Dinamani - தினமணி கதிர் - https://www.dinamani.com/weekly-supplements/dinamani-kathir/ https://www.dinamani.com/ RSS Feed from Dinamani en-us Copyright 2016 Dinamani. All rights reserved. 3076897 வார இதழ்கள் தினமணி கதிர் சிரி... சிரி... சிரி... சிரி...  Monday, January 14, 2019 01:04 PM +0530 ""காலண்டர் ஒன்று வாங்கினால் ஒன்று இலவசம்ன்னு 
போட்டதுக்கு ஏன், எல்லாரும் சண்டை போடுறாங்க?''
""பின்னே என்னங்க, இந்த வருடம் காலண்டர் 
ஒன்று வாங்கினால்... போன வருடக் காலண்டர் ஒன்று இலவசமாம்!!!''

- சீனி. செந்தில்குமார், தேனி.

 

""தலைவரே,  பொம்பளைங்களை அழ வைக்காதீங்க. நல்லாவே இருக்கமாட்டீங்க''
""யார் சொன்னா, டி.வி. மெகா சீரியல் தயாரிப்பாளர்கள் எல்லாரும் நல்லாதானே இருக்காங்க!''

- தீபிகா சாரதி, சென்னை.

 

அலுவலகத்தில் மேல்அதிகாரி:  ""ஏன் லேட் ?''
அலுவலர்:  ""வீட்டுல, மாமியாரையும் மருமகளையும் சமாதானம் பண்றதுக்குள்ள 
கொஞ்சம் லேட் ஆயிடுச்சு சார்!'' 
"" என்னை சமாதானப் படுத்தணும்னு... நீ இதைச்  சொல்லலையே?'' 

- வி. ரேவதி, தஞ்சாவூர்.

 

"" பட்டிமன்றத்துல "பானையில வெச்ச பொங்கல் சிறப்பா?' -  "குக்கர்ல வெச்ச பொங்கல் சிறப்பாங்கற' தலைப்புக்கு
நடுவர் என்ன தீர்ப்பு சொன்னார்?'' 
""பொங்கலை சாப்பிட்ட  பிறகுதான் தீர்ப்பு சொல்ல 
முடியும்ன்னு சொல்லிட்டார்!'' 

- அ. செல்வ குமார், திருவொற்றியூர்.

 

"" நகை வாங்குங்க, டிரஸ் வாங்குங்க, ஸ்வீட் வாங்குங்கன்னு விளம்பரத்துல சொல்லுறதை எல்லாம் வாங்குறியே... 
எப்படி'டி முடியுது?''
""சிம்பிள்! கடனும் வாங்குறேனே!''

- சாய், சென்னை 

]]>
https://www.dinamani.com/weekly-supplements/dinamani-kathir/2019/jan/13/சிரி-சிரி-சிரி-சிரி-3076897.html
3072541 வார இதழ்கள் தினமணி கதிர் அப்பாவின் வேஷ்டி: பிரபஞ்சன் நினைவாக... பிரபஞ்சன் Monday, January 14, 2019 11:53 AM +0530 அப்பாவிடம் ஒரு பட்டு வேஷ்டி இருந்தது. அப்பாவிடம் வெண்பட்டும், பொன்னிறப் பட்டு வேஷ்டிகளும் நிறைய இருந்தாலும் கூட, குழந்தைகளாகிய எங்களுக்கு அவருடைய சிவப்புப் பட்டு வேஷ்டியே அற்புதமானதாகத் தோன்றியது.

சிவப்பென்றால் சுத்தச் சிவப்பும் இல்லை. குங்கும வண்ணமும் இல்லை. செப்புப் பாத்திரத்தைப் புளிபோட்டு விளக்கிப் படிக் கல்லில் வைத்து விட்டுக் குளிப்பார்களே, அப்போது பார்த்திருக்கிறீர்களா? நீங்கள்! உதயகாலத்துச் சூரிய ரேகைகள் பட்டுத் தகதகக்குமே, அந்தச் செப்புப் பாத்திரம் - அது மாதிரியான வேஷ்டி அது.

முழுதும் செப்புக் கலரும் இல்லை. கரை பச்சை நிறம். நாலுவிரல் அகலம். கரையில் சரிகை வேலைப்பாடுகள். சரிகை வேலைப்பாடு என்ன என்கிறீர்கள்? வாத்துகள் ஒன்றன்பின் ஒன்றாய் அணிவகுத்துச் செல்கிற சித்திரம். அவை வாத்துகள் அல்ல; அன்னப்பறவைகள் என்றாள், அம்மா. நாங்கள் அன்னப்பறவைகளை நிஜத்தில் பார்த்ததில்லை. அந்த வேஷ்டியின் கரையில்தான் பார்த்திருக்கிறோம். எதுவானால்தான் என்ன? உயிருள்ள ஜீவராசிகள்.

அந்த வேஷ்டி சாதாரணமாகக் கண்களில் காணக் கிடைப்பதில்லை. அப்பா, அதை அவருடைய ஆளுயர, மிக அகலமான அலமாரியில் வைத்திருப்பார். அந்த மாதிரி அலமாரிகள் எல்லாம் இப்போது கிடைப்பதில்லை. ஒற்றை ஆள் அகலம்தானே இப்போதைய அலமாரிகள். அதுவோ மூன்று அலமாரிகளை பக்கம் பக்கமாக நிறுத்தி வைத்ததுபோல் இருக்கும்.

அப்பா அலமாரியில் இருந்து, அதை எடுக்கப்போகும் நேரம் எங்களுக்குத் தெரியும். எனக்கும் என் தங்கை ராஜேஸ்வரிக்கும். பண்டிகை  மற்றும் தாத்தாவுக்கு தெவஷம் முதலான நாட்களில்தான் அது வெளிவரும். அந்த நாட்கள்தான் எங்களுக்கு முந்தியே சொல்லப்பட்டிருக்குமே! அப்பா குளித்துவிட்டு வந்து அந்த வேஷ்டியைத்தான் எடுத்து உடுத்துவார். அப்பா எப்போது குளித்து விட்டு வருவார் என்று தவம் கிடப்போம், அலமாரிக்கு முன்னால்.

அப்பாவுக்குக் குளிக்க ஒரு மணி நேரம் அவசியப்படும். அநியாயத்துக்கு ஏன் அவர் தாமதம் பண்ணுகிறார் என்று இருக்கும். அது குழந்தைப் பருவம். கேள்விகளால் மட்டுமே ஆன பருவம். இப்போது தெரிகிறது. குளிப்பது அழுக்குப் போகவா? அழுக்குப் போகக் குளித்தது யார்? குளிப்பது ஒரு சுகம். உச்சந்தலையில் விழுந்த குளிர்ச்சி வழிந்து வழிந்து பாதத்துக்கு வருகிற இன்பத்துக்குத் தானே குளிப்பது... குளித்த பின் ஏற்படுகிற புத்துணர்ச்சிக்குத்தானே குளிப்பது? அப்பா ஒரு மணி நேரம் எடுத்துக் கொண்டது நியாயம் என்றே தோன்றுகிறது.

சரி! குளித்ததும் சட்டுப் புட்டென்று வந்து வேஷ்டியை எடுப்பார் என்றா நினைக்கிறீர்கள்? அதுதான் இல்லை. குளித்தும், கோமணத்தோடு வாசலுக்கு வந்து நின்று விடுவார். ஈரத்தைப் பாதி தானும், மீதி சூரியனும் துடைக்க வேணும். நாங்கள் அப்பாவையே பார்த்துக் கொண்டு இருப்போம். நீர் முத்துக்கள் அவர் முதுகில் கோடு கிழித்துக் கொண்டு இறங்குவதைப் பார்க்க வியப்பாய் இருக்கும். அவர் முதுகே ஒரு பெரிய தாமரை இலையாகவும், நீர்த்துளிகள் முத்துக்களாகவும் தோணும். நிதானமாகவும், அங்குலம் அங்குலமாகவும் துடைத்து ஈரம் போக்குவார். அப்பாவின் உடம்பு சிவந்து போய்விடும். ஏற்கெனவே அவர் சிவப்பு. குளித்தபின், உடம்பு பழுத்துவிட்டது மாதிரி இருக்கும்.

"மணியாகுது.. சீக்கிரம் வந்து படைச்சா என்ன?' என்பாள் அம்மா. இதைக் கோபமாகவும் குற்றச்சாட்டாகவும் சொல்வாள் என்கிறீர்களா! இல்லை! இன்னும் கொஞ்ச நேரம்தான் ஆகட்டுமே என்று அப்பாவைத் தட்டிக் கொடுப்பதுபோல் இருக்கும். கூரை எரவானத்தில் ஒரு கையை வைத்துக் குனிந்து, வாசலில் நிற்கும் அப்பாவைப் பார்த்துச் சிரித்துக் கொண்டு அம்மா இதைச் சொல்கையில் எங்களுக்குக் கோபம் கோபமாய் வரும்.

அப்பாடா! ஆச்சு... ஒரு வழியாகக் குளித்து முடித்துத் துவட்டிய துண்டை இடையில் கட்டிக்கொண்டு, கோமணத்தை உருவிப் பிழிந்து, பத்துத் தடவை ஈரத் தூசி பறக்க உதறி உதறி வாசலில் கட்டியிருக்கும் கொடியில் காயப் போடுவார். அது காற்றில் பறந்து விடாமல் இருக்க, முனைகள் இரண்டையும் பிடித்து முடிச்சுப் போடுவார். அப்புறம் தலைமுடியை, தலையைக் கவிழ்த்துத் தட்டித் தட்டி ஈரம் போக்குவார். தெறிக்கும் நீர்த்தூசுகள், சின்னஞ் சிறு கொசுக் கூட்டம் மாதிரி இருக்கும். அப்புறம் கூடத்துக்கு வருவார், அப்பா. சடாரென்று வந்தால் தேவலையே! அதுதான் இல்லை. கூடத்து மிதியடியில் காலை இப்படி அப்படிப் புரட்டிப் புரட்டி நன்கு மணல், மண்போகத் துடைப்பார். காலில் ஒரு துளி அழுக்கு இருக்காது. அழுக்கு அவரது ஜென்மப் பகை ஆச்சே! எங்களுக்குத் தெரியுமே. அப்புறம்தான் அலமாரியைத் திறப்பார், அப்பா.

அந்தக் கணம் ஓர் அபூர்வமான கணம். கதவைத் திறந்ததும், குபீரென்று பச்சைக் கற்பூர வாசனை வந்து தாக்குமே, சிலிர்க்க அடிக்குமே உடம்பை, அந்தக் கணம் அதற்காகத்தானே காத்திருக்கிறோம். இத்தனை நாழி காத்திருக்கிறோம். நாங்கள் மூக்கு, வாய் இரண்டையும், கரை மீன் திறப்பது போலத் திறந்து திறந்து மூடி அந்த வாசனையை அனுபவிப்போம். அலமாரிக்குள் ஒரு சின்ன ஜாதிக்காய் பெட்டி வைத்திருப்பார். அந்தப் பெட்டிக்குள் என்ன இருக்கும்? ஒருநாள், ""அப்பா... அப்பா... அந்தப்  பெட்டியை எனக்குக் காட்டுப்பா!'' என்றேன். அப்பா சிரித்துக்கொண்டே என்னைத் தூக்கிப் பெட்டியண்டைக் காட்டினார். ஒரு வெள்ளைத் துண்டில் சுற்றி வைக்கப்பட்ட வேஷ்டி, சுருள் சுருளாகச் சுற்றி வைக்கப்பட்ட காகிதம், (பத்திரங்கள் என்று பின் நாளில் தெரிந்து கொண்டேன்) ராணி, ராஜா படம் போட்டு நோட்டுகள், தங்கக் காசுகள், அப்பாவுடைய சிவப்புக்கல், வெள்ளைக்கல் மோதிரங்கள் எல்லாம் இருந்தன. ராஜி பொறுத்துக் கொள்வாளா என்ன? ""நானும் பார்க்கணும்பா...'' என்றாள். அப்பா அவளையும் பெட்டித் தரிசனம் பண்ணி வைத்தார்.

அப்பா இப்போது அந்தப் பெட்டியைத் திறந்தார். ஜாக்கிரதையாக அந்தச் சிவப்பு வேஷ்டியை எடுத்துக்கொண்டு அறைக்குள் போனார். துவைத்துக் காயப்போட்ட அன்டிராயர்கள் அப்பா அறையில், கொடியில் தொங்கும். அவைதாம் எவ்வளவு பெரியவை! ஒன்றை வெட்டி ராஜிக்கு பாவாடையும், சட்டையும் தைக்கலாம் என்று இருக்கும். அப்பா முட்டிவரை நீளும். அந்த அன்டிராயரைப் போட்டுக்கொண்டு, அதன் மேல் வேஷ்டியைக் கட்டிக் கொண்டால் தான் அப்பாவுக்கு நிற்கும்!

அப்பா வேஷ்டியைக் கட்டிகொண்டு வெளியே வருவார். அடடா... நெருப்பைச் சுற்றிக்கொண்டு  வருவதுபோல் அல்லவா இருக்கும். அந்த வேஷ்டியில் தான் அப்பா எவ்வளவு அழகாகத் தெரிந்தார். அவரால் அந்த வேஷ்டிக்கு மகிமையா, அல்லது அந்த வேஷ்டியாலா? அப்பாவை அப்போது கட்டிக்கொள்ள வேண்டும் போல் இருக்கும். கட்டிக் கொள்வேன். பச்சைக் கற்பூரத்தின் வாசனையோடு, அந்தப் பட்டு சில்லென்று குளிர்ச்சியாய், பாப்பாவின் கன்னம்போல மிருதுவாய் இருக்கும். அதைத் தடவித் தடவிச் சந்தோஷம் கொள்வேன்.

அந்த வேஷ்டியோடுதான் பண்டிகை மற்றும் விசேச நாட்களில், தெவஷத்தின்போது அப்பா பூஜை எல்லாம் செய்வார். பூஜை என்றாலே எனக்கு நினைவில் நிற்பவை இரண்டு விஷயங்கள்தாம். ஒன்று சாப்பாடும் அன்றைக்கு சீக்கிரம் ஆகாது, தாமதம்  ஆகும்.  வடை, பாயசம் என்று பட்டியல் நீள்வதால் அப்படி. ரெண்டாவது, அந்த நாட்களில் இனிப்புப் பட்சணங்கள் கட்டாயம் இருக்கும். தவிர சொந்தக்காரர்கள் நிறையப்பேர் வருவார்கள். மரம் ஏறிய கையோடு குடுக்கையும், வடமுமாகச் சிலர் வருவார்கள். தென்னை மரத்தைத் தேய்த்து ஏறிய காரணமாகவும், கள்ளுக்குப் பானை சீவியதன் காரணமாகவும், அவர்கள் மேல் கள்நெடி அடிக்கும். கள் வாசனை, பூவைப்போலவே நல்ல வாசனைதான். சாப்பிட உட்காருவதற்காகக் குடுக்கையைச் சுவர் ஓரம் சாய்த்து வைப்பார்கள். அதில் உள்ள அரிவாளின் பளபளப்பு என்னைக் கவர்ந்த ஒன்று. அதைக் கையில் எடுத்துப் பார்க்கும் தைரியம்தான் இன்று வரை ஏற்படவில்லை. அந்த அரிவாளின் கூர்மையும் பட்டின் பளபளப்பும் சமம்.

இளமைக்காலத்தில் எனக்குள் ஒரு லட்சியம்தான். பெரியவர்கள், ""நீ பெரியவன் ஆனதும் என்ன செய்யப் போகிறாய்?'' என்று  கேட்பார்கள். டக்கென்று பதில் சொல்வேன். ""நான் டாக்டராவேன்'' - இல்லையெனில், ""நான் இன்ஜீனியர் ஆவேன்'' என்று சமயத்தில் ஞாபகத்துக்கு வந்ததைச் சொல்வேன். கேட்டவர்கள் திகைத்துப் புருவத்தை மேலே உயர்த்தி என்னைப் பார்ப்பார்கள். அப்பாவுக்கும் அம்மாவுக்கும் பெருமை நிலை கொள்ளாது. ஆனால், இந்த டாக்டர் பெருமையும், இன்ஜினீயர் பெருமையும் என் மனசுக்குள் இல்லை. பெரியவர்களுக்கு முன் நான் பொய்தான் சொன்னேன். இந்தப் பொய் ரசிக்கத்தக்க பொய். பெரியவர்கள் துண்டமாக்கிக் கொடுத்திருந்த இதை அவர்களிடமே திரும்பவும் நான் வீசினேன். சந்தோஷமாக வாலை ஆட்டிக் கொண்டு அவர்கள் அதை விழுங்கிக் கொண்டார்கள்.

இதைச் சொல்ல வெட்கம் என்ன? எனக்குப் பெரியவன் ஆனதும் அப்பாவின் வேஷ்டியைக் கட்டிக் கொள்ளவேண்டும்! இதுவே என் லட்சியமாக இருந்தது. நான் பெரியவன் ஆக ஆசைப்பட்டது இதற்காகத்தான். பெரியவன் ஆனால் அப்பாவைப் போல மீசை முளைக்குமே! மார்பில் சுருள் சுருளாக முடி முளைக்குமே.. முக்கியமான விசேஷ நாட்களில், அந்தச் சிவப்புப் பட்டு வேஷ்டியைக் கட்டிக்கொண்டு நான் சாமி கும்பிடுவேனே... நான் பெரியவன் ஆக வேண்டுமே!

மடித்தே வைக்கப்பட்டுக் கிடந்ததால், அந்த வேஷ்டி எப்போதும் மடிப்புக் குலையாமல் இருக்கும். மடிப்புகள் பிரிக்க முடியாதனவாக இருக்கும். கடைசி வரை அன்னங்கள் முழுமையாகவே இருந்தன. சரிகைக்கரை இற்று விழவில்லை. நெசவு நேர்த்தி அப்படி. அது  

அந்தக் காலத்துக் கை வேலைத் திறன். அவசர வாகனயுகம் தோன்று முன்பே தோன்றிய ஒரு நெசவுக் கலைஞனின் கை நேர்த்தி அப்படி உருவாகி இருந்தது. "இதை எங்கு வாங்கியது?' என்று அப்பாவிடம் கேட்டு வைத்துக் கொள்ளவில்லை நான். காவிரிக்கரையில், சோற்றுக்குப் பஞ்சம் இல்லாத, வெற்றிலை பாக்குப் போட்டு சிவந்த வாயுடன், உடம்பில் இளஞ்சூடு பரவிய திருப்தியில் ஒரு மனிதன் தன் மனைவியோடு சேர்ந்து நெய்த வேஷ்டியாக இது இருக்க வேண்டும். மாயவரம், கூரைநாடு, திருபுவனம் என்று ஏதாவது ஒன்றாய் இருக்கக் கூடும். பிறப்பிடம், மூலம் எதானால் என்ன? பிறந்த பயனை, கர்மாவைக் குறைவற, பரிபூரணமாகச் செய்தது அது என்பது சத்தியம்.

எனக்குக் கல்யாணங்களுக்குப் போவதில் அந்தக் காலத்தில் பெருத்த ஆர்வம் இருந்தது. காரணம் இதுதான். மாப்பிள்ளை பட்டுடுத்திக் கொண்டு இருப்பார். பட்டு வேஷ்டியைப் பார்ப்பதே இன்பமான அனுபவமாக இருக்கும். எத்தனை, எத்தனை வகையான பட்டுடுத்திப் பெண்கள் கல்யாணங்களுக்கு வருகிறார்கள்! பட்டுப் புடவைகளை வைத்துக்கொண்டு கல்யாணங்களுக்கு ஏங்குகிறார்கள் பெண்கள். கல்யாணங்களே உலகில் இல்லாது போனால், இந்தப் பெண்கள் கண்ணீர் வடிப்பார்கள். பட்டுடுத்தி யாரிடம் காட்டிப் பரவசப் பட்டுக் கொள்வது?

என் கனவுகள் கூட அந்தக் காலத்தில் பட்டாய் இருந்தன. கனவுகளில் அன்னப்பறவைகள் அணிவகுத்து வரும். ஆகாயம் செம்புக் கலரில், கத்தியாய் மின்னும். அந்தச் செம்பு ஆகாயத்தின் ஊடே, பச்சை நிறத்தில் ஒரு நீளமான ஆறு. அந்த ஆற்றில் அந்த அன்னங்கள் நீந்தின.

அந்த வேஷ்டியை அப்பா துவைத்து நான் இரண்டு முறை பார்த்திருக்கிறேன். குழந்தைப் பாப்பாவைக் குளிப்பாட்டுவது மாதிரி இருக்குமே! அதற்குச் சுடு தண்ணீர் ஆகாது. பச்சைத் தண்ணீரில் தான் அதைக் குளிப்பாட்டுவார். சவுக்காரம் அதற்கு ஆகாதாம். ஆகவே சந்தன சோப்பைத்தான் அப்பா உபயோகிப்பார். அப்பா குளித்தது மைசூர் சந்தன சோப்பில். அதற்கும் முந்தி கதம்ப சோப்பில். பிரான்சில் இருந்து வந்த கதம்ப சோப். நாங்கள் கதம்ப சோப் என்போம். இறக்குமதி நின்று போனவுடன் மைசூர் சந்தன சோப். அதைத்தான் இதற்கும் போடுவார். சோப் போடுவது தடவிக் கொடுப்பது மாதிரி இருக்கும். அம்மா எங்களுக்கு 

எண்ணெய் தேய்த்து விடுகிற முரட்டுத்தனம் இருக்காது. அவ்வளவு மெது. கசக்கிப் பிழிய மாட்டார். மெதுவாக நீரில், அகலவாக்கில் வேஷ்டியின் முனைகளைப் பிடித்துக்கொண்டு அலசுவார். பிறகு,  தண்ணீர்த் துளி எங்கள் மேல் தெறிக்க, உதறுவார். ரொம்பவும் உதறக்கூடாது. நாள்பட்ட துணி, கிழித்துவிடக் கூடும். உதறும்போது. மழைச் சாரலில் நிற்பதுபோல் இருக்கும், எங்களுக்கு. அப்புறம் நிழலில் காயப்போடுவார். வெயில் பட்டால் நிறம் வெளுக்கக் கூடும். காய்ந்ததும் அப்பாவுக்குச் சொல்ல வேண்டியது எங்கள் பொறுப்பு. நாங்கள் மாற்றி மாற்றி அஞ்சு நிமிஷத்துக்கு ஒரு முறை துணியைத் தொட்டுப் பார்த்துக் கொண்டே இருப்போம். காய்ந்து விட்டதா என்று பார்ப்பதற்காகத்தான். எங்களுக்கு இது ஒரு சாக்கு. அந்தச் சாக்கில் வேஷ்டியைத் தொட்டுப் பார்த்துக்கொண்டே இருக்கலாமே!

சாயங்காலம் வாக்கில் வேஷ்டி காய்ந்து விட்டிருக்கும். அப்பாவிடம் சொல்ல ஓடுவோம். அப்பாவே வந்து, நிதானமாக அதைக் கொடியில் இருந்து எடுத்து, மூலை பிசிறில்லாமல் இழுத்து மடித்து, மீண்டும் அந்தப் பெட்டிக்குள் வைத்துவிடுவார். இனி அதன் உபயோகம் அடுத்த நல்ல நாளில்தான்.

நாளடைவில் எனக்கு மீசை முளைத்தது. ஒரு சிநேகிதனின் சகோதரிக்கு லவ் லட்டரும் கொடுத்தேன். உதை வாங்கினேன். நியாயம் தானே! அப்புறம் கல்லூரிக்குச் சென்றேன். என்னமோ படித்தேன். என் மூளையை ஆக்கிரமித்துக் கொள்ள எவ்வளவோ விஷயங்கள் இருந்தன.

என் கவனத்தைக் கவர எவ்வளவோ நிகழ்ச்சிகள், நடப்புகள், உலகம் ஜீவத் துடிப்போடு ஒவ்வொரு கணமும் அல்லவா பிறந்து இறந்து,  தன்னைப் புதுப்பித்துக் கொள்கிறது. என் மனசில்தான் எத்தனை ஆவாகனங்கள்.... கம்பன்; கதை சொல்லிகள்; கொடி மரத்து மூலை வக்கீல் ஜெகந்நாதையர் மகள் உமா மகேஸ்வரி எல்லோரும் சேர்ந்து என்னை உருமாற்றி அடித்து விட்டார்களே, கம்பியை நகையாக்குவது போல...! இடையிடையே அந்தச் செப்புப் பட்டு வேஷ்டியும் என் நினைவில் ஆடும். நீ எங்கு, எவ்வாறு இருக்கிறாய்?

அதைப் போற்றிக் கொண்டாடி, பயன் துய்க்க அப்பா இல்லை. பெட்டியுள் இருக்கும் பாம்பென உயிர்த்துக் கொண்டிருக்கும் அது என்பது எனக்குத் தெரியும். ஆண்டுகள் பல கழிந்து சொந்த ஊருக்கு வந்தபோது ஒரு சம்பவம் நிகழ்ந்தது. அப்போது விநாயக சதுர்த்தி வந்தது. நன்றாக நினைவு இருக்கிறது. ராஜி, கல்யாணம் செய்துகொண்டு போய்விட்டிருந்தாள். நான்தான் பிள்ளையார் வாங்கி வந்தேன். அச்சுப் பிள்ளையார்தான். மூக்கும், முழியும் கன கச்சிதம். இந்தச் சாமிதான் என்ன அழகான கற்பனை! என்னையே படைக்கச் சொன்னாள், அம்மா.

மனசுக்குள் ஒரு படபடப்பே எனக்கு ஏற்பட்டுவிட்டது. அந்தப் பெட்டிக்குள் இருக்கும் வேஷ்டியை நினைத்துத்தான். சுய நினைவின்றித்தான் குளித்தேன். ஈரம் போகாமல் துவட்டிக்கொண்டு, அப்பாவின் அலமாரியைத் திறந்தேன். அந்தப் பச்சைக்கற்பூர வாசனை இன்னும் இருந்தது. வாசனை போகாது போலும்! அனுபவித்தேன். உடன் ராஜி இல்லையே என்று வருத்தமாய் இருந்தது. ஜாக்கிரதையாகப் பெட்டியையும் திறந்தேன். அப்பாவின் மோதிரங்களைத் தவிர மற்றவை அனைத்தும் அங்கு இருந்தன. மோதிரங்கள், என் கல்லூரிக் கட்டணமாகவும், சாப்பாட்டுச் செலவாகவும் ஏற்கனவே மாற்றம் அடைந்திருந்தன.

வேஷ்டியை வெளியே எடுத்தேன். அதன் மேல் சுற்றிய துண்டை நீக்கினேன். அதே குழந்தையின் மென்மை. அதே கத்தியின் பளபளப்பு. அதே வாசனை. கொஞ்சம் கூட நிறம் மங்கல் இல்லை.

இடுப்பில் சுற்றிக் கொண்டேன். மனசு அப்பாவை நினைத்துக் கொண்டது. மயிர்க் கால்கள் குத்திட்டு நின்றன. வாழை இலையைச் சுற்றிக் கொண்டது போல் இருந்தது. அவ்வளவு மழமழப்பு.

மனைப் பலகையை எடுத்துப் போட்டுக்கொண்டு பிள்ளையாருக்கு முன் அமர்ந்தேன். ஓர் ஓசை, முனகலோடு வேஷ்டி உயிரை விட்டது. என் பின் பக்கத்து மடிப்புகள் தோறும் நீளம் நீளமாகக் கிழிந்திருந்தது. எழுந்து நின்று கொண்டேன். இருட்டில் குழந்தையின் கையை மிதித்து விட்டாற்போல் இருந்தது.

அடுப்பங்கரையிலிருந்து அம்மா, கொழுக்கட்டைப் பாத்திரத்தோடு வந்தாள்.
""என்னடா, கிழிஞ்சு போச்சா... போவட்டும்... அப்பா காலத்து வேஷ்டி! உனக்கு எப்படி உழைக்கும்.... போயி, உன் வேஷ்டியைக் கட்டிக்கிட்டு வந்து காரியத்தைப் பாரு!'' என்றாள் அம்மா.

நான் என் டெரிகாட்டன் வேஷ்டியை எடுத்துக் கட்டிக்கொண்டு, பிள்ளையாருக்கு முன் உட்கார்ந்தேன். டெரிகாட்டன் வேஷ்டிதான் எனக்குச் சரி என்று பட்டது. ஆனாலும் மனசுக்குள் எங்கோ வருத்தமாகத்தான் இருந்தது.

]]>
https://www.dinamani.com/weekly-supplements/dinamani-kathir/2019/jan/07/அப்பாவின்-வேஷ்டி-பிரபஞ்சன்-நினைவாக-3072541.html
3076889 வார இதழ்கள் தினமணி கதிர் இருவர்! ஸிந்துஜா  Sunday, January 13, 2019 12:00 AM +0530 ""எத்தனை மணிக்கு இண்டர்வியூ?'' என்று முப்பதாவது தடவையாக அப்பா கேட்டார்.
""பதினோரு மணிக்கு'' என்று அலுக்காமல் பதில் சொன்னான் ஜானகிராமன். அவருடைய டென்ஷனை அவனால் புரிந்து கொள்ள முடிந்தது. இது அவனது பதினாறாவது இண்டர்வியூ.
""வழக்கமா நல்ல ராகு காலமா பாத்து கூப்பிடுவாங்க . இன்னிக்கு பொழச்சுப் போகட்டும்னு ராகு காலத்தை விட்டுட்டாங்க போல. எல்லாம்  நல்லதுக்குத்தான். கடவுள் கண் தொறந்து பாக்கட்டும்'' என்றாள் ஈசிசேரில் உட்கார்ந்திருந்த பாட்டி.
""சாமிக்கு ரெண்டு மந்திரம் சொல்லிட்டு வந்து சாப்பிடு'' என்று அடுப்பாங்கரையிலிருந்து  அம்மாவின் குரல் கேட்டது. 
நல்ல வேளையாக வீட்டில் இருப்பவர்களின் எண்ணிக்கை அவ்வளவுதான். இன்னும் இரண்டு பேர் இருந்தால் இன்னும் இரண்டு பரிதாபத்தை, இறைஞ்சலை, ஏக்கத்தை, பயத்தை காண்பிக்காமல் காண்பிக்கும் குரல்கள் கிளம்பி வந்திருக்கும். இவர்களுக்காகவாவது, இந்தச் சூழலுக்காகவாவது அவனுக்கு சீக்கிரம் வேலை கிடைத்து விட வேண்டும். கிளம்புவதற்கு ரெடியாக  ஹாலுக்குள் சென்றான்.
ஹாலில் இருந்த பழைய மர மேஜையின் டிராயரின் உள்ளே இருந்த ஃபைலை எடுத்து மேஜை மீது வைத்துக் கொண்டான். படிப்பு வயது நன்னடத்தை சான்றிதழ்கள் அடங்கிய  ஃபைல். நிறையக் காகிதங்கள் அடங்கிக் கனமாக இருந்தது. டிராயரைத் துழாவும் போது கையில் இடறிய பர்ûஸயும் எடுத்து மேஜை மீது வைத்தான். அது அவ்வளவு கனமாக இல்லை.
பூசை  அறைக்குள் சென்றான். சுவரில் சிவனும் பார்வதியும் , வெங்கடாசலபதியும், ரமணரும், சீரடி சாயியும், காஞ்சி முனிவரும்  தத்தம் கருணை நிறைந்த பார்வைகளுடன் இருந்தார்கள். அவன் ஆர்.ஸி.ஸ்கூலில் நாலாவது படிக்கும் போது மரகத மேரி டீச்சர் ஒரு நாள் எல்லா குழந்தைகளிடமும், ""கடவுளை எப்போதும் நினைத்து வணங்கி வர வேண்டும்'' என்று சொல்லிக் கொடுத்தாள். அன்று ஆரம்பித்த தினசரிப் பழக்கம் நிற்கவேயில்லை. படித்து முடிக்கிற காலம் வரை படிப்பில் நன்றாக முன்னுக்கு வர வேண்டும் என்று வேண்டிக் கொண்டான். இப்போது படிப்பு இருந்த இடத்தில் வேலை வந்து உட்கார்ந்து கொண்டிருக்கிறது.
அவன் டிபன் சாப்பிட வந்த போது அம்மா  தயாராக ஒரு தட்டில் பொங்கலும் அதைச் சுற்றி சட்டினியும் - குழம்பும்  கையில் வைத்துக் கொண்டிருந்தாள்.
"" நான் வந்து எடுத்துகுவேன்ல?'' என்று கேட்டபடியே வாங்கிக் கொண்டான். 
சாப்பிடுவதற்கு பொங்கல் நன்றாக இருந்தது. அது அவனுக்குப் பிடித்த ஐட்டம் என்பதாலும் அம்மாதிரி தோன்றி இருக்கலாம்.
அம்மா ஒரு தட்டில் இன்னும் கொஞ்சம் பொங்கலை எடுத்துக் கொண்டு வந்தாள்.
""போதும்.. போதும்'' என்று அவன் எழுந்தான். 
""தம்பி, நீ இப்பல்லாம் சரியாவே  சாப்பிடறதில்லே'' என்றாள் அம்மா.
அவன் மறுத்து எதுவும் பேசாமல் பின் பக்கம் கை
கழுவச்  சென்றான். இப்போதெல்லாம்  தொண்டையில் ஏதோ கல் சிக்கிக் கொண்ட மாதிரி அவ்வளவாக சாப்பாடு இறங்க மாட்டேன் என்கிறது. கிடைக்காத வேலைதான் கல்லாக உட்கார்ந்திருக்கிறதோ என்று அம்மாவின் பார்வையில் முள் எகிறுகிறது. 
ஜானகிராமன் இஸ்திரி போட்ட உடைகளை அணிந்து கொண்டு கிளம்பும் போது அப்பா  ""ஆல் தி பெஸ்ட்'' என்றார்.
அம்மா ""எல்லாம் நல்லபடியா நடக்கட்டும்'' என்று அவன் கையில் ஒரு நூறு ரூபாய் நோட்டைத் திணித்தாள்.
""எதுக்கும்மா?'' என்ற அவனிடம்  ""இந்த வெய்யில்ல பஸ்ல போயி கச கசன்னு இண்டர்வியூல நிக்க வேணாம். போறப்ப  ஆட்டோல போயிடு. வரச்ச வேணா பஸ்ல வரலாம்'' என்று சிரித்தாள்.
அவன் வாசலைக் கடக்கும் போது பாட்டி ஈசிசேரில் படுத்தபடியே தூங்கி விட்டிருந்தாள். விழித்திருந்தால் அவனை ஆசீர்வதித்து விட்டு இண்டர்வியூக்காரனை  நாலு திட்டு திட்டி... 
வேலைக்குச் செல்லும் ஜனங்கள் எதிரும் புதிருமாக விரைந்து  கொண்டிருந்தார்கள்.
கார்களும்,  ஆட்டோக்களும் அடுத்த யுகத்தைப் போய்ப் பிடிக்கும் வேகத்துடன் பறந்து கொண்டிருந்தார்கள். இந்த ஓட்டத்தைக் கேலி செய்வது போல ஒரு தெரு நாய் பாதி ஈரமும் பாதி உஷ்ணமும் நிரம்பிய தரையில் தன்  உடலைப் போட்டுப் புரண்டு புரண்டு படுத்து இளைப்பாறிக் கொண்டு இருந்ததைப் பார்த்தபடி ஜானகிராமன் சென்றான். 
பஸ்களின் மீது மனிதர்களுக்கு இருக்கும் நம்பிக்கையை உணர்த்துவது போல பஸ் ஸ்டாப்பில் கூட்டம் இல்லை. அவன் அருகே இருந்த ஆட்டோ ஸ்டாண்டை  அடைந்த போது வாசுவின் ஆட்டோவைப் பார்த்தான். 
 வாசு,  ""ஏறுங்க சார் வண்டியில'' என்று அவனைப் பார்த்து நட்புடன் சிரித்தான். அவனுக்கு சந்தோஷம் வந்து விட்டால் இப்படித்தான் கூப்பிடுவான். ஒரே வயதுக்காரர்கள்தான். ஜானகிராமன் இருந்த தெருவிலேயே வாசுவும் இருந்தான். படிப்பு ஏறவில்லை. இருந்தாலென்ன? மூன்று வருஷங்களாக ஆட்டோ ஓட்டி சம்பாதித்துக் கொண்டு தானே இருக்கிறான்!
ஜானகிராமன் ஏறி உட்கார்ந்து ""வாசு கன்னிங்காம் ரோடு போகணும்'' என்றான்.
அவன் கையிலிருந்த ஃபைலைப் பார்த்து "'இண்டர்வியூவா?" என்று கேட்டபடி வண்டியை ஸ்டார்ட் செய்தான்.
""ஆமாம். கஜனி முகமதுவோட ரெகார்ட்டை முறியடிச்சிருவேன் போல இருக்கு'' என்றான் ஜானகிராமன். 
அப்போது  ""ஆட்டோ'' என்று கத்திக் கொண்டே கையை அசைத்தபடி ஒரு யுவதி ஓடி வந்தாள்.
 வாசு வண்டியை நிறுத்தி அவளைப் பார்த்து  " சவாரி உள்ள  இருக்கில்ல? பாக்கலையா?'' என்றான். 
""நீங்க எங்க போகணும்?'' 
""கன்னிங்காம் ரோடு'' என்றாள் அவள்.
""அட தேவுடா!'' என்று வாசு பின் பக்கம் திரும்பி ஜானகிராமனைப் பார்த்துச் சிரித்தான்.
""அவங்களும் வரட்டும்'' என்றான் ஜானகிராமன். அவளைப் பார்த்து "'நானும் அங்கதான் போறேன்'' என்றான்.
அவள் அவனுக்கு நன்றி தெரிவித்தபடியே ஆட்டோவில் ஏறி உட்கார்ந்து கொண்டாள். 
கையில் இருந்த கர்சீப்பால் முகத்தை ஒற்றிக் 
கொண்டாள். ஓடி வந்ததில் சிறிது மூச்சு வாங்கியது. வெள்ளையும், சிவப்பும் கலந்த நிறத்தில் சேலை அணிந்திருந்தாள். கறுப்பு ரவிக்கை . வலது கையில் கடிகாரம். இடது கையில் கறுப்பும் மஞ்சளுமாக ஒரு வளையல். மாநிறம். பார்க்கும்படி இருந்தாள். கையில் ஒரு பை வைத்திருந்தாள்.
வண்டியை ஓட்டிக் கொண்டே வாசு அவளிடம் ""கன்னிங்காம் ரோடுல எங்கம்மா?'' என்று கேட்டான். 
"" சிண்டிகேட் பாங்க் கிட்ட'' என்றாள் அவள்.
""ஜானகி, நீனு?''
""அதே இடத்திலதான்'' என்றான் ஜானகிராமன்.
அவள் இப்போது அவனைத் திரும்பிப் பார்த்தாள். அவள் பார்வை அவன் கையில் இருந்த ஃபைல் மீது விழுந்தது.
""இண்டர்வியூவா?'' என்று கேட்டாள்.
அவன் அவளை ஆச்சரியத்துடன் பார்த்தான். பிறகு தன் கையில் இருந்த ஃபைலைத் திருப்பித் திருப்பிப் பார்த்தான்.
""இது மேல அப்படி ஒண்ணும் எழுதி இருக்கலையே'' என்றான்.
""மூஞ்சில எழுதி இருக்குல்ல?'' என்றான் வாசு,
அவளால் சிரிப்பை அடக்க முடியவில்லை. ஜானகிராமனும் சேர்ந்து சிரித்தான்.
அவளிடம் ""தயவு செஞ்சு நீங்க பீக்கே இன்டர்நேஷனல் இண்டர்வியூவுக்குப்  போறேன்னு மட்டும் சொல்லிடாதீங்க'' என்றான் ஜானகிராமன்.
அவள் பதிலளிக்காமல் அவனை உற்றுப் பார்த்தாள்.
""எனக்கு உங்களை ஏமாற்றமடையச் செய்வதில் ஈடுபாடு இல்லை. ஆனால் எனக்கு வேறு வழி எதுவும் தெரியவில்லை'' என்றாள் அவள் ஆங்கிலத்தில்.  
""போகட்டும். ஒரு போட்டியாளருக்கு ஆட்டோவில் இடம் தந்து உதவிய பெருந்தன்மை எனக்குக் கிடைத்திருக்கிறது'' என்றான் ஜானகிராமன்.
""இங்கிலீஷுல என்ன ரெண்டு  பேரும் ஒருத்தரை ஒருத்தர் திட்டிக்கிறீங்க?'' என்று கேட்டான் வாசு. 
""இதுதான் உங்க முதல் இண்டர்வியூவா?'' என்று ஜானகிராமன் அவளிடம் கேட்டான்.
"" என்னப் பாத்தா அவ்வளவு சின்னக் குழந்தையாவா தெரியுது?'' என்றாள் அவள். "பத்தாவது இண்டர்வியூ''. 
""எப்படி இருந்தாலும்  எனக்கு ஜூனியர்தான்.''
அவள் அவனை எத்தனையாவது முறை என்று கேட்கவில்லை.
அவர்கள்  அடைய வேண்டிய இடம் வந்து விட்டது. இருவரும் இறங்கிய பிறகு ஜானகிராமன் வாசுவிடம் நூறு ரூபாயை நீட்டினான். அவளும் பர்ûஸத் திறந்து பணம் எடுத்தாள்.
வாசு, "'ரெண்டு பேரும் பணத்தை வச்சுக்குங்க. ஆளுக்கு முப்பது ரூபா. வேலை கிடைச்சதும் தாங்க'' என்றான்.
""எத்தனை வருஷம்னாலும் பணம் வாங்கக் காத்துக்கிட்டு இருக்க நீ தயாருதான். ஆனா உன்னளவு நம்பிக்கையும் பொறுமையும் எனக்கில்ல''  என்று அவன் கையில் பணத்தைத் திணித்துவிட்டு,  நாப்பது ரூபாய் அப்புறம் வாங்கிக்கறேன்'' என்று கூறி விட்டு நடந்தான்.
அவள் ஜானகிராமனிடம் ""இது என் ஷேர்'' என்று மூன்று பத்து ரூபாய்த் தாள்களை நீட்டினாள். அவன் வாங்கி சட்டைப் பையில் போட்டுக் கொண்டான்.
இருவரும் லிப்டில் ஏறி மூன்றாம் மாடிக்குச் சென்றனர். அவன் ஹாலில் தொங்கிக் கொண்டிருந்த கடிகாரத்தைப் பார்த்தான். ஒன்பது நாற்பது என்று காட்டியது. 
""பதினோரு மணி இண்டர்வியூக்கு நாம ரொம்ப சீக்கிரமே வந்துட்டோம்'' என்றான்.
""அங்க பாருங்க'' என்று அவள் சுட்டிக் காட்டிய திசையில் நின்றிருந்த ஹனுமார் வாலைப் பார்த்ததும் அவன் அதிர்ந்தான். இதற்கு முன் கியூவைப் பார்த்து அதிர்ந்தது நோட்டுக் கட்டுக்களை வைத்துக் கொண்டு பேங்க் வாசலில் நின்ற போதுதான்.  
""ஒரு நிமிஷம் இருங்க. நான் போய் கேட்டுட்டு வரேன்'' என்று அவன் வரிசையின் கடைசியில் நின்றிருந்தவரின் அருகில் சென்றான்.
அவரிடம் பேசிய பின் அவளிடம் சைகை காண்பித்து தான் நிற்கும் இடத்திற்கு வரச் சொன்னான்.
""இன்னிக்கு என்ஜினீயர், அக்கெளண்ட்ஸ் ஆபிசர், சேல்ஸ் ஆபிசர்னு மூணு போஸ்டுகளுக்கு இண்டர்வியூவாம். எல்லோரும் ஒரே வரிசைல. அட்லீஸ்ட் பிரிச்சு நிக்கற வரிசையா வச்சிருக்கக் கூடாதா?'' என்று அவளிடம் சொன்னான்.
அவன் பேசியதை யாரோ கேட்டு விட்டதைப் போலப் பத்து நிமிஷம் கழித்து ஒருவர் வந்து மூன்று வரிசைகளாகப் பிரிந்து நிற்கச் சொன்னார். வரிசையில் நிற்கும் போதுதான் அவனுக்குத் தெரிந்தது அவள் தனக்குப் போட்டியல்ல என்று. அவள்  சேல்ஸ் ஆபிசர் வரிசையிலும் அவன்  என்ஜினீயர்  வரிசையிலும் நின்றார்கள். அவன் பார்த்த போது அவள் அவனைப் பார்த்துப்  புன்னகை புரிந்தாள். 
சற்று நேரத்தில் ஒரு பெண் வந்து ஒவ்வொருவரிடமும் இருந்து கம்பெனி அனுப்பிய இண்டர்வியூ அழைப்புக் கடிதத்தை வாங்கிக் கொண்டாள். அவன் வரிசையில் ஐந்தாவது ஆள். அவளுக்கு நான்காம் எண்.
இருவரும் சென்று ஹாலில் போடப்பட்டிருந்த நாற்காலிகளில் அமர்ந்து கொண்டார்கள்.
""என் பேர் ஜானகிராமன்'' என்றான் அவன்.
""தெரியும்.  ஆட்டோக்காரர் கூப்பிட்டாரே'' என்றாள் அவள். 
தொடர்ந்து ""என் பெயர் மீனா'' என்றாள்.
""தெரியும்'' என்றான் ஜானகிராமன்.
""எப்படி?'' என்று ஆச்சரியத்துடன் கேட்டாள்.
""எனக்கு பக்கத்து வரிசைல எனக்கு முந்தி  நின்னீங்க.
இண்டர்வியூ லெட்டரை கொடுக்கறப்போ பேர் சொல்றதைக் கேட்டேன்'' என்றான்.
""ஓ அப்படி ஒரு ஆபத்து இருக்குதா?'' என்று சிரித்தாள். பிறகு, ""சீக்கிரம் ஆரம்பித்து சீக்கிரம் கூப்பிட்டா நல்லாயிருக்கும்''  என்றாள்.
""நாலாம் நம்பருக்கே இப்படி சொல்றீங்களே. நான் எவ்வளவோ காத்திருந்திருக்கேன் தெரியுமா?' என்றான் ஜானகிராமன்.
""நீங்க எனக்கு தன்னம்பிக்கை கொடுக்கணும்னு என்னென்னவோ சொல்றீங்க'' என்று அவள் சிரித்தாள்.
""ஆனா முன்னால கூப்பிட்டா பின்னால வர்றவனுக்கு வேலை கிடைக்கும். இந்த பாலிடிக்ûஸ புரிஞ்சுக்கறது ரொம்ப கஷ்டம்''  என்றான் ஜானகிராமன்.
அப்போது அவர்களிடமிருந்து கடிதங்களை வாங்கிய பெண் வந்து இண்டர்வியூ பதினோரு மணிக்குப் பதிலாக பன்னிரண்டு மணிக்கு ஆரம்பிக்கும் என்று சொல்லி விட்டுச் சென்றாள்.
""எனக்கு இப்பவே பசிக்கிற மாதிரி இருக்கு'' என்றாள் மீனா. 
""சரி வாங்க இன்னும் நேரம் இருக்கே. வெளில போய் ஏதாவது சாப்பிடலாம்'' என்று ஜானகிராமன் எழுந்தான்.
அவர்கள் கட்டடத்தை விட்டு வெளியே வந்து இடது  பக்கம் திரும்பி மில்லர்ஸ் ரோடில் நடந்தார்கள். சாலையில் குவிக்கப் பட்டிருந்த  குப்பைகள் இப்போது காற்றின் போக்கில் பறந்து ஜனநாயக முறையில் தெருவெங்கும் சிதறிக் கொண்டிருந்தன. நாளை துப்புரவுப் பணிக்கு வரும் ஆட்களுக்கு வேலை வேண்டும் அல்லவா? அக் குப்பைகளிலிருந்து எழுந்து வந்த "நறுமணம்' மாநகராட்சியை நினைவு படுத்தியது. 
""மல்லேஸ்வரத்தில எங்க இருக்கீங்க?'' என்று ஜானகிராமன் கேட்டான்.
""ஆறாவது கிராஸ்ல'' என்றாள்.
""அட! நான் கோகனட் அவென்யூல. ஆனா  உங்களைப் பாத்ததே இல்லையே?'' என்றான் அவன் ஆச்சரியத்துடன்.
""சரிதான். என்னமோ மல்லேஸ்வரத்துல இருக்கற எல்லா பொம்பளைகளையும் உங்களுக்குத் தெரிஞ்சிருக்கற மாதிரி !'' என்று மீனா சிரித்தாள்.
""அழகாயிருக்கற எல்லா பொண்ணுகளையும்'' என்று அவனும் சிரித்தான்.
""நாங்க இதுக்கு முன்னால மைசூர்ல இருந்தோம். எங்கம்மாவுக்கு டிரான்ஸ்ஃபர்னு இங்க வந்து ரெண்டு வாரம்தான் ஆகுது. அவங்க  இந்தியன் பாங்க்ல இருக்காங்க'' என்றாள் அவள். 
""அப்பா?'' என்று கேட்க நினைத்து விட்டு  விட்டான்.     
அவனது நினைவோட்டத்தைப் படித்தவள் போல ""அப்பா எங்களோட  இல்ல. எங்கம்மாவுக்கும் அவருக்கும் ஒத்துக்கலே. சுமுகமா ரெண்டு பேரும் பிரிஞ்சிட்டாங்க'' என்றாள். 
அவளது பேச்சு அவனுக்கு வியப்பைத் தந்தது. அறிமுகம் ஆன சில  மணி நேரத்திலேயே இப்படிக் கொட்டி விடுவது என்றால்? நிர்தாட்சண்யமாகப் பேசும் வழக்கமுடையவளாகத்தான் காணப்படுகிறாள்.
""நாம பழகி கொஞ்ச நேரத்திலேயே நீங்க எப்படி என்கிட்டே இப்படி வெளிப்படையா பேசறீங்க?'' என்று கேட்டான்.
""உங்களை பார்த்ததுலேர்ந்து இப்ப வரைக்கும் நீங்க நடந்துக்கற முறைதான் காரணம்'' என்றாள் மீனா.
""புரியல''
""ஆட்டோல வந்தப்போ ஓரக் கண்ணால பாக்கல. ஸ்டைல் பேச்சு ஒண்ணும் பேசாம  வெளிப்படையா இருந்தீங்க. நான் பணம் தந்தப்ப வழக்கமா ஆம்பளைங்க மறுத்து இம்ப்ரெஸ் பண்ணுறதை போல இல்லாம நீங்க  வாங்கி பாக்கெட்டுக்குள்ள போட்டுகிட்டீங்க. தத்துப் பித்துன்னு பேசாம கலகலப்பா இருந்தீங்க. வேலைக்கு மன்றாடுறத மறைக்காம சொன்னீங்க. சிநேகிதத்துக்கு இதெல்லாம் போதாதா?'' என்று கேட்டாள். 
""úஸா நான் ரொம்ப நல்லவன்னு சொல்றீங்க'' என்றான் ஜானகிராமன் புன்னகையுடன்.
""இல்ல. அப்படி ஒண்ணும் கெட்ட  ஆசாமி இல்லேன்னு சொல்றேன்'' என்றாள் மீனாவும் சிரித்தபடி.
""இந்த இண்டர்வியூலயாச்சும் வேலை கிடைச்சா ரொம்ப நல்லா  இருக்கும்'' என்றான் அவன். 
""இன்னும் ரெண்டு மாசத்துல எங்கம்மா ரிட்டையர் ஆயிடுவாங்க. அதுக்குள்ளே எனக்கு வேலை கிடைச்சாகணும்.''
""எல்லா பிரச்னையிலிருந்தும் தப்பிக்க வேலையைத் தேடறோம்.  ஆனா அது கெடக்கிறதே இப்போ பிரச்னையா ஆயிருச்சி'' என்றான் ஜானகிராமன். 
""கவலைப்படாதீங்க. ஐரோப்பாலயும் அமெரிக்காலயும் கூட வேலையில்லா திண்டாட்டம் அதிகமாயிடிச்சாம்'' என்றாள் அவள் குறுநகையுடன்.
""ஆமா . கேக்கறதுக்கு ரொம்ப சந்தோஷமா இருக்கு'' என்றான் ஜானகிராமன்.
அவர்கள் ஹோட்டல் சாளுக்கியாவை அடைந்து ஓரிடத்தில் உட்கார்ந்து கொண்டார்கள்.  அங்கே உட்கார்ந்து சாப்பிட்டுக் கொண்டிருந்தவர்களை விட  சர்வர்கள் அதிகமிருந்தார்கள்.
""சர்வர் வேலைக்கு அவ்வளவா திண்டாட்டம் இருக்காது போல இருக்கு'' என்றாள் மீனா அவன் பார்வையைக் கவனித்து விட்டு.
சாப்பிட்டு விட்டு காபி குடித்தார்கள். அவள் கைக்கடிகாரத்தைப் பார்த்து ""கிளம்பலாமா? பதினொன்னரை ஆச்சு''  என்றாள்.
திரும்புகையில் மீனா அவனிடம், "" பெங்களூர்தான் நீங்க பிறந்த ஊரா?'' என்று கேட்டாள்.
ஜானகிராமன் ""இல்ல. மதுரை. ஆனா நான் பிறந்து அஞ்சு வருஷத்துல இங்க வந்துட்டோம்'' என்றான். 
""úஸா படிச்சது எல்லாம் இங்கேதான்?'' என்று கேட்டாள்.
""ஆமா. எம்மெஸ் ராமையால என்ஜினீரிங்'' என்றான். 
பிறகு அவளை பார்த்து  ""நீங்க படிச்சது?''
""மைசூர்லதான். ஜே எஸ் எஸ்ல'' என்றாள்.
""அங்கதான் எம் பி ஏ படிச்சீங்களா?'' என்றான்.
அவள் குழப்பத்துடன் ""எம் பி ஏ வா?'' என்று  திரும்பி அவனைப் பார்த்தாள்.
""இல்ல நீங்க சேல்ஸ் ஆபிசருக்கு இருந்த கவுண்டர்ல போய் நின்னீங்களேன்னு...'' 
""ஆமா. நான் ரெண்டுக்கும்  அப்ளை  செஞ்சேன். ரெண்டுக்கும் கூப்பிட்டிருந்தாங்க. ஆனா  நீங்க என்ஜினீயர் குரூப்ல போய் நின்னதைப் பார்த்ததும் சேல்ஸூக்கு போனேன்'' என்றாள். 
அவன் நடப்பதை நிறுத்தி விட்டான்.       

-  அடுத்த இதழில்
 

]]>
https://www.dinamani.com/weekly-supplements/dinamani-kathir/2019/jan/13/இருவர்-3076889.html
3076891 வார இதழ்கள் தினமணி கதிர் திருமணத்துக்கு நாள் இருக்கிறது! - கண்ணம்மா பாரதி DIN Sunday, January 13, 2019 12:00 AM +0530 சர்வதேச  போட்டிகளில்  நழுவிக் கொண்டிருந்த தங்கப் பதக்கத்தை   முதல் முறையாக வென்று  சாதனை படைத்திருக்கும்   இறகுப்  பந்தாட்ட  வீராங்கனை பி.வி. சிந்து இந்தியாவில்  நம்பர் ஒன்  வீராங்கனையாகிவிட்டார். சர்வதேச தர இறகுப் பந்தாட்டப் போட்டிகளில் இறுதிச் சுற்று வரை ஒன்பதுமுறை சென்றாலும் பி.வி.சிந்து தங்கப் பதக்கம் ஒன்றையும் பெற இயலவில்லை. வெள்ளிப் பதக்கங்களுடன் திருப்திப்பட வேண்டிவந்தது. சிந்துவுக்கும் சிந்துவின் ரசிகர்களுக்கும் "தங்கப் பதக்கம்  கிடைக்காதது' ஒரு  மனக்குறையாகவே இருந்தது.

""இறுதி போட்டியின் போது  அதிர்ஷ்டம்  என் பக்கம் இல்லை. அதே சமயம், வெள்ளிப் பதக்கம் சாதாரணமானதும் இல்லை.  எதிராளி திறமையாக ஆடினார்.. அதனால் தங்கப் பதக்கம்  அவரைச் சென்றடைந்தது.''  என்று சொல்லி வந்த சிந்து  பலவித எதிராளிகளின் லாகவத்தை.. சூட்சுமத்தை  மனதில் பதிவு செய்தே வந்திருக்கிறார். அந்த கணிப்புதான்  சிந்துவுக்கு கை கொடுத்திருக்கிறது. 

""தங்கப் பதக்கம்  பெற்ற  வெற்றியை மறக்க முடியாது.  "ஏன் இறுதிச் சுற்றில்  வெற்றி பெறவில்லை' என்ற கேள்வியை சந்தித்து போதும் போதும் என்றாகிவிட்டது.  அந்தக் கேள்வியை எதிர் கொள்ளும் சந்தர்ப்பம்   இனி வராது என்று நம்புகிறேன். அதுவே பெரிய  சந்தோஷத்தைக் கொடுத்திருக்கிறது.

"சக போட்டியாளரான  சாய்னா  நேவால்  திருமணம்  செய்து கொண்டுவிட்டார். திருமணம் குறித்து  சிந்து சிந்திக்கத்  தொடங்கியாச்சா'  என்று  அனைவரும் கேட்கிறார்கள். 

சாய்னா திருமணம் செய்து கொண்டுள்ளது சந்தோஷமான விஷயம்தான். ஆனால், இப்போதைக்கு என் திருமணம் பற்றி  யோசிக்கவேயில்லை. எனக்கு வயது இருபத்திமூன்றுதானே ஆகிறது. இன்னும் காலம் நேரம் இருக்கிறது. திருமணத்திற்கு முன்  சாதிக்க வேண்டியதும்  அதிகம் இருக்கிறது. 

இறகுப் பந்தாட்டத்தில்  எனது குருவும் பயிற்சியாளருமான கோபிசந்த்தின் மகள் காயத்ரி  முன்னேறி வருகிறார். காயத்ரிக்கும்  கோபிசந்த்தான் பயிற்சியாளர். கோபி சார் எங்கள் அனைவரையும் அவரது மகள்களாகத்தான் கருதுகிறார். நடத்துகிறார். பயிற்சி தருகிறாள். காயத்ரியின்  லெவல் வேறு. என்னுடையது வேறு. விளையாட்டில் ஒவ்வொருவருக்கும்  ஒரு ஸ்தானம் கிடைக்கிறது. காயத்ரி இப்போதுதான் பளிச்சிடத் தொடங்கியிருக்கிறார். வரும் நாட்களில் பிரகாசிப்பார்''  என்று இறகுப் பந்தாட்டத்தில்   புதிய  தலைமுறை பற்றி சிந்து கருத்து சொல்கிறார்.      புதிய  சாதனை நிகழ்த்தியிருக்கும்  சிந்துவுக்கு  இந்திய இறகுப்பந்தாட்ட  சங்கம் பத்து லட்சம் ரூபாய்  பரிசாக வழங்கியுள்ளது.

]]>
https://www.dinamani.com/weekly-supplements/dinamani-kathir/2019/jan/13/திருமணத்துக்கு-நாள்-இருக்கிறது-3076891.html
3076892 வார இதழ்கள் தினமணி கதிர் மாணவிக்கு உதவிய  நாய்க்கு கெளரவப் பட்டம்...! - சேரன்  DIN Sunday, January 13, 2019 12:00 AM +0530 கல்லூரிக்கு  மாணவியுடன் சென்று வந்த  நாய்க்கு   கெளரவ  டிப்ளமோ வழங்கப்பட்டுள்ளது.   இந்தியாவில் அல்ல. அமெரிக்காவில்!

அமெரிக்காவின் வடக்கு கரோலினா பகுதியில் வாழ்பவர்   பிரிட்னி  ஹவுல். இவர்  ஏறக்குறைய ஒரு மாற்றுத்திறனாளி. கல்லூரி மாணவி. இடுப்பு வலி காரணமாக  எப்போதும்  சக்கர நாற்காலியில்தான்  முழு நேரமும்  இருப்பார். 

பிரிட்னி தனது   அன்றாட  பணிகளுக்கு மற்றவர்களின் உதவியை எதிர்பார்க்க வேண்டிய கட்டாயத்தில் இருந்தார். தனக்கு உதவியாக  ஒரு நாயை வளர்க்கலாம் என்று  முடிவு  செய்தார். நாய்களுக்கு பயிற்சி தரும் நிலையத்திற்குச் சென்றார்.

"நாய்கள்  சக்கர நாற்காலியைப் பார்த்தால் பயப்படும். அதனால் எந்த நாய் உங்களிடம் வருகிறதோ அந்த நாயை தேர்ந்தெடுங்கள்'' என்றார்கள். ஒரு நாய் மட்டும் ஓடி வந்து பிரிட்னியின்  மடியில் உட்கார்ந்து கொண்டது. அது,  கோல்டன் ரெட்ரிவர் இனத்தைச் சேர்ந்தது.  நாய்க்கு  "கிரிஃபின்'  என்ற பெயரையும் வைத்தார்.  தனக்கு தேவையான உதவிகளைச் செய்ய  நாயைப் பழக்கினார்.

கிரிஃபின் எப்போதும் நிழலாக  பிரிட்னியைத் தொடரும்.  பிரிட்னி  சக்கர நாற்காலியில்  நகரும் போது வழியில் மூடியிருக்கும் கதவைத்  திறந்து மூடவும், விளக்கு சுவிட்ச்களை போடவும் ஆஃப் செய்யவும், செல் போன் வேண்டுமென்றால் எடுத்துத் தரவும், புத்தகங்களை கொண்டு வரவும்  திரும்பக் கொண்டு போய் வைக்கவும்   கிரிஃபின் பழகிக் கொண்டது. 

நியூயார்க்கில் உள்ள போஸ்ட்டாம் என்ற கல்லூரியில்  பிரிட்னி  பட்டம் படிக்க சென்றார். கல்லூரிக்கு  பிரிட்னி செல்லத் தொடங்கியது முதல், தினமும் கிரிஃபின் கல்லூரிக்கு போகத் தவறவில்லை. கல்லூரி  வளாகத்திலும் பிரிட்னிக்கு  கிரிஃபின் உதவுவதை அனைத்து மாணவர்களும்  ஆசிரியர்களும் ஆச்சரியமாகப்   பார்ப்பார்கள்.   கிரிஃபின் திறமையை  கல்லூரி நிர்வாகமும் கவனித்து வந்தது. கிரிஃபின்  அநாயச திறமைகள் .. கடமையைச் செவ்வனே செய்வது,  பிரிட்னியை விட்டு அகலாமல் எப்போதும் உடன் இருப்பது, புத்திசாலித்தனம்  இவற்றை   கணக்கில் எடுத்து  பட்டமளிப்பு விழாவில் கிரிஃபின்னையும்  கெளரவிக்க வேண்டும் என்று முடிவு செய்தது.       பிரிட்னி பட்டம் பெற்ற போது, அதே பட்டமளிப்பு விழாவில் கிரிஃபினுக்கும் பட்டமளிப்பு விழாவில் அணியப்படும் தொப்பி,  கவுன் அணிவித்து கௌரவ டிப்ளமோ பட்டம் வழங்கியது. 

அடுத்த மாதம்  இன்னொரு பட்டமளிப்பு  விழாவில் பிரிட்னி கலந்து கொள்கிறார். அப்போதும், கிரிஃபின்னுக்கு  கெளரவப் பட்டம் காத்திருக்கிறது. 

""வேலைக்குப் போனாலும் கிரிஃபின்னை  உடன் அழைத்துச் செல்ல  அனுமதி  கேட்டு வாங்குவேன்'' என்கிறார் இருபத்தைந்து வயதாகும் பிரிட்னி.

]]>
https://www.dinamani.com/weekly-supplements/dinamani-kathir/2019/jan/13/மாணவிக்கு-உதவிய--நாய்க்கு-கெளரவப்-பட்டம்-3076892.html
3076895 வார இதழ்கள் தினமணி கதிர் சொன்னால் நம்பமாட்டீர்கள் ! - 11  சின்ன அண்ணாமலை DIN Sunday, January 13, 2019 12:00 AM +0530 சுயராஜ்யம் வாங்கியாச்சா?

நான் காசியில் தலைமறைவாக இருக்கும்போது தேவகோட்டையில் என் இல்லத்தில் என் பெரிய தந்தையார் புதல்வர் பழ. லெட்சுமணனுக்குத் திருமணம் நடந்தது. அத்திருமணத்திற்குக் கண்டிப்பாக நான் வருவேன் என்று போலீஸார் நினைத்து திருமணத்தன்று ஏராளமான போலீஸாருடன் இன்ஸ்பெக்டர் வீராசாமி ஐயர், திருமண வீட்டிற்குள் நுழைந்தார். ஏராளமான பிரமுகர்களும், சொந்தக்காரர்களும் நிறைந்திருந்த திருமணப் பந்தல் போலீûஸக் கண்டதும் குழம்பிவிட்டது. போலீஸார் எல்லோரையும் விரட்டி அடித்ததோடு, சமையல் பாத்திரங்கள் அனைத்தையும் தூக்கி எறிந்து, சாப்பாட்டை நாசம் செய்து, பல இடங்களிலும் என்னைத் தேடி இருக்கிறார்கள். அப்போது என் பெரிய தந்தையார், எனது தந்தையார் அனைவரும் போலீஸாரால் அடிக்கப்பட்டனர்.

அச்சமயம் என் தாயார் அங்கு வந்து போலீஸ் இன்ஸ்பெக்டர் அவர்களைப் பார்த்து ""ஐயா, நீங்கள் தேடி வந்த பையன் என் மகன்தான். அவனுக்காக மற்றவர்களை அடிக்காதீர்கள். என்னை அடியுங்கள்; நான்தான் அவன் தாய்'' என்று உருக்கமாகச் சொல்ல; உடனே இன்ஸ்பெக்டர், ""இன்னும் பத்து நாட்களில் அவனைக் கொண்டு வந்து போலீஸில் ஒப்படைக்காவிட்டால் உங்கள் அனைவரையும் லாக்கப்பில் தள்ளி இந்த வீட்டையும் தீ வைத்துக் கொளுத்தி விடுவேன்'' என்று சொல்லிவிட்டுப் போய்விட்டார்.

உடனே பதறிப் போய் தேவகோட்டையில் இருந்து ஒரு நண்பர் காசிக்கு நேராகப் புறப்பட்டு வந்து என்னிடம் விவரத்தைச் சொன்னார்.

என்னால் எனது உறவினர்களும், தாய் தந்தையர்களும் பட்ட சிரமங்களை எண்ணி மிகவும் மனம் வருந்தினேன். நாம் செய்த காரியத்திற்குத் தண்டனையை மற்றவர்கள் அனுபவிப்பது தவறு என்று எனக்குத் தோன்றியது. ஆங்கில அரசாங்கம் என்ன தண்டனை கொடுத்தாலும் பெற்றுக்கொள்வது, உறவினர்களையும் தாய் தந்தையர்களையும் காப்பாற்றுவது என்ற முடிவுக்கு வந்தேன்.

ஆகவே ஒரு நிமிடம் கூட காசியில் தாமதியாமல் அங்கு இருந்து நேராகப் புறப்பட்டு என்னைக் கூப்பிட வந்த நண்பருடன் தேவகோட்டை வந்து சேர்ந்தேன்.

தேவகோட்டையில் என்னை ஒரு வீட்டில் தலைமறைவாகக் கொண்டு போய் வைத்தார்கள். இரவு 8 மணிக்குமேல் எனது நெருங்கிய உறவினர்களில் பலரும் ஊரின் முக்கிய பிரமுகர்களும், நான் தலைமறைவாக இருந்த வீட்டிற்கு வந்தார்கள்.

என் தாயார் என்னைப் பார்த்ததும் கதறி அழுதார். எல்லோருமாகக் கூடி மறுநாள் காலையில் என்னைப் போலீஸ் ஸ்டேஷனில் ஒப்படைப்பது என்று முடிவு செய்தார்கள்.

அப்போது ஊரின் முக்கிய பிரமுகர் ஒருவர், ""ஸ்டேஷனில் கொண்டு போய் ஒப்படைக்கும்போது தம்பி கதர் கட்டாமல் மில் துணியை அணிந்து கொண்டு
வந்தால் நல்லது. கதரைக் கண்டால் இன்ஸ்பெக்டருக்கு கோபம் வரும். நம் கண் முன்னே தம்பியைப் போட்டு அடிப்பதை நாம் பார்த்துக் கொண்டிருக்க முடியுமா? அதனால் மில் துணியை அணிவதுதான் இந்த நேரத்திற்குச் சரியாக இருக்கும்'' என்று சொன்னார்.

நான் சொன்னேன்: ""தயவு செய்து மன்னித்து விடுங்கள். இன்று நான் அடிவாங்குவதற்குப் பயந்து கதரை மாற்றி மில் துணியை அணிந்தால், என் பேச்சைக் கேட்டு ஆயிரக்கணக்கான பேர் கதர் கட்டி விடுதலைப் போராட்டத்தில் ஈடுபட்டு போலீஸ்காரர்களிடம் அடிபட்டார்களே, அவர்கள் அனைவரும் என்னைத் "துரோகி' என்று சொல்லமாட்டார்களா? இன்றைக்கு நான் தப்பிக்கலாம். நாளை என் பிள்ளைகள் தெருவில் போகும்போது இதோ போகிறார்களே அவர்கள்தான் அந்தத் துரோகியின் பிள்ளைகள் என்று பெயர் வராதா? அந்தக் களங்கத்தை என் சந்ததியாருக்கு ஏற்படுத்திக் கொடுக்க நான் விரும்பவில்லை. அடிபட்டாலும் உதைபட்டாலும் சாக நேரிட்டாலும் கதர் துணியுடன்தான் சாவேன். நான் இறந்த பிறகு கதர் கொடியையே எனது சடலத்திற்குப் போர்த்த உபயோகப்படுத்த வேண்டும், என்பதே என் விருப்பம்'' என்று நான் சொன்னேன்.

என் தந்தையார் ""அவனைக் கட்டாயப்படுத்த வேண்டாம். அவன் ஓர் உயர்ந்த லட்சியத்திற்காகத் தன்னையே அர்ப்பணித்துக் கொண்டுவிட்டான். உயர்ந்தவன் உயர்ந்தவனாகவே இருக்கட்டும்'' என்று கூறியதும் எனக்கு மெய்சிலிர்த்தது. மிகப் பயந்த குணம் உடைய என் தந்தையாருடைய உள்ளத்தில் அப்படியொரு உறுதியான உணர்ச்சி ஏற்பட்டது எனக்கு வியப்பாக இருந்தது.

என்னால் சிரமப்பட்ட  உறவினர்களிடம் என்னை மன்னிக்கும்படி நான் கேட்டுக்கொண்டபோது அவர்கள் அனைவரும் தங்கள் சிரமத்தைப் பொருட்படுத்தாமல் அதை வெளிக்காட்டிக் கொள்ளாமல் ""எல்லாம் விதிப்படி நடக்கிறது, அதற்கு நீ என்ன செய்ய முடியும்'' என்று தத்துவம் பேசி என்னைச் சமாதானப்படுத்தினார்கள்.

மறுநாள் நான் வாங்கப் போகும் அடி உதை இவைகளைப் பற்றியே என் உறவினர்கள் அனைவரும் கவலைப்பட்டதாகத் தெரிந்தது. நான் சிறிதும் கவலைப்படவில்லை. என் கண்முன்னேயே என்னைக் காப்பாற்றப் பலபேர் துப்பாக்கி குண்டுபட்டு இறந்து, என் மீது சாய்ந்து தங்கள் இரத்தத்தால் எனக்கு அபிஷேகம் செய்தது போல் என் உடம்பெல்லாம் இரத்தத்தைத் தெளித்து அமரநிலை அடைந்த காட்சி என் மனக்கண் முன் நின்று கொண்டே இருந்தது. இவ்வளவு மாபெரும் தியாகத்திற்கு முன்னால் ஏதோ சில அடி உதைகள் என் உடம்பில் படுவது ஒரு சாதாரண தூசிக்குச் சமம் என்ற உறுதியான எண்ண அலைகள் என் உள்ளத்தில் மோதிக்கொண்டு இருந்தன.

மறுநாள் காலை ஊர் பிரமுகர்கள் 5 பேர் வந்து என்னைத் தேவகோட்டை போலீஸ் ஸ்டேஷனுக்குக் கூட்டிக்கொண்டு போனார்கள். ஸ்டேஷனில் இன்ஸ்பெக்டர் இருப்பதைப் பார்த்து மேற்படி ஐவரும் மேல் துண்டை (அங்கவஸ்திரம்) எடுத்து இடுப்பில் கட்டிக்கொண்டு பய பக்தியுடன் இன்ஸ்பெக்டருக்கு முன்னால் போய் நின்றார்கள்.

இன்ஸ்பெக்டர் வீராசாமி ஐயர் என்ன விஷயம் என்று அதிகாரத் தோரணையில் கேட்டார்.

""பையனைக் கொண்டு வந்திருக்கிறோம்'' என்று பிரமுகர்கள் பவ்யமாகச் சொன்னார்கள்.

""வந்துட்டானா? எங்கே அவன்?'' என்ற மிரட்டல் சத்தம் கொடுத்து கொண்டு இருக்கும்போது நான் அவர் பார்க்கும்படியாக முன்னால் வந்து நின்றேன்.

""டேய் சுயராச்சியம் வாங்கிவிட்டாயா?'' என்று ஒரு உறுமல் உறுமினார்.

நான் சமாளித்துக் கொண்டு ""இன்ஸ்பெக்டர் சார், நீங்களும் எங்களுடன் சேர்ந்து ஒத்துழைத்தால்தான் சுயராச்சியம் கிடைக்கும் போல் இருக்கிறது'' என்று சொன்னேன். இன்ஸ்பெக்டர் கடகட என்று சிரித்து ""அப்படிச் சொல்லு, சரியாகச் சொன்னாய், நீதாண்டா உண்மையான காங்கிரஸ்காரன். எங்க ஒத்துழைப்பு இல்லை என்றால் வெள்ளைக்காரனை நாட்டை விட்டு விரட்ட முடியுமா? இது பலபேருக்குத் தெரியவில்லை. உனக்குத் தெரிந்திருக்கிறது'' என்று இன்ஸ்பெக்டர் சொன்னதும் ""இதுதான் என்னுடைய அனுபவம்'' என்று நான் சொன்னேன்.

இன்ஸ்பெக்டருக்குச் சந்தோஷம் தாங்க முடியவில்லை. வந்திருந்த ஊர் பிரமுகர்கள் அனைவரையும் பார்த்து,  ""நீங்கள் எல்லோரும் போகலாம்'' என்று உத்தரவு கொடுத்தார்.

அவர்கள் அனைவரும் புறப்பட்டனர்.

சொன்னால் நம்பமாட்டீர்கள்.

இன்ஸ்பெக்டர் ஒரு போலீஸ் காவலரைப் பார்த்து ""டே 403 உடனே போய் எங்கள் இருவருக்கும் காபி வாங்கிக் கொண்டு வா'' என்று சொன்னார்.

இதைக் காதில் கேட்டுக்கொண்டு ஊர் பிரமுகர்கள் மகிழ்ச்சியாகச் சென்றார்கள்.

காபி வந்ததும் இன்ஸ்பெக்டர் என்னை காபி சாப்பிடச் சொன்னார். அதன் பின்னர்,  என்னை ஸ்டேஷனில் உள்ள லாக்கப்பில் வைக்கும்படி உத்தரவிட்டார்.

 - தொடரும்

]]>
https://www.dinamani.com/weekly-supplements/dinamani-kathir/2019/jan/13/சொன்னால்-நம்பமாட்டீர்கள்----11-3076895.html
3076898 வார இதழ்கள் தினமணி கதிர் திரைக் கதிர்  -ஜி. அசோக் DIN Sunday, January 13, 2019 12:00 AM +0530 குறைவான படங்களில் நடித்திருந்தாலும், ரசிகர்களின் வெகுவான கவனத்தை ஈர்த்திருப்பவர்  பிரியா பவானி சங்கர். அடிப்படையில் சாஃப்ட்வேர் என்ஜினீயரான இவர் தொலைக்காட்சி நிகழ்ச்சித் தொகுப்பாளர், மெகா சீரியல் ஹீரோயின் என்று பலமான அனுபவத்தோடுதான் "மேயாத மான்' படம் மூலமாக சினிமாவுக்கு வந்தார். "கடைக்குட்டி சிங்கம்' உள்ளிட்ட படங்களில் ஆச்சரியப்படுத்தினார்.  "8 தோட்டாக்கள்' இயக்குநர் ஸ்ரீகணேஷின் அடுத்தப் படமான அதர்வா நடிக்கும் "குருதி ஆட்டம்', "ஒருநாள் கூத்து' இயக்குநர் நெல்சன் வெங்கடேசன் இயக்கத்தில் எஸ்.ஜே.சூர்யா நடிக்கும் "மான்ஸ்டர்', "மாப்ள சிங்கம்' இயக்குநர் ராஜசேகரின் இயக்கத்தில் ஜீவா - அருள்நிதி இணைந்து நடிக்கும் படம் என அடுத்தக் கட்டப் பரபரப்பில் இருக்கிறார். ""டி.வி.யில் எவ்வளவு பரபரப்பாக இருந்தேனோ, அதை விட  இப்போது பரபரப்பாக இருக்கிறேன். "மான்ஸ்டர்' படப்பிடிப்பு முடிந்து விட்டது.  நகர்புறத்தில் வாழுகிற பெண்ணாக நடிக்கிறேன்'' என்றார்.   

ரஜினியுடன் "கோச்சடையான்' படத்தில் நடித்தவர் பாலிவுட் நடிகை தீபிகா படுகோன். சமீபத்தில் இவருக்கும் பாலிவுட் நடிகர் ரன்வீர் சிங்கிற்கும் திருமணம் நடந்தது. சில தினங்களுக்கு முன் அமெரிக்காவிலிருந்து தீபிகா படுகோன் ரசிகர் ஒருவர் சுட்டுரைப் பக்கத்தில் ருசிகரமான தகவல் பகிர்ந்திருந்தார். ஒரு தோசையும் அதன் அருகில் மெனு கார்டும் இருந்தது. பின்னர்தான் அதன் விவரம் தெரியவந்தது.  அமெரிக்காவில் ஆஸ்டின், டெக்ஸாஸ் நகரில் உள்ள ஹோட்டல்களில் தோசை ஒன்றிற்கு "தீபிகா படுகோன் தோசை' என பெயரிடப்பட்டிருக்கிறது. தோசையின் மேல்புறத்தில் மிளகாய் மற்றும் உருளை கிழங்கு மசாலாவுடன் இந்த தோசை சுவை மிகுந்ததாக இருக்கிறதாம். ரசிகரின் சுட்டுரையைப் பார்த்த  தீபிகா மகிழ்ச்சியில் பொங்கினார். பிறகு அவருக்கு அளித்த பதிலில், "புத்தாண்டு என்னவொரு பிரமாதமாக தொடங்கியிருக்கிறது' என தெரிவித்துள்ளார். 
  
"என்னை நோக்கி பாயும் தோட்டா',  "அசுரன்' ஆகிய படங்களில் நடித்து வரும் தனுஷ், முதல்முறையாக நடித்துள்ள ஹாலிவுட் படம்,  "தி எக்ஸ்ட்ரார்டினரி ஜர்னி ஆஃப் தி ஃபகிர்'.  கென் ஸ்காட் இயக்கியுள்ள இந்தப் படம், ஐக் வார்ட்ரோபின் "ஷதி எக்ஸ்ட்ரார்டினரி ஜர்னி ஆஃப் தி ஃபகிர்' என்ற நாவலைத் தழுவி உருவாகியுள்ளது. முழுநீள நகைச்சுவை படமாக உருவாக்கப்பட்டுள்ளது. தனுஷ், பெர்னைஸ் பெஜோ நடித்துள்ளனர். மே 30-ஆம் தேதி பிரான்ஸ் நாட்டில் படம் வெளியாகிறது.  சமீபத்தில் கேன்ஸ் திரைப்பட விழாவில் படம் திரையிடப்பட்டது. இதற்காக பிரான்ஸ் சென்றிருந்த தனுஷ், இந்தப் படம் தமிழில் டப் செய்யப்படுவதாக தெரிவித்தார். அத்துடன்  இந்தப் படத்துக்கு, "வாழ்க்கையை தேடி நானும் போனேன்'  என்று பெயரிட்டு, பர்ஸ்ட் லுக் போஸ்டரை வெளியிட்டார். தனுஷ் நடிப்பில் வெளியான "வேலையில்லா பட்டதாரி' படத்தில் இடம்பெற்ற பாடல் வரிகளையே அவர் தலைப்பாக வைத்துள்ளார். இந்தப் படம் மே மாத இறுதியில் தமிழில் வெளியாகும் எனத் தெரிகிறது. இதற்கான தமிழ் டப்பிங் வேலைகள் தொடங்கியுள்ளதாக தெரிகிறது.   

தீபிகா படுகோனேவை காதலித்தார் ரன்பீர் கபூர். கருத்து மோதல் ஏற்பட்டு இருவரும் பிரிந்தனர்.  பின்னர் கேத்ரினா கைபுடன் ரன்பீர் நெருங்கி பழகினார். திடீரென அவரையும் பிரிந்தார். இப்போது நடிகை அலியா பட்டை காதலித்து வருகிறார். ரன்பீரை பிரிந்தது பற்றி கேத்ரினா  எதுவும் கூறாமல் இருந்து வந்தார். இப்போதுதான் அது பற்றி அவர் பேசியுள்ளார், ""அவரை பிரிந்த பிறகு இத்தனை நாட்களாக நான் என்னையே புரிந்து கொள்ளாமல் வாழ்ந்தது தெரிய வந்துள்ளது. அந்த காதல் முறிவுக்கு பிறகு என் வாழ்வில் தெளிவு ஏற்பட்டுள்ளது. இத்தனை நாட்களாக என்னை புரிந்து கொள்ளாமல் வாழ்ந்து வந்திருக்கிறேன். தற்போது என் வாழ்வில் நான் மட்டும் தான். அதனால் என் கவனம் எல்லாம் என் மீது மட்டும் தான். நான் யாரையும் குறை சொல்ல விரும்பவில்லை. என்னிடம் பாசம் காட்டினால் நானும் பாசமாக இருப்பேன். இல்லை என்றால் கண்டுகொள்ள மாட்டேன்'' என்று கேத்ரினா பேசியுள்ளார். 

]]>
https://www.dinamani.com/weekly-supplements/dinamani-kathir/2019/jan/13/திரைக்-கதிர்-3076898.html
3076899 வார இதழ்கள் தினமணி கதிர் பெங்க் மீலியா! DIN DIN Sunday, January 13, 2019 12:00 AM +0530 கம்போடியாவின், அங்கோர்வாட்  கோயிலிருந்து, கிழக்கே  சுமார்  40 கி.மீ. தொலைவில் அடர்ந்த  காட்டினுள்  இந்து கோயில் ஒன்று கண்டுபிடிக்கப்பட்டு ஆய்வுக்கு  உட்படுத்தப்பட்டது.

 12 -ஆம்  நூற்றாண்டில்  இரண்டாம் சூரிய  மன்னனால், கோயில் கட்டப்பட்டிருக்கலாம்.  ஆனால், கவனிப்பாரின்றி, மரங்களால் சூழ்ந்து  பாழ் மண்டபங்களாக  மாற்றியுள்ளன. இருந்தாலும்  இப்போதும், தேவர்களும், அசுரர்களும்  அமிர்தத்திற்காக  கடைந்த  பாற்கடல்  காட்சி,  கருடனில்  விஷ்ணு, ஏழு தலை  நாகம், நாகவழிபாடு  சார்ந்த  சிற்பங்கள்  என பலவற்றை  இங்கு சுவர்களிலும்  தரைகளிலும்  காண முடிகிறது.

தற்போது இந்த இடம்  சுத்தம்  செய்யப்பட்டு,  சுற்றுலாவாசிகளுக்கு திறந்துவிடப்பட்டுள்ளது.  கட்டணம்  5 டாலர்..  கோயில்  சிப்பந்தியை, கூப்பிட்டுக் கொண்டால், பாழடைந்தவை போக மீதம்  உள்ளதை  அறிவு பூர்வமாக பார்க்கலாம்.  இந்த கோயிலுக்கு  சியாம் ரீப் பகுதியிலிருந்தும்  77கி.மீ. பயணம் செய்து வரலாம்.
 

]]>
https://www.dinamani.com/weekly-supplements/dinamani-kathir/2019/jan/13/பெங்க்-மீலியா-3076899.html
3076901 வார இதழ்கள் தினமணி கதிர் பேல்பூரி DIN DIN Sunday, January 13, 2019 12:00 AM +0530 கண்டது

(சிதம்பரத்திலுள்ள நூலகம் ஒன்றில்) 

என்னைத் தேடி  நீ வந்தால்..
 உன்னைத் தேடி உலகமே  வரும்.

  - நூலகம்
மு.சுந்தரம், தேனி.

 

(தஞ்சை  மாவட்டம்  திருப்பனந்தாள்  அருகே  உள்ள ஒரு
கிராமத்தின் பெயர்)

சிற்றிடையாள்  நல்லூர்

வீர.செல்வம், பந்தநல்லூர்.

 

(பட்டுக்கோட்டை  - அறந்தாங்கி சாலையில்  ஆவணத்தான் கோட்டையில் உள்ள ஓர்  உணவகம்)

 மண்பானை  உணவகம்

 ப.விஸ்வநாதன், கீரமங்கலம். 

 

(திருச்சி சாலையில்  ஒரு வாகனத்தின்  பின்புறத்தில்)

தொடர்ந்து வா  பயமில்லை
தொட்டுவிடாதே  பணமில்லை

கே.விஸ்வநாதன், கோயமுத்தூர். 

 

கேட்டது

(திண்டுக்கல்  தெற்கு ரத வீதியில் உள்ள டீ கடையில்  இரு நண்பர்கள்)

""மாப்பிள்ளே  உலகமே  ஒரு நாடகமேடை
அதில் நாம் எல்லாம்  நடிகர்கள்...''
""மச்சான்  அப்ப நயன்தாராவோட 
நடிக்க வாய்ப்பு இருக்கா...''
""உங்க வீட்டுக்காரம்மாகிட்ட கேட்டுச் சொல்றேன்''
""நமக்குள்ள  எதுக்குப் பிரச்னை...
மாஸ்டர்  நல்லா சூடா ரெண்டு டீ போடுங்க!''

எஸ்.வேல் அரவிந்த்,  திண்டுக்கல். 

