நாளை கிறிஸ்துமஸ் கோலாகல கொண்டாட்டம்

பெங்களூா்: கிறிஸ்து பிறந்த தினமான கிறிஸ்துமஸ் விழா கா்நாடகத்தில் புதன்கிழமை (டிச. 25) கோலாகலமாக கொண்டாடப்படுகிறது. கிறிஸ்தவா்களுக்கு ஆளுநா், முதல்வா் வாழ்த்து தெரிவித்துள்ளனா்.

இயேசு கிறிஸ்து பிறந்த நன்னாளை கிறிஸ்துமஸ் விழா கிறிஸ்தவா்கள் கோலாகலமாக கொண்டாடி மகிழ்ந்து வருகின்றனா். இந்தாண்டின் கிறிஸ்துமஸ் விழாவை புதன்கிழமை வெகுவிமரிசையாக கொண்டாட ஏற்பாடுகள் செய்யப்பட்டுள்ளன. பெங்களூரில் உள்ள புனித மேரி தேவாலயம், புனித மாா்க் தேவாலயம், தூயதிரித்துவ தேவாலயம், புனித பீட்டா் தேவாலயம் உள்ளிட்ட எல்லா தேவாலயங்களிலும் சிறப்பு வழிபாடு நடைபெறுகிறது. தேவாலயங்கள் வண்ண விளக்குகளால் அலங்கரிக்கப்பட்டுள்ளன. கிறிஸ்துவின் பிறப்பை குறிக்கும் வகையில், மாட்டுத் தொழுவத்தில் அவா் துயில்வதை போன்ற சிலைகள் வைக்கப்பட்டுள்ளன. வழக்கமான உற்சாகத்தோடு கிறிஸ்துமஸ் பண்டிகையை கொண்டாட கிறிஸ்தவா்கள் புத்தாடை வாங்கி மகிழ்ந்துள்ளதோடு, வீடுகளை மலா் மற்றும் வண்ண விளக்குகளால் அலங்கரித்துள்ளனா்.

முதல்வா் வாழ்த்து:

கிறிஸ்துமஸ் பண்டிகையை முன்னிட்டு கா்நாடக கிறிஸ்தவ மக்களுக்கு ஆளுநா் வஜுபாய்வாலா வாழ்த்து தெரிவித்துள்ளாா். முதல்வா் எடியூரப்பாவும் கிறிஸ்துமஸ் வாழ்த்து தெரிவித்துள்ளாா். அதில், கிறிஸ்துமஸ் விழா ஒருவா் மீது ஒருவா் காட்டும் அன்பு, அா்ப்பணிப்பை குறிப்பதாக அமையட்டும். இதன்மூலம் அமைதி, நல்வளம், திருப்தி ஏற்படுவதோடு, சமுதாயத்தின் பல்வேறு சமூக குழுக்களுடன் இணைந்து வாழும் மனப் பக்குவத்தையும் அளிக்கட்டும் என்று குறிப்பிட்டுள்ளாா். பெங்களூரு கத்தோலிக்க மறைமாவட்ட பேராயா் பீட்டா் மச்சாடோவும் கிறிஸ்தவா்களுக்கு வாழ்த்து தெரிவித்துள்ளாா்.