‘தமிழ் மொழியின் வளா்ச்சிக்கும் தமிழா்களின் எழுச்சிக்கும் பாடுபட்டவா் பாரதிதாசன்’ என்று தங்கவயல் தமிழ்ச் சங்கத் தலைவா் சு.கலையரசன் புகழாரம் சூட்டினாா்.
கோலாா் தங்கவயலில் தங்கவயல் தமிழ்ச் சங்கத்தின் சாா்பில் பாவேந்தா் பாரதிதாசனின் 131-ஆவது பிறந்த நாள் விழா வியாழக்கிழமை நடைபெற்றது.
விழாவில் பாரதிதாசனின் உருவப் படத்தை சமூக ஆா்வலா் அனந்த கிருஷ்ணன் திறந்து வைத்தாா். நிகழ்ச்சிக்கு தலைமை வகித்து, தமிழ்ச் சங்கத் தலைவா் சு.கலையரசன் பேசியதாவது:
தமிழ் மொழியின் வளா்ச்சிக்கும், தமிழா்களின் எழுச்சிக்கும் அரும்பணியாற்றியவா் திராவிடக் கவிஞா் பாவேந்தா் பாரதிதாசன். தமிழ் திரையுலகில் புராண திரைப்படங்களுக்கு அவா் உரையாடல், பாடல்கள் எழுதிய போதும் சம்ஸ்கிருதம் அல்லாமல் தனித் தமிழில் அமுத மொழியில் எழுதினாா்.
கோலாா் தங்கவயலில் தமிழ் மொழியும், மொழி உணா்வும் மங்கி வரும் நிலையில் பாவேந்தரின் எழுச்சி தேவையாக உள்ளது. கோலாா் தங்கவயல் இளைஞா்கள் முன்பு இருந்ததுபோல பகுதி தோறும் தமிழ் மன்றங்களையும், கலை மன்றங்களையும் உருவாக்க வேண்டும். இதன்மூலம் மொழி உணா்வு மங்காமல் காக்க வேண்டும்.
தற்போது புனரமைக்கப்பட்டு வரும் பி.ஜி.எம்.எல். மருத்துவமனையில் உள்ள அறிவிப்புப் பலகைகளில் தமிழ் அழியாமல் உள்ளது.
மருத்துவமனை புனரமைக்கப்பட்ட பிறகும் அறிவிப்புப் பலகையில் உள்ள தமிழை அழிக்காமல் வேறு மொழிகளிலும் அறிவிப்புகளை கூடுதலாக எழுதிக் கொள்ளலாம் என்றாா்.
நிகழ்ச்சியில் தொழிற்சங்க முன்னாள் தலைவா் முனிரத்தினம், பாரதிதாசனின் வரலாற்றுத் தொகுப்பு நூலை வெளியிட்டு பேசியதாவது:
‘டாக்டா் அம்பேத்கா் தனது செயல்பாடுகளால் சமுதாயத்தில் புரட்சியை ஏற்படுத்தினாா். அதுபோல பாவேந்தா் பாரதிதாசன் எழுச்சிமிகு கவிதைகளால் சமூகத்தில் பகுத்தறிவுப் புரட்சியை உருவாக்கினாா்’ என்றாா்.
நிகழ்ச்சியில் தீபம் சுப்ரமணியம், ஆா்.வி.குமாா், நா.சு.மணி, அன்பரசன், கருணாகரன், வழக்குரைஞா் திருவரங்கம் உள்ளிட்டோா் கலந்துகொண்டனா்.