ஹைதராபாத்- கர்நாடகப் பகுதி வளர்ச்சி வாரியம்: ஆளுநர் ஒப்புதல்

ஹைதராபாத்- கர்நாடகப் பகுதி வளர்ச்சி வாரியம் அமைக்க கர்நாடக ஆளுநர் எச்.ஆர்.பரத்வாஜ் ஒப்புதல் அளித்துள்ளார்.
 இதுதொடர்பாக கர்நாடக ஊரக வளர்ச்சி மற்றும் பஞ்சாயத்துராஜ் துறை அமைச்சர் எச்.கே.பாட்டீல் பெங்களூருவில் புதன்கிழமை செய்தியாளர்களிடம் கூறியது:
 ஹைதராபாத்- கர்நாடக பகுதிக்கு சிறப்பு அந்தஸ்து வழங்குவதற்கான அரசியலமைப்புச் சட்டப் பிரிவு 371-ஐ மத்திய அரசு திருத்தியமைத்துள்ளது. இதையடுத்து, ஹைதராபாத்- கர்நாடக பகுதி வளர்ச்சி வாரியம் அமைக்க ஆளுநர் எச்.ஆர்.பரத்வாஜ் செவ்வாய்க்கிழமை ஒப்புதல் அளித்து, அறிவிக்கையையும் வெளியிட்டார்.
 இதன்மூலம், மத்திய அரசு கொண்டு வந்த சட்டத் திருத்தம் அமலுக்கு வந்துள்ளது.
 இதனால், அந்தப் பகுதியில் நிறுத்திவைக்கப்பட்டிருந்த பல்வேறு துறைகளின் பணி நியமனங்கள் தொடங்கப்படும். வளர்ச்சி ஆணையம் அமைந்தவுடன், அடுத்த 10 ஆண்டுகளில் இந்தப் பகுதி கல்வி, சமூக கட்டமைப்பில் முன்னேற்றம் அடையும்.
 ஹைதராபாத்- கர்நாடக பகுதியில் அமைந்துள்ள அனைத்து கல்வி நிறுவனங்களிலும் இந்தப் பகுதியைச் சேர்ந்தவர்களுக்கு 70 சதம் இடம் ஒதுக்கப்படும்.
 இதேபோல, வேலைவாய்ப்பிலும் இட ஒதுக்கீடு அளிக்கப்படும். வேலைவாய்ப்பில் "ஏ' பிரிவில் 75 சதமும், "பி' பிரிவில் 75 சதமும், "சி' பிரிவில் 80 சதமும், "டி' பிரிவில் 85 சதமும் இட ஒதுக்கீடு அளிக்கப்படும். இதுதவிர, மாநில அளவிலான உயர் பதவிகளில் 8 சத இட ஒதுக்கீடும் கிடைக்கும். ஹைதராபாத்- கர்நாடக பகுதி வளர்ச்சி வாரியத்தின் தலைவராக ஆளுநர் செயல்படுவார். உறுப்பினர்களாக அந்தப் பகுதி எம்எல்ஏ, எம்பிக்கள் செயல்படுவர். முதல்வர் சித்தராமையாவுடன் ஆலோசித்து வளர்ச்சித் திட்டங்கள் செயல்படுத்தப்படும் என்றார் அவர்.