 

(ராமநாதபுரம்  ரயிலில்  இரு நண்பர்கள்)

 ""நீ சிகரெட்  பிடிப்பியா?''
""இல்லை''
"" நீ தண்ணி அடிப்பியா?''
"" இல்லை''
"" வெரிகுட் ... இப்படித்தான்  இருக்கணும்''
""ஆனா,  அடிக்கடி பொய்  சொல்லுவேன்'' 

ஆ.சுகந்தன்,  தருமபுரி.

 

யோசிக்கிறாங்கப்பா!


 ஆடம்பரமா வாழ்றதுக்கு  கூட
 அதிகமா  போராட வேண்டியதில்லை!
ஆனால்...
 நிம்மதியா  வாழ்றதுக்கு
 சாகும்வரை 
போராட  வேண்டியிருக்கு!
துரை.ஏ.இரமணன்,  துறையூர். 

மைக்ரோ கதை

ஓர் ஊரில்  துறவி  ஒருவர்  இருந்தார்  அவர்  எப்பொழுதும் மகிழ்ச்சியாக இருந்தார்  தன்னைக் காண வருபவர்களிடம்  கலகலப்பாகப் பேசினார்.

சிரித்த  முகத்துடன்  காட்சி அளித்தார்.  அவருடைய   90-ஆவது பிறந்தாள் விழா சீரும் சிறப்புமாகக்  கொண்டாட  ஏற்பாடு  செய்யப்பட்டது.  பல ஊர்களில் இருந்தும்  அவருடைய சீடர்கள்  விழாவிற்கு  வந்து இருந்தனர்.

 சீடர்களில் ஒருவர்,  ""துறவியாரே!  உங்களுடன்   பல ஆண்டுகள்  பழகும் பேறு பெற்றுள்ளேன்.  நீங்கள்  சோகத்தில்  இருந்து  நான் பார்த்த தேயில்லை. எப்பொழுதும்  மகிழ்ச்சியாகவே  இருக்கிறீர்கள்.  எப்படி  உங்களால்   இப்படி இருக்க முடிகிறது'' என்று கேட்டான். 

அதற்கு, துறவி  சிரித்துக் கொண்டே  ""அதில்  ஒன்றும்  பெரிய ரகசியம் இல்லை. நான்  இளைஞனாக இருந்த போதே  சொர்க்கத்திற்குப் போவதும் நரகத்திற்குப் போவதும்  என் கையில்தான் இருக்கிறது  என்று கண்டுபிடித்தேன். அதனால்  என்னையே  கேள்வி கேட்டுக் கொண்டேன். சொர்க்கம் செல்லவே விரும்புகிறேன் என்று முடிவு  செய்தேன்.  அதற்கு ஏற்ப நல்ல  செயல்களையே செய்தேன்.  நான் எப்போதும்  மகிழ்ச்சியாக இருப்பதற்கு இதுதான்  காரணம்''  என்று  விளக்கினார்.

அ. ராஜா  ரஹ்மான், கம்பம். 


எஸ்.எம்.எஸ்.

பதில் சொல்ல முடியாத கேள்வி கேட்டா
 அது "பொண்டாட்டி'!
பதிலே  இல்லாத கேள்வி கேட்டா
அது "குழந்தை'!

 ஆர். ஜனனி  ரமணன், ராசிபுரம். 


அப்படீங்களா!


உலகில் உள்ள மொத்த  சிலந்திகளின் கூட்டமும்  ஒன்றுசேர்ந்து   செயல்பட்டால்  பன்னிரண்டு  மாதத்தில்  மனித  இனத்தையே  அவைகளால் தின்று  தீர்த்துவிட முடியும்  என்று தெரிவித்துள்ளனர். 

சிலந்திகள்  தொடர்பாக  ஆய்வு  மேற்கொண்டுள்ள  விஞ்ஞானிகள் தற்போது வெளியிட்ட  இந்த பகீர்  தகவல்  மனித இனத்திற்கே  சவாலாக  அமைந்துள்ளது.
தற்போது  வரை பெரும்பாலான  சிலந்திகள்  பூச்சிகளையே  உணவாக உட்கொள்ளுகின்றன.  ஆனால் சில காட்டுவகை   சிலந்திகள்  பல்லிகள், பறவைகள்  மற்றும் சிறிய வகை பாலூட்டிகளையும் உணவாக   எடுத்துக் கொள்கின்றன.

சிலந்திகள்  குறித்து  ஆய்வு  மேற்கொண்ட விஞ்ஞானிகள்  வெளியிட்ட தகவலில், உலகில்  உள்ள மொத்த சிலந்தி வகைகளும்  உண்ணும்  உணவின் மொத்த எடையானது, மொத்த மனித இனத்தின்  எடையைவிடவும் அதிகமாகும்.

பூமியில்  உள்ள மொத்த  சிலந்தி  வகைகளும்  ஆண்டுக்கு  சுமார்  440.9இல் இருந்து  881.8 மில்லியன்  டன் உணவு  உட்கொள்கின்றனவாம்.

உலகில் வசிக்கும்  மொத்த  இளைஞர்களின் உடல்  எடையே  316.3  மில்லியன் டன் தான்.  அவ்வாறிருக்க, சிலந்திகள்  ஓராண்டில் எடுத்துக் கொள்ளும் உணவின்  எடை இதைவிட  அதிகம்  என ஆய்வாளர்கள்  குறிப்பிடுகின்றனர். மேலும், ஒட்டு  மொத்த  மனித  இனத்தையே  ஓராண்டில் தின்று முடித்தாலும், உணவின்றி  பல எண்ணிக்கையிலான  சிலந்திகள்  அவதியுறும்  எனவும்  கூறுகின்றனர்.
கே.கே., சென்னை-115.

]]>
https://www.dinamani.com/weekly-supplements/dinamani-kathir/2019/jan/13/பேல்பூரி-3076901.html
3076902 வார இதழ்கள் தினமணி கதிர் ஆயுள் காக்கும் ஆயுர்வேதம்: பொடுகுத் தொல்லையி−ருந்து விடுபட...! பேராசிரியர்  எஸ். சுவாமிநாதன் DIN Sunday, January 13, 2019 12:00 AM +0530 எனக்கு வயது 21 ஆகிறது. இந்த இளம் வயதிலேயே எனக்கு பெரும் மன உளைச்சல். காரணம் பொடுகு, அதனால் முடி கொட்டுதல், அதனால் முன் வழுக்கை. இதற்கு ஆயுர்வேதத்தில் ஏதேனும் உபாயம் உள்ளதா? 

வே.மாதவன், காவேரிபாக்கம்.

சிறிதும் எண்ணெய்ப்பசையே இன்றி தலையை வறட்சியுடன் வைத்திருக்கும் பலருக்கும் நீங்கள் குறிப்பிடுவது போன்ற உபாதை வரக் காரணமாகலாம். இவ்விஷயத்தில் தற்சமய ஆராய்ச்சிகள் பலதும் எண்ணெய்க்கு எதிராகவே இருக்கின்றன. ஆனாலும், ஆயுர்வேதம் அதை சம்மதிக்கவில்லை என்று தான் கூற வேண்டியிருக்கிறது. முடியினுடைய வேர்பகுதியிலிருந்து பிய்த்துக் கொண்டுவரும் தோல் பகுதியானது வெளியேறும்போது மயிர்கால்களின் வலுவையும் குறைத்து விடுவதால் அவை உதிர்ந்துவிடும் நிலையில் முடி கொட்டிவிடும் பிரச்னையானது தொடங்கிவிடுகின்றது. தோல், விண்டு கீறுவது எதனால்? பூச்சிகளின் உபாதையாலா? அல்லது நீர்ப்பசையின் குறைவினாலா? நெய்ப்பின்றி கிடப்பதாலா? மன உளைச்சலால் அப்படி ஏற்படுமா? போன்ற பல சந்தேகங்களை இப்பிரச்னைக் கிளப்பி விடுவதால் இது மிகவும் ஆராய்ச்சிக்கு உட்பட்டதன் விளைவாக பழ்ண்ஸ்ரீட்ர்ப்ர்ஞ்ஹ் என்ற தலைமுடி சம்பந்தப்பட்ட துறையே தொடங்கப்பட்டு, இன்று உலகம் முழுவதும் மிகவும் பார்க்கப்படும் வலைதளமாக விளங்குகின்றது. 

எதுவாக இருந்தாலும் தோல்வறட்சியை நீக்கி வனப்பை ஏற்படுத்தும் சில ஆயுர்வேத மூலிகைத் தைலங்களை நீங்கள் தொடர்ந்து பயன்படுத்தினால் குணம் பெற வாய்ப்பிருக்கிறது. அய்யப்பாலாகேரதைலம், தூர்வாதி கேர தைலம், சதுக்ஷீரீ கேர தைலம், ஏலாதி கேர தைலம், ஏலாதி தைலம் போன்ற சிறந்த மருந்துகள் இருந்தாலும் ஆயுர்வேத மருத்துவரை அணுகி ஆலோசனை பெற்ற பிறகு ஒன்றிரண்டு மருந்துகளை பயன்படுத்தலாம். 

இவைகளின் மூலமாக கிருமி தொற்றுகள் ஏதேனும் தோலில் இருந்தால் அவையும் மறைந்துவிடும். தலைப்பகுதி பொதுவாகவே கபம் எனும் தோஷத்தின் இருப்பிடமாகையால் அதன் மூலமாகவே சிலருக்கு அரிப்புடன் கூடிய பொடுகுத் தொல்லையும், முடி உதிர்தலும் ஏற்படலாம். அதற்கு, வெளிப்புறத் தைலத்தின் பயன்பாடு மட்டுமே போதாது என்பதால் உள்ளுக்கு ஆரக்வதாதி கஷாயம், படோலகடுரோஹிண்யாதி கஷாயம், திக்தகம்/மஹாதிக்தகம் கஷாயம் போன்றவை சரியானபடி தேர்ந்தெடுக்கப்பட்டு பயன்படுத்தினால் குணம் தரக்கூடிய நல்ல மருந்துகளாகும்.

சொரிந்தால் செதில் செதிலாக உதிரக்கூடிய பொடுகுத் தொல்லையுடன், எரிச்சலும் இருந்தால் பித்த ரத்தங்களுடன் கேடுற்று தலையின் தோல்பகுதியில் கபதோஷத்தின் ஆதிக்கம் நடைபெறுவதை  ஊகித்து அறியலாம். கஷாயம் மருந்துகளை விட மூலிகை நெய் மருந்துகளாகிய திக்தகம்/மஹாதிக்தகம் இந்நிலையில் உட்புறமாகவும் வெளிப்புறமாகவும் பயன்படுத்த சிறந்தவை. உட்புற விஷச்சேர்க்கையானது உணவின் மூலமாகவோ, ஒவ்வாமை உணவுகளின்  சேர்க்கையின் மூலமாகவோ நடைபெற்றிருந்தாலும் அவையும் தோலில் பிரதிபலிக்கவே செய்யும். மாணிபத்ரம் லேஹ்யம் திருவ்ருல் லேஹ்யம் போன்றவற்றைப் பயன்படுத்தி நன்கு வயிறு பேதியாகும்படிச் செய்து நமது உடலை சுத்தப்படுத்தலாம். ரத்தத்தில் உள்ள விஷத்தை முறிக்கச் செய்து வெளியேற்றும் இவ்வகை மருந்துகளால் குடல் சுத்தம் அடைந்து பல தோல் நோய்கள் குணமடைந்துள்ளன. தலையில் ஊற்றப்படும் சிரோதாரா சிகிச்சை முறை, மூலிகைகளை அரைத்து தலையில் பொத்திவைக்கும் தலைப்பொதிச்சல் எனும் சிகிச்சை, மூக்கினுள் மருந்தைவிட்டு தலையிலுள்ள உட்புற அழுக்குகளை நெகிழச் செய்து வாய்வழியாக வெளியேற்றும் நஸ்யம் எனும் சிகிச்சை போன்றவைகளாலும் நீங்கள் பயன்பெறலாம். 

மீன், சிக்கன், தயிர், வெல்லம், பால்பொருட்கள், பகல் தூக்கம் போன்றவற்றைத் தவிர்க்கவும். தலைக்குளிக்க கடுக்காய், கருங்காலிக்கட்டை, சரக்கொன்றைப்பட்டை, வேப்பம்பட்டை ஆகியவை போட்டு காய்ச்சி ஆறிய வெந்நீரையே பயன்படுத்தவும்.

 (தொடரும்)

]]>
https://www.dinamani.com/weekly-supplements/dinamani-kathir/2019/jan/13/ஆயுள்-காக்கும்-ஆயுர்வேதம்-பொடுகுத்-தொல்லையி−ருந்து-விடுபட-3076902.html
3072538 வார இதழ்கள் தினமணி கதிர் தொடங்குங்கள்... இப்போது! DIN DIN Sunday, January 6, 2019 12:00 AM +0530 புது வருடம் பிறந்துள்ள நிலையில் ஆயுர்வேதத்தில் கூறப்பட்டுள்ள கருத்துக்களுக்குச் செயல் வடிவம் கொடுத்து செய்ய விரும்புகிறேன். அது மருந்தானாலும் சரி, செயலானாலும் சரி. அவற்றை விளக்கிட முடியுமா? 

-மணிமாறன், ராமேஸ்வரம்.

வாக்படர் மற்றும் சரகர் எனும் முனிவர்களால் எத்தனையோ ஆண்டுகளுக்கு முன்னால் எழுதப்பட்ட ஆயுர்வேத நூல்களின் பல கருத்துக்களும் இன்றளவிலும் போற்றத்தக்கவையாகவே இருக்கின்றன. நடைமுறை சாத்தியமாகவும் உள்ளன. அந்நூல்களிலிருந்து சில உயர்வான உபதேசங்கள்:

பிறர் தம்முடன் பேசுவதை எதிர்பாராமல் தானே முதலில் பேச்சைத் தொடங்குவாய். இனிய முகத்துடன் உரிய நேரத்தில் இதமாயும் அளவுடனும் இனியதாயும் பேசுவாய். 

மனமும் புலன்களும் உனக்கு அடங்கிச் செயலாற்றட்டும். பிறரது வளர்ச்சிக்குக் காரணமான சாதனங்களைத் தான் பெறவில்லையே... அதனைப் பெறவேண்டும் என்று பொறாமைப் படாதே. பிறரது வளர்ச்சியைக் கண்டு பொருமாதே. வரவிருப்பதைப் பற்றிய கவலையும் கிலியும் தேவையற்றது. செய்யத்தகாததைச் செய்வதில் கூச்சமும், எதனையும் ஆழ்ந்து சிந்திப்பதும் சிறப்பு தரும்.

உடற்பயிற்சி, கிண்டல் பேச்சு, சொற்பொழிவு, வழிநடை, உடலுறவு, கண்விழிப்பு முதலியவற்றில் எத்தனை பழக்கப்பட்டிருந்தாலும் அறிவாளி அவ்வப்போதுள்ள உடல் நிலையை நன்கு கவனித்து, அவற்றைத் தன் அளவிற்கு மீறி கையாளமாட்டான். இவற்றையும் இவற்றைப் போன்றவற்றையும்  அளவிற்கு மீறிக் கையாள்பவன் வலிமையிழந்து திடீரென அழிவிற்கு உட்படுவான்.

தினமும் இரண்டு வேளைகளிலும் குளிக்க வேண்டும். குளித்த பிறகு முன் உடுத்திய ஆடையை மறுபடிகட்டிக் கொள்ளாதே. நாக்கு, மூக்கு, காது, கண், வாய், மலவாய், சிறுநீர் வாயென ஒன்பது மலத்துவாரங்கள் - அழுக்கு சேருமிடங்கள். நடையால் கால்களிலும் அழுக்கு சேரும். இவற்றை அடிக்கடி சுத்தப்படுத்திக் கொள். அழுக்கற்ற ஆடை அணி. உடல் நாற்றமகல மணப் பொருளைப் பூசிக்கொள். தோற்றத்தை அழகாக வைத்துக் கொள்.
 எவரையும் தனக்கு எதிரி என்றோ, எவருக்கும் தான் எதிரி என்றோ பிரகடனப்படுத்தாதே. தனக்கு ஏற்பட்ட அவமதிப்பை வெளிப்படுத்தாதே. தனது எஜமானன் தன்னிடம் பிரியமாக இல்லையென வெளிப்படையாகக் கூறாதே. வேறொருவர் இதனைப் பயன்படுத்தி எஜமானனுக்கு மேலும் வெறுப்பேற்படச் செய்யக் கூடும்.

தன்னிடம் உதவி எதிர்பார்த்து வருபவரை வெறுங்கையுடன் அனுப்பாதே. அவர்களை அவமதிக்காதே. கொடுஞ்சொல் சொல்லாதே. எவரையும் முழுவதுமாக நம்புவதோ, சிறிது கூட நம்பாதிருப்பதோ நல்லதல்ல.
 எல்லா உயிரிடத்திடமும் அன்புடன் பழகு. ஆபத்தான  சூழ்நிலையில்  வருந்துபவர்களுக்கு உதவு. கோபவசப்பட்டு குமுறுபவர்களைச் சமாதானப்படுத்து. பயந்தவர்களுக்கு ஆறுதல் கூறு. சொன்ன சொல்லைக் காப்பாற்று. அமைதியை முக்கியமாக்கிக்கொள். பொறுமையின்மையைத் தவிர்த்துவிடு.

வாயை மூடிக்கொள்ளாமல் தும்மவோ, சிரிக்கவோ,  கொட்டாவி விடவோ கூடாது. மூக்கை அடிக்கடி நோண்டக் கூடாது. கை, கால் முதலிய உறுப்புகளை இயற்கைக்கு மாறான வழிகளில் உபயோகிக்கக் கூடாது.

அறம், பொருள், இன்பம் என்ற மூன்றுக்கும் பயன்படாத  எந்தச் செயலையும் தொடங்காதே. இம் மூன்றில் எதனையும் புறக்கணிக்காதே. எல்லா நடைமுறைகளிலும் நடு நிலையைப் பின்பற்று. அதிக ஈடுபாட்டையோ வெறுப்பையோ காட்டாதே.

காது, கண் முதலிய பொறிகளுக்குத் தேவையானவற்றை மிகவும் குறைத்தளித்து அடக்குவதோ, அளவுக்கு மீறி அளித்து அதிகமாக மகிழச் செய்வதோ தவறு.

மக்களின் கருத்தறிந்து அவர்களை திருப்திப்படுத்துவதில் தேர்ந்தவனாக இரு. எவர் எவர் எப்படி எப்படி மகிழ்வரோ அப்படி அவர்களுக்கு அனுகூலமாகப் பழகு.

இறைவனை வழிபடும் போது வேறொரு பணியில் மனத்தைச் செலுத்தாதே. மழையில் நனைந்து கொண்டு ஓடாதே. பிறரைத் துன்புறுத்திப் பணம் சேர்க்காதே.  

உடலில் பேச்சு மனம் இவை களைப்படையும் முன்பே  இவற்றின் பணிகளை நிறுத்திக் கொள்ள வேண்டும். பிரயாணம் செய்யும் போது தனக்கு எதிரே அடிக்கும் காற்று, கடும் வெயில், புழுதி, பனிமூட்டம், பேய்க்காற்று இவற்றைத் தவிர்க்கலாம்.

மேற்குறிப்பட்டவை சில உதாரணங்களே. அவர்கள் மேலும் நிறைய நல் உபதேசங்களை நம் நன்மைக்காக அளித்துள்ளனர். புத்தாண்டில் இவற்றைக் கடைபிடிக்க நீங்கள் தீர்மானித்துவிட்டீர்கள் தானே?
(தொடரும்)

பேராசிரியர்  எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே) 
செல் : 94444 41771
 

]]>
https://www.dinamani.com/weekly-supplements/dinamani-kathir/2019/jan/06/தொடங்குங்கள்-இப்போது-3072538.html
3072539 வார இதழ்கள் தினமணி கதிர் சொன்னால் நம்பமாட்டீர்கள் ! - 10 சின்ன அண்ணாமலை DIN Sunday, January 6, 2019 12:00 AM +0530  

தலைமறைவு வாழ்க்கை

1942 ஆகஸ்ட் போராட்டத்தில் திருவாடானை சிறையில் இருந்து மக்கள் என்னை விடுதலை செய்ததும், போலீஸ் துப்பாக்கிப் பிரயோகம் நடைபெற்றதும் அந்தத் துப்பாக்கிப் பிரயோகத்தில் என் கையில் ஒரு குண்டு பாய்ந்ததும், போலீஸ்காரரிடம் இருந்து தப்புவதற்காகப் பல பகுதிகளில் ஒளிந்து மறைந்து கையில் ஏற்பட்ட காயத்துடன் திருச்சிக்கு வந்து சேர்ந்தேன். திருச்சியில் திரு. டி.எஸ். அருணாசலம் அவர்கள், இப்போது காமராஜ் மன்றம் என்ற பெயரால் இயங்கி வரும் நூல்நிலையக் கட்டடம் அப்பொழுது ஜில்லா போர்டு ஆபீஸாக இருந்து வந்தது;  அதில் அவர் தங்கி இருந்தார். நடு இரவில் மேற்படி கட்டடத்திற்குச் சென்று அவரை எழுப்பினேன். அவர் என்னைப் பார்த்து திடுக்கிட்டு ""எப்படி இங்கு வந்தாய்?'' என்று கேட்டார். நடந்த சம்பவங்களைச் சொல்லிக் கையில் இருந்த காயத்தைக் காண்பித்தேன். உடனே என்னை அவர் டாக்டர் ஜகந்நாதன் என்பவரிடம் கூட்டிச் சென்றார். திருச்சி நகரசபை சேர்மனாக இருந்த டாக்டர் ரங்கநாதன் அவர்களுடைய மாமனார்தான் டாக்டர் ஜகந்நாதன். டாக்டர் ஜகந்நாதன் அவர்கள் சிறந்த காங்கிரஸ் அபிமானி; ஆகையால் கையில் பாய்ந்திருந்த துப்பாக்கிக் குண்டை போலீஸýக்கு அறிவிக்காமல் வெளியில் எடுத்து காயத்துக்கு மருந்து போட்டுக் கட்டிவிட்டார்.

அதற்குள் போலீஸார் தேவகோட்டையிலும், திருவாடானையிலும் சிறையில் இருந்து தப்பிய என்னை உயிருடனோ, அல்லது பிணத்தையோ கொண்டு வந்தால் ரூ.10,000 பரிசளிப்பதாகப் பறைசாற்றினார்கள். இது விவரம் தெரிந்ததும் தலைவர் டி.எஸ். அருணாசலம் அவர்கள் என்னை ஒரு பாதுகாப்பான வீட்டில் தலைமறைவாக இருக்கச் செய்தார்கள்.

தலைவர் டி.எஸ். அருணாசலம் அவர்களும், நானும் பல யோசனைகள் செய்து திருச்சியில் உள்ள காவேரி பாலத்தை வெடி வைத்துத் தகர்ப்பது என்றும் அகில இந்திய ரேடியோ நிலையத்தை "பாம்' வைத்துத் தகர்ப்பது என்றும் திட்டம் தீட்டி அதற்கு வேண்டிய வெடி மருந்துகள் தயார் செய்வதற்கு ஏற்பாடுகள் செய்தோம். இந்தக் காரியத்தை நாங்கள் செய்வதற்கு குறித்த நாளுக்கு முதல்நாள் போலீஸார் திடீரென்று டி.எஸ். அருணாசலம் அவர்களைக் கைது செய்தனர். அவர் கைது செய்யப்பட்ட செய்தியை அறிந்ததும் நானும் தப்புவதற்காக ஏற்பாடுகள் செய்யும்போது பெரிய கம்மாள தெருவில் ஏராளமான போலீஸார் நடமாட்டம் இருப்பது தெரிந்தது. மேற்படி கம்மாள தெருவில்தான் நான் தலைமறைவாக இருந்தேன். அந்த வீட்டுக்கு உடையவர் ஒரு ஏணியை எடுத்து நடுவாசலில் வைத்து ஓட்டின்மீது ஏறச் செய்து வரிசையாக இருந்த வீடுகளின் வழியாக ஓட்டின்மீதே நடந்து அடுத்த தெருவில் உள்ள ஒரு வீட்டிற்கு எல்லா வீடுகளையும் கடந்து குதிக்கச் சொன்னார். அவர் சொன்னதுபோல் செய்து நானும் குதித்தேன். அந்த வீட்டுக்காரர் தயாராக வைத்திருந்த காரில் ஏற்றி என்னை கரூருக்கு அனுப்பி வைத்தார்.

கரூரில் டி.கே.எஸ். பிரதர்ஸ் நாடகக் குழுவினரின் நாடகம் நடந்துகொண்டு இருந்தது. அந்த நாடகக் குழுவினர்களுடன் போய் நானும் சேர்ந்துகொண்டேன். டி.கே.எஸ். சகோதரர்கள் என்னிடம் மிக அன்பாக நடந்து கொண்டு நான் தலைமறைவாக இருப்பதற்கு வேண்டிய சகல உதவிகளையும் செய்தார்கள். அதற்கும் ஒரு நாள் ஆபத்து வந்தது. நாடகம் பார்க்க வந்ததுபோல் சில போலீஸ் அதிகாரிகள் வந்து நான் இருப்பதைக் கண்டுபிடித்துவிட்டார்கள். இதை அறிந்த திரு. டி.கே. சண்முகம் அவர்கள் சாமர்த்தியமாக என்னை போலீஸ் அதிகாரிகளிடம் இருந்து தப்புவித்து அவர்களுடைய காரிலேயே என்னைச் சென்னையில் கொண்டுவிடும்படி செய்தார்.

சென்னையில் தலைமறைவாக இருந்த திரு. சா. கணேசன் அவர்களைச் சந்தித்தேன். அவர் சென்னையில் இருப்பது ஆபத்து என்று கூறி என்னை காசிக்குப் போய் தலைமறைவாக இருக்கும்படி ஏற்பாடு செய்தார். காசிக்கு என்னை இரயிலில் ஏற்றி விடுவதற்கு சென்னை சென்ட்ரல் ஸ்டேஷனுக்கு தினமணி ஆசிரியர் ஏ.என். சிவராமன் அவர்கள், திரு. ஏ.கே. செட்டியார் அவர்கள், திரு. கோயங்கா முதலியவர்கள் வந்திருந்தார்கள்.

சென்னையிலிருந்து நானும் எனது நண்பரும் காசிக்கு ரயிலில் சென்றபோது இட்டார்சி என்ற ஊரில் ஒருநாள் மாலையில் இறங்கி மறுநாள் காலையில் ரயில் ஏற வேண்டியிருந்தது.

*************

இட்டார்சி என்பது ஒரு ரயில்வே ஜங்ஷன். யுத்த காலமாக இருந்ததால் ராணுவ வீரர்கள் ஏராளமாகத் தென்பட்டனர். இரவு எங்கு தங்குவது என்று தெரியவில்லை. எந்தப் போலீஸ்காரரைப் பார்த்தாலும் சந்தேகமாக இருந்தது. பசி வயிற்றைக் கிள்ளியது. "சரி, முதலில் ரயில்வே உணவு விடுதியில் சாப்பிடுவோம்' என்று சாப்பிடப் போய் உட்கார்ந்தோம். அது அசைவ உணவு விடுதி. பரோட்டா, கோழி குருமா, மீன் வறுவல் என்று பலவகையான உணவு வகைகளை இருவரும் ஒரு "பிடி பிடித்தோம்'. பில் வந்தது. ரூபாய் அறுபது. அசந்து விட்டோம். இதுவரையில் இம்மாதிரி ஓட்டலில் நாங்கள் சாப்பிட்டதுமில்லை. இவ்வளவு ரூபாய்க்கு பில் கொடுத்ததுமில்லை.

எங்கள் கைவசமோ ரூபாய் அதிகமில்லை. இப்போது அறுபது ரூபாய் கொடுத்து விட்டால் என்ன செய்வது என்று நாங்கள் இருவரும் தமிழில் பேசிக் கொண்டோம்.

எங்களுக்கு உணவு பரிமாறி பில் கொடுத்த சர்வர் எங்களை ஆச்சரியமாகப் பார்த்து ""ஏன் சார் நீங்கள் தமிழ்நாடா?'' என்று தமிழில் கேட்டார்.

""ஆமாம் நாங்கள் தமிழ்நாடுதான், ராமநாதபுரம் ஜில்லா'' என்றோம். உடனே அவர், "" நான் கூட ராமநாதபுரம் ஜில்லாகாரன்தான் சார். என் ஊர் சிவகங்கைக்குப் பக்கத்திலுள்ள பார்த்திபனூர்'' என்றான்.

""அடடே அப்படியா சங்கதி. ரொம்ப நெருங்கி வந்து விட்டாயே, இங்கே வந்து எவ்வளவு காலமாச்சு?'' என்று கேட்டேன். 

""பத்து வருஷமாச்சு, நம்ம ஊரை எல்லாம் பார்க்க வேண்டுமென்ற ஆசை வரவர அதிகமாகிக்கொண்டு வருகிறது'' என்று சொன்னவன், தன் குரலைத் தாழ்த்தி, ""ஏன் சார், திருவாடானைப் பகுதியில் பெரிய புரட்சியாமே, இங்கிலீஷ் கவர்ன்மெண்டே போச்சாமே, ஜெயிலை உடைத்து காங்கிரஸ் தலைவர்களை ஜனங்கள் விடுதலை செய்து விட்டார்களாமே, நம்ம ஊர் ஆளுங்க செய்யக் கூடியவங்கதான் சார். வீர மறவர் நிறைஞ்ச ஊரில்ல'' என்று அடுக்கிக் கொண்டே போனான். நாங்கள் அவனைத் தடுத்து, ""நீயும் காங்கிரஸ்காரன்தானா?'' என்று கேட்டோம்.

""என்ன சார் இப்படிக் கேட்கிறீங்க, என் பெயர் வீரபத்ரன். என் உடம்பிலும் மறவன் ரத்தம் ஓடுது. உண்மையான மறவன் ஒவ்வொருவனும் தேச பக்தி உள்ளவன்தான் சார், தேசத்துக்காக நாங்கள் எதையும் செய்வோம். இந்த ஓட்டலுக்கு வெள்ளைக்காரங்க, அதிலும் போலீஸ், ராணுவ அதிகாரிகள் வந்தாங்கன்னா, அவர்களுக்கு நான் சாப்பாடு பரிமாற வேண்டி வந்தால் கட்டாயம் விஷத்தைப் போட்டுக் கொடுத்திடுவேன் சார்'' என்றான் ஆவேசமாக.

அவனுடைய தேசபக்தியைப் பார்த்து நாங்கள் பிரமித்து விட்டோம். நாங்கள் யார் என்பதையும் இப்போது எந்த நிலையில் அங்கு வந்திருக்கிறோம் என்பதையும் சொன்னவுடன் அவன் எங்களை அப்படியே கட்டிப்பிடித்துக் கொண்டு தாரை தாரையாகக் கண்ணீர் விட்டான். அவனால் பேச முடியவில்லை.

""திருவாடானை ஜெயிலை உடைத்து மக்களால் விடுதலை செய்யப்பட்டவர்கள் நீங்கள்தானா, நீங்களாதானா'' என்று எங்களைத் தொட்டுப் பார்த்தான். பின்னர் ஓட்டல் முதலாளியிடம் எங்களைக் கூட்டிச் சென்று, எங்களைப் பற்றிய முழு விவரத்தையும் அவரிடம் சொல்லி விட்டான். ""பில்லுக்கு பணம் கொடுக்க வேண்டாம். நானும் ஒரு காங்கிரஸ்காரன்தான். பிழைப்பிற்காக வேறு துணி கட்டியிருக்கிறேன். நீங்கள் பக்கத்திலிருக்கும் அறையில் தங்கிக் கொள்ளுங்கள்'' என்று ஓட்டல் முதலாளி இந்தியில் சொன்னார்.

எல்லாம் வீரபத்ரன் ஏற்பாடுதான். அறையில் தங்கியிருந்தோம்.

சுமார் அரைமணி கழிந்ததும், அறையைத் திறந்து கொண்டு வீரபத்ரன், ஓட்டல் முதலாளி முதலியவர்களுடன் ஒரு போலீஸ் இன்ஸ்பெக்டர் உள்ளே நுழைந்தார்.

நாங்கள் திடுக்கிட்டுத் திகைத்தோம். "ஆகா மோசம் போய் விட்டோம்' என்று நினைத்துக் கொண்டோம்.

வந்த போலீஸ் இன்ஸ்பெக்டர் இனிமையான தமிழில், ""தம்பி வீரபத்ரன் எல்லாம் சொன்னான். நீங்கள் எதற்கும் பயப்பட வேண்டாம். இன்று இரவு நமது வீட்டில் தமிழ்நாட்டுச் சாப்பாடு சாப்பிடலாம் வாருங்கள்'' என்று கூப்பிட்டார்.

""அப்பாடா'' என்று பெருமூச்சு விட்டோம். அந்தப் போலீஸ் இன்ஸ்பெக்டர் பெயர் சுந்தர்சிங் என்றும், அவர் தந்தை மதுரையைச் சேர்ந்தவர் என்றும் காசியில் வியாபாரம் செய்ய வந்த குடும்பம் அங்கேயே தங்கி விட்டார்கள் என்றும் சுந்தர்சிங் முழுப் பெயர் சோமசுந்தரம் என்றும் வடக்கே உத்யோகம் பார்க்க செளகரியமாக சுந்தர்சிங் என்று பெயரை வைத்துக் கொண்டிருக்கிறார் என்றும் ஒரு பஞ்சாபிப் பெண்ணைத் திருமணம் செய்துகொண்டிருக்கிறார் என்றும் வீரபத்ரன் சொல்லத் தெரிந்து கொண்டோம்.

இன்ஸ்பெக்டர் வீட்டுக்குச் சென்றோம். அவரது பஞ்சாபி மனைவி தூய தமிழில் ""வணக்கம்'' என்றார். அப்போதே எங்களுக்கு, ""அங்கு தமிழ்நாட்டு சாப்பாடுதான்'' என்று புரிந்துவிட்டது.

இரவு சாப்பாடு முடிந்தது. காலையிலும் பலகாரம் தந்தார்கள். இன்ஸ்பெக்டர், ஓட்டல் முதலாளி, வீரபத்திரன் மூவரும் சேர்ந்து ரூபாய் ஐநூறு கொடுத்து செலவிற்கு வைத்துக் கொள்ளச் சொன்னார்கள். நாங்கள் புறப்பட வேண்டிய ரயில் ஏறினோம். அப்போது இன்ஸ்பெக்டர் சுந்தர்சிங்கின் மகன் ஐந்து வயதுப் பையன் வெளியூர் சென்றிருந்தவன் அங்கு வந்தான். அவன்தான் அவர் மகன் என்பதைத் தெரிந்து கொண்டு நான், ""தம்பி உன் பெயர் என்ன?'' என்றேன்.

சொன்னால் நம்பமாட்டீர்கள் அவன் சொன்ன பதில் ""காந்தி'' என்பதாகும்.

(தொடரும்)

]]>
https://www.dinamani.com/weekly-supplements/dinamani-kathir/2019/jan/06/சொன்னால்-நம்பமாட்டீர்கள்----10-3072539.html
3072540 வார இதழ்கள் தினமணி கதிர் இசைக்குழு மூலம் சேவை! சி.வ.சு.ஜெகஜோதி DIN Sunday, January 6, 2019 12:00 AM +0530 திருச்சி விமான நிலையம் எதிர்புறத்தில் லூப்ரா மாற்றுத்திறனாளிகள் சேவை மையத்தை நிறுவி கடந்த 32 ஆண்டுகளாக அதை நிர்வகித்து  வருகிறார் இரு கண்களையும் இழந்த பா.தாமஸ்.  இவர் அந்த சேவை மையத்திற்கு  "லூப்ரா சேவை மையம்' எனப் பெயரிட்டுள்ளார். மூளை வளர்ச்சி குன்றியவர்கள், பிள்ளைகளால் கைவிடப்பட்ட முதியோர்கள், ஆதரவற்ற சிறார்கள், மாற்றுத்திறனாளிகள் என மொத்தம் 187 பேருக்கு ஆதரவுக்கரம் நீட்டியிருக்கிறது இம்மையம்.

இவர்களுக்கான மருத்துவச் செலவுகள் செய்தல், விளையாட்டுப் போட்டிகள் நடத்துதல், பார்வையற்றவர்களுக்கு திருமணங்கள் செய்து வைத்தல், ஆதரவற்ற முதியோர்கள் மரணமடைந்து விட்டால் அவரவர்களது மத வழக்கப்படி நல்லடக்கம் செய்தல்  என தாமஸின் சேவைப் பட்டியல் நீள்கிறது. இவை தவிர திருச்சி அருகேயுள்ள 13 கிராமங்களைத் தத்தெடுத்து அக்கிராமங்களில் உள்ள குழந்தைகளுக்கு சிறந்த ஆசிரியர்களைக் கொண்டு இரவுநேர பாடவகுப்புகள் நடத்தியும் வருகிறார்.  இவ்வமைப்புக்கு  பொருளாதார வசதி என்ன? அதற்கும் ஒரு குழு வைத்திருக்கிறார்.

பார்வையற்ற 17 இசைக்கலைஞர்களைக் கொண்டு "ராஜபார்வை' என்ற இசைக்குழுவை தொடங்கியிருப்பதாகவும்,  அந்தக் குழு ஊர், ஊராகச் சென்று பாடுவதில் கிடைக்கும் வருமானத்தின் மூலம் இச்சேவைகளை மனநிறைவோடு செய்து வருவதாகவும் தெரிவித்த அவரிடம் தொடர்ந்து பேசினோம்..

""எனக்கு 7 வயதிருக்கும் போது கண்களில் வலி ஏற்பட்டது. வலி நிவாரணி என நினைத்து பச்சிலையை கசக்கி கண்களில் விட்டேன். அதோடு கண்பார்வை பறிபோனது. சின்னஞ்சிறு வயதிலேயே கண்களிலிருந்து இரு விழிகளையும் எடுத்தாக வேண்டிய கட்டாயம் வந்து விட்டது. கூலித்தொழிலாளியாக இருந்த என் அப்பா என்னைப் பிச்சை எடுக்க வைத்தார். அந்த நேரத்தில் சிறுவனாக இருந்த என்னை பென்ஸ் என்ற கிறிஸ்தவ பாதிரியாரால் நடத்தப்பட்ட கருணை இல்லத்தில் சேர்த்து எனக்கு இசைக்கருவிகளை இசைக்க கற்றுக் கொடுத்தார். 8 வயது முதல் 22 வயது வரை இசை கற்றுக் கொண்டேன்.

நான் பிச்சை எடுத்தது போல வேறு எந்த மாற்றுத்திறனாளியும் பிச்சை எடுக்கக் கூடாது என்பதற்காக  லூப்ரா சேவை  மையத்தை மாற்றுத்திறனாளிகளின் நலனுக்காகவே தொடங்கினேன். எனக்குத் தெரிந்த இசையை  என் மையத்திலிருந்த பார்வையில்லாத சிலருக்கும் கற்றுக் கொடுத்து ஓர்  இசைக்குழுவையும் உருவாக்கினேன். தற்போது எங்கள் இசைக்குழுவில் 17பேர் உள்ளனர். தமிழகம் முழுவதும் சென்று இசைக் கச்சேரிகளை நடத்தி வருகிறோம். நடிகர் கமல் பார்வையற்றவராக நடித்த படம் "ராஜபார்வை' என்பதாகும். பார்வையற்ற எங்கள் இசைக்குழுவுக்கும் "ராஜபார்வை' என்றே பெயர் வைத்தேன்.

ஒரு முறை திருச்செந்தூரில் கச்சேரி நடத்திக் கொண்டிருந்த போது கோயில் கடற்கரையோரத்தில் ரோந்துப்பணியில் ஈடுபட்டிருந்த போலீஸார் 4 வயதுள்ள ஓர் ஆண் குழந்தை ஒன்று கிடந்ததாகவும், அதை    வளர்க்க முடியுமா? என்று எங்களிடம் கொடுத்தார்கள்.   கண்பார்வை இல்லாத அந்தக் குழந்தையின் கழுத்து நிற்காமல் ஆடிக் கொண்டே இருந்தது. ஆட்டிஸம் என்ற நோயால் பாதிக்கப்பட்டு தூக்கி எறியப்பட்ட அந்தக் குழந்தையை போலீஸார் எங்களிடம் கொடுத்து வளர்க்கச் சொன்ன போது, அதை சுகமான சுமையாக ஏற்றுக் கொண்டு எடுத்து வந்து வளர்த்தோம். திருச்செந்தூரில் கிடைத்த அந்தக் குழந்தைக்கு செந்தில்நாதன் என்றே பெயரும் வைத்தோம்.

குழந்தைக்கு வயது ஆக, ஆக பல திறமைகள் இருப்பது தெரிய வந்தது. ஹிந்தி, கன்னடம், தெலுங்கு, தமிழ்,மலையாளம் என 5 மொழிகளில் பாடும் திறமை இருந்தது. இவற்றில் எந்த ஒரு மொழியின்  பாடலையும் ஒரே ஒரு முறை கேட்டால் அதை அப்படியே, அதே ராகத்துடன் மனப்பாடமே செய்யாமல் பாடும் அசாத்திய திறமையுடைய  குழந்தையாக அது இருந்தது. இப்போது செந்தில்நாதனுக்கு வயது 18. இப்போதும் கழுத்து ஆடிக்கொண்டே தான் இருக்கிறது. 

எங்கள் இசைக்குழு மூலம் வரும் வருமானத்தில் ஆதரவற்ற முதியோர்கள், மாற்றுத்திறனாளிகள் உடல் நலமில்லாமல் உயிரிழந்து விட்டால் அவர்களை அவரவர் மதவழக்கப்படி இதுவரை 100க்கும் மேற்பட்டோரை நல்லடக்கம் செய்திருக்கிறோம். பார்வையற்ற 122 ஜோடிகளுக்கு சொந்த செலவில் திருமணம் செய்து கொடுத்திருக்கிறோம். திருச்சி அருகேயுள்ள 13 கிராமங்களில் வசிக்கும் 700 குழந்தைகளுக்கு இரவு நேர பாடவகுப்புகளை இலவசமாக நடத்தி வருகிறோம். இதற்காக மட்டுமே ஒவ்வொரு மாதமும்  ரூ.20 ஆயிரம்   செலவாகிறது. பார்வையற்றவர்களை ஊக்குவிக்க கிரிக்கெட் மற்றும் கபடி போட்டிகளையும் நடத்தி வருகிறோம்.

பொதுவாக மூளை வளர்ச்சிகுன்றிய குழந்தைகளை வளர்க்க பெற்றோர்கள் சிரமப்படுவதால் அவர்களை வெளியூர்களுக்கு கார்களில் அழைத்து வந்து ஈவு,இரக்கமே இல்லாமல் தனியாக இறக்கி விட்டு,விட்டு போய் விடுகிறார்கள். ஏனெனில் மூளை வளர்ச்சியில்லாத குழந்தைகள் வீட்டில் யாரும் பெண் எடுக்க மாட்டார்கள். அதையும் மீறி பெண் எடுத்தால் அவர்களுக்கு பிறக்கும் குழந்தையும் மூளை வளர்ச்சியில்லாத குழந்தைகளாக பிறந்து விடும் என்ற பயமே அதற்கு முக்கிய காரணமாக இருக்கிறது. இதையே நாங்கள் ஒரு சவாலாக எடுத்துக் கொண்டு மூளை வளர்ச்சி இல்லாதவர்களையும் எங்கள் மையத்தில் சேர்த்துக் கொண்டு அவர்களின் நலனுக்காகவே இசைக்குழுவை நடத்தி வருகிறோம்.

கோயில் திருவிழாக்கள்,பிறந்த நாள், திருமண நாள் நிகழ்ச்சிகளுக்கு எங்கள் இசைக்குழு பாடி அதில் கிடைக்கும் வருமானத்திலும்,  முன்னோர்களின் நினைவு நாட்களுக்கு மையத்தில் உள்ளவர்களுக்கு  உணவு தரும் சில உயர்ந்த உள்ளங்களாலும் எங்கள் மையத்தின் சேவைகள் தொடர்கின்றன'' என்றார் பா.தாமஸ்.

]]>
https://www.dinamani.com/weekly-supplements/dinamani-kathir/2019/jan/06/இசைக்குழு-மூலம்-சேவை-3072540.html
3072542 வார இதழ்கள் தினமணி கதிர் திரைக்கதிர் - ஜி.அசோக் DIN Sunday, January 6, 2019 12:00 AM +0530 தில்லியைச் சேர்ந்த லட்சுமி அகர்வால், தனது 15-ஆவது வயதில் ஆசிட் வீச்சுக்கு ஆளானார். அவரை ஒரு தலையாகக் காதலித்த ஒருவனின் காதலை லட்சுமி ஏற்காததால் லட்சுமி முகத்தில் அவன் ஆசிட் வீசினான். ஆனாலும் நம்பிக்கையை இழக்காத லட்சுமி, அந்த நபரை சட்டத்தின் முன் நிறுத்தி தண்டனை வாங்கித் தந்தார். அமெரிக்க அதிபராக இருந்த போது ஓபாமா அவரை அழைத்துப் பாராட்டினார். 

சில ஆண்டுகளுக்குப் பிறகு அசோக் தீட்சித் என்பவர் லட்சுமியைத் திருமணம் செய்தார். அவர்களுக்கு குழந்தை உள்ளது. ஆசிட் வீச்சால் பாதிக்கப்பட்ட பெண்களுக்காக அமைப்பு ஒன்றையும் நடத்தி வருகிறார் லட்சுமி. இவரது வாழ்க்கையை இயக்குநரும் கவிஞருமான குல்சாரின் மகள் மேக்னா குல்சார் படமாக எடுக்கிறார். இதில் லட்சுமி வேடத்தில் நடிக்க தீபிகா படுகோனே ஒப்பந்தமாகியுள்ளார். ஆசிட் வீச்சுக்கு ஆளான லெட்சுமியின் முகத் தோற்றத்தை தீபிகாவுக்கு கொண்டு வருவதற்கான பிரத்யேக மேக்அப் டெஸ்ட் எடுக்கப்பட்டுள்ளது. அமெரிக்காவிலிருந்து இதற்கான ஒப்பனை கலைஞர்கள் நியமிக்கப்பட்டுள்ளனர்.

----------------

உலக அழகியாக தேர்வுப் பின் தமிழில் "ரட்சகன்' படத்தில் அறிமுகமானார் சுஷ்மிதா சென். அதன் பின் பாலிவுட்டில் கவனம் செலுத்திய அவர், மீண்டும் தமிழுக்கு வந்தார்.  ஷங்கர் இயக்கத்தில் அர்ஜுன் நடித்த "முதல்வன்' படத்தில், "ஷக்கலக்க பேபி... ஷக்கலக்க பேபி...' பாடலுக்காக கவர்ச்சி நடனம் ஆடினார். தற்போது 43 வயது ஆகும் அவருக்கு இன்னும் திருமணமாகவில்லை. 

எனினும் ரெனீ, அலிஷா ஆகிய பெண் குழந்தைகளைத் தத்து எடுத்து வளர்த்து வருகிறார். சில மாதங்களாக பாலிவுட் பிரபலம் ரோஹ்மேன் ஷாவல் என்பவரை அவர் காதலித்து வருவதாகச் சொல்லப்படுகிறது.  இரண்டு பேரும் அவ்வப்போது பாலிவுட்டில் நடக்கும் நிகழ்ச்சிகளுக்கு ஜோடியாக வருகின்றனர்.  இதையடுத்து அவர்களுக்கு இடையே காதல் மலர்ந்தது. சமீபத்தில் தனது காதலை ரோஹ்மேன் சொன்ன மறுநிமிடம் அதை சுஷ்மிதா சென்னும்  ஏற்றுக்கொண்டார். இதையடுத்து இந்த ஜோடி இல்லற வாழ்வில் இணைய முடிவு செய்துள்ளனர். சுஷ்மிதா சென் தத்தெடுத்த பெண் குழந்தைகளுக்கும் ரோஹ்மேனை பிடித்துவிட்ட காரணத்தால், அவர்கள் சுஷ்மிதா சென், ரோஹ்மேன் காதல் திருமணத்துக்கு முழு சம்மதம் தெரிவித்துள்ளனர். 

----------------

மர்ஷியல், கவர்ச்சி என நடித்த வந்த கதாநாயகிகள் ஒரு கட்டத்துக்கு மேல் தங்கள் முன்னிலைப்படுத்தும் கதாபாத்திரங்களைத் தேர்வு செய்கின்றனர். கதாநாயகியாக நடிப்பதற்கான வாய்ப்புகள் குறைந்து வருவதும் இதற்கு முக்கிய காரணம். தற்போது இந்த வரிசையில் இணைந்திருப்பவர் ஹன்சிகா.  
சமீபத்தில் "மஹா' படத்துக்காக சாமியார் வேடத்தில் கஞ்சா புகைப்பது போன்று படத்தின் போஸ்டர் வெளியாகியிருந்தது.  இது சர்ச்சையானது. அவர் மீது போலீசில் புகார் அளித்திருப்பதுடன், நீதிமன்றத்தில் வழக்கு தொடரப்பட்டிருக்கிறது. 

இதுகுறித்து இப்படத்தின் இயக்குநர் யு.ஆர்.ஜமீல் கூறும்போது...""எந்த மதத்தினரையும் புண்படுத்தும் நோக்கத்துடன் இந்த படம் எடுக்கப்படவில்லை'' என்றார். இந்நிலையில் இப்படத்தின் மற்றொரு காட்சியில் ஹன்சிகா முஸ்லிம் பெண் போன்று தொழுகை செய்வதுபோல் புகைப்படம் வெளியிடப்பட்டிருப்பதுடன் அதன் பின்னணியில் மசூதி, ஹன்சிகா தன்னை தானே கைத்துப்பாக்கியால் சுட்டுக்கொள்வது போன்ற காட்சி இடம் பெற்றுள்ளது. இதுவும் சர்ச்சையாகிவிடுமோ என்பதால் முன்னதாகவே இயக்குநர் ஜமீல் அளித்துள்ள விளக்கத்தில், ""இப்படத்தின் ஒரு சில காட்சிகளில் ஹன்சிகா முஸ்லிம் பெண்ணாக நடிக்கிறார். எனவே இப்படியொரு காட்சி படமாக்கப்பட்டது. மற்றபடி எந்த மத்தையும் இழிவுபடுத்தும் நோக்கம் எங்களுக்கு இல்லை''  என கூறி உள்ளார்.  

----------------

விஸ்வாசம்' படத்துக்குப் பின் "சதுரங்க வேட்டை', "தீரன் அதிகாரம் ஒன்று' படங்களை இயக்கிய எச்.வினோத் இயக்கத்தில் நடித்து வருகிறார் அஜித். இன்னும் பெயரிடப்படாத இந்தப் படம், தற்போதைக்கு "தல 59' என்று குறிப்பிடப்படுகிறது. மறைந்த நடிகை ஸ்ரீதேவியின் கணவர் போனி கபூர் இந்தப் படத்தைத் தயாரிக்கிறார். அமிதாப் பச்சன் நடித்து பாலிவுட்டில் வெளியான  "பிங்க்' ஹிந்திப் படத்தின் ரீமேக் தான் இந்தப் படம் என அதிகாரப்பூர்வமாக அறிவிக்கப்பட்டுள்ளது.  யுவன் ஷங்கர்ராஜா இப்படத்துக்கு இசையமைக்கிறார். அடுத்த  கட்டமாக படத்தின் கதாநாயகிகள் தேர்வு நடந்து வருகிறது. கதைப்படி இதில் மூன்று கதாநாயகிகள் என்று சொல்லப்படுகிறது. இதில் ஒருவராக கல்யாணி ப்ரியதர்ஷன் நடிக்கிறார்.

பிரபல இயக்குநர் ப்ரியதர்ஷன் மகள்தான் இந்தக் கல்யாணி. இன்னொரு கதாநாயகி வேடத்துக்கு ஸ்ரத்தா ஸ்ரீநாத் ஒப்பந்தமாகியுள்ளார். "விக்ரம் வேதா' படத்தில் நடித்த இவர் "ரிச்சி', "இவன் தந்திரன்', "காற்று வெளியிடை' படங்களிலும் நடித்துள்ளார். கன்னட நடிகையான இவர், அந்த மொழி சினிமாக்களில் பரபரப்பாக இயங்கி வருகிறார். இந்நிலையில் அஜித்துக்கு ஜோடியாக இந்தப் படத்துக்கு தேர்வாகியுள்ளார். 3-ஆவது கதாநாயகியாக நஸ்ரியா தேர்வாகியுள்ளார். திருமணத்துக்குப் பின் தமிழில் அவர் நடிக்கும் முதல் படம் இது.  

----------------

னிமா  தவிர்த்து குழந்தைகள் நலன், கிராமப்புற சுற்றுச் சூழல் தன் நேரத்தை செலவிட்டு வருகிறார் நடிகை சமந்தா. சமீபத்தில் எச்ஐவி தொற்றால் பாதிக்கப்பட்ட குழந்தைகளைப் பராமரிக்கும் "டிசையர் சொசைட்டி' அமைப்பிற்கு  கிறிஸ்துமஸ் தினத்தையொட்டி சமந்தா சென்றார். கிறிஸ்துமஸ் தாத்தா வேடத்துக்கு பதிலாக கிறிஸ்துமஸ் தேவதைபோன்று சென்றார். அங்குள்ள குழந்தைகளுக்கு  இனிப்பு வழங்கி, அவர்களுடன் இணைந்து நடனம் ஆடி மகிழ்ந்தார். முன்னதாக அனைவரையும் ஜவுளி கடைக்கு  அழைத்து சென்று, ""உங்களுக்கு என்ன உடை பிடிக்குமோ அதை எடுத்துக்கொள்ளுங்கள்'' என்றார். சந்தோஷத்தில் குதித்த குழந்தைகள் தங்களுக்கு பிடித்தமான உடைகளைத் தேர்வு செய்தனர். இதுகுறித்து சமந்தா கூறும்போது...""தொண்டு என்பது பரிதாபத்தால் செய்யப்படுவது அல்ல. அது அன்பால் செய்யப்படுவது. இன்றைக்குத்தான் நான் அதிகமாக அன்பை பெற்றேன், பகிர்ந்தேன். டிசையர் அமைப்பு எச்ஐவியால் பாதிக்கப்பட்ட குழந்தைகளை பராமரிக்கிறது. இன்றைக்கு ஒரு நாள் மட்டுமல்லாமல் இந்த ஆண்டு முழுவதும் என்னுடைய பணி இவர்களுக்காக செய்ய காத்திருக்கிறேன். கிறிஸ்துமஸ் தாத்தா வருகைக்காக காத்திருக்காமல் அவராக நாமே ஆகி பரிசுகள் வழங்கிடுவோம்'' என்றார்.

]]>
https://www.dinamani.com/weekly-supplements/dinamani-kathir/2019/jan/06/திரைக்கதிர்-3072542.html
3072544 வார இதழ்கள் தினமணி கதிர் ஏன் கட்டுப்பாடு தேவைப்படுகிறது? DIN DIN Sunday, January 6, 2019 12:00 AM +0530 கட்டுப்பாடு, மனித ஆற்றலை வளர்த்ததா அல்லது குறைத்ததா?  

அனைத்து மதத்தினரும், மதகுருமார்கள் அனைவரும் கட்டுப்பாடு அவசியம் என வலியுறுத்தி வருகின்றனர். 

அடக்கி ஆளுதல், வசப்படுத்துதல், எதிர்த்து நிற்றல், சரிப்படுத்துதல், பொருந்தவைத்தல், நிறுத்திக் கொள்ளல், வெளிவிடாதிருத்தல் என்பனவற்றை உள்ளடக்கியதே மனக்கட்டுப்பாடாகும் என உணர்கின்றனர்.

கட்டுப்பாடுகள் மனித ஆற்றல், வலு, ஊக்கம் ஆகியவற்றின் விளைவை அதிகரிக்குமானால் அவற்றை ஏற்றுக் கொள்ள நியாயமுண்டு ஆனால் கட்டுப்பாடுகள் மனித ஆற்றலை அடக்கி வைப்பதோடு மனித மனத்திற்கும் பெரும் தீங்கை ஏற்படுத்துகின்றன.  கட்டுப்பாடுகள் அழிவையும் உண்டாக்குகின்றன.

மக்கள் அனைவருக்கும்  ஆற்றலும் ஊக்கமும் உண்டு. கட்டுப்பாடுகளால் ஆற்றல்கள் உயர்நிலையை அடைகின்றனவா?  அல்லது கட்டுப்பாடுகளால் ஆற்றல் அனைத்தும் அழிந்து போகின்றனவா என்பன போன்ற கேள்விகளுக்குரிய விடைகளை ஆராய்ந்து பெற வேண்டும். 

பலர் தமது ஆற்றலைச் சமூகக் கட்டுப்பாட்டாலும் போலியான நடைமுறைகளாலும் அழித்து வருகின்றனர். 

சமூகக் கட்டுப்பாடு என்ற பெயரிலே தனியொருவன் ஆற்றல் எல்லாம் வீணாகக் கழிகின்றன. 

***************

நீண்ட காலக் கட்டுப்பாட்டின் விளைவே சுதந்திரம் என்று மக்கள் நம்புகின்றனர். 
ஒன்றைப் பூரணமாகக் காண்பதே அக்காட்சிக்குரிய கட்டுப்பாடாகும்.  ஒன்றைப் பூரணமாகவும் தெளிவாகவும் காணச் சுதந்திரம் தேவையேயன்றி கட்டுப்படுத்தப்பட்ட நோக்கம் தேவையன்று. 

எனவே கட்டுப்பாட்டின் முடிவல்ல சுதந்திரம். சுதந்திரத்தை அறிந்து கொள்வதே அதற்கான கட்டுப்பாடாகும். 

"ஜே.கே.யின் உண்மையைத் தேடும் பொன்மொழிகள்' என்ற நூலிலிருந்து...

ஆதவன், சென்னை-19

]]>
https://www.dinamani.com/weekly-supplements/dinamani-kathir/2019/jan/06/ஏன்-கட்டுப்பாடு-தேவைப்படுகிறது-3072544.html
3072546 வார இதழ்கள் தினமணி கதிர் சிரி... சிரி...  சிரி...  சிரி...  DIN DIN Sunday, January 6, 2019 12:00 AM +0530
""என் வீட்டுக்காரருக்கு ஞாபக மறதி அதிகமாயிடுச்சு. வீட்டைப் பூட்டிட்டு  
போய் திரும்பவும் வந்து ஒன்னுக்கு ரெண்டு தடவை பார்த்துட்டு வருவாரு டாக்டர்''
""அது நல்லதுதானம்மா...''
""நான் சொன்னது பக்கத்து வீட்டோட பூட்டை''


""புது வருஷத்தில இருந்து பைசா கடன் வாங்க மாட்டேன்டா''
""அப்படியா?''
""ஆமா... ரூபாய் நோட்டாத்தான் வாங்குவேன்''


""தலைவா லஞ்ச ஊழல்துறைக்கு 
ஓராளை நியமிக்கப் போறீங்களாமே... 
யாரை நியமிக்கப் போறீங்க?''
""அதிகமா யார் தர்றாங்களோ... 
அவங்களைத்தான்''

தீ.அசோகன், சென்னை-19.


""என்ன இந்த டீக்கடையிலே  
டீ  தர்றப்ப ஒண்ணு, ரெண்டு, மூணுன்னு சொல்லி  
டீ  தர்றாங்க... ஏன்?''
""நான்தான் சொன்னேன் இல்ல. இங்க ஏலம் போட்ட   
டீ  கிடைக்கும்ன்னு''


""அந்த டாக்டர் ஈயைப் பார்த்ததே இல்லை போலிருக்கு...''
""எப்படிச் சொல்றே?''
""பல்லு வலின்னு போனா "ஈ' காட்டுன்னு சொல்றாரே?''

எஸ்.வேல் அரவிந்த், திண்டுக்கல்.



""உண்மையைச் சொல்லணும்னா விளம்பரம்தான் எனக்குச் சோறு போடுது''
""நீங்க விளம்பர ஏஜெண்டா இருக்கீங்களா?''
""அதெல்லாமில்லை... டி.வி.யில விளம்பரம் போட்டால்தான் என் மனைவி எனக்கு சோறு போடவே வருவாள்ன்னு சொன்னேன்''

வி.ரேவதி, தஞ்சை.


""கிரிக்கெட் பிளேயர்ஸ் எல்லாம் எப்படி பேசுவாங்க தெரியுமா?''
""எப்படி?''
""ஓவரா பேசுவாங்க''

ஜோ.ஜெயக்குமார், நாட்டரசன்கோட்டை.

""ஏன்டா மாப்பிள்ளே... 
யாராவது முக்கியமான ஆள் இறந்துட்டா வானத்தை நோக்கிசுடுறாங்களே 
அது எதுக்காக?''
 ""இறந்தவங்க ஆவியாக் கூட  தப்பிச்சிடக் கூடாதுன்னுதான்.''

எஸ்.கார்த்திக் ஆனந்த், திண்டுக்கல்.

]]>
https://www.dinamani.com/weekly-supplements/dinamani-kathir/2019/jan/06/சிரி-சிரி--சிரி--சிரி-3072546.html
3072548 வார இதழ்கள் தினமணி கதிர் ஒத்தடம் அல்லிஉதயன் DIN Sunday, January 6, 2019 12:00 AM +0530 கசகசவென புரள்வுகள் பெருகின. அசங்கலில் விழித்துக் கொண்டாள். ""ஒங்களுக்கு என்ன ஆச்சு?... ஏ... சாமக் கோடாங்கி மாதிரி முழிச்சுக் கெடக்கீக...'' அவனது பதிலை எதிர்பாராமல் உறங்கியும் போனாள்.

அனற் புழுவென அவன் துடிக்கும் காரணம் அறிவாள் அவள். எனினும் சேர்ந்து வாங்கிக் கொள்ள முடியாது. "அழுது அழுது பெத்தாலும் அவதான் பெறணும்' என்பது பெண்களுக்கானது மட்டுமல்ல.

அடுக்களையில் பூனையின் உருட்டல். சரேலென உள் சென்றான். பாய்ந்த வேகம் தெரியவில்லை. வால் நுனியையும் மறைத்துக் கொண்டது வெருகு. வீட்டுப் பூனைகள் வைத்த பாலைத் தவிர ஒன்றையும் தொடாது. வெருகுப் பூனைகள் நடுநிசிக் கள்ளர்கள். எத்தனை மூடினாலும் எடுத்துக் கொள்கிறது லாகவமாய். 

மொட்டை மாடியில் நிலா. வானெங்கும் பொழிந்தது. "உள்ளத்தில் ஒளி உண்டாயின் வாக்கிலே ஒளி உண்டாம்' ஏனோ பாரதி நினைவு. மன இருள். அமைதியின்மையின் பேரிருள்.

விட்டம் பார்ப்பதும் புட்டம் நிமிர்வதுமாய் பின்னிரவைத் தாண்டி புது நாளும் வந்தது. போட்டது போட்டபடி செல்ல வேண்டும் அவள். நீட்ட வேண்டும் சுளையாய். மறுசொல் இல்லை அங்கு. வெட்டு ஒன்று துண்டு இரண்டுதான்.
விதம் விதமாய் பெருகின குழுக்கள். கிள்ளியும் தந்தன. அள்ளியும் வழங்கின. சிட்டைகள் திமிறின கை கொள்ளாமல். கூட்டிக் கழித்தால் மூணு லட்சம், நாலு லட்சம் என கால்கள் முளைத்தன. தவிர நாள், வாரம், மாதமென கந்துக்காரன் கூண்டு.

பெண்ணும் பையனும் கண்ணயர்ந்திருந்தார்கள். கால்மாடு தலைமாடென வழிந்தது தூக்கம். "பிள்ளையாய் இருந்து விட்டால் இல்லையொரு துன்பமடா' இழைந்து வரும் பாடல். கடனறியாக் குழந்தைகள். தகப்பனின் பாடறியாச் செல்வங்கள். தானும் ஒன்றென இருந்து கொள்கிறாள் அவள். "பொருளீட்டும் தொழிலற்ற இரவுகளில் தூக்கம் தொலைப்பதால் கடன்கள் தீர்வதற்கில்லை'யென உணர்ந்திருக்கலாம் அவள்.

"ஒவ்வொன்னாக் கொறைக்யணும்...' என்பான் அவன்.

""ஒங்க மொள்ளைக்கு எத எதக் கொறப்பீங்க?'' கேட்பாள் அவள்.

ஒருநாள் விட்டு ஒருநாள் குழுத்தலைவிகளின் வீடுகள், "வா...வா'வென அழைத்தன. ஆண் சுய உதவிக் குழுக்கள் பெயருக்கு என்றான பின் பெண்கள் சுய உதவிக் குழுக்களே பெருகி வளர்ந்தன. மான அவமானங்களுக்கு அஞ்சி அவர்கள்தான் "வாயைக் கட்டி வயித்தைக் கட்டி' கடன் கட்டுவார்கள் என்று "தெய்வ சாட்சி'யாய் நிறுத்தப்பட்டார்கள். கடனாளியாவதன் மூலமாய் ஆணுக்குச் சமமாய் மாற "உறுதி மொழி' எடுக்க அவள் முன் சென்றாள். "இறைவணக்கம்' முடிந்து பிள்ளைகள் வகுப்பறைகளுக்கு பின் சென்றனர்.

ஆபீஸர்ப் பையன்கள் எட்டு என்றாள் ஏழு ஐம்பதுக்கே சபைக்கு வந்தார்கள். அத்தக் கூலி அரைக் கூலி இழந்து பெண்கள் காத்திருந்தார்கள்.

"கடன் பெறுவதும் தொழில் செய்வதும் அடிப்படை உரிமை. முறையாகக் கட்டி, மீண்டும் மீண்டும் வாங்குவேன். கடன் வாங்குவதன் மூலம் நாட்டையும் வீட்டையும் வளப்படுத்துவேன். ஒருவர் கட்டாவிட்டாலும்  அவருக்காகப் பொறுப்பேற்றுக் கட்டுவேன். சங்க விதிகளைக் காப்பேன். சங்க ஒற்றுமை பேணுவேன்' உறுதி மொழிக்குள் வந்து சேராதவர்களுக்கு உவட்டி விடும். குழுத் தலைவிகள் ஆட்டம் போடுவார்கள். குவலயத்திற்கே ராணிபோல் கொம்பு தூக்கி ஊதுவார்கள். ""வாங்கத் தெரியுது...  நல்லா வாக்கட்ட போடத் தெரியுது... வந்து கட்டத்தே வலிக்குது. இவளுகளெல்லாம் சங்கத்துல சேரலைன்னு யார் அழுதாக...''

மொட்டை மாடிகளிலும், முற்றங்களிலும் சபைகள் கூடின. புழங்க ஏதுவற்ற தலைவிகள் வீடெனில் தெருக்களில் சேர் போட்டார்கள். ஆபீஸர்ப் பையன்களின் தோரணைகள் எம்.எல்.ஏ, மந்திரிகளைக் கொண்டிருந்தது. அவர்களது சுட்டு விரல்களுக்குக் கட்டுப்பட்டவர்களைப் போல் பெண்கள் அடங்கி ஒடுங்கி அமர்ந்தார்கள்.

எழுவது ஒன்றுதான் விழாமல் இருக்க உதவும். ஒருபக்கம் விடிவதற்குள் வியாபாரக் குரல் எழுப்ப முடியாது. தூக்கச் சடவுடன் இருப்பார்கள். வெள்ளன எழுந்தவர்களின் கவனம் சாணம் தெளிப்பதிலும், கோலம் வரைவதிலும் இருக்கும். எனினும் பார்க்க வேண்டும்.  எண்ணி எழுபது பாக்கெட்டுகள் கால் கிலோவும் அரைக் கிலோவுமாக இருந்தன. "கையில காசு... வாயில தோச' என்றால்தான் கதை நடத்த முடியும். சீவி  முடித்து சீருடை அணிந்து ஒட்டகச் சுமையுடன் பிள்ளைகள் ஆட்டோ, பஸ்களெனப் புகுவதற்குள் டப்பாக்களில் விழ வேண்டும் தின்பண்டங்கள்.
இரு வேளை அலைந்தாலே சங்கம் கட்டமுடியும் என்றிருந்தால் அவள் சுதாரித்துக் கொள்வாள். ஆபீஸர்ப் பையன்கள் "சுடு தண்ணி'யைக் காலில் ஊற்றிக் கொண்டு நிற்பார்கள். அவகாசம் ஒரு மணி நேரம் என்றாள் ஒரு மணி நேரம் தான். தலையை அடமானம் வைத்தாவது முடிக்க வேண்டும்.
அதற்குள் கொடுத்து உதவுகிறவர்களைத் தேடி அலைந்தாள். ஆயிரம் கைமாற்றுக்கு மாலைக்குள் ஆயிரத்து நூறு. விடிந்தால் ஆயிரத்து இருநூறு. வட்டி குட்டி போடுவதுடன் பன்றிகள் பல குட்டிகள் போட்டன. 
திருமண மாதத்தில் உருப் பெற்ற குழுக் கடன்கள் பருப் பொருளாகி பாறாங்கல்லாய்  அழுத்தின. ""எட்டுக் குத்துக்கும் எளையதுக  கூட ஆனமான தொழில்கள பாத்து அரசனாப் பொழய்க்கிதுக... நீங்க என்னாடான்னா தொத்த சைக்கிள  வச்சுக்கிட்டு தொண்ணாந்து கெடக்கீக...'' ஒரு நாளைக்குப் பத்து தரமாவது சொல்வாள். வருஷத்திற்கு எத்தனை தடவை என்று எண்ணிக் கொள்வான். எருமை மாட்டில் மழை விழுந்தது. 
கேட்டுத் தவித்து கிடைக்காத காசுகள் கூரையைப் பிளந்து கொட்டின. வலிய ஆள் சேர்த்துவழங்கும் வினோதங்கள் நடந்தன. கடைசியில் ஓர் ஒப்புதலைப் பெறாமல் குழுத் தலைவிகள் வெளியேறியதில்லை. பெண்களின் சொந்தக் காலில் நிற்க உருவானதெல்லாம் ஆண்களின் பந்தல் காலில் விழுந்து கொண்டிருந்தன. ஸ்மார்ட் கார்டு, ஆதார் கார்டு, பேங் பாஸ்புக், பாஸ்போர்ட் சைஸ் போட்டோ, ஒரிஜினல், ஜெராக்ஸ் என்கிற பேச்சுகள் வீடு முழுவதையும் பீடித்துக் கொண்டன. தெருவெங்கும் ஆங்கில முழக்கமாய் பரவியுமிருந்தது.
ஒவ்வொன்றிலும் பத்துக் காப்பி, இருபது காப்பி என எடுத்து ராணுவ தயார் நிலையில் இருந்தார்கள். ஒரிஜினல், ஜெராக்ஸ் அடங்கிய மஞ்சள் பை மீது எப்போதும் ஒரு கண் இருந்தது.
"பணம் போடுறாக...' என்கிற நாட்களில் கண்ணுறங்காது. அரைகுறை வியாபாரத்தோடு பதறி வருவான். அதற்குள் அவள் சங்க ஆபீஸ் போய்ச் சேர்ந்திருப்பாள். கால் மூளை செத்துக் காசை வாங்குவதற்குள் கண்ணீர் பிதுங்கிவிடும். பசித்த வயிற்றுக்குச் சிறிது புளிச்சாதமோ தயிர்ச் சாதமோ தருவார்கள். பெருமாள் கோயில் பொங்கச் சோறு நினைவுக்கு வரும். பொரியைத் தின்று தண்ணீர் குடித்தாற் போல் பசி அடங்காது.
நீட்டிய இடமெல்லாம் அவள் ஐம்பது என்றால் அதில் பாதி கையெழுத்தை அவன் போட வேண்டும். ஒரிஜினல், ஜெராக்ஸ் தாள்களுடன் பணத்தாள் சேரும் நாள் அது ஒன்றுதான். குழுத்தலைவிகள் தொகைக்கேற்ப ஆயிரம், ரெண்டாயிரம் எடுத்துக் கொள்வார்கள். நாகர் ரெஸ்டாரண்டிலோ எவரெஸ்ட் ஹோட்டலிலோ பிரியாணிக்கு அமர்வார்கள். ஆட்டோவுக்குப் பகிர்ந்தளிப்பார்கள். ஐம்பத்து இரண்டு வாரங்கள் இழுபட்டு, துவைபட்டு லோன் அடைந்ததும் மற்றொரு "பணம் போடும்' நாளுக்காக மஞ்சள் பையுடன் காத்திருப்பார்கள்.
மொத்த கடைகளில் இனிப்பு கார வகைகள் வாங்கி மறு எடை போட்டு விற்பதும் ஒரு தொழில்தான். "செய்யும் தொழிலே தெய்வம்' ஊர்கள் தோறும் முகங்கள் வந்தன. சொந்தங்கள் கூடின. கால் கிலோ பாக்கிக்காக தெரு முக்கில் மறைபவர்களும் பெருகினார்கள்.
நடு வயிற்றில் அவளது கை விழுந்திருந்தது. ஒருச்சாய்த்து உடம்போடு சேர்த்து அணைத்துக் கொண்டிருந்தாள். ஓசையின்றி விலக்கி எழ முயன்றான். என்ன மாயமோ விழித்துக் கொண்டாள். அடித்துப் போட்டாற் போல் உறங்கவும் செய்கிறாள். அசங்கலில் எழுந்தும் விடுகிறாள். அப்படியொரு வாகு. அறியாக் குழந்தையின் வாகு, வரம்தான்.
""செவராத்திரிதான் போல...'' என்றாள். 
""முழிச்சுக் கெடந்தா எல்லாம் கெடச்சிருமா?... முழுசா தூங்கி எந்திரிச்சுப் போனாத்தான வெடுப்பா அலஞ்சு ஏவாரம் பண்ணல முடியும்... இல்லேன்னா எதப் பாத்தாலும் கடுப்பு வரும்...'' கனிவு ததும்பும் சொற்களுடன் பார்த்தாள்.
குருட்டழுக்கேறிய பனியன், வெளிறிய கைலி, ஒட்டடைக் குச்சியாய் நின்றான்.  அந்தக் கோலம் அவளை என்னவோ பண்ணியது. பாடுகள் தீர்ந்து எப்போது நன்றாகப் படுத்து உறங்குவான் என்று 
தெரியவில்லை.
எங்காவது கேட்டு வைத்திருக்கலாம். அந்த விடியலை அவள் அணுகிய விதம் அப்படி எண்ண வைத்தது. எதுவெனிலும் அவளிடமிருந்து ஒரு வார்த்தையை வாங்கி விட முடியாது.
நகர்கிற அவனது பாதங்களில் வலது கையை அழுந்தப் பதித்தாள். விலகிக் கொள்ள முயன்றான். விடவில்லை. இடது கையால் முழங்கால்களை வளைத்துப் பிடித்தாள். தலைமாட்டில் இருந்த டைகர் பாமை எடுத்தாள். கரகரவெனத் தேய்த்தாள். வலிக்கு இதமாயிருந்தது. சற்று அழுத்தினாள்.""ஆ'' என்றான்.
""இந்த வலியோட எப்படி சைக்கிள் மிதிப்பீக..?''என்றாள். ""சரக்கு வேற பத்தாம இருக்கு... அதிலயும் கடன் போனா எப்புடி சங்கம் கட்றது?''
""வேற என்ன பண்றது?... போற வேலைக்கு போயித்தான ஆகணும்... இருப்புக் காசா வச்சிக்கிட்டிருக்கோம்... எடுத்து நீட்ட...''
அவள் அவனை ஆதூரத்துடன் பார்த்தாள். உடம்போடு சேர்த்து சைக்கிளும் பிணைந்திருந்தது. கர்ணணுக்கு கவச குண்டலம்.
இன்னொரு விரல் டைகர் பாமைத் தோண்டினாள். அவன் நின்ற வண்ணமே மயங்கினான். அமர்ந்து அவளை கட்டிக் கொண்டான்.
""நாயா பேயா அலஞ்சாலும் ஒனக்கு ஒரு நல்லதப் பண்ண முடியல... மொத்த சத்தமா எடுத்தாலும் முளிமூக்குக்கு கா பவுனு போட வக்கில்ல... கடன வாங்கி... கடனக் கட்டி இப்புடியே காலம் ஓடிரும் போல்ருக்கு...'' விரக்தியாய்ச் சிரித்தான்.
அவள் அவனது தலையைக் கோதினாள். கூட்டிப் பிடித்துச் சிலுப்பினாள்.
""ஏ கழுத... விடு... புரு புருங்குது...'' என்றான்.
அவள் புன்னகைத்தபடியே முடியை விட்டாள். 
""கடன் குடுக்கும் போதும், வாரந் தவறாம திருப்பிக்குடுக்கும் போதும் கடன் பெறுவதால் விளையும் நன்மைகள்னு ஒரு பிரசங்கமே பண்றாய்ங்க... இன்னிக்கிருக்கிற ஆயிரத்தெட்டுப் பிரச்னைகள்ல நன்மைகள் நமக்கா சங்கத்துக்காரய்ங்களுக்காணு  வெளங்கல...'' பேசிக் கொண்டே அவனது பனியனைத் தொட்டாள். ஓரிடத்தில் ஓட்டை இருந்தது. விரல் விட்டுக் கிழித்து விடுவாள் போல் தோன்றியது.
""இதெல்லாம் எதுக்கு?... விடிய ஆபீஸர்ப் பையங்க வந்து நிப்பாய்ங்களே..?'' என்றான்
""ஆமாமா... அவய்ங்க வரத்தானே செய்வாங்க...'' என்றாள். 

]]>
https://www.dinamani.com/weekly-supplements/dinamani-kathir/2019/jan/06/ஒத்தடம்-3072548.html
3072549 வார இதழ்கள் தினமணி கதிர் நடையழகு! நெ.இராமன் DIN Sunday, January 6, 2019 12:00 AM +0530 சென்னை  கமலா  தியேட்டர்  அதிபர்  வி.என். சிதம்பரம்  சிவாஜியின்  நெருங்கிய நண்பரும்   ரசிகரும்  ஆவார்.  அவர் சிவாஜியை  ஒருமுறை புட்டபர்த்திக்கு அழைத்துச்  சென்றார்.

புட்டபர்த்தி  சென்றபோது  பொது நுழைவு  வாசல்  அருகே,  சிறிது  நேரம் அவர்களை  உட்காரவைத்து பின் அழைத்து  சென்றனர்.  நீண்ட   தூரம்  நடக்க வேண்டியிருந்தது. பிரத்யேக  வழியாக  உள்ளே செல்ல அனுமதிக்கப்படவில்லை.
புட்டபர்த்தி  சாய்பாபாவிடம்  இருவரும்  சென்றபோது  பாபா  தெலுங்கில் , ""மெயின்  நுழைவு  வாயிலிலிருந்து  நடக்க வைத்து  விட்டேனே  என்று கோபம்தானே  உனக்கு.  சிவாஜியின்  நடிப்பில்  ரொம்ப   ரசிக்கத்தக்கது அவருடைய  நடைதான்  என்று  எல்லாரும்  சொன்னார்கள். எனக்கு உன் நடையை பார்க்கணும்னு  ஆசை.  அதனால் தான் உன்னை இவ்வளவு  தூரம்  நடக்க வைத்தேன்'' என்றார்.

சிவாஜிக்கு  தெலுங்கு நன்றாகப்புரியும். பாபா சொன்னதைக்  கேட்டு  நெகிழ்ந்து விட்டார்.

]]>
https://www.dinamani.com/weekly-supplements/dinamani-kathir/2019/jan/06/நடையழகு-3072549.html
3072550 வார இதழ்கள் தினமணி கதிர் பேல்பூரி DIN DIN Sunday, January 6, 2019 12:00 AM +0530 கண்டது


(கோவை ரயில்நிலையம் அருகில் உள்ள ஒரு ரெஸ்டாரன்டின் கரும்பலகையில்)

தொலைக்காட்சியும் செல்போனும் 
வேலை செய்யாதபோதுதான், வீட்டில் உள்ள ஒட்டடை கண்ணுக்குத் தெரிகிறது.

வி.ரேவதி, தஞ்சை.

 

(பொன்னை - சித்தூர் சாலையில் உள்ள ஒரு சிறிய  கிராமத்தின் பெயர்)

பெரிய ஊர்

கோவி.ராதாகிருஷ்ணன், அரக்கோணம்.


(சேலத்தில் நின்றிருந்த ஓர் ஆட்டோவில்)

பாவாடை ராயன்
பரதேசியப்பன் துணை

எஸ்.சி.சுப்ரமணியம், சின்னப்பம்பட்டி.


கேட்டது
 

(திருப்பூர் நகரப் பேருந்தில் இரு மாணவர்கள்)

""ஏன்டா கதிரு... தாய் எட்டடி பாய்ஞ்சா மகன் பதினாறடி பாய்வானாம்.  அப்படின்னா மகனோட மகன்  எத்தனை அடி பாய்வான்னு சொல்லு?''


""மகனோட மகனா,  அவன் அப்பத்தானடா தவழவே ஆரம்பிப்பான்.  அப்புறம் எப்படிப் பாய முடியும்?''

பா.அஜித்குமார்,  கே.செட்டிபாளையம், 
திருப்பூர் மாவட்டம்.


(மண்ணச்சநல்லூர் பஸ் நிறுத்தம் அருகே இரு பெண்கள்)

"" அஞ்சாவது படிக்கிற உன்  பையனுக்கு உன் ஹெல்த் மேல் எவ்வளவு அக்கறை? தினமும் வாக்கிங் போம்மான்னு அவன் சொன்னதை நேத்து கேட்டேனே?''

""அட நீ வேற... முந்தா நால் வாக்கிங் போன ஸ்கூல் கிரவுண்டுல கீழே பத்து ரூவா கிடந்ததை அவன் கிட்டே கிஃப்ட்டா கொடுத்தேன்... அதுதான் விஷயமே''

ஆர்.தனம்,  திருச்சி -2


யோசிக்கிறாங்கப்பா!

ஒரு நிமிடம் கூட 
மொபைல் போனை 
சுவிட்ச் ஆப் செய்யாமல் இருப்பவன்,
காதலில் விழுந்தவன்...
நிமிடத்துக்கு ஒரு முறை ஸ்விட்ச் ஆப் செய்பவன்,
கடனில் விழுந்தவன்.

ஏ.எம்.ஷெரீப், புதுக்கோட்டை.


மைக்ரோ கதை


""ஏன் டாக்டர், ஒருத்தருக்கு  பாதிக்கப்பட்ட  மனநலம்  குணமாயிடுச்சான்னு  எப்படிக் கண்டுபிடிப்பீங்க?'' என்று கேட்டான் குமார். 
""அதுக்கு சின்னச் சின்ன டெஸ்ட் இருக்கு'' என்றார் டாக்டர்.
""ஃபார் எக்ஸாம்பிள்?''
""ஒரு பக்கெட்டில் நிறைய தண்ணி  வச்சிட்டு, பக்கத்துல ஒரு ஸ்பூன், ஒரு மக் ரெண்டும் வச்சிடுவோம். போய் அந்தப் பக்கெட் தண்ணியைக் காலி பண்ணுன்னு சொல்வோம்.''
""புரியுது... புரியது... மனநலம் குணமாகாத ஆளா இருந்தா ஸ்பூன்ல  தண்ணியை எடுத்து வெளியே ஊத்தி காலி பண்ண ட்ரை பண்ணுவான்... சரிதானே?''
""கரெக்ட்... நீங்களா  இருந்தா என்ன பண்ணுவீங்க?'' என்று கேட்டார் டாக்டர்.
""மக்கில் தண்ணி எடுத்து வெளியே கொட்டுவேன்'' என்றான் குமார். 
""இது மாதிரி கேஸ்களை நாங்கள் செமின்னு சொல்வோம்'' என்றார் டாக்டர்.
அதிர்ச்சியுடன் டாக்டரைப் பார்த்தான் குமார்.  டாக்டர் புன்னகையுடன் சொன்னான்: 
""நல்ல மனநலம் உள்ளவன் பக்கெட்டை  எடுத்து கவிழ்த்திட்டு போய்க்கிட்டே 
இருப்பான்''

ப.காளிதாசன், நீர்விளக்குளம், 
புதுக்கோட்டை மாவட்டம்.


எஸ்.எம்.எஸ்.

அடுத்தவரின் வசதிக்கு மரியாதை கொடுக்காதீர்கள்!
வயதுக்கு மரியாதை கொடுங்கள்.
வசதி எல்லாருக்கும் வருவதில்லை.
ஆனால் முதுமை எல்லாருக்கும் வரும்.

கே.முத்துச்சாமி, தொண்டி.


அப்படீங்களா!

இணையவெளி தொடர்புக்கு ரண்ஊண் பயன்படும் என்று எல்லாருக்கும் தெரியும்.  அதேபோன்று எந்தவித வயர் இணைப்பும் இல்லாமல்,   ஸ்மார்ட் வாட்ச்,  ஃபிட்னஸ் பேண்ட்ஸ்,  ஹெட் போன்ஸ் போன்ற பல்வேறு எலக்ட்ரானிக் பொருள்களை சார்ஜ் செய்ய ஒரு புதுவிதமான ட்ரான்ஸ்மிட்டரை பவர்காஸ்ட் என்ற நிறுவனம் தயாரித்துள்ளது. 

80 அடி சுற்றளவில் உள்ள எலக்ட்ரானிக் பொருள்களை இந்த ட்ரான்ஸ்மிட்டர் சார்ஜ் செய்யும்.  அதிக மின்சாரம் தேவைப்படும்  ஹெட்போன்ஸ்,  கேமிங் கண்ட்ரோலர்ஸ் , விளக்கு போன்றவற்றை 30 அடி தூரத்துக்குள்  வைத்து சார்ஜ் செய்ய வேண்டும்.  அவ்வாறு அதிக அளவு மின்சாரம் தேவைப்படாத பொருள்களை 80 அடி தூரத்துக்குள் எங்கே வேண்டுமானாலும்  வைத்து சார்ஜ் செய்யலாம். 

இந்த ட்ரான்ஸ்மிட்டர் மூலம் சார்ஜ் செய்ய, சார்ஜ் செய்யப்பட வேண்டிய பொருளில் ஒரு "சிப்' -ஐப் பொருத்த வேண்டும்.  அப்படிச் செய்துவிட்டால் ட்ரான்ஸ்மிட்டரிலிருந்து மின்சாரம் காற்றின் வழியே சென்று  "சிப்' பொருத்தப்பட்ட பொருளை சார்ஜ் செய்துவிடும். 

