதை,  அன்னை, கண்ணுற்றார்.  

லோகமாதாவிற்கு, தன் குழந்தைகள் பசியால்வாடுவதை காணப்பொறுக்கவில்லை. 

காசி என்னும் மகா புண்ணிய பூமியில், அட்சய திருதியை அன்று, ஸ்ரீ அன்னபூரணியாக, அவதாரம் செய்தார். 

அங்கு, தானே தன் கைப்பட அன்னம் தயார் செய்து, எல்லாருக்கும் வயிறு நிறைய ஆகாரம் அளித்தார். 

ஸ்ரீ சிவபெருமானும், கப்பரையைக் கையில் ஏந்தி, ஸ்ரீ பார்வதியிடம் பிக்ஷை பெற்றார். 

பகவானின் லீலை எல்லாமே ஒரு நன்மைக்காகத்தான் என்பதை நாம் உணரவே, நாடகம் அரங்கேற்றப்படுகிறது. எல்லாமே தேவ கைங்கர்யம். 

அட்சய திருதியை அன்று நகைக் கடைக்குப் படையெடுப்பதைத் தவிர்த்து,  ஸ்ரீ லக்ஷ்மி குடியிருக்கும், மஞ்சள், பச்சரிசி, கல் உப்பு ஆகியவைகளை வாங்க வேண்டும். 

அன்றைய தினம், தன்னால் இயன்ற தானத்தைச் செய்ய வேண்டும். 

அன்றைய தினம் சொல்ல வேண்டிய ஸ்லோகம். 

சங்க சக்ர கதாபாணே 
த்வாரகா நிலையாச்யுத 
கோவிந்த புண்டரீகாட்ஷ 
ரக்ஷமாம் சரணாகதம். 

எந்த இக்கட்டான நிலையிருந்தாலும், இந்த ஸ்லோகத்தைக் கூறினால், ஸ்ரீ கிருஷ்ண பரமாத்மாவின் அனுக்கிரகம் கிடைக்கும். 

அட்சய திருதியை அன்று,  அன்ன  தானம், வஸ்திர தானம் செய்து  அட்சயமாக வளத்தைப் பெருக்கிக் கொள்வோம். 

- மாலதி சந்திரசேகரன்

]]>
Atchaya Tritiya 2017, அட்சய திருதியை, அன்னபூரணி https://images.dinamani.com/uploads/user/imagelibrary/2017/4/25/w600X390/Akshaya-Tritiya.jpg https://www.dinamani.com/religion/religion-articles/2017/apr/25/atchaya-tritiya-2017-2690837.html
2721 ஆன்மிகம் கட்டுரைகள் ஆறுமுகப் பெருமானுக்கு அணி சேர்க்கும் முக்கியத் திருவிழா dn Thursday, July 28, 2016 12:11 PM +0530 தமிழ் மாதங்களில் "ஆடி'க்கும், "மார்கழி'க்கும் தனிப் பெருமை உண்டு. இவ்விரு மாதங்களையும் இறை வழிபாட்டிற்காகவே நம் முன்னோர்கள் அமைத்தனர். இறைவனின் திருவிழா வைபவங்களுக்கென்றே இரண்டு மாதங்களும் என்பதால், இந்த மாதங்களில் திருமண வைபவத்தைத் தமிழ் மக்கள் நடத்துவதில்லை. அதிலும் ஆடி மாதத்தில் அம்பிகைக்கும், அவளுடைய குமரன் முருகனுக்கும் கோயில்களில் கோலாகலமாகத் திருவிழா நடக்கும்.

அந்த வகையில், ஆடிக்கிருத்திகை அழகென்ற சொல்லுக்கு முருகா என்று போற்றப்பட்ட ஆறுமுகப் பெருமானுக்கு அணி சேர்க்கும் முக்கியத் திருவிழா.

சூரபத்மாதியர் செய்த கொடுமையால் தேவர்கள் சிவபெருமானிடம் தஞ்சம் புகுந்தனர். அவர்களின் இன்னல்களைக் களையத் திருவுளம் கொண்டார் ஈசன். அவருடைய நெற்றிக் கண்ணிலிருந்து வெளியான தீப்பொறியிலிருந்து ஆறு குழந்தைகளாக அவதரித்தார் ஆறுமுகப் பெருமான். அந்தக் குழந்தைகளுக்குக் கார்த்திகைப் பெண்கள் பாலூட்டி வளர்த்ததால் முருகனுக்குக் கார்த்திகேயன் என்ற திருப்பெயரும் ஏற்பட்டது. அதன்பின் ஆறுமுகக் கடவுள் சூரனை வதம் செய்து தேவர்களைக் காத்த வரலாற்றை புராணங்கள் எடுத்தியம்புகின்றன.

