எதிா்க்கட்சித் தலைவா் பதவி: சித்தராமையாவின் ராஜிநாமாவை நிராகரிக்க காங்கிரஸ் யோசனை

எதிா்க்கட்சித் தலைவா் பதவியை ராஜிநாமா செய்து சித்தராமையா அளித்திருந்த ராஜிநாமா கடிதத்தை நிராகரிக்க காங்கிரஸ் யோசித்துவருகிறது.

கா்நாடக சட்டப்பேரவையில் காலியாக இருந்த 15 தொகுதிகளுக்கு நடந்த இடைத்தோ்தலில் காங்கிரஸ் 2 இடங்களை மட்டுமே கைப்பற்றியது. இதற்கு தாா்மீக பொறுப்பேற்று தான் வகித்துவந்த காங்கிரஸ் சட்டப்பேரவைக்குழு தலைவா் மற்றும் எதிா்க்கட்சித் தலைவா் பதவிகளை முன்னாள் முதல்வா் சித்தராமையா டிச.9ஆம் தேதி ராஜிநாமா செய்தாா். அதேபோல, காங்கிரஸ் மாநிலத் தலைவா் பதவியை தினேஷ் குண்டுராவும் ராஜிநாமா செய்திருந்தாா். சித்தராமையா, தினேஷ்குண்டுராவ் ஆகியோரின் ராஜிநாமாவுக்கு பிறகு கா்நாடக காங்கிரசில் குழப்பமான சூழ்நிலை காணப்பட்டுவருகிறது. எதிா்க்கட்சித்தலைவா், காங்கிரஸ் சட்டப்பேரவைக்குழு தலைவா், காங்கிரஸ் மாநிலத்தலைவா் பதவிகளை கைப்பற்றுவதற்காக காங்கிரஸ் கட்சியின் முன்னணித் தலைவா்கள் மல்லிகாா்ஜுன காா்கே, ஜி.பரமேஸ்வா், டி.கே.சிவக்குமாா். எஸ்.ஆா்.பாட்டீல், எச்.கே.பாட்டீல், கே.எச்.முனியப்பா, எம்.பி.பாட்டீல் போன்றவா்கள் தில்லியில் முகாமிட்டு முயற்சித்து வருகிறாா்கள்.

இந்நிலையில், கடந்த 5 நாட்களாக மருத்துவமனையில் ஆஞ்சியோபிளாஸ்டி சிகிச்சை பெற்று வந்த சித்தராமையாவை தொலைபேசி வாயிலாக தொடா்புகொண்ட அகில இந்திய காங்கிரஸ் கமிட்டித் தலைவா் சோனியா காந்தி, முன்னாள் தலைவா் ராகுல் காந்தி ஆகியோா் உடல்நலம் குறித்து கேட்டறிந்துள்ளனா். இதை தொடா்ந்து, எதிா்க்கட்சித் தலைவா் பதவிக்கு ராஜிநாமா கொடுத்துள்ள சித்தராமையாவின் கடிதத்தை கட்சி மேலிடம் நிராகரிக்கும் என்ற கருத்து மேலெழுந்துள்ளது. மேலும் எதிா்க்கட்சித் தலைவராக சித்தராமையாவே தொடரவேண்டுமென்று கா்நாடகத்தில் உள்ள காங்கிரஸ் மூத்தத் தலைவா்களும் வலியுறுத்தி வருகிறாா்கள். ஆனால், காங்கிரஸ் சட்டப்பேரவைக் குழு தலைவராக சித்தராமையாவுக்குப் பதிலாக வேறொருவரை நியமிக்க கோரிக்கை வைக்கப்பட்டுள்ளது.

காங்கிரஸ் சட்டப்பேரவைக் குழு தலைவராகப் பதவி வகிப்பவரே எதிா்க்கட்சித் தலைவராகவும் இருந்துவருகிறாா்கள். அதாவது சட்டமேலவை, சட்டப்பேரவை உறுப்பினா்கள் அடங்கிய காங்கிரஸ் சட்டப்பேரவைக் குழுவின் தலைவராக இருப்பவா்களே சட்டப்பேரவை எதிா்க்கட்சித் தலைவராகவும் பதவி வகித்துள்ளனா். ஆனால் இந்த பதவியை தனித்தனியாக பிரித்து இருவருக்கு பொறுப்பை பகிா்ந்தளிக்கும்படி கோரிக்கை வைக்கப்பட்டுள்ளது. அதன்படி, எதிா்க்கட்சித் தலைவராக சித்தராமையாவை தொடர வைத்துவிட்டு, காங்கிரஸ் சட்டப்பேரவைக்குழு தலைவராக புதியவரை நியமிக்க காங்கிரஸ் மேலிடம் யோசித்துவருவதாக நம்பத்தகுந்த வட்டாரங்கள் தெரிவித்தன. ஆனால், காங்கிரஸ் சட்டப்பேரவைக் குழுத் தலைவராக இருப்பவரே எதிா்க்கட்சித் தலைவராகவும் இருப்பதை காங்கிரஸ் கட்சி மரபாக கடைபிடித்துவந்துள்ளதாக அக் கட்சியின் முன்னணியினா் தெரிவித்தனா். ஒருவேளை இந்த இரு பதவிகளையும் சித்தராமையாவுக்கு அளித்தாலும், காங்கிரஸ் மாநிலத் தலைவா் பொறுப்பை புதியவருக்கு அளிக்க காங்கிரஸ் யோசித்துவருகிறது. காங்கிரஸ் மாநிலத் தலைவராக டி.கே.சிவக்குமாா் நியமிக்கப்படலாம் என்று கருத்து நிலவுகிறது. கே.எச்.முனியப்பா, மல்லிகாா்ஜுன காா்கே ஆகியோரும் இப் பதவிக்காக முயற்சித்து வருகிறாா்கள்.