ரயில்நிலையம், பேருந்துநிலையம்,  மருத்துவமனைகள் போன்ற பொது இடங்களில் இம்மாதிரியான ட்ரான்ஸ்மிட்டர்களை அதிக அளவில் பொருத்தி "இலவசமாக சார்ஜ் செய்து கொள்ளலாம்' என்று அறிவிப்பதற்கும் வருங்காலத்தில்  வாய்ப்புகள் உள்ளன.

என்.ஜே., சென்னை-116.

]]>
https://www.dinamani.com/weekly-supplements/dinamani-kathir/2019/jan/06/பேல்பூரி-3072550.html
3068508 வார இதழ்கள் தினமணி கதிர் வரலாறாகவே வாழ்ந்த அறவாணன்! Monday, December 31, 2018 04:04 PM +0530 இ.சுந்தரமூர்த்தி, முன்னாள் துணைவேந்தர், தஞ்சாவூர் தமிழ்ப் பல்கலைக்கழகம் அருணாசலம் என்ற இயற்பெயரைக் கொண்ட தமிழறிஞர் க.ப.அறவாணன் தஞ்சாவூர் மாவட்டம் கடலங்குடியில் பிறந்தவர்.  அங்கு விஷ்ணுபுரம் ஜார்ஜ் உயர்நிலைப் பள்ளியில் பயின்றவர். அண்ணாமலைப் பல்கலைக்கழகத்தில் புலவர், பி.ஓ.எல்.  பட்டங்களைப் பெற்றவர். பின்னர் கேரளப் பல்கலைக்கழகத்தில் எம்.ஏ. பட்டமும் சென்னைப் பல்கலைக்கழகத்தில் முனைவர் பட்டமும் பெற்றார். 

சிறு வயது முதலே தமிழில் ஈடுபாடு கொண்ட அவர், 12 வயதிலேயே பள்ளியின் பொது மேடையில் ஏறிப் பேசியவர். தமிழக அளவில் நடைபெற்ற சிறுகதைப் போட்டியில் 1959-ஆம் ஆண்டு பரிசு பெற்றார். கடுமையான முயற்சிகளை மேற்கொண்ட  அறவாணன், பகுதி நேரமாக உழைத்துக் கொண்டே பட்டங்களையும் பல்கலைக்கழக அளவிலேயே முதலிடங்களைப் பெற்றவர். தமிழில் முதுநிலைப் பட்டம் பெற்ற அவர், பாளையங்கோட்டை சேவியர் கல்லூரியில் நேர்முகத் தேர்வின்றியே 1967-இல் விரிவுரையாளராகத் தேர்வு செய்யப்பட்டார். 

பின்னர் திருநெல்வேலி மாவட்டம் பாபநாசம் திருவள்ளுவர்  கல்லூரியின் முதல்வராகப் பணியாற்றினார். பின்னர் சென்னை பச்சையப்பன் கல்லூரியில் விரிவுரையாளராகப் பணியாற்றினார். தொடர்ந்து, சென்னை லயோலா கல்லூரியின் தமிழ்த் துறைத் தலைவரானார். 1987 முதல் 1998-ஆம் ஆண்டு வரை புதுச்சேரி  பல்கலைக்கழக தமிழ்த் துறைத் தலைவராகப் பணியாற்றினார். 1991-ஆம் ஆண்டின் சிறந்த மனிதராக "அமெரிக்க பயோஃகிராப்பிக்கல்'நிறுவனம் இவரைத் தேர்வு செய்தது. 1998-ஆம் ஆண்டு முதல் 2001-ஆம் ஆண்டு வரை திருநெல்வேலி மனோன்மணியம் சுந்தரனார் பல்கலைக்கழகத் துணைவேந்தராகப் பணியாற்றினார். 

இடையில் சில காலம் ஆப்பிரிக்காவில் உள்ள தக்கார் பல்கலைக்கழகத்தில் செனகல் அதிபர் செங்கோர் அழைப்பின் பேரில் அங்கு பணியாற்றினார்; மொழி சார்ந்த மானுடவியல் ஆய்வை அங்கு மேற்கொண்டார். சென்னைப் பல்கலைக்கழகத்தில் அவர் பெற்ற மானுடவியல் படிப்பில் சான்றிதழே இதற்கு அடித்தளமாக அமைந்தது. 

இலக்கண அறிஞராகவும் இலக்கிய அறிஞராகவும் திகழ்ந்த க.ப.அறவாணன், நூற்றுக்கணக்கான கட்டுரைகளையும் நூல்களையும் தமிழுக்கு வழங்கியுள்ளார். "700 ஆண்டுகளில் நன்னூல்...', "அவிநயம்', "அமுதசாகரம்', "இந்திரகாளியம்' முதலான இலக்கண நூல்களையும் எழுதியுள்ளார். அவருடைய சங்க இலக்கிய ஆய்வான  "அற்றைநாள் காதலும் வீரமும்...' எனும் நூல் குறிப்பிடத்தக்கது. "சைனரின் தமிழ் இலக்கண நன்கொடை' என்னும் அவருடைய நூல், சமணத் தமிழின் பங்களிப்பைக் காட்டும். 

இலக்கணம், இலக்கியம் மட்டுமல்லாமல், திறனாய்விலும் க.ப.அறவாணன் மிகுந்த ஈடுபாடு கொண்டிருந்தார். "கவிதையின் உயிர், உள்ளம், உடல்...', "கவிதை கிழக்கும் மேற்கும்...' ஆகிய திறனாய்வு நூல்கள் தொடக்க காலத்தில் முதுநிலைப் பட்ட தமிழ் மாணவர்களுக்கு பெரிதும் துணையாக இருந்தன. 

மானுடவியல் ஆய்வில் பெரிதும் ஈடுபாடு கொண்ட அவர், தமிழர்களின் வீழ்ச்சிக்கான காரணங்களைப் பல நூல்களில் துணிச்சலோடு கூறியிருப்பது குறிப்பிடத்தக்கது. "தமிழர் அடிமையானது ஏன், எவ்வாறு?', "தமிழர் மேல் நிகழ்ந்த பண்பாட்டுப் படையெடுப்புகள்...', "தமிழர்தம் மறுபக்கம்...', "தமிழர் தன்னம்பிக்கை-தற்கொலை...' ஆகிய சமூக-மானுடவியல் ஆய்வு  நூல்கள் உலகத் தமிழ் மக்களிடையே புதிய விழிப்புணர்ச்சியைத் தோற்றுவித்தன. 

படைப்பிலக்கியத்திலும் ஈடுபாடு கொண்ட அவர், "அவன்-அவள்-அது...', "நீ ஒரு பண்புத் தொகை...' முதலாகிய நூல்களைப் படைத்துள்ளார். இளமைக் காலம் முதலே கவிதை எழுதுவதிலும் சிறந்து விளங்கினார். 

தமிழ் ஆராய்ச்சியாளர்களுக்குப் பயன்படும் விதத்தில் பல அரிய தொகுப்புகளை வெளியிட்டுள்ளார். அவற்றில் தமிழின் முதல் இலக்கண நூலான தொல்காப்பியத்தை அடிப்படையாகக் கொண்ட "தொல்காப்பியக் களஞ்சியம்' என்னும் நூலும், அறநூல்களை அடிப்படையாகக் கொண்ட "திருக்குறள் அறநூல் களஞ்சியம்' என்னும் நூலும் குறிப்பிடத்தகுந்தவை.  

பல நேரங்களில் அவருடன் உரையாடியபோது, அவர் நெஞ்சில் நிலைத்து நின்ற தொடக்கப் பள்ளி ஆசிரியர்கள் குறித்துக் கூறுவார். அவர்கள் இருவர். ஒருவர், தொடக்கப் பள்ளியில் பாடம் நடத்திய கிருஷ்ணமூர்த்தி ஐயர். "என் காதுகளையும் கன்னங்களையும் கிள்ளித் திருகி கற்றுத் தந்த ஆசிரியர் கிருஷ்ணமூர்த்தி ஐயரை மறக்க முடியாது; அதாவது, ஆசிரியர் கிருஷ்ணமூர்த்தி ஐயர் கையில் படிந்துள்ள சாக்கட்டியின் வெள்ளை நிறம் பதியுமாறு என்னுடைய காதுகளும் கன்னங்களும் திருகப்பட்டன; அப்போது வலித்தன; ஆனால், அந்த வலியால் நான் செய்ததவறுகள் திருந்தின; எனவே, இவற்றுக்காக அவரை என்னால் இப்போதும் வாழ்க்கையில் மறக்கவே முடியவில்லை' என்பார். 

இன்னொருவர், "எனக்கு எட்டாம் வகுப்பு வரை பாடம் கற்பித்த ஆசிரியர் சீதாராம ஐயர். சிவந்த தோற்றமும் சிரித்த முகமும் தலைக் கொண்டையும் உடைய அவர், கண்டிப்பான ஆசிரியர். வகுப்பிலேயே அழகாகப் பாடி பாடம் எடுப்பவர். 1951-52 நவம்பர் 14-ஆம் நாள் என்னைப் பள்ளி பொது மேடையில் ஏற்றி நேருவைப் பற்றிப்  பேச வைத்தவர். என்னுடைய முதல் மேடைப் பேச்சும் அதுவே. இவர் தமிழ்ப் பேச்சு கொஞ்சலாகவே இருக்கும்' என்பார். 

அறவாணனின் உயர்நிலைப் பள்ளி வாழ்க்கையில் உச்சமாக அவர் நினைவில் இருப்பவர் தமிழ் ஆசிரியர் வித்துவான் இரா.கந்தசாமி. "என் 20 ஆண்டுகள் கற்றல் வாழ்க்கை முழுமையிலும் மிக மேலாகவும் முதலாகவும் இருப்பவர் இவரே. என்னுடைய தமிழ்த் திறமையை அடையாளம் கண்டு ஊக்குவித்தவரும் இவரே. இவர்கள் இல்லையேல் நான் இல்லை' என்பார். 

தன்னுடைய வாழ்க்கை வெற்றிக்கும் திருப்புமுனைக்கும் காரணமாகத் திகழ்ந்தவர்களை அவர் எப்போதும் நன்றியுடன் குறிப்பிடுவது வழக்கம். தஞ்சாவூர் தமிழ்ப் பல்கலைக்கழக முதல் துணைவேந்தராக விளங்கிய பேராசிரியர் வி.ஐ.சுப்பிரமணியம், இளமைக் கல்விக்குத் துணை நின்ற ஆசிரியர் இரா.கந்தசாமி, துறவி நா.காசிநாதர், வாழ்க்கை நிலைக்குத் துணை நின்ற அருள்திரு சூ.ராசநாயகம் அடிகளார் உள்ளிட்டோர் குறிப்பிடத் தகுந்தவர்கள். 

தன்னுடைய வாழ்க்கைப் பாதையை தானே திட்டமிட்டு தனக்கென ஒரு வழியை அமைத்துக் கொண்டு வாழ்வில் முன்னேறிய அவர், தம் நூல்களில் பல இடங்களில் கூறும் தன்னம்பிக்கை மொழி இதுதான்: "பாதைகள் தாமாக அமைந்து கிடப்பதில்லை; அவற்றை நாம்தாம் அமைக்கின்றோம்; அமைத்தல் வேண்டும்'. 

1975 முதல் உலகின் ஐந்து கண்ட நாடுகளுக்கும் பயணம் செய்தவர் க.ப.அறவாணன். உலக நாடுகள் பலவற்றிலும் உள்ள மக்களின் வாழ்க்கை முறையை ஆராய்ந்தவர். அவர்களுடைய பண்பாடு, பழக்கவழக்கங்கள் அரசியல் பார்வை ஆகியவற்றைத் தமிழர்களின் வாழ்க்கை முறையோடு நுட்பமாக ஒப்பிட்டுப் பார்த்துத் தம் நூலில் பதிவு செய்தவர்.  

சென்னை பச்சையப்பன் கல்லூரி தமிழ்த் துறை விரிவுரையாளராகப் பணியாற்றியபோது, மாணவர்களை ஒருங்கிணைத்து "பண்பாட்டுப் பாசறை' என்னும் அமைப்பை உருவாக்கினார். ஞானபீடப் பரிசு பெற்ற எழுத்தாளர் அகிலன் அதைத் தொடங்கி வைத்தார்.

புதுச்சேரி பல்கலைக்கழகத் தமிழ்த்துறை தலைவராகப் பணியாற்றியபோது, "தேடல்', "முடியும்', "செய்தி விழுது' என்னும் வெளியீடுகளைக் கொண்டு வந்தார். இவை மூன்றும் புதுச்சேரி பல்கலைக்கழகத் தமிழ்த் துறை சார்பில் வெளியிடப்பட்டன. இவற்றில் ஆய்வாளர்கள், ஆசிரியர்களின் சிறந்த கட்டுரைகள் வெளியிடப்பட்டன.  "முடியும்' என்னும் வெளியீட்டில், மொழிபெயர்ப்புக் கட்டுரைகள், தரமான தமிழ்க் கட்டுரைகள் வெளியாகின. அனைத்திந்தியப் பல்கலைக்கழக ஆசிரியர்கள், கல்லூரித் தமிழ் ஆசிரியர்கள் ஆகியோர் ஆண்டுதோறும் ஒன்றுகூடி தமிழியல் ஆய்வுக் கருத்தரங்கம் ஒன்றை நடத்தினர். அந்த அமைப்பின் பொருளாளராக க.ப.அறவாணன் இருந்தார். இந்த மன்றத்தின் மேம்பாட்டுக்கு உழைத்தார். 

தமிழறிஞர் தவத்திரு தனிநாயகம் அடிகளார் தோற்றுவித்த "தமிழ்ப் பண்பாட்டு ஆய்வு மன்றம்'  செயலிழந்திருந்த நிலையில், அதைத்  தவத்திரு ஞானப்பிரகாச அடிகளாரோடு இணைந்து மீண்டும் பொலிவுறச் செய்தவர் க.ப.அறவாணன். தொல்பொருள் துறை ஆய்வாளர்கள், தமிழியல் துறை ஆய்வாளர்கள் ஆகியோர் இணைந்து ஆராய்ச்சி மன்றம் என்ற அமைப்பை உருவாக்கக் காரணமாக இருந்தார். அந்த அமைப்பின் சார்பில் "ஆய்வுக் கொத்து' என்னும் தொகுப்பினையும் வெளியிட்டார்.

அறிஞர் அறவாணரின் புகழ்பெற்ற மொழி: "முயன்று வரலாற்றைப் படித்தல் வேண்டும்; இயன்றால் வரலாற்றைப் படைத்தல் வேண்டும்; முடிந்தால் வரலாறாகவே வாழ்தல் வேண்டும்' என்பதாகும்.  தமிழகத்தின் வரலாற்றையும் உலக நாடுகளின் வரலாற்றையும் பேராசிரியர் அறவாணன் முயன்று படித்தார். அதனால், தமிழர்களின் எழுச்சியையும் வீழ்ச்சியையும் வரலாறாகப் படைத்தார். எளிய குடும்பத்தில் தோன்றித் தன் முயற்சியால் படித்து பல பட்டங்களைப் பெற்று கல்லூரிகள், பல்கலைக்கழகங்களில் பணியாற்றித் துணைவேந்தராக உயர்ந்து இறுதிநாள் வரை  எழுத்தையே வாழ்க்கையாகக் கொண்டு அரிய நூல்களையும் கட்டுரைகளையும் படைத்துத் தமிழுக்கு வளம் சேர்த்து வரலாறாகவே வாழ்ந்து மறைந்துள்ளார்.

]]>
https://www.dinamani.com/weekly-supplements/dinamani-kathir/2018/dec/30/வரலாறாகவே-வாழ்ந்த-அறவாணன்-3068508.html
3068504 வார இதழ்கள் தினமணி கதிர் ஆயுள் காக்கும் ஆயுர்வேதம்: உள்ளும் புறமும் எண்ணெய்ப் பசை! DIN DIN Sunday, December 30, 2018 12:00 AM +0530 எனது வயது 70. நீரிழிவு, ஆட, கொலஸ்டராலுக்கு காலையும் இரவும் மாத்திரை எடுத்துக் கொள்கிறேன். காது சரியாகக் கேட்காததால் வெளியே செல்வதில்லை. நடைப்பயிற்சி உடற்பயிற்சி செய்ய இயலவில்லை. சாப்பிட்டவுடன் ஈசிசேரில் படுத்துக் கொள்கிறேன். இரவில் இரண்டு மணி நேரத்திற்கு ஒரு தடவை சிறுநீர் கழிக்க எழுந்திருக்கிறேன். வாழ்வின் கடைசிநாட்களில் உடல் நலத்தோடு வாழ வழியென்ன?

அழகர், விஸ்வநாதபுரம், நெல்லை மாவட்டம். 

வயோதிகத்தில் உடலைக் காக்கக் கூடிய திறன், எண்ணெய் தேய்ப்புக்கு மட்டுமே உள்ளது எனக் கூறலாம். பலருக்கும் இதிலுள்ள அலுப்பும், மெத்தனமும், நம்பிக்கையின்மையுமே அதைச் செய்யவிடாமல் தடுத்துவிடுகிறது. பலவீனம், முதிர்ச்சி, வாயுவின் சீற்றம், கண்பார்வை மங்குதல், உடல் இளைப்பு போன்றவை வயது ஏற ஏற வரத் தொடங்குகிறது. இவை அனைத்தையும் மாற்றக் கூடிய சிறப்பு, எண்ணெய் தேய்ப்பதால் கிடைக்கிறது. ஆயுளை வளர்க்கக் கூடியதும், நல்ல ஆழ்ந்த உறக்கத்தை தரக் கூடியதும், சருமத்தை மென்மையாக்கக் கூடியதும், உடலை வலுப்படுத்தக் கூடியதுமான எண்ணெய் தேய்ப்பை நீங்கள் சிறுவயது முதலே பழகி வந்திருந்தால் வயது முதிர்ச்சியினால் ஏற்படக் கூடிய பல உபாதைகளிலிருந்தும் பாதுகாத்திருக்கலாம்.

காலையில் பசி எடுத்துள்ள நிலையில், உடல் உட்புறக் குழாய்கள் சுத்தமாக இருப்பதால், தைலத்தை உடலில் வெது வெதுப்பாகத் தேய்ப்பதால், உடல் முழுவதும் எளிதில் பரவும். பருவகாலங்களுக்குத் தக்கவாறு, வாசனைப் பொருள் கலந்ததும், வாயுவை அடக்கும் தன்மையுடையதுமான தைலங்களைப் பயன்படுத்துவதே நல்லது.

தலைக்குக் க்ஷீரபலா தைலம், கார்ப்பாஸாஸ்த்யாதி தைலம், ஹிமஸாகரதைலம், அஸனவில்வாதி தைலம், ஏலாதிதைலம் போன்றவற்றில் ஒன்றை உடலின் தன்மைக்கு ஏற்ப தேர்ந்தெடுத்து வெது வெதுப்பாகத் தடவுவதால், தலைமுடி, மண்டை ஓடு, புலன்கள் ஆகியவை உறுதியாகின்றன. தலையைச் சார்ந்த பல உபாதைகளுக்குத் தீர்வை தரக் கூடிய இவற்றை நீங்கள் தேர்ந்தெடுத்துப் பயன்படுத்தலாமே!

காதுகளினுள்ளே விடக் கூடிய வெது வெதுப்பான கார்ப்பாஸாஸ்த்யாதி தைலம், வசாலசுனாதி தைலம், மஹாநாராயணதைலம் போன்றவற்றால் தாடை,  தலை, காது ஆகியவற்றில் வலி உண்டாவதில்லை. அவ்விடங்களிலுள்ள நாடி நரம்புகள் வலுப்பெற்று புஷ்டியை அடைவதால், வாயுவை நன்கு கட்டுப்படுத்தலாம்.

பாதங்களில் மஹாமாஷ தைலம், பலாஅஸ்வகந்தாதி தைலம், பிண்டதைலம், முரிவெண்ணெய், ஸஹசராதி தைலம் போன்றவற்றில் ஒன்றை பயன்படுத்துவதால், பலம், நல்லதூக்கம், கண்ணுக்கு நன்மை ஆகியவை உண்டாகின்றன. கால் பாதம் மரத்துப்போதல், கால் வலுவின்மை, சுருக்கம், வெடித்தல் ஆகியவை நீங்குகின்றன. பாதங்களின் நடுவில் இரண்டு நுண்ணிய ரத்த குழாய்கள்,  விஸ்தாரமான அமைப்புள்ள நான்கு ரத்தக் குழாய்கள் என பலவாறாக கண்களை அடைவதால், மூலிகைத் தைல வீர்யமானது கண்களுக்கு எடுத்துச் செல்லப்படுவதால்  கண்பார்வையைக் கூர்மையாக்குகின்றன.

தலை, கழுத்து, மார்புப் பகுதிகளில் கபம் அதிகரித்து கஷ்டப்படுபவர், உணவு செரிமானமாகாமல் அஜீரண நிலையில் இருப்பவர் எண்ணெய் தேய்த்துக் கொள்ளக்கூடாது என்று ஆயுர்வேதம் வலியுறுத்துகிறது.

நெய்ப்பு உடலில் குறையாதவாறு வயோதிகத்தில் கவனித்துத் கொள்ள வேண்டும். பச்சரிசி, உளுந்து, எள்ளு ஆகியவற்றை 4:2:1 என்கிற கணக்கிலெடுத்து பெருந்தூளாக உடைத்து, கஞ்சி காய்ச்சி, அதில் பால், சர்க்கரை கலந்து காலை உணவாகச் சாப்பிட, உடல் உட்புற உறுப்புகளில் உரசல்களைத் தவிர்த்து, வனப்புடன் வாழ இயலும் என்ற விஷயத்தையும் வயோதிகர்கள் கவனத்தில் கொள்வது நல்லது என ஆயுர்வேதம் கூறுகிறது. சிறிய அளவில் பசு நெய்யை, சூடான சாதத்துடன் கலந்து, சிட்டிகை உப்பு சேர்த்து முதல் உணவாகக் கொள்பவர்களுக்கும், நெய்ப்பான தன்மை உடனடியாக உடலுக்குக் கிடைப்பதால், பூட்டுகளுக்குத் தேவையான எண்ணெய்ப் பசையானது கிடைக்கிறது. தோல்கள் வறண்டுவிடாமல், சுருக்கமில்லாமல், ஊட்டத்தை அடைவதால், இளமை குன்றாமல் வசீகரத்தை உடலில் நிலை நிறுத்துகிறது.

 இப்படி உள்ளும் புறமும் தொடர்ந்து எண்ணெய்ப் பசை கிடைக்கச் செய்தால், வாழ்வின் கடைசி நாட்களில், நலத்தோடு வாழலாம்!

சியவனப்பிராசம் எனும் லேகியம், அஸ்வகந்தா எனும் சூரணம், திரிபலை எனும் சூரண மருந்தில் நெய், தேன் குழைத்து  இரவில் சாப்பிடுதல், க்ஷீரபலா 101 எனும் சொட்டு மருந்து, இந்துகாந்தம், விதார்யாதி, கல்யாணம், தாடிமாதி, சுகுமாரம் எனும் பெயரிலுள்ள நெய் மருந்துகள் முதியோர் சாப்பிடக் கூடிய தரமான மருந்துகளை மருந்துவர் ஆலோசனைப்படி சாப்பிடவும்.

(தொடரும்)

]]>
https://www.dinamani.com/weekly-supplements/dinamani-kathir/2018/dec/30/ஆயுள்-காக்கும்-ஆயுர்வேதம்-உள்ளும்-புறமும்-எண்ணெய்ப்-பசை-3068504.html
3068509 வார இதழ்கள் தினமணி கதிர் விசும்பல்கள் ஜெ.பாஸ்கரன் DIN Sunday, December 30, 2018 12:00 AM +0530 சியாமளாவுக்குக் குழப்பமாகவும், கோபமாகவும் இருந்தது.  குழப்பத்திற்குக் காரணம் அலுவலகத்தில் நடந்தது. கோபத்திற்குக் காரணம் வீட்டில் இருந்தது. நாற்பது வயதை எட்டாத இளம் விதவை சியாமளா. இரண்டு வருடம் முன்பு, திடீரென முளைத்த  ஒவர்பிரிட்ஜ் மேல் டூவீலரில் வேகமாய் வந்த அவள் கணவன், தண்ணீர் லாரியின் பின்னால் மோதி, தெறித்து, விழுந்த இடத்திலேயே உயிரை விட்டான். போஸ்ட்மார்ட்டம் எல்லாம் செய்து, அவன் இறப்புச் சான்றிதழ் தவிர வேறொன்றும் இவளுக்குக் கிடைக்கவில்லை.

அமெரிக்கக் கம்பெனி முதலாளி நல்லவர். கணவனின் நேர்மைக்கும், அகால மரணத்துக்குமான சன்மானமாக, கிராஜுவேட் ஆன சியாமளாவுக்கு ஒரு கிளார்க் உத்தியோகம் கொடுத்தார். நன்றியுடன் வேலையில் சேர்ந்தாள். வாழ்க்கை கேள்விக்குறியாகும் போது, சில நல்லவர்கள் தெய்வமாகத் தெரிவார்கள்!

அங்கு மானேஜராக இருந்தவன் சிவா. கண்டிப்புக்குப் பெயர் போனவன். ஆனாலும் தன் சக சிப்பந்திகளை மரியாதையுடனும், கருணையுடனும் நடத்துவான். சியாமளாவின் கணவன் இறப்பில் வருந்தி, அவளுக்கு வேலை கற்றுக் கொடுத்து, கொஞ்சம் தன்னம்பிக்கையையும் வளர்த்தான்.

சியாமளாவின் ஒரே மகன், ப்ளஸ் ஒன் படிக்கும் சங்கர்.  "அரும்பு மீசை, நடுவில் விட்டு, ஓரத்தில் மட்டும் மெஷின் கட் செய்த "பிரஷ்' தலை,  ஜீன்ஸ், "தொடாதே' என்றெழுதிய டி ஷர்ட்' படிப்பில் சுமார்! கணவன் இறந்த பிறகு, ஒரே மகனை ஆளாக்கும் சுமை முழுதும் அவள் தலையில்.

""அம்மா, நான் கேட்டது என்னாச்சு?'' - இரண்டு நாட்களாகக் கேட்டுக்கொண்டிருக்கிறான்.

""ரொம்ப காஸ்ட்லியா இருக்கேப்பா? விலை கம்மியான பிராண்ட் ஏதாவது பாரேன்''

""அதெல்லாம் சரியா வராதும்மா. இப்போ ஸ்கூல்ல ஹோம்வொர்க் எல்லாம் கூட வாட்ஸ் ஆப் லெதான் அனுப்புறாங்க. அதுக்கெல்லாம் அந்த செல்போன்தான் சரிவரும்மா''

மறுநாள் அலுவலகத்தில், ""சிவா, நல்ல ஸ்மார்ட்போன் "என் ரேஞ்சுக்குள்ள" பார்த்து சொல்லேன். சங்கருக்கு வேணுமாம், மறுக்க முடியல்லெ'' என்றாள்.

""இரு, பார்த்து சொல்றேன். காஷியர் கிட்டே அட்வான்ஸ் வாங்கிக்கோ. திடீர்ன்னு பணத்துக்கு எங்கே போவே?''

சியாமளாவுக்கு நிம்மதியாய் இருந்தது. இந்தக் காலக் குழந்தைகளின் எதிர்பார்ப்பு எப்போது, என்ன என்பதே தெரியமாட்டேன்கிறது பெருமூச்சு விட்டாள்.

மாலை, சுமார் ஆறாயிரம் பெறுமான செல் சியாமளாவின் மேஜைமீது சிணுங்கியது.

""சிவா, இந்த ஃபைலில் இரண்டு இன்வாய்ஸ் மிஸ்ஸிங்''

"" ம்.. கமலாகிட்டே கேளு. இன்வார்ட் லிஸ்டுலெ இருக்கான்னு பார்க்கச் சொல்லு. காபி எடுத்து, ரீப்ளேஸ் பண்ணிடு''

சிவா எப்போதுமே இப்படித்தான். எல்லாவற்றுக்கும் ஓர் உடனடி தீர்வு வைத்திருப்பான். முதலாளிக்கும் சிவாவிடம் பிடித்த குணமே, இந்த பிராப்ளம் சால்விங் திறமைதான்!

லஞ்ச் ப்ரேக். எதிரும் புதிருமா உட்கார்ந்து சாப்பிடும்போது சிவா கேட்டான். ""என்ன சியாமளா, முகம் ஒரு மாதிரியா இருக்கே?''

""ஒண்ணுமில்லே சிவா...  இரண்டு வருஷமா அவுஸ் ஓனர் வீட்டு வாடகையை ஒசத்தலையேன்னு பார்த்தேன்''

""வீட்டு வாடகைதானே, ஏத்தத்தான் செய்வாங்க; அதுதானே வழக்கம்?''

""அது கூட பரவாயில்லே சிவா. கொஞ்ச நாளாவே வீட்டுக்காரன் பார்வையும், பாடி லாங்வேஜும் சரியா இல்லே. இன்னிக்குக் காலைலே வரும்போது, வீட்டுச் சாவியை என் கையத் தொட்டு வாங்கிக்கறான்.  முகம் முழுக்க சிரிப்போட, ஜொள்ளு''

சிவா நிமிர்ந்து அவள் முகத்தைப் பார்த்தான்.  வாடியிருந்தது.

""தனியா ஒரு பெண் கண்ணியமா வாழ்க்கை நடத்தவே முடியாதா சிவா?''

""சரி விடு. ஒரு நாள் முகத்துலெ அறைஞ்ச மாதிரி நேராவே சொல்லிடு. என்ன, வாடகை ஏறும், இல்லேன்னா வேறெ வீடு பார்க்கணும். அவ்வளவுதானே?''
இவள் தயிர் சாதத்தை முடிக்கு முன்பே, அவன் தன் டிபன் பாக்ûஸ எடுத்துக் கொண்டு வாஷ் பேசின் பக்கம் போனான்.

சியாமளாவுக்கு ஆச்சரியமாக இருந்தது  இவனால் எப்படி இவ்வளவு யதார்த்தவாதியாக இருக்க முடிகிறது என்று!

சங்கருக்கு நட்பு வட்டம் பெரியது. பீச், ஓட்டல், மாலில் சினிமா என்று எதற்கும் குறைவு கிடையாது. அவ்வப்போது பணம் கேட்கும்போது, சியாமளா மறுப்பதும், அவன் கோபப்படுவதும், வாக்குவாதம், விதண்டாவாதம் எல்லாம் அரங்கேறும்.

சியாமளா எவ்வளவு சொல்லியும் கேட்கவில்லை சங்கர். உடனே டூ வீலர் வேண்டும் எனப் பிடிவாதம்.

""பணத்துக்கு எங்கேடா போவேன்? அப்பாவும் இல்லே, நீ கொஞ்சம் பொறுப்பை உணர்ந்து நடந்துக்கக் கூடாதா?''

""என்னம்மா பெரிய பொறுப்பு? இப்போ விட்டா ஸ்கூல் லைஃப் திரும்பக் கிடைக்குமா? நம்ம கஷ்டங்கள் எப்பொவும்தான் இருக்கு. அப்பொ படிப்பை விட்டுட்டு வேலக்குப் போயிடட்டுமா?''  அனலைக் கக்கினான்.

""ஹும், படிச்சவனே இங்கே தாளம் போடறான். உன் ப்ளஸ் ஒன்னுக்கு, மூட்டைத் தூக்கற வேலை கூட கிடைக்காது''

""மூர்த்தியோட அம்மாவும் உன்னை மாதிரி சிங்கிள் பேரண்ட்தானேம்மா? அவனுக்கு மட்டும் அவன் அம்மா எப்படி கேட்டதெல்லாம் வாங்கித் தர்ராங்க?''
""அவங்கப்பா சொத்து கொஞ்சம் இருக்கு. சொந்த ஃப்ளாட். அவங்க வேலை செய்யற கம்பெனியும், சம்பளமும் பெரிசு'' சியாமளா உண்மையில் பாதியைத்தான் சொன்னாள்.

ஏழெட்டு வருடங்களுக்கு முன்னால், பள்ளிக்கூடத்து வாசலில் பார்த்துப் பழகியவர்கள் சியாமளாவும், மூர்த்தியின் அம்மாவும். தினம் ஒரு "பளிச்' புடவை, கழுத்து இறக்கித் தைத்த டிசைனர் ப்ளௌஸ், தங்கக் கொலுசு, டூவீலர், கூலிங் கிளாஸ் என பெண்களே திரும்பிப் பார்க்கும் வகையில் வருவாள் மூர்த்தியின் அம்மா.

ஓரிரண்டு வருடங்களில் நெருங்கிய நட்பானாலும், சியாமளா கொஞ்சம் விலகியே இருந்தாள் வாழ்க்கைக் கண்ணோட்டம்   இருவருக்கும் வெவ்வேறானது.

சிரித்துப் பழகி, எதையும் சாதித்துக் கொள்ளும் திறமை இருந்தது மூர்த்தியின் அம்மாவிடம். மால்கள், சினிமா தியேட்டர், ஃபைவ் ஸ்டார் ஓட்டல் என மேலதிகாரிகளுடன் செல்வதைப் பெருமையாகச் சொல்லிக்கொள்வாள் "" சிரித்துப் பேசிப் போவதில் எனக்கொன்றும் நஷ்டம் இல்லை; பிடித்துதானே அவர்களும் வருகிறார்கள்?'' என்பாள். வாழ்க்கை வாழ்வதற்கே என்ற கொள்கைப் பிடிப்பு அவளுக்கு!

இதையெல்லாம் சங்கரிடம் சொல்வதற்கு சியாமளாவுக்கு விருப்பம் இல்லை. இம்மாதிரி விஷயங்கள் இந்த வயதில் தவறான எண்ணங்களுக்கு வித்திட்டுவிடும் என்பதால், மிகவும் கவனமாக இருந்தாள் சியாமளா.

""அம்மா, எல்லோரும் ஸ்கூல்ல உல்லாசப் பயணம் போறாங்க. ஐந்து நாள் டூர் நானும் போகணும்மா'' அலுவலகம் விட்டு வந்ததும் ஆரம்பித்தான் சங்கர்.
""மூவாயிரம் ரூபாய்க்கு நான் எங்கே போவேன்? இப்போ முடியாது. அடுத்த முறை பார்த்துக்கலாம்''

""ம்க்கும், அடுத்த வருஷம் பூரா படிப்புதான் ப்ளஸ் டூ. நேரம் எங்கே இருக்கும்? டூரே இருக்காது. மூர்த்தியெல்லாம் பணம் கொடுத்துட்டான் தெரியுமா?''
குழந்தை முகம் பார்த்து மனம் நெகிழ்ந்தது. இளமையில் வறுமை கொடியதுதான்.

""ஏற்கெனவே ஆபீசில் நெறைய அட்வான்ஸ் வாங்கியாச்சு. ஏதோ சிவா உதவியால வண்டி ஓடறது. நீயும் நம்ம நெலைமை புரியாமெ ஏதாவது கேக்கற.  புரிஞ்சுக்கோடா சங்கர்''

""எப்பொவும் உனக்கு இல்லே பாட்டுதான்''  முகத்தைத் தொங்கப் போட்டுக்கொண்டு , அறைக்குள் சென்று கதவைச் சார்த்திக் கொண்டான் சங்கர்.

வாசல் புறம் ஏதோ சத்தம் கேட்கவே, சியாமளா ஜன்னல் வழியே பார்த்தாள். பூந்தொட்டியைச் சரி செய்வது போல் அவளைக் கண் இமைக்காமல் பார்த்துக் கொண்டிருந்தான் கிருஷ்ணன்.

""குட் ஈவினிங். பையன் கோபமாய் இருக்கான் போல்ருக்கு. இந்தக் கால பையன்களே  ஏன் பொண்ணுங்களும்தான் சொன்ன பேச்சைக் கேட்கிறதே இல்லே''

ஒப்புக்குத் தலையாட்டிவிட்டுத் திரும்பினாள் சியாமளா. இவன் ஏன் சம்மன் இல்லாமெ ஆஜர் ஆகிறான்? அவள் மைண்ட் வாய்ஸ் சொன்னது.

""ஏதாவது உதவி தேவையா?''

கோபம் வந்தது பல்லைக் கடித்துக்கொண்டு, திரும்பிப் பார்த்து "வேண்டாம்' எனத் தலையாட்டினாள்.

""குழந்தை ஆசைப்பட்டா, எக்ஸ்கர்ஷன்தான் அனுப்பி வையுங்களேன். நான் பணம் தருகிறேன், மெதுவா திருப்பித் தாங்களேன்'' -ஆடு நனைகிறதே என்று ஓநாய் கவலைப் பட்டதாம்!

""வேண்டாம் சார். கடன் வாங்கற சக்தி கூட இப்போ எங்கிட்டெ இல்லெ. உங்க உதவிக்கு என் நன்றி'' என்று "பட்'டென்று சொல்லி, உள்ளே சென்று விட்டாள். "கழுகாட்டம் அலையறான்கள்' முணுமுணுத்தாள்.

மறுநாள் அலுவலகத்தில் சிவாவிடம் விவரம் கூறி வருந்தப்பட்டாள் சியாமளா. மாலை வேலை முடிந்து கிளம்பும்போது சிவா அவளைத் தன் கேபினுக்குக் கூப்பிட்டான்.

""இங்கே பார் சியாமளா, நீ ஏன் கிருஷ்ணன் கிட்டெ கைமாத்தா பணம் வாங்கிக்கக் கூடாது, கடன்தானே?''

""வேண்டாம் சிவா. அவன் பார்வையே சரியில்லே. வேண்டாத வெனைய வெலைக்கு வாங்கிக்கறா மாதிரிதான் இது. அப்புறம் அவன் பார்க்கிற போதெல்லாம் பல்லிளிக்கணும்  தேவையா?''

சிவாவின் முகத்தில் ஏதோ மாற்றம் தெரிந்தது. சியாமளாவுக்குப் புரியவில்லை. சிவா எதற்கோ தயங்குவதைப்போல் இருந்தது.

""அதுக்கில்லே. யாரும் சும்மா உதவி செய்துடறது இல்லே இந்தக் காலத்துலே. ஏதேதோ எதிர்பார்ப்புகளோடதான் செய்யறாங்க. நாமதான் அனுசரித்துப் போகணும். தேவை நமக்குத்தானே? வேண்டாம்னா நஷ்டமோ, கஷ்டமோ அதுவும் நமக்குத்தானே?''

""இப்போ என்ன சொல்ல வரே சிவா?''

""இப்போ இதெல்லாம் சகஜமாப் போச்சு சியாமளா. சமயத்துலே நான் கூட ஏன் உனக்கு இதெல்லாம் செய்யணும்ன்னு நினைப்பேன்; சிலசமயம் தேவையான்னு கூட எனக்குத் தோணும். எது காரணம்? ஆழ்மன விகாரங்களை அவ்வளவு எளிதாகக் கடந்துவிட முடியாது சியாமளா''

"சுருக்' கென்றது சியாமளாவுக்கு. சீ, இவனும் இவ்வளவுதானா? மனதில் விகல்பமில்லாத மனிதர்களே கிடையாதா? ஒரு பெண் தனியாக வாழ்வது அவ்வளவு கடினமா?

""சாரி சிவா, உன் பேச்சு எனக்குப் புரியலெ. இது வரைக்கும் நீ செய்த உதவிகளுக்கு, மனதிலே உன்னை ரொம்ப உயர்வா நெனச்சிக்கிட்டிருக்கேன். அந்த பிம்பம் கலையற மாதிரி நீ ஏதாவது கேட்பதற்கு முன்னாடி, நான் இங்கிருந்து போயிடறேன்''  சொல்லியவாறே, திரும்பிப் பார்க்காமல் வெளியேறினாள்.

உலகத்தின் மீதும், மனிதர்கள் மீதும் கோபம் கொப்பளித்தது.  தனிமையில் தள்ளாடும் தன் மீது ஒரு கழிவிரக்கம் ஏற்பட்டது. வெளியில் வானம் கருத்திருந்தது, மழை வருமோ?

வானத்தில் தனியாய்ப் பறக்கும் ஒரு மாலைப் பறவை திக்கு தெரியாமல் செல்வதைப் போலத் தோன்றியது.

வீட்டிற்கு வந்தவள் சங்கரைப் பார்த்தாள். இவனது தகுதிக்கு அதிகமான ஆசைதானே எல்லா துயரங்களுக்கும் காரணம் என்று எரிச்சலும், கோபமுமாய் வந்தது. ஒன்றும் பேசாமல் உள்ளே சென்றாள்.

""அம்மா, எக்ஸ்கர்ஷனுக்குப் பணம் கிடைத்ததா?''

ஆவேசம் வந்தவள் போல் சங்கர் அருகில் வந்தாள்  அவள் முறைத்த முறைப்பில் சங்கர் மிரண்டான். தலைக்கு மேல் உயர்ந்த அவளது வலது கை. சங்கரின் இடது கன்னத்தில் "பளீரென' இறங்கித் தடம் பதித்தது.

""மானத்தை விற்று உனக்கு சுற்றுலாவா? போதும் நீ படித்தது  மூட்டைத் தூக்கிப் பிழைத்து, உன் சம்பளத்தில் ஊரைச் சுற்று''

அறைந்த வேகத்தில்... நடு வீட்டில் விழுந்து குலுங்கிக் குலுங்கி அழுதாள் சியாமளா. விசும்பல்கள் நீண்ட நேரம் உயிர்த்திருந்தன.
 

]]>
https://www.dinamani.com/weekly-supplements/dinamani-kathir/2018/dec/30/விசும்பல்கள்-3068509.html
3068510 வார இதழ்கள் தினமணி கதிர் பேல்பூரி DIN DIN Sunday, December 30, 2018 12:00 AM +0530 கண்டது

(சேலம் பேருந்துநிலையத்திற்கு வெளியே நின்று கொண்டிருந்த ஒரு காரில்)

முட்டாள் அழகான இடத்தைத் தேடுகிறான்...
அறிவாளி இருக்கும் இடத்தை அழகாக்குகிறான்.

இரா.வசந்தராசன், கல்லாவி.

 

(சிதம்பரம் மேலவீதியில் பாழடைந்த வீடு ஒன்றில் கண்ட விளம்பரம்)

இவ்விடம் பாழடைந்த கட்டடங்களை இடிக்க பொக்லைன் இயந்திரம் வாடகைக்குக் கிடைக்கும்.

சிவகுமார் நடராஜன், பரங்கிப்பேட்டை.

 

(திருவாரூருக்கு அருகில் உள்ள ஓர் ஊரின் பெயர்)

பாம்பு புகுந்த நல்லூர்

மு.பெரியசாமி, விட்டுக்கட்டி.

 

கேட்டது


(தூத்துக்குடி ஆட்டோ ஸ்டாண்டில் ஆட்டோ ஒட்டுநரும், பயணியும்)

"" சார்... ஆட்டோ வேணுமா?''
""வேண்டாம்ப்பா...
ஏற்கெனவே வீட்டுல ஒரு காரும், பைக்கும் இருக்கு''

க.சரவணகுமார், திருநெல்வேலி-11

 

(நாகர்கோவிலில் பள்ளிக்குச் செல்லும் மாணவியும் அவளுடைய அம்மாவும்)

""பள்ளிக்கூடம் விட்டா நேரா வீட்டுக்கு வந்து சேரு. கேட்டியா?''
"" நேரா வர்றதுக்கு நான் ட்ரெயின்ல் வரலை. 
பஸ்ல வந்தா வளைஞ்சி வளைஞ்சிதான் வரும்''


கே.ஆர்.ஜெயக்கண்ணன், கவற்குளம் தேரிவிளை.


யோசிக்கிறாங்கப்பா!

பார்வையற்றோர் குழு
 பாட்டுப் பாடி 
யாசிக்கும்போதுதான் தெரிகிறது...
வெளியே  காதுகேளாதோர் நிறைய என்று.

துரை.ஏ.இரமணன், துறையூர்.


மைக்ரோ கதை

அருகிலிருந்த கொழுக்கொம்பு ஒன்றைப் பற்றிக் கொண்டு  படர்ந்தது ஒரு கொடி.
""ஆகா... உனக்கு என்மேல் என்ன அன்பு... என்ன அன்பு... ஆசையோடு தாவி, என்னை அப்படியே இறுகத் தழுவிக் கொண்டுவிட்டாயே''  என்றது கொம்பு ஆனந்த பரவசத்துடன். 
""அட... பாவமே மனிதர்களில் கூட இப்படித்தான் சிலர் ஏமாந்துவிடுகிறார்கள்'' என்றது கொடி.
""அது எப்படி?'' என்று கொம்பு கேட்டது.
""  அன்புக்கும்  சுயநலத்துக்கும் உள்ள வித்தியாசம்  உனக்குத் தெரியாதது போல்தான் அவர்களுக்கும் தெரிவதில்லை'' என்றது கொடி.

ஆதினமிளகி.வீரசிகாமணி.


எஸ்.எம்.எஸ்.

நதிகள் என்றால் வளைவுகள் இருக்கும்;
வாழ்க்கை என்றால் வலிகள் இருக்கும்.

வெ.சென்னப்பன், கீரைப்பட்டி.


அப்படீங்களா!


ஸ்விட்சர்லாந்தின் ùஸர்மாத் நகருக்கு அருகில்  1621 அடி நீளத்தில்  உலகிலேயே நீளமான தொங்கு பாலம் உள்ளது.  இந்த  பாலம்   செங்குத்தான குறுகிய பள்ளத்தாக்கில் ùஸர்மாத் என்ற நகருக்கும் கிராச்சென் என்ற நகருக்கும்  இடையே  அமைக்கப்பட்டுள்ளது.  நிலத்தில் இருந்து 279 அடி உயரத்தில் இந்த பாலம் அமைந்துள்ளது. இந்தப் பாலத்தில் மக்கள் நடந்து செல்லும்போது ஆடாமல் இருக்க 8 டன் கேபிள்கள் பயன்படுத்தப்பட்டுள்ளன.

என்.ஜே., சென்னை-116.

]]>
https://www.dinamani.com/weekly-supplements/dinamani-kathir/2018/dec/30/பேல்பூரி-3068510.html
3068512 வார இதழ்கள் தினமணி கதிர் சிரி... சிரி...  DIN DIN Sunday, December 30, 2018 12:00 AM +0530 ""எங்கம்மா எது செய்தாலும் எங்க  அப்பா வாயை மூடிக்கிட்டு சாப்பிட்டுப் போயிடுவார்ன்னு சொன்னா...  ஏன் ஆச்சரியமா பாக்குற?''
""வாயை மூடிக்கிட்டு எப்படிச் சாப்பிட முடியும்ன்னுதான்''

தீ.அசோகன், சென்னை-19.

 

""மழைக்காலம் வந்தா கையிலே
 ஏன் தாயத்துக் கட்டிக்கிறே?''
""பெய்றது பேய்'  மழையாச்சே''

க.  நாகமுத்து, திண்டுக்கல்.



""நீங்க எழுதின புத்தகத்திலே "கொசுவுக்கு நன்றி'ன்னு  முதல் பக்கத்திலே போட்டிருக்கீங்களே... ஏன்?''
""கொசுக்கடியினால் தூக்கம் வராம விழிச்சிருந்தப்ப எழுதின புத்தகமாச்சே''

பி.பரத், கோவிலாம்பூண்டி.

]]>
https://www.dinamani.com/weekly-supplements/dinamani-kathir/2018/dec/30/சிரி-சிரி-3068512.html
3068513 வார இதழ்கள் தினமணி கதிர் திரைக் கதிர் DIN DIN Sunday, December 30, 2018 12:00 AM +0530 "புத்தகம்', "என்னமோ ஏதோ', "தீரன் அதிகாரம் ஒன்று' படங்களில் நடித்துள்ள ரகுல் ப்ரீத் சிங் திடீரென்று தெலுங்கு படங்களில் நடிக்கச் சென்று மளமளவென பட வாய்ப்புகளைக் குவித்தார். கடந்த 2017-ஆம் ஆண்டு மட்டும் அவர் 5 படங்களில் நடித்தார். முன்னணி நடிகைகள் பட்டியலில் இடம் பிடித்த ரகுல் ப்ரீத்துக்கு 2018-ஆம் ஆண்டு அதிர்ஷ்டம் இல்லாத ஆண்டாகவே அமைந்தது. தமிழ், தெலுங்கு எதிலும் அவருக்கு ஒரு படம் கூட இந்த ஆண்டில் வெளியாகவில்லை.  

கடந்த 2017-ஆம் ஆண்டு  மகேஷ்பாவுடன், "ஸ்பைடர்' படத்தில் கதாநாயகியாக நடித்திருந்த ரகுல் அப்படத்தை பெரிய அளவில் எதிர்பார்த்தார். ஆனால் படம் தோல்வி அடைந்ததால் அதிர்ச்சி அடைந்தார். புதிய வாய்ப்புகளுக்காக காத்திருந்த அவருக்கு ஏமாற்றமே மிஞ்சியது.  ஜனவரி தொடங்கி டிசம்பர் வரை ஒரு படம் கூட அவருக்கு கைகூடவில்லை.  வரும் 2019-ஆம் ஆண்டில் சூர்யாவுடன் "என்ஜிகே', சிவகார்த்திகேயனுடன் புதியபடம், கார்த்தியுடன் "தேவ்' என 3 படங்களில் நடித்து வருவதுடன் மறைந்த என்டி.ராமராவ் வாழ்க்கை படத்தில் ஸ்ரீதேவி கதாபாத்திரம் ஏற்று நடித்து வருகிறார். ஹிந்தியிலும் ஒரு படத்தில் நடிக்கவுள்ளார்.

 

-----------------------


தணிக்கை குழு பற்றி தனது கருத்துக்களை வெளிப்படையாக தெரிவித்துள்ளார் நடிகர் அரவிந்தசாமி. இது குறித்து கேள்விக்கு பதிலளித்துள்ள அவர், ""தணிக்கை குழு ஏகப்பட்ட கட்டுப்பாடுகளை விதிக்கிறது. ஆனால் அது எல்லாமும் பொருந்தாத நிலையில் உள்ளது. தமிழ் சினிமாவில் ஆணும், பெண்ணும் முத்தம் கொடுப்பது போல் காட்சி இருந்தாலே "யூ' சான்றிதழ் கிடைக்காது. அது எதற்காக வைக்கப்படுகிறது. அதில் ஆபாசம் இருக்கிறதா என்றெல்லாம் பார்க்க மாட்டார்கள். அன்பை வெளிப்படுத்தும் முத்தக் காட்சியை கூட அனுமதிப்பதில்லை. அதே போன்று பெண்களுக்கு எதிரான வன்முறைகள் பற்றிய படங்களுக்கு யூ சான்றிதழ் கிடைக்காது. பெண்களுக்கு எதிரான வன்முறையை காட்டி விட்டுத்தானே, அதற்கு தீர்வு சொல்ல முடியும். அந்த வன்முறைக்கு வக்காலத்து வாங்கவில்லை என்பதை எப்படி புரிய வைப்பது. தணிக்கையில் அரசியல் இருக்கிறது. இங்கே நிறைய கோபக்கார கும்பல் இருக்கிறது.  நாங்கள் அவர்களின் உணர்வுகளைப் புண்படுத்த மாட்டோம். ஒரு நடிகனின் வேலை மற்றவர்களைக் காயப்படுத்துவது அல்ல. சிந்திக்க வைப்பது. அது போல சினிமாவின் வேலை போதிப்பது அல்ல. சந்தோஷப்படுத்துவது.  அதில் வருகிற கருத்தும் முக்கியம். இனி சர்ச்சைக்குரிய படங்களில் நடிக்க மாட்டேன்'' என்று தெரிவித்துள்ளார் அரவிந்தசாமி.

---------------------
 

"பாகுபலி' படம் மூலம் இந்தியா முழுவதும் பிரபலம் ஆனவர் பிரபாஸ். தற்போது தமிழ், தெலுங்கில் உருவாகும் "சாஹு' படத்தில் நடித்து வருகிறார். ஹிந்தி படத்தில் நடிக்கவும் பேச்சு நடக்கிறது. கோடிகளில் சம்பளம் வாங்கும் பிரபாஸ் வறுமை கோட்டுக்கு கீழ் உள்ளாரா என்ற கேள்வி எழுந்துள்ளது.  தெலங்கானா மாநிலம் ராயதுர்க பகுதி பன்மக்தா கிராமத்தில் உள்ள 84 ஏக்கர் நிலத்தை சமீபத்தில் அரசு நிலம் என்று அறிவிக்கப்பட்டதையடுத்து அங்கிருந்த ஆக்கிரமிப்பு கட்டிடங்கள் இடிக்கப்பட்டன. அதேபகுதியில் பிரபாஸின் பண்ணை வீடு உள்ளது. அந்த பங்களாவுக்கும் அதிகாரிகள் சீல் வைத்தனர். "வரைமுறைப்படுத்தப்பட்ட  விதிகளின் அடிப்படையில் வாங்கிய அந்த வீட்டை முன் அறிவிப்பு இல்லாமல் சீல் வைத்திருக்கின்றனர். அதற்கு தடை விதிக்க வேண்டும்' என்று பிரபாஸ் சார்பில் வழக்குத் தொடரப்பட்டது. வரைமுறைப்படுத்தப்பட்ட விதி என்பது வறுமைகோட்டுக்கு கீழ் உள்ளவர்களுக்காக வகுக்கப்பட்டிருக்கும் விதியாகும். இதைக் கேட்ட நீதிபதிகள்,'பிரபாஸ் வறுமை கோட்டுக்கு கீழ் உள்ளவரா?' என்றனர். அதற்கு பதில் அளித்த அரசு வழக்கறிஞர், "பிரபாஸ் ஏழை அல்ல, அவர் பாகுபலி' என்றார். இதையடுத்து நீதிபதிகள் இந்த வழக்கு தொடர்பாக தெலங்கானா அரசுக்கு விளக்கம் கேட்டு நோட்டீஸ் அனுப்ப உத்தரவிட்டனர்.  
 

---------------------
 

அஜித் - சிவா கூட்டணியில் உருவாகி வரும் படம் "விஸ்வாசம்'.  தொடர்ந்து நான்காவது முறையாக சிவா இயக்கத்தில் அஜித் நடித்துள்ள இந்தப் படத்தில், நயன்தாரா கதாநாயகியாக நடிக்கிறார். தம்பி ராமையா, போஸ் வெங்கட், ரோபோ சங்கர், யோகி பாபு உள்ளிட்ட பலர் முக்கிய வேடங்களில் நடிக்கின்றனர். மதுரை மற்றும் தேனி மாவட்டங்களைப் பின்னணியாகக் கொண்டு இந்தப் படம் உருவாகியுள்ளது. "தூக்கு துரை' என்ற கதாபாத்திரத்தில் அஜித் நடித்திருப்பதாகச் சொல்லப்படுகிறது.  சத்யஜோதி ஃபிலிம்ஸ் தயாரித்துள்ள இந்தப் படத்துக்கு, டி.இமான் இசையமைக்கிறார். பாடல்கள் மற்றும் டீஸர் வெளியாகி, அஜித் ரசிகர்களிடையே பெரும் வரவேற்பைப் பெற்றுள்ளது. வரும் பொங்கல் பண்டிகைக்கு வெளியாகவுள்ள இப்படத்தின் அனைத்துப் பணிகளும் முடிந்த நிலையில் தணிக்கை குழுவுக்கு அனுப்பி வைக்கப்பட்டது. படத்தைப் பார்த்த தணிக்கை அதிகாரிகள், படத்துக்கு "யு' சான்றிதழ் வழங்கியுள்ளனர். இந்தப் படத்தின் தமிழக விநியோக உரிமையை, நயன்தாராவின் "அறம்' படத்தைத் தயாரித்த கே.ஆர்.ஜே. ஸ்டுடியோஸ் கைப்பற்றியுள்ளது. அத்துடன், ஏரியா வாரியாக யார் யார் விநியோக உரிமையைப் பெற்றுள்ளனர் என்ற விவரமும் வெளியிடப்பட்டுள்ளது. "விஸ்வாசம்' படத்துடன், ரஜினி நடித்துள்ள "பேட்ட' படமும் வரும் பொங்கலுக்கு வெளியாகவுள்ளது. 
 

---------------------


தனுஷ் - வெற்றிமாறன் கூட்டணிக்கு எப்போதுமே ரசிகர்கள் மத்தியில் பெரும் எதிர்பார்ப்பு உண்டு. "பொல்லாதவன்', "ஆடுகளம்', சமீபத்தில் வெளிவந்த "வட சென்னை' என இந்த கூட்டணியில் உருவான அனைத்துப் படங்களுமே விமர்சனரீதியாகவும், வசூல்ரீதியாகவும் தனித்துவம் பெற்றவை. இந்நிலையில் இந்த கூட்டணி மீண்டும் இணையவுள்ளது. படத்துக்கு "அசுரன்' எனப் பெயரிடப்பட்டுள்ளது. "வடசென்னை' படத்தை 2 பாகங்களாக உருவாக்க திட்டமிட்டார் வெற்றிமாறன். அதனை முதல் பாகத்தின் க்ளைமாக்ஸிலும் உறுதிப்படுத்தினார். ஆனால், 2-ஆவது பாகத்துக்கு முன்னதாக, மற்றொரு கதையில் வெற்றிமாறனும், தனுஷும் இணையவுள்ளதாக செய்திகள் வெளியாகின. இதனை இருவருமே உறுதி செய்தார்கள். தற்போது தனுஷ் இயக்கத்தில் "மாரி 2' வெளியாகியுள்ள சூழலில், வெற்றிமாறன் இயக்கத்தில் நடிக்கவுள்ள படத்தின் ஃபர்ஸ்ட் லுக்கை வெளியிட்டுள்ளார் தனுஷ். "அசுரன்' எனப் பெயரிடப்பட்டுள்ள இப்படத்தை தாணு தயாரிக்கவுள்ளார். விரைவில் படப்பிடிப்பு தொடங்கவுள்ளது. சென்னையை பின்னணியாக கொண்ட கதைக்களம் என தயாரிப்பு வட்டாரங்கள் தெரிவித்துள்ளது.

]]>
https://www.dinamani.com/weekly-supplements/dinamani-kathir/2018/dec/30/திரைக்-கதிர்-3068513.html
3068514 வார இதழ்கள் தினமணி கதிர் சொன்னால் நம்பமாட்டீர்கள்! - 9 சின்ன அண்ணாமலை DIN Sunday, December 30, 2018 12:00 AM +0530 இது நடந்த சிறிது நேரத்திற்கெல்லாம் பல ஆயிரக்கணக்கான மக்கள் கையில் கடப்பாரை, கோடாரி, அரிவாள், ஈட்டி முதலிய ஆயுதங்களுடன் பலத்த கோஷம் போட்டுக்கொண்டு சப்-ஜெயிலை நோக்கி வந்தார்கள். பலர் "ஜெயிலை உடை'யென்றும் "கட்டடத்திற்கு தீ வை' என்றும் பலவாறாகச் சத்தம் போட்டார்கள்.

கூட்டத்திற்குத் தலைமை வகித்து வந்தவர்களில் ஒருவரான எனது நண்பர் திருவேகம்பத்தூர் பாலபாரதி செல்லத்துரை அவர்கள் எல்லாரையும் அமைதிப்படுத்தி நான் இருந்த சிறைக்கு முன்னால் உட்கார வைத்தார்கள். அவர் சொற்படி அனைவரும் சப்-ஜெயிலுக்கு முன்னால் இருந்த மைதானத்தில் உட்கார்ந்தார்கள். பின்னர் செல்லத்துரை அவர்கள் என்னிடம் வந்து ""இப்பொழுது நாங்கள் என்ன செய்ய வேண்டும்?'' என்று கேட்டார். ""நீங்கள் என்ன முடிவுடன் வந்திருக்கிறீர்கள்'' என்று நான் திருப்பிக் கேட்டேன். ""இந்தச் சிறையை உடைத்து உங்களை விடுதலை செய்ய வந்திருக்கிறோம்'' என்று சொன்னார். ""சரி அப்படியே செய்யுங்கள்'' என்று நான் சொன்னதும், அங்கு நின்ற சிறை வார்டன் ஓடி வந்து ""இதோ சாவி இருக்கிறது'' என்று சாவியைக் கொடுத்தார். ""சாவி வேண்டியது இல்லை. உடைத்துதான் திறப்போம்'' என்று மக்கள் பெரும் முழக்கம் போட்டார்கள். அதன்படியே அவர்கள் கொண்டு வந்திருந்த கடப்பாரை, முதலிய ஆயுதங்களால் என்னை அடைத்து வைத்திருந்த சப்-ஜெயில் பூட்டை உடைத்துத் தகர்த்து கதவைத் திறந்தார்கள்.

பட்டப்பகல் 12 மணிக்கு பல ஆயிரக்கணக்கான மக்கள், சூரியன் அஸ்தமிக்காத பிரிட்டிஷ் சாம்ராச்சியத்தில் இம்மாதிரி சிறைக் கதவை உடைத்து ஓர் அரசியல் கைதியை விடுதலை செய்தது சரித்திரத்தில் அதுதான் முதல் தடவை. அந்தச் சரித்திர சம்பவத்திற்கு நான் காரணமாக இருந்தேன் என்று நினைக்கும்போது இன்றும் நான் பெருமைப்படுகிறேன், இந்தியாவில் வேறு யாருக்கும் கிடைக்காத பெருமை எளியேனுக்குக் கிடைத்தது.

மக்களுடைய மாபெரும் சுதந்திர எழுச்சியின் வேகத்தில் நடைபெற்ற சக்தி மிகுந்த இந்தத் திருவாடானை ஜெயில் உடைப்புச் சம்பவம், தமிழகத்தின் ஒரு கோடியில் ராமேஸ்வரம் அருகில் நடைபெற்றதால் இந்தியா முழுவதும் விளம்பரம் இல்லாமல் அமுங்கிவிட்டது.

தமிழ்நாட்டுத் தலைவர்களும், இச்சம்பவத்தின் பெருமையை உணரவில்லை. மதிப்பிற்குரிய ஜெயப்பிரகாஷ் நாராயணன் அவர்கள் 1942 சிறையிலிருந்து தப்பியதே பெரிய வீரச்செயல் என்று நாடுபோற்றிக் கொண்டிருக்கிறது. ஆனால் தமிழகத்தில் திருவாடானையில் மக்கள் திரண்டு சிறைச்சாலையை உடைத்து ஆங்கில ஏகாதிபத்தியம் கைது செய்து வைத்திருந்த ஒரு சுதந்திர போராட்ட வீரனை விடுதலை செய்ததை நாடு முழுமையாக அறிந்து கொள்ளவுமில்லை, பாராட்டவும் இல்லை.

விடுதலை செய்யப்பட்ட என்னைச் சுற்றி இருந்த மக்கள்,  என்னைத் தோளில் தூக்கிக் கொண்டு ஆனந்தக் கூத்தாடினார்கள். சிலபேர் நான் இருந்த சப்-ஜெயிலுக்குத் தீ வைத்தார்கள். வேறு சிலர் மாஜிஸ்ரேட் கோர்ட்டிற்கும், தாசில்தார் அலுவலகத்திற்கும் தீ வைத்தார்கள்.

அதன் பின்னர் போலீஸ் லைனை நோக்கி ஓட ஆரம்பித்தார்கள். அப்பொழுது நான் குறுக்கிட்டு ""அங்கு ஓடாதீர்கள். அவர்கள் அனைவரும் நமக்காக வேண்டிய ஒத்தாசை செய்திருக்கிறார்கள்'' என்று அவர்களிடம் சொன்னேன். சில பேர் போலீஸ்காரர்களை சும்மாவிடக் கூடாது என்றும் அவர்கள் வீடுகளுக்குத் தீ வைக்க வேண்டும் என்றும் சத்தம் போட்டார்கள். நான் அவர்களைத் தடுத்து, ""அவர்கள் அனைவரும் நமது சகோதரர்கள், நமது சுதந்திர போராட்டத்திற்கு உறுதுணையாக உள்ளவர்கள். அவர்களை ஒன்றும் செய்யவேண்டாம். இதோ அவர்களது உடைகள்'' என்று கூறி, போலீஸ்காரர்களுடைய உடைகள் அனைத்தையும் மக்களுக்குக் காண்பித்தேன். அவர்கள் அந்த உடைகளை வாங்கித் தீயில் போட்டுப் பொசுக்கித் தங்கள் கோபத்தைத் தீர்த்துக் கொண்டார்கள்.

பின்னர் கூட்டத்தினர் அனைவரும் என்னைத் தூக்கிக் கொண்டு ஊர்வலமாகச் சென்றார்கள். அப்பொழுது என்னை அடைத்து வைத்திருந்த சப்-ஜெயிலும், அதைச் சுற்றி இருந்த சர்க்கார் அலுவலகங்களும், கொழுந்து விட்டு எரிந்தன. அச் சமயம் சிலர் போலீஸ் ஸ்டேஷனுக்கு உள்ளே புகுந்து அங்கிருந்த துப்பாக்கிகளை ஒருவரும், துப்பாக்கிக் குண்டுகளை இன்னொருவரும் தூக்கிக் கொண்டு வெளியே வந்தனர். சிலர் துப்பாக்கிகளைக் கையில் ஏந்திக்கொண்டு சிப்பாய்களைப் போல் நடந்தனர்.

மக்கள் என்னை ஊர்வலமாக அழைத்துக் கொண்டு ஊருக்கு வெளியே செல்லும்போது தூரத்தில் போலீஸ் லாரிகள் வருவது தெரிந்தது. போலீஸ் லாரியைப் பார்த்து மக்கள் கோபாவேசப்பட்டார்கள். பலர் போலீஸ் லாரியை அடித்து நொறுக்க வேண்டும் என்று கூச்சல் போட்டார்கள். சிலர் போலீஸ் லாரியை நோக்கி அரிவாளை வீசிக்கொண்டு ஓடினார்கள். எல்லோரையும் சமாதானப்படுத்தி ரோடுக்கு பக்கமாக இருந்த பனங்காட்டுக்குள் இருக்கும்படி கேட்டுக் கொண்டேன். அதன்படி மக்கள் இரு கூறாகப் பிரிந்து ரோடின் இருமருங்கிலும் உள்ள பனங்காட்டுக்குள் பதுங்கிக் கொண்டார்கள்.

போலீஸ் லாரிகள் மெதுவாக ஊர்ந்து கொண்டு வந்தன. மக்கள் மறைந்திருப்பதை யூகித்தவர்கள் போல் போலீஸார் சுடுவதற்குத் தயார் நிலையில் லாரியில் நின்று கொண்டு இருந்தார்கள். ரோடு ஓரமாக மறைந்திருந்த ஒருவரை போலீஸார் பார்த்து விட்டனர். உடனே அவரை நோக்கிச் சுட்டனர். அவர்கள் சுட்ட குண்டு மேற்படி நண்பரின் தொடையை தொட்டுக் கொண்டு சென்றுவிட்டது. உடனே மேற்படி நண்பர் பெரும் கூச்சல் போட்டு ""எல்லாம் வெத்து வேட்டு வெளியே வாங்கடா'' என்று கலவரப்படுத்தி விட்டார். மறைந்திருந்த மக்கள் அனைவரும் பெரும் கூச்சல் போட்டுக் கொண்டு வெளியே வந்து போலீஸாரைத் தாக்க ஓடினார்கள். இச்சமயம் துப்பாக்கி வைத்திருந்தவர்கள் ஒரு பக்கமும், குண்டு வைத்திருந்தவர்கள் மறு பக்கமும் பிரிந்து இருந்தார்கள். அதனால் மக்களிடம் இருந்த துப்பாக்கியினால் போலீஸாரைச் சுட இயலாமல் போய்விட்டது. குண்டுகளைக் கையில் வைத்திருந்த கிராமவாசிகள் மட்டும், மேற்படி குண்டுகளை எறிந்தால் வெடிக்குமா? வெடிக்காதா? என்று தெரியாததால் அவற்றைச் சரமாரியாக வீசிக்கொண்டு இருந்தார்கள்.

இந்நிலையில் போலீஸார் தங்களைக் காத்துக் கொள்ளச் சரமாரியாகத் துப்பாக்கிப் பிரயோகம் செய்தனர். குண்டுகளை பொழிந்து தள்ளினர். என் இடது கையில் ஒரு குண்டு பாய்ந்தது. மக்களின் முன்னால் நின்ற என் மீது மேலும் குண்டுபடக்கூடாது என்று பல பேர் மாறி மாறி என் முன்னால் நின்று தங்கள் மார்பில் போலீஸாரின் குண்டுகளை ஏற்று வீர மரணம் எய்தினார்கள். இம்மாதிரி தியாகம் செய்த பெரு வரலாற்றை நான் படித்ததும் இல்லை, கேட்டதும் இல்லை. இந்த மாபெரும் தியாகத்தை இன்று நினைத்தாலும் எனது மெய் சிலிர்த்துவிடுகிறது.

பல பேர் ஒரு தேசபக்தனைக் காப்பதற்கு உயிரைக் கொடுப்பது என்பது வீரகாவியமாகப் பாட வேண்டிய அத்தியாயமாகும். எவ்விதப் பிரதி பிரயோசனமும் கருதாமல் தங்கள் இன்னுயிரை ஈந்த அந்த மாபெரும் தியாகிகளுக்கு இந்த நாடு என்றும் தலைதாழ்த்தி வணங்கக்கடமைப்பட்டுள்ளது.

இப்படிப் பல பேரைச் சுட்டு வீழ்த்தி விட்டு போலீஸார் தப்பி ஓடிவிட்டார்கள். சிலர் இறந்து வீழ்ந்ததும் பலர் உடம்பிலிருந்து இரத்தம் தெறித்ததும், அங்கு கூடியிருந்த மக்கள் ஒரு நிமிடத்தில் எங்கே சென்றார்கள் என்று தெரியாமல் ஓடிவிட்டனர்.

நானும் எனது நண்பர் இராமநாதனும் பிணக் குவியலின் மத்தியில் நின்று கொண்டு இருந்தோம். உயிர் போன பலரும், உயிர் போகும் தறுவாயில் சிலரும், கை, கால், கண் போன சிலரும் ஒரே இரத்தக் காடாக முனகலும் மரணக் கூச்சலும், நிறைந்திருந்த அந்த இடத்தில் என்ன செய்வது என்று தெரியாமல் திக்பிரமை பிடித்த 10 நிமிடத்துக்கு மேல் நின்று கொண்டு இருந்தேன். இரவு மணி 7 ஆயிற்று. வெளிச்சம் மங்கி இருள் பரவிற்று. பனங்காடு, சலசல என்ற சத்தம். மரத்தினுடன் மரங்கள் உராயும்போது ஏற்பட்ட பயங்கரமான "கீரிச், கீரிச்' என்ற ஒருவித அச்சமூட்டும் சத்தம். இந்நிலையில் நரியின் ஊளை வேறு, சுற்றிலும் இறந்து கிடந்த தேச பக்த தியாகிகளைப் பார்த்து ஒரு முறை அவர்களின் பாதாரவிந்தங்களுக்கு வணக்கம் தெரிவித்து விட்டு நகர்ந்தேன்.

இருட்டில் மேடு பள்ளம், முள், கல் இவைகளில் தட்டுத் தடுமாறி நடந்தோம். காலெல்லாம் கிழிசல் ஏற்பட்டு ரத்தம் வடிந்து கொண்டே வந்தது. கையில் குண்டு பாய்ந்த இடத்தில் ரத்தம் வழிந்து கொண்டிருந்தது. சுமார் நான்கு மைல் வந்ததும் தலை சுற்றியது. மயக்கமாக வந்தது. அதே இடத்தில் கீழே "தடால்' என்று மயக்கமாக விழுந்து படுத்து விட்டேன். என் நண்பரும் மயங்கிப் படுத்துவிட்டார். மயங்கிய நிலையில் நன்றாகத் தூங்கி விட்டோம்.

தூங்கிக் கொண்டிருந்த எங்களை சிலர் தட்டி எழுப்பினார்கள். சுமார் 10 பேர் நின்று கொண்டிருந்தார்கள். போலீஸார் என்று நினைத்து விட்டோம். ஆனால் அவர்கள் போலீஸார் அல்ல. அதற்கு முன் தினம் இறந்து போன உறவினர் ஒருவருக்குப் பால் ஊற்றி அஸ்தி எடுத்துப் போக வந்திருக்கிறார்கள். அது சரி அவர்கள் ஏன் நாங்கள் படுத்திருந்த இடத்திற்கு வந்தார்கள்? எதற்காக எங்களை எழுப்பினார்கள்?

சொன்னால் நம்பமாட்டீர்கள், நாங்கள் அவர்கள் உறவினரைப் புதைத்திருந்த இடத்திற்கு மேல்தான் அவ்வளவு நேரம் அந்த இரவு முழுதும் படுத்திருக்கின்றோம். இதை அறிந்ததும் எங்கள் மனோநிலை எப்படி
இருந்திருக்கும்?

(தொடரும்)

]]>
https://www.dinamani.com/weekly-supplements/dinamani-kathir/2018/dec/30/சொன்னால்-நம்பமாட்டீர்கள்---9-3068514.html
3064143 வார இதழ்கள் தினமணி கதிர் மைக்ரோ கதை Monday, December 24, 2018 11:22 AM +0530 ஒரு நாள் சுவருக்கும், காலண்டருக்கும், காலண்டர் மாட்டப்பட்டிருந்த ஆணிக்கும் சண்டை வந்துவிட்டது. காலண்டர் ஆணியைப் பார்த்து, "நான் இல்லையென்றால் உனக்கு இங்கே வேலையில்லை'' என்று கர்வத்துடன் கூறியது. அதற்கு ஆணி, "நான் இல்லையென்றால், நீ இங்கே தொங்கிக் கொண்டிருக்க மாட்டாய்'' என்றது. 
சுவர் குறுக்கிட்டுச் சொன்னது: "நான் இல்லையென்றால் உங்கள் இருவருக்குமே இங்கு வேலையில்லை'' என்று கூறி இகழ்ச்சியாய் சிரித்தது. 
"என்ன சத்தம் இங்கே?'' என்று கேட்டுக் கொண்டே வந்த மனிதன், சண்டையின் காரணத்தைத் தெரிந்து கொண்டு சிரித்தான். 
"நான் இல்லையென்றால் நீங்கள் யாருமே இங்கே இல்லை''  என்றான். 
ஆதினமிளகி, வீரசிகாமணி. 

]]>
https://www.dinamani.com/weekly-supplements/dinamani-kathir/2018/dec/24/மைக்ரோ-கதை-3064143.html
3064142 வார இதழ்கள் தினமணி கதிர் பேல்பூரி DIN DIN Monday, December 24, 2018 10:59 AM +0530 கண்டது
• (கோவை பீளமேடு அருகில் உள்ள காந்தி நகரில் உள்ள ஒரு வீட்டின் பெயர்)
வானிலை இல்லம்
அ.கடக்கரை, கோயம்புத்தூர் -4

• (நெய்வேலியில் ஒரு நூலகத்தில்)
பறவைகள் உண்பதில் 
செரித்தது உரமாகிறது...
செரிக்காதது மரமாகிறது.
கி.ரவிக்குமார், நெய்வேலி.

• (ஆற்காடு சாலை - காட்பாடி சாலை திருப்பம் அருகே உள்ள ஒரு கடையின் பெயர்)
எண்ணும் எழுத்தும் 3D
அரவிந்தம், வேலூர்-9

கேட்டது
• (தருமபுரி - சேலம் பேருந்தில் ஊசி விற்பவரும், பயணியும்)
"சார்... 16 ஊசி பத்து ரூபா சார்... நோட் புக் தைக்கலாம்... துணி தைக்கலாம்.... செருப்பு தைக்கலாம்''
"ஏம்ப்பா எவ்வளவு ரூபாயாயிருந்தாலும் பரவாயில்லை.... என் பெண்டாட்டி வாயைத் தைக்கிற மாதிரி ஊசி இருக்கா?''
ஆ.சுகந்தன், கம்பைநல்லூர்.

• (சென்னை கே.கே.நகரில் ஒரு வீட்டில் அம்மாவும், மகனும்)
"தூங்கி எழுந்து எம்புட்டு நேரமாச்சு. போய் பல்லை விளக்கிட்டு வா. டிபன் சாப்பிடலாம்''
"போம்மா... ஆடு மாடு எல்லாம் பல்லா விளக்குது? என்னைய மட்டும் பல்லு விளக்கச் சொல்றே?''
"அது சரி... அப்ப நான் செஞ்சு வச்சிருக்கிற பூரியைச் சாப்பிடாதே... வீட்டுக்கு வெளியே நிக்கிற பூவரச மர இலையைத் தின்னுக்கோ''
மல்லிகா அன்பழகன், சென்னை-78

யோசிக்கிறாங்கப்பா!
நாய்கள் நன்றியுள்ளவையாம்...
சொல்கிறார்கள்
நன்றியில்லாதவர்கள்.
மு.பெரியசாமி, விட்டுக்கட்டி.

எஸ்எம்எஸ்
டீன் ஏஜைத் தாண்டும்போதும்...
ட்ரெயினேஜைத் தாண்டும்போதும்...
ரொம்ப உஷாரா இருக்கணும்.
இல்லைன்னா வாழ்க்கை நாசம் ஆயிடும்.
சு.பொருநை பாலு, நெல்லை.

அப்படீங்களா!
இணையத்தின் பயன்பாடு அதிகரித்துவிட்ட இக்காலத்தில் பாஸ்வேர்டைச் சொன்ன பிறகுதான் இனிமேல் மனிதர்கள் குனிவார்கள்; நிமிர்வார்கள் போலிருக்கிறது. அந்த அளவுக்கு முகநூல், சுட்டுரை, இ மெயில் ஆகியவற்றுக்கு மட்டுமல்ல, நெட் பேங்கிங் பக்கத்திற்குள்ளும் நுழைய பாஸ்வேர்ட் அவசியம். ஏன் செல்போனைப் பயன்படுத்தவும் பாஸ்வேர்டைப் பயன்படுத்துபவர்கள் இருக்கிறார்கள். ஆனால், பாஸ்வேர்டைத் தேர்ந்தெடுப்பதில் நிறையச் சோம்பேறித்தனம் இருக்கிறது. 
இதனால் எல்லாரும் மிக எளிதான பாஸ்வேர்டுகளையே தேர்ந்தெடுக்கிறார்கள். இதனால் இணையத்தில் திருடுபவர்களுக்கு அப்படிப்பட்ட பாஸ்வேர்டுகளைக் கண்டுபிடிப்பது எளிதாக இருக்கிறது. 
அமெரிக்காவின் கலிஃபோர்னியாவில் உள்ள சான்டா கிளாரா மாகாணத்தில் செயல்படும் "ஸ்பிளாஸ் டேட்டா' என்ற நிறுவனம், உலகிலேயே மிக மோசமான பாஸ்வேர்ட்களாகச் சிலவற்றைச் சொல்கிறது. இப்படிப்பட்ட பாஸ்வேர்டுகளைப் பயன்படுத்தினால், இணையத் திருடர்கள் எளிதில் உங்கள் நெட் பேங்கிங் பக்கங்களையோ, முகநூல், சுட்டுரை பக்கங்களையோ, தனிப்பட்ட இணையதளப் பக்கங்களையோ எளிதில் திறந்து பயன்படுத்திக் கொள்ள முடியும். 
என்.ஜே., சென்னை-116.


