Enable Javscript for better performance
கர்நாடகத்தில் மாநிலங்களவைத் தேர்தல்: 3 காங்கிரஸ், 1 பாஜக உறுப்பினர் வெற்றி; மஜத தேர்தல் புறக்கணிப்பு- Dinamani

சுடச்சுட

    

    கர்நாடகத்தில் மாநிலங்களவைத் தேர்தல்: 3 காங்கிரஸ், 1 பாஜக உறுப்பினர் வெற்றி; மஜத தேர்தல் புறக்கணிப்பு

    By DIN  |   Published on : 24th March 2018 05:38 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    கர்நாடகத்திலிருந்து 4 மாநிலங்களவை உறுப்பினர்களுக்கான தேர்தலில் காங்கிரஸ் 3 இடங்களையும், பாஜக ஒரு இடத்தையும் கைப்பற்றியுள்ளது. மஜத எம்எல்ஏக்கள் தேர்தலைப் புறக்கணித்து வாக்களிக்காமல் வெளியேறினர்.
    மாநிலங்களவையில் உறுப்பினர்களாக உள்ள கர்நாடகத்தைச் சேர்ந்த பசவராஜ் பாட்டீல், ரகுமான்கான், ஆர்.ராமகிருஷ்ணா (மூன்று பேரும் காங்கிரஸ்), ராஜீவ் சந்திரசேகர் (பாஜக ஆதரவு சுயேச்சை) ஆகிய நான்கு பேரின் பதவிக்காலம் ஏப்.2-ஆம் தேதியுடன் நிறைவடைகிறது.
    இதனால் காலியாகும் 4 இடங்களுக்கு வெள்ளிக்கிழமை தேர்தல் நடைபெற்றது.இதில் காங்கிரஸ், பாஜக, மஜத ஆகிய கட்சிகள் 5 பேரை களத்தில் இறக்கியுள்ளன. காங்கிரஸ் வேட்பாளர்களாக எல்.ஹனுமந்தையா, நசீர் ஹுசேன், ஜி.சி.சந்திரசேகர் ஆகிய மூன்று பேரும், பாஜக வேட்பாளராக ராஜீவ் சந்திரசேகரும், மஜத வேட்பாளராக பி.எம்.ஃபாரூக்கும் போட்டியிட்டனர்.
    வாக்குப்பதிவில் குளறுபடி
    பெங்களூரு விதான செளதா வளாகத்தில் காலை 9 மணிக்கு வாக்குப்பதிவு தொடங்கியது. முதல்வர் சித்தராமையா, அமைச்சர்கள் கே.ஜே.ஜார்ஜ், ராமலிங்கரெட்டி, எதிர்க்கட்சித் தலைவர் ஜெகதீஷ் ஷெட்டர், துணைத் தலைவர் ஆர்.அசோக், மஜத சட்டப்பேரவைக்குழுத் தலைவர் எச்.டி.குமாரசாமி, ஒய்.எஸ்.வி.தத்தா உள்ளிட்டோர் வாக்களித்தனர்.
    இந்நிலையில், வருவாய்த் துறை அமைச்சர் காகோடு திம்மப்பா, காங்கிரஸ் எம்எல்ஏ பாபுராவ் சின்சுன்சூர் ஆகியோர் முன்னுரிமை அடிப்படையில் வாக்களிப்பதற்குப் பதிலாக, தனக்கு விருப்பமான வேட்பாளரின் பெயருக்கு எதிராக 'டிக்' குறியிட்டுவிட்டனர்.
    இதை காங்கிரஸ் முகவர் போஸ்ராஜ் கவனித்துக் கூற, இருவரும் தேர்தல் அதிகாரியிடம் மாற்று வாக்குச்சீட்டு கேட்டனர். இதற்கு இணங்கிய தேர்தல் அதிகாரி, இருவருக்கும் மாற்று வாக்குச்சீட்டை அளித்தார். இதைத் தொடர்ந்து இருவரும் வாக்களித்தனர். இதை கவனித்த மஜத முகவர் எச்.டி.ரேவண்ணா, தேர்தல் விதிமுறைகளை மீறி மாற்று வாக்குச்சீட்டு பெற்று இருவரும் வாக்களித்ததை கடுமையாக எதிர்த்தார். மஜத சட்டப்பேரவைக் குழுத் தலைவர் குமாரசாமி தலைமையில் மஜத எம்எல்ஏக்கள் வாக்குச்சாவடியில் தர்னாவில் ஈடுபட்டனர்.
    இதுகுறித்து மஜத வேட்பாளர்பி.எம்.ஃபாரூக் தேர்தல் ஆணையத்திடம் புகார் அளித்தார். தேர்தல் விதிமுறைகளை மீறி வாக்களித்துள்ளதால், தேர்தலை ரத்து செய்யக் கோரி தனது புகார் மனுவில் அவர் கேட்டுக் கொண்டார்.
    தேர்தல் குளறுபடி காரணமாக, வாக்குப்பதிவு 2 மணி நேரம் நிறுத்திவைக்கப்பட்டிருந்தது. மஜத வேட்பாளர் ஃபாரூக்கின் புகாரின் பேரில் தேர்தல் அதிகாரி மூர்த்தியை உடனடியாக மாற்றிய தேர்தல் ஆணையம், வாக்குப்பதிவைத் தொடர அனுமதி அளித்தது. இதைத் தொடர்ந்து வாக்குப்பதிவு நடைபெற்றது.