"கிருத்திகை நட்சத்திரத்தன்று விரதமிருந்து முருகனை வழிபடுவோருக்குத் துன்பங்கள் அனைத்தும் நீங்கி இனிமையான வாழ்வு அமையும்' என்று சிவபெருமான் கார்த்திகைப் பெண்களுக்கு அருள்பாலித்தார். எனவே ஒவ்வொரு மாதமும் வரும் கிருத்திகை நட்சத்திரம் முருகனுக்கு மிகவும் உகந்த நாளாயிற்று. மேலும் தமிழ் மாதங்களில் "கிருத்திகை' என்ற பெயரில் ஒரு மாதமும் அமைந்துள்ளது குறிப்பிடத்தக்கது. முருகப் பெருமான் அக்னியிலிருந்து தோன்றியவன் அல்லவா? அதை உணர்த்தும் வகையில் இம்மாதம் முழுவதும் தீப ஒளியால் இறைவனை வழிபாடு செய்தால் வாழ்வில் ஒளி பிறக்கும்.

வேத காலத்தில் கிருத்திகை நட்சத்திரமே முதலாவதாக இருந்தது. இது அம்பா, துலா, நிதத்னி, அப்ரயந்தீ, மேகயந்தீ, வர்ஷயந்தீ, சுபணிகா ஆகிய ஏழு நட்சத்திரங்களின் கூட்டமாகும். வேத நெறியில் ஒழுகும் அந்தணர்கள் கார்ஹபத்யம், ஆஹவனீயம், தட்சிணாக்னி ஆகிய மூன்று அக்னி கொண்டு யாக யக்ஞாதிகளை, வேத வேள்விகளைச் செய்வர். "மூன்று வகை குறித்த முத்தீச் செல்வத்து இரு பிறப்பாளர்'' என்று இதனை நக்கீரர், திருமுருகாற்றுப்படையில் போற்றுவார்.

இந்த யாகங்கள் ஆதானம் என்ற கர்மாவினால் செய்யப்படுகிறது. கிருத்திகை நட்சத்திரம் அக்னியின் நட்சத்திரம் என்றும் அந்த நட்சத்திரத்தில் அக்னியை ஆதானம் செய்ய வேண்டும் என்றும் வேதம் கூறுகிறது. ஏனெனில் நட்சத்திரங்களின் முகம் கார்த்திகை. மேலும் மற்ற நட்சத்திரங்கள் ஒன்று, இரண்டு, மூன்று அல்லது நான்கு நட்சத்திரங்களின் கூட்டமாகும். ஆனால் கிருத்திகை நட்சத்திரம் மட்டும் ஏழு நட்சத்திரங்களின் கூட்டமாகும். எனவே, அதில் ஆதானம் செய்பவரும் அவரது வம்சத்தாரும் அளவற்ற நன்மைகளை அடைகிறார்கள் என்று வேதம் கூறுகிறது. எனவே அவ்வளவு சிறப்புடையது கார்த்திகை நட்சத்திரம்.

"ஸ்ரீசுப்ரமண்ய கடவுள் க்ஷேத்திரக் கோவை பிள்ளைத் தமிழ்' என்னும் பிரபந்தத்தில் காஞ்சிபுரம் சிதம்பர முனிவர் "கார்த்திகை மலை'' என்னும் தலத்தை ஒரு பாடலில் போற்றுகிறார். இது முருகன் தவமிருந்து சிவபெருமானை அர்ச்சனை செய்து வழிபட்ட மலையாகும். மஹாராஷ்டிர மாநிலத்தில் புனே அருகில் உள்ள பார்வதி மலையில் கார்த்திகேயன் கோயில் உள்ளது. இதனை கார்த்திகை மலை என்று அழைக்கிறார்கள்.

அனைத்து சிவாலயங்களிலும், முருகன் ஆலயங்களிலும் ஆடிக் கிருத்திகையன்று பக்தர்கள் பால்குடம் எடுத்து வருவதும், பல விதமான காவடிகள் சுமந்து வந்து தண்டபாணியை வழிபடுவதும் அரங்கேறுகிறது.

மனிதனைப் பரம்பொருளுடன் ஐக்கியப்படுத்துவதற்கு ஆன்றோர் கண்ட சிறந்த நெறிகளே விரதங்கள் எனப்படும். இறைவனிடம் பக்தி பூண்டு தன்னைப் பக்குவப்படுத்திக்கொள்ள விரதங்களைப்போல ஒருவருக்கு வேறு எதுவும் துணை புரிவதில்லை. "வரிக்கப்படுவது விரதம்' "உடலளவு விரதம்' "காப்பது விரதம்' என்ற ஆன்றோர் வாக்குகளை நாம் சிந்திக்க வேண்டும். புலன்களை வெல்லுதலும் ஆன்மாவின் வெற்றிக்கு உற்ற துணையாகும். "புலன் ஐந்தும் வென்றான் தன் வீரமே வீரம்'' என்பது முதுமொழியல்லவா?