 

]]>
https://www.dinamani.com/weekly-supplements/dinamani-kathir/2018/dec/24/பேல்பூரி-3064142.html
3064141 வார இதழ்கள் தினமணி கதிர் சொன்னால் நம்பமாட்டீர்கள்!  8 சின்ன அண்ணாமலை DIN DIN Monday, December 24, 2018 10:55 AM +0530 தேவகோட்டையிலும் அதன் சுற்றுப்புறத்திலும் 144 தடை உத்தரவுகள் பிறப்பிக்கப்பட்டன. தடை உத்தரவு பிறப்பிக்கப்பட்ட அன்று மாலை ஜவஹர் மைதானத்தில் ஒரு மாபெரும் பொதுக்கூட்டம் கூடியிருந்தது. தடை உத்தரவை நான் மீறப்போவதாக அறிவித்திருந்தபடியால் ஊரெல்லாம் ஒரே பரபரப்புடன் கூடியிருந்தது. போலீஸாருக்கு எதிராகக் கொரில்லா போர் செய்வதற்கு மக்கள் தயாராக வந்திருந்தனர். சிலர் அரிவாள் வைத்திருந்தனர். பலர் சுலபமாகக் கொண்டு வரக் கூடிய கற்களை கொண்டு வந்திருந்தனர். இன்னும் சிலர் நல்ல வகையான நெற்றி மட்டக் கம்புகளில் காங்கிரஸ் கொடிகளை மாட்டிக் கொண்டு வந்திருந்தனர். கொடி சொருகி இருக்கும் இடம் "ஈட்டி முனை' என்றும் ரகசியமாகச் சொல்லிக் கொண்டார்கள். இப்படி மக்கள் போலீஸைத் தாக்க தயாராக இருப்பதை அறிந்து நான் வேதனை அடைந்தேன். காந்தியம் அதுவல்ல. எனக்குத் தெரியும். எனினும் அந்தச் சூழ்நிலையில் நான் என்ன செய்வது என்று தெரியாமல் திகைத்தேன். எனக்கு இள வயது. ஆகவே 144 உத்தரவை மீறாமல் கூட்டத்தைக் கலைத்தால் மக்கள் என்னைக் "கோழை' என்றும் "துரோகி' என்றும் காரி உமிழ்வார்கள். இப்படி நான் நிலை தடுமாறிக் கொண்டு மேடையில் நிற்கையில் "ஜே ஜே' என்ற மக்கள் ஆரவாரத்தின் மத்தியில் போலீஸ் இன்ஸ்பெக்டர் திரு. வீராசாமி ஒரு போலீஸ் படையுடன் வந்து மேடைக்கு முன் அணிவகுத்து நின்றார்.
 மக்கள் அவரைச் சுட்டெரித்து விடுவது போல் பார்த்தார்கள். சிலர் "போலீஸ் ஒழிக' என்றும் "காட்டிக் கொடுக்கும் கங்காணிகள் ஒழிக' என்றும் "துரோகிகள் ஒழிக' என்றும் முழக்கம் செய்தார்கள். நான் மக்களை அமைதியாக இருக்கும்படி கேட்டுக் கொண்டேன். மக்களோ ஒரே குரலாக, "தலைவர்களை விடுதலை செய்'', ""போலீúஸ திரும்பிப் போ'' என்று கர்ஜனை செய்தார்கள். இந்நிலையில் இன்ஸ்பெக்டர் திரு. வீராசாமி அவர்கள் மேடைமீது வந்து என்னிடம் 144 தடை உத்தரவை நீட்டினார்.
 மக்கள் முழக்கத்தில் நான் ஆவேசத்துடனிருந்தேன். நீட்டிய 144 தடை உத்தரவை இன்ஸ்பெக்டர் கையிலிருந்து பிடுங்கி, "ஆங்கில அரசாங்கத்தின் 144 தடை உத்தரவுக்கு இந்திய மக்களாகிய நாங்கள் கொடுக்கும் மரியாதை இதுதான்'' என்று கூறி சுக்கு நூறாகக் கிழித்து என் காலில் போட்டு மிதித்தேன். உடனே மக்கள் கொதித்தெழுந்து நாற்புறமிருந்து கற்களை வீசத் தொடங்கினர். நான் மைக் முன் வந்து, "மகாத்மா காந்தி மீது ஆணை, யாரும் போலீஸாரைத் தாக்கக் கூடாது'' என்றேன்.
 கூட்டத்தினர் சிறிது அடங்கினர். அச்சமயம் பார்த்து இன்ஸ்பெக்டர் வீராசாமி பின்வாங்கி, தன் ஜவான்களுடன் வண்டியில் ஏறி ஓடிவிட்டார், மக்கள் வண்டியை விரட்டிக் கொண்டே சென்றார்கள்.
 அக்காட்சி எனக்கு மக்கள் வெள்ளைக்காரன் ஆட்சியை விரட்டிக் கொண்டு ஓடுவதுபோல் தோன்றியது.
 திருவாடானைச் சிறை
 1942 ஆகஸ்ட் மாதம் 8-ஆம் தேதி அன்று இரவு 12 மணிக்கு போலீஸார் என்னைக் கைது செய்தனர். பகல் நேரத்தில் எப்போதும் பெரும் கூட்டம் என்னைச் சூழ்ந்து கொண்டு இருந்தபடியால் ஒரு வார காலமாக முயற்சி செய்தும் கைது செய்தால் பெரும் கலகம் ஏற்படும் என்று போலீஸார் கைது செய்வதை தள்ளிப் போட்டுக் கொண்டு வந்தனர்.
 ஆனால் அன்று 144 தடை உத்தரவை மக்கள் முன்னிலையில் நான் கிழித்தெறிந்ததும் போலீஸ் இன்ஸ்பெக்டரை மக்கள் விரட்டி அடித்ததாலும் அதற்குமேல் என்னை வெளியில் வைத்திருப்பது பெருத்த அபாயம் என்று கருதி, போலீஸார் அன்றிரவே கைது செய்வது என்று முடிவு செய்துவிட்டனர். இரவில் அதிகம் பேர் என்னைச் சுற்றி இருக்கமாட்டார்கள், சில பேர்தான் இருப்பார்கள். இருப்பவர்களை சமாளித்துக் கொள்ளலாம் என்று போலீஸார் எண்ணி அன்றிரவு என்னைக் கைது செய்வதற்குச் சுமார் பத்து லாரி ரிஸர்வ் போலீஸைக் கொண்டு வந்து நான் தங்கி இருந்த "ஐக்கிய சங்கம்' என்ற கட்டடத்தைச் சுற்றி வளைத்து நிறுத்திக்கொண்டு உள்ளே படபடவென்று குதித்தார்கள்.
 அப்பொழுது இரவு மணி 12 இருக்கலாம். சப்தம் கேட்டதும் திடுக்கிட்டு விழித்துப் பார்த்தபோது என்னைச் சுற்றிப் பல ரிஸர்வ் போலீஸ் நின்றது தெரிந்தது. "உங்களைக் கைது செய்திருக்கிறோம்'' என்று போலீஸார் சொன்னார்கள். இன்ஸ்பெக்டர் என் கையில் விலங்கை மாட்டி, பல நூற்றுக்கணக்கான ரிசர்வ் போலீஸார் சூழ "இராமவிலாஸ்' பஸ் ஒன்றில் என்னை ஏற்றிக் கொண்டு முன்னும், பின்னும் பல போலீஸ் வண்டிகள் தொடர தேவகோட்டையில் இருந்து 22 மைல் தொலைவில் உள்ள திருவாடானை என்ற ஊருக்குக் கொண்டு சென்றார்கள்.
 திருவாடானையில் உள்ள சப்-ஜெயிலில் என்னைக் கொண்டு போய் அடைத்தார்கள். மறுநாள் காலையில் என்னைக் கைது செய்த விஷயம் ஊர் முழுவதும் பரவி மக்கள் கும்பல் கும்பலாகச் சேர்ந்து ஊரே ஒன்றாகத் திரண்டு என்னை விடுதலை செய்யும்படி போலீஸ் ஸ்டேஷனுக்கு முன்னால் சென்று ஆர்ப்பாட்டம் செய்திருக்கிறார்கள். கடைகள் அனைத்தையும் மூடும்படியும் செய்து போலீஸைத் திக்கு முக்காட வைத்துவிட்டார்கள்.
 என்னை ஏற்றிக் கொண்டு சென்ற இராமவிலாஸ் பஸ்ஸை சூழ்ந்துகொண்டு தீ வைத்துக் கொளுத்தி மேற்படி பஸ்ஸை சாம்பலாக்கி விட்டார்கள். அதன் பின்னர் தேவகோட்டையில் உள்ள சப்-கோர்ட்டை நடத்தக்கூடாது என்று மக்கள் கோஷம் போட்டு இருக்கிறார்கள். அதையும் மீறி கோர்ட்டை நடத்தியதால் மக்கள் கோபம் கொண்டு பக்கத்திலிருந்த பெட்ரோல் பங்கில் இருந்து பெட்ரோலைப் பிடித்து கோர்ட் கட்டடத்தின்மீது ஊற்றி தீ வைத்துவிட்டார்கள். போலீஸ் துப்பாக்கிப் பிரயோகம் செய்தும் கூட்டம் கலையவில்லை.
 பல பேர் துப்பாக்கிப் பிரயோகத்தில் இறந்தார்கள். அங்கிருந்த கூட்டம் கோபங்கொண்டு புறப்பட்டு திருவாடானையை நோக்கி வந்தது. திருவாடானை வரும்வழியில் உள்ள கிராமங்களில் எல்லாம் இளைஞர்களும், பெரியோர்களும், உற்சாகமாக இக்கூட்டத்துடன் சேர்ந்து அவர்களும் திருவாடானையை நோக்கி வந்தார்கள்.
 சுமார் 20 ஆயிரத்துக்கு மேற்பட்ட மக்கள் ஒன்று சேர்ந்து திருவாடானை சப்-ஜெயிலுக்கு என்னை விடுதலை செய்ய வந்து கொண்டு இருக்கிறார்கள் என்று கேள்விப்பட்டதும் சப்-ஜெயிலைச் சுற்றி இருந்த சர்க்கார் அலுவலகங்களான மாஜிஸ்ட்ரேட் கோர்ட், தாசில்தார் காரியாலயம், கஜானா அதிகாரி, போலீஸ் ஸ்டேஷனில் இருந்த சப்-இன்ஸ்பெக்டர், போலீஸ் கான்ஸ்டபிள்கள், அனைவரும் என்னை அடைத்து வைத்திருந்த சப்-ஜெயிலுக்கு முன்பு வந்தார்கள். எல்லோரும் என்னிடம் என்ன செய்யலாம் என்று ஆலோசனை கேட்டார்கள்.
 நான் சொன்னேன்: "20 ஆயிரத்துக்கு மேற்பட்ட ஜனங்கள் வருவதால் அவர்களைத் தடுத்து நிறுத்துவதோ, வன்முறையை உபயோகிப்பதோ இப்பொழுது உள்ள சூழ்நிலைக்குச் சரியாக இருக்காது. இது சுதந்திரப் போராட்ட வேகம். மக்களிடம் ஏற்பட்டிருக்கும் உணர்ச்சியை மதித்து அவர்களுக்கு வழிவிட்டு நில்லுங்கள்; அனைவரும் ஒதுங்கிக் கொள்வதுதான் இந்த நேரத்தில் செய்யக்கூடிய புத்திசாலித்தனமான காரியம்'' என்று அவர்களுக்கு ஆலோசனை கூறினேன்.
 அவர்கள் சொன்னார்கள்: ""நாங்களும் எங்கள் குடும்பமும் குழந்தை குட்டிகள் அனைவரும் பக்கத்திலுள்ள லையனில்தான் குடியிருக்கிறோம், வருகின்ற கூட்டம் எங்களையும் எங்கள் குடும்பத்தாரையும் கோபப்பட்டுத் தாக்கினால் என்ன செய்வது?'' என்று கேட்டார்கள்.
 "அதைப்பற்றி நீங்கள் கவலைப்பட வேண்டாம். அதற்கு நான் பொறுப்பு'' என்று சொன்னேன். அப்போது அங்கிருந்த சப்-இன்ஸ்பெக்டரின் பெயர் சூரப்புலி சுந்தராஜ் ஐயங்கார் என்பது ஆகும். எனது ஆலோசனையை ஏற்றுக்கொண்டு நான் சொன்னபடி போலீஸார் தங்கள் உடைகள் அனைத்தையும் கழற்றி நான் இருந்த சப்-ஜெயிலுக்கு முன்னால் போட்டார்கள். எல்லோரையும் அவரவர் வீட்டுக்குப் போய் நிம்மதியாக இருக்கும்படி கூறினேன். அதன்படி அவர்கள் அனைவரும் செய்தார்கள்.
 (தொடரும்)
 

]]>
https://www.dinamani.com/weekly-supplements/dinamani-kathir/2018/dec/24/சொன்னால்-நம்பமாட்டீர்கள்--8-சின்ன-அண்ணாமலை-3064141.html
3064140 வார இதழ்கள் தினமணி கதிர் வாயுவின் அளவைக் குறைக்க! DIN DIN Monday, December 24, 2018 10:50 AM +0530 என் வயது 70. சர்க்கரை நோய் உள்ளது. இன்சுலின் போட்டுக் கொள்கிறேன். அக்குபஞ்சர் சிகிச்சையும் காந்த சிகிச்சையும் நடைபெறுகிறது. வாயுவின் சீற்றமே பல உபாதைகளுக்கு காரணம் என்று இயற்கை மருத்துவர் கூறுகிறார். உடலில் வாயுவின் அளவை குறைக்க என்னென்ன செய்ய வேண்டும்.?
 - ரா.ராஜமோகன், செம்பாக்கம், சென்னை.
 வாயு எனும் தோஷமானது பாஞ்சபௌதிக சித்தாந்தத்தின்படி வாயு மற்றும் ஆகாயத்தின் ஆதிக்கத்தை நிறைய உள்ளடக்கியதாகவும் பெருங்குடல், இடுப்பு, தொடை எலும்புகள், காது, பிற எலும்புப் பகுதிகள், தோல் ஆகிய உடல் பகுதிகளில் அதிக சஞ்சார விசேஷத்தைக் கொண்டதாகவும் இருக்கிறது. இதனால் குடல் வறட்சி அடைவதும் குடலின் அங்க அசைவுகளை நெய்ப்பின்றி வறட்சியுடன் அசைப்பதால் மலச்சிக்கலானது எளிதில் ஏற்பட்டுவிடுகிறது. இனிப்புச் சுவையிலுள்ள நிலம் மற்றும் நீரும், புளிப்புச் சுவையிலுள்ள நெருப்பும், நிலமும், உப்புச் சுவையிலுள்ள நீரும், நெருப்பும், வாயுவினுடைய ஆதிக்ய பூதங்களாகிய வாயு மற்றும் ஆகாயத்திற்கு எதிராக இருப்பதால் இம்மூன்று சுவைகளும் போட்டி போட்டுக்கொண்டு வாயுவை கட்டுப்படுத்துகின்றன. இதனால் தான் நம் முன்னோர் உணவிற்குப் பிறகு புளித்த மோரில் சிறிது உப்பு கலந்து சாப்பிட்டு குடலில் வாயு சேராதவாறு பார்த்துக் கொண்டனர்.
 ஆயுர்வேத மூலிகைத் தைலங்களாகிய மஹா நாராயண தைலம், மஹாமாஷ தைலம், பலா அஷ்வகந்தாதி தைலம் ஆகியவற்றில் ஒன்றிரண்டைச் சேர்த்து சூடாக்கி உடலில் தேய்த்து அரை முக்கால் மணி நேரம் ஊற வைத்து, வெந்நீரில் குளிக்க பரிந்துரை செய்கிறது. இதனால் தோலிலுள்ள வாயுவானது சீற்றமடையாமல், தோல் சுருக்கங்கள் ஏற்படாமல், எண்ணெய்ப் பசையை தோலில் தக்க வைக்கிறது. தோலினடியில் வந்தடையும் நாடி நரம்புகள் இதனால் வலுப்பட்டு தோல்சார்ந்த உபாதைகள் ஏதும் ஏற்படுவதில்லை.
 உடலெங்கும் எண்ணெய்யைத் தடவி வியர்வை ஏற்படும் வகையில் மூலிகை இலை ஒத்தடம், மூலிகை நீராவிக் குளியல் போன்றவற்றைச் செய்வதன் மூலமாக உடல் உட்புறப் பகுதிகளில் அடைந்து கிடக்கக் கூடிய தேவையற்ற கொழுப்பு, அழுக்குகள், அடப்பாசம் போன்றவை நெகிழ்ந்து உடல் வெளிப்புற ஓட்டைகளின் வழியாக வெளியேறுவதால் உடல் ஓர் அப்பழுக்கற்ற தன்மையை அடைகிறது.
 சுமார் 150 மி.லி. சூடான பாலுடன் 10 - 15 மி.லி. சுத்தமான விளக்கெண்ணெய் கலந்து காலையில் வெறும் வயிற்றில் வாரம் இரண்டு முறை பருகுவதால் குடல் வாயு, மலச்சிக்கல் போன்றவை நீங்கி வயோதிகத்தில் ஏற்படும் பல வாயு உபாதைகளைத் தவிர்க்கிறது.
 உணவுப் பொருட்களை வெது வெதுப்பாக சாப்பிடுவதால் வாயுவினால் ஏற்படும் சீற்றமானது தவிர்க்கப்படுகிறது. இளஞ்சூடாக்கிய நெய்ப்புள்ள மூலிகை எண்ணெய்களை ஆசன வாய் வழியாக செலுத்தி மலப்பை மற்றும் பெருங்குடல் பகுதிகளை நெய்ப்புறச் செய்வதால் வாயுவின் சீற்றமானது ஒருபொழுதும் ஏற்படுவதில்லை.
 பசித்தீயை தூண்டுவதும் தன்னைச் சுற்றியுள்ள செரிமானமாகாத உணவுப்பொருட்களை செரிக்க வைப்பதுமாகிய மூலிகை நெய்ப்பொருட்களை கொண்டு சூடான சாதத்துடன் சாப்பிடுவதால் குடல் மற்றும் தசை நார்களைச் சார்ந்த வாயு உபாதைகளை நம்மால் பெருமளவில் தவிர்க்க இயலும். இந்துகாந்தம் க்ருதம், தாடிமாதி க்ருதம், விதார்யாதி க்ருதம் போன்ற நெய் மருந்துகள் இந்த வகையைச் சேர்ந்தவை. பெண்களுக்கு ஏற்படும் கருப்பை சார்ந்த உபாதைகளும், ஆண்களுக்கு ஏற்படும் புரஸ்தோல க்ரந்தி வீக்கமும் குணமடைய சுகுமாரம் எனும் நெய் நன்கு பயன்படுகிறது. வாயு குளிகை, தசமூலாரிஷ்டம், பத்ரதார்வாதி கஷாயம், அஷ்டசூரணம், தசமூலரசாயனம் எனும் லேஹ்யம் போன்றவை வாயு உபாதைகளில் தோல்வியே அறியாதவை.
 (தொடரும்)
 பேராசிரியர் எஸ். சுவாமிநாதன்,
 ஸ்ரீஜயேந்திர சரஸ்வதி ஆயுர்வேதக் கல்லூரி,
 நசரத்பேட்டை - 600 123 (பூந்தமல்லி அருகே)
 செல் : 94444 41771
 

]]>
https://www.dinamani.com/weekly-supplements/dinamani-kathir/2018/dec/24/வாயுவின்-அளவைக்-குறைக்க-3064140.html
3064138 வார இதழ்கள் தினமணி கதிர் சிரி... சிரி... சிரி...  DIN DIN Monday, December 24, 2018 10:47 AM +0530 • சார் ஸ்கூல்ல 5 நிமிஷம் தியானம் பண்ணறதை அரை மணி நேரமா மாத்தணும் சார்''
-தியானம் பண்றதுல அவ்வளவு
விருப்பமாடா உனக்கு?''
-இல்ல சார்... இப்ப அஞ்சு நிமிஷம் தூங்குறதை அரை மணி நேரம் தூங்கலாமே''
தீ.அசோகன், சென்னை-19.

• என் மனைவி எப்பவும் குடும்பம்
குடும்பம்ன்னுதான் இருப்பா?''
-அட... நல்ல விஷயம்தானே? 
குடும்பத்து மேலே அவ்வளவு அக்கறையா?''
-அட... நீ வேறே... "குடும்பம்' சீரியல்ல
மூழ்கிக் கிடக்கிறாள்ன்னு சொல்ல வந்தேன்''
எஸ்.சடையப்பன், காளனம்பட்டி.

• "எதிர்காலம் என் கையில்ன்னு ரொம்ப
தன்னம்பிக்கையோட அடிக்கடி சொல்றீங்களே... எதை வச்சு அப்படிச் சொல்றீங்க?''
"அடுத்த வருஷ காலண்டர் என் கையில் இருக்கே... அதை வச்சுத்தான்''
எஸ்.வேல் அரவிந்த், திண்டுக்கல்.
 

]]>
https://www.dinamani.com/weekly-supplements/dinamani-kathir/2018/dec/24/சிரி-சிரி-சிரி-3064138.html
3064137 வார இதழ்கள் தினமணி கதிர் திரைக் கதிர் DIN DIN Monday, December 24, 2018 10:44 AM +0530 • கன்னட நடிகரும், தயாரிப்பாளருமான நவீன் என்பவரை காதல் திருமணம் செய்து கொண்ட நடிகை பாவனா சினிமாவிலிருந்து ஒதுங்கினார். கணவருடன் பெங்களூருவில் வசித்து வந்த பாவனா, கடந்த சில மாதங்களாக சினிமாவில் நடிக்காமல் ஒதுங்கியிருந்தார். தற்போது அவர் மீண்டும் நடிக்க வந்துள்ளார். தமிழில் விஜய் சேதுபதி, த்ரிஷா நடிப்பில் வெளியான "96' படம் கன்னடத்தில் "99' என்ற தலைப்பில் ரீமேக் ஆகிறது. இதில் த்ரிஷா வேடத்தில் நடிக்க ஒப்பந்தம் செய்யப்பட்டுள்ள பாவனா பேசும் போது... ""பொதுவாக ரீமேக் படங்களில் நடிக்க நான் விரும்புவதில்லை. காரணம், ஏற்கெனவே நடித்த நடிகையுடன் இப்போது என்னையும் சேர்த்து ஒப்பிட்டு பேசுவார்கள். ஆனால், "96' படத்தின் கதை அனைத்து மொழிப் படங்களுக்கும் உரிய கதை. அதனால்தான் த்ரிஷா வேடத்தில் நடிக்க சம்மதித்தேன். அடுத்த மாதம் படப்பிடிப்பு தொடங்குகிறது'' என்றார். விஜய் சேதுபதி கதாபாத்திரத்தில் கன்னட நடிகர் கணேஷ் நடிக்கிறார். பிரீத்தம் குப்பி இயக்குகிறார். மார்ச் மாத வெளியீடாக படம் திரைக்கு வரவுள்ளது.

• "மீடூ' இயக்கம் திரையுலகம் மற்றும் அரசியல் பிரபலங்கள் இடையே பெரும் சலசலப்பை ஏற்படுத்தியது. அர்ஜுன் மீது நடிகை ஸ்ருதி ஹரிஹரன் பாலியல் குற்றச்சாட்டுகளை கூறியிருந்தார். இதையடுத்து அவர் மீது அர்ஜுன் வழக்கு தொடுத்தார். ஸ்ருதியும் காவல் துறையில் புகார் அளித்தார். இந்நிலையில் மீ டூ புகாருக்கு பிறகு தனக்கு பட வாய்ப்புகள் தர இயக்குநர்களும் தயாரிப்பாளர்களும் பின்வாங்குவதாக ஸ்ருதி தெரிவித்துள்ளார். இது குறித்து ஸ்ருதி ஹரிஹரன் பேசும் போது... "மீ டூ புகார் கூறுவதற்கு முன் எனக்கு வாரத்தில் 2 பட வாய்ப்புகள் கன்னட சினிமாவிலிருந்து வரும். இப்போது வருவதில்லை. காரணம், மீ டூ புகார் கூறியதுதான். என்னை தங்களது படத்திற்குத் தேர்வு செய்ய இயக்குநர்கள், தயாரிப்பாளர்கள் தயங்குகிறார்கள். கன்னட சினிமா என்றில்லை, தென்னிந்திய சினிமாவிலும் இதுதான் நிலை. இது எனக்கு கவலை அளித்தாலும் சோர்ந்துவிடவில்லை. தொடர்ந்து போராடிக் கொண்டிருக்கிறேன். இந்த நிலைக்கு நான் வந்ததற்கும் திரையுலகில் நீடிப்பதற்கும் எனது வேலையில் நேர்மையாக இருந்ததே காரணம். நான் ஜெயிப்பேன் என்று தன்னம்பிக்கை இருக்கிறது'' இவ்வாறு அவர் கூறினார்.

• "காலா' படத்தில் ரஜினியின் காதலியாக நடித்தவர் பாலிவுட் நடிகை ஹுமா குரோஷி. இந்நிலையில் டோலிவுட் நடிகர் வெங்கடேஷ், நாக சைதன்யா இணைந்து நடிக்கும் புதிய தெலுங்கு படமொன்றில் நடிக்க ஹுமாவுக்கு வாய்ப்பு தேடி வந்தது. அப்பட இயக்குநர் கேஎஸ்.ரவிந்திரா, வெங்கடேஷ் ஜோடியாக நடிக்கும்படி குரோஷியிடம் கேட்டார். அதற்கு அவரும் சம்மதித்ததாகக் கூறப்படுகிறது. நாக சைதன்யா ஜோடியாக ரகுல் ப்ரீத் நடிக்க உள்ளார். விரைவில் படப்பிடிப்பு தொடங்க திட்டமிடப்பட்டிருந்த நிலையில் பட குழுவுக்கு அதிர்ச்சி தரும் வகையில் இப்படத்தில் நடிக்க விருப்பமில்லை என்று ஹுமா தெரிவித்திருக்கிறாராம். ஆரம்பத்தில் நடிப்பதற்கு ஓ.கே சொன்ன ஹுமா திடீரென்று நடிக்க மறுப்பது ஏன் என்பது பற்றி காரணம் தெரிவிக்கவில்லை. இதையடுத்து அவருக்கு பதிலாக ஸ்ரேயாவை நடிக்க வைக்க இயக்குநர் எண்ணி உள்ளார். இதுபற்றி பட தரப்பு ஸ்ரேயாவிடம் பேசியபோது அவர் நடிக்க பச்சை கொடி காட்டியிருக்கிறாராம். 

• "விஸ்வாசம்' படத்துக்குப் பின் "சதுரங்க வேட்டை', "தீரன் அதிகாரம் ஒன்று' படங்களை இயக்கிய எச்.வினோத் இயக்கத்தில் நடித்து வருகிறார் அஜித். இன்னும் பெயரிடப்படாத இந்தப் படம், தற்போதைக்கு "தல 59' என்று குறிப்பிடப்படுகிறது. மறைந்த நடிகை ஸ்ரீதேவியின் கணவர் போனி கபூர் இந்தப் படத்தைத் தயாரிக்கிறார். அமிதாப் பச்சன் நடித்து பாலிவுட்டில் வெளியான "பிங்க்' ஹிந்திப் படத்தின் ரீமேக் தான் இந்தப் படம் என அதிகாரபூர்வமாக அறிவிக்கப்பட்டுள்ளது. படப்பிடிப்புக்கான முதற்கட்ட வேலைகள் தொடங்கியுள்ளன. கடந்த வாரம் சென்னையில் படத்துக்கான பூஜை போடப்பட்டுள்ளது. இதில் அஜித் கலந்து கொள்ளவில்லை. இதையடுத்து படத்தின் தொழில்நுட்பக் கலைஞர்கள் மற்றும் இதர நடிகர்களின் தேர்வு நடந்து வருகிறது. இந்தப் படத்துக்கு ஏ.ஆர்.ரஹ்மான் இசையமைக்கவுள்ளதாக பேசப்பட்டு வந்தது. இது உறுதி செய்யப்படாத நிலையில் தற்போது யுவன் ஷங்கர்ராஜா இசையமைக்கிறார். இதை படக்குழுவினர் உறுதி செய்துள்ளனர். அடுத்த கட்டமாக படத்தின் கதாநாயகிகள் தேர்வு நடந்து வருகிறது. கதைப்படி இதில் மூன்று கதாநாயகிகள் என்று சொல்லப்படுகிறது. இதில் ஒருவராக கல்யாணி ப்ரியதர்ஷன் நடிக்கிறார் எனத் தகவல் கிடைத்துள்ளது. பிரபல இயக்குநர் ப்ரியதர்ஷன் மகள்தான் கல்யாணி. மற்ற நடிகர் - நடிகைகள் பற்றிய விவரம் இன்னும் தெரியவில்லை. "ஹலோ' என்ற தெலுங்குப் படத்தின் மூலம் சினிமாவில் அறிமுகமான கல்யாணி, தற்போது மலையாளம் மற்றும் தெலுங்குப் படங்களில் நடித்து வருகிறார். அத்துடன், துல்கர் சல்மான் ஜோடியாக "வான்' என்ற தமிழ்ப் படத்திலும் நடிக்க ஒப்பந்தமாகியுள்ளார் கல்யாணி ப்ரியதர்ஷன்.

• சீனு ராமசாமி இயக்கத்தில் வெளிவந்த "தென்மேற்கு பருவக்காற்று' படத்தின் மூலம் தமிழ் சினிமாவில் அறிமுகமானவர் விஜய் சேதுபதி. அதன் பின் தனக்குக் கிடைத்த வாய்ப்புகளைச் சரியாகப் பயன்படுத்திக் கொண்ட அவர், தனக்கென தனி இடம் பிடித்து முன்னணி இடத்தில் திகழ்கிறார். தற்போது வெளியாகியுள்ள "சீதக்காதி' அவருக்கு 25-ஆவது படமாகும். இந்நிலையில் சீனுராமசாமியுடன் நான்காவது முறையாக இணைகிறார் விஜய்சேதுபதி. இரண்டாவது முறையாக இணைந்த "இடம் பொருள் ஏவல்' இன்னும் வெளியாகாத நிலையில் மூன்றாவதாக இணைந்த "தர்மதுரை' பெரும் வெற்றி பெற்றது. தற்போது நான்காவது முறையாக இணைந்துள்ள இப்படத்துக்கு "மாமனிதன்' எனப் பெயரிடப்பட்டுள்ளது. தேனி மாவட்டப் பகுதிகளில் படப்பிடிப்பு தொடங்கியுள்ளது. யுவன்ஷங்கர் ராஜாவின் ஓய்எஸ்ஆர் பிலிம்ஸ் நிறுவனம் இப்படத்தை தயாரிக்கிறார். இளையராஜா - யுவன் ஷங்கர்ராஜா இருவரும் முதன் முறையாக இணைந்து இப்படத்துக்கு இசையமைக்கின்றனர். விஜய் சேதுபதிக்கு ஜோடியாக காயத்ரி நடிக்கிறார். மற்ற நடிகர், நடிகைகள் குறித்த அறிவிப்பு இன்னும் வெளியாகவில்லை. சுகுமார் இப்படத்துக்கு ஒளிப்பதிவு செய்கிறார். 
ஜி.அசோக்
 

]]>
https://www.dinamani.com/weekly-supplements/dinamani-kathir/2018/dec/24/திரைக்-கதிர்-3064137.html
3064136 வார இதழ்கள் தினமணி கதிர் போட் மெயில் சாயபு DIN DIN Monday, December 24, 2018 10:42 AM +0530 "டேய் பையா, போட்மெயில் சாயபு தலை தெரியுதான்னு கொஞ்சம் பாரு'' -
ஏதோ ஒரு முக்கிய தபாலுக்காகக் காத்திருந்த என் அப்பா உத்தரவிட்ட அடுத்த விநாடியே அரை டிராயரை இடுப்புவரை ஏற்றி, எனது இடுப்பை விட்டு அது நழுவிவிடாமல் இருக்க அரைஞாண் கயிற்றால் பந்தோபஸ்து செய்து கொண்டு, ரயில் எஞ்சின் அல்லது கார் எழுப்பும் ஓசையை எனது அப்போதைய மனோநிலைக்கு ஏற்ப ஒலித்துக் கொண்டு, எங்களின் பெருமாள் கோயில் தெருவை நிமிடத்தில் கடந்து ஏரிக்கரைத் தெருவை எட்டி விடுவேன்.
கனத்த துணிப்பைகளில் நிரம்பி வழியும் தபால்களுடனும், தபால்காரர்களுக்கேயுரிய சீருடையுடனும், சற்றே நரைத்த கூர்மையான தாடி மற்றும் தடித்த மூக்குக்கண்ணாடியுடனும் சைக்கிளைத் தள்ளிக் கொண்டுவரும் ஐம்பது வயது தபால்கார சாயபுவிடம் சென்று, ""நீங்க எப்போ வருவீங்கன்னு எங்கப்பா கேட்டாரு சாயபு'' என்பேன்.
"அரே சோட்டா, நீ போய்க்கிட்டே இரு, இன்னும் அரை மணியிலே உங்க வீட்டுல இருப்பேன். உங்க அம்மா ,அப்பா கிட்டே சொல்லி எனக்குப் பலகாரம், வெத்தில, பாக்கு, தட்சிணை எல்லாம் தயார் செய்யச் சொல்லு, உன்னைப் பிள்ளை கேட்டு உன் மாமியார் வூட்லேர்ந்து மஞ்சள் தடவின கடுதாசி கொண்டாந்திருக்கேன்னு சொல்லு, போ, ஜல்தி வர்றேன் சாயபுன்னு சொல்லு''
பத்து வயசுப்பையன் எனக்குக் கல்யாணம் என்று சாயபு சொன்னதும் வெட்கம் பீறிட, வந்த வேகத்தில் "டுர்ர்ர்' என்று மோட்டார் சைக்கிள் விட்டபடி வேகமாக என் வீட்டை அடைந்து, மூச்சு வாங்கியபடி, "அரை மணியிலே வருவாராம் சாயபு'' என்பேன்.
எப்போதும் ஜாலி மூடில் இருக்கும் சாயபு என்னைப் போன்ற சின்னப் பையன்களை நடுவழியில் நிறுத்தி, "உனக்கு எப்போ தம்பி கல்யாணம்?'' என்கிற ரீதியில் ஏதாவது கேட்டுக் கலவரப்படுத்துவது வழக்கம்தான்... இதன் காரணமாகவே எங்கள் வீட்டுப்பக்கம் சாயபு வரும் வேளையில் அங்கே இருக்க வெட்கப் பட்டுக்கொண்டு விளையாடப் போய் விடுவேன் நான்.
"அரே சோட்டா, முதல் கல்யாணப் பத்திரிகே நீ இந்த சாயபுக்குத்தான் கொடுக்கணும், தெரியுதா ?'' என்று குறும்பு மின்னும் கண்களுடன் அவர் கேட்க, அருகிலுள்ளவர்களிடம் அட்டகாசச் சிரிப்பு கிளம்புவதை எதிர்கொள்ளும் தைரியம் எனக்கு ஏது?
இன்றைய எஸ்.எம்.எஸ்.களும், செல்போன்களும், ஈ மெயில்களும், கம்ப்யூட்டர்களும் இல்லாத காலம் அது.
இருபதாம் நூற்றாண்டில் இன்னும் மூன்று பத்தாண்டுகளுக்கும் மேல் மிச்சம் இருந்த நேரம் அது.
மனித உறவுகள், வேலை வாய்ப்புகள், திருமணங்கள், அரசு இயந்திரத்தின் இயக்கங்கள் எல்லாம் தபாலும் தபால் சார்ந்ததுவுமாக இருந்தது. ஓரளவு தந்தியைச் சார்ந்தும் இருந்தது.
தபால்காரர் என்பவர் சமுதாயத்தின் தவிர்க்க முடியாத கண்ணியாக இருந்தவர். தபால்கார சாயபு போன்றவர்களோ அதற்கும் மேலாக ஒரு ஊரின் ஒவ்வொரு குடும்பத்திலிருந்தும் பிரித்துப் பார்க்க முடியாத அங்கத்தினராகவே இருந்தார்கள் அன்றெல்லாம்.
ஊரின் அனைத்துக் குடும்பங்களிலும் உள்ள வயதானவர், வயதில் சிறியவர், ஆண், பெண், வேலை தேடும் வாலிபர்கள், கல்யாண வயதிலிருப்பவர்கள், பிள்ளைப் பேற்றுக்குப் பிறந்த வீட்டிற்கு வந்திருக்கும் இளம்பெண்கள், தூரதேசத்திலிருந்தபடி சம்பாதித்து அனுப்பும் குடும்பத் தலைவர் அல்லது மூத்த பிள்ளை என்று எல்லா விவரங்களுக்கும் சாயபுவுக்கு அத்துப்படி.
தோற்றத்தையும் பேச்சையும் பார்த்தால் வயது அறுபதுக்கும் மேலே மதிப்பிட்டுவிடலாம் என்றுதான் தோன்றும். நாலு வருடம் முன்பே ரிடையர் ஆகிவிட்டிருக்க வேண்டும் என்று கூடச் சந்தேகம் எழும்பும்.
அந்தக்காலத்தில் மெட்ராஸிலிருந்து ராமேஸ்வரத்துக்குக் கால்நடை போலவே பயணிக்கும் போட்மெயிலின் பெயரை யாரோ சாய்புவுக்கும் வைத்துவிட்டார்கள். அபூபக்கர் என்ற அவரது நிஜப்பெயர் அவருக்கே மறந்து போகும் அளவுக்கு போட்மெயில் சாயபு புழங்கிக் கொண்டிருந்தது. சாயபுவின் நிதானத்துக்கு, அவரை "போட் பாஸஞ்சர்' என்றே சொல்லலாம்.
காலையில் ஒன்பது மணியளவில் தபால் ஆபீஸிலிருந்து கிளம்பி, மண்டபத் தெருவிலுள்ள நாற்பது வீடுகளைக் கடந்து, பெருமாள்கோயில் தெருவில் நுழைவதற்கே மணி பதினொன்று ஆகிவிடும். நடையில் அப்படி ஒரு நிதானம். பேச்சில் ஒரு பெரிய மனிதத் தன்மை. மணிஆர்டர் கொடுத்துவிட்டுப் பல்லிளிப்பது கிடையாது. இனாம் கொடுத்தாலும் வாங்குவது கிடையாது.
"அல்லா ஆர்டர் போட்டு கவர்மென்டு மூலம் சம்பளம் கொடுக்க வெச்சிருக்கான் சாமி, எனக்கு ஜில்லுனு ஒரு சொம்பு தண்ணி குடுங்கோ போதும்... வெய்யில் என்னா போடு போடுது பாரு...'' என்று சொல்லித் திண்ணையில் சுவாதீனமாக அமர்ந்து கொண்டு தண்ணீர்ச் சொம்பு முழுவதையும் காலி செய்து விட்டு அடுத்த வீட்டுக்குப் போவார் சாயபு.
சாயபு தபால் கொடுக்கும் தெருக்களில் அவரது பள்ளித்தோழர்களின் வீடுகளும் இருப்பதால், சாவகாசமாக நாலு வார்த்தை பேசிவிட்டுத்தான் நகர்வார்.

அறுபது வயதைத் தொட்டு, அவரவர் பணியியிலிருந்து ஓய்வு பெற்றுச் சொந்த ஊரிலேயே செட்டில் ஆகி, தபால்காரர்களை விட அதிக எண்ணிக்கையில் கூரியர் ஆட்களையும், ஃப்ளிப்கார்ட் டெலிவரி பாய்ûஸயும் பார்க்கின்ற என் போன்றவர்களுக்கு போட்மெயில் சாயபுவைப் பற்றிப் பேச ஏராளமான விஷயங்கள் உண்டு.
என் ஒரே தங்கைக்கு இரண்டு வயதிருக்கும் அப்போது. குழந்தை நிற்காமல் அழுகிறது. கையில் ஏந்தினால் புழுவாக நெளிகிறது. அனலாகக் கொதிக்கும் உடம்பு. அம்மாவிடமும் சாப்பிட மறுக்கிறது. கஞ்சியோ பாலோ பாலாடையில் வைத்துப் புகட்டினாலும் தள்ளிவிடுகிறது. முதல் நாள் ராத்திரியிலிருந்து ஒரே அழுகை வேறு. வீட்டில் யாரும் தூங்கவுமில்லை.
"இப்படித்தான்... அந்தக் காலத்துல...'' என்று எங்கள் அப்பாவின் அம்மா தங்கள் பரம்பரையில் தான் கண்ட, கேள்விப்பட்ட குழந்தை நோயாளிகளைப் பற்றி விதவிதமாக அடுக்கினாள்.
இங்கிலீஷ் டாக்டரைப் பார்ப்பதென்றால் மாட்டுவண்டி வைத்துக்கொண்டு பக்கத்து ஊர் போக வேண்டும். குதிரை வண்டிக்கு இரண்டணா அதிகம் தரவேண்டும். அப்பாவின் எலிமென்டரி ஸ்கூல் வாத்தியார் சம்பளத்தில் கட்டுப்படியாகாத விஷயம் அது.
தேரடித்தெரு சித்த வைத்தியர் கிருஷ்ணமூர்த்தியை அழைத்து வரச் சொன்னார் அப்பா.
வைத்தியருக்கு எழுபது வயது. எப்பொழுதும் இடிந்து விழத் தயாராக இருக்கும் ஒரு மூதாதையர் காலத்திய ஓட்டு வீட்டில், தன்னை விடக் கச்சலாகப் பிறந்த நான்கு பெண்களைப் பெற்றுவிட்டு, அதுகளுக்குக் கல்யாணமாகாத கவலையில் அவரே ஒரு நோயாளி போலத்தான் இருப்பார்.
நான் போய்ச் சொன்ன மறுநிமிடம் ஒரு கனத்த மஞ்சள் பையுடன் கிளம்பி வந்த வைத்தியர், குழந்தையின் வயிற்றில் தனது வலது கை விரல்களால் தபேலாவுக்கு சுருதி சேர்ப்பதைப் போல் நாலைந்து முறை தட்டிப் பார்த்துவிட்டு, "வயத்துல மந்தம் தட்டி இருக்கு... இந்த மாத்திரையைப் பொடி பண்ணி நாலு வேளைக்குத் தேன்ல கலந்து குழந்தைக்குக் கொடுங்கோ... சரியாயிடும்... தாய்ப்பால் தவிர வேறு ஆகாரம் ரெண்டு நாளைக்குத் தரவேண்டாம்'' என்று தமது மஞ்சள் பையிலிருந்து ஒரு பாட்டிலை எடுத்து நான்கு பழுப்புக் கலர் மாத்திரைகளைப் பொட்டலம் கட்டிக் கொடுத்து விட்டு, அப்பா நாலு தரம் தடவிப்பார்த்துக் கொடுத்த ஒரு ரூபாய் நோட்டை சந்தோஷமாக வாங்கிக் கொண்டு, "கொஞ்சூண்டு காப்பி கிடைக்குமா?'' என்று கேட்டு வாங்கிக் குடித்துவிட்டுக் கிளம்பினார்.
அன்று மதியமும் குழந்தை விடாமல் அழுது கொண்டிருந்தது, தபால் கொடுக்க வந்த சாயபுவுக்குக் கேட்டு விட்டது.
"கொளந்தே ஏன் சாமி அளுவுது... நான் கொஞ்சம் பார்க்கட்டுமா?''
"தாராளமா பாருப்பா சாயபு...'' என்று உள் திண்ணையில் இருந்த குழந்தையைக் காண்பித்தார் அப்பா.
"அரே அல்லா... கொழந்த எதையோ பார்த்து பயந்து போயிருக்கு சாமி... ஒண்ணு சொல்றேன் கேப்பீங்களா. இன்னிக்கு சாயந்திரம் அஞ்சு மணிக்கு குழந்தைய எடுத்துக்கிட்டு அம்மாவை நம்ம ஊர் பஜார் மசூதிக்கு வரச்சொல்லுங்கோ சாமி. உள்ளே நமாஸ் ஓதிட்டு வர்றவங்க வாயால குழந்தை கண்ணுல ஊதுவாங்க... தானே சரியாப் போயிடும் சாமி... நீங்க ஒண்ணும் பயப்பட வேணாம்...''
"நீ சொன்னா சரி சாயபு...''
அன்று இரவு குழந்தை நன்றாகத் தூங்கியது.
நாங்களும்தான்.

போட்மெயில் சாயபு தன்னுடைய சைக்கிளை ஓட்டி நாங்கள் பார்த்ததில்லை. தபாலும் தபால் சார்ந்ததுமான அன்றைய சமூக வாழ்வில் சாயபுவின் சைக்கிள் கேரியர் சுமார் இரண்டடி உயரத் தபால் கட்டுகளைச் சுமந்து கொண்டிருக்க, அதன் ஹேண்டில் பாரின் இரண்டுபுறத்திலும் தொங்கிக் கொண்டிருக்கும் யானைக்காது போன்ற பைகளிலும் தபால்கள் நிரம்பி வழியும். பழைய அட்லாஸ் சைக்கிள் அது என்று ஞாபகம். தினமும் அதைத் துடைத்து சுத்தப்படுத்தி எடுத்து வருவார். சைக்கிளின் மணிதான் கொஞ்சம் மக்கர் செய்யும். "ணிக் ணிக்' என்ற அது எழுப்பும் ஓசை அத்தனை பேருக்கும் அத்துப்படி.
சாயபு ஒவ்வொரு வீடாகக் கொடுக்கக் கொடுக்க, யாரோ ஒருவர் அவரது கனத்த பைகளைத் தபால்களால் நிரப்பிக் கொண்டே வருவது போலவே ஒரு தோற்ற மயக்கம். சாயபுவின் நிதானத்துக்கு, அன்றைய ஒரு நாளின் தபால்களைக் கொடுத்து முடிப்பதற்கு நள்ளிரவு ஆகிவிடும் போலவே இருக்கும்.
எங்கள் ஊரில் ஏறத்தாழ பதினைந்து இருபது தெருக்கள் சாயபுவின் ஆளுமையின் கீழ். பெற்ற மகன் வெளியூரிலிருந்து அனுப்பும் பத்திருபது ரூபாய்க்காகக் காத்திருக்கும் வயதானவர்கள், பென்ஷன் வரவேயில்லையே என்று நச்சரிக்கும் ஓய்வூதியர்கள், சமையலை முடித்துக் கணவரையும் குழந்தைகளையும் அனுப்பிவிட்டுக் கல்கி , கலைமகளுக்காகக் காத்திருக்கும் வீட்டுப் பெண்மணிகள், இண்டர்வியூ கடிதத்தை எதிர்பார்த்திருக்கும் இளசுகள், பத்து கதைகளைப் பத்திரிகைகளுக்கு அனுப்பி விட்டுப் பன்னிரண்டு கதைகளாகத் திரும்பப் பெறும் கற்றுக் குட்டி எழுத்தாளர்கள் எல்லோருக்கும் சாயபுவின் தரிசனம் கண்டதும் ஒரு பரவசம். நானும் எஸ் எஸ் எல் சி படிக்கும் போது முதலும் கடைசியுமாக ஒரு கதையை எழுதியனுப்பித் திரும்பப் பெற்றிருக்கிறேன்.
என் தங்கையின் உடம்பு சரியாவதற்கு ஒரு வழி சொன்னது போல், இன்னும் ஏராளமான விஷயங்கள் எங்கள் போட்மெயில் சாயபுவைப் பற்றிச் சொல்லிக்கொண்டே போகலாம்.

எதிர்வீட்டுக் காமுப்பாட்டி தனிக்கட்டை. திருச்சி ரயில்வேயில் வேலை பார்க்கும் அவளுடைய ஒரே பிள்ளை வாராவாரம் போடும் நாலுவார்த்தைக் கார்டுக்கும் மாதாமாதம் அனுப்பும் சொற்ப மணி ஆர்டருக்கும் வாசற்திண்ணையிலேயே தவம் இருப்பாள்.
ஒருதரம் மணியார்டர் வாங்கிய காமுப்பாட்டியின் வாடிய முகத்தைக் கண்டு, ""கியா ஹுவா மாமி...ஒடம்புக்கு என்னாச்சுது...?'' என்று கேட்டுத் தெரிந்து கொண்ட சாயபு, அன்றைய டூட்டி முடிந்து இரவு ஏழு மணிக்கு வெறும் லுங்கி சட்டையுடன் காமுப்பாட்டி வீட்டுக் கதவைத்தட்டினார்.
"என்னாப்பா சாயபு, இந்த நேரத்துல...'' என்று மங்கிய அரிக்கேன் விளக்கு வெளிச்சத்தில் முனகிய பாட்டியிடம், "இந்தாங்கோ மாமி. எங்க வீட்டுத் தோட்டத்து வெளைஞ்ச ஆடாதொடை இலை ஒரு கட்டு திண்ணையிலே வெச்சிருக்கேன். ரெண்டு நாளைக்குக் கஷாயம் வெச்சுக் குடிங்கோ...எல்லாம் சரியாப்போயிடும்...'' என்று சொல்லிய சாயபு, "நீ மகராஜனா இருக்கணும்பா...'' என்றவளின் நன்றியைத் தலையசைத்துப் பெற்றுக் கொண்டு, சைக்கிளில் ஏறி வந்த வழியே திரும்பிவிட்டார்.
சாயபு வேலை செய்யும் எங்கள் ஊர்ப் போஸ்ட் ஆபிஸ் கிளார்க் ஜெயராமன் எங்கள் அப்பாவின் அந்த நாளைய இரண்டாம் கிளாஸ் மாணவன். எஸ். எஸ். எல். சி., பி. யூ. சி. இரண்டும் முடித்து, டிகிரி முதல் வருடம் படித்துக் கொண்டிருக்கும்போதே போஸ்டல் கிளார்க் வேலை கிடைத்து, அங்கே இங்கே சுற்றிக் கடைசியில் சொந்த ஊருக்கே மாற்றல் கேட்டுக்கொண்டு வந்து விட்டான். கல்யாணம் குதிர்ந்த பாடில்லை. வயது முப்பதைத் தாண்டிவிட்டது. அந்தக் காலத்தில் அது ரொம்ப லேட்.
தனக்குக் கல்யாணம் நிச்சயமாக சாயபுதான் வழிகாட்டியிருக்கிறார் என்று என் அப்பாவுக்குப் பத்திரிகை கொடுக்க வந்த ஜெயராமன் கூறினான்.
"ஜய்ராம் தம்பி... இதுக்கு முன்னே இருந்த போஸ்மாஸ்டர் ஸாப் பொண்ணுக்கு மாப்ளே கிடைக்கோ ரொம்ப ரொம்ப தாமதமாச்சுது. கடைசியில ஜோசியர் சொன்னாருன்னு கும்மோணம் பக்கத்துல உப்பிலியப்ப சுவாமிக்கும் அம்பாளுக்கும் கலியாணம் செஞ்சு வெச்சாருப்பா. நானும் அந்த ஐயா கூடப் போயிருந்தேன். திகட்ட திகட்ட சர்க்கரைப் பொங்கல் சாப்ட்டேன். சாமிக்குக் கல்யாணம் செய்ஞ்சி ஒரே மாசத்துல மாப்ளே ஓடிவந்து விழுந்தான் தெரியுமா? கியோங் நஹி...நீயும் அந்த உப்பிலியப்ப சுவாமிக்கு ஒரு நிக்காஹ் செஞ்சிப்பாரேன் தம்பி'' என்று ஐடியா கொடுத்தாராம் போட்மெயில் சாயபு.
உப்பிலியப்பன் கோயிலில் கல்யாண உற்சவம் செய்த கொஞ்ச நாளில் சுலபமாக வரன் அமைந்து விட்டதாம் ஜயராமனுக்கு.
"போகிற போக்கைப் பார்த்தால் இந்த போட்மெயில் சாயபு சீமந்தத்துக்கு நாளெல்லாம் பார்த்துக் கொடுப்பார் போல இருக்கே'' என்று ஜயராமன் பத்திரிகை கொடுத்துவிட்டுக் கிளம்பிய பிறகு அப்பா என் அம்மாவிடம் ஆச்சரியப்பட்டுக் கொண்டிருந்தார்.
தான் தபால் கொடுக்கும் ஒவ்வொரு வீட்டுக்கும், தபால் டெலிவரியையும் தாண்டி ஏதோ ஓர் உபகாரம் செய்திருக்கிற போட்மெயில் சாயபு என் விஷயத்திலும் ஒரு முறை சூப்பர்மேன் அவதாரம் எடுத்திருக்கிறார்.

இப்போது போல பத்து காலிப்பணியிடங்களுக்குப் பத்தாயிரம் பேர் மனுப் போடுகிற காலம் இல்லை அது.
பதினெட்டு வயசு பூர்த்தியாகக் காத்திருந்து அப்ளிகேஷன் போட ஆரம்பித்தால், பத்தொன்பது தொடங்குவதற்குள் ஒரு வேலையில் உட்காந்துகொள்ளும் காலம் அது.
நானும், நாட்டுமருந்துக்கடை வெங்கடாசலம் செட்டியார் மகன் டில்லிராஜனும் மெட்ராஸ் டெலிபோன்ஸில் டெலிபோன் ஆபரேடர் வேலைக்குச் சட்டென்று தேர்வாகி விட்டோம்.
ஹைக்கோர்ட்டு எதிரில் அரண்மனைக்காரத் தெருவில் உள்ள ஆர்மீனியன் சர்ச்சுக்கு அப்பால் இருந்த சென்னைத் தொலைபேசித் தலைமையகத்தில் ஒரு முற்பகல் வேளையில் சிறிய தேர்வு எழுதிவிட்டுப் பசியோடு காத்திருந்து, பிற்பகலில் நேர்முகம் முடிந்த சிறிது நேரத்தில் அறிவிப்புப் பலகையில் ஒட்டப்பட்ட தேர்ச்சிப் பட்டியலில் என் பெயரும் டில்லிராஜன் பெயரும் இருந்தது. இரண்டு மாதம் கழித்து, ஜூன் முதல் வாரம் தொடங்க இருக்கும் பயிற்சிக்கு இரண்டு நாள் முன்னதாக அப்பாயிண்ட்மென்ட் ஆர்டர் அனுப்பப்படும் என்று சொன்னார்கள். மூன்று மாதப் பயிற்சி முடிந்ததும் வேலை. அந்த நாளில் ஆரம்பச் சம்பளம் சுமார் ஐந்நூறு ரூபாய்.
அப்பாவுக்கு சந்தோஷத்தில் தலைகால் புரியவில்லை. மறுநாள் பெருமாள் கோயிலுக்குச் சென்று ஸ்பெஷலாக சகஸ்ரநாம அர்ச்சனை செய்யச்சொன்னார் அப்பா. (அர்ச்சகருக்கு ஐந்து ரூபாய் தட்சிணை).
மே மாதம் இருபது தேதி ஆயிற்று.
"தொர, எனக்கு அப்பாயிண்ட்மென்ட் ஆர்டர் வந்திருச்சு. உனக்கு வந்துதா?'' என்று டில்லிராஜன் வீட்டுக்கு வந்து கேட்டது முதல் போட்மெயில் சாயபுவுக்காகக் காத்திருக்கத் தொடங்கினேன்.
மறுநாளும் தபால் வரவில்லை.
"வராமல் எங்கடா போயிடும், இன்னிக்கு இல்லேன்னா நாளைக்கு அனுப்பப்போறான். எப்போ உன் ஃப்ரெண்டு டில்லிராஜனுக்கு வந்துதோ உனக்கும் வந்துதானே ஆகணும்?'' என்று கேட்ட அப்பாவுக்கும் மறுநாள் லேசாக நம்பிக்கை குறைந்தது.
"ஏன்டா, நிஜமா நீ செலெக்ட் ஆனியா? செலெக்ஷன் லிஸ்ட்ல உன் பேரு இருந்துதா? இல்ல அது வேற ஒரு துரையா?'' என்று கேட்டவரை, "சும்மா இருங்கோன்னா'' என்று அதட்டி வாயை மூட வைத்தாள் என் அம்மா.
டில்லிராஜன் வேறு தினமும் நாலுதரம் சைக்கிள் எடுத்துக்கொண்டு வந்து, "இன்னுமா வரலே?'' என்று கேட்கவும் எனக்கு அழுகை வராத குறை.
போதாக்குறைக்கு அப்பாவைப் பார்க்க வந்த நண்பர் ஒருவர், ""போஸ்ட்டல் டிலே, தபாலே வரவில்லை'' என்பதையெல்லாம் சென்டிரல் கவர்ன்மென்ட்காரன் ஒத்துக்க மாட்டான். அடுத்த முறை செலெக்ஷன் வரும்போது அப்ளிகேஷன் போடுன்னு சொல்லிடுவான்'' என்று எங்கள் எல்லார் வயிற்றிலும் திகிலைக் கிளப்பிவிட்டுப் போய்விட்டார். அன்றைய இரவு முழுவதும் எனக்குத் தூக்கமில்லை.
மறுநாள் காலை எட்டு மணிக்கே தபால் ஆபீஸில் ஆஜரானேன். தபால் கட்டுகளுடன் வெளியே வந்து, "என்னா தம்பீ?'' என்று விசாரித்த சாயபு, "உம்பேருக்கு ரிஜிஸ்டர் தபால் எதுவும் இல்லையே தம்பீ'' என்றவுடன் என் கண்கள் மடைதிறந்தன.
பதறிப்போன சாயபுவிடம் நான் என் நண்பன் இருவரும் தேர்வு பெற்று, நண்பனுக்கு மட்டும் மூன்று நாட்கள் முன்னதாகவே ஆர்டர் கிடைத்துள்ள செய்தியை விவரித்தேன்.
தோளில் என்னைத் தட்டிக் கொடுத்த போட்மெயில் சாயபு, " தொரே தம்பி, கவலைப் படாதே. அல்லா ஒன்னை நிச்சயமா கைவுடமாட்டாரு. நாளைக்குக் கட்டாயம் வந்துரும். டீ சாப்டறியா? கண்ணத் தொடச்சுக்கோ. கவலைப் படாமே வூட்டுக்குப் போ. இன்னும் ரெண்டு வருசத்துல கல்யாணம் ஆவப் பொற ஆம்பள. இதுக்கெல்லாம் அழுவலாமா?'' என்று என் கண்ணைத் துடைத்து அனுப்பி வைத்தார்.
சுற்றியிருந்த ஓரிருவர் பார்க்கத் தொடங்கியதை உணர்ந்து, வேதனையுடன் வெட்கமும் சேர்ந்து கொள்ளத் தளர்நடையிட்டு வீடு திரும்பினேன்.
அப்பா ஸ்கூல் போயிருந்தார்.
அம்மா என் தலையைக் கோதிவிட்டு, ""முதல்ல சாப்பிடுரா'' என்று சொல்லி, நான் சாப்பிடும் போது சைக்கிளில் வந்த டில்லி ராஜனிடம், "அவன் வெளியில போயிருக்காம்பா'' என்று சொல்லி வாசலோடு அனுப்பி வைத்தாள்.
அன்று மாலை மணி நான்கு இருக்கும்.
எனக்கு ஆர்டர் வராத கவலை அப்பாவையும் கவலை பிடித்துக் கொண்டிருக்க வேண்டும். தலைவலி என்று கடைசி பீரியடுக்குப் பர்மிஷன் எடுத்துக்கொண்டு வீடு திரும்பி, ஒருவாய் காப்பி சாப்பிட்டுவிட்டு பெஞ்சில் ஒரு டவலை விரித்துக் கொண்டு படுத்த சற்று நேரத்துக்கெல்லாம் வாசல் கதவு சத்தம் செய்தது.
கதவைத் திறந்தால் போட்மெயில் சாயபு.
"அரே தொரே தம்பீ... அல்லா உன்னைக் கைவுடல பாத்தியா. இந்தா உன்னோட அப்பாயிண்ட்மெண்டு ஆர்டர்'' வாய் நிறையச் சிரிப்புடன் சாயபு சொல்லவும், தூக்கம் கலைந்து எழுந்து வந்த அப்பா, "என்னா சாயபு விசேஷம், இப்போ வந்திருக்கீங்க?'' என்றார்.
"தம்பி இன்னிக்குக் காலையில எல்லா விவரமும் சொல்லிக் கண்ணால் தண்ணி உட்டத பாத்து எனக்கு மனசு கேக்கலே சாமி. மத்தியம் என் பீட் முடிஞ்சதும் ரெண்டு மணிக்கு சாப்பிடக் கூட வூட்டுக்குப் போகாம போஸ்ட் ஆபீஸ்ல சல்லடை போட்டேன். அப்புறமாத்தான் ஞாபகம் வந்தது சாமி, நம்ம ஊர்ல உங்க பெருமாள் கோயில் தெருவுக்கு வர்ற லெட்டருங்களும், பெருமாள் முதலித்தெருவுக்கு வர்றதும் அப்பப்ப மாறிப் போவுறது வழக்கம். இன்னிக்குப் பார்த்து அந்தப் புதுப்பயல் முனுசாமி பீட் முடிஞ்சு லேட்டா மூணு மணிக்கு வந்தான். ஏன்டா, இப்படி தொரைங்கிற பேருக்கு ஒரு ரிஜிஸ்டர் தபால் இருக்கான்னு கேட்டால், ஆமாம்பா, ரெண்டு நாளா தேடறேன். பெருமாள் முதலித்தெருவுல யாருக்குமே தெரியாதுங்கறாங்க. சரின்னு இன்னிக்கு ரிட்டர்ன் அனுப்பலாம்னு இருக்கேன்னு சொன்னான். அதைக் குடுடா பையா, அது நமக்குத் தெரிஞ்ச புள்ளாண்டானுக்கு வந்ததுடான்னு கேட்டு வாங்கி, போஸ்ட் மாஸ்டர் ஐயாகிட்ட விஷயத்த சொல்லி என் பீட்டுக்கு மாத்தி எளுதி இதோ எடுத்துக்கிட்டு ஓடியாறேன் சாமி'' என்று சாயபு விவரித்த மறுகணம் சட்டென்று எங்கள் வீட்டைச் சந்தோஷ வெள்ளம் சூழ்ந்து கொண்டது.
"ரொம்ப தேங்க்ஸ் சாயபு, நீங்க சாப்டீங்களா இல்லியா? நம்ம வீட்டுல ஒருவாய் சாப்பிடுங்களேன்''என்று அப்பா அவரது கையைப் பிடித்துக் கொண்டு கேட்டார்.
"பரவாயில்ல சாமி, ஒரு சொம்பு தண்ணி குடுங்கோ போதும். வீட்டுல சமையல் செஞ்சி வெச்சிட்டு என்னோட பீவி காத்துக்கிட்டிருக்கும். சாப்பிடலேன்னா சண்டை போடும்''
"ஒரு வாய் காப்பியாவது சாப்பிடுங்கோ சாயபு''
"வேணாம் சார், அப்புறம் பசி இல்லாமே சோறு குறைச்சலா சாப்பிடுவேன். அதுக்கும் என் பீவி சண்டை போடும்'' என்றார் சாயபு.
சட்டென்று உள்ளே சென்ற அப்பா, (இன்னும் அடகு வைக்காமல்) தான் பயன்படுத்திக்கொண்டிருக்கும் வெள்ளிச் சொம்பில் தானே கிணற்றில் தண்ணீர் சேந்தி வந்து சாயபுவைக் குடிக்கச் சொன்னார்.
"ரொம்ப சந்தோஷம் சாமி. பையனுக்கு நிக்காஹ் செய்யும் போது மறக்காம எனக்கு பத்ரிகே குடுங்கோ. அப்போ எனக்கு ரெண்டு கப்பு பாயசம் எக்ஸ்டிராவாக் குடுங்கோ''என்று சொல்லிக் கிளம்பியவரை நிறுத்திய அப்பா -
"டேய் பையா, நம்ம சாயபு கால்ல விழுந்து ஆசீர்வாதம்வாங்கிக்கோடா'' என்றார்.
காலில் விழுந்த என்னைத் தொட்டு எழுப்பி, "நல்லா இருக்கணும் தம்பீ, வேலைல நேர்மையா இருக்கணும் சரியா, அல்லா ஆசீர்வாதம் உனக்கு நிச்சயம் கிடைக்கும்'' என்று நெகிழ்ச்சியுடன் வாழ்த்திய போட்மெயில் சாயபு, பீவியின் சாப்பாட்டுக்காக எக்ஸ்பிரஸ் வேகத்தில் கிளம்பினார்.

எஸ்.ஸ்ரீதுரை
 

]]>
https://www.dinamani.com/weekly-supplements/dinamani-kathir/2018/dec/24/போட்-மெயில்-சாயபு-3064136.html
3064135 வார இதழ்கள் தினமணி கதிர் ஆயிரஞ்சூரியன் ஓருருவாகிய பாடல்! DIN DIN Monday, December 24, 2018 10:39 AM +0530 எட்டயபு ரத்தினில் உதித்திட்ட பாரதி
 என்றும் மறைவதில்லை - அவன்
 தொட்ட சிகரங்கள் தாண்டிஎப் புலவனும்
 பயணந் தொடரவில்லை
 விட்டஇ டத்தினைத் தொட்டுத் தொடரவோர்
 ஆயுள் போத வில்லை - அவன்
 வீரியப் பாடலில் ஆயிரஞ் சூரியன்
 விதிவிலக் கேயில்லை!
 இந்திய தேசத்து எல்லைகடந்தவன்
 எங்கும் போனதில்லை - உலக
 எல்லைகள் நீத்தவன் யாத்த கவிதைக்குப்
 பிரபஞ்சம் போதவில்லை!
 "வந்தே மாதரம்' என்கிற சொல்லுக்கு
 மாநிலம் தாயானாள் - கவி
 இந்திரன்ஆகிய ரவீந்த்ர னுக்குமே
 பாரதி தாயானான்!
 சந்திர மண்டலச் சக்திய ளந்திட
 யந்திரக் கவிபுனைந்தான் - தெருச்
 சந்திபெ ருக்கிபொய்ச் சாத்திரக் குப்பையைப்
 போக்கிடுந் தமிழ்வனைந்தான்!
 எந்தக் கவியிந்த பாரதிபோல் - இந்தப்
 பாரினில் தோன்றியுளார்? - இவன்
 சந்தக் கவிகேட்க தெய்வங்கள் முன்வந்து
 இவனிடம் நின்றதையா!
 சொந்தக் கவலைகள் சோகங்கள் துயரங்கள்
 சொல்லி யழுததில்லை - பிஜித்
 தீவினில் சோதரி யார்படுந் துயர்கண்டு
 சொன்னதற் கீடு இல்லை!
 சின்னக் கவலைகள் தின்னத் தகாதென்று
 அன்னையைச் சரண்புகுந்தான் - அந்த
 அன்னையோ "அனுதினம்
 என்னைநீ பாடெ'ன்று
 இவனைச் சரண்அடைந்தாள்!
 "உப்புக்கும் கேவலம் புளிக்குமோ என்மனம்
 ஏங்கித் தவிக்குமெனில் - நானினி
 நாத்திக னாவேன்' எனச்சூ ளுரைத்துத்
 தெய்வத்தை எச்சரித்தான்!
 எல்லை தனக்கெதும் இல்லையெனத் தமிழ்
 இவன்வழி கண்டதையா! - புவி
 எங்கும் நிறைந்த பரம்பொருளே வந்து
 இவன்கவி யானதையா!
 அல்லா யெஹேவா இயேசுவைப் போற்றி
 அருட்கவி பாடியவன் - தெய்வம்
 ஆயிர முண்டெனப் பொய்க்கதை
 சொன்னோரைப்
 பாடலால் சாடியவன்!
 காக்கை குருவியைச் சாதியாய்க் கொண்டவற்
 கேதுத னிச்சாதி? - அண்டங்
 காக்கப் பிறந்தவன் பாரதி வகுத்ததே
 உலகத்துக் குயர்நீதி!
 ஆக்கப் பணிக்கவன் வகுத்திட்ட திட்டங்கள்
 ஆயிர மாயிரமே! - அதை
 அனுதினஞ் செய்திடில் பாரதம் உலகினில்
 வல்லர சாகிடுமே!
 "தனியொரு மனிதனுக் குணவிலை யெனிலிந்த
 ஜகத்தினை யழி'ப்பதற் கோர்
 கவிக்கணை படைத்தவன் பசிப்பிணி போக்கவும்
 தமிழைச் சமைத்தவன்காண்!
 புவிக்கெலாம் முதல்வன்நம் கவிக்கெலாம் இறைவன் பாரதி ஒருவன்தான் - அவன்
 அடிக்கடி நமக்குளே வெடிக்கும் பல்பிரிவினை போக்கிடும் தலைவன்காண்!
 மனைவியைத் தெய்வமாய், தெய்வத்தை மனிதமாய்ச்
 செய்திட்ட மாகவிஞன்! - புவி
 மக்களே நாம்தொழும் தெய்வங்கள் எனப்புது
 வேதஞ்சமைத்த தவன்!
 மின்னலைக் கையினில் ஏந்தி யிடியினைப்
 பாடலாய் ஆக்கியவன் - கவி
 சொன்னதால் வானமே பூமியாய் வந்திடக்
 காற்றினை ஏவியவன்!
 காலனை யோர்கணப் பொழுதில்உ தைத்திடும்
 கால்பந் தாக்கியவன் - அவன்
 ககன வெளிதனிற் கோள்களை ஓச்சியே
 கைப்பந் தாடியவன்!
 நாற்பது வயது வரும்வரை கூடஇம்
 மண்ணி லிருக்கவில்லை - ஆனால்
 நாற்றிசை புகழ்ந்திடும் அவன்தமிழ் வாழ்வது
 என்றும் மரிப்பதில்லை!
 முத்தத்தின் ஈரத்தில் வான்மழை தந்தவன்
 மீட்டிய பாடல்களில் - புவி
 மொத்தமும் விடுதலை சொத்தெனக் கொண்டினி
 மானுடம் வாழுமடா!
 
 - கிருங்கை சேதுபதி

]]>
https://www.dinamani.com/weekly-supplements/dinamani-kathir/2018/dec/24/ஆயிரஞ்சூரியன்-ஓருருவாகிய-பாடல்-3064135.html
3064134 வார இதழ்கள் தினமணி கதிர் தரைதொட முடியா ஞான சமுத்திர ஆழம்! DIN DIN Monday, December 24, 2018 10:38 AM +0530 பாட்டின் மகத்துவமேதும் அறியாப் பிராயத்தில்
 பிறை வெளுத்த மாலையொன்றில்
 என்னை மலர்த்திய ஆசிரியர் சொன்னார்:
 "இலக்கியவிழாவில் பாரதியின்
 பாடலொன்றைப் பாடெ'ன்று
 ஆசீர்வாதப் பூக்கள் விழுந்தது
 அப்போதெனக்குத் தெரியாது
 சினிமாவில் வந்த
 உன் பாடல் ஒன்றை நான் பாட
 சூல் கொண்ட மழைநாளின் சந்திப்பாய்
 நீ எனக்கு அறிமுகமானாய்!
 ருசியறியாப் பருவத்தில்
 நான் கண்ட கீதத்தின் முதல் ருசி நீ!
 தரிசனத்தின் கண நேர மன விரிவால்
 பின் தேடித்தேடிப் படித்த போதும்
 ஓடி ஓடிக் கேட்டபோதும்
 சிந்தி உறைந்த படிவங்களாய்த்
 தேங்கிவிட்டாய்!
 சங்கீதக்காரர் பேச்சாளர்
 ஆசிரியர் அரசியல்வாதியென எல்லோரும்
 உன் கவிதையைச் சொல்லும் போதுதான் தெரிந்தது,
 உன் கவிதை தொடாத ஆளேயில்லையென்று!
 சங்கீதம் படிக்கத் தொடங்கிய பின்
 தெலுங்குக் கீர்த்தனைகள் பாடமாமென்றாலும்
 முன்னும் பின்னும் உவமையில்லா
 உன் தமிழ்க் கவிதைப் பாடல்களே
 எனக்குக் கானாமிர்தமாயின
 அகாரங்கள், சிட்டாஸ்வரங்கள், பிருகாக்கள் என்ற
 அரூப வியப்புகளின் மத்தியில் ஒப்பனையற்ற மொழியழகு
 உன் உணர்ச்சிமிகு கவிதைப்பாடல்
 கவிதைக்கும் கானத்துக்கும் இடைவெளி இருந்த காலத்தில்
 இரண்டும் தெரிந்த நீதான்
 அதைப் பொருத்தமாய் இணைத்துக் கண்ணியாக்கினாய்!
 ஆளற்ற மலைத்தொடரில் கேட்கும் நாட்டுப் பாடலா,
 பறைகொட்டி முழங்கும் ஆட்டப்பாடலா,
 மோன நிலைக்குத் தள்ளும் தத்துவப்பாடலா,
 வீர உணர்வூட்டும் கிளர்ச்சிப் பாடலா,
 பக்தியில் திளைக்கும் ஆன்மீகப்பாடலா,
 காதல் மொழி பேசும் சொல்லும் குயில் பாட்டா,
 இன்னும் பள்ளா, கும்மியா, சிந்தா, தெம்மாங்கா
 தரைதொட முடியா ஞான சமுத்திர ஆழமே,
 எதை நீ பாடவில்லை?
 தியாகய்யரின் முத்துசாமி தீட்சிதரின்
 திறமைகளை வியந்து சொன்னாலும்
 கேட்ட பாடலையே கேட்டுக் கொண்டிருக்கும்
 பிரகிருதிகளை இரும்புக் காதுகொண்ட மனிதரென்று
 எள்ளலாய்ச் சொல்லி...
 புதுப்புது கீர்த்தனங்கள் தமிழிலே வேண்டுமென்றாய்!
 சன்மானங்களுக்கும் சமஸ்தானங்களுக்கும் பாடாததால்
 சங்கீதத்தின் எல்லா முனைகளுக்கும் சென்று வந்தாய்!
 நீலவானின் நீள அகலங்களில்
 இஷ்டமாய்த் திரியும் பறவையாய்
 பாடல்களெங்கும் உன் பயணம்
 பாடல்களில் மட்டுமல்ல
 இசைக் கருவிகளின் சுநாதங்களிலும்
 கிறங்கிப்போனாய்!
 வீணையும் குழலும்
 இன்னபிற கருவிகளும்
 உன் கவிதையெங்கும் ஒலிக்கும் போது
 ஆர்மோனியத்தின் மீதான
 உன் வெறுப்பின் மர்மம் மட்டும் விளங்கவில்லை
 மரபின் பிடியில் மகிழ்ந்திருந்த புலவர்கள்
 இலக்கண மயக்கத்தில் இறுகிக் கிடந்தபோது
 நீ தானே வழித் தடத்தை மாற்றிப்போட்டு
 எளிய கவிப்பாடல்களால் இன்பக் களி செய்தாய்!
 தமிழில் பாடாத கலைஞர்களுக்கு மத்தியில்
 தமிழும் இசைக்கு நன்று சாலுமென்று
 புதுப்பாடல் புனைந்து காட்டினாய்!
 கப்பல்களற்ற கடலின் மேல்
 கலங்கரை விளக்கச் சுழலொளியாய்
 தவித்த உன் தமிழ்க் கீர்த்தனைக் கனவு
 நனவானகிப் போனதய்யா
 அதைக் கேட்கத்தான் நீயில்லை!
 புறக்கணிப்பின் இடரகற்றி
 உன்னைப் பற்றியே
 "பாமலைக்கிணையுண்டோ
 நீ பக்தியுடன் தொடுத்த பாமலைக்கிணையுண்டோ?"
 என்ற பாநாசம் சிவனின் கீர்த்தனையில்
 "தமிழ் நாட்டின் தவப்பயனாய்' என்ற
 உன் புகழ் பாடும் வரியில்
 மதுரை மணி செய்யும் நிரவலொரு பேரழகு!
 முடிவிலா அதிர்வாய்
 காலத்தின் ஏக்கமாய்
 "தமிழிலே கீர்த்தனங்கள் வேண்டி
 நீ 1916-இல் எழுப்பிய குரலுக்கு
 கௌரவங்கள் சேர்ந்த பின்னும்
 அந்தக் கச்சேரிகளைச் சென்று இன்று
 கேட்கத்தான் ஆளில்லை
 நீ இன்றிருந்தால் தமிழர்களுக்கு இருப்பது
 என்ன காதென்று சொல்வாயோ, தெரியவில்லை!
 
 - ரவிசுப்பிரமணியன்
 
 

]]>
https://www.dinamani.com/weekly-supplements/dinamani-kathir/2018/dec/24/தரைதொட-முடியா-ஞான-சமுத்திர-ஆழம்-3064134.html
3064131 வார இதழ்கள் தினமணி கதிர் வெல்க உன் கனவுத் தீ! Monday, December 24, 2018 10:36 AM +0530  ஒரு பருக்கையில்லையெனில்,
 தனியொருவனுக்கு உணவு இல்லையெனில்,
 இச்சகத்தை அழிக்கச் சொன்ன சிறுத்தையிவன்.
 நெருப்பு வரிகளை நெஞ்சில் விதைத்திட்ட நெருப்பு பிழம்பு இவன்.
 களைகள் போல தமிழ் வயலைக்
 கரையானாய் அரித்துக் கிடந்திட்ட
 அக்காலம் மாற்றியவன்.
 முறத்தில் புலிதுரத்திய மறத்தி பால் குடித்த
 குங்குமம் சூடிய குமரிக் கண்டமிவன்
 கருப்புச் சட்டைக்குள் வெறுப்பை வேரறுக்க
 வேல் பதுக்கியவன்.
 சாதி களைந்தெறிய சதிகள் முறியடிக்க வந்த
 சாரதீ இந்த பாரதீ.
 அடிமை விலங்கொடிக்க
 பகைவர் தலைதெறிக்க
 எரிதழல் கொண்டெழுதியவன்.
 அச்சமென்பதில்லையெதும் துச்சமெனக்கு என
 தூர்வாரக் கிளம்பிய போர்வாளிவன்.
 வந்தேமாதரம்... வந்தேமாதரம் என்ற வார்த்தை பீரங்கிதனை
 முழக்கம் செய்த அருமுரசு இவன்.
 காகம் குருவிதனை தன் சாதி என்றுரைத்த
 சக்தி காளியவள் புத்திரனிவன்.
 ரசித்து பா படித்து அருமை கவி எழுதி
 ரெளத்திரம் பழகச் சொன்ன சரித்திரமிவன்.
 மழலை மனங்குளிர மலையும் பெயர்ந்து விழ
 மகுடவரி படைக்கும் மந்திரனிவன்.
 பார் போற்ற நற்பா இயற்றி
 இப்பார் வென்ற பாசறைப் புலவனிவன்
 ஆத்திரங் கொண்டோர்க்கே
 சாத்திரமில்லையென
 சூத்திரம் உரைத்த கவிச்சூரியனிவன்
 பார் ஏதி என்றும் பார் தீ என்றும்
 ரசித்துப் பா படித்து, அருமை கவி எழுதி
 எனைத் தூண்டிய பெருந்தீ,
 இந்த பாரதி
 வாழ்க பாரதி
 வெல்க உன் கனவுத் தீ.
 - பாரதி பத்மாவதி
 
 

]]>
https://www.dinamani.com/weekly-supplements/dinamani-kathir/2018/dec/24/வெல்க-உன்-கனவுத்-தீ-3064131.html
3064133 வார இதழ்கள் தினமணி கதிர் இனியொருவன் நிகரில்லை உனக்கு! Monday, December 24, 2018 10:36 AM +0530 அச்சமில்லை, அச்சமில்லை, அச்சமில்லை என்றே நீ
 இச்சகத்தில் அடிமைத்தளை அறுத்துவிட்ட பாங்கும்
 மிச்சம்மீதி வைக்காமல் சொற்சுவையும் குறையாமல்
 லட்சியத்தை வார்த்தைகளில் வடிவமைத்த பாங்கும்
 
 அஞ்சனத்து வண்ணனையே உருமாற்றி உந்தன்
 நெஞ்சகத்துக் காதலியாம் கண்ணம்மா வாக்கி
 வஞ்சியர்தம் சுடர்விழியில் தஞ்சமடை கின்ற
 கொஞ்சுதமிழ் கவிதையாய் நீவிரித்த பாங்கும்
 
 சித்தர்களும் செப்பிடாத தத்துவங்கள் பொழிந்து
 பித்தர்களைத் தெளியவைத்த வித்தகமாய் மலர்ந்து
 எத்தருணம் என்றாலும் அத்தனைக்கும் பொருந்தும்
 புத்தகமாய் விரியுமுந்தன் கவிதையதன் பாங்கும்
 
 இனியொருவன் நிகரில்லை இனியுலகில் எங்கே
 இனியதமிழ் வாழுமந்த நாள்வரையில் செப்பும்
 தனியொருவன் உணவுக்குத் தவித்திடாத வரையில்
 உனையன்றி யாரொருவன் உவமையிங்கு நிற்கும்?
 
 தடம்புரளா ரயில்போல எதுகைமோனை இயங்க
 உடன் பிறந்த உயிர்போல ஓசைநயம் இணங்க
 குடம்குடமாய் மலைத்தேனைப் பருகிவிட்ட தமிழும்
 மடைதிறந்து பாய்ந்ததுவோ பாரதியின் கவியில்
 
 உற்றவர்கள் மூடனென்றும் சுற்றமதோ பித்தனென்றும்
 கற்றவர்கள் அயலகத்தார் தேசத்தின் துரோகியென்றும்
 சுற்றிவிட்ட சுடுசரங்கள் சற்றுமுனைத் தீண்டவில்லை,
 மற்றவர்கள் மாண்டுவிட நீமட்டும் வாழுகின்றாய்!
 
 காணிநிலம் மட்டுமேநீ யாசித்த போதும்
 வாணியவள் பணித்திட்டாள் சாகாவரம் உனக்கு
 கேணியதன் தெள்ளியநீர் போலிங்கே தமிழும்
 பேணியுந்தன் கவிதைகளை நிரந்தரமாய்ப் போற்றும்
 
 ஏட்டுக்குள் புதைந்திருந்த வார்த்தைகளை மெருகேற்றி
 நாட்டுக்குள் நடக்கவிட்ட வித்தகனே நீவாழி!
 கூட்டுக்குள் அடைந்திருந்த தமிழ்தன்னை விடுவித்து
 பாட்டாக்கி வளையவர வைத்தனையே நீவாழி!


