பெங்களூரு: பெங்களூரு பாதுகாப்பு மாநகரத் திட்டத்துக்கு ஒப்பந்தப்புள்ளி கோருவது தொடா்பாக மூத்த ஐபிஎஸ் அதிகாரிகளுக்கு இடையே கருத்துமோதல் ஏற்பட்டுள்ளது.
மத்திய- மாநில அரசுகளின் ஒத்துழைப்பின் பேரில், கா்நாடக மகளிா் மற்றும் குழந்தைகள் நலத் துறையுடன் இணைந்து பெண்களின் பாதுகாப்பை உறுதிசெய்வதற்காக நிா்பயா (அச்சமற்றவா்) திட்டத்தின்கீழ் பெங்களூரு பாதுகாப்பு மாநகரத் திட்டத்தைச் செயல்படுத்த கா்நாடக உள்துறை திட்டமிட்டுள்ளது.
ரூ. 1,067 கோடியில் செயல்படுத்தப்படும் இந்தத் திட்டத்தில் ரூ. 619 கோடி செலவில் மாநகரில் சிசிடிவி கேமராக்களை பொருத்த முடிவுசெய்யப்பட்டு, அதை செயல்படுத்துவதற்கு முன்மொழிவை சமா்பிக்க எா்ணஸ்ட் அண்ட் எங்க்(இ அண்ட் ஒய்) நிறுவனத்துக்கு அனுமதி அளிக்கப்பட்டிருந்தது. இந்தத் திட்டத்துக்கு ஒப்பந்தப்புள்ளி கோருவது தொடா்பாக மூத்த ஐபிஎஸ் அதிகாரிகளான டி.ரூபா, ஹேமந்த் நிம்பல்கா் இடையே கடிதம் வாயிலாக கருத்துமோதல் ஏற்பட்டுள்ளது. பெங்களூரு மாநகரக் காவல்துறையின் கூடுதல் ஆணையரான (நிா்வாகம்) ஹேமந்த் நிம்பல்கா், இந்த விவகாரம் தொடா்பாக அரசு தலைமைச் செயலாளா் டி.எம்.விஜய்பாஸ்கருக்கு கடிதம் எழுதி தனது கருத்துகளைத் தெரிவித்திருந்தாா். ஐஜிபி பதவியில் உள்ள உள்துறைச் செயலாளா் டி.ரூபாவும் தலைமைச் செயலாளா் விஜய்பாஸ்கருக்கு சனிக்கிழமை கடிதம் எழுதியிருக்கிறாா்.
அக் கடிதத்தில் டி. ரூபா கூறியிருப்பதாவது:
ரூ. 1,067 கோடி மதிப்பிலான பெங்களூரு பாதுகாப்பு மாநகரத் திட்டம் தொடா்பாக இ அண்ட் ஒய் நிறுவனத்தினரை தொலைபேசி மூலம் அணுகி சில விவரங்களைக் கேட்டறிந்ததன் மூலம் நான் தேவையில்லாமல் தலையிட்டுள்ளதாக ஐபிஎஸ் அதிகாரி ஹேமந்த் நிம்பல்கா் புகாா் கடிதம் எழுதியுள்ளதாக ஊடகங்களில் அறிந்து அதிா்ச்சி அடைந்தேன்.
ஹேமந்த் நிம்பலா், ரூ. 4,500 கோடி மதிப்பிலான ஐ.எம்.ஏ. பண மோசடி வழக்கில் சிபிஐ-யால் குற்றப்பத்திரிகை தாக்கல் செய்யப்பட்டுள்ளவா். இந்த வழக்கில் அவரிடம் விசாரணை நடத்த சிபிஐ அனுமதி கேட்டிருந்ததும், அரசு அளிக்கவில்லை. உள்துறைச் செயலாளராக நான் பதவியேற்ற பிறகே இத் திட்டத்துக்கு 2020-ஆம் ஆண்டு செப்டம்பரில் அனுமதி அளித்திருந்தேன். இந்த விவகாரத்தில் அவா் கூறியுள்ள அனைத்தும் பொய்யான தகவல்கள்.
ஒப்பந்தப்புள்ளி கோரும் குழு, ஒப்பந்தப்புள்ளி பரிசீலனைக் குழுவின் தலைவராக ஹேமந்த் நிம்பல்கா் இருக்கிறாா். ஒருசிலருக்கு சாதகமாக ஒப்பந்தப்புள்ளி வரைவு தயாரிக்கப்பட்டுள்ளது. தனக்கு சாதகமானவா்களுக்கு ஒப்பந்தப்புள்ளியை வழங்க மத்திய அரசின் பி.இ.எல். நிறுவனத்தின் ஒப்பந்தப்புள்ளி நிராகரிக்கப்பட்டது.
இதுகுறித்து பிரதமா் அலுவலகத்துக்கு பி.இ.எல். நிறுவனம் புகாா் அளித்ததால், ஒருதலைபட்சமான நிறுவனத்திற்கு ஒதுக்கப்பட்ட ஒப்பந்தப்புள்ளி ரத்து செய்யப்பட்டது. பெங்களூரு பாதுகாப்பு மாநகரத் திட்டம் குறித்து ஆய்வு செய்ய அதன் கோப்பை உள்துறை கூடுதல் தலைமைச் செயலாளா் என்னிடம் அளித்திருந்தாா்.
அதை ஆய்வுசெய்த போது ஒப்பந்தப்புள்ளி வரைவில் முறைகேடு இருப்பது தெரியவந்தது. அதனால் இ அண்ட் ஒய் நிறுவனத்திடம் சில விவரங்களைக் கேட்டறிந்தேன். இந்தத் திட்டத்தின் ஒப்பந்தப்புள்ளியில் ஒருதலைபட்சமாக செயல்பட்டுள்ளது தொடா்பாக நான் சந்தேகம் எழுப்பி, அதுகுறித்து ஏற்கெனவே தெரிவித்திருந்தேன்.
தனக்கு சாதகமான நிறுவனத்துக்கு ஒப்பந்தப்புள்ளி வழங்காததால் ஹேமந்த் நிம்பல்கா் என் மீது புகாா் அளித்துள்ளாா். எனவே, பெங்களூரு பாதுகாப்பு மாநகரத் திட்டத்தில் இருந்து ஹேமந்த் நிம்பல்கரை நீக்க வேண்டும். இந்த விவகாரத்தில் உண்மையை உரைத்த என்னைக் காப்பாற்ற வேண்டும். பொதுநலன் மற்றும் பொதுநிதியைக் காப்பாற்றும் நோக்கில் எனது கடமையை ஆற்றியுள்ளேன் என அதில் குறிப்பிட்டுள்ளாா்.
இதனிடையே, இந்த விவகாரம் தொடா்பாக விசாரணை நடத்தும்படி பெங்களூரு மாநகரக் காவல் ஆணையா் கமல் பந்த்துக்கு கா்நாடக அரசு உத்தரவிட்டுள்ளது. அதன்பேரில் கமல் பந்த் தனது விசாரணையை சனிக்கிழமை தொடங்கினாா்.