திருக்குறளைத் தந்த திருவள்ளுவரின் உருவப் படத்தை உருவாக்கி 60ஆண்டுகள் நிறைவடைவதை முன்னிட்டு, தங்கவயல் தமிழ்ச் சங்கத்தில் விழா கொண்டாடப்படுகிறது.
இதுகுறித்து தமிழ் சங்கத் தலைவா் சு.கலையரசன் வெளியிட்ட அறிக்கை:
குறல் நெறி தந்த திருவள்ளுவருக்கு முதலில் உருவப்படத்தை வடிவமைத்து தந்தவா் கே.ஆா்.வேணுகோபால் சா்மா. இன்றும் அந்த உருவம்தான் திருவள்ளுவா் என்றால் நினைவுக்கு வருகிறது. வேணுகோபால் சா்மா தனது 12-ஆவது வயதில் இருந்தே, திருவள்ளுவா் எப்படி இருந்திருப்பாா் என்ற எண்ணம் தோன்றியது. பல நுாற்றுக் கணக்கான ஓவியங்கள் வரைந்தாா்.
எதிலும், அவருக்குப் பிடித்தமான, திருவள்ளுவா் என்று நம்பும்படியான ஓவியம் அமையவில்லை.
இதனைச் சவாலாக எடுத்துக் கொண்டு, 40 ஆண்டுகள் ஆயிரக் கணக்கில் ஓவியங்களை வரைந்தாா். ஆனால், எதிலும் அவருக்கு திருப்தி ஏற்படவில்லை. வேணுகோபால் சா்மா நேரம் கிடைத்த போதெல்லாம் வள்ளுவரை வரைந்து பாா்த்துக் கொண்டே இருந்தாா். இறுதியில் எந்தவித மத, இன, அடையாளங்களும் இன்றி 1959- ஆம் ஆண்டு டிச. 13-ஆம் தேதி வள்ளுவருக்கு முழு உருவப்படத்தை வடிவமைத்துக் கொடுத்தாா்.
அண்ணா, பக்தவத்சலம், காமராஜ், மு.வ. ஜீவா, கி.ஆ.பெ.விஸ்வநாதன், கக்கன் என பலரும் வேணுகோபால் சா்மா இல்லத்துக்குச் சென்று வரைந்த திருவள்ளுவா் உருவத்தைக் கண்டு மெய்சிலிா்த்தனா். மத்திய, மாநில அரசுகளால் இந்த திருவள்ளுவா் திருவுருவம் அங்கீகரிக்கப்பட்ட ஓவியமாக பின்னா் அறிவிக்கப்பட்டது.
1959-இல் வெளியிடப்பட்ட திருவள்ளுவா் உருவப்படமானது, 1964-மாா்ச் 23-இல் தமிழக சட்டப்பேரவையில் அன்றைய துணை ஜனாதிபதி ஜாகிா் உசேன் அவா்களால் திறந்து வைக்கப்பட்டது. 1967-இல் ஆட்சிப் பொறுப்பேற்ற மறைந்த முதலமைச்சா் அண்ணா திருவள்ளுவரின் உருவப்படத்தை அனைத்து அரசு அலுவலகங்களிலும் இடம்பெறச் செய்ய அரசாணை பிறப்பித்தாா்.
40 ஆண்டு காலமாக தனது சிந்தனையால் சா்மா வரைந்த வள்ளுவா் ஓவியம் 60 ஆண்டுகள் நிறைவடைந்துள்ள நிலையில், தங்கவயல் தமிழ் சங்கம் சாா்பில் விரைவில் மணி விழாவாகக் கொண்டாட முடிவு செய்யப்பட்டுள்ளதாக அதில் தெரிவிக்கப்பட்டுள்ளது.