 - கலாரசிகன்

]]>
https://www.dinamani.com/weekly-supplements/dinamani-kathir/2018/dec/24/இனியொருவன்-நிகரில்லை-உனக்கு-3064133.html
3064128 வார இதழ்கள் தினமணி கதிர் பாரதி என்னும் ஆகிருதி Monday, December 24, 2018 10:35 AM +0530 எனக்குத் தட்டுவதற்காகவே 
கைகளோடு வந்தவர்களே
உங்கள் கைகளுக்கு என்
கவிதை வணக்கம்
முகம்பார்த்துச்
சொல்லவேண்டிய வணக்கத்தை
இவனெதற்குக்
கை பார்த்து சொல்கிறானென்று
யோசிக்கிறீர்களா?
இலக்கியத்தை
ஒரு கை பார்த்தவன்
பாரதி என்பதால்
நானும் உங்கள்
கைகளைக் கௌரவிக்கும்
வணக்க வார்த்தைகளோடு
வந்திருக்கிறேன்
கையால் ஆகாதது
எதுவுமில்லையென்று
இந்த மேடையிலாவது
சொல்லிவிட்டுப் போகிறேன்
ஏனெனில், இந்தியாவைத்
தங்கள் கைகளுக்குள்
வைத்துக் கொள்ள விரும்பிய
வெள்ளை ஏகாதிபத்தியத்தை
அவன் கையிலிருந்து வந்த
வார்த்தைகளே கழுவிலேற்றின
போராளிகளுக்குக் கைகொடுக்க
அவன் புனைந்த கவிதைகள்
சுதந்திர இந்தியாவின்
நம்பிக்கை மட்டுமல்ல,
சுதந்திரம் பெறாத இந்தியாவின்
தேசத் துரோக நடவடிக்கை
அவன் கார்த்திகைக்கு
ஏற்றப்பட்ட அகல் விளக்கல்ல
கவலை இருட்டுகளைப்
போக்கக் வந்த முரட்டுச் சூரியன்
அவன் குனிந்து குனிந்து
எழுதிய வார்த்தைகள்
முடமாய்க் கிடந்த இந்தியாவின்
முதுகை நிமிர்த்தின
அதுமட்டுமல்ல,
அழுது கொண்டிருந்த
இந்திய அன்னை
அவன் எழுத வந்த பிறகுதான்
எழுந்து உட்கார்ந்தாள்
வார்த்தைகளால் விடுதலையை
வரவழைக்க முடியுமா? என்று 
கேட்கலாம்... உண்மையில்,
வார்த்தைகளுக்கும் விடுதலையை
வழங்கியவன் பாரதிதான்
பொய் நிறைந்த கவிதைகளுக்கு
அவன் பூப்பு நீராட்டு
நடத்தவில்லை - மாறாக
வயதுக்கு வந்துவிட்ட விடுதலைக்கு
வளைகாப்பு நடத்தினான்
சொர்க்கக் கனவுகளில்
சொக்கிப் போயிருந்த கவிதைகளை
தரைக்கு இழுத்துவந்து
தாலி கட்டியன் அவன்தான்
தூக்கணாங்குருவிகளுக்குத்
தூதுவிட்ட கவிதைகளை
மூக்கணாங்கயிறு போட்டு
முற்றத்துக்குக் கொண்டு வந்தவனும்
அவனே
அவன் கொடுக்கிற தெய்வமாய்
இருந்தபோதும் கூரையைப் பிய்த்து
கொட்டவில்லை, மாறாக
ஏழைகளுக்கான கூரைகளாகவே
கொட்டியிருக்கிறான் கவிதைகளை
நான் என் பெயரில்
பாரதியை வைத்திருக்கிறேன்
என்று நினைக்காதீர்கள்
அவன் பெயரால் நான்
பசியில்லாமல் வாழ்கிறேனென்று
பார்த்துக் கொள்ளுங்கள்
ஒட்டுமொத்த கஷ்டங்களையும்
அவன் ஒருவனே பெற்றுவிட்டதால்
பின்னால் வந்த நாங்கள்
பிழைத்துக் கொண்டிருக்கிறோம்
எளியவர்களையும்
எழுத வைத்தது அவன் சாதனையல்ல
எழுதி எழுதி சாதித்தவர்களும்
அவன் முன்னால் எளியவர்களாகவே
இருக்கிறார்களே...
அதுதான் சாதனை
முண்டாசும் மீசையும்
அவன் அடையாளங்களாகச் 
சொல்வதுண்டு.
எனக்கோ அவை இரண்டும்
அடையாளங்களாகத் தெரிவதில்லை
அவன் பற்ற நினைத்த
அதிகாரங்களாகத் தெரிகின்றன
அவன் முண்டாசு-
அவனுக்கு அவனே வைத்துக்கொண்ட
கிரீடம்
அவன் மீசை-
அவனுக்கு அவனே எழுப்பிக்கொண்ட
முடியாட்சி
அவனுடைய கவிதைத் தாள்கள்
அர்த்த ராத்திரியில்
அறிவிக்கப்பட்ட செல்லாத 
நோட்டுகளல்ல...
அர்த்தமில்லாமல் நீண்ட ராத்திரிகளை 
செல்லாமல் போகவைத்த
சிந்தனைகள்
பாரதியும் கோட்டை 
விரும்பி அணிந்தான், ஆனாலும், அதை
சர்ச்சைக்குரிய விஷயமாக
சமுதாயம் பார்க்கவில்லை
கிழிந்து தொங்கிய அவன் ஆடைகள்
சுதந்திர இந்தியாவின்
தோரணங்கள் ஆயின
காணி நிலத்திற்குக் கையேந்திய 
அவன் தான்
ஒட்டுமொத்த இந்தியாவையும்
உரிமை கொண்டாடினான்.
காசியில் பாரதி கொஞ்சநாள்
கால் வைத்திருக்கிறான்.
அதனால்தான் அது
புண்ணிய பூமியென்று நானும்
சொல்கிறேன்.
அவன் ஒருவன்தான்
தேசியத்தை மதம் என்று
பேசத் தொடங்கியவன்
இன்றோ...
மதமே தேசமென்று சிலபேர்
பேசிக் கொண்டிருக்கிறார்கள்
யாவருக்கும் ஒரே நீதி
என்றுதான் அவன் எழுதினான்
ஆனால் தற்போதோ
ஆளுக்கொரு நீதியென்று
அறிவிக்கப்படுகிறது
அவன் பயமில்லாமல்
எல்லா பிரச்னைகளையும் எழுதினான்
நாங்களோ
எழுதினால் பிரச்னையாகுமென்று
எல்லாவற்றுக்கும்
பயந்துகொண்டிருக்கிறோம்
தெய்வம்
அவனுக்குள் இருந்தது
அதனால்தான் அவன்
கனகலிங்கத்தை கட்டியணைத்தான்
அவன் போட்டுவிட்டது
பூணூல் என்றா நினைக்கிறீர்கள்
இல்லை இல்லை, அது அவன்
போலி மதவாதத்தை
போகச்சொல்லி காட்டிய
கருப்புக் கொடி
அவன்
அறிவே தெய்வமென்று
அறைகூவல் விடுத்தான்
ஆனால், இப்போதோ
அறிவை மதிப்பவர்கள்
தெய்வத்தை நம்புவதில்லை
தெய்வத்தை துதிப்பவர்கள்
அறிவோடு நடப்பதில்லை
பாரதிதான்
அரசியல் கவிதைகளின்
ஆரம்பப் புள்ளி.
அவன் எழுதிக்காட்டாமல்
போயிருந்தால்
அன்னைத் தமிழ்மொழி
அந்தப்புரத்திலேயே இருந்திருக்கும்
அறியா சனங்களிடமும் வந்திருக்காது
அரிசனங்களிடமும் வந்திருக்காது
உங்களுக்குத் தெரியுமா?
நாமெல்லோரும்
பாரதத்தில் ஒருத்தியாகவே
பாஞ்சாலியைப் பார்க்கிறோம்
ஆனால் பாரதி ஒருவன்தான்
பாரதத்தையே
பாஞ்சாலியாகப் பார்த்தவன்
குழல் ஊதிக்கொண்டிருந்த
கண்ணனை 
பாவப்பட்டவர்களுக்காகப்
பறையிசைக்க வைத்தவனும்
பாரதிதான்
காக்கை குருவிகள்
எங்கள் ஜாதி என்றவனுக்கு
ஆணவக் கொலைகளைப் பற்றி
அப்போதே தெரிந்திருக்கிறது
அதனால்தான்
ஆதலினால் காதல் செய்வீர்
என்று ஆரம்ப வரி எடுத்தான்
அவன் ஒருவன் தான்
இரு கட்சிகளுக்கும்
இடையிலே கற்பை வை என்றான்
இப்போதிருக்கிற கட்சிகளுக்கோ
கற்பை விடவும் ஆட்சியைக் 
காப்பாற்றவேண்டிய கட்டாயமிருக்கிறது
வராசக்தியெல்லாம்
வருமென்று நம்பிய அவன்
பராசக்தியைப் பார்க்க விரும்பினான்
நாங்களோ
பராசக்தியைப் பார்த்துவிட்டு
இருந்த சக்தியையும்
இழந்து நிற்கிறோம்
தூங்கிக்கிடந்த இந்தியாவை
அவன் தூக்கி நிறுத்தினான்
நாங்களோ
முட்டுக்கொடுக்கிறோம் 
என்கிறபேரில்
மொட்டை அடிக்கிறோம்
நான் நினைப்பதுண்டு,
சினிமாவுக்கு பாரதி
பாட்டெழுதியிருந்தால்
வார்த்தைகளைக் கொலை செய்யும்
இந்திப் பாடகர்களை
எட்டி உதைத்திருப்பான்
அரை நிர்வாண இசையை
மோதி மிதித்திருப்பான்
முகத்தில் உமிழ்ந்திருப்பான்
இந்த கேடுகள் தமிழுக்கு
வரவேண்டாமென்றுதான்
சுந்தரத் தெலுங்கினில் பாட்டிசைக்கச்
சொன்னானோ?
ஜனங்கள் முழுமைக்கும்
ஒரே சங்கமென்று அவன்
கனவு கண்டான், இப்போதோ
நம்முடைய ஜனங்கள்
கனவுகளில்கூட ஜாதிகளையும்
சங்கங்களையும் மறப்பதில்லை
பெண்களின் 
இடையைப் பற்றி பாரதியும்
யோசித்திருக்கிறான்
ஆனால்... அவன்
இல்லாத இடையைப் பற்றி
எழுதவில்லை
இடுப் பொடிந்த இடையைப் பற்றியே
எழுதியிருக்கிறான்
பள்ளித் தலமனைத்தும்
கோயில் செய்வோம் என்ற பாரதிக்கு
கோயில்களில் இருந்த சிலைகள்
காணாமல் போன
கதை தெரியுமா?
நாட்டு விடுதலையே
மூச்சென்று நம்பிய அவன்
யானை மிதித்து மரிக்கவில்லை
ஆமை மிதித்தே 
ஆவியை விட்டிருக்கிறான்
அந்த ஆமை அறியாமை
அந்த ஆமை கல்லாமை
அந்த ஆமை தீண்டாமை
அந்த ஆமைகளை வெல்வோம்
அல்லது
அந்த ஆமைகளைக் கொல்வோம் 
- யுகபாரதி
 

]]>
https://www.dinamani.com/weekly-supplements/dinamani-kathir/2018/dec/24/பாரதி-என்னும்-ஆகிருதி-3064128.html
3064130 வார இதழ்கள் தினமணி கதிர் செழுஞ் சுப்ரமணி பாரதி! Monday, December 24, 2018 10:35 AM +0530 முடிகொண்ட தலைமீது முக்கோண மலைவடிவில் மூழ்கிய தலைப்பாகையும்
 மூக்குநுனி கீழடியில் தேக்குநிற இதழ்வெளியில் முனைகூர்ந்து வளைமீசையும்
வெடிகொண்ட குண்டுகளின் வடிவமென உருள்பாவை குடிகொண்ட இரண்டு விழியும் வீரரவர் உருவமென தீரரவர் கருவமென வளையாத நிமிர்பார்வையும்
 கொடி கொண்ட மலர்வரிசை என வந்த கவிவரிசை குறையா தளிக்குமனமும்
 கோடானுகோடி உயிர் யாமேஎனப் புகலும் கொள்கைவழி சேர்நேர்மையும்
 தடிகொண்ட செங்கோலும் தளராத செந்நாவும் இடங்கொண்ட கவிவேந்தனே!
 தலைமுறைகள் பலகோடி உனதுபுகழ் தனைப்பாடும் தனிசுப்ர மணிபாரதி!
 சொல்கின்ற பொருள்தன்னை சொல்கின்ற வகைதன்னில் சொல்கின்ற பேறுபெற்றாய்!
 சூக்குமப் பொருள்யாவும் தேக்கிடும் கவிநூறும் செய்கின்ற பெருமையுற்றாய்!
 வெல்கின்ற சொற்கொண்டு விளைகின்ற கற்கண்டு விஞ்சிடும் சுவையிசைத்தாய்!
 வேலாயுதன் கையின் கூராயுதம் என்ன வீறிடும் கவி வடித்தாய்!
 கொல்கின்ற வறுமையினைக் கொல்கின்ற வகைபுரியக் கூவி நீ பாட்டிசைத்தாய்!
 கொல்லர் உலை வேலை முதல், கப்பல்தொழில், ஆலை வரை கற்றிடுதல் வேண்டுமென்றாய்!
 செல்கின்ற வழிநெடுக செந்தமிழின் பயன்பெருக செய்க நல நூல்கள் என்றாய்!
 சென்மங்கள் பலகோடி, சமுதாயம் உனை வாழ்த்தும் செழுஞ்சுப்ர மணிபாரதி!
 - அமுதபாரதி

]]>
https://www.dinamani.com/weekly-supplements/dinamani-kathir/2018/dec/24/செழுஞ்-சுப்ரமணி-பாரதி-3064130.html
3059789 வார இதழ்கள் தினமணி கதிர் உன்னால் முடியும் கவிதா! DIN DIN Monday, December 17, 2018 10:53 AM +0530 பிள்ளையார்கோயில் தெருவின் திருப்பத்தில், கவிதாவும் அவள் உயிர்த்தோழியாகிய பத்மாவும் இன்னும் நாலைந்து தோழிகளும் நடந்தார்கள். பத்மா கவிதாவிடம்,"கவிதா ! இன்று நீ எங்களுடன் புடவை எடுக்க பெரிய கடைக்கு வரணும். நாளை தமிழ்ப் புத்தாண்டு. நாம் எல்லாரும் புதுப்புடவை கட்டிக்கொண்டு, ஆபீஸýக்கு தமிழ்ப் புத்தாண்டுக்கு மறுநாள் வரவேண்டும். நீ என்ன சொல்றே ?'' என்று கேட்டாள். மேலும் அவள் தன்னுடன் கூட நடந்து வரும் தோழிகளைச் சுட்டிக்காட்டி, ""பெரிய கடைக்கு அவர்களெல்லாம், என்னுடன் டிரஸ் எடுக்க வரவும் சம்மதித்து விட்டாங்க. நீ மட்டும் வரமாட்டேன்னு ஏன் பிகு பண்ணிக்கிறே கவிதா?'' என்றாள் பத்மா.
""நான் பிகு பண்ணலே பத்மா ! நான் உங்களோட பெரிய கடைக்கு டிரஸ் எடுக்க வந்தால், என்னோட மாமியார் வீட்டிலே பிரச்னை ஏற்படும் என்றுதான் நான் யோசிக்கிறேன். என்னை எப்போதும்போல் உங்கள் வழிக்கு இழுக்காதீங்க'' என்றாள்
"என்ன பெரிய பிரச்னை வரப்போறது? உன்னோட மாமியார் கணக்கு கேட்பார். உன்னோட ஹஸ்பெண்ட் பெர்மிஷன் இல்லாமல், எதுவும் நீ செய்யக் கூடாது. அடுத்து உன்னோட மாமா வேறு உன்னைக் கோபித்துக் கொள்வார். இதானே உன் பிரச்னை'' என்று கவிதாவைப் பற்றி நன்கு தெரிந்து கொண்டே கேட்டாள் பத்மா.
"ஆமா பத்மா... என் குடும்பத்தைப் பற்றியெல்லாம் தெரிந்திருந்தும் ஏன் என்னை வற்புறுத்தி பெரிய கடைக்கு டிரஸ் எடுக்க உங்களோட என்னையும் அழைக்கிறே?''
"உன்னோட மாமனார், மாமியார் ஹஸ்பெண்ட் எல்லாருக்கும் பயந்துபோய் உன்னோட சின்னஞ்சிறு ஆசைகளையும் உணர்வுகளையும் கட்டுபடுத்திக்கொண்டு நீ அவர்களிடம் அடிமையைப்போல் வாழ்வது, உனக்கு அவமானமாகத் தெரியலையா கவிதா?''
"எனக்கு உணர்ச்சிகள் இருந்தால்தான் நான் அவங்களுக்கு அடிமையா, எஜமானியான்னு கேட்கத் தோன்றும். எனக்கு அதுதான் இல்லையே பத்மா'' என்று அலுத்துச் சலித்துக் கொண்டாள் கவிதா.
"இந்தக் கம்ப்யூட்டர் காலத்திலும் மாமியாருக்குப் பயந்து வாழும் பெண்கள் இருக்காங்கன்னு உன்னைப் பார்த்துதான் நான் தெரிந்து கொண்டேன் கவிதா''
"எல்லாம் என்னோட தலைவிதி. என்னோட தலைவிதியை நீயோ நானோ மாற்ற முடியுமா பத்மா?'' தன்னோட இயலாமையை இப்படிக் கூறினாள் கவிதா
"நீ அவங்களுக்கெல்லாம் அடங்கி போவதால்தான், அவர்கள் உன்னை அடக்கி வைத்திருக்காங்க. நீ இப்படி எல்லாம் அடங்கிப் போவதால், உன்னோட புருஷனுடைய கோழைத்தனத்துக்கு நல்ல தீனி. தன்னோட வசதிக்காக, உன்னை அவர் தன்னோட அப்பா அம்மா பேரைப் பயன்படுத்தி உன்னை அடங்கிப் போகுமாறு கூறுகிறார்''
"பத்மா ப்ளீஸ்... என்னை "கம்பல்' பண்ணாதே. நீ சொல்றபடியெல்லாம் நான் கேட்டால் மற்றவங்க என்னை தப்பாகவே பேச ஆரம்பித்து விடுவாங்க. அக்கம் பக்கம் உள்ளவங்க "அடங்காத மருமகள்' " அடங்காப் பிடாரி' என்று பட்டம் வேறு என் மீது கட்டி விடுவாங்க. இப்படி எல்லாம் நான் பேச்சு கேட்க வேண்டுமா?'' என்று கவிதா தன் இயலாமையை வெளிப்படுத்தினாள்
பத்மா, கவிதாவை அவள் வழிக்கு இன்று விடுவதாக இல்லை. அவளைத் தன்னுடைய வழிக்கு எப்படியும் கொண்டுவந்து விட வேண்டும் என நினைத்துக்கொண்டு, "கவிதா... நான் சொல்வதைக் கவனமாகக் கேள். தன்னோட அப்பா, அம்மாவை கஞ்சிக்கு அலைய விட்டு விட்டு தான் மட்டும் தனிக்குடித்தனம் நடத்திக்கொண்டு சொகுசா இருக்காங்களே, அப்படிப்பட்ட பிள்ளைகளை, நடுரோட்டில் வைத்து சுட்டுத் தள்ளணும். அதே சமயத்தில் தன்னோட மகன், மருமகளுடைய இயல்பான உணர்வுகளுக்கு மதிப்புக் கொடாமல் நந்திபோல் குறுக்கே நிற்கும் பெற்றவர்கள் கூறுவதையெல்லாம் நாம் கேட்க வேண்டும் என்ற கட்டாயம் இல்லை'' என்று சற்று உரக்கவே உணர்ச்சியுடன் கூறினாள் பத்மா.
கவிதா பத்மா கூறுவதைக் கேட்டு அமைதியாக இருந்தாள். ஆனால் அதே சமயத்தில் அவள் மனதில் ஒரு போராட்டமே நடந்து கொண்டிருந்தது. தனது புகுந்த வீட்டைப் பற்றி இப்போது நினைக்கவும் ஆரம்பித்தாள். ஆம். கவிதா தனது கணவருக்கு நிகராக ஒரு தனியார் கம்பெனியில் பணிபுரிந்து வந்தாள். ஆனால் அவள் வாங்கும் சம்பளத்தை ஒரு பைசா குறையாமல் கவரில் வைத்து மாதாமாதம் மாமியாரிடம் ஒப்படைக்க வேண்டும். அதனால் அவள் ஒரு டீ குடிக்க வேண்டுமானால் கூட யோசித்துதான் செலவு செய்வாள் கவிதா.
புகுந்தவீட்டில் அவள் இருக்கும் சூழ்நிலை பற்றி தெரியாதவர்கள், கவிதா பணம் செலவழிக்காத சுத்தக் கருமி என்றும், பணத்தை இப்போதே தனக்கு சேமித்து வைக்கிறாள் என்றும் தான் நினைப்பார்கள். அவள் நிலையை நன்கு உணர்ந்தவள் அவளுடன் பணிபுரியும் உயிர்த்தோழி பத்மா மட்டும்தான். அவள் கவிதாவுக்கு அடிக்கடி அவளது கோழைத்தனத்தைச் சுட்டிக்காட்டி, தன்னோட வழிக்கு வரும்படி வற்புறுத்துவாள். அதேபோல்தான் இப்போதும் தன்னோட வழிக்குக் கவிதாவைக் கொண்டு வருவதற்கு, அவள் பெரிய கடைக்கு வருவதற்கு முயற்சியை மேற்கொண்டாள்.
"கவிதா... உன்னோட மாமனார், மாமியார் கூறுவதெல்லாம் நீ கேட்க வேண்டாம் என்று நான் உன்னிடம் கூறவில்லை. உனக்காக அவர்கள் கூறும் நல்லவற்றை மட்டும் நீ எடுத்துக்கொள். அதேசமயம் அவர்கள் உன்னைச் சுற்றி ஒரு தேவையில்லாத எல்லைக்கோடு போட்டு விட்டு, அதற்குள்தான் நீ சுற்றி வரவேண்டும், வாழ வேண்டும் என்று உன்னைக் கட்டுப்படுத்தும்போது, நீ ஏன் அந்த எல்லைக்கோட்டைத் தாண்டி வரக்கூடாது. எனக்கு மட்டும் மாமனார், மாமியார் இல்லையா! நாங்களெல்லாம் அவர்களுடன் சேர்ந்து வாழவில்லையா? நீ ஏன் இப்படி மாமனார் மாமியார்க்கெல்லாம் பயந்து பயந்து சாகுற? ஏனென்று எனக்குப் புரியவில்லை'' என்றாள்.
"பத்மா... பெண்ணுரிமை, பெண் விடுதலை, சமஉரிமை என்பதெல்லாம் மேடையேறிப் பேசினால், எழுதினால் கேட்பதற்கும் படிப்பதற்கும் நம்மைப் போன்ற பெண்களுக்கு நல்லாத்தான் இருக்கும். ஆனால் நடைமுறைக்கு இதெல்லாம் ஒத்து வராதுப்பா'' என்றாள் கவிதா.
"கவிதா, நான் என்ன சொல்ல வரேன் என்பதை நீ இன்னும் சரியாகப் புரிந்து கொள்ளவில்லை என்றுதான் நான் நினைக்கிறேன். இப்போது நான் சொல்வதைக் கேட்டு, நீ என் மீது கோபப்பட்டு விடாதே. ஒரு பேச்சுக்குத்தான் சொல்றேன். இப்போது நீ யாருக்கும் தெரியாமல், ஏதோ தவறான செயல் செய்கிறாய் என்று வைத்துக் கொள். அதைப் பார்த்து விட்டு, தெரிந்து கொண்டு உன்னோட மாமாவோ, மாமியாரோ உன்னைக் கண்டித்து, உன்னை நல்வழிப்படுத்த நினைத்து, உன்னை அவர்கள் கண்டித்து அடக்குறாங்கன்னு வைத்துக்கொள். அதற்கு தாராளமாக நீ அவர்களிடம் அவர்கள் சொல்வதைக் கேட்டு அடங்கிப் போகலாம். அடங்கித்தான் போக வேண்டும். அதை நான் மட்டும் அல்ல; குடும்பப் பெண்ணாக யாராக இருந்தாலும் அதனை நன்கு வரவேற்பார்கள். அதில் உன்னோட குடும்பக் கவுரவம் மட்டுமல்லாமல், நமது நாட்டுப் பண்பாடும் அடங்கி இருக்கு'' என்று அவளுக்குப் புரியும்படி விளக்கினாள்..
"பத்மா, நீ என்னை இன்று ஒரு வழி பண்ணாமல் விடமாட்டேபோல் தெரிகிறது. இப்போது நீ என்னை என்னதான் செய்யச் சொல்றே?'' என்று கவிதா தனது பிடிவாதத்திலிருந்து கீழே கொஞ்சம் இறங்கி வந்தாள்.
"கவிதா... அப்படி வா வழிக்கு. சமஉரிமை பெண் விடுதலை என்பதெல்லாம் கட்டுப்பாடு இல்லாமல், பெண்கள் சுதந்திரமாக இருக்கலாம் என்பதல்ல. யார் நல்லதை எடுத்துச் சொன்னாலும் அதைக் காது கொடுத்து கேட்காமல், அவங்க என்ன சொல்வது, நாம் என்ன அடங்கி நடப்பது என்ற தவறான எண்ணத்தில் இருப்பதல்ல. நாம் அடங்கி நடக்க வேண்டியதற்கு மட்டும் அடங்கி நடக்க வேண்டும். அதே சமயத்தில் குதிரைக்கு கண்ணை மறைத்து விட்டால் ஒரே பாதையில் செல்வதுபோல், எல்லாவற்றிற்கும் அடங்கியும் போகக்கூடாது. அதாவது உன்னைப்போல். போதுமா? நாமும் நல்லது எது ? கெட்டது எது ? என்று சுயமாகச் சிந்தித்து செயலபட வேண்டும் கவிதா'' என்று ஒரு குட்டிப் பிரசங்கமே செய்தாள் பத்மா.
"பத்மா, என்னைப் பொறுத்தவரை என்னோட குடும்பத்தில், அதாவது எனது புகுந்த வீட்டில் எனக்குள்ள உரிமையைப் பெறுவதற்கு, நான் துணிவுடன் முன் வரவேண்டும் என்று கூற வருகிறாய், அப்படித்தானே'' என்றாள் கவிதா.
"அப்பாடி ! கவிதா இப்போதாவது ஒரு வழியாக நான் சொல்வதை சரியாகப் புரிந்து கொண்டாயே. நமக்குள்ள நியாயமான உரிமையை எப்போதும் விட்டுக் கொடுக்கக் கூடாது. நீயும் உன் ஹஸ்பெண்ட் போல் வேலைக்குப் போய் சம்பாதிக்கிறாய். நீ சம்பாதிக்கும் பணத்தில் உனக்கும் செலவு செய்ய உரிமை உண்டு. அதை யாரும் தடுக்க முடியாது, துணிந்து உன்னோட உரிமையை நிலைநாட்டு. உன்னோட ஹஸ்பெண்டும் நாளடைவில் உணர்ந்து கொண்டு, உன் வழியில் வருவதோடு, அவருடைய அப்பா, அம்மாவிடம், உனக்காக உனது உரிமைக்காக வாதாடவும் முன்வருவார்'' என்றாள் பத்மா.
கவிதா ஒரு தீர்க்கமான முடிவுக்கு வந்தவளாக, "சரி பத்மா! நானும் உங்களுடன் பெரிய கடைக்கு டிரஸ் எடுக்க வரேன், உனக்குச் சந்தோஷம்தானே. அதனாலே என்னோட வீட்டில் ஏற்படப்போகும், பின்விளைவுகளையும், எதிர்கொள்ள நான் தயாராகி விட்டேன்'' என்று அவள் கூறும்போது பத்மாவும் அவளுடைய தோழிகள் அனைவரும் கைதட்டி ஆரவாரம் செய்து வரவேற்றார்கள்.
கவிதா அவர்களுடன் சேர்ந்து பெரிய கடைக்குச் சென்றாள். அங்கு தனக்கு ஒரு புடவை எடுத்துக் கொண்டாள். அதேபோல் தனது மாமியாருக்குப் புடவை, மாமாவிற்கு வேஷ்டி சட்டை, கணவருக்குப் பேண்ட் சர்ட்டிங் கிளாத் எடுத்துக் கொண்டாள். பில் ரூபாய் மூன்றாயிரத்தைத் தாண்டியது. கவிதா கிருஷ்ணாவில் ஸ்வீட் பாக்ஸ் வாங்கிக் கொண்டாள். பத்மா மற்ற தோழிகள் அனைவரிடம் விடைபெற்று, மயிலாப்பூர் செல்லும் நகரப்பேருந்தில் ஏறினாள்.
கவிதா வீட்டிற்குள் தான் வாங்கி வந்த பார்சல்களுடன் நுழைந்தவுடன் கவிதாவின் கணவன் ரமேஷ், "வா கவிதா ! என்ன இன்னிக்கி அமர்க்களமாக பெரிய பார்சலுடன் வருகிறாய்?'' என்று கேலியும் கிண்டலுமாக வரவேற்றான்.
"நாளைக்கு தமிழ் புதுவருஷப் பிறப்பு இல்லையாங்க, அதான் நம்ம எல்லாருக்கும் புதுடிரஸ் வாங்கிட்டு வந்தேன்'' என்று வீட்டில் உள்ள மாமியார் மாமனாருக்கும் கேட்கும்படியாகச் சற்று உரக்கவே கூறினாள் கவிதா.
தான் எடுத்து வந்த டிரஸ்களெல்லாம் மேஜையின் மீது, ஒவ்வொன்றாக கவிதா வெளியே எடுத்து வைக்கும்போது, அதைப் பார்த்துக் கொண்டிருந்த அவளுடைய மாமியார் பொறுத்துக் கொள்ள முடியாமல், "இவ்வளவுக்கும் பணம் அவளுக்கு ஏதுன்னு கேள் ரமேஷ்?'' முகத்தை கடுகடுப்பாக வைத்துக்கொண்டு தன்னோட மகன் மூலம் கேட்க ஆரம்பித்து விட்டாள்.
"எங்க கம்பெனியிலே வழக்கம்போல் தமிழ்ப் புத்தாண்டை முன்னிட்டு போனஸ் கொடுத்தாங்க. அதிலிருந்துதான் இந்த டிரஸ் எல்லாம் எல்லாருக்கும் வாங்கி வந்திருக்கேன்'' என்று தன் கணவருக்கும் மாமியாருக்கும் கேட்கும்படி பொதுவாக கூறினாள்.
""யாரைக் கேட்டுக்கொண்டு இவ்வளவும் செய்தாய் ? டிரஸ் எல்லாம் எடுத்து வந்தாய் ?'' என்று மாமியார் நேரடியாகவே கவிதாவின் மீது சீற ஆரம்பித்தாள்.
"நான் யாரைக் கேட்கணும் அத்தை? இது நம்ம பணம். அடுத்தவங்க பணம்ன்னால்தான் கேட்கணும்'' என்று உரக்கவே அவள் மாமியாரைப் பார்த்து பதிலடி கொடுத்தாள்.
"கவிதா... நீ யாருட்ட பேசுறேன்னு தெரிஞ்சுதான் பேசுறயா ?'' என்று ரமேஷ் வீடே அதிரும்படி கத்தினான்.
"நான் எல்லாம் தெரிஞ்சுதான் பேசுறேன். நீங்க கொஞ்சம் சும்மா இருங்க. கத்தாதீங்க. இது நம்ம வீட்டுப் பணம் என்றுதான் கூறினேன், என்னோட பணம் என்று நான் ஒன்றும் கூறவில்லை. நான் சம்பாதித்த பணம் என்றாலும், நம்ம எல்லாருக்கும் அந்தப் பணத்தைச் செலவு செய்ய உரிமை உண்டு. அதாவது நான் உட்பட'' என்பதை மட்டும் சற்று அழுத்தமாக கூறி விட்டு , "உங்களுக்குப் புரியுதா?'' என்று மாமியார் மாமாவையும் ஓரக்கண்ணால் பார்த்துக்கொண்டே தன்னோட கணவன் ரமேஷுக்குப் பதில் அளித்தாள்.
"என்னடா ரமேஷ்... இதெல்லாம். உன்னோட பொண்டாட்டியின் புதுப்பழக்கம்'' மாமியாரின் பயம் கலந்த கேள்வி.
"அத்தை அவரை ஏன் கேட்கிறீங்க. நானாகத்தான் டிரஸ் எல்லாம் வாங்கி வந்திருக்கேன். நான் சம்பாதித்த பணம் என்றாலும், என்னோட பணம் என்று தனிப்பட்ட முறையில் உரிமை கொண்டாடவில்லை. அதேபோல் எனக்கு மட்டும் புடவை வாங்கி வரலே. உங்களுக்கும் மாமாவுக்கும் சேர்த்துத்தான் டிரஸ் எடுத்து வந்திருக்கேன். இதுல என்ன தப்பு இருக்கு அத்தை?'' என்று இப்போது கவிதா அமைதியாகப் பதில் அளித்தாள்.
"ரமேஷ், வீட்டில் எது செலவழிக்க வேண்டுமானாலும் எல்லாரும் கலந்து பேசி, அதற்கு எல்லாருடைய சம்மதம் தெரிவித்த பிறகுதான், இந்த வீட்டில் யாரும் அந்தச் செலவை செலவழிக்க வேணும்னு உன்னோட பொண்டாட்டிக்குத் தெரியுமா? தெரியாதா?'' என்று கோபத்துடன் கத்தினாள் கவிதாவின் மாமியார்.
" எனக்கு எல்லாமே தெரியும் அத்தை. நான் வாங்கி வந்த சம்பளப் பணத்திலே போன மாதம் உங்க மகளுக்கு, ஒரு மோதிரம் செய்து கொடுத்தீங்களே அதைப்பத்தி நீங்கள் யாரிடம் கலந்து பேசினீங்க, என்னிடம் கூட கேட்டிருக்க வேண்டாம். ஒரு வார்த்தை உங்க பிள்ளையிடமாவது கேட்டுருப்பீங்களா ? நீங்க இப்போது கூறுங்க, நான் உழைத்துச் சம்பாதித்தப் பணத்தை எல்லாம் செலவழிக்க, உங்களுக்கு உரிமையுண்டு, எனக்கு உரிமையில்லையா? இது எந்த விதத்தில் நியாயமோ தெரியலை'' என்று கவிதா கேள்வியுடன் நிறுத்தினாள்.
" என்ன திமிரா அவள் பேசறா பார்த்தீங்களா?'' என்று தன்னோட கணவனிடம் அழ ஆரம்பித்தாள் கவிதாவின் மாமியார்.
"கவிதா கேட்டதில் என்ன தவறு இருக்கு. அவள் கேட்டதெல்லாம், செய்தது எல்லாம் சரிதான். நம்ம மகளுக்கு மோதிரம் செய்யும்போது நீ யாரைக் கலந்து கேட்டுக் கொண்டு செய்தாய் ? எனக்குக்கூட தெரியாது. இப்போது கவிதா சொன்ன பிறகுதான் மோதிரம் பற்றிய விவரமே எனக்கே தெரியுது'' என்று கவிதாவின் மாமியாரை நோக்கி மாமா கடிந்து பேசினார்.
"நீங்களும் மருமகள் பக்கம் சேர்ந்திட்டீங்களா ?'' என்று புலம்ப ஆரம்பித்தாள்.
"அவள் சம்பளப் பணத்தைச் செலவு செய்வதற்கு, நமக்கு எவ்வளவு உரிமையுண்டோ, அதேபோல் அவளுக்கும் அவள் சம்பளப் பணத்தை செலவழிக்க உரிமை இல்லையா ? அவளுக்கும் உரிமை உண்டு. அவள் எனக்குத் தெரிந்து இதுவரைக்கும் தனக்குன்னு எதுவும் ஆசையாக செலவு செய்ததை, நான் பார்த்ததே இல்லை. இப்போது என்ன தேவையில்லாததையா அவள் வாங்கி வந்திருக்காள்? வீணா அவளைப் போய் கோபப்பட்டு பேசுறயே'' என்று கூறி தன் மனைவியை சமாதானப்படுத்த முயற்சி செய்தார் கவிதாவின் மாமனார்..
கவிதாவின் மாமியார், யாருடைய சொல்லுக்கும் எதற்கும் சமாதானம் அடையாமல் தன்னோட உரிமையெல்லாம் கவிதாவினால் , பறிபோய் விட்டதாகத் தவறாக நினைத்துக்கொண்டு, ஒரு பையில் தன்னுடைய துணிமணிகளைத் திணித்துக்கொண்டு "நான் என்னோட மகள் வீட்டுக்குப் போறேன்' என்று கோபத்துடன் வெளியேற முற்பட்டாள்.
"அத்தை... நான் சொல்வதைக் கொஞ்சம் கேளுங்கள். நீங்கள் எங்கேயும் போக வேண்டாம்'' என்று மேலும் ஏதோ கூற முற்பட்ட கவிதாவை, "கவிதா... உன்னோட அத்தையைப் போகவிடு, அவளுக்கு இந்தக் குடும்ப உரிமை முழுவதையும் நீ பறித்து விட்டதாகக் தவறாக எண்ணிக்கொண்டு முடிவும் எடுத்தும் விட்டாள். அந்த எண்ணம் மாறியவுடன் உன்னைப்பற்றி புரிந்து கொண்டவுடன், அவளே நம்மைத் தேடி வருவாள். அதுவரை அவளை அவள் போக்கிலே விட்டு விடுவதுதான் சரி'' என்று கூறி கவிதாவை அவர் மாமனார் சமாதானப்படுத்தினார்.
தன் மாமாவின் மாற்றத்தைக் கண்ட கவிதா, பெரிய கடையில் டிரஸ் எடுக்கும்போது, பத்மாவிடம், "பத்மா என்னோட மாமியார், மாமாவின் குணத்தை என்னால் மாற்ற முடியுமா ?'' என்று பயம் கலந்த சந்தேகத்துடன் பத்மாவிடம் கேட்டதற்கு அவள் தன்னிடம், "உன்னால் முடியும் கவிதா ! நீ என்னோட பேச்சில் உள்ள நியாயத்தை உணர்ந்து, நீ எங்களுடன் துணிந்து பெரிய கடைக்கு ஜவுளி எடுக்க வந்தாயோ, அப்போதே நான் உன்னைப்பற்றி என்ன நினைத்தேன் தெரியுமா கவிதா, நீ உன் உரிமையைப் புகுந்த வீட்டில் நிலை நாட்டுவாய் என்பது ,எனக்கு உன்மீது நம்பிக்கை வந்து விட்டது துணிந்து நில். தோல்வி கிடையாது'' என்று பத்மா கூறியதை, இப்போது கவிதா நினைத்துப் பார்த்து மகிழ்ந்தாள்.
தன் மாமியாரும் தன்னைப் புரிந்துகொண்டு மகள் வீட்டிலிருந்து விரைவில் வீடு திரும்புவார் என்பதையும், தன்னோட மாமா தன்னிடம் உள்ள நியாயத்தை உணர்ந்து, தான் செய்தது தவறு இல்லை என்று அவர் மாமியாரிடம் சுட்டிக்காட்டியதையும் இப்போது நினைத்துப் பார்த்து கவிதா மகிழ்ந்தாள்.

பொன்விலங்கு பூ.சுப்ரமணியன்









 

]]>
https://www.dinamani.com/weekly-supplements/dinamani-kathir/2018/dec/17/உன்னால்-முடியும்-கவிதா-3059789.html
3059788 வார இதழ்கள் தினமணி கதிர் ஹிட்லரும் ஓவியரும்! DIN DIN Monday, December 17, 2018 10:52 AM +0530 சர்வாதிகாரி அடால்ப் ஹிட்லருக்கு ஒரு சமயம் பிரெஞ்சு பெண் சார்லோட்டிலோக் ஜோயி ( 19 வயது) டன் தொடர்பு ஏற்பட்டு, காதலாக மலர்ந்தது. அவர்களுக்கு குழந்தை கூட உண்டு என கிசுகிசு உண்டு. இதனை நிரூபிப்பதுபோல் ஜுன்மரியல் என்ற நபர், தன்னை ஹிட்லரின் மகன் என கூறிக் கொண்டதும் உண்டு.
 ஹிட்லர் ஆரம்ப காலங்களில், சுற்றுலா பயணிகளிடம், வியாபார நோக்கில் உருவாக்கப்படாத ஓவியங்களை வாங்கி விற்று வந்தவர். அத்துடன், "தனக்கு ஓவியத்தில் மிகுந்த ஈடுபாடு உண்டு. தான் ஒரு பிறவிக் கலைஞர்'' எனவும் கூறிக் கொண்டதுண்டு. இதனை வியன்னா அகாதெமி ஆஃப் ஆர்ட் இருமுறை நிராகரித்துள்ளது. ஆனால், தனது பிரெஞ்ச் காதலியை ஹிட்லர், தத்ரூபமாய் தைல வண்ண ஓவியமாக வரைந்தார். அது சமீபத்தில் ஏலத்துக்கு வந்து 60 ஆயிரம் டாலருக்கு விற்பனையானது.
 - ராஜிராதா
 

]]>
https://www.dinamani.com/weekly-supplements/dinamani-kathir/2018/dec/17/ஹிட்லரும்-ஓவியரும்-3059788.html
3059787 வார இதழ்கள் தினமணி கதிர் தமிழ் வாழ்க! DIN DIN Monday, December 17, 2018 10:51 AM +0530 "இன்று பாரதியார் சொன்ன வார்த்தைகளுடன் என்னுடைய உரையையும் சட்டசபையின் அலுவலையும் முடித்துக் கொள்கின்றேன். பாரதியார் "வாழிய செந்தமிழ்' என்றார். "வாழ்க நற்றமிழர்' என்றார். அந்த வாழ்வு ஏதோ பிரிந்த வாழ்வு என்று அவர் கருதவில்லை.
 "வாழிய பாரத மணித்திரு நாடு' என்று சொன்னார். அப்பேர்ப்பட்ட வாழ்வு எங்கெங்கும் ஓங்கட்டும். "வாழ்க தமிழ்', "வாழ்க தமிழ்' , "வாழ்க தமிழ்' (பலத்த கைத்தட்டல்)'' என்றார் அமைச்சர் சி.சுப்பிரமணியம்.
 கம்யூனிஸ்ட் தலைவர் பி.ராமமூர்த்தியும் அவருடன் சேர்ந்து எல்லா அங்கத்தினர்களும் "வாழ்க தமிழ்! வாழ்க தமிழ்! வாழ்க தமிழ்!'' என்று முழங்க பலத்த ஆரவாரத்துக்கிடையே தமிழ் ஆட்சி மொழி மசோதா ஏகமனதாக நிறைவேறியது.
 ஆதாரம்: தமிழ் ஆட்சி மொழி ஒரு வரலாற்று நோக்கு ( 1921 - 1956) நூல்.
 தகவல்: தங்க.சங்கரபாண்டியன்
 
 
 

]]>
https://www.dinamani.com/weekly-supplements/dinamani-kathir/2018/dec/17/தமிழ்-வாழ்க-3059787.html
3059786 வார இதழ்கள் தினமணி கதிர் பொடுகுத் தொல்லை...முடி கொட்டுதல்... முன் வழுக்கை! DIN DIN Monday, December 17, 2018 10:50 AM +0530 ஆயுள் காக்கும் ஆயுர்வேதம்
எனக்கு வயது 21 ஆகிறது. இந்த இளம் வயதிலேயே எனக்கு பெரும் மன உளைச்சல். காரணம் பொடுகு, அதனால் முடி கொட்டுதல், அதனால் முன் வழுக்கை. இதற்கு ஆயுர்வேதத்தில் ஏதேனும் உபாயம் உள்ளதா? 
வே.மாதவன், காவேரிபாக்கம்.
சிறிதும் எண்ணெய்ப்பசையே இன்றி தலையை வறட்சியுடன் வைத்திருப்பதே பலருக்கும் நீங்கள் குறிப்பிடுவது போன்ற உபாதை வரக் காரணமாகலாம். இவ்விஷயத்தில் தற்காலத்திய ஆராய்ச்சிகள் பல எண்ணெய்க்கு எதிராகவே இருக்கின்றன. ஆனாலும், ஆயுர்வேதம் அதைச் சம்மதிக்கவில்லை என்று தான் கூற வேண்டியிருக்கிறது. முடியினுடைய வேர்பகுதியிலிருந்து பிய்த்துக் கொண்டுவரும் தோல் பகுதியானது, வெளியேறும்போது மயிர்கால்களின் வலுவையும் குறைத்து விடுவதால் அவை உதிர்ந்துவிடும்நிலையில் முடிகொட்டிவிடும் பிரச்னையானது தொடங்கிவிடுகின்றது. தோல், பிளவுற்று அரிப்பது எதனால்? பூச்சிகளின் உபாதையாலா? அல்லது நீர்ப்பசையின் குறைவினாலா? நெய்ப்பின்றி கிடப்பதாலா? மன உளைச்சலால் அப்படி ஏற்படுமா? போன்ற பல சந்தேகங்களைக் கிளப்பி விட்டதால் இது மிகுந்த ஆராய்ச்சிக்கு உட்பட்டது. அதன் விளைவாக Trichology என்ற தலைமுடி சம்பந்தப்பட்ட துறையே தொடங்கப்பட்டு, இன்று உலகம் முழுவதும் மிகவும் பார்க்கப்படும் வலைதளமாக அது விளங்குகின்றது. எதுவாக இருந்தாலும் தோல்வறட்சியை நீக்கி வனப்பை ஏற்படுத்தும் சில ஆயுர்வேத மூலிகைத் தைலங்களை நீங்கள் தொடர்ந்து பயன்படுத்தினால் குணம் பெற வாய்ப்பிருக்கிறது. அய்யப்பாலா கேரதைலம், தூர்வாதி கேர தைலம், சதுக்ஷீரீ கேர தைலம், ஏலாதி கேர தைலம், ஏலாதி தைலம் போன்ற சிறந்த மருந்துகள் இருந்தாலும் ஆயுர்வேத மருத்துவரை அணுகி ஆலோசனை பெற்ற பிறகு ஒன்றிரண்டு மருந்துகளைப் பயன்படுத்தலாம். இவற்றின் மூலமாக கிருமிதொற்றுகள் ஏதேனும் தோலில் இருந்தால் அவையும் மறைந்துவிடும். தலைப்பகுதி பொதுவாகவே கபம் எனும் தோஷத்தின் இருப்பிடமாகையால் அதன் மூலமாகவே சிலருக்கு அரிப்புடன் கூடிய பொடுகுத் தொல்லையும், முடி உதிர்தலும் ஏற்படலாம். அதில் வெளிப்புறத் தைலத்தின் பயன்பாடு மட்டுமே போதாது என்பதால் உள்ளுக்கு ஆரக்வதாதி கஷாயம், படோலகடுரோஹிண்யாதி கஷாயம், திக்தகம்/மஹாதிக்தகம் கஷாயம் போன்றவற்றைச் சரியானபடி தேர்ந்தெடுத்துப் பயன்படுத்தினால் குணம் தரக்கூடிய நல்ல மருந்துகளாகும்.
சொரிந்தால் செதில் செதிலாக உதிரக் கூடிய பொடுகுத் தொல்லையுடன், எரிச்சலும் இருந்தால் பித்த ரத்தங்களுடன் கேடுற்று தலையின் தோல்பகுதியில் கபதோஷத்தின் ஆதிக்கம் நடைபெறுவதை ஊகித்து அறியலாம். கஷாயம் மருந்துகளை விட மூலிகை நெய் மருந்துகளாகிய திக்தகம்/மஹாதிக்தகம் இந்நிலையில் உட்புறமாகவும் வெளிப்புறமாகவும் பயன்படுத்த சிறந்தவை. உட்புற விஷச்சேர்க்கையானது உணவின் மூலமாகவோ, ஒவ்வாமை உணவுகளின் சேர்க்கையின் மூலமாகவோ நடைபெற்றிருந்தாலும் அவையும் தோலில் பிரதிபலிக்கவே செய்யும். மாணிபத்ரம் லேஹ்யம் திருவ்ருல் லேஹ்யம் போன்றவற்றைப் பயன்படுத்தி நன்கு வயிறு பேதியாகும்படிச் செய்து நமது உடலைச் சுத்தப்படுத்தலாம். இரத்தத்தில் உள்ள விஷத்தை முறிக்கச் செய்து வெளியேற்றும் இவ்வகை மருந்துகளால் குடல் சுத்தம் அடைந்து பல தோல் நோய்கள் குணமடைந்துள்ளன. தலையில் ஊற்றப்படும் சிரோதாரா சிகிச்சை முறை, மூலிகைகளை அரைத்து தலையில் பொத்தி வைக்கும் தலைப்பொதிச்சல் எனும் சிகிச்சை, மூக்கினுள் மருந்தைவிட்டு தலையிலுள்ள உட்புற அழுக்குகளை நெகிழச் செய்து வாய்வழியாக வெளியேற்றும் நஸ்யம் எனும் சிகிச்சை போன்றவற்றாலும் நீங்கள் பயன்பெறலாம். 
மீன், சிக்கன், தயிர், வெல்லம், பால்பொருட்கள், பகல் தூக்கம் போன்றவற்றைத் தவிர்க்கவும். தலை குளிக்க கடுக்காய், கருங்காலிக்கட்டை, சரக்கொன்றைப்பட்டை, வேப்பம்பட்டை ஆகியவற்றைப் போட்டு காய்ச்சி ஆறிய வெந்நீரையே பயன்படுத்தவும்.
(தொடரும்)
பேராசிரியர் எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே) 
செல் : 94444 41771
 

]]>
https://www.dinamani.com/weekly-supplements/dinamani-kathir/2018/dec/17/பொடுகுத்-தொல்லைமுடி-கொட்டுதல்-முன்-வழுக்கை-3059786.html
3059784 வார இதழ்கள் தினமணி கதிர் மைக்ரோ கதை DIN DIN Monday, December 17, 2018 10:47 AM +0530 "நாளைக்கு உனக்கு கிரிட்டிகல் ஆபரேஷன் பண்ணப் போறதை நினைச்சு வருத்தமா இருக்கியாப்பா?'' என்று நோயாளி குமாரைப் பார்த்து டாக்டர் கேட்டார். 
" இல்ல டாக்டர். ஆபரேஷனை நினைச்சு வருத்தமோ, பயமோ இல்லை'' என்ற குமார்... "ஆனால்?'' என்று இழுத்தான்.
"என்னப்பா?'' என்று கனிவுடன் கேட்டார் டாக்டர்.
"ஒரு தூக்குத்தண்டனை கைதிக்கு கொடுக்குற மரியாதையைக் கூட என் சொந்தக்காரங்க யாரும் கொடுக்கல.. பிரண்ட்ஸ் யாரும் கொடுக்கல'' என்றான் குமார் வருத்தத்துடன்.
"என்னப்பா சொல்றே? ஒண்ணும் புரியலையே?'' என்ற கேட்ட டாக்டரிடம் குமார் கோபமாகச் சொன்னான்:
"என்னை வந்து பார்த்த ஒருத்தர் கூட என் கடைசி ஆசை என்னன்னு கேட்கலையே டாக்டர்'' .
கோ.வினோத், கிருஷ்ணாபுரம்.

]]>
https://www.dinamani.com/weekly-supplements/dinamani-kathir/2018/dec/17/மைக்ரோ-கதை-3059784.html
3059783 வார இதழ்கள் தினமணி கதிர் பேல்பூரி DIN DIN Monday, December 17, 2018 10:46 AM +0530 கண்டது
• (வடலூர் பண்ருட்டி சாலையில் ஒரு காரின் பின்புறம்)
நீயா... நானா என்பது 
அழிவின் ஆரம்பம்
நீயும் நானும் என்பது 
வெற்றியின் தொடக்கம்.
வெ.லட்சுமிநாராயணன், வடலூர்.

• (அதிராம்பட்டினத்தில் ஓர் உணவகத்தின் பெயர்)
மக்களே துணை
பிறை சாகுல், அதிராம்பட்டினம்.

• (வேலூரில் ஓர் ஆட்டோவின் பின்புறத்தில்)
அறிஞர்கள் என்னைப்
பின்தொடர மாட்டார்கள்.
சி.பழநி, வேலூர்.

• (சென்னை செங்குன்றம் அருகில் உள்ள ஓர் ஊரின் பெயர்)
குதிரை பள்ளம்
பா.அஜித்பாலா, கே.செட்டிபாளையம்.

கேட்டது
• (புதுக்கோட்டை பெரிய கடைவீதியில் இரு வாலிபர்கள்)
"வாங்க பிரதர்... உங்களை கஜா புயலுக்கு முன்னே பார்த்தது''
"ஆமாம் பிரதர்... புயல்காற்றில் போனவன்... பஸ்ûஸப் பிடிச்சு இன்னைக்குத்தான் வீடு வந்து சேர்ந்தேன்''
செ.தர்மலிங்கம், திருச்சி.

• (தஞ்சாவூர் மாரியம்மன் கோயில் போகும் சாலையில் உள்ள ஒரு பெரிய திருமண மண்டபத்தின் முன்
இளைஞர்கள் இருவர்)
"என்னடா இங்கே நின்னுகிட்டு இந்த கல்யாண மண்டபத்தையே வெறிச்சுப் பார்க்குறே?''
"என்னோட கல்யாணத்துக்கு இந்த பெரிய மண்டபத்தைப் புக் பண்ணினால் நல்லா இருக்குமேன்னு யோசிக்கிறேன்''
"அப்படியெல்லாம் யோசிக்காதே... இந்த கல்யாண மண்டபத்துக்கு வாடகை கொடுத்தீன்னா நீ கோவணத்தைக் கட்டிக்கிட்டுதான் பெண்ணுக்கு தாலி கட்டணும். அவ்வளவு வாடகை. ஒரு சின்ன மண்டபமா பாரு''
ஜா.முரளி, தஞ்சாவூர்

யோசிக்கிறாங்கப்பா!
வாழ்க்கையில் தோற்றவர்கள்
இரண்டு வகையினர்...
ஒருவர் யார் பேச்சையும் கேட்காதவர்.
மற்றொருவர் எல்லாருடைய பேச்சையும் கேட்பவர்.
முத்தூஸ், தொண்டி.

எஸ்எம்எஸ்
மண்ணில் எதை விதைக்கிறோமோ...
அதை அறுக்கிறோம்.
மனதிலும்தான்.
அ.ப.ஜெயபால், ஆனைக்காரன் சத்திரம். 

அப்படீங்களா!
வடமேற்கு சீனாவில் உள்ள ஷாங்சி மாகாணத்தில் உள்ள சியான் ஜியோடாங் பல்கலைக்கழகத்தைச் சேர்ந்த ஆராய்ச்சியாளர்கள் ஒரு புதுவிதமான உயிரிப் பொருளைக் கண்டுபிடித்துள்ளார்கள். 
ஒருவருக்கு காயம் ஏற்பட்டால் - அதிலும் பெரிய காயம் ஏற்பட்டால் - அது ஆறுவதற்கு நீண்ட நாட்கள் ஆகும். அவர் நீரிழிவு நோய் உள்ளவராக இருந்தால் கேட்கவே வேண்டாம். பெரிய தீப்புண்கள் விரைவில் ஆறாது. பலவிதமான மருந்துகளுக்கும் அழியாத தொற்றுநோய்க் கிருமிகள் காயங்களில் இருந்தால் ஆறவே ஆறாது. 
இப்படிப்பட்ட காயங்கள் விரைவில் ஆறுவதற்கு உதவும் விதமாக அவர்கள் ஒரு புதுவிதமான உயிரிப் பொருளைக் (BIOMIMETIC ANTIBACTERIAL MATERIAL) கண்டுபிடித்திருக்கிறார்கள். 
நமது தோலைப் போல சுருங்கி விரியும் தன்மையுள்ள, பலவிதமான மருந்துகளையும் தாக்குப் பிடித்து உயிர் வாழும் பாக்டீரியா தொற்றுநோய்க் கிருமிகளை அழிக்கக் கூடிய இந்த உயிரிப் பொருளை எலிகளின் உடலில் உள்ள காயத்தின் மேல் கட்டி சோதனை செய்து பார்த்திருக்கிறார்கள். வெகுவிரைவில் காயங்கள் ஆறியதுடன், காயம் இருந்த இடத்தில் உள்ள தோல் விரைவில் வளர்ந்து இருப்பதையும் கண்டுபிடித்திருக்கிறார்கள். விரைவில் மனிதர்களுக்கும் சோதனை செய்து பார்த்து, மேலும் இந்த உயிரிப் பொருளை மேம்படுத்தப் போகிறார்கள்.
என்.ஜே., சென்னை-116.

]]>
https://www.dinamani.com/weekly-supplements/dinamani-kathir/2018/dec/17/பேல்பூரி-3059783.html
3059781 வார இதழ்கள் தினமணி கதிர் பேரீச்சை ஓலை குடிசை! DIN DIN Monday, December 17, 2018 10:42 AM +0530 இந்தியாவில் கிராமங்களில் தென்னை மரத்திலுள்ள ஓலைகளைக் கொண்டு குடிசைகள் அமைத்து கொண்டு, அதில் மக்கள் வசிப்பதுண்டு. அதுபோன்று, ஆப்பிரிக்காவில் கிராமங்களில் குடிசைகளுக்கு மேல் பேரீச்ச மர ஓலைகளை வேய்கிறார்கள். இந்த குடிசைகளுக்கு "பேரீச்சை ஓலை குடிசைகள்' என்று பெயர். அங்கு கிராமங்களில் இதைப் போன்ற குடிசைகள் இன்றும் ஏராளம் உள்ளன.
 - உ.ராமநாதன்
 

]]>
https://www.dinamani.com/weekly-supplements/dinamani-kathir/2018/dec/17/பேரீச்சை-ஓலை-குடிசை-3059781.html
3059780 வார இதழ்கள் தினமணி கதிர் உறவை முறிக்க முடியாது! DIN DIN Monday, December 17, 2018 10:41 AM +0530 தென்னாப்பிரிக்க தேசத்தை அடிமைப்படுத்தி கொடுங்கோல் ஆட்சி செய்த தென்னாப்பிரிக்க பிரிட்டிஷ் நிறவெறி அரசின் ஜனாதிபதி எஃப் டபிள்யூ. கிளார்க்குக்கு 1989-ஆம் ஆண்டு மண்டேலா எழுதிய ஒரு கடிதம்.
 தென்னாப்பிரிக்க கம்யூனிஸ்ட் கட்சியுடனான உறவை ஆப்பிரிக்க தேசிய காங்கிரஸ் முறித்துக் கொள்ள வேண்டுமென்கிற வாதம் விடுதலை இயக்கத்தில் ஒரு பிளவை உண்டாக்க வேண்டுமென்ற அரசின் தந்திரமாகும். இது எங்களைத் தற்கொலை செய்து கொள்ளும்படி கூறுவதற்குச் சமமாகும். ஒரு நிரந்தரக் கூட்டுக் கட்சியுடன் (கம்யூனிஸ்ட் கட்சியுடன்) உறவை முறித்துக் கொள்ள வேண்டுமென்கிற கோரிக்கைக்குப் பணிந்தால் பிறகு இந்த விடுதலை இயக்கத்தை யார் நம்புவார்கள்?அந்தக் கோரிக்கைக்கு நாங்கள் பணிய வேண்டுமென்கிறது அரசாங்கம். பணிவதென்ற பேச்சுக்கே இங்கு இடமில்லை. துயரத்தில் வீழ்ந்து கிடக்கும் நாடுகள் முன்னேற சோசலிசத்தைத் தவிர வேறு மார்க்கம் இல்லை என்றும், கம்யூனிசத் தத்துவ ஆசான் காரல் மார்க்சின் சிந்தனை மீது தமக்குப் பெரும் நம்பிக்கை உள்ளதென்றும் மண்டேலா அந்தக் கடிதத்தில் தெரிவித்திருந்தார்.
 - தங்க. சங்கரபாண்டியன்
 
 

]]>
https://www.dinamani.com/weekly-supplements/dinamani-kathir/2018/dec/17/உறவை-முறிக்க-முடியாது-3059780.html
3059779 வார இதழ்கள் தினமணி கதிர் திரைக் கதிர் DIN DIN Monday, December 17, 2018 10:40 AM +0530 • "நம்பர் ஒன்' என்கிற இடத்தில் இருந்த அனுஷ்கா, நயன்தாரா, த்ரிஷா ஆகியோர் கமர்ஷியல், கவர்ச்சி என பிரபல ஹீரோக்களுடன் ஜோடி போட்டு நடித்தனர். வயது, அனுபவம், பக்குவம் என காலம் மாற்றம் ஏற்பட திடீரென்று தங்களுக்கு முக்கியத்துவம் உள்ள கதைகளில் நடிக்க முடிவு செய்தனர். தற்போது இந்த பாணியை தீவிரமாகப் பின்பற்றத் தொடங்கியிருப்பவர் ஹன்சிகா. இந்த வகையில் ஹீரோயினுக்கு முக்கியத்துவம் உள்ள "மஹா' என்ற படத்தில் நடிக்கிறார். இதில் ஹன்சிகாவுக்கு பிரபலம் இல்லாத நடிகர் ஒருவர் ஜோடி சேரவுள்ளார். மற்றபடி கருணாகரன், தம்பி ராமையா போன்றவர்கள் நடிக்கின்றனர். இது ஹன்சிகா நடிக்கும் 50-ஆவது படம். இப்படத்தை புதுமுக இயக்குநர் யு.ஆர்.ஜமீல் இயக்குகிறார். இதில் இடம் பெறவுள்ள ஹன்சிகாவின் தோற்றம் கடந்த வாரம் வெளியாகியுள்ளது. விரைவில் படப்பிடிப்பு தொடங்கவுள்ளது. இப்படம் மே மாதத்தில் வெளியாகும் என எதிர்பார்க்கப்படுகிறது.

• விஜய் சேதுபதி, த்ரிஷா நடிப்பில் வெளியாகி பரவலான பாராட்டுகளைப் பெற்ற படம் "96'. ஒளிப்பதிவாளரான சி.பிரேம் குமார் இந்தப் படத்தின் மூலம் இயக்குநராக அறிமுகமானார். கோவிந்த் வசந்தா இசையமைத்த இந்தப் படத்தில் இடம்பெற்ற பாடல்கள் பெரும் வரவேற்பைப் பெற்றுள்ளன. கதை சொன்ன விதம், காட்சிப்படுத்திய விதம், புது வித சுவாரஸ்யங்கள் என கதையின் போக்கில் பல மாற்றங்கள் இருந்ததால், விமர்சனரீதியாகவும் படத்துக்கு பெரும் பாராட்டுக்கள் கிடைத்தன. தமிழில் வெற்றி பெற்றதையடுத்து இப்படத்தின் மற்ற மொழி ரீமேக் உரிமைக்கு கடும் போட்டி நிலவியது. குறிப்பாக தெலுங்கு ரீமேக்கிற்கு தயாரிப்பு நிறுவனங்கள் மத்தியில் கடும் போட்டி உருவானது. இந்நிலையில் பிரபல தயாரிப்பாளரான தில் ராஜு தெலுங்கு உரிமையை வாங்கியுள்ளார். பிரேம் குமாரே இயக்கவும், அல்லு அர்ஜுன் அல்லது நானி நாயகனாக நடிக்கவும் பேச்சுவார்த்தை நடைபெற்றது. இதில் யார் நாயகன் என்பது முடிவாகிவிட்டதாகவும், விரைவில் அறிவிப்பு வெளியாகும் எனவும் தெரிகிறது. மேலும், த்ரிஷாவின் கதாபாத்திரத்தில் அவரையே நடிக்க வைக்க தற்போது பேச்சுவார்த்தை தொடங்கப்பட்டுள்ளது. தெலுங்கிலும் அவர் முன்னணி நாயகி என்பதால், அவரே நடித்தால் படத்துக்கு எதிர்பார்ப்பு அதிகம் இருக்கும் என்று தயாரிப்பு நிறுவனம் கருதியுள்ளது. 

• மலையாள இயக்குநர் ஹாசிம் மரிகர் தயாரித்து இயக்கி வரும் படம் "உன் காதல் இருந்தால்' ஸ்ரீகாந்த் , ரியாஸ்கான், லெனா, மபுள் சாலமான், சந்திரிகா, காயத்ரி, மிதுன் உள்ளிட்டோர் நடிக்கின்றனர். காதலைப் பின்னணியாகக் கொண்ட இப்படம் குறித்து இயக்குநர் ஹாசிர் மரிக்கர் பேசும் போது... "ஒரு முறை அபிராமி ராமநாதன் அவர்களின் பேட்டியைப் பார்த்தேன். ஒரு படம் நன்றாக ஓடுவதற்கு கதை தான் தேவை என்று சொன்னார். இப்படத்தில் அது இருக்கும். இப்படத்தின் பெயர் தான் காதலைச் சம்பந்தப்படுத்தி இருக்கும். ஆனால் படத்தில் காதல் பற்றி ஒன்றும் இருக்காது. உச்சபட்ச த்ரில்லர் படமாக இருக்கும். இந்த படத்தில் ஒரே ஒரு கதாநாயகன் தான். அது ரியாஸ்கான் மட்டும் தான். அவரைத் தவிர, மற்ற அனைவரும் வில்லன்கள் தான். இப்படத்தின் கதையை யாராலும் யூகிக்க முடியாது. படம் பார்ப்பவர்களுக்கு வித்தியாசமான அனுபவமாக இருக்கும். புதுமையான முயற்சிகளைக் கையாண்டிருக்கிறோம்'' என்றார். ஸ்ரீகாந்த் பேசும் போது... "இந்த படத்தின் திரைக்கதையில் நிறைய சவால்கள் இருக்கின்றன. அதை திறமையாக ஹாசிர் மரிக்கர் கையாண்டிருக்கிறார்'' என்றார்.

• பாலிவுட் சினிமாக்களில் நம்பர் ஒன் என்கிற இடத்தில் இருந்தாலும், தென்னிந்திய சினிமாக்களில் நடிப்பதை பெரிதும் விரும்புகிறார்கள் ஹீரோயின்கள். குறிப்பாக தமிழ் சினிமாவில் நடிப்பதை ஆவலாக எதிர்பார்க்கிறார்கள். பிரியங்கா சோப்ரா, தீபிகா படுகோனே உள்ளிட்ட பல முன்னணி நடிகைகள் தென்னிந்திய ஹீரோக்களுடன் ஜோடியாக நடிக்கின்றனர். "கோச்சடையான்' படத்தில் ரஜினிகாந்துடன் ஜோடி சேர்ந்தார் தீபிகா படுகோனே. அது போல் "தமிழன்' படத்துக்காக விஜய்யுடன் நடித்தார் பிரியங்கா சோப்ரா. தற்போது உருவாகி வரும் "சாஹோ' படத்தில் பிரபாஸ் ஜோடியாக ஷ்ரத்தாவும் ஜோடி போட்டு நடிக்கிறார். இந்நிலையில் தென்னிந்திய சினிமாவில் களம் இறங்க தயாராகிறார் ஸ்ரீதேவி மகள் ஜான்வி. ஸ்ரீதேவியின் மறைவுக்குப் பின் அவரது வாரிசாக திரையுலகில் நுழைந்துள்ள ஜான்வி, "தடக்' என்ற படத்தின் மூலம் பாலிவுட் திரையுலகில் அறிமுகமாகியுள்ளார். இதையடுத்து மற்ற மொழி சினிமாக்களிலும் தன்னுடைய கவனத்தைத் திருப்பியுள்ளார் ஜான்வி. தனது அம்மா தென்னிந்திய சினிமா உலகைப் பெரிதும் நேசித்த காரணத்தாலும், தமிழ்நாட்டைச் சேர்ந்தவர் என்பதாலும் தென்னிந்திய சினிமாக்களில் கவனம் செலுத்துவதை விரும்புகிறார். இது குறித்து சமீபத்தில் அளித்துள்ள பேட்டியில்.... ""தென்னிந்திய ஹீரோ விஜய் தேவரகொண்டாவுடன் நான் ஜோடியாக நடிக்கத் தயாராக இருக்கிறேன்'' என்று தெரிவித்துள்ளார். தமிழில் "நோட்டா' படத்தில் நடித்த விஜய் தேவரகொண்டா தெலுங்கில் அர்ஜுன் ரெட்டி மூலம் பரபரப்பாகப் பேசப்பட்டார்.
- ஜி.அசோக் 

]]>
https://www.dinamani.com/weekly-supplements/dinamani-kathir/2018/dec/17/திரைக்-கதிர்-3059779.html
3059778 வார இதழ்கள் தினமணி கதிர் மனதில் இப்போது ஈரம்! DIN DIN Monday, December 17, 2018 10:38 AM +0530 சிங்காரம் குணத்தில் புலி. தனக்கு இரை ஒன்று கிடைக்கிறது என்றால் புலி என்ன செய்யும்? இரை மீது பாய்வதற்கு முன் பதுங்கும். இவரோ பதுக்குவார். பின் பாய்வார்.அடிப்பார்கொள்ளை. அத்தனையிலிருந்தும் லாபம். அதனால் நாளடைவில்- பதுக்குவதில் ஒரு தனி ருசியே கண்டுவிட்டார். அப்படி செய்யும் வேலையில் அடிக்கடி இறங்கி - அது போதை பழக்கம் போல தொடரலாயிற்று. அவரோ திருமணம் செய்து கொள்ளாமல் தனித்து வாழ்ந்து வந்தார். வயது ஐம்பதைத் தாண்டி விட்டது. தியாகு எனும் ஆதரவற்ற இளைஞன் ஆரம்ப காலத்தில் இருந்தே அவருக்கு எடுபிடி. அவர் சாப்பிட்டு மிச்சம் மீதி உணவைச் சாப்பிட்டு வயிறு கழுவிக் கொண்டு உதவி செய்து வாழ்ந்து வந்தான்.
ஆரம்பத்தில் அவர் ஒரு புளி வியாபாரி. மொத்தமாக விநியோகிக்கப்படும். முதலீடு போட்டு சாதாரணமாக முன்னேறிக் கொண்டிருந்தார். திடீரென்று அந்த ஆண்டில்-புளிய மரங்களில் புளி காய்ப்பது வறட்சி காரணமாக தவறிவிட்டது. ஓரளவுக்கு தேறியிருந்த புளிக்குவியலை அதிகத்தொகை கொடுத்து வாங்க வேண்டிய இக்கட்டான சூழ்நிலை.
அந்த சமயம் பார்த்து அவர் இரு சக்கர வாகன விபத்தில் சிக்கி-உடம்பில் பல பகுதிகளில் காயம். நாற்பது நாட்கள் மருத்துவமனை வாசம்.
அவரோ ஒண்டிக்கட்டை; படுக்கைவாசம்; தியாகு கூடவே இருந்து பணிவிடை செய்தான்.
கூடுதல் விலை கொடுத்து வாங்கி வைத்திருந்த புளிக்குவியல் நாற்பது நாட்களாக வீட்டுக்குள் தேங்கி விட்டது. வியாபாரத்தைக் கவனிக்க வேறு ஆள் இல்லை. நீண்ட காலமாக புளிக்குவியல் சேமிப்புக்கிடங்கில் இருந்ததால்-புளி பழையதாகி விட்டது.பழைய புளிக்கு மவுசு அதிகம். அதனால் அதற்கு கூடுதல் விலை. அந்த வாரமே வியாபாரத்தில் செம லாபம். எதிர்பாராத உடனடி வரவு.
ஓ... இனி மற்ற பொருள்களையும் இப்படி பதுக்கி வைத்து-அவசரத் தேவை தருணத்தில் அதிக விலையில் விற்று பணம் பண்ணலாமே... அவர் மூளை குறுக்கில் வேலை செய்ய ஆரம்பித்தது. மனம் ஒரு குரங்கானது. குணம் தான் ஏற்கனவே புலி ஆயிற்றே! எனவே அவர் முடிவே செய்து விட்டார்.
அவரது வீட்டு முற்றம் மிக விசாலம். அதற்கு அடியில் இரண்டு மீட்டர் ஆழத்தில் ஒரு பாதாள அறையை உருவாக்கினார். கறுப்புச் சரக்கு அறை! உள்ளே அவர் மட்டும் போக, வர கதவு... தரையோடு தரையாக ஓர் பதுக்கல் அறை !
"முதலாளி... இப்படிபட்ட காரியம் வேண்டாங்க... நேர்மையாக நடந்து, அதே விலைக்கு விற்கலாமே... எதுக்கு அநியாய விலை ஏற்றி ஏமாத்தணும்?'' பதமாக சொல்லி பார்த்தான். ஊகூம்... அவர் செவி சாய்க்கவில்லை. 
"எல்லாம் எனக்குத் தெரியும். போடா... நான் சொல்ற வேலையை மட்டும் பார்'' கோபமாக முறைத்தார்.வேறு வழியில்லாமல் தியாகு "கப்சிப்' ஆனான்.
அடுத்ததாக-அவரது மூளை அடுத்த கட்ட நடவடிக்கை எடுக்கலாயிற்று. சந்தையில் அவ்வப்போது எந்தெந்தப் பொருளுக்குத் தட்டுப்பாடு என்பதைக் கணக்கு போட்டார். சர்க்கரை கிடைக்கும் காலமா ? பிடி ஆட்களை. பல இடங்களுக்கு அனுப்பு... நிறைய சர்க்கரை மூட்டைகளை கொள்முதல் செய்... அந்த பிரத்யேக அறையில் அடுக்கு... 
இப்படியாக- ஊரில் சர்க்கரை பஞ்சம் சமயத்தில்- பழைய சர்க்கரை மூட்டைகளை வெளியே அனுப்பி வியாபாரத்தை முடுக்கி விட்டார். பணம் கொட்டலாயிற்று.
"அய்யா... புளி வியாபாரம் போதும். இப்ப சர்க்கரை விற்பனை எதுக்கு ? கெஞ்சி கேட்டுக்கிறேன்.இத்தோடு நிறுத்திக்குங்க..இல்லாட்டி பிற்காலத்தில் கஷ்டம் வந்து தொல்லை கொடுக்கும். தயவு செய்து யோசித்துப் பாருங்க'' மன்றாடினான் தியாகு.
"டேய்... நீ என் விவகாரத்தில் அடிக்கடி மூக்கை நீட்டறே... இனி உனக்கு இங்கே வேலை இல்லை. ஓடிப் போயிடு'' அடிக்காத குறையாக விரட்டினார்.
"அதுவும் சரிதான் முதலாளி... இங்கே இருந்து பாவச் செயலுக்கு துணை போவதை விட, வேற எங்கேயாவது போய் உழைச்சு பிழைச்சிக்கிறேன். இத்தனை நாள் சாப்பாடு போட்டு, உதவினதுக்கு ரொம்ப நன்றி அய்யா. உங்களைத் தனியாக விட்டு போவது தான் மனசை சங்கடப்படுத்துது'' கலங்கியவாறு வெளியேறினான் தியாகு. அவனது வேண்டுகோள் செவிடன் காதில் ஊதிய சங்கு போலானது.
அப்புறம்- அரிசி, பருப்பு, எண்ணெய், பூண்டு ,வெங்காயம், தக்காளி, துணிமணிகள்... என வகைவகையாக வாங்கி பதுக்கினார் சிங்காரம்.
ஆடு, மாடு, மான்.. என்று பிராணிகள் மீது பாய்கிற புலி - ஒருநாள் எதுவுமே பசிக்கு கிடைக்காத போது மனிதன் மீதே பாய்ந்து விடுமாம்!
அந்த மாதிரியான காலகட்டத்தில் - எதிர்பாராத விதமாக-வாகன எண்ணெய் வள நாடுகளில்-போர் மேகம் சூழ்ந்து கொண்டது. இறக்குமதி விநியோகம் குறைய ஆரம்பித்தது.அதன் எதிரொலியாக பெட்ரோலிய பொருட்களின் விலை ஏறி, சிங்காரத்துக்கு வந்தது பாருங்கள்... ஒரு வேகம்!
ஏற்கனவே தனித்தரை அறையில் மூட்டை மூட்டையாக மளிகை சாமான்கள்.அதற்கு அருகில் துணிமணி ரகங்கள்... என நெருக்கியடித்துக் கொண்டு ஏராளமான பொருள்கள்...
"ஆகா... நமக்கு யோகம்தான். முன்கூட்டியே தேட்டை போட்டு தேத்திய பதினைந்து பேரல் மண்ணெண்ணெய், பத்து டிரம் பெட்ரோல் நம்மகிட்டே இருக்கு. இப்போது அதை எடுத்து மார்க்கெட்டில் விற்று விட நல்ல வாய்ப்பு... ஆட்டோ, தனியார் பேருந்து, வாடகை கார்னு கியூவில் நின்னு வாங்குவாங்க.லட்சக்கணக்கில் ரூபாய் வருமானம் தான் ! நாளைக்கு அதிகாலை நேரத்திலேயே பிசினஸ் ஆரம்பிச்சிடணும்' குஷியானார். நிலை கொள்ளாத ஆனந்தத்துடன் உறங்கத் தொடங்கினார்.
இரவு மணி பன்னிரண்டு அடித்தது. "படார்' என சத்தம் வெடித்தது. அதிர்ச்சியாகி எழுந்து என்னவென்று எட்டிப்பார்த்தார்.
ஆம். வெடிச்சத்தம் அந்த பாதாள அறையிலிருந்து வந்தது.
" இது எப்படி ஆச்சு..? புரியலையே' எட்டி நின்று கொண்டு, தவிப்புடன் குழம்பினார் சிங்காரம்.
புலியை மடக்கியது ஒரு பூனை! 
நிலத்தடி அறையில்-எலி வேட்டைக்கு வந்த ஒரு பூனை பெட்ரோல் டிரம் மேல் தாவிக் குதிக்க- உடனே அந்த டிரம் அசைந்து கீழே கவிழ்ந்து விழ -அதன் மூடி கழன்று வெள்ளமென பெட்ரோல் தரை நெடுக ஓட-படிக்கட்டில் இருந்த மெழுகுவர்த்தியின் தீ பட்டு- கண்ணிமைக்கும் நேரத்தில் அங்கே பெரும் தீ வேகமாக கொழுந்து விட்டு பரவியது.
அவ்வளவுதான்.அந்த அறையில் குவிந்து கிடந்த அ முதல் ஃ வரை சகல சரக்குகளும் பற்றி எரிய-அவற்றோடு மண்ணெண்ணெய் கேன்களும் கூட்டணி இணைந்து-ஒரு நெருப்பு விழா நிகழ்ந்தது. 
ஒரே வினாடியில் ஓட்டாண்டி ஆனார் சிங்காரம். அவருக்கு உதவ யாராவது முன் வருவார்களா? அவர் அந்த கிராம மக்களுக்கு ஏதேனும் நன்மை செய்தது உண்டா? அப்புறம் எப்படி பிரதிஉதவி கிடைக்கும்? அக்கம்பக்கம் உள்ளோர் பேருக்கு விசாரித்து விட்டு விலகிக் கொண்டார்கள். தியாகு வேறு அங்கே இல்லாததால் அவரால் தனியாக ஒன்றும் செய்ய இயலவில்லை. அத்தனை சாமான்களும் சடுதியில் எரிந்து சாம்பல் ஆயின ! 
உயிருக்குப் பயந்து வீதிக்கு வந்தவருக்கு வீதியே வீடாயிற்று!
"பிச்சை புகினும் கற்கை நன்றே' என்பது ஒüவைப்பாட்டி வாக்கு. பாடம் கற்றபின் பிச்சை எடுக்கும் நிலைக்கு இப்போது தள்ளப் பட்டார்.
தீ மிச்சமாக விட்டிருந்த, அவர் வீட்டுத் திண்ணையில் தங்க வேண்டிய நிர்பந்தம்!
ஒரு வாரம் கையில் இருந்த காசைக் கொண்டு பொழுது ஓட்டினார்.
அந்தப் பகுதியில்- இரசாயனம் ஆலை நிறுவுவதற்கு எதிர்ப்புத் தெரிவித்து திடுதிப்பென்று கலவரப் போராட்டம் வெடித்தது. மாநிலம் தழுவிய ஸ்டிரைக்... கடை அடைப்பு... எங்கெங்கு நோக்கினும் கூச்சல்... குழப்பம்... கூட்டம் ! ஒரு பெட்டிக்கடை திறந்தாலும்-கத்தி கம்புடன் திரண்டு வந்து கடையை மூட வைத்தது போராட்டக் குழு. "ஏன் வீண் வம்பு' என்று அந்த சின்ன ஊரிலும் கூட எல்லா கடைகளையும் அடைத்து விட்டனர்.
"எதுவுமே எனக்கு ஒட்டவில்லை' என்பார்கள்; இவருக்கு மட்டும் ஒட்டியது ஒன்று.அது அவர் வயிறு. இப்போது கடும் பசியில்...
"அம்போ' நிலையில் இருந்த சிங்காரம் சட்டை பையில் பத்து ரூபாய் பணம் மட்டுமே கடைசியாக மிச்சம் இருந்தது.
எங்குமே ஆள் நடமாட்டம் சுத்தமாக இல்லை.கலவரத்துக்கு அஞ்சி, யாரும் வெளியே வர வில்லை.
ஊர்க்கோடியில்- வேளாண்மை ஆராய்ச்சிக் குழுவைச் சேர்ந்த இளைஞர்கள் தற்காலிகமாக கூடாரம் அமைத்து அந்த ஊரில் கேம்ப் போட்டிருந்தார்கள். அங்கேயே தங்கி, சமையல் செய்து சாப்பிட்டு, வயல்வெளிகளுக்கு தினமும் விஜயம் செய்து ஆராய்ச்சி குறிப்பு எடுத்து வரும் பிரம்மச்சாரி இளைஞர்கள் எட்டு பேர்.
"இந்த பிள்ளைகள் உள்ளுக்குள் மெஸ் வைத்து நடத்துவதைக் கேள்விப்பட்டிருக்கேன்.. இவர்களைக் கேட்டால் உணவு கிடைக்குமே' தயக்கத்துடன் உள்ளே அடியெடுத்து வைத்தார். 
"அடடே... அய்யா... நீங்களா... வாங்க... வாங்க. உட்காருங்க'' வரவேற்றனர் இளைஞர்கள் ஒருமித்த குரலில்.
"வணக்கம் தம்பிங்களா... திடீர்னு கடையடைப்பு பண்ணி எல்லா ஓட்டலையும் மூடிட்டாங்க... பசி வயித்தைக் கிள்ளுது... பத்து ரூபாய் பணம் கொடுக்கிறேன். சாப்பாடு எதாச்சும் இருந்தா கொடுங்க'' அழாத குறையாக கேட்டார்.
"பணமெல்லாம்வேண்டாம் அய்யா... இது உங்க வீடு மாதிரி. யாரும் இங்கே வந்து பிரச்னை பண்ணமாட்டாங்க... உங்களைப் பற்றி கேள்விப்பட்டிருக்கோம்... போன வாரம் நடந்த தீ விபத்தில் எல்லா பொருளும் எரிந்து நஷ்டமாயிட்டது தெரியும்... கவலை வேண்டாம்... ஸ்டிரைக் முடியும் வரைக்கும் நீங்க இங்கேயே சாப்பிடலாம்...வீடு ரெடி ஆகும் வரை இங்கேயே தங்கிக்கலாம்'' என்றான் குழுத்தலைவன் ஆனந்த். அவனது உள்ளார்ந்த- உடனடி- உத்வேக வார்த்தைகளால் நெக்குருகிப் போனார் சிங்காரம்.
அவரைக் கரம்பிடித்து டைனிங் டேபிளில் அமர வைத்தவன் யார் தெரியுமா? 
சிங்காரத்தின் முன்னாள் உதவியாள் தியாகு தான்!
ஆச்சரியம் அடைந்து அவனை மலங்க மலங்க பார்த்தார்.
"முதலாளி... நீங்க துரத்திய பிறகு எனக்கு அடைக்கலம் கொடுத்தவர்கள் இந்த இளைஞர்கள் தான்... இவர்களுக்கு உணவு தயாரிக்கிறது நான் தான்'' கும்பிட்டான் தியாகு.
தலை கவிழ்ந்து, கலங்கிய விழிகளோடு அவரும் 
கும்பிட்டார்.
"அழாதீங்க முதலாளி... முதலில் சாப்பிடுங்க... அப்புறம் விலாவாரியாக பேசலாம்''உணவு பரிமாறினான் தியாகு. வயிராற சாப்பிட்டு முடித்த சிங்காரம் நாற்காலியில் உட்கார்ந்தார்.
"தம்பி... இந்த சின்ன வயதில் தன்னம்பிக்கையோடு இந்த ஊரில் தங்கி, விவசாய முன்னேற்றத்துக்கு பாடுபடுறீங்களே... உங்களை நினைச்சா ரொம்ப பெருமையா இருக்கு...''
"நல்ல பணிக்கு வாய்ப்பு வரும் போது பயன்படுத்திக்கணும். எப்போதும் இயந்திரத்தனமாக இருக்கும் நகர வாழ்க்கையை விட கிராம வாழ்க்கை மிக அருமையாக இருக்கு.. இஞ்சினியரிங், டாக்டர் படிப்பு வேண்டாம்னு, வித்தியாசமாக- அக்ரிகல்ச்சர் டெவலப்மெண்ட் பற்றி அறிந்து கொள்ள நாங்க ஆர்வம் காட்டி, உங்க ஊர் வயல் வெளியை - பயிர் விளைச்சலை -ஆய்வு செய்ய வந்திருக்கோம்'' விவரித்தான் ஆனந்த்.
"சிறந்த நோக்கம்... பொறுப்போடு செயல்படுத்த வந்திருப்பது மகிழ்ச்சியாக இருக்கு... ஆராய்ச்சி வெற்றி பெற வாழ்த்துகள்'' என்றார் சிங்காரம்.
"சொல்றோம்னு வருத்தப்படக்கூடாது... கோபிக்க மாட்டீங்க தானே?'' அருகில் அமர்ந்தான் இன்னொரு இளைஞன் குமார்.
"சொல்லுங்க தம்பி'' புன்னகைத்தார் சிங்காரம்.
"நீங்களோ தனியாக வசிக்கும் மனிதர். மனைவி, பிள்ளைகள் என யாரும் இல்லை. குடும்ப பிரச்னை கிடையாது. கொஞ்சம் வருமானம் கிடைச்சா போதும். எந்த தொந்தரவும் இல்லாமல் நிம்மதியாக காலம் தள்ளலாம். அப்புறம் எதுக்கு வீணாக பணம் சம்பாதிக்க நினைக்கிறீங்க... அதுவும் குறுக்கு வழியில். எல்லாப் பொருட்களையும் ஒரு சின்ன கிடங்கில் அடைச்சு பதுக்கி வச்சிங்க... இப்போது எல்லாம் தீ விபத்தில் காலி ஆயிடுச்சு... நீங்க உயிர் பிழைச்சதே கடவுள் புண்ணியம் தான்'' பதமாக எடுத்துரைத்தான்.
"உண்மைதான் தம்பி... பேராசை பிடிச்சு, பணம் பணம்னு அலைஞ்சேன். குறுக்கு வழியில் பெரிய பணக்காரனாகணும்னு துடிச்சேன்... இப்போது அந்த பேராசை பெரும் நஷ்டமா போச்சு'' தழுதழுத்தார்.
"இனிமேல் நீங்க அங்கே தங்க வேண்டாம்.அந்த எரிந்து போன காலி இடத்தை வித்திடுங்க... இந்த கேம்ப் படிப்பு முடித்து நாங்க போன பிறகும், அடுத்த குழு மாணவர்களுக்கு ஆராய்ச்சி மேற்கொள்ளும் பணி தொடர்ந்து இங்கேயே செயல்படும். அதனால் இங்கே ஒரு பெட்டிக்கடை வைக்க எங்கள் நிறுவன அதிபரிடம் அனுமதி வாங்கி தர்றோம். நீங்க நல்ல பொருளை வியாபாரம் செய்து, நேர்மையாக உழைச்சு சம்பாதிக்கலாம். சரிதானே ஐயா?'' என்றான்.
"அற்புதமான யோசனை... நீங்க என் அறிவுக் கண்ணைத் திறந்திட்டீங்க... என் எதிர்காலத்துக்கும் ஒளி ஏத்திட்டீங்க... ஏற்கெனவே நான் விரட்டி அடிச்ச தியாகுவுக்கு ஆதரவு தந்ததைக் கண்டதுமே உங்க எல்லாருக்கும் உயர்ந்த உள்ளம் இருக்குன்னு புரியுது... நான் திருந்திட்டேன்... இனி தப்பான வழியில் போகமாட்டேன்... நன்றி தம்பிங்களா... நீங்க நல்லா இருப்பீங்க...'' எல்லாரது கரம் பிடித்து பாராட்டினார் சிங்காரம்.
அன்றிலிருந்து - அந்த கூடாரத்தில் இளைஞர்களின் தோழராக தன்னை இணைத்துக் கொண்டார் அந்தப் பெரியவர்! அவரது உள்ளத்தில் பற்றி எரிந்த பணத்தாசை நெருப்பின் அனல் தன்மை குறைந்து, மனதில் ஈரம் பரவ ஆரம்பித்து விட்டது. 
மாலா உத்தண்டராமன்

]]>
https://www.dinamani.com/weekly-supplements/dinamani-kathir/2018/dec/17/மனதில்-இப்போது-ஈரம்-3059778.html
3059777 வார இதழ்கள் தினமணி கதிர் சிரி... சிரி... சிரி... சிரி...  DIN DIN Monday, December 17, 2018 10:36 AM +0530 • "அந்த ரவுடிக்கு ஜோசியம்
சொன்னது தப்பாப் போச்சு''
"ஏம்ப்பா?''
"நீ சொன்னது நடக்கலேன்னா... 
நீ நடக்க மாட்டேன்னு மிரட்டிட்டுப் போறான்''
தீ.அசோகன், சென்னை-19.

• "பேச்சாளர் மைக் செட் காரர்கிட்ட லஞ்சம் வாங்கிட்டார்''
"எப்படிச் சொல்றே?''
"மேடையிலே பேசும்போது
அரை மணி நேரத்துக்கு ஒரு தடவை சிறந்த ஒலி ஒளி அமைப்புக்கு ஷீலா சவுண்ட் சர்வீஸ்ன்னு சொல்றாரு''
ஜோ.ஜெயக்குமார்,
நாட்டரசன்கோட்1டை.

• "உங்க ஏரியாவுல சமீபத்துல
எந்தக் கல்யாணமும் நடக்கலையா?''
"எப்படி மச்சான் கரெக்டா
கண்டுபிடிச்சே?''
"நீ போட்டுருக்கிற செருப்பு ரொம்ப பழசா இருக்கே. அதை வச்சுத்தான்''
நாகமுத்து, திண்டுக்கல்.

• "மெகா சீரியல் டைரக்டர் வீட்டுல
ஐ.டி. ரெய்டு நடக்குதாம்''
"எத்தனை எபிசோட்
நடத்துவாங்கன்னு தெரியலையே''
வி.ரேவதி, தஞ்சை.

• "கமலா... என் மருமகள் ரொம்ப மோசம்டி''
"ஏன் அப்டிச் சொல்றே விமலா?''
"எனக்கு வைரஸ் ஃபீவர்
வந்து இருக்குன்னு
சொன்னதுக்கு எனக்கு பாக்டீரியா
ஃபீவர் வந்திருக்குன்னு சொல்றா...
இதுல எது உசத்தின்னு டாக்டர் கிட்டே போன் போட்டு கேக்குறா''
எஸ்.கார்த்திக் ஆனந்த், திண்டுக்கல்.

• "என் மனைவிக்கு என் மேலே
ரொம்பப் பாசம்''
"அப்படியா கேட்கவே
ரொம்ப சந்தோஷமா இருக்கே''
"ஒரு புடவை வாங்கினா ரெண்டு
கர்சீப் இலவசம்னு விளம்பரம்
போட்டு இருக்கான். எனக்கு
12 கர்சீப் இலவசமா
வாங்கித் தந்துருக்காள்ன்னா பாரேன்''
கே.ஆர்.ஜெயக்கண்ணன்,
கவற்குளம்தேரிவிளை.

• "ஏங்க ஏழேழு சென்மத்துக்கும் நீங்கதான்
கணவனா வரணும்னு ஆசைப்படுறேன்ங்க''
"எங்கம்மாதான் அத்தனை பிறவியிலேயும் மாமியாரா வருவாங்க... பரவாயில்லையா?''
செல். பச்சமுத்து, சென்னை-24.

• "அந்த கிளிஜோதிடர்கிட்ட என்ன கேட்டீங்க?
அவ்வளவு கோபமா இருக்காரு''
"அவர் வச்சிருக்கிற கிளி ஆண் கிளியா? 
பெண் கிளியான்னு கேட்டேன். அதான்''
பி.பாலாஜி கணேஷ், சிதம்பரம்.
 

