காங்கிரஸுக்கு களங்கம் ஏற்படுத்த பாஜக முயற்சி

காங்கிரஸ் கட்சிக்கு களங்கம் ஏற்படுத்த பாஜக முயற்சிக்கிறது என அக்கட்சியின் மாநிலத் தலைவா் டி.கே.சிவக்குமாா் தெரிவித்தாா்.

பெங்களூரு, புலிகேசிநகா் சட்டப்பேரவைத் தொகுதிக்குள்பட்ட தேவா்ஜீவனஹள்ளி, காடுகொண்டனஹள்ளி காவல் நிலையங்களுக்கு உட்பட்ட பகுதிகளில் ஆக. 11-ஆம் தேதி நிகழ்ந்த கலவரத்தில் அத்தொகுதியின் காங்கிரஸ் எம்.எல்.ஏ. அகண்ட சீனிவாஸ் மூா்த்தியின் வீடு எரித்து நாசமாக்கப்பட்டது. இந்த கலவரத்தை தூண்டிவிட்டதாக குற்றம்சாட்டப்பட்டு தலைமறைவாக இருந்த பெங்களூரு மாநகராட்சி முன்னாள் மேயா் சம்பத்ராஜை செவ்வாய்க்கிழமை அதிகாலையில் போலீஸாா் கைது செய்தனா்.

இது தொடா்பாக பெங்களூரில் செவ்வாய்க்கிழமை செய்தியாளா்களிடம் காங்கிரஸ் மாநிலத் தலைவா் டி.கே.சிவக்குமாா் கூறியதாவது:

முன்னாள் மேயராக இருந்தாலும், நானாக இருந்தாலும் அனைவரும் சட்டத்தை மதிக்க வேண்டும். ஆனால், ஆட்சி அதிகாரத்தில் இருக்கும் ஒருசிலா் சட்டத்தை தவறாக பயன்படுத்தி வருகிறாா்கள். சம்பத்ராஜ் கண்டிப்பாக சட்டத்தை மதிப்பாா். ஆட்சி அதிகாரத்தை பாஜக அரசு தவறாக பயன்படுத்துகிறது. காங்கிரஸ் கட்சிக்கு களங்கம் ஏற்படுத்த பாஜக தொடா்ந்து முயற்சி செய்து வருகிறது.

பெங்களூரு கலவரத்தில் காங்கிரஸ் கட்சியைச் சோ்ந்தவா்களுக்கு சம்பந்தம் இருப்பதற்கான ஆதாரம் எங்கே? ஆனாலும், காங்கிரஸ் கட்சியை குறிவைத்து, சம்பத்ராஜ் கைது செய்யப்பட்டுள்ளாா். பெங்களூரு கலவரம் தொடா்பான குற்றப்பத்திரிகையை பாா்த்திருக்கிறேன். காங்கிரஸ் தலைவா்களுக்கு தொந்தரவு செய்வதையே பாஜக வழக்கமாகக் கொண்டுள்ளது. அதைதான் இப்பொதும் செய்திருக்கிறாா்கள். எந்தத் தவறும் செய்யாத நிலையில் சம்பத்ராஜ் எப்படி கைது செய்யப்பட்டாா் என்ற கேள்விக்கு நான் பதிலளிக்க முடியாது. இந்த விவகாரம் நீதிமன்றத்தின் விசாரணையில் உள்ளதால், அதுபற்றி எதுவும் கூற விரும்பவில்லை.

சம்பத்ராஜ் உடல்நலக் குறைவால் பாதிக்கப்பட்டிருந்தாா். அவரை தலைமறைவாக இருந்தாா் என்று கூறுவது சரியல்ல.

பெங்களூரு கலவர விவகாரத்தில் தனக்கு ஆதரவாக இருக்கும்படி காங்கிரஸ் எம்.எல்.ஏ. அகண்ட சீனிவாஸ் மூா்த்தி, என்னிடம் எதுவும் கூறவில்லை. இதுபற்றி என்னிடம் அவா் பேசவில்லை. தனிப்பட்ட ஒருவரின் கருத்தை வைத்துக்கொண்டு நாம் முடிவுக்கு வர முடியாது. கலவரம் தொடா்பாக விசாரணை நடந்து வருகிறது அதன் பின்னணியில் இருக்கும் அரசியல் எங்களுக்கும் புரிகிறது. தகுந்த நேரம் வரும்போது அதுகுறித்து பேசுகிறேன்.

சட்டத்தை மதிக்கும் அனைவருக்கும் காங்கிரஸ் துணை நிற்கும். கலவரத்துக்கு சம்பத்ராஜ் காரணம் என்பது அகண்ட சீனிவாஸ் மூா்த்தியின் கருத்தாக இருக்கலாம். கலவரம் நடந்ததும், அந்த இடத்தை நான் பாா்வையிட்டேன். இந்த விவகாரத்தில் போலீஸாா் மீது அழுத்தம் கொடுக்கப்பட்டுள்ளது. சம்பத்ராஜ் மீது நடவடிக்கை எடுக்க வேண்டுமென்று அகண்ட சீனிவாஸ் மூா்த்தி கூறியுள்ளாா். அதற்கு நான் ஊடகங்களில் பதிலளிக்க முடியாது. அகண்ட சீனிவாஸ் மூா்த்தி என்னைச் சந்தித்து பேசட்டும் என்றாா்.