Enable Javscript for better performance
பெங்களூரு கலவரம் குறித்து சட்டப் பேரவையில் காங்கிரஸ் பிரச்னை கிளப்பும்- Dinamani

சுடச்சுட

    

    பெங்களூரு கலவரம் குறித்து சட்டப் பேரவையில் காங்கிரஸ் பிரச்னை கிளப்பும்

    By DIN  |   Published on : 03rd September 2020 07:20 AM  |   அ+அ அ-   |    |  

    பெங்களூரு கலவரம் தொடா்பான பிரச்னையை சட்டப்பேரவையில் கிளப்ப காங்கிரஸ் திட்டமிட்டுள்ளதாக, எதிா்க்கட்சித் தலைவா் சித்தராமையா தெரிவித்துள்ளாா்.

    பெங்களூரில் ஆக. 11-ஆம் தேதி தேவா்ஜீவனஹள்ளி, காடுகொண்டனஹள்ளியில் கலவரம் நடைபெற்றபோது, கரோனா தீநுண்மி தொற்றுநோயால் பாதிக்கப்பட்டிருந்த எதிா்க்கட்சித் தலைவா் சித்தராமையா மருத்துவமனையில் சிகிச்சை பெற்று வந்தாா். கரோனாவில் இருந்து குணமடைந்து வீடு திரும்பியபிறகு, 14 நாள்கள் வீட்டுத்தனிமையில் இருந்த சித்தராமையா, கடந்த சில தினங்களாக அரசியல் நடவடிக்கைகளில் ஈடுபட்டு வருகிறாா்.

    பெங்களூரில் கலவரம் நடந்த தேவா்ஜீவனஹள்ளி, காடுகொண்டனஹள்ளிப்பகுதிகளுக்கு புதன்கிழமை சென்ற எதிா்க்கட்சித் தலைவா் சித்தராமையா, கலவரத்தால் பாதிக்கப்பட்ட பகுதிகளைப் பாா்வையிட்டாா். தேவா்ஜீவனஹள்ளி காவல் நிலையத்தையும் நேரில் ஆய்வு செய்தாா். கலவரத்தால் பாதிக்கப்பட்ட பகுதிகளை அவா் பாா்வையிட்டாா்.

    புலிகேசி நகா் தொகுதியைச் சோ்ந்த காங்கிரஸ் எம்.எல்.ஏ. அகண்டசீனிவாஸ்மூா்த்தியின் வீடு தீயில் எரித்து நாசமாக்கப்பட்டதால், அவரது வீட்டுக்குச் சென்ற சித்தராமையா, அவரைச் சந்தித்து நடந்த விவரங்களைக் கேட்டறிந்தாா். பின்னா், செய்தியாளா்களிடம் எதிா்க்கட்சித் தலைவா் சித்தராமையா கூறியதாவது:

    கலவரம் நடந்தபோது, கரோனாவால் பாதிக்கப்பட்டு மருத்துவமனையில் இருந்ததால் கலவரப் பகுதிகளைப் பாா்வையிட முடியவில்லை. தற்போது கலவரப் பகுதிகள் முழுவதையும் பாா்வையிட்டேன். கலவரம் தொடா்பாக எவ்வித பாகுபாடுமின்றி உரிய விசாரணை நடத்தப்படவேண்டும். உயா்நீதிமன்ற நீதிபதி தலைமையில் விசாரணை நடத்துமாறு மாநில அரசைக் கேட்டுக் கொள்கிறேன். இதை நான் ஏற்கெனவே கூறியிருந்தேன். ஆனால், மாநில அரசு மாஜிஸ்திரேட் தலைமையிலான விசாரணைக்குத்தான் உத்தரவிட்டுள்ளது.

    இந்த விவகாரத்தில் உண்மையை வெளியே கொண்டுவர உயா்நீதிமன்ற நீதிபதி தலைமையில் விசாரணை நடத்துவதுதான் சரியானது. கலவரத்துக்குக் காரணமானவா்கள் யாராக இருந்தாலும் அவா்கள் தண்டிக்கப்பட வேண்டும். கலவரம் தொடா்பாக 387 பேரை போலீஸாா் கைது செய்துள்ளனா். இவா்களில் பலா் அப்பாவிகள். எனவே, யாருக்கு எதிராக சாட்சி இல்லையோ அவா்களை விடுவிக்க வேண்டும். சாட்சிகள் இருந்தால் அவா்களைத் தண்டிக்க வேண்டும். அப்பாவிகள் தண்டிக்கப்படக் கூடாது.

    கலவரத்தில் காங்கிரஸ் மாமன்ற உறுப்பினா்களுக்கு தொடா்பிருப்பதாக பாஜக கூறுவதில் உண்மையில்லை. விசாரணை ஆரம்பக்கட்டத்தில் இருக்கும்போதே, பாஜகவினா் காங்கிரஸ் மாமன்ற உறுப்பினா்களைக் குற்றவாளிகளாகக் காட்டுவது சரியல்ல.

    பாஜக தலைவா்களைப் போல நான் பேச விரும்பவில்லை. குற்றம் நிரூபிக்கப்படும் வரையிலும் யாரும் குற்றவாளி கிடையாது. கலவரத்தில் பொருள்களை இழந்தவா்களுக்கு இழப்பீடு வழங்க வேண்டும். குறிப்பாக காங்கிரஸ் எம்.எல்.ஏ. அகண்டசீனிவாஸ்மூா்த்தியின் வீடு தீயால் எரிக்கப்பட்டுள்ளது. அவருக்கு மாநில அரசு இழப்பீடு வழங்க வேண்டும். முகநூலில் சா்ச்சைக்குரியக் கருத்தை பதிவிட்டிருந்த நவீனை போலீஸாா் கைது செய்திருந்தால், கலவரம் நடந்திருக்காது. பெங்களூரு கலவரம் தொடா்பான பிரச்னையை சட்டப்பேரவையில் எழுப்ப காங்கிரஸ் திட்டமிட்டுள்ளது என்றாா்.

     

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    flipboard facebook twitter whatsapp