]]>
https://www.dinamani.com/weekly-supplements/dinamani-kathir/2018/dec/17/சிரி-சிரி-சிரி-சிரி-3059777.html
3059775 வார இதழ்கள் தினமணி கதிர் சொன்னால் நம்பமாட்டீர்கள் ! 7 - சின்ன அண்ணாமலை DIN DIN Monday, December 17, 2018 10:33 AM +0530 தமிழிசை மாநாடு
 தமிழிசை இயக்கம் தோன்றிய நேரம். சிதம்பரத்தில் முதல் தமிழிசை மாநாடு நடைபெற்று பத்திரிகைகளில் பரபரப்பாகச் செய்திகள் வந்து கொண்டிருந்தன. இயற்கையாகவே தமிழ் உணர்ச்சி அதிகமுள்ள எனக்கு, அச் செய்திகள் எனது உள்ளத்தில் ஒரு பெரிய கிளர்ச்சியை உண்டாக்கிற்று. சிதம்பரத்தில் நடந்தது போல ஒரு பெரிய மாநாடு சொந்த ஊரான தேவகோட்டையில் நடத்த வேண்டுமென்ற ஆவல் உண்டாயிற்று. இரவு பகல் அதே கனவு. கண்டவர்களிடமெல்லாம் தமிழ் இசை மாநாட்டைப் பற்றியே பேச்சு. இதில் எனக்கு மிகுந்த உற்சாகமூட்டியவர் என் அருமை நண்பர் திரு. டி.ஆர். அருணாசலம் அவர்கள். ஆகவே அவரைக் கெட்டியாகப் பிடித்துக் கொண்டேன். இருவரும் கையிலிருந்து செலவு செய்து சில நோட்டீஸ்கள் அச்சடித்து தமிழிசை மாநாடு நடைபெறப் போவதாக விளம்பரம் செய்தோம். ஊரில் பரவலாகக் கொஞ்சம் ஆதரவு கிடைக்கும் போலிருந்தது. சங்கீத வித்வான்கள் அனைவருக்கும் கடிதம் போட்டோம். இலக்கியப் புலவர்களுக்கும் அழைப்புகள் அனுப்பினோம். அனைவரின் பதில்களும் உற்சாகமூட்டக் கூடிய வகைகளாக இருந்தன. அடுத்தது மாநாட்டிற்காக நிதி வசூல் தொடங்கினோம். வீடு வீடாகச் செல்லும்போதுதான் தமிழிசையைப் பற்றி பலருக்கு புரியவில்லை என்று தெரிந்தது. இத்தனைக்கும் அந்த ஊரில் மாதம் தவறாமல் நடைபெறும் பல கல்யாணங்களில் சங்கீத கச்சேரிகள் நடைபெற்று கொண்டிருந்தன.
 "எதுக்குத் தமிழில் பாடவேண்டும்?'', "இதற்கு ஏன் மாநாடு?'', "தமிழில் பாட முடியுமா?'' , "தமிழில் பாட பாட்டுக்கு எங்கே போவது?'', "இசையில் ஏன் பாஷை விவகாரம்?'' என்றெல்லாம் கேள்விமேல் கேள்வி கேட்டுப் பலர் எங்களை அதைரியப்படுத்தினார்கள். ஆனால் எங்களுடைய தமிழுணர்ச்சி அவற்றை எல்லாம் ஒரு பொருட்டாக நினைக்கவிடவில்லை.
 திட்டங்கள் பிரமாண்டமானதாகப் போடப்பட்டன. ஆனால் நிதி வசூல் எப்படிச் செய்வதென்று தெரியவில்லை. பல பேர் மாநாட்டை கைவிடும்படி உபதேசம் வேறு செய்ய ஆரம்பித்து விட்டார்கள். என்ன வந்தாலும் சரி, எடுத்த காரியத்தை முடிக்காமல் விடுவதில்லை என்று உறுதி பூண்டோம். சுமார் பத்தாயிரம் ரூபாய் வசூலானால் மாநாடு சிறப்பாக நடைபெறும் என்று திட்டம் போடப்பட்டது. ரூபாய் பத்தாயிரத்துக்கு எங்கே போவது? இந்நிலையில் மாநாட்டுக் காரியங்களில் தானாக வந்து உற்சாகமாகப் பங்கெடுத்துக் கொண்டு அல்லும் பகலும் எங்களுடன் பணிபுரிந்து வந்த அன்பர் ஒருவர், "இராஜா. சர். அண்ணாமலைச் செட்டியார் அவர்களிடம் சென்று முயற்சிக்கலாமே'' என்றார்.
 நானும் திரு. டி.ஆர். அருணாசலம் அவர்களும் தீவிர காங்கிரஸ்காரர்கள். பலமுறை ராஜா சர் அண்ணாமலைச் செட்டியார் அவர்களை மேடையில் தாக்கிப் பேசி இருக்கிறோம். ஆகவே காங்கிரஸ்காரர்களாகிய நாங்கள், ராஜா சர் அவர்கள் வாசற்படி ஏறுவதே தவறு என்பதாக நினைப்பவர்கள். அப்படியிருக்க, அவரிடம் எப்படிப் போவது? ஆயினும் அந்த அன்பர் விடவில்லை. "இது காங்கிரஸ் விஷயம் இல்லையே; தமிழ் சம்பந்தப்பட்டதுதானே, தமிழுக்காகச் செல்லலாமே'' என்றெல்லாம் நியாயங்களை எடுத்துரைத்து, எங்களை ராஜா சர் அண்ணாமலை செட்டியார் அவர்களிடம் கூட்டிச் சென்றார்.
 ராஜா சர் அவர்கள் எங்கள் இருவரையும் வெகு அன்பாக வரவேற்று, எங்கள் தோள்மேல் கைபோட்டு மாநாட்டைப் பற்றிய விவரமெல்லாம் கேட்டார். நாங்கள் நிதி வேண்டுமென்று கேட்கவில்லை. ஏனோ கேட்பதற்கு எங்கள் மனம் துணியவில்லை.
 காபி சாப்பிட்டதும் நாங்கள் போய் வருகிறோம் என்று கிளம்பினோம். ராஜா சர் எங்களிடம் ஒரு கவரைக் கொடுத்து "இதில் எனது அன்பளிப்பு இருக்கிறது; மாநாட்டைச் சிறப்பாக நடத்துங்கள்'' என்று சொன்னார்கள். விடைபெற்றுக் கொண்டு வெளியே வந்தோம்.
 கவரைப் பிரித்துப் பார்த்தோம். அப்படியே திகைத்துக் கல்லாய் சமைந்து நின்றோம்.
 சொன்னால் நம்ப மாட்டீர்கள், அதில் இருந்தது ரூபாய் பத்தாயிரம்.
 ஆயிரம் ரூபாய் பரிசு
 தமிழிசை இயக்கம் சுறுசுறுப்பாக நடைபெற்றுக் கொண்டிருந்த நேரம். தேவகோட்டையில் ஒரு கல்யாண வீட்டில் அரியக்குடி ராமனுஜ ஐயங்கார் கச்சேரி நடைபெற்றுக் கொண்டிருந்தது.
 வெகுநேரம் அரியக்குடி தெலுங்கிலேயே பாடிக் கொண்டிருந்தார். நான் தமிழிசை இயக்கத்தின் காரியதரிசி. ஆகவே அரியக்குடியிடம், "தயவு செய்து தமிழில் பாடவும்'', என்று சீட்டு எழுதிக் கொடுத்தேன். அரியக்குடி சீட்டை வாங்கிப் பார்த்து விட்டுப் புன்முறுவல் பூத்தார். பாடுவதாகச் சைகை செய்தார். நான் வெற்றிப் பெருமிதத்துடன் அவர் பாடப்போகும் தமிழ்ப்பாட்டை எதிர்பார்த்திருந்தேன். பாட ஆரம்பித்தார் அரியக்குடி. அதுவும் என்னைப் பார்த்தே பாட ஆரம்பித்தார்,
 ""யாரடா குரங்கு நீ--இங்கே வந்த
 யாரடா குரங்கு நீ''.
 அருணாசலக் கவிராயர் கீர்த்தனைதான். நான் அரியக்குடியை முறைத்துப் பார்த்தேன்.
 "இது தமிழ் பாட்டுதானே?'' என்று சொல்லிவிட்டு அதைப் பாடி முடித்தார். அந்தப் பாட்டு முடிந்ததும் என்னை அருகில் வரும்படி அரியக்குடி கூப்பிட்டார். சென்றேன். ""கோபப்படாதீர்கள் சும்மா தமாஷ் செய்தேன். இனி பூராவும் தமிழ்ப் பாட்டுத்தான்'' என்று சொல்லி சுமார் இரண்டு மணி நேரம் தமிழிசையை முழக்கிச் சபையை மெய்மறக்கச் செய்தார்.
 கச்சேரி முடிந்ததும் நான் அவர் அருகில் சென்று நன்றி சொன்னேன். அரியக்குடி என்னைப் பார்த்து, "இசைக்கு மொழி அவசியமா?'' என்று கேட்டார். "அவசியம்தான்,'' என்றேன்.
 "எதனால்?'' என்றார்.
 "நம் முன்னோர்கள் இசையில் மொழிக்கு முக்கியத்துவம் கொடுத்திருக்கிறார்களே,'' என்றேன். "எப்படி'' என்றார்.
 "இசைதான் முக்கியம் என்றால் நம் முன்னோர்கள் வாய்ப்பாட்டுக்காரர்களை நடுவில் வைப்பார்களா? ஒரு சாதாரண வித்வான் பாடினாலும் கும்பகோணம் ராஜமாணிக்கம் பிள்ளை, பாலக்காடு மணி போன்ற பெரியவர்கள் பக்கவாத்தியமாகத்தானே உட்காருகிறார்கள்? இசைதான் முக்கியம்; மொழி முக்கியம் இல்லை என்றால் ராஜமாணிக்கம் பிள்ளையைத்தானே நடுவில் வைக்க வேண்டும். இதிலிருந்தே மொழி முக்கியமென்று தெரியவில்லையா'' என்றேன்.
 அரியக்குடி அன்றிலிருந்து தமிழ்ப் பாட்டு நிறையப் பாட ஆரம்பித்தார். இந்தச் சம்பவத்தை ஒரு சபையில் ராஜா சர் அண்ணாமலை செட்டியார் அவர்களிடம் அரியக்குடியே சொன்னார். உடனே ராஜா சர் அகமகிழ்ந்து அப்போதே எனக்கு ஆயிரம் ரூபாய் பரிசளித்தார்.
 விடுதலை ஆவேசம்
 1942 ஆகஸ்ட் மாதம் முதல் தேதியிலிருந்தே பாரத நாட்டு மக்கள் "விடுதலைப்புரட்சி'க்குத் தயாரான நிலையில் பரபரப்புடன் இருந்தனர்.
 என்னைப் போன்றவர்கள் மக்களிடையே நெருப்புப் பொறி பறக்கப் பேசிய பேச்சுகள் புரட்சி எந்த நேரமும் வெடிக்கலாம் என்பதற்கு அறிகுறிகளாய்த் தென்பட்டன.
 நான் ஓய்வு ஒழிச்சல் இல்லாமல் மூலை முடுக்கெல்லாம் சென்று மக்களைத் தட்டி எழுப்பும் விதத்தில் சுதந்திர வேட்கையை உண்டாக்கினேன். ஆங்கில ஆட்சியை அடியோடு ஒழித்துக் கட்ட வேண்டுமென்றும் அதற்காக எதை வேண்டுமானாலும் தியாகம் செய்யலாம் என்றும் மக்களைப் பக்குவப்படுத்தினேன். எங்களூரில் நான் பேசும் கூட்டங்களுக்கு மக்கள் ஆயிரக்கணக்கில் வருவதும், இளைஞர்கள் அங்கும் இங்கும் பரபரப்புடன் திரிவதும், அரசாங்கத்தை எதிர்த்துப் பல துண்டுப் பிரசுரங்கள் ரகசியமாக மக்களிடம் விநியோகிப்படுவதும் போலீஸாருக்குப் பெரும் பிரச்னையாக இருந்தது.
 போலீஸார் எந்த இடத்திலும் தனியாக வர முடியாத நிலை ஏற்பட்டுவிட்டது. போலீஸ் ஸ்டேஷனில் இருந்து வீட்டிற்கு எந்தப் போலீஸ்காரரும் போக முடியவில்லை. போலீஸார் அனைவரும் போலீஸ் ஸ்டேஷனிலேயே தங்க, தூங்க, சாப்பிட வேண்டிய நிலையை ஊரில் உண்டாக்கிவிட்டோம். தந்திக் கம்பிகள் அறுக்கப்பட்டுவிட்டன. டெலிபோன்கள் துண்டிக்கப்பட்டுவிட்டன.
 என்னைப் பலமுறை போலீஸார் கைது செய்ய முயன்றும் முடியவில்லை. காரணம், எப்போதும் என்னைச் சுற்றி நானூறு, ஐநூறு இளைஞர்கள் இருந்துகொண்டேயிருந்தனர். அதனால் என்னைக் கைது செய்தால் நிச்சயம் கலகம் ஏற்படும் என்று போலீஸார் தக்க சமயத்தை எதிர்பார்த்துக் கொண்டிருந்தனர்.
 1942 ஆகஸ்ட் 8 - ஆம் தேதி காந்தியடிகள் கைது செய்யப்பட்டார். இச் செய்தி காட்டுத் தீ போல நாடெங்கும் பரவியது. எங்கள் ஊரில் பெரும் புயலுடன் இடியும் மின்னலும் சேர்ந்ததுபோல் மக்கள் மனதில் குமுறல் ஏற்பட்டது. ஊரெங்கும் இதைப் பற்றியே பேச்சு. ""வெள்ளையனே வெளியே போ'' என்ற முழக்கம். தெருவில் அகப்பட்ட ஓர் அப்பாவிப் போலீஸ்காரர் ஒருவரை மக்கள் சூழ்ந்து கொண்டு தாக்கி அவரது காக்கி உடை சிவப்புத் தொப்பி இவைகளைப் பறித்து தீ வைத்துக் கொளுத்தி விட்டனர்.
 (தொடரும்)
 
 

]]>
https://www.dinamani.com/weekly-supplements/dinamani-kathir/2018/dec/17/சொன்னால்-நம்பமாட்டீர்கள்--7---சின்ன-அண்ணாமலை-3059775.html
3059774 வார இதழ்கள் தினமணி கதிர் ஓய்வறியா உழவன்! Monday, December 17, 2018 10:28 AM +0530 மருத்துவ குணங்கள் நிறைந்த பாரம்பரிய நெல் ரகங்களையும், இயற்கை விவசாயத்தையும் மீட்டெடுத்து மக்களுக்குக் கொண்டு சேர்க்க வேண்டும், மக்கள் நோயின்றி வாழ வழிகாண வேண்டும் என தமிழகத்தின் பட்டிதொட்டிகளுக்கு மட்டுமல்லாமல், வெளி மாநிலங்களுக்கும், வெளி நாடுகளுக்கும் அலைந்து திரிந்த ஓய்வறியா உழவன் நெல் ஜெயராமன், நிரந்த ஓய்வு கொண்டுவிட்டார். 
நெல் ஜெயராமன் தமிழகத்தின் பின்தங்கிய மாவட்டங்களில் ஒன்றான, திருவாரூர் மாவட்டம், திருத்துறைப்பூண்டியில், கட்டிமேடு என்ற குக்கிராமத்தில், ராமசாமி - முத்துலெட்சுமி தம்பதியருக்கு மூன்றாவது மகனாக 1968-இல் பிறந்தவர். 
ஜெயராமன், மேல்நிலைக் கல்வியை எட்டும் முன்பாகவே கல்வியைக் கைவிட்டார். அச்சகத் தொழிலாளியாக மாறினார். நுகர்வோர் பாதுகாப்புத் துறையில் ஈடுபட்டார். 
பள்ளிகளில் நுகர்வோர் மன்றங்கள் பல தொடங்கப்பட காரணமாக விளங்கினார். நுகர்வோர் பாதுகாப்பு குறித்த அரசு நடவடிக்கைகளில் ஆலோசகராகவும் விளங்கினார். இதன் காரணமாக, "நுகர்வோர் ஜெயராமன்' என அழைக்கப்பட்டார். 
அவரின் கவனம் இயற்கை வேளாண்மையின் பக்கம் திரும்பியது. நஞ்சில்லா உணவை வலியுறுத்தி நாடெங்கும் பயணப்பட்ட இயற்கை வேளாண் விஞ்ஞானி நம்மாழ்வாரின் அடிச்சுவட்டைப் பின்பற்றி, அவருடனேயே பயணப்படத் தொடங்கினார். மேலும், "கிரியேட் - நமது நெல்லை காப்போம்' என்ற அமைப்பின் மாநில ஒருங்கிணைப்பாளராகவும் பங்காற்றினார். 
2003-ஆம் ஆண்டில் நம்மாழ்வார் மேற்கொண்ட விழிப்புணர்வு நடைபயணத்தின் போது, நாகை மாவட்டம், தலைஞாயிறு அருகே நம்மாழ்வாரைச் சந்தித்த முன்னோடி விவசாயி ஒருவர் காட்டுயானம், குழியடிச்சான், பால்குடவாழை, குறுங்கார், சிங்கினிக்கார், குருவிக்கார், பனங்காட்டு குடவாழை ஆகிய 7 பாரம்பரிய நெல் ரக விதைகளை அவரிடம் அளித்தார். 
அந்த நெல் வகைகளின் பாரம்பரியத்தையும், மருத்துவக் குணங்களையும், இயற்கைச் சீற்றங்களை எதிர்கொள்ளும் வலிமையையும் கேட்டறிந்த நம்மாழ்வார், தன் அருகிலிருந்த ஜெயராமனை அழைத்து, அந்த 7 பாரம்பரிய நெல் விதைகளையும் ஒப்படைத்து, அவற்றை மறு உற்பத்தி செய்து பெருக்கி, விவசாயிகளுக்குப் பகிர வேண்டும் என வேண்டுகோள் விடுத்தார். அந்த வேண்டுகோள், ஜெயராமனின் பாரம்பரிய நெல் ரகங்கள் குறித்தத் தேடலுக்குத் தூண்டுகோலானது. 
அப்போது முதல், பாரம்பரிய நெல் ரகங்களைத் தேடும் பணியைத் தன் வாழ்வின் மிக முக்கியப் பணியாக்கிக் கொண்ட ஜெயராமன், சுமார் 15 ஆண்டு காலமாக பாரம்பரிய நெல் வகைகள் குறித்த தேடலைத் தொடர்ந்தார். இந்தியாவில் ஒரு லட்சத்துக்கும் அதிகமான பாரம்பரிய நெல் ரகங்களும், தமிழகத்தில் 20 ஆயிரத்துக்கும் அதிகமாக இருந்த பாரம்பரிய நெல் ரகங்களும், பசுமைப் புரட்சி அளித்த ரசாயன உரங்களின் பயன்பாட்டால், அழிந்து போனதையும், பல நெல் ரகங்கள் அழிவின் விளிம்பில் இருப்பதையும் அறிந்தார். 
இதயம் பலப்பட, ஆண்மை வலிமை பெற, கர்ப்ப காலத்துக்கு, மகப்பேறுக்குப் பிந்தைய காலத்துக்கு, வெயில் காலப் பயன்பாட்டுக்கு, குளிர் காலப் பயன்பாட்டுக்கு என ஒவ்வொரு காலத்துக்கும், மனிதர்களின் ஒவ்வொரு நிலைக்குமான மருத்துவ குணமிக்க நெல் ரகங்கள், தமிழகத்தில் ஏற்கெனவே பயன்பாட்டில் இருந்ததையும், முன்னோர்களின் நோயற்ற வாழ்வுக்கு மருத்துவ குணமிக்க பாரம்பரிய நெல் ரகங்களும், இயற்கை விவசாயமும் முக்கிய காரணம் என்பதையும் அறிந்து, அவற்றை மீட்டெடுக்க உறுதி கொண்டார். 
தேடலைத் தொடர்ந்தார். பாரம்பரிய நெல் வகைகளை மீட்க அவர் மேற்கொண்ட பயணத்தில் சந்தித்த சவால்களும், அவமதிப்புகளும் ஏராளம். இருப்பினும் தனது தளராத முயற்சிகளால் அனைத்தையும் கடந்து வெற்றி கண்டார். 
மாப்பிள்ளை சம்பா, சீரகச் சம்பா, மைசூர் மல்லி, கிச்சிலி சம்பா என பல வகையான பாரம்பரிய நெல் ரகங்களை அவர் மீட்டெடுக்கத் தொடங்கினார். நம்மாழ்வார் அளித்த பாரம்பரிய ரக நெல் விதைகளையும், தன்னால் சேகரிக்கப்பட்ட பாரம்பரிய நெல் ரகங்களையும் திருத்துறைப்பூண்டி அருகே உள்ள ஆதிரெங்கத்தில் பயிரிடத் தொடங்கினார். அழிவின் விளிம்பில் இருந்த பல நெல் ரகங்கள், அங்கு மறு உற்பத்தியாகத் தொடங்கின. 
ஆண்டு தோறும் மே மாத இறுதியில் பாரம்பரிய நெல் திருவிழாவை நடத்தத் தொடங்கினார். இந்த நெல் திருவிழாவில் பங்கேற்கும் விவசாயிகளுக்குப் பாரம்பரிய நெல் ரகங்களின் விதைகளை 2 கிலோ எடையில் இலவசமாக அளித்து, அதனை ரசாயன உரங்கள் இல்லாமல் இயற்கை முறையில் மறு உற்பத்தி செய்து, அடுத்த ஆண்டு நெல் திருவிழாவுக்கு வரும் போது 4 கிலோ விதை நெல்லாகத் திருப்பி அளிக்க வேண்டும் என்பது பாரம்பரிய நெல் ரகங்களின் மறு உற்பத்தியை விரிவுப்படுத்த,ஜெயராமன் பயன்படுத்திய ஓர் உத்தி. 
பாரம்பரியமான நெல் ரகங்களில் சுமார் 500 நெல் ரகங்களையாவது மீட்டெடுத்து, மறு உற்பத்தி செய்திட வேண்டும் என்ற உத்வேகத்துடன் சுழன்று, 174 பாரம்பரிய நெல் வகைகளை மீட்டார். இறுதியாக மேற்கு வங்கத்தில் பொரிகள் தயாரிப்புக்குப் பயன்படுத்தப்படும் நெல் வகையைச் சேகரித்துக் கொண்டு வந்ததுடன், ஓய்ந்து விட்டது நெல் ஜெயராமனின் பாரம்பரிய நெல் தேடல். 
மத்திய அரசின் "கிருஷ்டி சல்மான்' விருது உள்பட பல விருதுகளையும், மறைந்த முன்னாள் குடியரசுத் தலைவர் ஏ.பி.ஜெ. அப்துல் கலாம் உள்பட பலரின் பாராட்டுச் சான்றுகளையும் பெற்ற நெல் ஜெயரானுக்கு, டிசம்பர் 7-ஆம் தேதி நடைபெற்ற இறுதி ஊர்வலத்தில் பங்கேற்ற ஆயிரக்கணக்கான இயற்கை வேளாண் ஆர்வலர்கள், விவசாயிகள் அவரால் மீட்டெடுக்கப்பட்ட நெல் ரகங்களின் பெயர்களை உரக்கக் கூறி, உணர்ச்சிப் பெருக்கால் சிந்திய ஒவ்வொரு துளி கண்ணீரும், விலை மதிக்க முடியாத விருதுகளே. 
மேல்நிலைக் கல்வியைக் கூட எட்டாத ஜெயராமன், வேளாண்மையில் எட்டிய உயரம், எவராலும் எளிதில் எட்ட முடியாதது என்பதை மறுப்பதற்கில்லை. 500 நெல் ரங்களை மீட்டெடுக்க வேண்டியது இலக்கு எனப் பயணப்பட்ட நெல் ஜெயராமனின் பயணம் பாதியிலேயே தடைப்பட்டுவிட்டது. அவர் வகுத்த பாதையில் இனி பயணத்தைத் தொடரப்போவது யார்? 
11 வயதுடையவராக, பள்ளி மாணவனாக இருக்கும் நெல் ஜெயராமனின் மகன் சீனிவாசராம், தந்தை விட்டுச் சென்ற பணியைத் தொடருவது சாத்தியமில்லை. எனவே, என்ன ஆகப் போகிறது நெல் ஜெயராமனின் விதைப் பண்ணை? இனி நடக்குமா பாரம்பரிய நெல் திருவிழா? என எண்ணற்ற கேள்விகள் நெல் ஜெயராமனின் மறைவுக்குப் பின்னால் பதில் இல்லாமல் கிடக்கின்றன. 
இந்தக் கேள்விகள், அவரது இறுதி ஊர்வலத்துக்கு முன்பாக இயற்கை வேளாண் ஆர்வலர்களால் சிந்திக்கப்பட்டன. நெல் ஜெயராமன் விட்டுச் சென்ற பணிகள் தொய்வின்றி தொடர, நாங்கள் என்றும் உறுதுணையாக இருப்போம் என நம்பிக்கையை விதைத்துச் சென்றுள்ளார், "கிரியேட் நமது நெல்லை காப்போம்' அமைப்பின் தேசிய ஒருங்கிணைப்பாளர் உஷா. 
இதுகுறித்து, நெல் ஜெயராமனுடன் பயணப்பட்டவர்களில் ஒருவரும், இயற்கை உழவர் இயக்க திருவாரூர் மாவட்டச் செயலாளருமான ஜி. வரதராஜனிடம் பேசிய போது, "நெல் ஜெயராமன் விட்டுச் சென்ற பணிகளைத் தொடரும் வழிமுறைகள் குறித்து இயற்கை வேளாண் ஆர்வலர்கள் ஒருங்கிணைந்து பேசி வருகிறோம். இறுதியான திட்டம், ஜனவரி மாதத்தில் அறிவிக்கப்படலாம். அவரது பணிகள் நிச்சயம் தொடரும். நாடெங்கிலும் உள்ள இயற்கை வேளாண் ஆர்வலர்கள் அதற்கு உறுதுணையாக உள்ளனர். முதல் முயற்சியாக, வரும் மே மாத இறுதியில், அவரால் தொடங்கப்பட்ட பாரம்பரிய திருவிழாவை தொடர்ந்து நடத்தத் திட்டமிட்டுள்ளோம்'' என்றார். 
எம்.சங்கர்

]]>
https://www.dinamani.com/weekly-supplements/dinamani-kathir/2018/dec/17/ஓய்வறியா-உழவன்-3059774.html
3055368 வார இதழ்கள் தினமணி கதிர் ஆயுள் காக்கும் ஆயுர்வேதம்: மைக்ரேன் தலைவலிக்கு மருந்து! DIN DIN Monday, December 10, 2018 02:59 PM +0530 என்னுடைய அண்ணன் மகள் மணமானவர். வயது 47. கடந்த 15 ஆண்டுகளுக்கும் மேலாக மைக்ரேன் தலைவலியால் அவதியுற்று வருகிறாள். அண்மையில் இந்த தலைவலி வந்தபோது, மயக்கமுற்று, தற்காலிகமாக, பேச முடியாத நிலை வந்தது. இதற்கு ஆயுர்வேதத்தில் மருந்து உள்ளதா?

-க.இளங்கோ, சென்னை - 101.

பிராணவாயுவின் முக்கிய இருப்பிடமாகிய தலைப்பகுதியில், நீங்கள் குறிப்பிடும் மைக்ரேன் தலைவலியைக் குணப்படுத்த, அந்த வாயுவின் சீரான செயல்பாட்டிற்கான அடித்தளம் அமைத்துத் தர வேண்டிய அவசியமிருக்கிறது. வாயினுள் மூலிகைத்தைலம் விட்டு நன்கு குலுக்கித் துப்புவதும், தலை, காது, கண் மற்றும் மூக்கினுள் மூலிகைகளால் காய்ச்சப்பட்ட எண்ணெய் வகைகளால் இட்டு நிரப்புவதுமான  சிகிச்சை முறைகளே நல்ல பலனை அளிக்கக் கூடியவை. அந்த வகையில், தலைக்குக் க்ஷீரபலா தைலத்தைச் சூடாக்கி, பஞ்சில் முக்கி போட்டு வைக்கும் சிகிச்சை முறையும், வசாலசுனாதி எனும் மூலிகைத் தைலத்தை, வெது வெதுப்பாக காதில் விடும் முறையும், கண்களைச் சுற்றி வரம்பு கட்டி, அதனுள் பிழிந்து விடப்படும் த்ரைபல க்ருதம் எனும் நெய் மருந்தைவிட்டு நிரப்பிவைப்பதும், மூக்கினுள் 3 - 4 சொட்டுகள்,  நரம்பிற்கு ஊட்டமளிக்கும் க்ஷீரபலா தைலத்தை விட்டுக் கொள்வதும், நரம்புகளிலுள்ள வாயுவை நெய்ப்புடன் குணமாக்கி, தலைவலி முற்றிலும் விட்டு அகல உதவிடக்கூடும். நீர்க்கோர்வையினால் தலைவலி ஏற்படுவதாயிருந்தால், ராஸ்னாதி சூரணம் எனும் மூலிகை சூரணத்தை, சிறிது இஞ்சிச் சாறுடன் குழைத்துச் சூடாக்கி, நெற்றியில் பற்று இடுவதன் மூலம், தலை சார்ந்த ரத்த குழாய்கள் விரிவடைந்து, ரத்த ஓட்டம் சீராவதால், தலைவலி குறைந்துவிடும். இந்த சிகிச்சை முறைகள் அனைத்துமே மூளையைச் சார்ந்த நரம்பு மண்டலங்களை வலுப்படுத்துவதும், அவற்றில் ஏற்படும் வாயுவின் சீற்றத்தை அகற்றி, ஊட்டத்தை அளிப்பதுமாகும். 

உணவில் சூடு ஆறிய நிலையிலுள்ள பருப்பு சாம்பார், கொத்துக்கடலை சுண்டல், உருளைக்கிழங்கு, வாழைக்காய் பொரியல், வேர்க்கடலை சட்னி போன்றவற்றைச் சேர்க்கக்கூடாது. இவற்றால் ஏற்படும் வாயுவின் சீற்றமானது, குடலிலிருந்து கிளம்பி ரத்த நாளங்களைத் தாக்கக் கூடும் அபாயமிருப்பதால், இவ்வகை உணவுகளை நீக்க வேண்டிய அவசியமிருக்கிறது. வெயிலில் குடை, குளிர்க் கண்ணாடி போன்றவற்றைப் பயன்படுத்தாமல் செல்லுதல் கூடாது. மன உளைச்சல் ஏற்படும்படியான வார்த்தைகளை அவர் மீது பயன்படுத்தாமல், அன்புடனும் அனுசரணையுடனும் பிறர் பழக வேண்டும். வயிற்றில் புண் இருந்தால் கூட, தலைவலி ஏற்படலாம். காரம், புளி, உப்பு அதிகம் சேர்த்த உணவு வகைகளால் வயிற்றில் வலியோ, எரிச்சலோ ஏற்பட்டால், பித்த சேர்க்கையினால் ஏற்படுவதாக ஊகித்தறியலாம். அதற்குரிய சிகிச்சைகளைச் சரியான படி செய்து பித்தத்தினால் ஏற்படக் கூடிய மைக்ரேன் தலைவலியைப் போக்கலாம்.

கண் பரிசோதனை செய்யப்பட்டு அவற்றில் ஏதேனும் கோளாறுகள் இருந்தால் அதை சரி செய்து கொள்வது நல்லது. கண்களை வலுப்படுத்தும் பொன்னாங்கண்ணி, முருங்கை கீரைகளை உணவில் அதிகம் சேர்க்க வேண்டும். கண் சோர்வடையும் வரை புத்தகம் படித்தல், தொலைக்காட்சி நிகழ்வுகளைப் பார்த்தல், இருட்டறையிலிருந்து கொண்டு வெளிச்சம் அதிகமுள்ள கைபேசி, கணிணி ஆகியவற்றைப் பார்த்தல், படுத்துக் கொண்டே கண்களுக்குச் சோர்வைத் தரும் செயல்களைச் செய்தல் போன்றவை தவிர்க்கப்பட வேண்டியவை.

தேனில் ஊறிய நெல்லிக்காய், ஒன்றிரண்டு காலையில் வெறும் வயிற்றில் சாப்பிடுதல், சம அளவில் அல்லாமல் தேனும் நெய்யும் குழைத்துச் சாப்பிடுதல், கல்லீரல் மற்றும் மண்ணீரல் பகுதியில் பித்த ஊறலை மட்டுப்படுத்தும் திரிபலைக் குடிநீர் பருகுதல், வாஸாகுடூச்யாதி எனும் கஷாய மருந்தை, திராக்ஷôதி கஷாய மருந்துடன் கலந்து காலை, மாலை வெறும் வயிற்றில் சாப்பிட்டு, குடலிலிருந்து பித்த ஊறலை அதிகப்படுத்தாதபடி வெளியேற்றுதல் போன்ற சில சிகிச்சை முறைகளால் தலைவலியானது பித்தத்தின் சீற்றம் காரணமாக ஏற்பட்டிருந்தால் குணப்படுத்தலாம். 

பிராணாயாமம், நல்ல காற்றுள்ள பகுதியில் அமைதியாக உட்கார்ந்திருப்பது, அன்புடன் கூடிய தோழிகளுடன் அடிக்கடி பேசி மனதை லேசாக்குவது, பகல் தூக்கம் தவிர்த்து, இரவில் அதிக நேரம் கண்விழித்திராமல், குறித்த நேரத்திற்கு படுத்துறங்குதல் போன்றவை நல்லது. தசமூல ரஸாயனம், அகஸ்திய ரஸாயனம் தல மூலஹரீதகீ போன்ற நல்ல தரமான ஆயுர்வேத மருந்துகளிலிருந்தாலும், மருத்துவர் ஆலோசனைப்படி சாப்பிடுவதே சிறந்தது.

(தொடரும்)

]]>
https://www.dinamani.com/weekly-supplements/dinamani-kathir/2018/dec/10/ஆயுள்-காக்கும்-ஆயுர்வேதம்-மைக்ரேன்-தலைவலிக்கு-மருந்து-3055368.html
3055367 வார இதழ்கள் தினமணி கதிர் சிரி... சிரி... சிரி... சிரி...  DIN DIN Monday, December 10, 2018 02:56 PM +0530 ""அந்தப் படத்தைப் பார்த்துட்டு வாயைப் பிளக்காதவங்களே இருக்க முடியாது''
""அவ்வளவு நல்ல படமா?''
""நல்லா கொட்டாவி விடுவாங்கன்னு சொல்ல வந்தேன்''

வி.ரேவதி, தஞ்சை.

 


""நாம் பார்த்த பெண்ணுக்கு சர்க்கரை இருக்குன்னு ஏன் முன்னாலேயே சொல்லலை?''
""பொண்ணு "லட்டு'  மாதிரின்னு சொன்னப்பவே நீ உஷாராயிருக்கணும்''

பானுமதி, சென்னை-110.

 


""மன்னருக்கு மாபெரும் சோதனையாமே?''
""ஆமாம்... பதுங்கு குழியில் வெள்ளம் புகுந்துவிட்டதாம்''

பொ.பாலாஜி, அண்ணாமலை நகர்.



""எங்க வீட்ல சாப்பிட்ட உடனே கிளம்பிடுவியா?''
""இல்லை. கை கழுவிட்டுத்தான் கிளம்புவேன்''

ஆர்.விஸ்வநாதன், சென்னை-78.

]]>
https://www.dinamani.com/weekly-supplements/dinamani-kathir/2018/dec/10/சிரி-சிரி-சிரி-சிரி-3055367.html
3055366 வார இதழ்கள் தினமணி கதிர் திரைக் கதிர் - ஜி.அசோக்      DIN Monday, December 10, 2018 02:54 PM +0530 "காதலர் தினம்' உள்ளிட்ட தமிழ்ப் படங்களில்  நடித்தவர் சோனாலி பிந்த்ரே. பல்வேறு ஹிந்தி படங்களிலும் அவர் நடித்திருக்கிறார். கடந்த சில மாதங்களுக்கு முன் திடீரென்று ஒரு தகவலை வெளியிட்டு ரசிகர்களை அதிர்ச்சிக்குள்ளாக்கினார் சோனாலி. புற்று நோய் பாதித்திருப்பதாக அவர் தெரிவித்ததையடுத்து திரையுலகினரும் ரசிகர்களும் அவர் குணம் அடைய பிரார்த்திப்பதாக ஆறுதல் கூறி பதிவுகளை அனுப்பினர். அமெரிக்காவில் தங்கி நோய் பாதிப்புக்கான சிகிச்சை பெற்று வரும் சோனாலி, சமீபத்தில் தனது தலை முடியை முற்றிலுமாக அகற்றி  மொட்டை தோற்றத்துக்கு மாறினார். இந்நிலையில் அனைவரது பிரார்த்தனையுடனும், மன வலிமையுடனும் சிகிச்சை பெற்று வந்த சோனாலி, தற்போது முழுமையாகக் குணம்அடைந்து நாடு திரும்பியுள்ளார். 

மும்பைக்கு வருவதற்கு முன் விமான நிலையத்தில் இருக்கும் புகைப்படத்துடன் உருக்கமான பதிவை சோனாலி பகிர்ந்திருந்தார். அதில், ""என் இதயம் இருக்கும் இடத்தை நோக்கி புறப்பட்டேன். இந்த உணர்வை வார்த்தைகளால் விவரிக்க முடியவில்லை. எனிலும் முயற்சிக்கிறேன். எனது நண்பர்கள், குடும்பத்தைக் காண ஆவலாக இருக்கிறேன். நோய் உடனான எனது போராட்டம் முழுவதுமாக தீரவில்லை என்றாலும், சிறிய இடைவெளி கிடைத்துள்ளதில் மகிழ்ச்சி'' என்று நெகிழ்ந்துள்ளார்.  

-------------------------


ஜெயலலிதா வாழ்க்கை வரலாறு படத்தில் அவரது வேடம் ஏற்கவுள்ளார் நித்யாமேனன். தற்போது இது தொடர்பாக அளித்துள்ள பேட்டியில், அது பற்றி பேசியிருக்கிறார்.   ""ஜெயலலிதா வேடத்தில் நடிக்க என்னிடம் இயக்குநர் பிரியதர்ஷினி கேட்டபோது அவர் அந்த பாத்திரத்துக்காக எவ்வளவு அர்ப்பணிப்புடன் பணியாற்றி உள்ளார் என்பது எனக்குத் தெரிந்தது. அதே பொறுப்பு எனக்கும் நிச்சயம் இருக்கிறது. ஜெயலலிதா போன்ற பெரிய தலைவர் வேடத்தில் நடிப்பது சாதாரணமானது அல்ல. இதற்காக உடலளவிலும், மனதளவிலும் நான் அவராக மாற வேண்டியிருக்கிறது. அது சாதாரண விஷயம் கிடையாது. அதற்காக அர்ப்பணிப்புடன் நானும் பணியாற்றிக் கொண்டிருக்கிறேன்.  ஹிந்தியில் விண்வெளி படமொன்றில் நடிக்கிறேன். அக்ஷய்குமார் ஹீரோ. இப்படத்தின் கதை என்னை வியப்பில் ஆழ்த்தியது. சந்திரனுக்கு இந்தியா விண்கலம் அனுப்புவது என்பது ஒரு வரலாற்றுச் சாதனை. அதுபோன்ற கதை அம்சம் கொண்டு இப்படத்தில் நடிப்பதை பெருமையாக கருதுகிறேன்'' என்று தெரிவித்துள்ளார் நித்யாமேனன்.

-------------------------

தற்போது "இந்தியன்' படத்தின் இரண்டாம் பாகம் உருவாகவுள்ளது. தனது அரசியல் களத்தில் தீவிரமாக இயங்கி வரும் கமல், அரசியல் நுழைவுக்குப் பின் இந்தப் படத்தில் நடிக்கிறார். திரைக்கதை அமைக்கும் பணிகளை முடித்து விட்ட, ஷங்கர் படப்பிடிப்புக்குத் தயாராகி விட்டார். அதற்கு முன்னதாக கமலுக்கு பிரத்யேக இந்தியன் தாத்தா வேடம் போடப்பட்டு மேக்கப் டெஸ்ட் எடுக்கப்பட்டது. இதையடுத்து இந்த மாதம்14-ஆம் தேதி படப்பிடிப்பு சென்னையில் தொடங்குகிறது. இதில் முதல் முறையாக கமல்ஹாசன் ஜோடியாக காஜல் அகர்வால் நடிக்கிறார். கமல்ஹாசன் மற்றும் காஜல் அகர்வாலுக்கு அமெரிக்காவில் மேக்கப் டெஸ்ட் நடந்தது. இதில் பங்கேற்ற காஜல் அகர்வால், மேக்கப் போட்ட பிறகு ஆளே அடியோடு மாறிவிட்டாராம். முதல்முறையாக கமல்ஹாசன், ஷங்கர் கூட்டணியில் இணைந்துள்ள அவர், இந்த படத்தின் படப்பிடிப்பு முடியும் வரை புதுப்படத்தில் நடிப்பதில்லை என முடிவு செய்துள்ளார். வேறு எந்த படத்திலும் நடிக்க கூடாது என பட ஒப்பந்தத்திலும் கையெழுத்து இட்டுள்ளார் காஜல்.


-------------------------


அஜித் - சிவா கூட்டணியில் உருவாகி வரும் "விஸ்வாசம்'  படப்பிடிப்பு முடிந்து இறுதிக் கட்டப் பணிகள் நடக்கின்றன. பொங்கலுக்கு திரைக்கு வருவது உறுதி செய்யப்பட்டுள்ள நிலையில், ஹிந்தியில் ஹிட்டான "பிங்க்' பட தமிழ் ரீமேக்கில் நடிக்கிறார் அஜித்.  ஸ்ரீதேவியின் கணவர் போனி கபூர் தயாரிக்கிறார். "தீரன் அதிகாரம்' ஒன்று படத்துக்கு பிறகு இந்தப் படத்தை வினோத் இயக்குகிறார். ஹிந்தியில் அமிதாப்பச்சன் நடித்திருந்த வேடத்தில் அஜித் நடிக்கிறார். படத்தில் அமிதாப் மற்றும் டாப்ஸி உள்ளிட்ட 3 நடிகைகள் தாம் முக்கிய பாத்திரங்கள். இதில் டாப்ஸி வேடத்தில் நடிக்க நஸ்ரியாவிடம் பேசப்பட்டுள்ளதாகத் தெரிகிறது. சில நாள்களுக்கு முன் சுட்டுரையில், "" விரைவில் தமிழ் படத்தில் நடிக்கப் போகிறேன். அறிவிப்பு வரும்'' என நஸ்ரியா பதிவிட்டிருந்தார். அது பிங்க் பட ரீமேக்தான் என பேசப்பட்டது. இதற்கிடையில் நஸ்ரியாவுக்கு பதில் டாப்ஸியே அவரது வேடத்தில் நடித்தால் நன்றாக இருக்கும் என்ற கருத்தும் படக்குழுவினர் மத்தியில் பரவியுள்ளது. இதனால் அஜித்துடன் நஸ்ரியா நடிப்பாரா அல்லது டாப்ஸி நடிப்பாரா என்பது உறுதியாகவில்லை. இருவருமே இந்த வாய்ப்பைப் பிடிக்க போட்டி போடுவதாக கோடம்பாக்க வட்டாரத்தில் பேசப்பட்டு வருகிறது.  


-------------------------


தொடக்க காலத்தில் போஜ்புரி படங்களில் மட்டுமே நடித்து வந்த ராதிகா ஆப்தேவுக்கு மற்ற மொழிகளில் பட வாய்ப்புகள் குறைவாகவே இருந்தன. அழகு, திறமை இருந்த போதிலும் நட்சத்திர அந்தஸ்து அடைவதற்காக அவர் பல வருடம் காத்திருந்தார்.  நடிப்பு ஒரு வகையில் கைகொடுத்த போதும், அடிக்கடி அவர் அதிரடியாக கருத்துகள் தெரிவித்து பரபரப்பு ஏற்படுத்தினார். பிரபல ஹீரோக்கள் மீது பாலியல் புகார்கள் கூறியும், கவர்ச்சி புகைப்படங்கள் வெளியிட்டும், மீடியாக்களின் கவனத்தை ஈர்த்தார். இந்நிலையில் உடல் எடை கூடியதால் பட வாய்ப்பைப் பறிகொடுத்த சம்பவம்பற்றி ராதிகா ஆப்தே கருத்து வெளியிட்டுள்ளார்:  

""வழக்கமாக ஹீரோக்களுக்கு வரும் பட வாய்ப்புகள் போல் எனக்கும் ஒரு வாய்ப்பு வந்தது.  எனக்காக எழுதியிருப்பதாக கூறியதால் நானும் ஆர்வமாகக் கேட்டேன், கதையும் பிடித்திருந்தது.  அதில் நடிக்க சம்மதித்தேன். தயாரிப்பாளரும் படத்தைத் தயாரிக்க முன்வந்தார். படப்பிடிப்பு தொடங்குவதற்கு முன்பாக நான் விடுமுறைப் பயணமாக சென்று திரும்பினேன். அதற்குள் என்ன நடந்ததோ தெரியவில்லை, என்னை அப்படத்திலிருந்து நீக்கிவிட்டு வேறு நடிகையை ஒப்பந்தம் செய்திருந்தார்கள். 

"ஏன் இப்படிச் செய்தீர்கள்?' என்று கேட்டேன். அதற்கு அவர், "நீங்கள் முன்பு இருந்ததைவிட ஊருக்கு சென்றுவந்தபிறகு உடல் எடை கூடிவிட்டீர்கள். அதனால்தான் வேறு நடிகையைத் தேர்வு செய்தோம்' என்றார்கள். "சிறிது அவகாசம் கொடுங்கள் கதாபாத்திரத்துக்கு ஏற்ப உடல் எடையை குறைத்துக்கொள்கிறேன்' என்று நான் கூறியபோதும் அது அவரது காதில் விழவில்லை'' என வருத்தப்பட்டுள்ளார் ராதிகா ஆப்தே. 

]]>
https://www.dinamani.com/weekly-supplements/dinamani-kathir/2018/dec/10/திரைக்-கதிர்-3055366.html
3055365 வார இதழ்கள் தினமணி கதிர் பேல்பூரி DIN DIN Monday, December 10, 2018 02:51 PM +0530
கண்டது

(மதுரை வில்லாபுரத்தில் ஒரு முடித்திருத்தகத்தின் பெயர்)

சிகை வெட்டும் சிற்பி

டி.கே.ஹரிஹரன், மதுரை.

 

(தஞ்சை மாவட்ட படைப்பாளர்கள் சங்க அலுவலத்தில் கண்ட வாசகம்)

எழுத்தால் உலகத்தைப் படைப்போம்
உலகத்தையே எழுத்தால் படிப்போம்.

தா.ஜெசிமா பர்வின், கரம்பயம்.

 

(புதுக்கோட்டை - அறந்தாங்கி சாலையில் உள்ள ஓர் ஊரின் பெயர்)

எரிச்சி

ப.விஸ்வநாதன், கீரமங்கலம்.

 

கேட்டது

(திருவாரூர் திருமண மண்டபத்தில் இருவர்)

""என்ன சார் வடையை அல்வாவுல  தொட்டுத் திங்குறீங்க?''
""ஏன் தின்னா என்ன? ஆறின வடையை சூடான அல்வாவுல தொட்டு தின்னு பாரு. ருசி தெரியும்.  இந்த மாதிரி காம்பினேஷனை இங்குதான் சாப்பிட முடியும்.  ஓட்டல்லயோ...  வீட்டுலயோ... சாப்பிட முடியாது.''

பரதன், திருவாரூர்.

(திண்டுக்கல் - எரியோடு பஸ்ஸில் இருவர்)

""என் மனைவி வந்த பிறகுதான் இதெல்லாம் தெரிஞ்சுக்கிட்டேன்''
""எதெல்லாம்?''
""ஆயிரம் ரூபாய்க்கு செருப்பு, பத்தாயிரம் ரூபாய்க்கு சேலையெல்லாம் இருக்குன்னு தெரிஞ்சுக்கிட்டேன்''

எஸ்.சடையப்பன், காளனம்பட்டி.


யோசிக்கிறாங்கப்பா!


மரக்கிளையில் அமரும் பறவை
கிளை உடைந்துவிடும் என அஞ்சுவதில்லை.
அதன் நம்பிக்கை கிளையில் இல்லை...
அதன் சிறகில் உள்ளது.

அ.பூங்கோதை, செங்கல்பட்டு.



மைக்ரோ கதை


ஒருவர் விமானநிலையத்துக்குப் போன் செய்தார். ""இங்கேயிருந்து சிங்கப்பூருக்கு போய்ச் சேர எவ்வளவு நேரம் ஆகும்?''  என்று கேட்டார்.  வேறு வேலையில் கவனமாக இருந்த விமானநிலைய ஊழியர், ""ஒரு நிமிஷம்''  என்றார். 

""இவ்வளவு சீக்கிரமாகக் கூட சிங்கப்பூருக்குப் போக முடியுமா?''  என்று சந்தேகத்துடன் போனை வைத்துவிட்டார் அவர்.

நெ.இராமன், சென்னை-74.

எஸ்.எம்.எஸ்.


ஆண் பாலாகப் பிறந்ததற்குப் பதிலாக
ஆவின் பாலாகப் பிறந்திருந்தால்...
மனைவிக்கு முன் தைரியமாகப் பொங்கியிருக்கலாம்.

சுகந்தாராம்,  சென்னை-59


அப்படீங்களா!


நெதர்லாந்தின்  ஆம்ஸ்டர்டாம் நகரில் அண்மையில் "உலகக் கட்டுமானத்துறை திருவிழா' நடைபெற்றது.  அப்போது சிங்கப்பூரில் உள்ள முதியோர் குடியிருப்பு கட்டடம் ஒன்றை 2018 ஆம் ஆண்டின் உலகின் சிறந்த கட்டடம் என்று தேர்ந்தெடுத்திருக்கிறார்கள். அப்படியென்ன அந்தக் கட்டடத்தில் உள்ளது?

இந்தக் கட்டடத்தில் பல தளங்கள் உள்ளன. தரைக்கு அடியில் உள்ள திறந்தவெளி தளத்தில்  உடற்பயிற்சி செய்யும் இடம், வாகனங்கள் நிறுத்தும் இடம், பூங்காக்கள், ஷாப்பிங் மால்கள் ஆகியவை உள்ளன.  மத்திய தளப் பகுதியிலோ மருத்துவ மையங்கள் உள்ளன. கட்டடத்தின் மேல்தளத்தில் முதியோர் வசிக்கும் பகுதி உள்ளது. பச்சைப்பசேல் என்று செடிகளும், சிறு மரங்களும் இந்த மேல்தளத்தில் உள்ளன. முழுக்குடியிருப்பும் இந்த பசுமையான தாவரங்களால் போர்த்தப்பட்டு உள்ளன. நல்ல காற்று, வெளிச்சம், தூய்மை என அங்கே வாழ்பவர்களுக்கு உடல், மன நலனைக் கொடுக்கும் இந்தக் குடியிருப்பை ரஞஏஅ என்ற புகழ்பெற்ற சிங்கப்பூர் கட்டுமான நிறுவனம் உருவாக்கியுள்ளது.

என்.ஜே., சென்னை-116.

]]>
https://www.dinamani.com/weekly-supplements/dinamani-kathir/2018/dec/10/பேல்பூரி-3055365.html
3055364 வார இதழ்கள் தினமணி கதிர் ஆசை...  தகவல்: தங்க. சங்கரபாண்டியன் DIN Monday, December 10, 2018 02:44 PM +0530 ""ஆரம்பத்தில்  நான்  ஒரு நடிகன் ஆவதற்கே ஆசைப்பட்டேன்.  ஆனால்  இடையில் நான் சட்டம்  படிக்கப் போனாலும்  சினிமாவில்  நடிக்க வேண்டும் என்னும்  ஆசையே  என் மனதில் இருந்தது''.

- நடிகர் மம்முட்டி

]]>
https://www.dinamani.com/weekly-supplements/dinamani-kathir/2018/dec/10/ஆசை-3055364.html
3055363 வார இதழ்கள் தினமணி கதிர் பாராட்டு... தகவல்: அனிதா  ராமச்சந்திரன் DIN Monday, December 10, 2018 02:43 PM +0530 ""என் இசையமைப்பில்  பாடிய  யாரையுமே  நான் பாராட்டியதில்லை.  பிரபல பாடகர்  எஸ்.பி.பி. கூட  ஒரு பேட்டியில்,  "இளையராஜா  என்னை ஒருமுறை கூட பாராட்டியதில்லை' என்று சொன்னார்.  அது உண்மைதான். ஆனால்  ஒரு தெலுங்குப்  படத்தில்  அவர் பாடிய  கஜல்  பிரமாதமாக  இருந்தது.  அதற்காக நான் அவரைப்  பாராட்டினேன்''

- இசையமைப்பாளர்  இளையராஜா

]]>
https://www.dinamani.com/weekly-supplements/dinamani-kathir/2018/dec/10/பாராட்டு-3055363.html
3055362 வார இதழ்கள் தினமணி கதிர் பாரம்பரியம்...   - வி.ந.ஸ்ரீதரன் DIN Monday, December 10, 2018 02:41 PM +0530 திருச்செந்தூரில்  இருந்து 33  கி.மீ.  தூரமே  உள்ள  ஸ்ரீ வைகுண்டம்  செல்ல இந்த ரயிலில்  பெரியவர்களுக்கு  கட்டணம்  400 ரூபாய்.   சிறுவர்களுக்கு  கட்டணம்  400 ரூபாய்.

காரணம்  இந்த ரயிலின்  எஞ்சின்  உலகின் மிகப் பழமையான  -  அதாவது 1855- ஆம் ஆண்டு   உருவான  நீராவி  எஞ்சினாகும்.  40 பேர் அமரக் கூடிய  ஒரே ஒரு கோச் மட்டும்  இதில் உள்ளது.  நீராவி  எஞ்சின் பாரம்பரியத்துக்காக  இந்த ரயில்  பயணம்  நடத்தப்படுகிறது.

]]>
https://www.dinamani.com/weekly-supplements/dinamani-kathir/2018/dec/10/பாரம்பரியம்-3055362.html
3055360 வார இதழ்கள் தினமணி கதிர் பெரியவரைப் பார்த்து வாழ்த்து பெறுதல்! முல்லை   மு.பழனியப்பன் DIN Monday, December 10, 2018 02:38 PM +0530 மு.வ.விடம்  ஒரு பழக்கம்  இருந்தது.  பொங்கலை  அடுத்துக் காணும்  பொங்கல் அன்று ஒரு பெரியவரைச் சென்று பார்த்து  அவரது  வாழ்த்துகளைப்  பெறுவதை தனது வழக்கமாகக் கொண்டிருந்தார். 

முதலில்  தமிழ்த் தென்றல்  திரு.வி.க.வைச்  சென்று  பார்த்துக் கொண்டிருந்தார். 
திரு.வி.க.விற்குப் பின் நாடகச் செம்மல்  பம்மல்  சம்பந்தம்  முதலியாரைச் சென்று  பார்த்து ஆண்டுதோறும்  வாழ்த்துகளைப் பெறுவார்.   சம்பந்த முதலியாரின் வீடு  பாரி நிலைய  அலுவலகத்துக்கு  அருகிலேயே இருந்தபடியால் அவர் இங்கு  வந்து என்னையும்  உடன் அழைத்துச் செல்வார்.

பாரி செல்லப்பனின் ஒரு நேர்காணலில்  இருந்து.

தகவல்: முல்லை   மு.பழனியப்பன்

]]>
https://www.dinamani.com/weekly-supplements/dinamani-kathir/2018/dec/10/பெரியவரைப்-பார்த்து-வாழ்த்து-பெறுதல்-3055360.html
3055359 வார இதழ்கள் தினமணி கதிர் தென்னையைப் பெற்றவள் ஜனநேசன் DIN Monday, December 10, 2018 02:35 PM +0530 ""ஊருக்கு மணக்கும்  சந்தனம்னு... உங்க அம்மா  உங்களைச்  சொன்னது தப்பு'' என்று மனைவி புலம்பினாள். 

""என்ன காலையில் மாமியார் செத்த  பின்னாலே புகழஞ்சலி  பாடுறே?'' என்று இவன்  கேட்டான். 

""ஒண்ணுமில்லை, நான் அதைத் திருத்தி ""ஊருக்கு மணக்குமாம் தாழம்பூ; அதுக்கு கீழே  கிடக்குமாம்  முள்ளும் புதரும்ன்னு  மாற்றி சொல்லணும்''

""சரி, காலையிலே என்ன புதுப் பாராயணம் ? நேரடியா  விஷயத்தை சொல்லு ''

""அப்புறம் என்னங்க, வீட்டுக்கு முன்னால நின்ன  வேப்ப  மரம்  குடை சாய்ந்தது கணக்கா புயல் காற்றில் விழுந்து ரெண்டு நாளா கரண்டே வராம குகைக்குள்ள குடியிருக்கிற மாதிரி  இருட்டிலே தடுமாறி கிட்டு இருக்கோம். அதுக்கு  ஒரு ஏற்பாடு பண்ணி சீக்கிரமா கரண்டு வர்ற  வழியைப் பாக்காம புயல் நிவாரணப்பொருள் திரட்டி லாரியோட போய்  கொடுக்கப் போறோமுன்னு  கிளம்பிட்ட மனுசனை வேற  என்ன   சொல்றது ?''              

""உனக்கு  இப்போ என்ன ? ஜெனேரட்டர்  வாடகைக்குப்  பிடிச்சி தொட்டி நிறைய தண்ணி  நிரப்பியாச்சு. இன்னும் மூணு நாளைக்கு நமக்கு குடிக்கவும் , குளிக்கவும் தண்ணிக்குப் பஞ்சமில்லை . அக்கம்பக்கம் கேட்கிறவங்களுக்கும் கொடுக்கலாம். பலசரக்கு இருக்கு. பாலிருக்கு. அப்புறம் ஏன் புலம்புற? குடிக்கத் தண்ணியும்,  உடுத்த துணியும் , வவுத்துக்கு  சோறும் இல்லாத ஜனங்களுக்கு  நாம் ஏதாவது  செய்யணுமா இல்லையா ?'' 

""நீங்க சொல்றது சரிதான். நானொண்ணும்  ஈவு இரக்கமில்லாதவ இல்ல. தீபாவளிக்கு எடுத்ததில்  கூடுதலா எடுத்த இரண்டு நைட்டியையும், ஒரு சேலையையும் தர்றேன், நல்லா எடுத்துட்டுப் போய் குடுங்க. நான் வேண்டாமுன்னு குறுக்கே நிற்கல்லை. ஆனா அக்கம்பக்கம் என்ன நடக்குதுன்னு தெரிஞ்சிக்கவாவது  டிவி பார்க்க ஏற்பாடு பண்ணிட்டுப் போங்கன்னுதான் சொல்றேன்'' 

மனைவியின் பேச்சில்  இவனுக்கு மகிழ்ச்சி என்றாலும் காரைக்குடி நகரெங்கும் மின்மாற்றிகள்  வெடித்து, மின்கம்பங்கள் விழுந்து ஊரே அல்லோகலப்பட்டு கிடக்குது. நமக்கும் மட்டும் கரண்டு உடனே வந்துருமா என்று கேள்வி எழுந்த போதே இவனுக்கு ஒரு யோசனை மின்னியது ! 

""சரி, டிவி நியூஸ் தானே பார்க்கணும். இந்தா இந்த செல்லிடபேசியில்  இந்த அலைவரிசை செய்தியைப் பார்த்துக்கோ. கரண்டு வர இன்னும் ஒரு நாளாகலாம். அளவா பயன்படுத்திக்கோ. நீ குடுக்கிற துணிமணிகளை குடு, நாங்க  சேகரிச்சிருக்கிற துணிகளோட  சேர்த்துக்கிறோம்.  வீட்டிலே பச்சைக்கொடி காட்டியாச்சு. இனி எந்தத் தடங்களும் இல்லாமல் செல்லலாம்'' என்று  வாங்கிகொண்டு  தனது சங்க நண்பர்கள் குழுமும் இடத்திற்கு போனான்...

நண்பர்கள் நிவாரணப் பொருள்களை ரகம் வாரியாகப் பிரித்து  மூடைகள் கட்டும் பணியில் இருந்தனர்.இவனது மனைவியின் பங்களிப்பை கொடுக்கவும் அவர்கள் பாராட்டியது இவனுக்கு புதுத் தெம்பு பிறந்தது. உற்சாகமாக  கட்டு கட்டும் பணியில் ஈடுபட்டனர். இவர்கள்  அமர்த்திய சரக்குந்து வந்தது. பொருள்கள் சேதமுறா வண்ணம் கட்டியதை கவனமாக அடுக்கினர். காவிரி டெல்டாவின் கடைமடைப் பகுதியில் சாலைகள் துண்டிக்கப்பட்ட ஒரு குக்கிராமத்துக்கு  விநியோகிக்க வேண்டும் என்று அங்குள்ள  நண்பர்கள் மூலம் வருவாய்த்துறை அதிகாரிகளின்  ஒத்துழைப்பில்  குடும்பம் வாரியாக விநியோகிக்கத்   திட்டம். 

சாலைகள் காற்றில்  கிழிந்து, வசம் புரண்ட சேலைகள் போல்  நிலைகுலைந்து கிடந்தன. ஒரே நீர்வெளியாகத் தெரிந்தது. பயிர்பச்சைகள் எல்லாம் நீர்ப்போர்வை போர்த்தப்பட்டுக்   கிடந்தன. தென்னை மரங்கள் எல்லாம் பாதி எரிந்த பத்திக்குச்சிகள் போல  சாய்ந்து நின்றன. நின்று நின்று வலித்து காலாற படுத்துக் கிடப்பது போல் மின்கம்பங்கள் மட்டமல்லாக்க கிடந்தன. நிழல்குடைகளாக நின்ற வேப்பமரங்கள் சில கம்பிகள் உடைந்த குடைகள் விரிந்தும் மடங்கியும் சாய்ந்தும், குடை  பற்றிய விரல்கள் போல் வேர்தெரிய கிடந்தன. பார்க்கவே நெஞ்சை அறுத்தது. இதைவிடக் கொடுமை இவர்களின் வாகனத்தை மறித்து எங்க ஊருக்கு நிவாரணப் பொருள் வரவில்லை. "சாப்பிட்டு இரண்டு நாளாச்சு' என்று வழி நெடுக கூக்குரல்கள் கேட்டு மனசு பிசைந்தது... அவர்களைச் சமாதானப்படுத்தி ஓரடி நகர்வது பெரும்பாடாகி விட்டது. இந்த மக்கள் பாடு தீர உடனடி வழி ? சிந்தித்து    நடவடிக்கை எடுக்க வேண்டியவர் நாமல்லவே என்று புலம்புவதைத்  தவிர வேறு என்ன செய்ய ?கூகுள் வரைபடம் மூலம் ஊர்ந்தார்கள். அது காட்டும் வழி கிட்ட இருந்தது. ஆனால் ஊரோ எட்ட இருந்தது.    வருவாய்த்துறை மூலம்  சங்க நண்பர்கள் வழி சொல்ல ஒரு வகையாக  ஊரை எட்டினோம்.  கூடி நின்ற மக்கள் துயரம் வழியும் குரலில் வரவேற்றார்கள். இவர்களது தாமதம்  காத்திருந்த நண்பர்களிடமும் சோர்வையும் அச்சத்தை ஏற்படுத்தி இருந்தது. இது போன்ற நிவாரணப் பொருள்களை ஏற்றிவரும் சரக்குந்துகளை ஆங்காங்கே மக்கள் மறித்து தம்தம் கிராமங்களுக்கு  கடத்துகிறார்கள் என்ற தகவல் நண்பர்களுக்குச் சோர்வு உண்டாக்கியிருந்தது . இவர்களது வண்டியையையும் பதாகையையும் பார்த்த பின்னர் தான்  உயிர்த்ததுபோல் உணர்ந்தார்கள்.

சங்க நண்பர்கள் வருவாய்துறையினர் மூலம் குடும்பவாரியாக வரிசைப்படுத்தி முதலில் நிவாரணப் பொருள்களையும் ,பிறகு , தலைக்கு ஒன்றாக உணவுப் பொட்டலத்தையும் கொடுத்தார்கள். பாதிக்கப்பட்ட ஒவ்வொருவருடைய முகத்திலும் அவர்கள் பொருளை வாங்கும்போது கழிவிரக்கமும், நன்றியும் , இதோடு பிரச்னை தீர்ந்துவிடாதே என்ற ஏக்கமும் கலந்த கலவையான உணர்வுகள் தென்பட்டன. இதை   இவனால் எதிர்கொள்ள இயலவில்லை. இப்படியான பிரச்னைகளை உடனடியாக தீர்க்க  தான் அமானுஷ்ய சக்திபடைத்த மனிதனில்லையே என்ற ஏக்கம் இவனைப் பிழிந்தது.

மக்கள்  தாம் பெற்ற நிவாரணப் பொருள்களை ஒழுங்கு செய்துவிட்டு பெற்ற உணவை உண்டார்கள். அவர்கள் சாப்பிடும்போது  அவர்களது முகத்தைப் பார்த்தால் தெய்வீகம் என்று சொல்வார்களே அதை உணர முடிந்தது. "பசித்தவன் முன் உணவே தெய்வம்' என்று விவேகானந்தர் சொன்னது நினைவில் வந்தது. பின்னர் வருவாய்த்துறை அலுவலர்களால் ஏற்பாடு செய்யப்பட்ட மின்னூடகவியலார்கள் ஒவ்வொரு குடும்பத்தாரையும் நேர்காணல் செய்து கஜா புயலினால் ஏற்பட்ட இழப்புகள், அரசிடம் எதிர்பார்க்கும் நிவாரணம் போன்றவற்றை உருக்கமாகச் சொல்லி வருவாய்த்துறையினரும்  எழுத்தாளர்கள் சங்கமும் இணைந்து  வழங்கிய தற்காலிக நிவாரணத்திற்கு நன்றியை உணர்ச்சிப் பெருக்கோடு சொல்லிக் கொண்டு இருந்தார்கள். இந்த விளம்பர உத்தி இவனுக்குப் பிடிக்கவில்லை.மெல்ல நகர்ந்து வீழ்ந்த தென்னைகள் பக்கமாக நகர்ந்தான்.

அங்கே அறுபது வயது மதிக்கத்தக்க பெண்மணி பொட்டலத்தை அவிழ்த்து சாப்பிடாமல் தென்னை மரங்களைப் பார்த்து கண்ணீர் வடித்துக் கொண்டிருந்தார். எல்லாரும் சாப்பிட்டு பசித்தீயை அணைத்து மகிழ்ந்திருக்கிறார்கள். இந்தப் பெண்மணி மட்டும்  தனியே அமர்ந்து அழுதுகொண்டிருக்கிறாரே, இவன் அருகே போனான்.

""ஏனம்மா தனியே சாப்பிடாமல் அழுது கொண்டிருக்கிறீர்கள் ? உங்கள் வீட்டு பிள்ளைகள் ?''

""இல்லை தம்பி. இப்ப  நான் ஒருத்தி தான். எனக்கு இப்ப பசியில்லை.''

""உங்கள் பிள்ளைகள் எங்கேம்மா ?''

""ஆமாப்பா. அதோ சாய்ந்து கிடக்கிற பதினாறு தென்னம்பிள்ளைகளும், பத்து மாமரங்களும் தான் என் பிள்ளைகள் !அதுகெல்லாம் போனப்புறம் நான் சாப்பிட்டா என்ன ? சாப்பிடாட்டா என்ன ?''

""அம்மா உங்க குறைகளை அந்த டிவி காரங்க முன்னால சொன்னா, அதைப் பார்த்து அரசாங்கமோ, எங்களைமாதிரி தன்னார்வ  சங்கங்களோ வேண்டிய உதவியை செய்யலாம், சாப்பிட்டிட்டுப் போய் , எங்களுக்கு நன்றி சொல்லாமல் உங்கள் குறைகளை மட்டும் சொல்லிட்டு வாங்கம்மா. தயவுசெஞ்சு போங்கம்மா. உங்க குறைகளை வெளியே சொல்லலையின்னா எங்களை மாதிரி சங்கத்துக்காரங்க முயற்சி எடுத்ததுக்கு பலனில்லை''

""இல்ல தம்பி. நான் டிவியில எதாவது சொல்லி அதை என் மகன், மருமகள் கேட்டாங்கன்னா அவங்களுக்கு அவமானம்ன்னு  நினைப்பாங்க. நான் இப்படியே என் தென்னம்பிள்ளைகளோடையே  ஆயுசை முடிச்சுக்கிறேன்.''

""என்னம்மா, உங்களுக்கு மகன், மருமகள் இருக்காங்களா சொல்லுங்கம்மா. நாங்க எந்த சிக்கலும் இல்லாம சேர்த்து வைக்கிறோம்''

""தம்பி, நான் பெத்தபிள்ளை இல்லை.வளர்த்த பிள்ளை. என் வீட்டுக்காரருக்கும் என் அக்காவுக்கும் பிறந்த பிள்ளை. பிள்ளை பெறந்த மறுநாளே எங்கக்கா செத்துப்போச்சு. அத்தான்  கைப்பிள்ளையோட கஷ்டப் படராறேன்னு , அந்த பிள்ளையை வளர்க்க நான் இஷ்டப்பட்டுதான் அவரை ரெண்டாம் தாரமாக கட்டிகிட்டேன். அக்கா பிள்ளையை வளர்க்க நான் பிள்ளையை பெத்துக்கல. அத்தானுக்கும் பிள்ளைக்கும் எந்த குறையையும் இல்லாம குடும்பத்தை காபந்து பண்ணினேன். பையனும் அவன் கல்யாணம் கட்டிகிறவரைக்கும் அம்மான்னு அவ்வளவு பாசமும்  பிரியமும் காட்டினான்... ம்ம்ம், கல்யாணம் முடிச்சதும் பட்டினத்தில் பொண்டாட்டி கூடவே இருந்திட்டான்.பிறந்த பேரப்பிள்ளைகளைக் கூட கூட்டிட்டு வந்து காட்டலை. அக்கா பெத்த பிள்ளைக்காக   நீ பிள்ளை பெத்துக்காம குடும்பத்தைக்  காப்பாத்தினே. பிள்ளை நம்மளை அம்போன்னு கைவிட்டுட்டான்.இப்போ நானும் நட்டாத்துல விட்டுட்டு போகப் போறேனே என்று அழுத என்புருஷன் எனக்கு கடைசிவழி துணையாய்  பதினாறு தென்னம்பிள்ளைகளையும், பத்து மாமரங்களையும் விட்டுட்டு செத்தாரு. இந்த தென்னம் பிள்ளைகளை   வச்சுதான் வயித்துப் பாட்டை ஓட்டினேன்.  அதுகளும் என்னை நிர்கதியாய் விட்டுட்டுப் போக வச்சுருச்சே இந்த எமகாதக புயலு'' அந்த அம்மா சொல்ல சொல்ல இவனுக்கும் கண்களில் புயல்நீர் பொங்கியது.

""அம்மா கவலைப்படாதீங்க, வேர் சாய்ந்த மரத்தையும், பாதி முறிஞ்ச மரத்தையும்  உயிர்ப்பிக்கும் விஞ்ஞான நடைமுறைகள் இருக்கும்மா. அந்த வேர்கள் காய்ந்து விடாமல் சாணிபூசி பாதுகாத்து வைங்க.    இன்னும் மூணுநாளில் அதற்கான விவசாய விஞ்ஞானிகளை எங்கள் செலவிலே கூட்டிட்டு வந்து உங்களுக்கு ஆயுள்பரியந்தம் துணை நிற்கவும், உதவவும் நாங்க இருக்கோம்மா. தயவுசெஞ்சு  சாப்பிடுங்கம்மா'' என்று கண்ணீர் பொங்க  குரல் தழுதழுக்க சொன்னான்.

அந்த அம்மா இவனது தோளை தட்டி, உணவு பொட்டலத்தைப் பிரித்தாள்.

]]>
https://www.dinamani.com/weekly-supplements/dinamani-kathir/2018/dec/10/தென்னையைப்-பெற்றவள்-3055359.html
3055356 வார இதழ்கள் தினமணி கதிர் சொன்னால் நம்பமாட்டீர்கள் ! - 6 சின்ன அண்ணாமலை DIN Monday, December 10, 2018 02:28 PM +0530
இதய ஒலி

ஒரு சமயம் காரைக்குடி கம்பன் திருநாளுக்குப் போய் இருந்தேன். ஸ்ரீ டி.கே. சிதம்பரநாத முதலியார் என்னும் பெரியார் வெகு அருமையாக எல்லாரும் ரசிக்கும்படி கவிதைகள் சொல்லுகிறார்கள் என்று ஏற்கெனவே நண்பர்கள் மூலம் கேள்விப்பட்டிருந்தேன். ஆனாலும் அதை நான் நம்பவில்லை.

"இது வெறும் புகழுரையாய்த்தான் இருக்க முடியும். கவிதைகளையாவது எல்லாரும் ரசிக்கும்படி சொல்லுவதாவது?'  என்று எண்ணிக்கொண்டேன். ஸ்ரீ டி.கே.சி. அவர்கள் மேடைக்கு வந்தார்கள். எல்லோரும் அவரைக் கரகோஷம் செய்து வரவேற்றனர். சபையோர் செய்த கரகோஷத்தையும் ஆரவாரத்தையும் வரவேற்பையும் உற்சாகத்தையும் பார்த்தால் சாக்ஷôத் கம்பருக்கு நடந்த வரவேற்பாகவே காணப்பட்டது. டி.கே.சியினுடைய கம்பீரமான மீசையும் சாந்தம் தவழும் முகமும் என்னை மிகவும் வசீகரித்து விட்டன. அவர்கள் "மைக்'கின் முன் நின்ற நிலையும் எடுப்பான குரலும், பிரசங்க தோரணையும் என்னைப் பிரமிக்கச் செய்துவிட்டன. அன்று கம்பராமாயணத்திலிருந்து ஒரு முக்கியமான கட்டத்தை டி.கே.சி. அவர்கள் எடுத்துச் சொன்னார்கள். விசுவாமித்திரர் ஜனகனிடம் ராமனுடைய வீரச் செயலைப் பற்றிக் கூறும் கட்டம்.

""வரும் வழியில் ஒரு குன்று. அந்தக் குன்றைப் பற்றியும் அதில் வாழும் அரக்கியான தாடகையைப் பற்றியும் பேசிக் கொண்டிருந்தோம். அப்போது திடீரென்று குன்றின் உச்சியில் தாடகை பயங்கரமான உருவத்தில் தோன்றினாள். குன்றின் சரிவில் இறங்கி நின்றுகொண்டு அவள் ஒரு சூலாயுதத்தை எடுத்து எங்கள் மேல் வேகமாக வீசினாள். ராமன் ஓர் அம்பை எய்து அந்தச் சூலாயுதத்தைச் சுக்குச் சுக்காக ஆக்கிவிட்டான். பிறகு பெரிய அம்பு ஒன்றை எடுத்து எய்தான். அது என்ன செய்தது? தன் கண்களில் கொல்லுலை போல அக்கினியைக் கொப்புளித்துக் கொண்டிருந்த தாடகையின் மார்பை ஊடுருவிப் போயிற்று.

அலை அலையாக மோதிக் கொண்டிருக்கும் நீலக் கடல் போல் சக்தியும் அற்புதமும் வாய்ந்தவனாய் இருக்கிறான் ராமன். ஜனகனைப் பார்த்து விசுவாமித்திரர் பேசுகிற பேச்சு இப்போது பாட்டைப் பார்க்கலாம்:

""அலையுருவக் கடல் உருவத்(து)
ஆண்டகை தன் நீண்டுயர்ந்த
 நிலையுருவப் புயவலியை
நீ யுருவ நோக்கையா
உலையுருவக் கனல் உமிழ்கண்
தாடகை தன் உரம் உருவி--''

தாடகையின் மார்பை உருவிவிட்டு வேறு என்ன செய்தது அந்த அம்பு? அவளுக்குப் பின்னிருந்த மலையை உருவியது, பிறகு மலைக்குப் பின் பக்கத்தின் சரிவில் வளர்ந்து ஓங்கி நின்ற மரம் ஒன்றையும் உருவியது. தன் காரியங்களை இப்படியாக முடித்துக்கொண்டு அந்த அம்பு கடைசியில் மண்ணுக்குள் பாய்ந்தது. செய்யுள் முழுமையும் பார்ப்போம்:

அலையுருவக் கடல் உருவத்(து)
ஆண்டகை தன் நீண்டுயர்ந்த
நிலையுருவப் புயவலியை
நீ யுருவ நோக்கையா!
உலையுருவக் கனல் உமிழ்கண்
தாடகை தன் உரம் உருவி
மலையுருவி மரம் உருவி
மண் உருவிற்(று) ஒருவாளி.

என்று பாட்டைப்பாடி முடித்தார்கள். ஒவ்வொரு வரியையும் நிதானமாக நிறுத்திப் பல தடவை சொன்னார்கள். அவர்கள் சொன்ன அந்தப் பாட்டிலுள்ள அம்பானது தாடகையின் (உரத்தை) மார்பை உருவியது. எல்லாம் அப்படியே கண் முன்னால் காட்சியளித்தது. ஆனால் ஸ்ரீ டி.கே.சி. அவர்களுடைய அழகிய பிரசங்கமோ முன்னாலிருந்த மைக்கை உருவியது. பின்னர் மின்சாரக் கயிறுகளை உருவியது. அப்புறம் எங்கள் இதயத்தை உருவி மனத்திலே பாய்ந்தது!

இப்படியாக ஓர் அதிசயமான காரியத்தை அன்று டி.கே.சி. செய்து விட்டார்கள். பாட்டு: அதிலும் கம்பன் பாட்டு எவ்வளவு சுலபமாகப் போய்விட்டது. அடடா என்ன எளிமை! இந்த எளிமை இத்தனை நாளாக நமக்குப் புலப்படாமல் போய்விட்டதே என்று ஒரே வருத்தமாகப் போய்விட்டது. அத்துடன் வியப்பும் ஆச்சரியமும் அதிசயமும் போட்டி போட்டுக் கொண்டு என்னைத் திக்கு முக்காடச் செய்து விட்டன. அதிலிருந்து ரசிகமணி டி.கே.சி.யின் அடியார்களில் அடியேனும் ஒருவனாகிவிட்டேன்.

பிறகு இரண்டு மூன்று தினங்கள் காரைக்குடியிலேயே தங்கியிருந்து ஸ்ரீ டி.கே.சி.யின் பிரசங்கங்களைக் கேட்டு அனுபவித்தேன்.

கடைசி நாளன்று டி.கே.சி.யை நெருங்கி பல விஷயங்களைப் பற்றிப் பேசிக் கொண்டிருந்தபோது, ""தாங்கள் எழுதிய புத்தகம் ஏதாவது இருக்கிறதா?'' என்று கேட்டேன். அதற்கு ரசிகமணி அவர்கள் ""ஆம் "இதய ஒலி' என்ற புத்தகம் ஒன்றை நண்பர்கள் பிரசுரித்திருக்கிறார்கள்'' என்று சொன்னார்கள்.

உடனே எனக்கு அப்புத்தகத்தைப் பார்க்க வேண்டும் என்ற ஆசை உண்டாயிற்று. அப்போது எனக்கு பால்ய வயது. ஸ்ரீ டி.கே.சி. அவர்களின் புத்தகத்தை விலை கொடுத்து வாங்கும் வசதியற்றவனாயிருந்தேன். ஆயினும் எனக்கென்று ஒரு புத்தகம் இருக்க வேண்டும் என்ற ஆசைவிட்ட பாடில்லை.

நான் அப்போது காரைக்குடி திரு. சா. கணேசன் அவர்கள் வீட்டில் தங்கியிருந்தேன். அவரிடம் நிறையப் புத்தகங்கள் இருக்கின்ற விஷயம் எனக்கு ஏற்கெனவே தெரியும். எனவே, "இதயஒலி'யும் இருக்கத்தான் வேண்டும் என்று எண்ணி அவரது புத்தக சாலையை சோதனை போட்டேன். என் முயற்சி வீண் போகவில்லை. "இதயஒலி' கிடைத்தது!

எனக்கு ஏற்பட் சந்தோஷத்தைச் சொல்லி முடியாது! ஒன்றிரண்டு பக்கம் வாசித்தேன். ஸ்ரீ டி.கே.சியே நேரில் வந்து நின்று கொண்டு முகத்தில் புன்னகை தவழப் பேசுவதுபோல் இருந்தது. அந்தப் புத்தகத்தைவிட்டு பிரிய மனம் வரவில்லை. வேறு புத்தகம் வாங்கவும் வசதி இல்லை. என்ன செய்யலாம்? வேறு என்ன இருக்கிறது செய்வதற்கு? மெதுவாகப் புத்தகத்தை எடுத்து ஒளித்துக் கொண்டு கம்பி நீட்டிவிட்டேன்! நேராகப் பஸ் ஸ்டாண்டிற்குப் போய் ஊரை அடைவதற்குள் என் பாடு வியர்த்து விறுவிறுத்துவிட்டது. வீட்டை அடைந்தவுடன் ஓர் அறைக்குள் சென்று கதவைத் தாளிட்டுக் கொண்டு புத்தகத்தை ஒரு முறை பிரித்துப் பார்த்தேன். அதன் அட்டையில்

"அருமை நண்பர்
சா. கணேசன் அவர்களுக்கு...
டி.கே.சி.'

என்று எழுதியிருந்தது. அந்தப் புத்தகத்துக்குடையவருடைய  பெயரையும் ஒரு முறை வாசித்தேன். அதை அப்படியே வைத்திருந்தால் நம்ம குட்டு வெளிப்பட்டு விடும் என்று பயந்து மேற்படி எழுத்துக்களை மிகவும் கஷ்டப்பட்டு அழித்தேன், பிறகு அதன் மேல் ஒரு வெள்ளைத் தாளை ஒட்டி அதில் என் பெயரை கொட்டை எழுத்தில் எழுதிப் புத்தகத்தைச் சொந்தமாக்கிய பின்புதான் நிம்மதி உண்டாயிற்று.

அந்தப் புத்தகத்தை நான் எத்தனை தடவை படித்திருப்பேன் என்பதைக் கணக்கிடவே முடியாது!

"இதயஒலி' செய்த வேலையோ அபாரம் என்று சொல்லலாம். தமிழ்க் கவிதைகளை, படித்தவர்களும் பாமரர்களும் அநுபவிக்கலாம் என்று அது சொல்லித் தந்தது. உண்மைக் கவிதை எது, போலிக் கவிதை எது, என்பதையும் "இதயஒலி' எடுத்துக்காட்டிற்று.

கம்பன், கலிங்கத்துப் பரணி ஆசிரியர், மகாமகோபாத்யாய சாமிநாத ஐயர், வெள்ளக்கால் முதலியார், கவிமணி, பாரதியார், நந்திக் கலம்பகம் ஆசிரியர் பாலசரஸ்வதி கிருஷ்ணமாச்சாரியார், முத்தொள்ளாயிரம் ஆசிரியர் திருப்பாப்புலியூர் ஞானியார் சுவாமிகள், குற்றாலக் குறவஞ்சி ஆசிரியர் முதலிய அனைவரையும் அறிமுகம் செய்து வைத்து அவர்களின் கவிதைகளை அநுபவிக்கும்படி "இதயஒலி' செய்தது.

"இதயஒலி'யில் உள்ள "சங்கீதமும் சாகித்யமும்'  என்ற கட்டுரையைப் படித்த பிறகு உண்டான ஆவேசம்தான் என்னைத் தேவகோட்டையில் ஒரு தமிழிசை மாநாடு நடத்தும்படி தூண்டியது. தமிழிசைக் கிளர்ச்சிக்கே அந்தக் கட்டுரை தூண்டுகோலாகவும் அமைந்தது.

இப்படிப்பட்ட அற்புதமான காரியங்களைச் செய்த "இதயஒலி' யின் இரண்டாம் பதிப்பை வெளியிடும் பாக்கியம் எனக்குக் கிடைத்தது.

சொன்னால் நம்ப மாட்டீர்கள், இந்த இரண்டாம் பதிப்பை வெளியிடுவதற்காகத் திருத்திக் கொடுக்கப்பட்ட புத்தகம் நான் காரைக்குடி திரு. சா. கணேசன் அவர்கள் வீட்டிலிருந்து அமுக்கிக் கொண்டு வந்த அதே புத்தகம் என்பதுதான்.

"இதயஒலி'யைச் சொல்லாமல் எடுத்துக்கொண்டு வந்த குற்றத்திற்குப் பரிகாரமாக நானே ஆயிரக்கணக்கான புத்தகம் போட்டு விநியோகம் செய்யும்படி ஏற்பட்டது, எல்லாவற்றையும்விட அதிசயமான விஷயமாகும்.

(தொடரும்)
 

]]>
https://www.dinamani.com/weekly-supplements/dinamani-kathir/2018/dec/10/சொன்னால்-நம்பமாட்டீர்கள்----6-3055356.html
3055355 வார இதழ்கள் தினமணி கதிர் இமயமலைச் சாரலிலே இரட்டைக் காப்பியங்கள்! பேராசிரியர் தி. இராசகோபாலன் Monday, December 10, 2018 02:22 PM +0530
இங்கிலாந்து நாட்டு வைசிராய்கள் கல்கத்தாவைத் தலைநகரமாகக் கொண்டு இந்தியாவை ஆண்ட நேரத்தில், அவர்கள் கோடைவாச ஸ்தலமாக சிம்லாவைத் தேர்ந்தேடுத்தனர். சிம்லாவில் இருந்து கொண்டே  ராஜ்ஜிய பரிபாலனம் செய்வதற்கு வசதியாக, அப்போது வைசிராயாக இருந்த லார்டு டப்ஃரின்
(1884-1888) தேக்கு மரங்களைக் கொண்டே, அங்கோர் குபேரபுரியை எழுப்பினார். அதற்கு "வைஸ்ராயின் அரண்மனை' (வைசிராய் பேலஸ்) எனப் பெயரும் சூட்டினார்.

சிம்லா நகருக்கு மின்சாரம் வருவதற்கு முன்பே அங்கிருந்த வைசிராய் அரண்மனைக்கு மின்சாரம் வந்து விட்டது. நிர்வாகம் தடையின்றி நடைபெறுவதற்காக இலண்டனிலிருந்து  நீராவி இயந்திரங்களைக் கொண்டு வந்து, மின்சக்தியைப் பயன்படுத்தினர். ஸ்காட்லாந்திலிருந்து வந்த கட்டடக் கலைஞர்களே, அந்தக் கனவு மாளிகையை வடிவமைத்தனர்.

இம்மாளிகையின்  சித்திர வேலைப்பாடுகளைக் கண்டு அதிசயித்த அப்போதைய நேபாள மன்னர், அம்மாளிகைக்கு எட்டு உலோகங்களால் ஆன ஓர் மணியைப் பரிசாகத் தந்து சென்றிருக்கிறார்.

இந்திய விடுதலைக்குப் பிறகு வைஸ்ராய் அரண்மனை, "ராஷ்டிரபதி நிவாஸ்' என்று பெயர் மாற்றம் செய்யப்பட்டது. "கேபினட் செகரட்டரி' எனும் அந்தஸ்திலிருந்த உயர்நிலை அதிகாரிகள், அந்த உல்லாச புரியிலே சுகபோகமாக வாழ்ந்தனர். சர்வபள்ளி டாக்டர் எஸ். இராதாகிருஷ்ணன் குடியரசுத் தலைவராக வந்தவுடன், அந்த உல்லாசபுரியை, ஓங்கி உலகளந்த ஆராய்ச்சிக்கு ஓர் அறிவாலயமாக ஆக்கத் திட்டமிட்டார். 

கேம்பிரிட்ஜ், ஆக்ஸ்போர்டு பல்கலைக்கழகங்களைப் போல், இந்தியாவிலுள்ள அறிவுஜீவிகளுக்கு ஓர் ஆராய்ச்சிக்கூடமாக அந்த ராஷ்டிரபதி நிவாûஸ மாற்ற வேண்டுமென்பது டாக்டர் இராதாகிருஷ்ணனின் கனவு. எனவே, அதற்கு "இண்டியன் இன்ஸ்டிடியூட் ஆஃப் அட்வான்ஸ்  ஸ்டெடிடீஸ்' என்கிற  பெயரைச் சூட்டினார். 1964-ஆம் ஆண்டு அக்டோபர் மாதம் பத்தாம் நாள் நடைபெற்ற விழாவுக்குத் தாமே தலைமை வகித்து, தனது கனவு நிறுவனத்தைத்  தொடங்கி வைத்தனர்.

இன்றைக்கு கன்னியாகுமரியிலிருந்து நேபாளம் வரையிலுள்ள அறிவுப்பட்டறைகள், தங்கள் அறிவுமுனைகளைக் கூர்மைப்படுத்துவதற்கு உலைக்களமாக இயங்கி வருகின்றது அந்நிறுவனம். மொழியியல், சமூகவியல், மானுடவியல் ஆகிய துறைகளைப் பற்றி அறிந்து கொள்வதற்கு, உலகத்தரம் வாய்ந்த நூல்கள் அனைத்தும் அங்கு வாசம்  செய்கின்றன. டாக்டர் இராதாகிருஷ்ணன் உருவாக்கிய அந்த நிறுவனத்திற்கு மேலும் புதுரத்தம் பாய்ச்ச நினைத்த   மத்திய அரசு, ஜவாஹர்லால் நேரு பல்கலைக்கழகத்தில்  தத்துவப் பேராசிரியராகப் பணியாற்றிய பேராசிரியர் கபில் கஃபூரை அந்நிறுவனத்தின் தலைவராக நியமித்தது.

கடந்த  ஐம்பதாண்டுகளில் அந்நிறுவனத்தில் தமிழ்மொழி பற்றியோ, தமிழிலக்கியங்கள் பற்றியோ யாரும் வாய் திறந்ததில்லை. ஆனால், இந்திய இதிகாசங்களையும் இந்திய தத்துவங்களையும் கற்றுத் துறைபோகிய பேராசிரியர் கபில் கஃபூர் பதவியேற்றவுடன், தமிழில் "இரட்டை காப்பியங்கள்' என்று அழைக்கப்படும் "சிலப்பதிகார'மும் "மணிமேகலை'யும் அந்நிறுனத்தில் ஓங்கி ஒலிப்பதற்குப் பச்சைக்கொடி காட்டினார்.  இரட்டைக் காப்பியமான சிலப்பதிகாரம் மற்றும் மணிமேகலை பற்றி ஆராய்வதற்கு கடந்த மாதத்தில் இரண்டு நாள்கள் ஒதுக்கப்பட்டன. 

தமிழ்நாட்டிலிருந்து தஞ்சைப் பல்கலைக்கழக மேனாள் பேராசிரியர் டாக்டர் பழநிஅரங்கசாமி தலைமையில் ஐந்து பேராசிரியர்கள் புறப்படத் தயாராயினர். நிறுவனத் தலைவர் கபில் கஃபூர் தொடக்கவுரையில், இந்திய மண்ணின் காரமும்  சாரமும்  கொப்பளித்தது. ஆய்வரங்கின் மையப்பொருளை  முதன்மைப்படுத்திப் பேசிய பேராசிரியர் பழநி அரங்கசாமியின் நாவில் இரட்டைக்காப்பியங்கள் இரட்டைக் குயில்களாக உருவெடுத்து, ஆங்கில மொழியில்  தாளம் தப்பாது கூவின. 