    மஜத புறக்கணிப்பு
    இதனிடையே, தேர்தல் விதிமீறல்களைக் கண்டித்து மஜத எம்எல்ஏக்கள் வாக்குப்பதிவைப் புறக்கணிக்க முடிவு செய்தனர். இதுகுறித்து குமாரசாமி கூறுகையில், 'தேர்தல் விதிகள் அதிகாரிகளால் மீறப்பட்டுள்ளன. ஒருசில காங்கிரஸ் எம்எல்ஏக்களுக்கு இருமுறை வாக்களிக்கும் வாய்ப்பை ஆளும் காங்கிரஸ் அரசு செய்து கொடுத்துள்ளது. தேர்தல் அதிகாரிகள், மாநில அரசின் முகவர்களை போல செயல்பட்டனர்' என்றார்.
    இதற்குப் பதிலளித்த காங்கிரஸ் தலைவர்கள், தேர்தலில் வெற்றி பெற போதுமான எண்ணிக்கையில் எம்எல்ஏக்கள் இல்லாததால், மஜதவினர் குற்றம்சாட்டுகின்றனர் என்றனர்.
    இதனிடையே, வாக்குப்பதிவு மாலை 4 மணிக்கு நிறைவடைந்தது. மஜத எம்எல்ஏக்களின் தேர்தல் புறக்கணிப்பைத் தொடர்ந்து, 224 எம்.எல்.ஏ.க்களில் 188 பேர் மட்டும் வாக்களித்தனர்.
    வாக்கு எண்ணிக்கை தாமதம்
    தேர்தலை ரத்து செய்யுமாறு மஜத கோரிக்கை விடுத்திருந்த நிலையில், வாக்கு எண்ணிக்கையில் ஈடுபடுவது குறித்து தில்லியில் உள்ள தேர்தல் ஆணையத்தின் வழிகாட்டுதலுக்காக மாநில தேர்தல் அதிகாரிகள் காத்திருந்தனர்.
    இதனால் மாலை 4 மணிக்கு தொடங்க வேண்டிய வாக்கு எண்ணிக்கை 3 மணி நேரம் தாமதமானது. தேர்தல் ஆணையம் அனுமதி அளித்ததன் பேரில் இரவு 7.45 மணி அளவில் வாக்கு எண்ணிக்கை தொடங்கி,நடைபெற்றது.
    காங்கிரஸ், பாஜக வெற்றி
    மாநிலங்களவை தேர்தலில் 3 காங்கிரஸ் வேட்பாளர்கள் எல்.ஹனுமந்தையா, நசீர் ஹுசேன், ஜி.சி.சந்திரசேகர், பாஜக வேட்பாளர் ராஜீவ் சந்திரசேகர் வெற்றி பெற்றனர். மஜத சார்பில் போட்டியிட்ட வேட்பாளர் பி.எம்.ஃபாரூக் வாக்களிக்காமல் வெளியேறினார்.
    மொத்தம் 188 வாக்குகள் பதிவாகியிருந்தன. இதில் 4 வாக்குகள் செல்லாதவை என அறிவிக்கப்பட்டன. மேலும், மாற்று வாக்குச்சீட்டில் வாக்களித்த அமைச்சர் காகோடுதிம்மப்பா, பாபுராவ் சின்சுன்சூர்
    ஆகியோரின் இரு வாக்குகள் நிராகரிக்கப்பட்டன.
    இதைத் தொடர்ந்து, காங்கிரஸ் வேட்பாளர்களாக போட்டியிட்ட எல்.ஹனுமந்தையா 44 வாக்குகள், நசீர் ஹுசேன் 42 வாக்குகள், ஜி.சி.சந்திரசேகர் 46 வாக்குகள் பெற்று வெற்றி பெற்றுள்ளனர். அதேபோல, பாஜக வேட்பாளராகப் போட்டியிட்ட ராஜீவ்சந்திரசேகர் 50 வாக்குகள் பெற்றார்.
    மஜத வேட்பாளர் பி.எம்.ஃபாரூக் போதுமான வாக்குகள் பெறாததால், தோல்வி அடைந்தார். காங்கிரஸ் கட்சியின் 3-ஆவது வேட்பாளர் ஜி.சி.சந்திரசேகருக்கு ஆதரவாக மஜத அதிருப்தி எம்எல்ஏக்கள் 7 பேரும் வாக்களித்தது, அவரது வெற்றியை உறுதி செய்துள்ளது. கட்சியின் கொறடா உத்தரவையும் மீறி அவர்கள் 7 பேரும் காங்கிரஸ் வேட்பாளரை ஆதரித்துள்ளது குறிப்பிடத்தக்கது.
    இதைத் தொடர்ந்து, காங்கிரஸ் வேட்பாளர்களுக்கு முதல்வர் சித்தராமையா, காங்கிரஸ் மாநிலத்தலைவர் ஜி.பரமேஸ்வர் உள்ளிட்டோர் வாழ்த்து தெரிவித்தனர். மேலும் பாஜக வேட்பாளர் ராஜீவ்சந்திரசேகர், பாஜக மாநிலத்தலைவர் எடியூரப்பா உள்ளிட்டோரை சந்தித்து ஆசி பெற்றார்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai