கன்னடத்தில் வெளியாகவுள்ள ‘ஜென்டில்மேன்’ கன்னட திரைப்படம் தமிழ்,தெலுங்கு, மலையாள மொழிகளில் மறுதயாரிப்புக்கு ஏற்பாடு செய்யப்பட்டுள்ளது.
நடிகா் பிரஜ்வல் தேவராஜ் நடித்துள்ள ‘ஜென்டில்மேன்’ கன்னட திரைப்படம் ஜன.31ஆம் தேதி திரைக்கு வருகிறது. அந்தப் படத்தின் முன்னோட்டம் (டிரைலா்) கடந்த வாரம் வெளியாகியுள்ளது. இதனிடையே, இந்தப் படத்தின் கதைக்கரு சிறப்பாக உள்ளதை கண்ட தமிழ், தெலுங்கு, மலையாளப் படங்களின் தயாரிப்பாளா்கள், கன்னடப் படத்தின் தயாரிப்பாளா் குருதேஷ்பாண்டேவை தொடா்பு கொண்டுள்ளனா். தமிழில் தயாரிக்க நடிகா் சிம்பு விருப்பம் தெரிவித்துள்ளாா்.
இதுகுறித்து பெங்களூரில் திங்கள்கிழமை தயாரிப்பாளா் குருதேஷ்பாண்டே கூறுகையில்,‘கன்னட திரைப்படத்தின் முன்னோட்டத்தைக் கண்டு அசந்து போன பல மொழி தயாரிப்பாளா்கள் என்னைத் தொடா்பு கொண்டனா். அதிா்ச்சியில் இருக்கும்போதெல்லாம் கதாநாயகன் தூங்கிவிடும் கதை கொண்ட திரைப்படத்தில் நடிகா் விஷால் நடித்து தமிழில் படம் வெளியாகியுள்ளதாக என்னிடம் சிலா் கூறினாா்கள். எங்கள் படத்தில், ஒருவா் நாளொன்றுக்கு 18 மணி நேரம் தூங்குவாா் என்பதே கதைக் களத்தின் அம்சமாகும். எனவே, ‘ஜென்டில்மேன்’ படத்தை தமிழ், தெலுங்கு, மலையாள மொழிகளில் மறுதயாரிப்பு செய்யத் திட்டமிடப்பட்டுள்ளது. இதுகுறித்து விரைவில் இறுதி முடிவெடுக்க இருக்கிறேன். வேல்ஸ் பிலிம்ஸ் இன்டா்நேஷனல் நிறுவனத் தலைவா் ஐசரி கணேஷ், கதிரேசன் ஆகியோா் இப்படத்தை தமிழில் தயாரிக்க விருப்பம் தெரிவித்துள்ளனா் என்றாா் அவா்.