இரண்டாவது அமர்வுக்குப் பேராசிரியர் ரமேஷ் சந்திரபிரதான்   தலைவராக இருந்தார்.  "சிலப்பதிகாரம் சித்திரிக்கும் பெண்ணியம்'  எனுந்தலைப்பில் கட்டுரை வடிவத்தில்  அமைந்த கருத்தாடலை, ஆங்கிலத்தில் நான் பேசி முடித்தேன். பெண்ணியம் உயர்குடிப்   பெண்களிடம் மட்டுமன்றி புறக்கணிக்கப்பட்ட வகுப்புப் பெண்களிடமும்  சுடர்விட்டுப் பிரகாசித்ததை எடுத்துகாட்டுக்களோடு எடுத்தியம்பினேன். 

மூன்றாவது அமர்வுக்குப் பேராசிரியர் டாம்பருதார் நாத் தலைமை வகித்தார். முதல் ஆய்வுக் கட்டுரையைப் பெரியார் பல்கலைக்கழக ஆங்கிலப் பேராசிரியர் டாக்டர்  வி. சங்கீதா , "காப்பியங்களுக்குள்ளே இரண்டு மாணிக்கங்கள்' எனுந்தலைப்பில் ஆங்கிலோ - அமெரிக்க காப்பியங்களுடன் ஒப்பிட்டு, இரட்டை காப்பியங்களின் தனித்துவத்தை  அற்புதமாக, பிறமொழியாளர்களின் மனங்கொள்ளுமாறு பதிவு செய்தார். 

இரண்டாவது  அமர்வில் அடுத்து இடம்பெறவிருந்தது, டி.என்.இராமச்சந்திரன் தீட்டிய "மணிமேகலைக் காப்பியத்தின் தனித்தன்மைகள்' என்பதாகும். கடைசி  நேரத்தில் டாக்டர் டி.என். இராமச்சந்திரனின்   உடல்நிலை, ஒத்துழைக்காமையினால், டாக்டர்  ஆர்.  சுப்பராயலுவே அக்கட்டுரையை வழங்கினார்.  டி.என். இராமச்சந்திரன்அக்கட்டுரையில்  மணிமேகலையில் சுடர்விடும் ஆளும் தன்மைகளைப் பட்டுக்கத்தரித்தது போல் எடுத்து மொழிந்திருந்தார். 

மூன்றாவது அமர்வுக்குப் பேராசிரியர் ரேகா செளத்ரி தலைமை வகித்தார். பாரதி  பார்வையில் திமிர்ந்த ஞானச் செருக்குடைய பெண்மணி அவர். தஞ்சை சாஸ்த்திரா  பல்கலைக்கழகத்தில்  பணியாற்றி ஓய்வுபெற்ற பேராசிரியர் டாக்டர் இராசமாணிக்கம்   "சிலப்பதிகாரம் சுட்டும் கவிதை அறங்கள்' எனுந் தலைப்பில் நேர்த்தியானதொரு கட்டுரை வடித்தார். "தாமஸ் ரைமர்' வரையறுத்த இலக்கிய அறங்கள், சிலப்பதிகாரத்தில் வென்று நிற்பதைச் சிறப்புற எடுத்துரைத்தார். 

நான்காவது அமர்வுக்கு டாக்டர் மனிஷா செளத்திரி தலைமை வகித்தார். திறமையான புலமையுடைய பேராசிரியர் அவர்.  அவருடைய தலைமையில் தஞ்சைத் தமிழ்ப்பல்கலைக் கழகத்தின் பதிவாளராகத் திகழ்ந்த டாக்டர் சுப்பராயலு, மணிமேகலையில் "இயற்கை இறந்த நிகழ்ச்சிகள்' எனும் தலைப்பில் தம் ஆய்வைக் கோடிட்டுக் காட்டினார். மனிதர்கள் தம் முயற்சியால் வெல்ல முடியாத இடங்களில், இயற்கை இறந்த நிகழ்ச்சிகள் ஆற்றலோடு எழுந்து தீர்த்து வைப்பதை நுண்மாண் நுழைபுலத்தோடு விளக்கியிருந்தார் ஆய்வாளர். 

அதே அமர்வில், இரண்டாவது கட்டுரையைப் பேராசிரியர், டாக்டர் பழநிஅரங்கசாமி,  "மணிமேகலையில் பன்முகத்தன்மை' எனுந் தலைப்பில் வழங்கியிருந்தார்.  தமிழ்-ஆங்கிலம் ஆகிய இருமொழிகளிலும் ஆழங்காற்பட்டவர் பேராசிரியர் என்பதால் மணிமேகலை ஒரு போராளியாகவும், ஞானப்பெண்ணாகவும் விளங்குவதை நடிப்பியலோடு எடுத்துக்காட்டி, அவையினரின் ஒட்டுமொத்த கவனத்தையும் அள்ளிச் சென்றார். 

ஐந்தாவது அமர்வுக்கு பேராசிரியர் முன்டோலினி நாராயணன் தலைமை வகித்தார். பேராசிரியர் பழநி அரங்கசாமி "திறனாய்வுப் பட்டறையில் சிலப்பதிகாரம்' எனுந்தலைப்பில், ஒப்பியல் நோக்கில், இளங்கோவடிகளின் படைப்புப் பரிமாணங்களை விளக்கிப்பேசினார். அவையினர் கண்டறியாதன கண்டதாக வியந்து பாராட்டினர்.

ஆறாவது அமர்வுக்கு  ஆசுதோஷ் பரத்வாஜ் தலைமை வகித்தார். பல்வேறு மாநிலங்களில் இருந்து வந்திருந்த ஆய்வியல்  அறிஞர்கள், வைரக்கற்களை ஒன்றோடு  ஒன்று உராய்ந்து மெருகேற்றுவது போல், ஆய்வரங்கத்தை மெருகேற்றினர். தமிழறிஞர்கள் அங்கு விற்றதும் அதிகம்;  பெற்றதும் அதிகம். 
வியப்புக்குரிய  செய்தி என்னவென்றால், நிறுவனத்தலைவர் பேராசிரியர் கபில்  கஃபூர் ஏறத்தாழ  அனைத்து அமர்வுகளுக்கும் வருகை தந்து, ஒவ்வொரு விவாதத்தின் போதும் பங்கேற்றது, தமிழுக்குக் கிடைத்த பரிசாகும். 

இமயமலைச்சாரல் எலும்புக்கும் குளிரையூட்டி நடுங்கச் செய்யும் தன்மை வாய்ந்தது. அந்தக்குளிரிலும், சிலப்பதிகாரமும் - மணிமேகலையும் தந்த கதகதப்பு, எங்களை நிமிர்ந்து நிற்கச் செய்தது. அன்னைத்தமிழ் வடக்கே நடமாடுவதற்கு இதுவோர்  ஒத்திகையாகும்.

]]>
https://www.dinamani.com/weekly-supplements/dinamani-kathir/2018/dec/10/இமயமலைச்-சாரலிலே-இரட்டைக்-காப்பியங்கள்-3055355.html
3051575 வார இதழ்கள் தினமணி கதிர் ஐராவதம் மகாதேவன்: தமிழ்ச் சமூகத்திற்கு வழங்கிய கொடைகள்! - வீ.அரசு Sunday, December 2, 2018 12:00 AM +0530  

26.11.2018 அதிகாலை இவ்வுலகத்தை விட்டுச் சென்ற அறிஞர் ஐராவதம் மகாதேவன் (1930-2018) தமிழ்ச் சமூகத்திற்கு வழங்கிய அறிவுக் கொடைகளில் இரண்டை மட்டும் அவருக்கான அஞ்சலியாகப் பதிவு செய்வோம். 

-1924 இல் ஜான் மார்சல் (1876-1934) சிந்துசமவெளி நாகரிகம் என்ற தொல்பழம் நாகரிகத்தை உலகிற்கு அறிவித்தார்.  இந்த நாகரிகம் திராவிடர்கள் என்று அழைக்கப்படும் தேசிய இனத்துக்குரியது என்றும் அறிஞர்கள் உறுதி செய்தனர். இந்த ஆய்வில் அறிஞர் ஐராவதம் அவர்களின் பங்களிப்பு எத்தகையது?

- 1924  இல் கல்வெட்டறிஞர் கே.வி.சுப்பிரமணிய அய்யர் (1875- 1969) காலனிய தொல்லியல் ஆய்வாளர்கள் கோடிட்டுக் காட்டிய எழுத்துரு ஒன்றை ஆய்வு செய்து,

அவ்வெழுத்து பண்டையத் தமிழ் எழுத்து என்பதை உறுதி செய்தார். அவ்வெழுத்துரு "பிராமி' என்று பெயரிடப்பட்டது.  இந்த எழுத்துரு தொடர்பாக 
அறிஞர் ஐராவதம் அவர்கள் செய்த ஆய்வுகள் தமிழ்ச் சமூக வரலாற்றுக்கு எந்தெந்த வகைகளில் உதவுகின்றன?

சிந்து சமவெளி நாகரிகம் குறித்த ஆய்வுகள் 1924 முதல் பலரால் பல கோணங்களில் நிகழ்த்தப்பட்டன. சிந்து சமவெளி தொடர்பான அகழ்வாய்வுகளில்   கிடைத்த இலச்சினைகள் (நஉஅகந)  சுமார் ஐந்நூறுக்கும் மேல் ஆகும். இலச்சினைகளில் உள்ள  உருவங்கள், வரையப்பட்டுள்ள கோடுகள் ஆகியவற்றை ஆய்வுசெய்வதின் மூலமே அந்த நாகரிகம் பற்றி அறிய முடியும். ஆனால் அந்த இலச்சினைகள் தரவாக்கம் (இஞதடமந)செய்யப்படவில்லை. அவ்விதம் செய்தாலே ஆய்வுக்கு விரிவாகப் பயன்படுத்த முடியும். 

அறிஞர் ஐராவதம் அவர்கள்தாம் முதன்முதலில் அதனை முறைப்படுத்தி பதிவு செய்தார். அந்த அடிப்படை ஆவணத்தை 1977-இல் இந்திய தொல்லியல்துறை வெளிக்கொண்டு வந்தது. ""சிந்து சமவெளி எழுத்துகளின்  மூலவடிவம், அவை இடம் பெற்றிருக்கும் முறை, அதற்கான பட்டியல் எனும் பெயரில் 830 பக்கங்கள் கொண்ட  பெருநூலாக  அது அமைந்துள்ளது.  இதன் வருகைக்குப் பின் சிந்துசமவெளி இலச்சினைகளை  வாசித்து அறிவதில்  பெரும் மாற்றம் நிகழ்ந்தது.  ஐராவதம் அவர்களின் வாசிப்பில் சங்க இலக்கியத்தோடு சிந்துசமவெளி இலச்சினைகளுக்கு உள்ள உறவை விரிவாக ஆய்வு செய்துள்ளார்.  அவை திராவிட மொழிக் குடும்பத்தைச் சேர்ந்தவை என்பதையும் நிறுவியுள்ளார்.  இவ்வகையில் திராவிடர்களின் தொல்பழம் வரலாற்றுக்கு இவரது பங்களிப்பு அளப்பரியது. 

1954 - இல் தமிழின் தொல்லெழுத்துருவான தமிழ் - பிராமி குறித்த ஆய்வை ஐராவதம் நிகழ்த்தி வந்தார். ஒரு மொழியின் தொன்மை என்பது அம்மொழியின் எழுத்துருவின்  தொன்மையோடு  இணைந்தது. கி.மு. 550 முதல் இந்த எழுத்துரு  இருப்பது உறுதிப்படுத்தப்பட்டுள்ளது.  இவர் கி.மு. 250 முதல் கி.பி.600க்கு இடைப்பட்ட காலத்து எழுத்துருக்களை ஆவணப்படுத்தியுள்ளார். 96 இடங்களில் உள்ள கல்வெட்டுகளை  ஒளிப்படமாகப் பதிவு செய்துள்ளார். பலராலும் பலகாலங்களில்  கண்டறிந்த இந்த கல்வெட்டுகளுக்கு ஆவண வடிவம் தந்தவர் இவர்தான். "தமிழின் தொல்பழம் கல்வெட்டுகள்: வரலாற்றுக்கு முன்பிலிருந்து  கி.பி.ஆறாம் நூற்றாண்டு வரை' என்ற இந்தப் பெருநூல் தமிழ்ச் சமூக வரலாற்றின் முதன்மையான ஆவணம்.

இக்கல்வெட்டுகளில் உள்ள மொழி வரலாறு, சமய வரலாறு, தமிழ்ச் சமூக வரலாறு ஆகியவை தொடர்பான விரிவான  ஆய்வுகளைச் செய்திருக்கிறார். மெளரியன் பிராமி எழுத்துருவிலிருந்து தமிழ்ப்பிராமி எந்தெந்த வகைகளில் வேறுபட்டுள்ளது என்ற ஆய்வை நிகழ்த்தியுள்ளார்.  தமிழகத் தொல்லியல் அறிஞர்களிடம் தமிழ் பிராமி  குறித்து வேறுபட்ட  கருத்துநிலைகள் இருந்தாலும், அவற்றை தரவாக்கம் (இஞதடமந)   செய்த  பெருமை ஐராவதம் அவர்களுக்கே சேரும்.  பிராமி எழுத்துருக்களைக் கண்டறிதல், படித்தறிதல், அதிலுள்ள பொருண்மைகளை ஆய்வு செய்தல் என அனைத்து நிலைகளிலும் இவரது ஆய்வு மிகச் சிறந்தவொன்று.

ஓலை வடிவில் இருந்தவற்றை அச்சுவடிவிற்குக் கொண்டு வந்த சி.வை.தாமோதரம்பிள்ளை (1832 - 1901), உ.வே.சாமிநாதையர் (1855 - 1942) ஆகியோரின் பணி தமிழ் மறுமலர்ச்சிக்கு மூலமாக அமைந்தது.  அதில் ஐராவதம் மகாதேவனின் பணி, அறியப்படாத தமிழ்ச்சமூக வரலாற்றை அறியச் செய்ததாகும். தமிழ்ச்சமூகம் இவரை என்றும் கொண்டாடும்.

]]>
https://www.dinamani.com/weekly-supplements/dinamani-kathir/2018/dec/02/ஐராவதம்-மகாதேவன்-தமிழ்ச்-சமூகத்திற்கு-வழங்கிய-கொடைகள்-3051575.html
3051587 வார இதழ்கள் தினமணி கதிர் ராமகிருஷ்ண மடத்துக்கு நன்கொடை! சந்திப்பு: மனோபாரதி  DIN Sunday, December 2, 2018 12:00 AM +0530 அண்மையில் காலமான தினமணி முன்னாள் ஆசிரியரும், கல்வெட்டு ஆராய்ச்சியாளருமான ஐராவதம் மகாதேவன்,தனது மறைந்த மகன் வித்யாசாகர் பெயரில் நடத்தி வந்த கல்வி அறக்கட்டளை பணம் ரூ 40 லட்சம் தொகையை ராமகிருஷ்ணமடத்துக்கு வழங்குமாறு  உயில் எழுதி இருந்தார்.

மறைந்த ஐராவதம் மகாதேவனுக்கு பல ஆண்டுகளாக பணிவிடை  புரிந்து உதவியாளராக இருந்த  ஆர். லட்சுமி கூறியது:

""எந்த ஒரு பணியையும் திட்டமிட்டபடி குறித்த சமயத்தில் முடித்து விட வேண்டும் என்பதில் ஆர்வமாக இருப்பார். தான் உண்மை, நேர்மையைக் கடைப்பிடிப்பது போல் பிறரும் உண்மையாகவும்,நேர்மையாகவும் இருக்க வேண்டும் என்று எதிர்பார்ப்பார்.

இந்திய ஆட்சிப்பணியில் சேர்வதற்கு முன்பு அன்றைய பிரதமர்   நேரு அவரிடம் அயல்நாட்டுத் தூதரகப் பணியில் சேருமாறு கூறியபோது,   நாட்டு மக்களுக்குப் பணிபுரிய விரும்பும் நான்  இங்கு  தான் பணிபுரிவேன் என்று மறுத்து  இந்திய ஆட்சிப் பணியில் சேர்ந்தார்.  முதன்முதலாக அவர் உதவி ஆட்சியராகப் பணிபுரிந்த ஊர் பொள்ளாச்சி.

அவர் இந்திய ஆட்சிப்பணியில்  25 வருடங்கள் நிறைவு செய்து,தொழில்துறைச் செயலராக  ஓய்வு பெறுவதற்கு முன் அவர் மேற்பார்வையில்   கரூர் அருகில் புகளூரில் தமிழ்நாடு செய்தித்தாள் நிறுவனம், தமிழ்நாடு உப்பு உற்பத்திக் கழகம், தூத்துக்குடியில் தூத்துக்குடி அல்கலிக் கார்ப்பரேஷன் உள்ளிட்ட சில நிறுவனங்கள் தொடங்கப்பட்டன. தில்லியில் வெற்றிகரமாகச் செயல்பட்டு வந்த  தனியார் சூப்பர் மார்க்கெட் பாணியில், சென்னையில் காமதேனு கூட்டுறவு அங்காடியைத் தொடங்கியதும் அவர் தான்.

நேர்மைக்கு உதாரணபுருஷராகத் திகழ்ந்த அவருக்கும் வருமானவரித்துறையால்  ஒரு சோதனை ஏற்பட்டது. திருவான்மியூரில் இருந்த அவருக்குச் சொந்தமான வீட்டை அவர் சந்தை விலைக்கும்  குறைவாக குறைந்தவிலைக்கு விற்பனை செய்ததாகவும்,அதில்  முறைகேடு நிகழ்ந்து விட்டதாக  வருமானவரித்துறை அவருக்கு நோட்டீஸ் அனுப்பியது.

விசாரணைக்குப் பின்னர் தனது தவறை வருமானவரித்துறை ஒப்புக்கொண்டு அவரிடம்  மன்னிப்புக் கோரியது.

ராமகிருஷ்ண மடம் உள்ளிட்ட சில சமூக சேவை நிறுவனங்களுக்கு பல ஆண்டுகளாக  நன்கொடை வழங்கி வந்தார். மறைந்த தனது  மகன் வித்யாசாகர் பெயரில் கல்வி அறக்கட்டளை தொடங்கி, ஜாதி, மதம், இனம் வேறுபாடு இல்லாமல், அதிக மதிப்பெண் பெற்ற  ஏழை, எளிய மாணவர்களுக்கு கல்வி உதவித் தொகை வழங்கி வந்தார்.

தனது மறைவுக்குப்பின் கல்வி  அறக்கட்டளையில் இருக்கும்  பணத்தை ராமகிருஷ்ண மடத்துக்கு வழங்க வேண்டும் என்று உயில் எழுதி வைத்து இருந்தார். அவர் விருப்பப்படி  அறக்கட்டளை கணக்கில்  இருந்த ரூ.40 லட்சம் பணத்தை ராமகிருஷ்ண மடத்துக்கு வழங்குமாறு அமெரிக்காவில் வசித்து வரும்  அவரது மகன் ஸ்ரீதர்  கூறிவிட்டார்'' என்றார்.

]]>
https://www.dinamani.com/weekly-supplements/dinamani-kathir/2018/dec/02/ராமகிருஷ்ண-மடத்துக்கு-நன்கொடை-3051587.html
3051589 வார இதழ்கள் தினமணி கதிர் ஆயுள் காக்கும் ஆயுர்வேதம்: காலை எழுந்தவுடன்...! பேராசிரியர் எஸ். சுவாமிநாதன் DIN Sunday, December 2, 2018 12:00 AM +0530 பலவிதமான ஆயுர்வேத ஆரோக்கிய குறிப்புகளை  உங்களுடைய கேள்வி - பதில் பகுதி மூலம் நான் தெரிந்து கொண்டாலும், ஆரோக்கியத்திற்கான மிக சிறப்பான சில வழிகளைக் கூற முடியுமா?

 -சங்கர நாராயணன், காஞ்சிபுரம்.

வைகறைத் துயிலெழுதல் என்பது ஆரோக்கியத்திற்கான பரம ரகசியங்களில் ஒன்றாக நம் முன்னோர் குறிப்பிடுகின்றனர்.  சூரிய உதயத்திலிருந்து முன் ஒரு மணி நேரம் அருணோதய வேளை. அதற்கு முன்னுள்ள ஒரு மணி நேரம் "ப்ராம்ஹ முகூர்த்தம்' எனப்படும். ஸத்வகுணம் நிறைந்த இந்த நேரத்தில் மனம் தெளிந்து, விருப்பு வெறுப்புக்களால் கலக்கமுறாமல், இரவின் தன்மையாலும் அமைதியாலும் முந்நாளின் கொந்தளிப்பு அடங்கி களைப்பு அகன்று, புலன்களும் மனமும் சுறுசுறுப்புடன் விழித்தெழும் வேளை.  புத்தி தெளிந்து கூர்மையுடன் தெளிந்த சிந்தனா சக்தியுடன், எதையும் முழுக்கவனத்துடன் ஏற்கும் வேளை - புதிதாகப் புத்தகம் எழுதுபவர்கள், பாடங்களை மனத்தில் அர்த்தத்துடன் நிலைக்கும்படி, மனப்பாடம் செய்கின்ற மாணவர், இறைவனைத் தியானம் செய்பவர், அன்றாட வேலைகளையும், நீண்ட காலத்திய பணிகளையும் பற்றிச் சிந்தித்து திட்டம் வகுப்பவர் இவர்களுக்கு உற்ற நேரம். மற்ற நேரங்களில் நான்கு மணி நேரத்தில் கற்பதை இந்த வேளையில் ஒரு மணி நேரத்தில் கற்கலாம். ஆனால் பல நோய்கள் நள்ளிரவில் கடுமை அடையும், அவற்றின் வேதனையால் தூக்கமிழந்தவர் விடியற் காலையில் அயர்ந்து உறங்குவர், அவர்களை அவ்வேளையில் எழுப்புவது முறையல்ல. இரவு அதிகம் கண்விழித்து, விடியற்காலையில் உறங்கச் செல்பவர்களுக்கும்  இந்த விதி பொருந்தாது.

விழித்தெழுந்ததும் சோம்பலுடன் படுத்திராமல் உடனே வாய் கொப்பளிப்பது நல்லது. தூக்கத்தில் வாயில் சுரந்து, இரைப்பையின் அமிலக் கலப்புபெற்று உலர்ந்தும் இறுகியும் உள்ள உமிழ் நீர்க் கலவையை எவ்வளவு விரைவில் அகற்ற முடியுமோ அவ்வளவு விரைவில் அகற்றுவது நல்லது.

உடலின் அலுவல்களில் சேர்த்தலும் கழித்தலும் அதிகம் இடம் பெறுகின்றன. கழித்தல் சரியே நடைபெறாவிடில் சேர்த்தல் சரியே அமையாது. இயற்கையே சேர்த்தலுக்கும் கழித்தலுக்குமான உந்துதல்களை ஏற்படுத்துகிறது. மலவேகம், சிறுநீர் வேகம், வாயுவேகம் என மூன்று உந்துதல்களையும் முறைப்படி தடையின்றி வெளியேற்ற வேண்டும். இவை தானே தடைப்பட்டாலும் வேறுசெயலில் ஈடுபட நேர்ந்ததால் இயற்கை உந்துதலை   மதிக்காமல் தடைநேர்ந்தாலும் நோய்கள் விளையக் கூடும். மலத்துவாரத்தை நன்கு கழவ வேண்டும். பிறகு அவ்விடத்தைவிட்டகன்று 10 - 15 தடவை வாய் கொப்பளித்தல் நல்லது. அதன் பிறகு பற்களைப் பொடி, பற்பசை முதலியவற்றால் பல்துலக்க வேண்டும்.

விடியற்காலையில் மலம் முதலியவற்றை வெளியேற்றுவது நோயின்றி நீண்ட நாள் வாழ உதவும். குடலில் இரைச்சல், வயிற்றில் உப்புசம் கனம் முதலியவை ஏற்படாமல் இருக்கும். சிறுநீர், மலத்துவாரங்களைச் சுத்தமாக வைத்துக் கொள்வதால் நோய்கள் பல தோன்ற வாய்ப்பில்லாமையால் ஆயுள் நீள்கிறது. உடலின் அழகும் வலிவும் கூடுகிறது. தூய்மை உணர்ச்சி ஓங்குகிறது. மனத்தளர்ச்சி கெட்ட எண்ணங்கள் தோன்றுவதில்லை. அதனால் கெட்ட செயல்களில் ஈடுபாடு ஏற்படுவதில்லை என்கிறது ஆயுர்வேதம்.

வீட்டிற்கு வெளியில் சென்று திரும்பும் ஒவ்வொரு தடவையும் கை, கால்களை அலம்புவது நல்லது. புழுதியை நீக்குவது மட்டுமல்ல இதன் நோக்கம். உடல்களைப்பும் அயர்வும் நீங்கி சுறுசுறுப்பும் புத்துணர்ச்சியும் பெறுவதும், தொற்று நோய்கள் பரவுதலைத் தடுப்பதும் இதன் நோக்கங்களில் முக்கியமானவையாகும். சாக்ஸூம் பூட்ஸூம் அணிந்து வெளியே சென்று வருபவரும் கூட அவற்றை நீக்கிய பின் உடனே கை, கால்களைக் கழுவும் போது அவர்கள் பெறும் புத்துணர்ச்சியைக் கழுவுவதைப் பழக்கமாகக் கொள்பவரே அறிவர்.

சிற்றுண்டி, முழு உணவு, தாம்பூலம் தரித்தல், பழம், பட்சணம், காபி, டீ முதலியவற்றிற்குப் பின் வாய் குழப்பி அலம்புவதும், கொப்பளித்துத் துப்புவதும் உமிழ்நீர் ஆரோக்யத்திற்கு உகந்தது. உணவிற்கு முன்வாய் கொப்பளித்தால் ஜீரண திரவங்களுக்குச் சுறுசுறுப்பு ஏற்படும். குளிர்ந்த நீரால் வாய் கொப்பளித்தல் மூலம்   நாற்றம், தொண்டையின் கபப்பூச்சு அகலும். கண் முதலியவை தெளிவடையும். வெந்நீரால் வாய் கொப்பளித்தால் நாக்கில் ருசியின்மை, எகிறுகள் கொழுத்திருத்தல், பற்களில் வலி நீங்கும். வாய் மொட மொடவென உணவேற்கத் தயாராகும்.

(தொடரும்)

]]>
https://www.dinamani.com/weekly-supplements/dinamani-kathir/2018/dec/02/ஆயுள்-காக்கும்-ஆயுர்வேதம்-காலை-எழுந்தவுடன்-3051589.html
3051592 வார இதழ்கள் தினமணி கதிர் சதைச் சுருணைகள் தி.தா. நாராயணன் DIN Sunday, December 2, 2018 12:00 AM +0530 சென்னை மருத்துவக் கல்லூரியில் மருத்துவம் மூன்றாம் ஆண்டு படிக்கும் என்னுடைய மூத்த மகள் பவித்ரா வெள்ளிக்கிழமை மாலை வீட்டுக்கு வந்திருந்தாள். வரும்போது கையில் ஓர் அட்டைப் பெட்டியை ஜாக்கிரதையாய் கொண்டு வந்து மேஜை மேல் வைத்தாள். 

""இன்னாதும்மா கண்ணே ?''

அவள் முகமெல்லாம் மகிழ்ச்சி வழிய, ""திறந்து பாருங்க'' என்றாள். 

""ஐயோ! இன்னா பீடிகை பலமாக இருக்கு'' 

கட்டை அவிழ்த்து மெதுவாக திறந்தவன் அப்படியே நின்று விட் டேன். உள்ளே இன்னும் கண்களைக் கூட திறக்காத, சிறகுகளே முளைக்காத, சதைச் சுருணைகளாக, தலை மட்டும் சற்று பெரியதாக, இரண்டு கிளிக்குஞ்சுகள். மூக்கின் அமைப்பினாலும், மேலே படர்ந்திருக்கும் ஒன்றிரண்டு பச்சை வர்ண ரோமங்களாலும் தான்  கிளிக்குஞ்சு என்று அடையாளம் காண முடிந்தது. மற்றபடி கைகளில் எடுக்க கூசும்படி மிருதுவான  சதைச் சுருணைகள். அச்சத்தினாலோ, அனிச்சை செயலாகவோ அவைகள் மூலையில் ஒன்றன் மேல் ஒன்றாய் ஒடுங்கிக் கொண்டிருந்தன. 

சின்னவள் விசாலி எட்டி பார்த்துவிட்டு. ""ஹைய்யா...ஹைய்யா'' என்று குதிக்க ஆரம்பித்து விட்டாள். எனக்கு சுரு சுருவென்று ஆத்திரம் எழுந்தது.

""உனக்கு இது எங்கே கிடைச்சிது''                                                                                                                                      
""மூர் மார்கெட் பின்னால விக்கிறாங்கப்பா. ஜதை 250/- ரூபா. என் ஃப்ரண்ட்ஸ் எல்லாம் கூட வாங்கினாங்க''
""உனக்கு கொஞ்சமாவது அறிவிருக்கா? பாவி..பாவி... கண்களைக் கூட திறக்காத இந்த பச்சை மண்ணை அதும் அம்மா கிட்ட இருந்து பிரிச்சிட்டியே. அந்த பாவம் நம்மளை சும்மா விடுமா? இந்த ஸ்டேஜ்ல அதுங்க அம்மாவுடைய கதகதப்பிலேதான் வளரணும். அப்பத்தான் உசுரு தக்கும். பார்த்துக்கிட்டே இரு ரெண்டும்  கண்டிப்பா செத்துரும். நம்மால காப்பாத்த முடியாது பாவி'' அவளுக்கு புர்ரென்று வந்துவிட்டது.

""அப்பா! நான் ஒண்ணும் அத பிரிச்சி கொண்டாரலே... எவனோ கொண்டாந்து விக்கிறான், வாங்கியாந்தேன்.   ஆனா என்னை பழி சொல்லணும் உங்களுக்கு'' 

""த்தூ! பேசாத. நீ வாங்கறதாலதான் அவன் விக்கிறான். இதுங்களை வளர்க்கிறப்ப இருக்கிற சந்தோஷத்தை விட செத்து போறப்ப ஏற்பட்ற வலி இருக்கே அது ரொம்ப கொடுமை. நான் சின்ன வயசில அனுபவிச்சிருக்கேன்'' வேதனையுடன் சொன்னேன். 

அன்றைக்கெல்லாம் கோபமாய் முறுக்கிக் கொண்டு நின்ற பவித்ரா, மறுநாள் விடியற்காலையே கிளிக் குஞ்சுகளை அப்படியே போட்டுவிட்டு நிம்மதியாக கிளம்பி விட்டாள். இது அவளுடைய இயல்பு. அவள் எப்பவுமே இப்படித்தான். கொஞ்சுவதற்கு மட்டும் தான் அவளுக்கு ஒரு பெட் தேவை. பாடு எடுக்கிறது குடும்பத்தில இருக்கிற மற்றவங்க... எனக்கு சுபாவத்திலேயே பூஞ்சை மனசு. காப்பாத்தறது பெருசில்லை, எப்படி அவைகளை அதன் கூட்டத்தில் 
சேர்க்கிறது?  

ராத்திரியெல்லாம் விதவிதமான யோசனைகள், திட்டங்கள். காலையில் நான் எழுந்திருக்க ஏழு மணியாயிடுச்சி. ஹாலில் அம்மாவும், சின்னவள் விசாலியும் கிளிகளை மடியில் வைத்துக் கொண்டு அரைத்த ஆப்பிள் சோற்றை அலகுகளைப் பிளந்து ஊட்டிக் கொண்டிருந்தார்கள். என்னைப் பார்த்தவுடன் மகிழ்ச்சியுடன் 

""அப்பா...அப்பா! எவ்வளவு சீக்கிரம் சாப்பிட கத்துக்கிச்சிங்க பாருங்க'' பார்க்கும் போது அலகில் ஊட்டிய பழ மசியலை "லபக் லபக்' என்று முழுங்கிக் கொண்டிருந்தன. நான் என் பங்குக்கு சிறிதளவு தண்ணீரைக் கொண்டுவந்து பில்லர் மூலம் சொட்டு சொட்டாய்ப் புகட்டினேன். போதாக் குறைக்கு என்னுடைய அம்மாவும் வேறு சில பத்தியங்களை சொல்லிக் கொண்டிருந்தார்கள். இப்படித்தான் எங்கள் வீட்டில் கிளி வளர்ப்பு ஆரம்பமாயிற்று. 

வீட்டில் எல்லாருமே செவிலித் தாயாக மாறியதில் எந்நேரமும் அதுங்க வயிறு "பம்' என்று உப்பிக் கிடக்கும்... இப்போதெல்லாம் விதவிதமான  பழவகைகளை தேடிப் பிடிச்சி வாங்க  ஆரம்பித்தேன். ஒருநாள் பழுத்த கொடுக்காப்புளி பழம், மறுநாள் நாவற்பழம், இன்னொரு நாள் அத்திப்பழம், ஒன்றையும் விட்டுவைக்கவில்லை. மெனு லிஸ்டில் வாதுமை பருப்புகளும், முந்திரி பருப்புகளும், வேர்க்கடலை பயறுகளும், நெல்லும், சோளக்கதிர்களும், அடக்கம். உழவர் சந்தையில ஒருநாள், மார்க்கெட்ல, ஆரணி கூட்ரோடில, வார சந்தையில... வில்லியர்கள் கிட்ட சொல்லி வெச்சி ஒருநாள். இப்படித்தான் சேகரிக்கிறேன்... இதுதான் வேலியில் போற ஓணானை எடுத்து மடியில விட்டுக்கிட்டவன் கதை. இது தொழிலற்றவன் வேலைன்னு தோணுதில்லே... என்ன பண்றது? மனசு கேட்கவில்லையே. கொடுக்கும் ஊட்டத்தில் அவற்றுக்கு வேகமான வளர்ச்சி. இரண்டு மூணு மாதங்களில் உடல் முழுக்க நன்றாக சிறகுகள் முளைத்து விட்டன. ஆட்களை பார்த்துவிட்டால் க்கீ...கீ...கீ... என்று குரல் கொடுக்க கற்றுக் கொண்டன.

வந்து ரெண்டொரு நாளிலேயே பெருசா ஒரு கூண்டு வந்து இறங்கி விட்டது என்று சொல்லத் தேவையில்லை. பூனை உலாத்துகிற வீடு இது. ஸ்கூல் போற நேரம் தவிர மற்ற நேரங்களில் கிளிகளை எடுத்து வெச்சிக்கிட்டு கொஞ்சுகிறதுதான் விசாலியின் வேலை.                    

அன்றைக்கு மதியம் நான் உள்ளே வேலையாய் இருந்தேன். க்கீ...கீ..கீ... ரெண்டும் போடுகிற கூச்சல் தெருவரைக்கும் கேட்கிறது.                                 

""இன்னாடா அங்க சத்தம்''  கையில் டானிக் பாட்டிலையும் பில்லரையும் எடுத்துக்கிட்டு வெளியே வந்தேன்... கிளிகள் கிட்ட பவித்ரா நிற்கிறாள். எப்ப வந்தாள்?  ""இதென்னப்பா ஹால்ல மரம் வளர்க்கறீங்க?''- கைகளை துடைத்துக் கொண்டே வந்த நீலா, "" அதை ஏன் கேக்கற. ரெண்டு நாளுக்கு ஒரு கிளை மாத்தியாவுது. தோட்டத்து வேப்பமரத்தை இன்னும் ஒருவாரத்தில மொட்டையடிச்சிடுவாரு. கிளிங்க மரத்தில வாழற ஃபீலிங்கோட வளரணுமாம்''

""சரி...சரி...நீ எப்படா வந்த? சொல்லாம கொள்ளாம வந்து நிக்கிற'' அவள் சிரித்து விட்டு ""இன்னாப்பா பொழுது சந்தோஷமா போறாப்பல தெரியுது? எங்களுக்கு என்னைக்காவது ஒரு ஹார்லிக்ஸ் வாங்கி குடுத்திருப்பீங்களா? கிளிக்குட்டிகளுக்கு, டானிக்காமே, வித விதமா பழ தினுசாம். கீரைக்கட்டு வேற. டெய்லி எனக்கு மெசேஜ் வந்திடுது'' எனக்கு லஜ்ஜையாக இருந்தது. சிரிச்சிட்டேன்.

""என்ன பண்றது அதுங்களை காப்பாத்தி கிளிங்க கூட்டத்தில சேர்த்து விட்டுடணுமே. இதுங்களின் எலும்பு வளர்ச்சிக்கு கால்ஸிய சத்து அவசியம் வேணுமாம். அதான்''

""ஊர்ல தாய் கிளிகள்லாம் எந்த கடையில டானிக் வாங்குதோ தெரியலையே ஏம்பா''  சொல்லிவிட்டு சிரித்தாள்.                                                       

""சரி சரி இனிமே கிளிக்குட்டீன்னு கூப்பிடாதீங்க. அதுங்க பேரு ஜிப்ஸி, பெப்ஸி, பேரை சொல்லி பழக்கப் படுத்துங்க'' 

அன்றையில இருந்து அதுகளுக்கு வீட்டில் ஆளாளுக்கும் டியூஷன் எடுக்க ஆரம்பிச்சிட்டோம். அடுத்த வார கடைசியில வந்திருந்த பவித்ரா இதையெல்லாம் பார்த்துட்டு டியூஷனில் ஒரு ஒழுங்குமுறையை கொண்டு வந்தாள். 

""அப்பா! நீங்க "அப்பா'ன்ற ஒரு வார்த்தையை மட்டும் கத்துக் கொடுங்க. அம்மா "அம்மா'ன்ற ஒரு வார்த்தையை மட்டும் கத்துக் கொடுக்கட்டும். அதுபோல நானு "அக்கா'ன்றதையும், ஆயா "ஆயா'வையும் சொல்லித் தருகிறோம். ஏய்! விசாலி! நீ சின்னக்கான்னு சொல்லணும் சரியா? அப்பத்தான் அதுகள்  அப்பாவைப் பார்த்தா அப்பான்னுதான் கூப்பிடுமே தவிர அம்மான்னு கூப்பிடாது''

அவள் கொண்டுவந்த சட்ட ஷரத்துகள் ஏகமனதாக நிறைவேறின. 

கிளிகளுக்கு பேச்சுப் பயிற்சி மும்முரமாக நடந்து கொண்டிருக்க, அவற்றை வீட்டுக்குள்ளே ஃப்ரீயாக விட்டுட்டோம். ரெண்டும் குறுக்கும் நெடுக்கும் வேகமாக பறக்க ஆரம்பிச்சிட்டுதுங்க. மேலும் சில வார்த்தைகளை உச்சரிக்க தெரிந்துக் கொண்டன. பகலெல்லாம்  வெளிக் கதவையும், தோட்டக் கதவையும் மூடியே வைக்கிறது நடைமுறைக்கு வந்து விட்டது. பகலில் வீட்டில என்ன புழுக்கமாக இருந்தாலும் யாரும் ஃபேன் போடுவதில்லை. ஜன்னல்களுக்கு நெட்லான் அடிச்சிருக்கு பயமில்லை. யாரு வெளியே போய் உள்ளே வந்தாலும் இரண்டும் கீ..கீ..கீ... என்று கத்திக் கொண்டே எங்கிருந்தாலும் பறந்து வந்து அவங்க தோளில் உட்கார்ந்து கொள்ள தெரிந்து கொண்டன. உட்கார்ந்து காதுகிட்ட நகர்ந்து வந்து கிள்ளைக் குரலில் "அப்பா..அப்பா' அதுபோலவே "அம்மா' ,  விசாலி கிட்ட "சின்க்கா'. அவை  பேசப் பேச தன்னால வளரும் ரோமம் போல கொஞ்சம் கொஞ்சமாக நாங்கள் தன்வசமிழந்து நெருக்கமாகிப் போனோம். எங்கள் குடும்பத்தில ஒருத்தராகவே நினைக்க ஆரம்பிச்சிட்டோம்...  விடிந்தப்புறம் யாரும் படுக்கையில் புரண்டுகிட்டிருக்க முடியாது. பறந்து அங்கேயே வந்துவிடும் காதுகிட்டே வந்து ரெண்டும் ஒரே கூச்சல். எழுந்து வெளியே போகும் வரைக்கும் விடாதுகள். இதை யார் சொல்லிக் கொடுத்தாங்க? என் அம்மாவுக்கு கொள்ளை சந்தோஷம். அவ்வப்போது எங்கிட்டேயும், மருமவ கிட்டேயும் சொல்லிச் சொல்லி மகிழ்வாள். 

அடுத்த மாசத்தில் ஒருநாள் என் அடுத்த கட்ட நடவடிக்கைக்காக  காயை நகர்த்தினேன். 

இன்றைக்குத்தான் ஜிப்ஸி, பெப்ஸிகளை கொண்டு போய் கிளிக்கூட்டத்தில விட்டுட்டு வர முடிவு செய்திருக்கிறேன்'' என்றேன். 

வீடு நிசப்தமாக இருக்கிறது. மூன்று பேரும் மவுனமாக இருந்தார்கள். யாருக்கும் சம்மதமில்லை.

""தோ பாருங்க, எனக்குக் கூட மனசுக்கு கஷ்டமாகத்தான் இருக்கு, நம்ம வீட்டு குழந்தைங்க மாதிரி எட்டு மாசமா அதுங்க நம்ம கூட வாழ்ந்தாச்சில்ல? அதான் நமக்கு கஷ்டமாயிருக்கு...''  ""இருந்தாலும் நான் செய்யறதுதான் சரி. பலதடவை அதுங்களை கூண்டோடு கொண்டுபோய் மொட்டை மாடியில வெச்சிருக்கேன். அப்படி வைக்கிறப்போ கொஞ்ச நேரத்தில எவ்வளவு கிளிங்க அங்க வந்து சேர்ந்துடும் தெரியுமா? கீ..கீ..கீ..ன்னு ஒரே கூச்சல். கூண்டை சுத்தி வந்து உட்கார்ந்துக்கிட்டு. கோரஸாக கத்தும். அப்பல்லாம் இதுங்க ரெண்டும் எவ்வளவு சோகமாயிடும் தெரியுமா? பாவம் இதுங்க. வாணாம் விட்ருவோம். ரெண்டும் பெருசாயிடுச்சி. வெளியே போனால் சமாளிச்சிக்கும்'' விசாலி அப்பவே அழ ஆரம்பிச்சிட்டாள்.       

மறுநாள் காலையிலேயே விசாலியின் அழுகையினூடே அவற்றைக் கூண்டில் வைத்து டூ வீலரில் மாட்டிக் கொண்டு கிளம்பி விட்டேன். என்னுடைய ஆபீஸூக்கு ஈசானிய மூலை பக்கம் சற்று தூரத்தில் ஒரு பெரிய ஆலமரம் இருக்கிறது. பிரமாண்டம். மரத்துக்குக் கீழே ஒரு குடும்பம் வசித்துக் கொண்டு, மூங்கில் கூடை முடையும் தொழிலை செய்து  கொண்டிருந்தன. அந்த மரத்தில் நிறைய கிளிகள் இருப்பதை பார்த்திருக்கிறேன். அந்த பக்கம் போறப்போ கீ...கீ...கீ... என்று ஒரே சத்தம். என்ன இனிமையான சத்தம்? அந்த மரத்தில விட்டுடணுங்கிறது திட்டம்.

அங்கே வண்டியை நிறுத்தும் போதே கூடை முடையும் கிழவி எழுந்து வந்தாள். 
""வா சாரு...  இன்னா வோணும் மொறமா, மூங்க கூடையா?''

""அம்மா எனக்கு ஒரு தகவல் சொல்லு, இந்த மரத்தில நிறைய கிளிங்க இருக்குதில்ல''

""ஆமா சாரு. சாயரட்சைக்கு வந்து பாரு இன்னா கூச்ச போடுதுங்கன்னு. ஆமா இன்னா விசயம்''

""எம் பொண்ணு ரெண்டு கிளிக்குஞ்சுங்களை மெட்ராஸில இருந்து வாங்கியாந்துட்டா. எனக்கு தாங்கல அதன் கூட்டத்தோட இருக்கிறதுதான் சரி. அதனால இங்க கிளையில விட்டுட்டா, அதுங்க கூட்டத்தோட சேர்ந்துப்புடும்னு கொண்டாந்தேன்'' 

அவள் அவசர அவசரமாக கையால் மறுத்தாள்:

""வாணாம்...வாணாம்பா! அதுங்க இத்த கூட்டத்தில் சேர்க்காதுப்பா. அப்படித்தான் உன்ன மாரியே ஒரு ஆளு ஒரு கிளியைக் கொண்டாந்து வுட்டாரு. அவ்வளவுதான் உடனே எல்லாம்  சர்ர்ருன்னு இறங்கி வந்து அத கொத்தி கொத்தி ரெண்டு நிமிசத்தில கொன்னு போட்டுட்டு பூட்ச்சிங்க சாரு. இப்ப நீ வுட்ட, உன் கண்ணெதிரிலேயே இதுங்களை கொன்னு போட்ரும். மேல பாரு எம்மாங் கிளிங்க... அதுங்களோட குஞ்சிங்க கூட்டுல இருந்து தவறி கீழே விழுந்துபுட்டா கூட சேர்க்கிறதில்லபா. அத்தையும் அப்பவே கொன்னு போட்டுட்துங்க. எம்மாம் பாக்கிறேன்''

எனக்கு வருத்தமாக இருந்தது. இப்படி ஒரு விஷயம் இருக்கிறதை நான் எதிர்பார்க்கவில்லை. இதுக்கு மேல என்ன பண்ணுவதென்று புரியவில்லை. விட்டால் கொலை பாதகமாயிடும் போலிருக்கே. கவலையாக இருந்தது. இதுகளை தாய்க்கிளி கிட்டயிருந்து பிரிச்ச தோஷத்துக்கு என்ன பரிகாரம் செஞ்சி திருத்துப்பாடு பண்ணப் போகிறோமோ? பகவானே!  சரி... நடக்கிறது நடக்கட்டும் என்று அவற்றுடன் வீட்டுக்குக் கிளம்பினேன்.

கூண்டை சிட்வுட்டில் வைத்து விட்டு உள்ளே போனேன். பின் வாசலில் மாமியாரும் மருமவளும் மவுனமாக உட்கார்ந்திருந்தனர், விசாலி அழுது ஓய்ந்து இப்போது அம்மாவின் மடியில் கண்முடி படுத்திருக்கிறாள்.

""வூடே வெறிச்னு போச்சுடா. கீ..கீ..கீன்னு எந்நேரமும் என்னா சத்தமா இருக்கும்.  அப்படி உட்காரக் முடியாது. ரெண்டும் ஓடியாந்து என் தோள்ல தொத்திக்கும். ஆயா... ஆயான்னு என்னமா கூப்புடும்? தடால்னு இப்படி பிரிச்சிட்டியடா'' கொஞ்ச நேரம் யாரும் எதுவும் பேசவில்லை. துக்க வீடுமாதிரி நிசப்தம்.

க்கீ...கீ...கீ...  திடுக்கிட்டு என்னைப் பார்த்தார்கள். அவநம்பிக்கையாய் சந்தோஷக் கீற்று. விசாலி ஓடிப்போயி ஹாலில் தேடுகிறாள்

""அதுங்களை திருப்பி கொண்டு வந்துட்டேன். சிட்டவுட்ல கூண்டு இருக்கு''

எல்லாரும் "ஜிப்ஸீ...பெப்ஸீ..' என்று கத்திக் கொண்டு எழுந்தோடினார்கள். 

க்கீ..கீ..கீ.., அம்மா... ! வா, ஆயா! சின்க்கா!  - இரண்டும் ஒரே கத்தல். அன்றைக்கு அப்படி சிரித்தார்கள். 

""ஏங்க! இனிமே அதுகளை விடுகிற பேச்சே வாணாம். நம்ம கூடவே இருந்துட்டு போய் சேரட்டும்'' 

""எவ்வளவு நாளைக்கு... கிளியின் சராசரி வயசு என்ன தெரியுமா... அம்பது வருஷம்... அவ்வளவு வருஷங்களும்  கூண்டு சிறையிலேயே கிடந்து தனக்குன்னு ஒரு வாழ்க்கையே இல்லாம, ஜோடி இல்லாம, சாவணுமா? இந்த பாவம் நம்மள சும்மா விடாதடீ''

""ஏன் இப்ப ஜோடியாத்தான இருக்கு?''

ரெண்டுமே ஆண்கிளிங்க''.  

""சும்மா நேரத்துக்கு ஏத்தாப்பல கதை விடாதீங்க. ஆண் பொண்ணு என்றதை அவ்வளவு சுலுவா கண்டுபிடிக்க முடியாதாம். மூணாவது வயசுல முட்டை போட்றதை வெச்சித்தான் கண்டு பிடிப்பாங்களாம், படிச்சிருக்கேன். நீங்க எப்படி கண்டுபிடிச்சிட்டீங்களாம்.'' 

""ரெண்டு நாளைக்கு முன்னால ஒரு ஜோலியா காஞ்சீபுரம்  போய் வந்தேனே, இன்னா ஜோலி? கிளிகளை புடிச்சி வந்து கிளிஜோஸ்யத்துக்கு பழக்கற கும்பல் ஒண்ணு காஞ்சீபுரம் ஒலிமுகமது பேட்டையில இருக்குது தெரியுமா?அங்கபோயி தெரிஞ்சிக்கிட்டு வந்தேன்டீ. தெரிஞ்சிக்கோ... ஆண்கிளின்னா வாலை இடவலமாத்தான் ஆட்டுமாம். பெண்கிளி மேலுங் கீழுமா மட்டுந்தான் ஆட்டுமாம். இங்க ஜிப்ஸியும், பெப்ஸியும் இடவலமாத்தான் ஆட்டுதுங்க. செக் பண்ணிட்டுத்தான் சொல்றேன்''

என்ன சொல்லியும் மாமியாரும் மருமவளும், சின்னவளும், ஒண்ணுசேர்ந்துவிட, என் கட்சி பலவீனப் பட்டு போச்சுது.

ஆனாலும் நான் விடுவதாக இல்லை. நல்லவனுக்கு அர்த்தம் சொல்லாம செய்யறதுதான்... சந்தர்ப்பத்தை எதிர்பார்த்து காத்துக் கொண்டிருந்தேன். அந்த ஒரு நாளும் வந்தது. அன்று ஞாயிற்றுக்கிழமை. காலை எட்டு மணியிருக்கும். காலை ஆறுமணிக்கெல்லாம் ஜிப்ஸியையும், பெப்ஸியையும் கூண்டிலிருந்து திறந்து விட்டாச்சி. ரெண்டும் துணி போடும் கொடிமேலே உட்கார்ந்திருந்தன.பவித்ராவும் வந்திருந்தாள். நீலாம்பாள் சமையற்கட்டில் பிஸியாக இருக்க, அம்மா தெருக்கோடி பிள்ளையார் கோவிலுக்குப் போயிருந்தாள், பவித்ரா ராத்திரி ரொம்ப நேரம் எதையோ படித்து குறிப்பு எடுத்துக் கொண்டிருந்ததால் இன்னும் எழுந்திருக்க வில்லை. அக்காவும் தங்கச்சியும் போட்டி போட்டுக்கிட்டு தூங்கறாளுங்க. நான் பின் கதவை மெதுவாக திறந்து வைத்துவிட்டு காத்திருந்தேன். அதுவாக போயிடுச்சின்னா மனசு குத்தாது. சர்ரென்று இரண்டும் மேலெழும்பி இரண்டு முறை ஹாலில் குறுக்கும் நெடுக்கும் பறந்து விட்டு சரேலென வெளியே பாய்ந்து விட்டன.

""ஐய்யய்யோ! ஜிப்ஸி!..., பெப்ஸி...''

நான் போட்ட கூச்சல் அதன் காதுகளில் விழுந்ததோ இல்லையோ வீட்டிலுள்ளவர்கள் காதில் விழுந்து விட்டது. நீலாவும், பவித்ராவும், விசாலியும், ஓடிவர, அப்போதுதான் உள்ளே நுழைந்து கொண்டிருந்த என்னுடைய அம்மாவுக்கும் ஏதோ விபரீதம் என்று புரிஞ்சி போச்சி. ஓடிவந்தார்கள்.

""என்ன... என்ன..? கிளிங்க எங்கடா?''  

""பறந்துபோயிடுச்சிங்க'' 

""இன்னாடா சொல்ற'' 

""வாசலுக்கு போவலாம்னு பின் கதவை திறந்தேம்மா... அவ்வளவுதான். நினைக்கவே இல்லை சர்ர்னு போயிடுச்சிங்க''

""ஐயோ ...ஐயோ ...  அதுங்களுக்கு எம்மாம் பாடு எடுத்திருப்பேன்? போறன் வரேன்னு ஒரு வார்த்தை சொல்லலியே'' பாச மேலீட்டில் பேசும் வார்த்தைகளில் அர்த்தம் இருப்பதில்லை, உணர்ச்சி மட்டுமே வெளிப்படும் என்பது நிஜந்தான்.
""அட அதுங்க என்கிட்டியே சொல்லலம்மா'' நானும் எதிர் தாளம் போட்டு முடித்துவிட்டேன்.  

இப்போது இரண்டும் பின் வீட்டு தென்னை மரத்தில் உட்கார்ந்திருந்தன. அத்தனை சீக்கிரத்தில் கிளிகள் கூட்டம் வந்து சூழ்ந்து  கொண்டிருந்தன. எப்படியும் ஒரு இருபது இருக்கும். மெதுவாக ஜிப்ஸி, பெப்ஸியை அவை நெருங்கிக் கொண்டிருந்தன. 

போச்சி... போச்சி... இன்னையோட அதுங்க ஆயுசு முடிஞ்சிடும். பெருசாயிடுச்சிங்க எந்த சூழலையும் சமாளிக்கும்னு நாம போட்ட கணக்கு தப்போ?ஐய்யயோ! தப்பு பண்ணிட்டேனே. பதற்றமாய் இருந்தது.

பெப்ஸீ!...ஜிப்ஸீ... அவை  கொல்லப்பட்டுவிடும் என்பதில் என்னுடைய அம்மாவும் , நீலாம்பாளும் கலவரமாய் அவற்றைப் பார்த்து கத்துகிறார்கள். பவித்ரா கைகளைப் பிசைந்துக் கொண்டிருந்தாள். எல்லோருமே பதட்டமாய் இருந்தோம். விசாலி கீழே உட்கார்ந்து தேம்பித் தேம்பி அழுது கொண்டிருந்தாள். வளர்த்த பாசம் கொடியதுன்னு சும்மாவா சொன்னாங்க? நாங்கள் பார்த்துக் கொண்டிருக்கும்போதே அந்த கிளிக் கூட்டம் தாக்கும் நெருக்கத்துக்கு போய்விட்டன. 

""போச்சு... போச்சு ஐயோ! குட்டீ! ஜிப்ஸீ... பெப்ஸீ... ஜிப்ஸீ... பெப்ஸீ... ஓடி வந்துட்றீ''  நீலாவுக்கும், என் அம்மாவுக்கும் குரல் உதறியது. கண்ணெதிரில் அவை  மடிவதை பார்க்க மனமில்லாமல் அம்மாவும், நீலாவும் கண்களை மூடிக் கொள்ள, க்..க்..கே... "கர்.ர்.ர்ர்.. !, க்..க்..கே..கே... கர்.ர்.ர்.ர்' கர்ணகடூரமான தொனியில் பெருங் கூச்சலுடன் ஜிப்ஸியும், பெப்ஸியும், கிளிக் கூட்டத்தின் மீது பாய,  அந்த கூச்சலுக்கே எல்லா கிளிகளும் மிரண்டு ஒடின. நாங்க கொடுத்த ஊட்டத்தினால் ஜிப்ஸியும், பெப்ஸியும், ஹைட் அண்டு வெயிட்டாக இருக்க, அந்த பர்சனாலிட்டிக்கு அவை  மிரண்டு போயிருக்கணும். இப்போது இரண்டும் கீ..கீ..கீ.. என்று கத்திக் கொண்டே பறந்து வந்து எங்கள் வீட்டு வாசலில் குளியலறையின் மேற்கூரை மேல் உட்கார்ந்தன. கூடவே கிளிக்கூட்டமும் வந்து சூழ்ந்து உட்கார்ந்தன. ஒவ்வொரு கிளியும் கழுத்து ரோமங்கள் சிலிர்க்க சீற்றத்துடன் இருப்பதில் அடுத்து என்ன நடக்கப் போகிறது என்பது புரிந்து விட்டது. ஆனால் கிளிகள் ஒன்றுகூட கிட்டே நெருங்கவில்லை என்பதையும் கவனித்தேன். பதட்டம் சற்று குறைந்தது. விசாலி உரக்க, ""ஜிப்ஸீ... பெப்ஸீ...'' என்று கத்தினாள். அவை   தலையைச் சாய்த்து அவளை ஒரு முறை பார்த்தது. அவ்வளவுதான் "சின்க்கா... கீ..கீ..கீ..'  குரல் கொடுத்து விட்டு எழும்பியது. நாங்கள் "ஜிப்ஸி..பெப்ஸீ..' என்று கத்திக் கொண்டே இருக்க, அவை  எழும்பி சடக்கென்று தென் திசை பக்கம் பறந்து போயின. கூடவே மொத்த கிளிக் கூட்டமும் ஆக்ரோஷத்துடன் துரத்திக் கொண்டு சென்றன. எல்லாரும் செயலற்று நிற்க, "சின்க்கா' என்ற சின்னக்கா ஓவென்று அழ ஆரம்பித்தாள். அவ்வளவுதான் அதற்கப்புறம் திரும்பவும் நாங்கள் அவற்றைப் பார்க்கவே இல்லை வீடு மவுனமாக துக்கம் அனுஷ்டித்துக் கொண்டிருந்தது.

""இந்நேரம் மத்த கிளிங்கள்லாம் சேர்ந்து பெப்ஸி ஜிப்ஸிய கொன்னு போட்டிருக்குமாடா''மதியம் அம்மா பரிதாபமாக கேட்டாள். பவித்ரா கொஞ்சம் பரவாயில்லை. நீலா அவ்வளவு சுலபத்தில் துக்கத்தை வெளிக்காட்ட மாட்டாள். விசாலி இன்னும் அழுது கொண்டுதான் இருக்கிறாள். எல்லாரும் என் பதிலுக்காக காத்திருக்கிறார்கள்.

""என்னது கொன்னு போட்றதா... எல்லாரும் பார்த்தீங்கள்ல?, நம்ம பசங்க  போட்டஒரு சீறலுக்கே எல்லாம் தலை தெறிக்க ஓடிப் போச்சிங்களே.  அப்பா இன்னா மாதிரி ஒரு கர்ஜனை? நான் எதிர்பார்க்கவே இல்லை. இந்நேரம் அந்த கூட்டத்துக்கே நம்மாளுங்கதாம்மா தலைமை. தெரிஞ்சிக்கோங்க.. சும்மாவா?

பாதாம் பருப்பும், முந்திரி பருப்பும் கொஞ்சமாகவா இறங்கியிருக்குது''- நான் பகபகவென்று சிரிக்க, என் வார்த்தையில் எல்லாருக்கும் மனசு பளிச்சென்று தெளிஞ்சி போச்சி. மனம் விட்டு சிரித்தார்கள். நானும் சிரித்துவிட்டு, என் அறைக்குள் சென்றேன். பின்னாலேயே நீலாம்பாள் வந்தாள்.

""சொன்னது நிஜமாங்க? எப்படி சொல்றீங்க''

""ஒரு சாத்தியந்தான். எல்லா உயிர்களிடமும் இருக்கிற பொது பண்பு என்ன தெரியுமா? எதிரியை அடக்க ட்ரை பண்ணும், முடியலேன்னா அடங்கிப் போயிடும்.  ஆக உண்மை எப்படி வேண்டுமானாலும் இருந்துட்டுப் போகட்டும். நாம இப்படித்தான் பாஸிட்டிவ்வாக நினைச்சிக்கணும் தெரியுதா? இதுக்கெல்லாம் சும்மா அழுது ஆர்ப்பாட்டம் பண்ணிக்கிட்டிருக்கக் கூடாது. அதுங்களை வீடு வரைக்கும் கொண்டு வந்தது தப்பு, கொண்டு வந்துட்டோம். இப்ப அதுங்களை தன் இனங்களோடு சேர்த்து வெச்சி பரிகாரம் பண்ணிட்டோம்.. சரியா''  சொல்லிவிட்டு நான் அலட்சியமாக திரும்ப, நீலா சூட்சுமக்காரி... ஒரு கணப் பொழுதில்  என்னுடைய கண் ஈரத்தை கண்டுபிடித்து விட்டாள்.

]]>
https://www.dinamani.com/weekly-supplements/dinamani-kathir/2018/dec/02/சதைச்-சுருணைகள்-3051592.html
3051593 வார இதழ்கள் தினமணி கதிர் ஒரு சந்தேகம்! ச.சண்முகசுந்தரம், சேலம். DIN Sunday, December 2, 2018 12:00 AM +0530 என்னுடைய  விழா ஒன்றில்  ஒரு பெருந்தலைவரின் காலைத் தொட்டு வணங்கினேன்.  அதைப்பார்த்தச்  சிலர்  என்னைக் கோபித்தார்கள். 
நான் சொன்னேன்...

""அந்தக் கால்கள் தேசத்துக்காகச் சத்தியாக்கிரகம்  செய்யப் போன கால்கள். சிறைச்சாலையில்  பல்லாண்டு  உலாவிய  கால்கள்.  என்னுடைய  கால்களுக்கு அந்தப் பாக்கியம்  இல்லாததால், கைகளாவது  அந்தப் பாக்கியத்தைப் பெறட்டுமே''

சில  சமயங்களில், சில சபைகளில் என்னை உட்கார  வைத்துக் கொண்டே என்னைப் புகழ்வார்கள். எனக்குச் சர்வாங்கமும் ஒடுங்கிவிடும்.

நாம் என்ன எழுதிவிட்டோம் ?  என்ன  செய்து விட்டோம்  என்ற எண்ணமே தோன்றும். 

இப்படிப்  புகழ்கிறார்களே  என்ற பயம் தோன்றும்.

ஆண்டவன்  என் தலையில் ஆணவத்தை உட்கார வைத்து என்னை அவமானப்படுத்தவில்லை.

அடக்கத்தில்  இருக்கும் சுகம்,  ஆணவத்தில் இல்லை.

இப்படி  பெருமைப்பட்டவர்:  கவிஞர் கண்ணதாசன்.

]]>
https://www.dinamani.com/weekly-supplements/dinamani-kathir/2018/dec/02/ஒரு-சந்தேகம்-3051593.html
3051594 வார இதழ்கள் தினமணி கதிர் திரைக் கதிர் ஜி.அசோக் DIN Sunday, December 2, 2018 12:00 AM +0530 "சர்கார்' படத்துக்குப் பின் விஜய் நடிக்கவுள்ள படத்தை அட்லி இயக்குகிறார். ஏ.ஜி.எஸ். எண்டர்டெயின்மெண்ட் நிறுவனம் தயாரிக்கவுள்ள இப்படம் விஜய்யின் 63-ஆவது படமாக உருவாகவுள்ளது. தற்போது இப்படத்தின் முதற்கட்டப் பணிகள் தீவிரமாகியுள்ளன. அடுத்த ஆண்டு தீபாவளி பண்டிகைக்கு படத்தை வெளிக்கொண்டு வருவதற்கு திட்டமிடப்பட்டுள்ளது. இந்நிலையில் முதலாவதாக படத்தில் நடிக்கும் நடிகர்கள் தேர்வு தொடங்கியுள்ளது. விவேக், யோகிபாபு  நடிப்பது உறுதி செய்யப்பட்டுள்ள நிலையில், தற்போது விஜய் ஜோடியாக நயன்தாரா நடிப்பது உறுதி செய்யப்பட்டுள்ளது. இது குறித்த அதிகாரப்பூர்வ அறிவிப்பும் வெளியாகியுள்ளது. ஏற்கெனவே  "வில்லு' படத்தில் விஜய் - நயன்தாரா ஜோடி சேர்ந்திருந்தனர். "சிவகாசி' படத்தில் விஜய்யுடன் ஒரு பாடலுக்கு மட்டும் நடனமாடியிருந்தார் நயன்தாரா. இந்த இரண்டு படங்களைத் தொடர்ந்து மீண்டும் விஜய் - நயன்தாரா இணையும் 3-வது படம் இது.  இதில் விளையாட்டுப் பயிற்சியாளராக விஜய் நடிக்கவுள்ளார். இதுவரை அவர் நடித்திராத கதாபாத்திரம் என்பதால், இதற்காக சில பயிற்சிகளையும் மேற்கொள்ளவுள்ளார் விஜய். விளையாட்டை மையப்படுத்தியது என்றாலும், விஜய் ரசிகர்களுக்கு ஏற்றவகையில் ஜனரஞ்சகமாக திரைக்கதையை வடிவமைத்திருக்கிறார் அட்லீ. இசையமைப்பாளராக ஏ.ஆர்.ரஹ்மான் ஏற்கெனவே ஒப்பந்தம் செய்யப்பட்டுள்ளார்.

சிவா இயக்கத்தில் அஜித் நடித்து வரும் "விஸ்வாசம்' படம் இறுதிக் கட்டத்தை எட்டியுள்ளது.  சத்யஜோதி பிலிம்ஸ் நிறுவனம் தயாரித்திருக்கும் இந்தப் படம் பொங்கல் வெளியீடாக திரைக்கு வரவுள்ளது. இதைத் தொடர்ந்து  எச்.வினோத் இயக்கத்தில் உருவாகும் படத்தில் நடிக்க கால்ஷீட் கொடுத்திருக்கிறார் அஜித்.  போனி கபூர் தயாரிக்கவுள்ளார். தற்போது இதன் முதற்கட்டப் பணிகள் தீவிரமாக நடைபெற்று வருகின்றன. ஹிந்தியில் பெரும் வரவேற்பைப் பெற்ற "பிங்க்' படத்தின் ரீமேக் தான் இது என்று தகவல்கள் வெளியாகி வந்தன. ஆனால், படக்குழுவினர் எதையுமே உறுதிப்படுத்தவில்லை. இந்த நிலையில், "பிங்க்' படத்தின் எழுத்தாளர் மற்றும் தயாரிப்பாளர்களில் ஒருவரான சூஜித் சர்கார் அளித்துள்ள பேட்டியில்.... ""பிங்க் தமிழில் உருவாகப் போகிறது. நான் அதை இயக்கமாட்டேன் என்று நினைக்கிறேன். படம் தயாரானதும் என்னிடம் காட்டுவதாகச் சொல்லியிருக்கிறார்கள். தமிழில் பிங்க் படக்குழுவினர் அதில் செய்துள்ள மாற்றங்களையும் மதிக்கிறேன்' என்று தெரிவித்திருக்கிறார். இதன் மூலம் "பிங்க்' ரீமேக்கில் அஜித் - வினோத் - போனி கபூர் இணையவுள்ளார்கள் என்பது உறுதியாகியுள்ளது. 
 
மறைந்த ஆந்திர மாநில முதல்வர் என்.டி.ராமராவ் வாழ்க்கை, "என்.டி.ஆர்: கதாநாயகுடு' சினிமாவாக உருவாக்கப்பட்டு வருகிறது. இரண்டு பாகங்களாக உருவாகி வரும் இப்படத்தை  கிரிஷ் எழுதி இயக்குகிறார். தமிழில் சிம்பு, பரத் நடிப்பில் வெளியான "வானம்' படத்தை இயக்கியவர் இவர். இப்படத்தில்  என்.டி.ஆராக அவரது மகன் பாலகிருஷ்ணா நடிக்கிறார்.  சாவித்திரியாக நித்யா மேனன் நடிக்கிறார்.  சரோஜாதேவியாக அனுஷ்கா, ஸ்ரீதேவியாக ரகுல் பிரீத் சிங், என்.டி.ஆர் மனைவி பசவதாரமாக வித்யாபாலன், சந்திரபாபு நாயுடுவாக ராணா, நடிகர் கிருஷ்ணாவாக அவரது மகன் மகேஷ் பாபு, டோலிவுட் நடிகை விஜயாவாக ஸ்ரேயா நடிக்கின்றனர். இந்த நிலையில் படத்தில் முக்கிய கதாபாத்திரமான  சந்திரபாபு நாயுடு மனைவி வேடத்தில் யாரை நடிக்க வைக்கலாம் என்று பேச்சு இருந்து வந்தது. தற்போது அந்த இடத்துக்கு மஞ்சிமா மோகன் ஒப்பந்தமாகியுள்ளார். இவர் தொடர்பான காட்சிகள் விரைவில் எடுக்கப்படவுள்ளன. 

தென்னிந்திய சினிமாக்களில் இலியானாவுக்கு முக்கிய இடம் உண்டு. தமிழ், தெலுங்கு, கன்னடத்தில் முன்னணி நடிகர்களுடன் நடித்து வந்தவர்,  திடீரென்று பாலிவுட் மோகத்தில் ஹிந்தியில் நடிக்கச் சென்றார். ரன்பீர் கபூருடன் அவர் நடித்த முதல்படம் "பர்பி' சூப்பர் ஹிட் ஆனது. அதேவேகத்தில் அடுத்தடுத்து சில படங்களில் நடித்தார். ஆனால் பாலிவுட் ஹீரோயின்களின் வேகத்துக்கு தாக்குப் பிடிக்க முடியாமல் திணறினார். பட வாய்ப்புகளும் மெல்ல குறைந்தன. மும்பையிலேயே வீடு எடுத்து தங்கிப்பார்த்தார். அப்போதும் பட வாய்ப்பு குவியவில்லை. இதில் சோர்வடைந்த இலியானா மீண்டும் தென்னிந்திய படங்கள் பக்கம் கவனத்தைத் திருப்பினார். 6 வருடங்களுக்கு பிறகு தெலுங்கில் "அமர் அக்பர் ஆண்டனி' படத்தில் ரவி தேஜா ஜோடியாக நடித்தார். தென்னிந்திய ரசிகர்களுக்கு குண்டான உடல்தோற்றம்தான் பிடிக்கும் என்பதால் ஸ்லிம்மாக மாற்றியிருந்த தனது தோற்றத்தை மெனக்கெட்டு பப்ளிமாஸ் தோற்றத்துக்கு மாற்றினார். திரைக்கு வந்த "அமர் அக்பர் ஆண்டனி' எதிர்பாராத தோல்வியைச் சந்தித்தது. இப்படம் வெற்றி அடைந்தால் தொடர்ந்து தென்னிந்திய படங்களில் நடிப்பேன் என்று முன்னதாக பேட்டி அளித்திருந்த இலியானா தற்போது என்ன செய்வது என்று தெரியாமல் திகைத்திருக்கிறார். ஹிந்தியில் ஒரு படம் மட்டுமே கைவசம் உள்ள நிலையில், திருமணம் குறித்து ஆலோசித்து வருவதாகத் தெரிகிறது. 

"நாடோடிகள்' படத்தின் மூலம் பரவலான தமிழ் ரசிகர்களின் பாராட்டுதல்களைப் பெற்றவர் அபிநயா. மாற்றுத்திறனாளியான இவர், அந்த சுவடுகளே தெரியாமல் கதாபாத்திரத்துக்கு உயிரூட்டி நடிப்பதில் தேர்ந்தவர். தற்போது ஹைதராபாத்தில் வசித்து வருகிறார். "ஈசன்', "வீரம்', "குற்றம் 23', "விழித்திரு' உள்ளிட்ட பல படங்களில் நடித்துள்ளார். தமிழ், தெலுங்கு, மலையாளம், கன்னடம் ஹிந்தி உள்ளிட்ட மொழிகளில் நடித்து வரும் இவருக்கு, தெலங்கான மாநில தேர்தல் ஆணையம் புது கௌரவம் ஏற்படுத்தி தந்துள்ளது. தெலங்கானா மாநில சட்டசபை தேர்தல் விரைவில் நடக்க உள்ளது. தேர்தலில் மாற்றுத்திறனாளிகள் தவறாமல் வாக்களிக்க வேண்டும் என்ற விழிப்புணர்வை ஏற்படுத்த தெலங்கானா மாநில தேர்தல் ஆணையமும், தெலங்கானா மாநில மாற்றுத்திறனாளிகள் நலத்துறையும் இணைந்து, அபிநயாவை தேர்தல் விழிப்புணர்வுத் தூதராக நியமித்துள்ளது. தேர்தல் நடைபெறும் தொகுதிகளுக்கு சென்று, அங்கு வசிக்கும் மாற்றுத்திறனாளிகளைச் சந்தித்து, தேர்தலில் தவறாமல் வாக்களிக்க வேண்டும் என்ற விழிப்புணர்வை அபிநயா ஏற்படுத்துவார். இந்திய அளவில் நடக்கும் தேர்தல்அனைத்திலும் அபிநயாவையே தூதராகப் பயன்படுத்தவும் இந்திய தேர்தல் ஆணையம் முடிவு செய்து இருக்கிறது.

]]>
https://www.dinamani.com/weekly-supplements/dinamani-kathir/2018/dec/02/திரைக்-கதிர்-3051594.html
3051598 வார இதழ்கள் தினமணி கதிர் பேல்பூரி DIN DIN Sunday, December 2, 2018 12:00 AM +0530  

கண்டது

(இராஜபாளையம் அருகே உள்ள சத்திரப்பட்டியில் ஓர் ஆட்டோவில்)

ஆசை ஆபிஸராகணும்ன்னு...
அமைப்பு,  ஆட்டோ ஓட்டணும்னு.

பி.ஜி.குருசாமிப் பாண்டியன், சத்திரப்பட்டி.

 

(காரைக்கால் அருகில் உள்ள ஒரு கிராமத்தின் பெயர்)

காக்கா முழி
அண்ணா அன்பழகன், அந்தணப்பேட்டை.


(நாகர்கோவில்  பீச்ரோடு அருகே பிரபல ஜவுளிக்கடையின் பெயர்)

சென்ட்ரல் ஜெயில்

ஆர்.கே.லிங்கேசன், மேலகிருஷ்ணன்புதூர்.


கேட்டது

(நாகர்கோவில் பேருந்து நிறுத்தத்தில் இரு கல்லூரி மாணவர்கள்)

""எத்தனை ஜோக் சொன்னாலும் சிரிக்கவே மாட்டியாடா?''
""மச்சி...   மொதல்ல நீ சொல்லப் போறது ஜோக்குன்னு சொல்லிடு... நானும் ஏதோ சோகக்கதை சொல்றியோன்னு நெனைச்சிட்டேன்''

கே.ஆர்.ஜெயக்கண்ணன், கவற்குளம் தேரிவிளை.

 

(திருச்சி ஜங்ஷன் இரு சக்கர வாகன நிறுத்தத்தில்)

""என்ன மச்சி... உன் ஸ்கூட்டர் முகப்புல "அன்னையே தெய்வம்'ன்னு எழுதியிருப்பே... அதைக் காணலையே...''
""இப்ப எனக்கு கல்யாணம் ஆயிடுச்சே''

 சம்பத் குமாரி, பொன்மலை.


எஸ்.எம்.எஸ்.

நாயைக் கண்டால் கல்லைக் காணோம்...
கல்லைக் கண்டால் நாயைக்  காணோம்...
என்கிறார்களே...
நாய்கள் அப்படி என்ன குற்றம் செய்தன?

மு.பெரியசாமி, விட்டுக்கட்டி.


மைக்ரோ கதை

""தலைவரே... நம் நிகழ்ச்சிக்கு விளம்பர சுவரொட்டிகள் ஒட்ட  பையன் வந்திருக்கான்''
""ஏம்பா... உங்க அப்பா வரலையா?''
""நல்லா ஒட்டுவியா?''
""ஒட்டுவேன் ஐயா....''
""இங்க பாரு...  ஊரெல்லாம் நிறைய வால்போஸ்டர்கள் ஒட்டியிருப்பாங்க.
நம்ம வால்போஸ்டர் தனியா தெரியணும்.  அதனால் ஒரே இடத்திலே ரெண்டு ரெண்டு  வால்போஸ்ட்டரா ஒட்டணும்.  அப்பதான் நல்லா 
தெரியும். புரியுதா?''
""ஆகட்டும் ஐயா''
மறுநாள் காரில் சென்று கொண்டிருந்த தலைவர் விளம்பரங்களைக் கவனித்தார். எல்லா இடத்திலும் ஒன்றொன்றாக மட்டும்தான் ஒட்டப்பட்டிருந்தன.  போஸ்டர் ஒட்டிய  பையனை போனில் கூப்பிட்டுக் கேட்டார். 
""நல்லா பாருங்கய்யா....  எல்லா இடத்திலும் நீங்க சொன்ன மாதிரி ஒரு வால் போஸ்டர் மேலே இன்னொரு வால்போஸ்டரை ரெண்டு ரெண்டாத்தான் ஒட்டியிருக்கேன்''  என்றான் பையன்.

இரா.சிவானந்தம், கோவில்பட்டி.


யோசிக்கிறாங்கப்பா!

நிறம் மாறும் போட்டியில் தோற்றுப் போய் தற்கொலை செய்து கொண்டது
பச்சோந்தி...
மனிதனிடம் போட்டி போட முடியாமல்!

 ஏ.இரமணன், துறையூர்.

அப்படீங்களா!

சர்க்கரையை நோயைக் கண்டுபிடிக்க  ரத்தத்தில் உள்ள குளூகோஸின் அளவை ரத்த பரிசோதனை மூலம் கண்டுபிடிப்பார்கள்.  உயர் ரத்த அழுத்தத்தைக் கண்டுபிடிக்கவும் பல கருவிகளை வைத்து சோதனை செய்வார்கள்.  நெதர்லாந்தில் உள்ள க்ரோனின்ஜென் பல்கலைக்கழகத்தைச் சேர்ந்தவர்கள் இந்த இரு நோய்களையும் கண்டுபிடிக்க   ஒரு புதுமுறையைக் கண்டுபிடித்திருக்கிறார்கள்.

உடலில் சேரும் அதிகப்படியான குளூகோஸ் தோல் திசுக்களில் உள்ள   புரத மூலக்கூறுகளில்   பசை போல ஒட்டிக் கொள்கின்றன.  இது உடலின் திசுக்களை இறுக்கமடையச் செய்கிறது.  ரத்தக் குழாய்களில் ஒட்டிக் கொண்டால் அது உயர் ரத்த அழுத்தத்துக்கு காரணமாகிறது.  இவ்வாறு பசைபோல ஒட்டிக் கொள்ளும் குளூகோûஸ அளந்து பார்த்தால்,   ஒருவருக்கு  சர்க்கரை நோய் பாதிப்பிருக்கிறதா?   ரத்த அழுத்த நோய் பாதிப்பிருக்கிறதா? என்பதைத் தெரிந்து கொள்ள முடியும்.

அவ்வாறு அளந்து பார்ப்பதற்கு அவர்கள் கண்டுபிடித்திருக்கும் முறை,  பரிசோதனைக்காக இரத்தம் எடுக்கும்போது ஏற்படும் வலி போல எந்த வலியையும் ஏற்படுத்தாதது. 

தோலில்  ஃபுளோரோசன்ட் வெளிச்சத்தைப் படும்படி செய்கிறார்கள்.  தோல் திசுக்களில் உள்ள   புரத மூலக்கூறுகளில்  ஒட்டியிருக்கும்  அதிகப்படியான குளூகோஸில் பட்டு அது பிரதிபலிக்கிறது. இந்த பிரதிபலிப்பின் அடிப்படையில்  தோல் திசுக்களில் ஒட்டியிருக்கும் குளூகோஸின் அளவைக் கணக்கிட்டு,  ஒருவருக்கு சர்க்கரை நோய் உள்ளதா?  ரத்த அழுத்தம் உள்ளதா? என்று கண்டுபிடிக்கிறார்கள்.

என்.ஜே., சென்னை-116

]]>
https://www.dinamani.com/weekly-supplements/dinamani-kathir/2018/dec/02/பேல்பூரி-3051598.html
3051600 வார இதழ்கள் தினமணி கதிர் சஞ்சய்கானுக்கு  நேர்ந்த  சங்கடம்!   ராஜிராதா, பெங்களூரு. DIN Sunday, December 2, 2018 12:00 AM +0530 1970 -80களில் , ஹிந்திப் படவுலகின்  சூப்பர் ஸ்டார்  சஞ்சய்கான்,  நல்ல அழகு மற்றும் சிறந்த  பர்சனாலிட்டி உடையவர். இது அவரைச் சுற்றி  பெரிய வட்டத்தை உருவாக்கியிருந்தது.

இன்று சஞ்சய்கானுக்கு வயது 78.  இப்பவும்  நிஜ சூப்பர் ஸ்டார்  போல்தான் இருக்கிறார். அத்துடன் முதல் தடவையாக,  தன்னுடைய  வாழ்க்கை அனுபவங்களை  “THE  BEST  MISTAKES  OF MY LIFE’  என்ற   பெயரில்  புத்தகமாக எழுதியுள்ளார்.

இதிலிருந்து  ஒரு சுவையான  சம்பவம்: 

1980}இல்  இவர் நடித்த  "அப்துல்லா'   ஹிந்தி படம், துருக்கி  மொழியில்  மாற்றம்   செய்து வெளியிடப்பட்டது.  இதற்காக  நேரில்  சென்றிருந்தார் சஞ்சய்கான். அப்போது அவருடைய   கம்பீரத்தைப் பார்த்து பலர்  வியந்தனர்.  இதில் ஒருவர் பிரபல டான் டின்டார்கிலிக்,   அவருக்கு சஞ்சய்கானை  ரொம்ப  பிடித்தது.

அடுத்த நாள்  ஊர் திரும்ப  இருந்த  சஞ்சய்கானை  தன் மாளிகைக்கு அழைத்தார்.

மரியாதை நிமித்தம்  சென்றார் சஞ்சய்.

அங்கு டான்,   அவரிடம், ""இந்தியா,  பாகிஸ்தான்,  பங்களாதேஷ்,   ஸ்ரீலங்கா மற்றும் நேபாளத்துக்கு  போதை  மருந்து சாம்ராஜ்யத்தின்,  தலைவராக உங்களை  நியமிக்கின்றேன்''  என்றாராம்.

திடுக்கிட்ட  சஞ்சய்கான், சமாளித்து ""நான்  நேர்மையானவன்  நடிகர் மற்றும் கற்பனைவாதி.  ஆனால் பிசினஸ் தெரியாது.  அதில் நான் சைபர்.  உங்கள் பணம் முழுவதும் நஷ்டமாகிவிடும்''  எனக் கூற, டான்  அதனை நம்பி,  சஞ்சய்யை விடுவித்துவிட்டாராம்.  எப்படி இருக்கு?

]]>
https://www.dinamani.com/weekly-supplements/dinamani-kathir/2018/dec/02/சஞ்சய்கானுக்கு--நேர்ந்த--சங்கடம்-3051600.html
3051602 வார இதழ்கள் தினமணி கதிர் சிரி... சிரி...  சிரி... சிரி...  DIN DIN Sunday, December 2, 2018 12:00 AM +0530  

""ஏங்க நாம ரெண்டுபேரும் சண்டை போடும்போது உங்க நண்பர் வீட்டுக்கு வெளியே நிற்கிறாரே... ஏன்?''
""எனக்கு அவன் வெளியிலிருந்து ஆதரவு தர்றான்''

ஆர்.விஸ்வநாதன், சென்னை-78


""அடுத்தவங்க கஷ்டப்பட்டால் அதைப் பார்த்துக்கிட்டு என்னால சும்மா இருக்க முடியாது''
""ஓடிப் போய் உதவி செய்வீங்களா?''
""இல்ல அந்த இடத்தை விட்டு நகர்ந்துடுவேன்''

வி.ரேவதி, தஞ்சை.


""இவர் ஒரு சரியான கெஞ்சப் பிரபு''
""கெஞ்சப் பிரபுவா... புரியலையே...''
""ரொம்ப கெஞ்சிக் கேட்டாத்தான் எதையுமே தருவார்''

 பர்வதவர்த்தினி, சென்னை.



""எங்க டெயிலர் ஒருத்தருடைய குணத்துக்குத் தக்கவாறுதான் சட்டை தைச்சுக் கொடுப்பாரு''
""நீ லூசா சட்டை  போடுறப்பவே நினைச்சேன்''

டி.மோகனதாஸ். நாகர்கோவில்.



""எதுக்கு உன் கணவரை வாயை ஊதச் சொல்றே?  அவரு குடிப்பாரா?''
""நீ வேற... எங்க வீட்டு எலி கூண்டுல 
வச்சிருந்த மசால்வடையைக் காணலை... அதான்''

 வி.பார்த்தசாரதி, சென்னை-5


அப்பா: ஏன்டா  நீ யாரோ ஒரு பொண்ணு 
பின்னாலே சுத்துறியாமே... யார்டா அது?
மகன்: அதைத் தெரிஞ்சுக்கத்தான் 
சுத்துறேன் டாடி...

டி.மோகனதாஸ், நாகர்கோவில்



""இப்ப சொல்றது அடுத்த விநாடியே மறந்து போகுது டாக்டர்''
""எத்தனை நாளா இப்படி இருக்கு?''
""எது டாக்டர்?''

பி.பரத், கோவிலாம்பூண்டி.


""என்ன புலவரே... கவிதை பாட பயப்படுறீங்க?''
""பொய் சொன்னா ராணிக்குக் கோபம் வரும். உண்மையைச் சொன்னா உங்களுக்கு கோபம் வரும். நான் என்ன செய்வேன் மன்னா?''

தீ.அசோகன், சென்னை-19

]]>
https://www.dinamani.com/weekly-supplements/dinamani-kathir/2018/dec/02/சிரி-சிரி--சிரி-சிரி-3051602.html
3051604 வார இதழ்கள் தினமணி கதிர் சொன்னால் நம்பமாட்டீர்கள்! - 5 சின்ன அண்ணாமலை DIN Sunday, December 2, 2018 12:00 AM +0530 பார்க்கர் பேனா:

1937 அக்டோபர் மாதம் முதல் தேதியன்று தமிழகத்தில் கள்ளுக்கடைகளை மூடும் திருப்பணியை அன்றைய ராஜாஜி துவக்கினார்.

"விட்டது சனியன் விட்டது சனியன்விட்டது நம்மை விட்டதடா கொட்டுக முரசு கொம்பெடுத்தூது கொடும்பாவி கள்ளைக் கொளுத்தி விட்டோம்' 

- என்று ஊர் ஊராக, தெருத் தெருவாக நாமக்கல் கவிஞரின் பாடலைப் பாடிக் கொண்டிருந்தேன். உயர்நிலைப் பள்ளியிலும் ஸ்ட்ரைக் செய்ததால் என்னை "ஸ்கூல் பைனல்' எழுத முடியாமல் "டிஸ்மிஸ்' செய்து விட்டார்கள். அதனால் முழுநேரமும் அரசியல், அரசியல்தான்!