விநாயகப் பெருமான் கூறியபடி கிருத்திகை விரதத்தை பன்னிரண்டு ஆண்டுகள் அனுஷ்டித்த நாரதர், முருகன் அருளால் தேவரிஷியாக உயர்ந்தார். இவ்விரதத்தை மேற்கொண்ட மனு என்பவன் மன்னன் ஆனான். எனவே கிருத்திகை விரதம் மிக மிக உயர்ந்தது. ஆகவே ஆடிக் கிருத்திகையில் நாமும் விரதமிருந்து ஆறுமுகனின் அருள் பெறுவோம்.

]]>
ஆடிக்கிருத்திகை https://images.dinamani.com/uploads/user/imagelibrary/2016/7/28/w600X390/murugan.jpg https://www.dinamani.com/religion/religion-articles/2016/jul/28/ஆறுமுகப்-பெருமானுக்கு-அணி-சேர்க்கும்-முக்கியத்-திருவிழா-2721.html
2690 ஆன்மிகம் கட்டுரைகள் அம்மன் கோயில்களில் ஆடித்திருவிழா dn Wednesday, July 27, 2016 02:35 PM +0530 செங்கல்பட்டு பகுதியில் உள்ள கோயில்களில் ஆடித்திருவிழா, கூழ்வார்த்தல் அண்மையில் நடைபெற்றது.

செங்கல்பட்டு பழைய பேருந்துநிலையம் அருகில் உள்ள கடும்பாடி அம்மன் கோயிலில் ஆடித்திருவிழா நடைபெற்றது. இதையொட்டி, கடந்த 18-ஆம் தேதி காப்புகட்டுதல் நிகழ்ச்சியும், 22-ஆம் தேதி கரக ஊர்வலமும் நடைபெற்றது. இதைத்தொடர்ந்து, தீமிதி விழாவும், அம்மன் வீதி உலாவும் நடைபெற்றது.

24 ஆம் தேதி கடும்பாடி அம்மனுக்கு சிறப்பு அபிஷேகமும் அலங்காரமும் நடைபெற்றது. இதைத்தொடர்ந்து கூழ்வார்த்தல் நடைபெற்றது. விழாவுக்கான ஏற்பாடுகளை கே.ஜெயவேல், ஜே.பாஸ்கர் உள்ளிட்டோர் செய்திருந்தனர்.

இதேபோன்று, செங்கல்பட்டு காட்டுநாயக்கன் வீதியில் உள்ள முத்துமாரியம்மனுக்கு 56-ஆம் ஆண்டு உற்சவத்தையொட்டி, கடந்த 22-ஆம் தேதி காப்புகட்டுதல் நிகழ்ச்சியும், மறுநாள் பூங்கரகம் வீதிவலமும், 24 ஆம் தேதி கூழ்வார்த்தில் நிகழ்ச்சியும் நடைபெற்றன.

இரவு உற்சவ அம்மன் அலங்கரிக்கப்பட்டு வீதி உலா நடைபெற்றது. இதில், ஏராளமான பக்தர்கள் கலந்துகொண்டு அம்மனை வழிபட்டனர். விழாவுக்கான ஏற்பாடுகளை அறங்காவலர்கள் டி.பாலகுமார், ஆர்.வீரராகவன், காட்டுநாயக்கன் கிளை சங்கத் தலைவர் கே.எஸ்.முருகன், செயலாளர் இ.செல்வம், தர்மகர்த்தா கே.வெங்கடேசன், துணைத் தலைவர் ஓ.குமார் உள்பட கோயில் நிர்வாக குழுவினர், பொதுமக்கள் செய்திருந்தனர்.

செங்கல்பட்டு முருகேசனார் தெருவில் உள்ள கங்கையம்மன் கோயில் ஆடி உற்சவ விழாவில் காப்புகட்டுதல், கரக ஊர்வலம் உள்ளிட்ட நிகழ்ச்சிகள் நடைபெற்றன.

24 ஆம் தேதி கூழ்வார்த்தலைத் தொடர்ந்து, அம்மனுக்கு சிறப்பு அபிஷேகம், அலங்காரம், ஆரத்தி நடைபெற்றது. இரவில் அம்மன் சிறப்பு அலங்காரத்துடன் ரத வீதியுலா நடைபெற்றது. இதற்கான ஏற்பாடுகளை விழா குழுவினர், கோயில் நிர்வாகிகள் செய்திருந்தனர்.
 

]]>
ஆடித்திருவிழா, கூழ்வார்த்தல் https://www.dinamani.com/religion/religion-articles/2016/jul/27/அம்மன்-கோயில்களில்-ஆடித்திருவிழா-2690.html