கரும்புக்கு ஆதரவு விலையை அரசு உயர்த்த வேண்டும்: முன்னாள் முதல்வர் சதானந்தகௌடா

கரும்புக்கான ஆதரவு விலையை அரசு உடனடியாக உயர்த்த வேண்டும் என்று முன்னாள் முதல்வர் சதானந்தகௌடா தெரிவித்தார்.

பெல்காம் சட்டமேலவையில் செவ்வாய்க்கிழமை கரும்புகான ஆதரவு விலையை உயர்த்துவது தொடர்பான விவாதத்தில் கலந்து கொண்டு அவர் பேசியது: டன் கரும்புக்கு அரசு ரூ. 2500 ஆதரவு விலையை நிர்ணயித்துள்ளது. கரும்பு விளைவிப்பத்தில் விவசாயிகள் பல்வேறு பிரச்னைகளை சந்தித்து வருகின்றனர். தற்போது நிர்ணயிக்கப்பட்டுள்ள இந்த விலை ஒருபோதும் அவர்களுக்கு போதுமானதாக இருக்காது. எனவே அரசு கரும்புக்கு ஆதரவு விலையை உயர்த்தித் தரவேண்டும். ஒவ்வொரு ஆண்டும் கரும்புக்கான ஆதரவு விலையை நிர்ணயிப்பதில் அரசுக்கும், விவசாயிகளுக்கு பிரச்னைகள் ஏற்பட்டு வருகின்றது. இதனை கருத்தில் கொண்டு அரசு விவசாயிகளுக்கு சமாதானம் ஆகும் வகையில் ஆதரவு விலையை உயர்த்த வேண்டும். கரும்பு விளைச்சலுக்கான செலவைவிட, ஆதரவு விலை குறைவாக நிர்ணயித்து இருப்பதால் விவசாயிகளுக்கு எந்த பலனும் இல்லை. கரும்பு மற்றும் சக்கரை உற்பத்தியால் அரசுக்கு ஆண்டுக்கு ரூ. 13 ஆயிரம் கோடி வருவாய் கிடைத்து வருகிறது. இதனை கருத்தில் கொண்டு ஆதரவு விலையை உயர்த்த வேண்டும் என்றார் அவர்.