என் தந்தையார் எனது செயல்களை கவலையோடு கவனித்து வந்தார்கள். கடைசியாக என்னைப் பினாங்குக்குப் போகும்படி பணித்தார்கள். பினாங்கில் (மலேயா) எங்களுக்கு ஒரு வட்டிக்கடையும் கொஞ்சம் ரப்பர் எஸ்டேட்டும் இருந்தது. எங்கள் ஏஜண்டு ஒருவர் இவற்றைக் கவனித்துக் கொண்டிருந்தார்.

நாகப்பட்டினத்தில் கப்பல் ஏறி ஐந்து நாட்கள் பிரயாணம் செய்து பினாங்கு போய்ச் சேர்ந்தேன். ஏற்கெனவே ஒரு முறை நான் போய் வந்தவனாகையால் எனக்கு எல்லாம் அத்துபடிதான்!

கொஞ்ச நாட்கள் எங்கள் கடையில் சிரத்தையுடன் வேலை செய்தேன். வட்டித் தொழிலில் ஈடுபாடு உண்டாகவில்லை. தினமும் பத்திரிகை படிப்பதிலும் அரசியலிலும் தான் நாட்டம் உண்டாயிற்று. கொஞ்சம் கொஞ்சமாகப் பொது ஸ்தாபனங்களில் தொடர்பு கொள்ள ஆரம்பித்தேன். பல இடங்களில் சொற்பொழிவு செய்யும் வாய்ப்பும் ஏற்பட்டது, கொஞ்சம் பிரபல்யம் உண்டாயிற்று.

 ஒருநாள் என் மாமாவின் ரப்பர் எஸ்டேட்டுக்குப் போயிருந்தேன். அங்கிருந்த கள்ளுக்கடை என் கண்ணை உறுத்தியது. தொழிலாளர்களிடம் பேச்சுக் கொடுத்ததில் பெண் மக்கள் பலர் கள்ளுக்கடையை வெறுத்துப் பேசினார்கள்.
ஆண்களும் ""கடை இருப்பதினால்தான் குடிக்கிறோம், கடையை மூடிவிட்டால் மறந்து விடுவோம்'' என்று கூறினார்கள். கள்ளுக்கடை காண்ட்ராக்டர் கடையை மூட ஒப்புக் கொள்ளவில்லை.

அங்குள்ள தொழிலாளிகள் அனைவரும் தமிழர்களே! கள்ளுக்கடை காண்ட்ராக்டரும் தமிழரே! ஆகவே எனது பிரசாரத்தைத் துவக்கினேன். சுமார் மூன்று மாத காலம் பல எஸ்டேட்டுகளுக்குச் சென்று பிரசாரம் செய்தேன். அமோக ஆதரவு கிடைத்தது. பின்னர் மறியல்--

அடிதடி--போராட்டம் இவைகள் நடந்தன.

கடைசியில் ஒரு எஸ்டேட்டில் பெண்கள் எல்லாம் கூடி, கள்ளுக்கடைக்கு நெருப்பு வைத்து விட்டனர். உடனே சங்கிலித் தொடராகப் பல கள்ளுக்கடைகள் கொளுத்தப்பட்டன. இதற்குக் காரணம் நான்தான் என்று காண்ட்ராக்டர்கள் அரசாங்கத்திற்குப் புகார் செய்தனர். உடனே என் மீது "வாரண்ட்' பிறப்பிக்கப்பட்டது. போலீசார் நான் தங்கி இருந்த எஸ்டேட்டுக்குப் படையெடுத்து வந்தனர். போலீசாரைத் தொழிலாளர்கள் எஸ்டேட்டுக்குள் நுழைய விடாமல் பலாத்காரத்தில் இறங்கினர். நிலைமை முற்றும்போல் இருந்ததால் நானே வெளிவந்து கைதானேன். என்னைக் கைது செய்து நேராக பினாங்கு கவர்னரிடம் கொண்டு போனார்கள்.

`Where is that man?'' (எங்கே அந்த ஆள்) என்று கர்ஜனை செய்து கொண்டு வெள்ளைக்கார கவர்னர் தன் ஆசனத்தில் வந்து அமர்ந்தார். என்னைப் பார்த்ததும் Oh you are a boy’' (ஓ நீ ஒரு பையன்) என்று வியந்தார். நான் உடனே, Sir, I am not a boy, I am father of a boy (ஐயா நான் பையன் அல்ல, ஒரு பையனுக்குத் தந்தை) என்றேன்.

கவர்னர் கட்டடம் அதிர  சிரித்துவிட்டுத் தன் மனைவியைச் சத்தம் போட்டுக் கூப்பிட்டார். என்னவோ ஏதோவென்று அந்த அம்மையார் ஓடி வந்தார், கவர்னர் தன் மனைவியைப் பார்த்து, Darling, see the fun. This boy is saying that he is a father of a boy  (இந்த வேடிக்கையைப் பாரு இந்தப் பையன் ஒரு பையனுக்குத் தந்தை என்று சொல்லுகிறான்) என்றார். உடனே அந்த அம்மையார் என்னைக் கனிவுடன் தன் பக்கத்தில் கூப்பிட்டு, What is your age?’’ (உன் வயதென்ன?) என்று கேட்டார்.

“Seventeen’’’. (பதினேழு) என்றேன்.

""பதினேழு வயதில் உனக்கு ஒரு பையனா? உனக்கு எப்போது கல்யாணமாயிற்று?'' என்றார்.

"பதின்மூன்று வயதில்' என்றேன்.

அந்த அம்மையாருக்கு ஒரே ஆச்சரியமாகப் போய்விட்டது. ""பதின்மூன்று வயதில் கல்யாணம் செய்து என்ன செய்வது?'' என்றாரே பார்க்கலாம்.

நான் உடனே ""பிள்ளை பெறுவது'' என்றதும் கவர்னரும் அவர் மனைவியும் வெகு நேரம் சிரித்தார்கள். சிரித்துச் சிரித்து அவர்கள் கண்ணில் நீர் வழிந்தது. பிறகு கவர்னர் ""உன் பையன் பெயர் என்ன?'' என்றார்.

""இன்னும் பெயர் வைக்கவில்லை, இப்போது அவன் "பேபி' தானே, நான் ஊருக்குப் போய்தான் அவனுக்குப் பெயர் வைப்பேன்'' என்றேன்.

""உன் குழந்தை உன் மாதிரி சிவப்பாக இருப்பானா?'' என்று கவர்னர் மனைவி கேட்டார்.

""என் மனைவி கர்ப்பமாக இருக்கும்போது நான் இங்கு வந்துவிட்டேன். அதனால் குழந்தையை இன்னும் பார்க்கவில்லை. ஆனால் குழந்தை அழகாக சிவப்பாக இருக்கிறது என்று என் மனைவி கடிதம் எழுதியிருக்கிறாள்'' என்று கூறினேன்.

""உன் குழந்தையைப் பார்க்க வேண்டும் என்ற ஆவல் உனக்கில்லையா?'' என்று அந்த அம்மையார் கேட்டார். ""மிகவும் ஆவலாக இருக்கிறது'' என்றேன்.

""பின்னர் ஏன் இம்மாதிரி எல்லாம் தப்பு செய்கிறாய்?'' என்று கவர்னர் கேட்டார்.
""நான் ஒரு தவறும் செய்யவில்லை, என் நாட்டு மக்கள் கள் குடித்துச் சீரழிவதைத் தடுத்து அவர்களுக்கு நல்வாழ்வு அளிக்க வேண்டுமென்பதே என் எண்ணம்'' என்றேன்.

""அதற்காகக் கள்ளுக்கடைகளைக் கொளுத்தலாமா?'' என்றார்.

""நான் கொளுத்தவில்லை கொளுத்தச் சொல்லித் தூண்டவுமில்லை. நான் காந்தீயவாதி. பலாத்காரத்தில் எனக்கு நம்பிக்கையில்லை. ஆனால் மக்கள் கள்ளுக்கடையை கொளுத்தியது அவர்களது வெறுப்புணர்ச்சியைக் காட்டுகிறதல்லவா?'' என்றேன்.

""இதற்கு என்ன தண்டனை தெரியுமல்லவா?'' என்று அதட்டினார் கவர்னர்.

""தெரியாது, ஆனால் குற்றம் செய்யாதவனுக்குத் தண்டனை கொடுப்பது நீதியா? என்பதை மேன்மைதங்கிய சீமாட்டியாரிடம் கேட்க விரும்புகிறேன்'' என்று கூறி அந்த அம்மையாரைப் பார்த்தேன்,

உடனே அந்த அம்மையார் ஏதோ கவர்னரிடம் கூறினார். கவர்னர் புன்முறுவல் செய்து, ""சரி உனக்கு வயது பதினேழுதான் ஆகிறது. ஆகவே உன்னை விடுதலை செய்கிறேன். ஆனால் நீ இன்னும் ஒரு மாதத்தில் மலேயாவை விட்டு இந்தியாவுக்குப் போய்விட வேண்டும். அப்படி நீ புறப்படவில்லை என்றால் அதிகாரிகள் உன்னை பலவந்தமாகக் கப்பலில் ஏற்றி விடுவார்கள்'' என்று தீர்ப்புக் கூறினார்.

""உன் மகனைப் பார்க்க சீக்கிரம் இந்தியா போய்ச் சேர்'' என்று கவர்னரின் மனைவி சிரித்துக் கொண்டே சொன்னார். நானும் விடைபெற்றுக் கொண்டு வந்தேன். அந்த ஒரு மாதமும் அதிகாரிகள் என்னைக் கண்காணித்தார்கள்.

கவர்னர் உத்தரவை அறிந்த, அங்கிருந்த லேவாதேவிக் கடைக்காரர்கள் அனைவரும் அதிகாரிகளைவிட அதிகக் கண்காணிப்பாக இருந்து என்னைக் கப்பலேற்றி விட்டுத்தான் மறு ஜோலி பார்த்தார்கள். நான் கப்பலில் நாகப்பட்டினம் வந்து இறங்கிய அன்று, ஹிட்லர் யுத்த பிரகடனம் செய்து குண்டு மாறி பொழிய ஆரம்பித்தான். என் தந்தையார் நான் நாடு கடத்தப்பட்டு வந்தது குறித்து வருத்தப்பட்டாலும், யுத்தகாலத்தில் வெளிநாட்டில் அகப்பட்டுக் கொள்ளாமல் ஊர் வந்து சேர்ந்தது குறித்து மகிழ்ச்சி அடைந்தார்கள்.

அதற்கடுத்து பத்தாண்டு கழித்து மேற்படி கவர்னர் தம்பதிகளை சென்னை அடையாறு எலியட்ஸ் பீச்சில் சந்தித்தேன். நான் அடையாளம் கண்டு கொண்டேன். அவர்களுக்கு முதலில் என்னை அடையாளம் தெரியவில்லை. பின்னர் நான் பழைய விஷயங்களை ஞாபகப்படுத்தியதும் ஓர் அலாதியான அன்பு காட்டினார்கள். அந்த அம்மையார் மறக்காமல் என் மகனைப் பற்றி விசாரித்துக் கொண்டார்கள். நான் அவ்விருவரையும் என் இல்லத்திற்குக் கூட்டி வந்து காபி கொடுத்து உபசாரம் செய்தேன் என் மகனையும் காண்பித்தேன்.

இரண்டு மூன்று நாட்கள் அவர்களை மகாபலிபுரம் முதலிய இடங்களுக்குக் கூட்டிபோய் காண்பித்தேன். அவர்கள் இந்தியாவைச் சுற்றிப் பார்க்க வந்திருந்தார்கள். ஓய்வு பெற்றதும் கொஞ்ச காலம் லண்டனில் இருந்துவிட்டு உலகம் சுற்றி வருகிறார்களாம். அவர்கள் மீனம்பாக்கம் விமான நிலையத்தில் என்னைவிட்டுப் பிரியும்போது அந்த சீமாட்டி எனக்கு ஒரு பார்க்கர் பேனா 
பரிசளித்தார்.

சொன்னால் நம்ப மாட்டீர்கள். இப்போது நான் இதை எழுதிக் கொண்டிருப்பது அந்தப் பேனாவால்தான்!

(தொடரும்)

]]>
https://www.dinamani.com/weekly-supplements/dinamani-kathir/2018/dec/02/சொன்னால்-நம்பமாட்டீர்கள்---5-3051604.html
3045666 வார இதழ்கள் தினமணி கதிர் உலகின் மிகப் பெரிய சிவலிங்கம்! Tuesday, November 27, 2018 03:52 PM +0530 உயரத்தில் பிரமாண்டமாக நிற்பது மட்டுமே சரித்திரத்தில் இடம் பிடிக்கிறது. சாதனையாகக் கருதப்படுகிறது. உலகத்தில் உயர்ந்து நிற்கும் இமயமலை ... உலகத்தில் மிக உயரமான சர்தார் வல்லபாய் படேல் சிலை. அடுத்த ஆண்டு படேலின் சிலையை விட, அதிக உயரத்தில் (சுமார் 600 அடி) மும்பையில் கடலில் செயற்கைத் தீவில் நிர்மாணிக்கப்படும் சத்ரபதி சிவாஜியின் சிலை ... இப்படி பட்டியல் நீளுகிறது.
 இந்த வரிசையில் உலகில் மிகப் பெரிய சிவலிங்கம் திருவனந்தபுரத்தில் நிர்மாணிக்கப்பட்டு வருகிறது.
 இன்று வரை கர்நாடக கோலார் மாவட்டத்தில் "கம்மசந்த்ரா' கிராமத்தில் இருக்கும் கோடிலிங்கேஸ்வர கோயிலில் இருக்கும் சிவலிங்கம் தான் உலகில் பெரியது. 108 அடி உயரம். பாறைக் கல்லில் செதுக்கப்பட்டது இந்த லிங்கம்.
 திருவனந்தபுரத்திற்கு அருகே நெய்யாற்றின்கராவில் 111 அடி உயரத்தில் சிவலிங்கம் ஒன்று கான்கிரீட் கலவையில் கட்டப்பட்டு வருகிறது.
 நெய்யாற்றின்கராவில் அமைந்துள்ள மஹேஸ்வரம் ஸ்ரீ சிவபார்வதி கோயில் வளாகத்தில் 2012 -இல் உலகின் பெரிய சிவலிங்கத்தின் நிர்மாண வேலைகள் தொடங்கின.
 " ஒவ்வொருவரும் பணத்திற்காகவும், சொந்த லாபங்களுக்காகவும் ஓடிக் கொண்டிருக்கின்றனர். இந்தப் பேராசை உலகின் அமைதியையும், மக்கள் இணக்கமாகச் சேர்ந்து வாழும் பக்குவத்தையம் சிதைத்து வருகிறது. உலகின் அமைதிக்காக இந்த சிவலிங்கம் நிர்மாணிக்கப்படுகிறது'' என்கிறார் சுவாமி மஹேஸ்வரானந்தா சரஸ்வதி. மஹேஸ்வரம் ஸ்ரீ சிவபார்வதி கோயிலின் மடாதிபதி.
 "இந்த சிவ லிங்கம் ஐம்பது அடி சுற்றளவு கொண்டது. சிவலிங்கத்திற்குள் எட்டுத் தளங்கள் உள்ளன. முதல் ஆறு தளங்கள் ஆறு "சக்தி' சக்கரங்களைக் குறிக்கிறது. ஒவ்வொரு தளமும் ஆறு வகை நிறங்களைக் கொண்டிருக்கும். ஒவ்வொரு தளத்திலும் பக்தர்கள் தியானம் செய்ய தனி இடம் உண்டு. எட்டாவது தளத்தில் அதாவது உச்சியில் சந்நிதி உள்ளது. அதை கைலாசம் என்று அழைக்கிறோம். சந்நிதியில் ஆயிரம் இதழ்களைக் கொண்ட தாமரை "சகஸ்ரரா சக்கரம்' என்ற பெயரில் அமைய உள்ளது. கீழ்தளத்தில் 108 சிவலிங்கங்கள் பலவித தோற்றத்தில் அமையும். அவை மகாபலிபுரத்தில் செதுக்கப்படுகின்றன. இந்த பிரமாண்ட சிவலிங்கத்தின் கட்டுமானத்தில் காசி, பத்ரிநாத், கங்கோத்ரி, கோமுகி, கைமுக், ராமேஸ்வரம், தனுஷ்கோடி, கைலாசம் போன்ற இடங்களிலிருந்து கொண்டுவரப்பட்ட புனித நீர் சேர்க்கப்பட்டுள்ளது. அடுத்த பிப்ரவரி மாதம் கட்டுமான வேலைகள் முடிவுறும். பக்தர்களுக்காக இந்த சிவலிங்கத்தில் கதவுகள் திறக்கப்படும். கட்டுமானச் செலவுகளை கோயில் நிர்வாகத்தினரும், பக்தர்களும் ஏற்றுக் கொண்டுள்ளனர்'' என்கிறார் சுவாமி மஹேஸ்வரானந்தா சரஸ்வதி .

 - சுதந்திரன்

]]>
https://www.dinamani.com/weekly-supplements/dinamani-kathir/2018/nov/25/உலகின்-மிகப்-பெரிய-சிவங்கம்-3045666.html
3045680 வார இதழ்கள் தினமணி கதிர் யார் நீ? DIN DIN Sunday, November 25, 2018 12:55 PM +0530 சென்னை ஐ.டி எக்ஸ்பிரஸ் நான்கு வழிச் சாலை. வாகனங்களின் நடமாட்டம் தவிர, ஆட்கள் புழக்கமே இல்லாத மதியம் சுமார் இரண்டு மணி. சராசரியான வேகத்தில் வந்து கொண்டிருந்த தனது வண்டியின் டியூப் வெடித்து கன்னாபின்னாவென்று ஓட, மிகவும் கட்டுப்படுத்தி ஒரு ஓரத்தில் நிறுத்தி விட்டாள்.
 வண்டி பஞ்சர். நகர்த்திப் பார்த்தாள். முடியவில்லை. சுற்றும் முற்றும் கடைகள் ஏதும் இல்லை. வெயிலுக்கு ஒதுங்க இடம் இல்லை. வெயில் உக்கிரம் காட்டியது. வண்டியில் செல்லும் யாரையும் நிறுத்தி உதவி கேட்க மனசு இல்லை. இன்று ஏனோ எல்லா வண்டிகளும் அசுர வேகத்தில் செல்வதாகப்பட்டது அவளுக்கு. வண்டி பஞ்சர். என்ன பண்ணுவது?
 அருகில் ஒரு பட்டுப்போன மரம் தென்பட்டது. அதிர்ஷ்டம் அவள் பக்கத்தில். பஞ்சர்க்கு தொடர்பு கொள்க என தகடு விளம்பரம். நம்பர் பார்த்து அழைத்தாள்.
 "மேடம் நான் சிறிது தூரத்தில் தான் இருக்கிறேன். சிட்டி பஸ்லதான் வருகிறேன். கொஞ்சம் பொறுங்கள்'' என்றவுடன் தான் அவளுக்கு உயிரே வந்தது போல இருந்தது.
 "மேடம், நான் தான் மெக்கானிக் மணி, பின் சக்கரம் தான். உடனே சரி பார்த்து விடலாம்'' என டயர் கழட்ட ஆரம்பித்தான்.
 "சாரி மேடம், டயர், டியூப் இரண்டும் ஆணி பட்டு கிழிந்து விட்டது. புதுசு தான் மாற்றணும். எனது வொர்க் ஷாப் இரண்டு கிலோமீட்டர் தூரம் உள்ளது. பக்கத்துல தான் டயர் கடை இருக்கு. நான் வண்டியை தள்ளிக்கொண்டு வருகிறேன், பின்னாடியே வாங்க'' என தள்ள ஆரம்பித்தான்.
 தள்ளிக்கொண்டே போவது கஷ்டம் தான் என உணர்ந்தாள், "ஹலோ மணி நானும் கொஞ்சம் பின்னாடி தள்ளிக்கொண்டு வருகிறேன்'' என்றாள்.
 இது ஒரு புது அனுபவமாக அவளுக்கு இருந்தது. மெக்கானிக் உடையெல்லாம் மிகவும் அழுக்காக, எங்கும் கிரீஸ் பட்டு, கையில் பை நிறைய மெக்கானிக் சாமான்கள். அவளுக்கு ஏனோ ரொம்ப தூரம் வந்து விட்டது போல் இருந்தது. இன்னும் எவ்வளவு தூரம் எனக் கேட்டாள். கொஞ்சம் தூரம் தான் என வேகமாகத் தள்ள ஆரம்பித்தான்.
 "மேடம் உங்களிடம் ஒண்ணு கேட்கலாமா?''
 "ம்... கேளுங்க மணி...''
 "நீங்க மோனிஷா தான...?''
 ஆச்சரியப்பட்டு போனாள்.
 "ஆமாம் எப்படி தெரியும்?''
 "அதுமட்டுமில்ல... உங்கள் வேலை சன்மானர் கம்யுனிக்கேசன் கம்பெனி தான?''
 "ஆமாம்''
 "என்னை எப்படி தெரிந்து வைத்திருக்க முடியும். நான் எப்பவும் ஹெல்மெட், முகம் முழுவதும் ஸ்கார்ப் மூடிக் கொண்டுதான் செல்வேன்' அவள்
 குழம்பினாள்.
 "சொல்லு மணி என்னைப் பற்றி வேற என்ன தெரியும்?''
 "ஐய்யயோ அவ்வளவு தான் தெரியும். உங்களை இதே நேரம், இதே ரோடு வழியா எப்பவும் பார்ப்பேன்''
 "அப்படியா உன்னை நான் ஒரு நாள் கூட பார்த்ததே இல்லையே மணி... ஹேய்... என்னப்பா என்னை காதல், கீதல் பண்றியா?'' என மோனிஷா சிரித்துக் கொண்டே கேட்டாள்.
 "அதெல்லாம் இல்லேங்க, லவ் பண்றேன், ஆனால் உங்களை இல்லை. உங்களை லவ் பண்ணனும்னா மாதம் இரண்டு லட்சமாவது சம்பாதிக்கணும்''
 " அப்படியெல்லாம் ஒன்றும் இல்லை மணி. நானும் சாதாரணமானவள் தான்''
 "இல்ல மோனிஷா, நீங்கள் மிக அழகு. இதுவரை உங்களை நான் பக்கத்துல இருந்து பார்த்தது இல்லை. இப்ப பக்கத்துல இருந்து பார்க்கும் போது நீங்கள் இன்னும் பேரழகியா தெரிகிறீங்க''
 "ஹும் அதான் கேட்கிறேன் மணி. என் முகத்தைக்கூட நான் காட்டியது இல்லை. நீ பார்த்திருக்கவும் வாய்ப்பு இல்லை. பிறகு எப்படி என் பெயர், வேலை, எல்லாம் தெரிஞ்சு வச்சிருக்க?''
 "அதை விடுங்க மேடம்... எனக்குத் தெரிந்த வரையில் நீங்கள் யாரையும் காதலிக்கல, யார் கூடவும் நட்பாகவும் பழகல''
 "ம் ... சொல்லு மணி, இண்ட்ரஸ்டிங்... ஏதாவது பேசிக்கிட்டே வா, ரொம்ப டயர்டா இருக்கு''
 "நீங்கள் தள்ள வேண்டாம். உங்களால் முடியாது. அதுவும் திருமணம் நிச்சயதார்த்தம் ஆன பொண்ணு நீங்க, வீட்ல ஏற்பாடு பண்ண பையன் சரிதான?''
 "ஹலோ!''...
 "என்ன மோனிஷா?... ஷாக் ஆகிட்டு அங்கேயே நின்னுட்டீங்க. வாங்க இன்னும் கொஞ்ச தூரம் தான். கடை வந்துடும்''
 மோனிஷாவிற்கு அதிர்ச்சி மேல் அதிர்ச்சி. மிகவும் குழப்பத்துடன் அவன் அருகில் வந்தாள். ""மேடம்! நீங்க வேணும்னா இங்கயே நில்லுங்க, நான் வண்டிய கொண்டு போய் சரி பண்ணி கொண்டு வந்துடுறேன்''
 மோனிஷா ஏதும் பேசாமல் நின்று கொண்டு இருந்தாள்.
 "வேண்டாம் மணி. நானும் கூடவே வருகிறேன்''
 "ஓ... முன்னே பின்னே தெரியாத என்னை நம்ப மாட்டீங்க இல்ல''
 "அப்படியெல்லாம் ஒண்ணும் இல்லை, உன்னை நம்புறேன். சொல்லு மணி நீ யாரு? என்னைப்பற்றி எல்லாம் தெரிஞ்சி வச்சிருக்க?''
 அப்போழுது அவனுடைய செல் ஒலித்தது. அவள் அருகில் இருந்து கொண்டே போனில் பேசினான்.
 "காயத்ரி நான் இன்னும் சிறிது நேரத்தில் வந்துடுவேன். நீ சொல்லியது எல்லாம் சரிதான். ஆனால் சத்யம் தவற மாட்டேன், என்னை நம்பு காயத்ரி. எல்லாம் உனக்காகத்தான். கொஞ்சம் வெயிட் பண்ணுப்பா. லவ் யூ டார்லிங்'' என்று போனை கட் பண்ணினான்.
 "சரி மணி... உன்னிடம் எல்லாம் சொல்லணும்னு தோணுது, எங்கப்பா நடராஜன். வேளச்சேரி மத்திய அரசு வங்கி ஒன்றில் ஆபீசர். அவருக்கு நான் ஒரே பொண்ணு. அவர் மனசு நோகக்கூடாதுன்னு அவர் சொன்ன பையனுக்கே கழுத்தை நீட்டப் போறேன். நான் என்ன சொன்னாலும் கேட்பார். எனக்காக எதையும் செய்வார். மிகவும் திறமைசாலின்னு பேர் எடுத்தவர். அம்மா வீட்ல, கருணையே உருவான முகம். என்னோட மூன்று வயது தங்கை திடீரென இறந்து போன அதிர்ச்சியில் இருந்து இன்னும் மீளாமல் வலம் வந்து கொண்டிருப்பவர்''
 "அதுசரி உங்க அப்பாவை மஞ்சநாயக்கன்பட்டி நடராஜன்னு ஏன் சொல்றாங்க?''
 " மணி இப்பவும் கேக்கிறேன் நீ யாரு?''
 "நான் மெக்கானிக் மேடம், எல்லா இடத்துக்கும் போய் வருபவன்''
 "ஓ... ஆமாம்ல, அப்பா இருபது வருசத்துக்கு முன்னாடி மஞ்சநாயக்கன்பட்டி என்ற கிராமத்தில் மேனேஜரா பணிபுரியும் பொழுது எல்லா மக்களுக்கும் வங்கி கணக்கு ஆரம்பித்து சிறு தொழில் புரிய கடன் வழங்கி அந்த ஊரையே வளமாக்கியதால் ஜனாதிபதி அவார்டு கூட வாங்கி இருக்கார். என் கதை இருக்கட்டும், காயத்ரி யாரு?''
 "அவள் என்னோட காதலி''
 "அப்படியா! என்ன பண்றா?''
 "வீட்ல சும்மாதான் இருக்கா, வசதி இல்ல ரொம்ப படிக்கல, அவங்க அம்மா பெரிய பெரிய கம்பெனிகள்ல சுத்தம் பண்ற வேலை''
 "ஐயோ கஷ்டம் தான். அவங்க அப்பா என்ன பண்றார்?''
 சிறிது நேரம் மெüனம் காத்தான் மணி.
 ""பாவம் காயத்ரி, அவளுக்கு அப்பா இல்லை''
 " ஐயோ பாவம் இறந்துட்டாரா?''
 "இல்லை மேடம், அவர் அவங்க அம்மாவை விட்டுட்டு போய்ட்டார்...''
 " கேட்க கஷ்டமா இருக்கு காயத்ரிக்காக அனுதாபப்படுறேன். அவளும் உன்னை உயிருக்குயிராக காதலிக்கிறாள் தானே?''
 "ஆமாம், அவங்க அம்மா இப்படி எமாற்றப்பட்டதால் அவள் யாருடனும் பேச விரும்ப மாட்டாள். அவளை இரண்டு வருடமாக பின்தொடர்ந்து அவள் காதலைப் பெற்றேன்''
 "வாவ் எனக்கும் காதல் அனுபவம் உண்டு மணி.'' "அட உங்களுக்கா...''
 "ஆமாம், இந்த இருபதெட்டு வயசு வரைக்கும் யாருக்கும் காதல் வராம இருக்குமா, வந்தது ஆனா எனக்கு ஒத்து வராதுன்னு ஒதுங்கிட்டேன். எப்பவும் நான், நியாயம், தர்மம், சத்தியம், நேர்மைன்னு பேசிட்டு இருந்தா எவன் என்னை காதலிக்க வருவான்? அதைவிடு, நீ சொல்லு மணி இவ்வளவு குடும்பப் பிரச்சனையிலும் எப்படி உன்னை காதலிக்கத் தொடங்கினாள்?''
 "காயத்ரி அடிக்கடி இட்லி கடைக்கு வருவா, ஒரு நாள் நன்றாக உடை அணிந்து அவள் எப்பவும் வரும் வழியில் சென்றேன். காதலிக்கறேன்னு எப்படி சொல்றதுன்னு தெரியல... பயம்... பதட்டம், அவள்ட்ட நல்லாருக்கியா, இல்ல உங்க டிரஸ் அழகா இருக்குன்னு, இல்ல நீங்க அழகா இருக்கிங்கன்னு இப்படி எதாவது சொல்லணும்னு, ஆனால் பயத்தில் இடத்தை விட்டு நகரவே இல்லை''
 " பிறகு எப்படித்தான் உன் காதலை சொன்ன மணி?''
 "நான் எங்க சொன்னேன். அவளே சொல்லிட்டாள்''
 மோனிஷா கண்களில் ஆர்வம் பொங்க... "என்ன சொன்னா?''
 "காயத்ரி நேரே என்னிடம் வந்து உங்களுக்கு அந்த மெக்கானிக் டிரஸ் தான் நல்லாயிருக்குன்னு சொல்லிட்டு ஓடிட்டா''
 "யெஸ் மணி. நடிகர் விஜய்சேதுபதி அந்த வீடியோவில் சொல்ற மாதிரி, "ஐ லவ் யூன்னு சொல்றத விட "உன்னை நான் ரொம்ப மிஸ் பண்றேன்னு'ன்னு சொல்லி பாருங்க, அதுல மிகப் பெரிய ஒரு போதை இருக்கும்ன்னு நான் நம்புறேன்னு சொல்வார். ஆனால் இதுல அதை விட செம போதை இருக்கு. ஒரு நாள் நான் காயத்ரிய பார்க்கணும்''
 "இல்ல மோனிஷா, அவள் மிகவும் கூச்ச சுபாபம். அவளுக்கு ஒரு சத்தியம் பண்ணியிருக்கேன், நமது கல்யாணம் ஊரறிய, எல்லார் சம்மதத்துடன் நடக்கணும், அவங்க அம்மாகிட்ட எங்க வீட்ல எல்லோரும் போய் பேசிட்டாங்க. அவங்க எல்லா விவரமும் கேட்டு தெரிஞ்சிக்கிட்டாங்க''
 பேசிக் கொண்டே மணி வண்டியை ரெடி பண்ணிக் கொடுத்துட்டான்.
 "நன்றி மணி. உங்க அப்பா, அம்மா தெய்வத்துக்கு சமமானவங்க, நேரில் பார்க்கும் போது நான் அவங்ககிட்ட ஆசிர்வாதம் வாங்கிக்கணும். காயத்ரி அவளோட அப்பா யாருன்னு உன்னிடம்
 சொல்லிருக்காளா?''
 "சொல்லிருக்காள், ஆனால் என்னிடம் சத்தியம் வாங்கியதால நான் யாரிடமும் சொல்ல மாட்டேன். அவங்க அம்மா ஒரு கிராமம். அப்பொழுது ஒரு வங்கியில் சுத்தம் பண்ணும் வேலை கிடைத்ததாம். அந்த மேனேஜர் விரிச்ச வலையில் சிக்கிக்கொண்டாராம். ஆனால் தனக்கு குடும்பம் இருக்குன்னு விலகிட்டாராம். கையில் குழந்தை, ஒளிந்து மறைந்து வாழ வேண்டிய சூழ்நிலை, சொந்த ஊரை விட்டு சென்னை வந்து இப்படி வேலை பார்த்து குழந்தையை வளர்த்து இருந்திருக்கிறார்.
 காயத்ரி பத்தாம் வகுப்பு படிக்கும் வரை அவங்க அம்மாவால எல்லாம் முடிந்ததாம் . அவளோட அப்பாவும் அவ்வப்போது அவங்களுக்கு பண உதவி பண்ணிருக்கார், அதுவும் மறைமுகமாகத்தான். யாருக்கும் தெரியாமல், அப்பான்னு தெரிஞ்சும் அப்பான்னு கூப்பிட முடியாதாம், அதுவும் அவரை ஒளிஞ்சி இருந்து தான் பார்த்து இருக்காளாம். பின்னர் ஒரு கட்டத்தில் அவர் எங்குமே தென்படலையாம். ஆதலால் படிக்க முடியாமல் வீட்டிலயே முடங்கி விட்டாள் என் காயத்ரி.''
 நிசப்தம்... இருவர் கண்களும் கலங்கி இருந்தன.
 மோனிஷா நட்புடன் மணியின் கையைப் பிடித்து, "எங்கப்பா பேங்க் ஆபீசர் அவரால் அந்த மனிதரை தேடி பிடிக்க முடியும். காயத்ரி கல்யாணத்துக்கு அவரை வர வைக்க முடியும். முடிந்தால் அவரை ஊரறிய மகள்ன்னு ஏத்துக்க வைக்க என்னால் முடியும்'' என அழுத்தமா சொன்னாள்.
 "வேண்டாம் மேடம், அது காயத்ரி குடும்ப இரகசியம். அப்பா இல்லையென்று தெரியாவண்ணம் நானும் எங்க குடும்பமும் காயத்ரியை நன்றாக வைத்துக் கொள்வோம். அவங்க அப்பாகிட்ட கிடைக்காத அந்த அரவணைப்பு எங்க வீட்ல அவளுக்கு நிச்சயம் கிடைக்கும். அவள் அப்பா கொடுக்காத கல்வியை நான் கொடுப்பேன். என்னை மாதிரி இல்லாமல் அவள் உங்களைப் போல ஒரு கம்பெனியில் வேலைக்கு அனுப்பணும்''
 "காயத்ரி கொடுத்துவைத்தவள்'' கண் கலங்கினாள் மோனிஷா.
 "என்னுடைய வாழ்த்துக்களை சொல்லிவிடு மணி''
 வண்டியை ஸ்டார்ட் செய்தாள்.
 "அது சரி, ஏன் உன் காதல் கதையை என்னிடம் சொன்னாய்?''
 "ஏன் உனக்கு சொல்ல தோணுச்சி''
 "எனக்கு ஏன் கேட்க தோணுச்சி. ஒண்ணுமே புரியலையே. எப்படி என்னைப் பற்றி எல்லாம் தெரிஞ்சி வைச்சிருக்க? ஒரே குழப்பமா இருக்கு. இப்ப கூட கேட்கிறேன், நீ யார் மணி? சொல்லு... ஏன் எதுவும் சொல்ல மறுக்கிற? என்னை நம்பலையா?''
 மணி அமைதியாகவே இருந்தான்.
 "உங்களை நம்புகிறேன். ஆனால் நீங்க போயிடுங்க ப்ளீஸ். மோனிஷா! ரொம்ப நல்லவங்க நீங்க... எங்க பிரச்சனை எங்களுக்கு''
 "ஓ.கே...ஓ.கே மணி... நான் போறேன்'' என்று வண்டியை அமைதியாக நகர்த்தினாள். திரும்பி பார்த்துக் கொண்டே அவ்விடத்தை விட்டு அகல ஆரம்பித்தாள். மனதில் ஒரு பாரம், கலக்கம், குழப்பம். அவளுக்கு இங்கு நடந்தது எதுவுமே புரியவில்லை. முதன் முறையாக மனதில் ஒருவித பதற்றம் தொற்றிக்கொண்டது. சில அடிகள் நடந்து சென்று இருப்பாள்.
 "ஹலோ மோனிஷா மேடம்! காயத்ரி யாருன்னு தெரியணுமா?''
 "அவளோட அப்பா பேரு நடராஜன்... பேங்க் ஆபீசர்... ஜனாதிபதி கையால அவார்டு வாங்கியவர்... அவங்க அம்மா ஊரு மஞ்சநாயக்கன்பட்டி...''
 
 ரா.கதிரேசன்
 
 
 
 
 
 
 
 

]]>
https://www.dinamani.com/weekly-supplements/dinamani-kathir/2018/nov/25/யார்-நீ-3045680.html
3045679 வார இதழ்கள் தினமணி கதிர் சிரி... சிரி... சிரி... சிரி...  DIN DIN Sunday, November 25, 2018 12:52 PM +0530 • "வர வர சிலைக் கடத்தல்காரங்க அட்டூழியம் தாங்க முடியலை''
"ஏன் என்னாச்சு?''
"இங்கிருந்த கோயிலையே கடத்திட்டாங்க''
அ.செல்வகுமார், சென்னை-19.

• "நான் எங்கே நடந்து போனாலும் என் பின்னாடியே கறுப்பு நாய் ஒண்ணு நிழல் மாதிரி தொடர்ந்து வருது சாமி?''
"உன்னோட நிழல்தான்யா அது... நிதானமா திரும்பிப் பாரு... புரியும்''
வி.ரேவதி, தஞ்சை.

• "என் மனைவி தங்கம் மாதிரி''
"எப்படி?''
"லேசுல இறங்கிவர மாட்டா...''
வெ.ராம்குமார், வேலூர்.

• "அந்த டாக்டர் அடிக்கடி டிவியில வருவார்ன்னு நெனைக்கிறேன்''
"எப்படிச் சொல்றே?''
"அவர்கிட்ட போய் வியாதியைச் சொன்னா, சவுண்ட் கம்மி பண்ணுங்கன்னு சொல்றாரே''
தீபிகா சாரதி, சென்னை-5.

• நடிகை: இந்த படத்துல நான் மேக்கப் இல்லாம நடிக்கப் போறேன்
நிருபர்: நீங்க எப்பவும் தயாரிப்பாளரைத்தானே பயமுறுத்துவீங்க... இந்தப் படத்துல 
ரசிகர்களைப் பயமுறுத்தப் போறீங்களா?

• அவர்: எங்க மானேஜருக்கு மணி பார்க்கக் கூடத் தெரியாது.
இவர்: நிஜமாவா?
அவர்: யாராவது லேட்டா வந்தா மணி என்னன்னு கேட்பார்.

• "என்னப்பா கம்ப்யூட்டருக்குப் போய் காலேஜ்ல அட்மிஷன் கேட்கிறே?''
" கம்ப்யூட்டர் படிச்சா எனக்கு வேலை கிடைக்கும்ன்னு சொன்னாங்க''

• "எங்க தலைவருக்கு லஞ்சம் ஊழல் எல்லாம் கொசு மாதிரி''
"எப்படி?''
"ரெண்டையும் ஒழிக்க முடியாதுன்னு அவருக்குத் தெரியும்''
வி.பார்த்தசாரதி, சென்னை-5

]]>
https://www.dinamani.com/weekly-supplements/dinamani-kathir/2018/nov/25/சிரி-சிரி-சிரி-சிரி-3045679.html
3045678 வார இதழ்கள் தினமணி கதிர் சிட்டுக்குருவி DIN DIN Sunday, November 25, 2018 12:50 PM +0530 இசை அமைப்பாளர் கே.வி. மகாதேவன் வீட்டில் சிட்டுக்குருவிகள் பல இடங்களில் கூடுகட்டி இருந்தன. மகாதேவன் இருந்தாலும் இல்லாவிட்டாலும் இந்த குருவிகள் தங்கள் சிறிய குரலில் பண் இசைத்து வரவேற்க தவறுவதே இல்லை. இவற்றை பற்றி யாராவது கேட்டால் மகாதேவன் இதைத்தான் சொல்வார்: " எனக்கு புகழை அளித்த படம் "டவுன்பஸ்' அதில் மிகவும் பிரபலமானது "சிட்டுக்குருவி...' என்ற பாட்டுத்தான். இந்த குருவிகளைப் பிரபலபடுத்திவிட்டதால்தானோ என்னவோ படைபோல் என் வீட்டிலும் அவை குடியேறிவிட்டன. என் மீதும் அவற்றுக்கு அன்பு. அவற்றின் மீது எனக்கு ஆசை.
 - செ.மயில், திருநெல்வேலி.
 

]]>
https://www.dinamani.com/weekly-supplements/dinamani-kathir/2018/nov/25/சிட்டுக்குருவி-3045678.html
3045677 வார இதழ்கள் தினமணி கதிர் மக்களிடம் செல்வாக்குச் செலுத்திய மனிதர்! DIN DIN Sunday, November 25, 2018 12:48 PM +0530 "ஒரு கால் நூற்றாண்டு காலம் வங்க மக்களிடம் செல்வாக்குச் செலுத்திய மனிதர் யாரென்று கேட்டால், நான் ரவீந்திரநாத் தாகூரின் பெயரையோ, சுபாஷ் சந்திர போஸின் பெயரையோ கூற மாட்டேன். மாறாக 5 அடி உயரமும் வெள்ளை வேட்டியும், குர்தாவும் அணிந்த வங்க மக்களின் விதியை நிர்ணயித்த ஜோதிபாசுவையே கூறுவேன்''.
 - பிரபல வங்கப் பத்திரிகையாளர் அருண் கங்குலி
 - தங்க. சங்கர பாண்டியன்

]]>
https://www.dinamani.com/weekly-supplements/dinamani-kathir/2018/nov/25/மக்களிடம்-செல்வாக்குச்-செலுத்திய-மனிதர்-3045677.html
3045676 வார இதழ்கள் தினமணி கதிர் எங்களோடு முடிந்துவிடுமோ? DIN DIN Sunday, November 25, 2018 12:47 PM +0530 "தற்போது பலருக்கும் கம்போசிங்குக்கு நேரம் இல்லை. சில பாடலாசிரியர்கள் நெட்டில் பாட்டிற்கான மெட்டை அனுப்பச் சொல்லி இ-மெயில் முகவரியை எஸ்.எம்.எஸ் மூலம் செய்கிறார்கள், இதிலெல்லாம் எப்படி உயிரோட்டம் இருக்கும்? இன்றைக்கு எல்லாமும் நெட்டிலேயே பிறந்து விடுவது ரொம்பவே வருத்தமாக இருக்கிறது.
 50 பேர் அமர்ந்து தபேலா, டோலக்கு, கீ போர்டு வைத்து கண்டக்டிங்கோடு இசையமைக்கும் நாட்களெல்லாம் எங்களோடு முடிந்து விடுமோ என்றே மனதில் படுகிறது''.
 - இசையமைப்பாளர் தேவா

]]>
https://www.dinamani.com/weekly-supplements/dinamani-kathir/2018/nov/25/எங்களோடு-முடிந்துவிடுமோ-3045676.html
3045675 வார இதழ்கள் தினமணி கதிர் யானை இறந்தாலும் ஆயிரம் பொன்! DIN DIN Sunday, November 25, 2018 12:46 PM +0530 உலகம் எல்லாம் பார்த்து வியந்த கவர்ச்சிக்கன்னி ஹாலிவுட் நடிகை மர்லின்மன்றோ "செவன்இயர் இட்ச்' என்ற படத்தில் நடித்தார். 1955- இல் வெளிவந்த அந்தப் படத்தில் ஒரு வெள்ளை உடையை அணிந்திருந்தார். அந்த ஆடை அணிந்து மன்றோ நடித்த அந்தக் காட்சி 14 முறை படம் பிடிக்கப்பட்டது. காட்சியை சீராக்க மூன்று மணி நேரமாகியது.
 மன்றோ காட்சியை முடிக்கும் முன்பு அந்த ஆடை வெள்ளையாக இருந்தது பின்னர். மஞ்சள் நிறமாகிவிட்டது.
 2011-இல் மன்றோ உடுத்திய அந்த ஆடை சுமார் 46 லட்சம் டாலர்களுக்கு ( சுமார் இரண்டு கோடியே அறுபத்தேழு லட்சம் ரூபாய்) ஏலத்தில் ஒரு ரசிகர் வாங்கினார்.
 - சக்திக் கொடி

]]>
https://www.dinamani.com/weekly-supplements/dinamani-kathir/2018/nov/25/யானை-இறந்தாலும்-ஆயிரம்-பொன்-3045675.html
3045674 வார இதழ்கள் தினமணி கதிர் வசை பாடுவதில் வல்லவர்! DIN DIN Sunday, November 25, 2018 12:45 PM +0530 தமிழில் வெண்பா பாடுவதில் புகழ்பெற்றவர் புகழேந்தி. விருத்தம் பாடுவதில் வித்தகர் கம்பர். உலா அந்தாதி புனைவதில் உயர்ந்தவர் ஒட்டக்கூத்தர். வசை பாடுவதில் வல்லவர் காளமேகப்புலவர்.
 உ. ராமநாதன்.
 

]]>
https://www.dinamani.com/weekly-supplements/dinamani-kathir/2018/nov/25/வசை-பாடுவதில்-வல்லவர்-3045674.html
3045673 வார இதழ்கள் தினமணி கதிர் திரைக்கதிர் DIN DIN Sunday, November 25, 2018 12:44 PM +0530 • தீபிகா - ரன்வீர் சிங் திருமணம் இத்தாலியில் கடந்த வாரத்தில் தென்னிந்திய மற்றும் வட இந்திய முறைப்படி நடந்தது. இவர்களது திருமணம் எந்தவித அசம்பாவிதமும் இல்லாமல் நடந்து முடிந்தபோதும் தீபிகா மற்றும் ரன்வீர் குடும்பத்தினர் திருமணம் முடியும்வரை திகிலுடன் இருந்த தகவல் தற்போது வெளியாகி இருக்கிறது. கடந்த ஆண்டு தீபிகா, ரன்வீர் சிங் இருவரும் "பத்மாவத்' படத்தில் இணைந்து நடித்தனர். சரித்திர படமாக உருவான இப்படத்துக்கு வடநாட்டை சேர்ந்த ராஜ்புத் இனத்தவர் கடும் எதிர்ப்பு தெரிவித்தனர். படத்தை தடை செய்ய வேண்டும் என்று போராட்டம் நடத்தியதுடன் தீபிகா தலையை வெட்டுவோம் என்றும் ஒரு சிலர் அறிவித்தனர். இதனால் பதற்றம் ஏற்பட்டது. நீதிமன்ற அனுமதிக்குப் பிறகு வெளியிடப்பட்டது. படம் நன்றாக ஓடி வசூலையும் அள்ளியது. ஆனால் அதில் நடித்த தீபிகா மற்றும் ரன்வீர் குடும்பத்தினர் ஒருவித அச்ச உணர்வுடனேயே இருந்தனர். இந்நிலையில்தான் தீபிகா, ரன்வீர் திருமணம் நிச்சயமானது. இந்தியாவில் திருமணம் நடத்தினால் பிரச்னை வருமோ என்று எண்ணியவர்கள் இத்தாலியில் திருமணம் நடத்தினர். மேலும் தங்களது திருமணத்தை தில்லியில் ஒரு கம்பெனியில் பல கோடிக்கு இன்சூரன்ஸ் செய்த தகவல் வெளியாகியுள்ளது. 

• பாலிவுட் சினிமாவில் காதல் தம்பதிகளாக வலம் வந்து கொண்டிருக்கின்றனர் அபிஷேக்பச்சன் - ஐஸ்வர்யாராய். சினிமாவில் தொடங்கிய இவர்களது நட்பு காதலாகி திருமணத்தில் முடிந்தது. மணிரத்னம் இயக்கத்தில் 2007-ஆம் ஆண்டு தமிழ், ஹிந்தியில் திரைக்கு வந்த "குரு' என்ற படத்தில் இருவரும் ஜோடியாக நடித்தனர். அப்போதுதான் இவர்களுக்குள் காதல் மலர்ந்தது. இவர்களுக்கு ஆராத்யா என்ற மகள் உள்ளார். அவரது 7-ஆவது பிறந்தநாளை குடும்பத்தினர் கொண்டாடினர். இதுபற்றி தனது இணைய தள இன்ஸ்டாகிராம் பக்கத்தில் குறிப்பிட்டுள்ள அபிஷேக் பச்சன், ""குழந்தையின் பிறந்தநாளின்போது அவரது தாயைக் கொண்டாடாமல் அது நிறைவடையாது. அவர் மீது அன்பு செலுத்துவதற்கு, அவரைப் பார்த்துக் கொள்வதற்கு, எல்லாவற்றுக்கும் மேலாக ஆச்சரியப் பெண்ணாக இருப்பதற்கு, வாழ்க்கையின் மிகச் சிறந்த பரிசான மகளை எனக்கு அளித்ததற்கு என் மனைவி ஐஸ்வர்யாராய்க்கு நன்றி. அத்துடன் என்னுடைய குட்டி தேவதை ஆராத்யாவுக்கு பிறந்தநாள் வாழ்த்துக்கள்'' என்று நெகிழ்ந்துள்ளார் அபிஷேக்பச்சன். 

• சூப்பர் ஹிட் படங்கள் முதல் சுமார் படங்கள் வரை சினிமாவுக்கு ஆன்லைனில் ஆதரவு அமோகம். தியேட்டர்களைவிட இணையதளங்களில் சினிமா பார்ப்பவர்களின் எண்ணிக்கை சில பல கோடிகளைத் தாண்டிக் கொண்டிருக்க, இணையதளங்களுக்காகவே படம் எடுக்கும் கலாசாரம் தொடங்கிவிட்டது. "வெப் சீரிஸ்' என அடையாளப்படுத்தப்படும் இந்த வகைபடங்கள்தாம் இப்போது ரசிகர்களிடம் பெரும் வரவேற்பைப் பெற்றுள்ளன. இதனால் சினிமாவுக்கு அடுத்தபடியாக வெப் சீரிஸ்களில் நடிப்பதை திரை நட்சத்திரங்கள் பெரிதும் விரும்புகின்றனர். முதல் கட்டத்திலேயே இதில் நுழையும் ஆர்வம் திரை நட்சத்திரங்களுக்கு ஏற்பட்டுள்ளது. இந்த பாணியில் மாதவன் நடித்து வெளியான வெப் சீரிஸ் ஒன்று பெரும் வெற்றி பெற்றது. இதையடுத்து ஆண்ட்ரியா, காயத்ரி, பிரியாமணி, சுனைனா, பாபி சிம்ஹா உள்ளிட்ட பலர் இதில் நடித்து வருகின்றனர். இந்த வரிசையில் அடுத்து இடம் பிடிக்க வருகிறார் பிரியா பவானி சங்கர். தற்போது எஸ்.ஜே.சூர்யாவுடன் "மான்ஸ்டர்', அதர்வாவுடன் "குருதி ஆட்டம்'ஆகிய படங்களில் நடித்து வருகிறார். இந்நிலையில் அவர், வெப்சீரிஸில் ஒன்றில் நடிக்க ஒப்பந்தம் செய்யப்பட்டுள்ளார். இதில் கருணாகரன், ரோபோ சங்கர் போன்றோரும் நடிக்கின்றனர்.

• அஜித் - சிவா கூட்டணி நான்காவது முறையாக இணைந்துள்ள படம் "விஸ்வாசம்'. இதன் படப்பிடிப்பு வெளி நாட்டிலும் மற்றும் சென்னை, ஹைதராபாத் போன்ற இடங்களிலும் நடந்தது. அஜித்தின் 58-ஆவது படமாக உருவாகியிருக்கும் இப்படத்தின் படப்பிடிப்பு முடிந்தது. பொங்கல் தினத்தில் படத்தை வெளியிடுவதற்கான வேலைகள் நடந்து வருகின்றன. அடுத்து அஜித்தின் 59-ஆவது படத்தை எச்.வினோத் இயக்க உள்ளதாக தகவல் வெளியானது. இவர் ஏற்கனவே "சதுரங்க வேட்டை', "தீரன் அதிகாரம் ஒன்று' படங்களை இயக்கியவர். மேலும் அஜித் நடிக்கும் புதிய படம், ஹிந்தியில் அமிதாப்பச்சன் நடித்த "பிங்க்' படத்தின் ரீமேக் என்றும், மறைந்த நடிகை ஸ்ரீதேவியின் கணவர் போனிகபூர் இப்படத்தை தயாரிக்க உள்ளதாகவும் கூறப்பட்டதுடன், வினோத் பெயரில் உள்ள ஒரு சுட்டுரையில் "தல 59' ரீமேக் இல்லை என்றும் ஒரு தகவல் வெளியானது. இதுகுறித்து இயக்குநர் வினோத் விளக்கம் அளித்துள்ளார். அதில்,"எனது அடுத்த படம் பற்றிய அறிவிப்பை படத் தயாரிப்பு நிறுவனம் வெளியிடும். மற்றபடி என் பெயர் மூலம் பரவும் வதந்திகளை நம்ப வேண்டாம். மேலும் முகநூல், சுட்டுரை, இன்ஸ்டாகிராம் உள்ளிட்ட எந்த சமூக வலைதளங்களிலும் எனக்கு கணக்கு இல்லை என்பதை தெரிவித்துக்கொள்கிறேன்'' எனக் குறிப்பிட்டுள்ளார்.

விக்ரம் நடிப்பில் சமீபத்தில் "சாமி' படத்தின் இரண்டாம் பாகம் வெளியானது. இதைத் தொடர்ந்து, "தூங்காவனம்' படத்தின் இயக்குநரான ராஜேஷ் எம் செல்வா இயக்கத்தில் தற்போது நடித்து வருகிறார் விக்ரம். இதில் அக்ஷரா ஹாசன் மற்றும் அபு ஹாசன் ஆகியோர் முக்கிய கதாபாத்திரங்களில் நடிக்கின்றனர்.கமல்ஹாசனின் ராஜ்கமல் ஃபிலிம் இண்டர்நேஷனல் மற்றும் ட்ரைடென்ட் ஆர்ட்ஸ் ஆர்.ரவீந்திரன் ஆகியோர் இணைந்து இந்தப் படத்தைத் தயாரிக்கின்றனர். ஜிப்ரான் இசையமைக்கிறார், ஸ்ரீனிவாஸ் ரெட்டி ஒளிப்பதிவு செய்கிறார். கடந்த செப்டம்பர் மாதம் இதன் படப்பிடிப்பு தொடங்கியது. தற்போது அடுத்தடுத்த கட்டங்களாக படப்பிடிப்பு நடந்து வருகிறது. இந்நிலையில், அடுத்த கட்டப் படப்பிடிப்புக்காக படக்குழுவினர் மலேசியா செல்ல இருக்கின்றனர். அடுத்த ஆண்டு இறுதிக்குள் படத்தை வெளியிட படக்குழுவினர் திட்டமிட்டுள்ளனர். இந்நிலையில், இந்தப் படத்தின் ஃபர்ஸ்ட் லுக் வெளியிடப்பட்டது. கமல்ஹாசன் தன்னுடைய சுட்டுரைப் பக்கத்தில் இதை வெளியிட்டார். "கடாரம் கொண்டான்' எனப் படத்துக்குத் தலைப்பு வைக்கப்பட்டுள்ளது. 
- ஜி.அசோக்


 

]]>
https://www.dinamani.com/weekly-supplements/dinamani-kathir/2018/nov/25/திரைக்கதிர்-3045673.html
3045671 வார இதழ்கள் தினமணி கதிர் மைக்ரோ கதை DIN DIN Sunday, November 25, 2018 12:41 PM +0530 ஒரு சிறுமி தன் கையில் இரண்டு ஆப்பிளை வைத்திருந்தாள். அவளுடைய அம்மா, "இரண்டு ஆப்பிள் 
வச்சிருக்கயே... எனக்கொண்ணு தா'' என்று கேட்டாள்.
உடனே சிறுமி தன் கையிலிருந்த இரண்டு ஆப்பிள்களையும் கடித்தாள்.
அம்மாவுக்கோ ஏமாற்றமாக இருந்தது. தனக்குக் கொடுக்கக் கூடாது என்பதற்காகத்தான் அப்படிச் செய்ததாக நினைத்தாள். முகத்தில் ஏமாற்றத்துடன், "எனக்குக் கொடுக்க மாட்டியா?'' என்று கேட்டாள்.
உடனே சிறுமி ஓர் ஆப்பிளைக் கொடுத்தாள்.
"இந்த ஆப்பிள்தாம்மா இனிப்பா இருக்கு... இதை நீ வெச்சுக்க''
ஜோ.ஜெயக்குமார், 
நாட்டரசன்கோட்டை.
 

]]>
https://www.dinamani.com/weekly-supplements/dinamani-kathir/2018/nov/25/மைக்ரோ-கதை-3045671.html
3045670 வார இதழ்கள் தினமணி கதிர் பேல்பூரி DIN DIN Sunday, November 25, 2018 12:40 PM +0530 கண்டது
• (மதுரையில் ஒரு காரின் பின்புறம் கண்ட வாசகம்)
தாத்தா - பாட்டி - அப்பா - அம்மா துணை
பொன்.பிரபாகரன், வத்திராயிருப்பு.

• (கம்பம் நகரில் ஒரு ரெடிமேட் கடையின் நுழைவு வாயிலில் உள்ள பலகையில்)
நீங்கள் ஆடைகளை மட்டும்
எடுத்துச் செல்லவில்லை...
நிறைவேறிய உங்கள் ஆசைகளையும் 
எடுத்துச் செல்கிறீர்கள்.
ஆர்.அஜிதா, கம்பம்.

• (துடியலூரில் ஒரு வேனில் கண்ட வாசகம்)
ஓர் உழவன் அழுதால்...
உலகமே அழ வேண்டி இருக்கும்.
தி.ரா.திருவேங்கடம், கோயம்புத்தூர்.

கேட்டது
• (சென்னை கோடம்பாக்கம் பவுர்ஹவுஸ் அருகில் ஒரு வீட்டில் கணவனும் - மனைவியும்)
"டெய்லி குறட்டை விட்டு எல்லாருடைய தூக்கத்தையும் கெடுப்பீங்க... நேத்து நீங்க குறட்டை விடாதது அதிசயமா இருக்கே?''
"மறந்துபோய் அசந்து தூங்கியிருப்பேன்''
செல்.பச்சமுத்து, சென்னை-24.

• (திருவாரூர் மருத்துவக் கல்லூரி பேருந்து நிறுத்தத்தில் இருவர்)
"என்ன சார் உங்களுக்கு கட்டி ஒரு நாளைக்கி சின்னதா தெரியுது... இன்னொரு நாளைக்கி பெரிசா இருக்கு?''
"ஆம்மாமாம்... அது பெட்ரோல் விலை மாதிரி சைஸ் ஏறும்... இறங்கும். எப்ப எப்படி மாறும்னு எனக்கே தெரியாது. இப்ப பெட்ரோல் விலை மாதிரி குறைஞ்சிக்கிட்டு வருது''
மு.தனகோபாலன், திருவாரூர்.
எஸ்எம்எஸ்
படித்தவன் ஞானி
படிக்காதவன் மெய்ஞானி
தீ.அசோகன், சென்னை-19.

யோசிக்கிறாங்கப்பா!
மகனின் பர்த் சர்டிபிக்கேட்டுக்காக
அப்பா லஞ்சம் கொடுப்பதும்,
அப்பாவின் டெத் சர்டிபிகேட்டுக்காக 
மகன் லஞ்சம் கொடுப்பதுமாக...
கழிகிறது வாழ்க்கை -
இந்நாளில்.
வளர்மதிமுத்து, திருச்சிற்றம்பலம்.

அப்படீங்களா!
படிக்காதவர்கள் அதிகமாக இருந்த காலத்தில் விரல் ரேகைதான் ஒருவரின் அடையாளமாக இருந்தது. பத்திரப் பதிவு முதற்கொண்டு எந்தவொரு முக்கிய ஆவணத்திலும் "கைநாட்டு'தான் இடம் பெற்றிருக்கும். தற்போது ஆதார் அட்டைக்கு அடையாள ஆதாரமாக இருப்பதும் இந்த விரல் ரேகைதான். பெரிய நிறுவனங்களில் வேலை செய்பவர்கள் வேலைக்குச் சென்றதற்கான அட்டென்டன்ஸ் விரல் ரேகை பதிவின் மூலமே தற்போது நடைபெற்று வருகிறது. செல்போனுக்கான பாஸ் வேர்டுக்குப் பதிலாக விரல் ரேகை பயன்படுகிறது. 
இப்படி பாரம்பரிய சிறப்புப் பெற்ற விரல் ரேகைப் பதிவை பின்னுக்குத் தள்ளி இப்போது முன்னுக்கு வந்திருக்கிறது Ear print எனப்படும் புதிய பதிவு. 
காதினுள் செல்லும் ஒலி எதிரொலிக்கும். இந்த எதிரொலியின் அளவு ஒவ்வொருவருக்கும் ஒவ்வொருவிதமாக இருக்கும். இதை அடிப்படையாக வைத்து இந்த Ear print எனப்படும் புதிய அடையாள பதிவை உருவாக்கியிருக்கிறார்கள். 
செல்போனைப் பயன்படுத்துபவருக்கான அடையாளத்தை இந்த அடிப்படையில் செல்போன் ஏற்படுத்திக் கொள்ளும். அந்த அடையாளம் இருந்தால் மட்டுமே செல்போன் செயல்படும். வேறு யாரும் செல்போனைப் பயன்படுத்த முடியாது. இது தொடர்பான ஆராய்ச்சியை யாகூ நிறுவனம் தொடர்ந்து செய்து வருகிறது.
என்.ஜே., சென்னை-116.

]]>
https://www.dinamani.com/weekly-supplements/dinamani-kathir/2018/nov/25/பேல்பூரி-3045670.html
3045669 வார இதழ்கள் தினமணி கதிர் பித்த வாயுக்களை மட்டுப்படுத்த...! ஆயுள் காக்கும் ஆயுர்வேதம் DIN DIN Sunday, November 25, 2018 12:36 PM +0530 என் வயது 53. கண் எரிச்சல், தலை சுற்றல், பாத எரிச்சல், வலது கால் கட்டைவிரல் மேல் நரம்பு கூச்சம், முட்டிக்குக் கீழே உளைச்சல், வலது கை ஆள்காட்டி விரல் மேல் நரம்பு உளைச்சல் போன்ற உபாதைகளால் அவதிப்படுகிறேன். நல்ல ஓய்விலிருந்தால் இவை குறைகின்றன. இவை எதனால் ஏற்படுகின்றன? என்ன மருந்து சாப்பிடலாம்?
-A.M. ஆரோக்கியசாமி, பந்தல்குடி.

பித்தம் வினா தாஹ: என்கிறது ஆயுர்வேதம். அதாவது, பித்தத்தினுடைய தொடர்பில்லாமல் எரிச்சல் ஏற்படுவதில்லை என்று அதற்கு அர்த்தம் கூறலாம். அத்தனை சூடான ஒரு பொருளை செரிமானத்திற்கான வயிற்றுப் பகுதியில், இயற்கை ஏற்படுத்திக் கொடுத்திருக்கிறது. அறுசுவைகளில் காரம் - புளி - உப்புச் சுவையாகிய மூன்றும், பித்தத்தினுடைய சூட்டை குறைத்துவிடாமல் பார்த்துக் கொள்ளும் திறனுடையவை. இவையே சற்று அதிக அளவில் நாம் உணவில் எடுத்துக் கொண்டால், பித்தத்தினுடைய நீர்த்த குணமானது, தன் இடம் விட்டுப்பெயர்ந்து, பிற இடங்களுக்கு சுற்றுலா சென்று வரப் புறப்பட்டுவிட்டால், நீங்கள் குறிப்பிடுவது போன்ற எரிச்சல் உடலில் ஆங்காங்கே தென்படத் தொடங்கும். உடலெங்கும் பரவியிருக்கும் நரம்பு மண்டலங்களில், வாயுவினுடைய ஆட்சி நடப்பதால், அங்குவந்து சேரும் பித்தமானது, வாயுவுடன் கலந்துவிட்டால், கூச்சம், உளைச்சல் போன்ற உபாதைகளும் தலைதூக்கிவிடும். அதனால், உங்களுடைய உடலில், பித்த - வாயுக்களுடைய சீற்றமானது அதிகரித்திருக்கிறது என்பது தெளிவாகப் புரிகிறது.
மேற்குறிப்பிட்ட மூன்று சுவைகளுக்கு எதிரான இனிப்பு - கசப்பு - துவர்ப்புச் சுவைகளை உணவில் அதிகப்படுத்தினால், எரிச்சலானது மட்டுப்படும். இனிப்புச் சுவை பொதுவாகவே, பித்த - வாயுக்களுக்கு எதிரானவை. தங்களுடைய நீண்டதொரு கடிதத்தில், சர்க்கரையின் சுவை ரத்தத்தில் வெறும் வயிற்றில் 121 மிக அளவில் இருப்பதால், ஆயுர்வேத மருந்து எடுத்துக் கொள்வதாகவும், இனிப்பை அறவே நீக்கியுள்ளதாகவும் குறிப்பிட்டுள்ளீர்கள். கசப்பு, துவர்ப்புச் சுவையினால், பித்த எரிச்சல் மட்டுப்பட்டாலும் வாயுவிற்கு அவை அனுகூலமானவை.
மேற்கூறிய காரிய காரணங்களை அலசிப் பார்த்தால், இந்த இரு தோஷங்களில் எது அதிக அளவில் ஆதிக்கம் செலுத்துகிறது என்று ஆராய்ந்து பார்த்தால், பித்தம், வாயுவை விட, ஒரு படி மேலே நிற்பதாகத் தோன்றுகிறது. அதனால், நீங்கள் உணவில் கசப்புச் சுவையுள்ள மணத்தக்காளிக் கீரை, பொன்னாங்கண்ணிக் கீரை, வெந்தயக் கீரை, பாகற்காய், துவர்ப்புச் சுவையுடைய கோவைக்காய், வாழைப்பூ, வாழைத்தண்டு, சுண்டைக்காய் போன்றவற்றை அதிகம் சேர்த்துக் கொள்ளவும். பித்தத்தினுடைய சீற்றம் உடலெங்கும் பரவியிருப்பதால், அதை குடலுக்குக் கொண்டு வந்த பின்னர், பேதி மூலம் அறவே நீக்க வேண்டும். அதற்கு, மேற்குறிப்பிட்ட சுவைகள் உதவினாலும், தலைக்குச் சந்தனாதி தைலம், ஹிமஸôகர தைலம், அமிருதாதி தைலம் போன்ற ஆயுர்வேத தைலங்களில் ஒன்றை, மருத்துவர் ஆலோசனைப்படி, தேய்த்துக் குளித்து வர வேண்டும். சுமார் 7 முதல் 10 நாட்களுக்குள், பித்தம் தன் சுற்றுலா சென்ற இடங்களைவிட்டு, நெகிழ்ந்து வெளியேறி குடலில் வந்து தஞ்சமடைந்துவிடும். ஆனால், இது தூய நிலையிலுள்ள பித்தமாக நாம் கருத முடியாது, பல இடங்களுக்கு சென்று வந்த கார், எப்படிப் புழுதிபடிந்த நிலையிலிருக்குமோ, அது போன்ற இந்தப் பித்தத்தை, சுத்தப்படுத்துவதைவிட, வெளியே அனுப்பிவிடுவதே சாலச் சிறந்தது. அதற்கு திரிவிருத் லேஹ்யம், அவிபத்தி சூரணம் உதவிடக் கூடியவை. காலையில் குடித்த கஞ்சி செரித்து, மதியம் பசி வந்துள்ள நிலையில், லேஹ்ய மருந்தானால் 20 - 25 கிராம் அளவில் நக்கிச் சாப்பிட்டு, ஓர் இடத்திலும் அமராமல் நடப்பதும், வெந்நீர் அருந்துவதும், உள்ளங்கைகளைத் தேய்த்துச் சூடாக்கி, வயிற்றில் வைத்துக் கொள்வதுமாகச் செய்தால், பித்தம் பேதி மூலமாக வெளியேறிவிடும். இதனால் பசி மந்தமாகிவிடக் கூடிய ஆபத்திருப்பதால், அன்றைய தினம் மிளகு, சீரகம், பூண்டு போட்ட சூடான ரசம், புழுங்கலரிசிச் சாதம், கத்தரிக்காய்க் கூட்டு, சுட்ட அப்பளம், மோர் சாதம், நார்த்தங்காய் வத்தல் என்ற வகையில் சாப்பிட வேண்டும். இரவில் எப்போதும் போல, நீங்கள் சாப்பிடும் உணவையே சாப்பிடலாம்.
பித்த வாயுக்களை மட்டுப்படுத்தும் விதார்யாதி கசாயத்தை, 15 மி.லி. எடுத்து, 60 மி.லி. சூடான பால் கலந்து ஒரு கேப்ஸ்யூல் அப்ரக பஸ்மத்துடன் காலை, மாலை வெறும் வயிற்றில் சாப்பிட உகந்தது.
(தொடரும்)

பேராசிரியர் எஸ். சுவாமிநாதன்,
ஸ்ரீஜயேந்திர சரஸ்வதி ஆயுர்வேதக் கல்லூரி, 
நசரத்பேட்டை - 600 123 (பூந்தமல்லி அருகே) 
செல் : 94444 41771


 

]]>
https://www.dinamani.com/weekly-supplements/dinamani-kathir/2018/nov/25/பித்த-வாயுக்களை-மட்டுப்படுத்த-ஆயுள்-காக்கும்-ஆயுர்வேதம்-3045669.html
3045667 வார இதழ்கள் தினமணி கதிர் மிட்டாய் DIN DIN Sunday, November 25, 2018 12:26 PM +0530 பொள்ளாச்சியில் கச்சேரி ஆபிஸ். எப்பவுமே ஒரு களையா இருக்கும். அதுவும் முகூர்த்த நாள்ல ஊரே அங்க வந்து நெறஞ்ச மாதிரி இருக்கும். சுத்தியும் கல்யாண மண்டபங்கள், மூணு சினிமா தியேட்டர்கள், மாகாளி அம்மன் கோயில், ஸ்டேட் பேங்க், பின்னால பஸ் ஸ்டாண்ட். பரபரன்னு இருக்கும். பிரெட்டி ஹவுஸ் பேக்கரி, அசோக் பிரியாணி ஹோட்டல், கவிதா ஹோட்டல் எல்லாம் கச்சேரி ஆபிஸ்க்கு எதுக்கால இருந்துச்சு. அதுக்குப் பக்கத்துல தான் ஜனனி ஜெராக்ஸ் இருந்துச்சு.
இன்ஜினியரிங் படிக்கும்போது செமஸ்டர் லீவுகள்ள ஜனனி அக்கா கடையிலே வேல செஞ்சுகிட்டு இருந்தேன். ரெண்டு ஜெராக்ஸ் மிஷின், பத்திரம் டைப் செய்ய கம்ப்யூட்டர், ஒரு பிரிண்டர், சின்ன பாஸ்போர்ட் போட்டோ ஸ்டுடியோ, போன் பூத் எல்லாமே அதுல அடக்கம். சில நாள் வேலை ஜாஸ்தியா இருக்கும். பல நாள் பெருசா வேலை எதுவும் இருக்காது.
கார்த்திகை மாச முகூர்த்த நாள். காலைல நச நசன்னு மழை.தலைக்கு நெறய எண்ணெய் வச்சு, கோகுல் பவுடர் பூசி, எண்ணெய்ல கொழச்ச பவுடரையே நெத்திக்கும் விபூதியா வெச்சுட்டு போய் இருந்தேன். மயில்சாமி சார் சொல்லி அனுப்பிச்சதா ஜனனி அக்காகிட்ட போய் நின்னேன்... அக்கா கையில ஜே கே யோட "பாரிசுக்கு போ நாவல்'.
""வாப்பா... சாரங்கா''ன்னு சிரிச்சிகிட்டே அவங்க கையிலே இருந்த மிட்டாய்ல ஒன்னு குடுத்தாங்க.
"அக்கா. எம் பேரு தமிழ்''ன்னு கொஞ்சம் கூச்சமா சொன்னேன்.
"அதுனால என்ன? எங்களுக்கு நீ சாரங்கனா இருந்துக்கோ.இல்ல சாரல்''ன்னு சிரிச்சிகிட்டே இன்னும் ரெண்டு மிட்டாய் குடுத்தாங்க. எந்த புதுச் சூழலும் ஒரு சின்ன புழுக்கம் மாதிரி. அப்ப யாராவது வந்து சடார்னு சன்னலை தெறந்து வெக்கற மாதிரி இருந்துச்சு அக்காவோட சிரிப்பும். அந்த ஆரஞ்சு மிட்டாயும்.
"இது சாரல். எல்லா வேலையும் பாத்தே பழகிக்கலாம். எதுவும் சிரமம் இல்ல. சாரல் இவரைப் பாத்துக்கோம்மா''
வெகு இயல்பாய் தன்னைத் தன் புது மனிதர்களிடம் கரைத்துக்கொள்வது ஒரு சிலருக்கு மட்டுமே சாத்தியப்படுகிறது. அத்தகு கரைதல் ஒரு மெல்லிய மணத்தோடும் நிகழ்ந்ததாய் இன்னும் நம்மில் நிகழ்வதாய் எவ்வளவோ முறை மனதில் உணர்ந்திருக்கிறேன்.
சாரல்...பழுத்த சீனிப் புளியங்காய் மாதிரி. நீல வண்ணக் கறுப்பு. களையான முகம்.வெச்சிருந்த செண்பக பூ வாசம். கையில கர்ச்சீப்.
""செரிக்கா''ன்னு சொல்லிட்டு...
""நான் சாரல். ஊரு வத்திராயிப்பு.நாலு மாசமா இங்கன அக்கா கடையிலே வேல செய்யறேன். நீங்க?'' என்றாள்.
அதற்குள், "அக்கா... டீ'' ன்னு வந்த பையன், வெச்சுட்டு ஓடிட்டான்.
என் அறிமுகம் அப்போது அங்கு தேவையில்லாமல் போனது.
"அச்சச்சோ... ரெண்டு பப்ஸ் தானா. பரவால்லே. நீங்க பாதி எடுத்துக்கோங்க'' என்று பிச்சு கொடுக்க,
""சாரல்... என்னுதுலேர்ந்து பாதி எடுத்துக்கோடி''ஜனனி அக்கா குரல் கேட்டதும், சிரிச்சிகிட்டே "இந்த முழுச நீங்க எடுத்துக்கோங்க'' என்று சாரல் மாற்றிக் கொடுத்தாள்.
"அக்கா... வக்கீல் ஆபிஸ்க்கு போயிட்டு வந்துடுறேன். இதுல இருந்துக்கோங்க'' என் இருக்கையைக் காட்டிக்கொடுத்தாள். ""நான் இப்ப வந்துடறேன்'' என்று கிளம்ப, ஜனனி அக்கா, "இருடி நானும் வர்றேன்.பஸ் ஸ்டாண்டிலே விட்டுட்டு போயிடு. தமிழ் கடைய பாத்துக்கோப்பா. யாராவது டாக்குமெண்ட்ஸ் கொண்டு வந்து குடுத்தா யாருன்னு கேட்டுட்டு வாங்கி வெச்சிடு. சாரல் இன்னுங் கொஞ்ச நேரத்துல வந்துடுவா... உடனே வேணும்னா பக்கத்துல பாத்துக்க சொல்லு.ரெண்டு நாள்ல நீயும் பழகிப்ப''ன்னு சொல்லிக் கிட்டே கேசட்டை திருப்பி போட்டுவிட்டு கிளம்பிட்டாங்க.
"ஒரு கிளி உருகுது. உரிமையில் பழகுது. ஒ மைனா மைனா'ன்னு ஜானகியும் ஷைலஜாவும் சிறகுகளை விரித்து சிரித்து நிரம்பி வழிந்தார்கள். டி வி எஸ் 50 யை ஸ்டார்ட் செய்து கொண்டே , "தமிழ்... லெண்டிங் லைப்ரரி பையன் வருவான். செயமோகன் புக்ஸ் கேட்டிருந்தேன்.கேட்டு வாங்கி வெக்கிரிகளா.ப்ளீஸ்'' என்று சாரலும் ஜனனி அக்காவும் கிளம்பி சென்றனர். இதுவரை இருந்திராத அந்த புது சூழலில் அவ்வளவு நெருக்கமா உணர்ந்து இருந்தேன். வெளில மழைக் காத்து.
"தங்கச் சங்கிலி... மின்னும் பைங்கிளி... தானே கொஞ்சியதோ' ன்னு இளையராஜா எனக்கு மட்டும் வாசிக்க ஆரம்பித்திருந்தார்.
மொத்தம் அஞ்சு செமஸ்டர் லீவ்ல அக்கா கடைல வேல செஞ்சேன்.சம்பளம்னு எதுவும் கிடையாது. லீவு முடிஞ்சு போகும் போது அக்கா கொடுக்கறது உக்கடம் பழைய மார்க்கெட்ல அடுத்த செமஸ்டர் புக்ஸ் வாங்கறதுக்கும், காந்திபுரம் சண்டே மார்க்கெட்ல நாலஞ்சு சர்ட் வாங்கவும் சரியா இருக்கும். அக்காவுக்கும் படிக்கிற பையனுக்கு ஏதோ தன்னால முடிஞ்சதுங்கிற எண்ணம் . அவ்வளவுதான். உண்மைய சொன்னா அக்கா கடைல வேல பாக்குற சந்தோசத்துக்காகவே எந்த இன்டெர்ன்ஷிப்க்கும் முயற்சி பண்ணதே இல்லை.
கெரயம் நெறய இருக்கறப்ப வேலை நெறய இருக்கும். பவர் கட் இருந்தா ஷட்டரை கொஞ்சம் இறக்கி விட்டுட்டு முழுக்க ஒரே அரட்டை தான். வேலை நெறய இருந்தா ராத்திரி ஒன்னு ரெண்டு நாள் நான் கடையில படுத்துக்குவேன். சாரல் அக்கா வீட்ல தான் தங்கி இருந்துச்சு. பெரிய கெரயம் இருக்கிற அன்னிக்கு அசோக் ஹோட்டல்ல இருந்து சாப்பாடு வந்துடும். பத்திரம் கெரயம் பண்றவங்களே பாத்துக்குவாங்க. அன்னிக்கு நல்ல சாப்பாடு. சாரல்... ஜனனி அக்காவிடம், "அக்கா... செயமோகன், சோத்துக்கணக்குல சொல்ற தெகெல் சாகிப், அசோக் ஹோட்டல் மாப்பிள்ள மாஸ்டரை விடவா ருசியா கோழிக்கொழம்பு வெச்சிருப்பாரு. கொடல் வறுவல் திங்கப்ப. மாப்பிள்ள மாஸ்டர் சமைச்சு, அவரு பிள்ளைங்களுக்கு எப்படி ஊட்டி விட்டுருப்பார்னு தோணுதுக்கா. எங்கப்பா தலக்கறி ஊட்டுனது மாறி இருக்கலாம்னு நெனக்கேன். உங்களுக்கு தமிழ்?'' என என்னிடம் நிறுத்திய பொழுது, "இந்துமதிக்கு கோழிக்குழம்பு ரொம்ப பிடிக்கும்''ன்னு நான் இந்துமதியை அறிமுகப்படுத்தி வைக்க நினைத்தேன். அதற்குள் அக்கா, ""ஜெயமோகன் சோத்துக்கணக்குல சொல்ற அறம், ஒரு தராசின் முள் நல்லதப் பாத்து சாயற மாதிரின்னு சொன்னா, அந்த அறத்துக்கும் ஒரு கனம் இருக்கணும். ஒரு தட்டுல நல்லதும். இன்னொரு தட்டுல கெட்டதும்... நல்லது கூடக் கூட... கெட்டத மிஞ்சி... அறம் நான் ஜெயிச்சேன்னு சிரிச்சிட்டு போகும். ஆனா... வாழ்க்கைல ஒவ்வொருத்தருக்கும் எது நல்லதா, எது கெட்டதாப் படுதுங்கறதுலதான் அவ்வளவு வித்தியாசம். அந்த அறத்தின் கனம் எல்லாருக்கும் எல்லா நேரத்துலேயும் ஒரே மாதிரி இருக்கிறதும் இல்ல. இருந்தா நல்லாத்தான் இருக்கும். இல்லையா? ன்னு கை கழுவப் போனாங்க.
"அக்கா சொன்னதும் செம காரம். கோழிக்கொழம்பு செம டேஸ்ட்... இல்லீங்களா தமிழ்?'' என்றவாறே சாரல் ஆளுக்கொரு ஆரஞ்சு மிட்டாயை கொடுத்துக் கொண்டு... "தமிழ்... உங்களுக்கு ஆரஞ்சு மிட்டாய் புடிக்குமா?'' என்று கேட்க... எங்கள் நட்பில் நான் கொஞ்சம் நிரம்பப் பேசிய முதல் தருணம் அது.
ஏழாம் வகுப்பு படிக்கும் போது, ராஜமாணிக்கம் வாத்தியார் வகுப்பில் சுதந்திர தினத்துக்கு மிட்டாய் வாங்கறதுக்கு ஆள் தேடிக்கிட்டு இருந்தார். எங்க அப்பாவை அவருக்கு நல்லா தெரியும்.
"என்னடா... மவனே... நீயும் அரை கிலோ ஆரஞ்சு மிட்டாய் கொண்டு வந்திரு. உங்கப்பா கொஞ்சூண்டு தங்கம் எடுத்தா நம்ம ஸ்கூலுக்கே மிட்டாய் குடுக்கலாம்டா'' ஏதோ உரிமையில் சொல்ல... பசங்க எல்லாரும் சத்தமா கிண்டல் பண்ணி சிரிச்சாங்க. எனக்கு பயங்கர கோவம், வாத்தியார் மேல. எங்கப்பாகிட்ட நச்சு பண்ணி அவரோட அவ்வளவு கஷ்டத்துலேயும் மிட்டாய் வாங்கிட்டுப் போய் குடுத்தேன். ஆனா குடுக்கும் போது, ""சார்... எல்லா தொழில்லேயும் ஒரு நேர்மையும் கஷ்டமும் இருக்குது. அந்த நேர்மையைத் திருடி ஊருக்கே மிட்டாய் குடுக்கறதுல எந்த பெருமையும் இல்ல சார்'' னு சொல்லிட்டு...
""சுதந்திர தினத்திற்கு நான் வர மாட்டேன் சார்''னும் சொல்லிட்டு வந்திட்டேன். "அவரு கொஞ்சம் கோவக்காரரு.அறைஞ்சா செவுளு பிஞ்சிரும்'' ஆனா எங்கப்பாவோட வலியை நான் உண்மையா சொன்னது அவருக்கு வலிச்சிருக்கணும். ஒன்னும் சொல்லலை. அமைதியா இருந்திட்டாரு. அதே ராஜமாணிக்கம் வாத்தியார் தான் எங்களுக்கு பத்தாம் வகுப்பிலே நீதி போதனை வகுப்புக்கு வருவாரு. ஒரு நாள் என்ன நெனச்சாரோ... என்னிடம் "தமிழ்... மறந்துர்ரா.அன்னிக்கு புத்தி இல்லாம சொல்லிட்டேன்''னாரு... அதிலிருந்து எனக்கு ஆரஞ்சு மிட்டாய் ரொம்ப பிடிக்கும்''னேன்.
சாரல் சிரித்துக்கொண்டே, "தமிழ்... என்ன கோவம் உனக்கு. எங்க ஊருல ஆரஞ்சு மிட்டாய்க்கு கொஞ்சூண்டு உப்பு போடுவாக. அதான் மொதல்ல கரிச்சிருக்கு பொறவு உனக்கு இனிச்சிருக்கு'' என்றபடி பாத்திரங்களை கழுவச்சென்றாள்.
நான் என் கல்லூரி இறுதி ஆண்டில் இருந்தேன். இந்துமதியை இன்னும் தீவிரமாகக் காதலித்துக் கொண்டிருந்தேன்.ராஜேஷ்குமார் வார்த்தைகளில் சொல்வதானால் நுரைக்க காதலில் இருந்தோம். இந்துமதியின் அப்பாவுக்கு சர்க்கரை பேக்டரியில் பெரிய வேலை. செமஸ்டர் லீவுகளில் அக்கா கடையில் இருந்த பூத்தில் இருந்து இந்துமதியின் வீட்டுக்கு கூப்பிட்டு அவ்வளவு பேசி, அவ்வளவு சிரித்து, அவ்வளவு சண்டைகள் போட்டிருக்கிறோம். "சின்னக் கண்ணன் அழைக்கிறான்... ராதையை... பூங்கோதையை... அவள்...'' பால முரளி கிருஷ்ணாவும், இளையராஜாவும் தேனில் குழைத்து இழைத்த ஒரு மழைப் பொழுதில் என் இந்துமதியை சாரலுக்கு போனில் அறிமுகம் செய்து வைத்தேன். பிறகு இந்துமதி என்னிடம் சொன்னது " நான் அவங்கள கட்டாயம் பார்க்கணும்''
ஆனால் அவர்கள் சந்திக்கும் வாய்ப்பு வாய்க்கவே இல்லை.
எனக்கும் இந்துமதிக்கும் கேம்பஸ்ல வேல கிடைச்சது. இறுதி ஆண்டில் தளும்பி வழிந்து பெரும் காதலில் இருந்தோம். ஒரு நாள்... சாரல் பன்னிரண்டு கைக்குட்டைகள் "தமிழ்மதி' என்று எல்லாவற்றிலும் மிக அழகாக எம்பிராய்டரி செய்து... "தமிழுக்காக என்றும் வளரும் தமிழ்மதி...'' என்று சிரித்துக்கொண்டே கொடுத்தாள். ஏனோ நான் அதை இந்துமதியிடம் குடுக்கவே இல்ல.
காலேஜ் முடிஞ்சு நான் ஹைதராபாத்துக்கும் இந்துமதி பெங்களூருக்கும் சென்று வேலையில் சேர்ந்தோம். ஓரிரண்டு ஆண்டுகளில் எப்போதாவது போன் செய்து ஜனனி அக்காவுடனும் சாரலுடனும் பேசுவதுண்டு.அதுவும் நாள் பட நின்று போனது. தள்ளி இருந்த பிரிவு. வேலையின் அழுத்தம். தனக்கான வாழ்வின் பிரதான தேடல்கள்... தோள்களின் சுமையில் கனவுகள் விலகி, எங்கள் காதலிலும் சிறு ஊடல்கள்... அவ்வப்பொழுது வந்து போயின. வண்ணங்களும் காற்றும் நிரம்பிய பலூன் எவர் கை படாமலும் ஏதோ ஓர் அழுத்தப்புள்ளியில் வெடித