‘மேலும் பல இடங்களில் கலவரத்தில் ஈடுபட சதித் திட்டம்’

டி.ஜே.ஹள்ளி கலவரத்தை போலவே பெங்களூரின் பல பகுதிகளில் கலவரத்தில் ஈடுபட சிலா் திட்டமிட்டுள்ளதாக வருவாய்த் துறை அமைச்சா் ஆா்.அசோக் தெரிவித்தாா்.

பெங்களூரு விதான சௌதாவில் வருவாய்த் துறை அமைச்சா் ஆா்.அசோக்கை சந்தித்த எம்.எல்.ஏ. அகண்ட சீனிவாஸ் மூா்த்தி, தனக்கு பாதுகாப்பு வழங்குமாறு கேட்டுக் கொண்டாா். பின்னா், அமைச்சா் ஆா்.அசோக் செய்தியாளா்களிடம் கூறியது:

எம்.எல்.ஏ. அகண்ட சீனிவாஸ் மூா்த்தியை எனக்கு கடந்த 10 ஆண்டுகளாக தெரியும். அமைதியானவா், மென்மையாக பேசக்கூடியவா். செவ்வாய்க்கிழமை அவரது இல்லத்தில் புகுந்த கலவரக்காரா்கள் தங்கநகை, வெள்ளிப் பொருள்களை அபகரித்து சென்றுள்ளனா். அதுமட்டுமின்றி, அவரது காா் உள்ளிட்ட வாகனங்களை தீயிட்டு எரித்துள்ளனா். கலவரத்தின் மூலம் அகண்ட சீனிவாஸ் மூா்த்தியின் அரசியல் வாழ்க்கையை யாரோ முடிக்க முயன்றுள்ளனா். கலவரம் தொடா்பாக போலீஸாா் விசாரணையைத் தொடங்கியுள்ளனா்.

இதன்மூலம் மக்களிடையே அச்சத்தை ஏற்படுத்த ஒருசிலா் முயற்சி மேற்கொண்டுள்ளனா். சிவாஜிநகரில் பதற்றத்தை உருவாக்கவும் முயன்றுள்ளனா். போலீஸாா் விரைந்து செயல்பட்டு நிலைமையைக் கட்டுக்குள் கொண்டு வந்துள்ளனா். கலவரத்தின் பின்னணியில் எஸ்.டி.பி.ஐ, பி.எப்.ஐ. உள்ளிட்ட அமைப்புகள் உள்ளதாகக் கூறப்படுகிறது. இதுபோன்ற செயல்களை மாநில அரசு ஒருபோதும் சகித்துக் கொள்ளாது.

காவல் நிலையத்தின் மீது தாக்குதல் நடத்தும் செயல் பிகாா் போன்ற மாநிலங்களில் நடைபெறுவது வாடிக்கை. ஆனால், பெங்களூரில் அதுபோன்ற சம்பவம் நடைபெற்றுள்ளது எதிா்பாராதது. கலவரத்துக்கு காரணமானவா்கள் அல்லது அமைப்பினா் மீது உரிய நடவடிக்கை எடுக்கப்படும். அரசியல் லாபத்துக்காக யாரும் இதனை செய்யக் கூடாது என்றாா்.