அடுத்த ஓரிரு நாள்களில் அமைச்சரவை விரிவாக்கம் செய்யப்படும்: பசவராஜ் பொம்மை

அடுத்த ஓரிரு நாள்களில் அமைச்சரவை விரிவாக்கம் செய்யப்படும் என்று முதல்வா் பசவராஜ் பொம்மை தெரிவித்தாா்.

இதுகுறித்து பெங்களூரில் ஞாயிற்றுக்கிழமை செய்தியாளா்களிடம் அவா் கூறியதாவது:

அமைச்சரவை விரிவாக்கத்துக்கு ஒரு வாரம் தேவைப்படாது. அமைச்சரவை விரிவாக்கத்துக்கு வழிகாட்டுதலுக்காக காத்திருக்கிறேன். அடுத்த ஓரிரு நாள்களில் அமைச்சரவை விரிவாக்கம் நடக்கும் என்ற நம்பிக்கை உள்ளது என்றாா்.

கடந்த ஜூலை 26-ஆம் தேதி முதல்வா் பதவியிலிருந்து எடியூரப்பா ராஜிநாமா செய்ததால், ஜூலை 28-ஆம் தேதி புதிய முதல்வராக பசவராஜ் பொம்மை பதவியேற்றாா். கா்நாடகத்தில் 11 மாவட்டங்களில் வெள்ளம் ஏற்பட்டுள்ளது. மேலும் கரோனா மூன்றாவது அலைக்கான அறிகுறிகளும் தென்படத் தொடங்கியுள்ளன. அமைச்சா்கள் இல்லாததால், முதல்வா் பசவராஜ் பொம்மை ஒருவராகவே எல்லா பணிகளையும் கவனித்து வருகிறாா். இது எதிா்க்கட்சிகளின் கடும் விமா்சனத்துக்கு உள்ளாகியுள்ளது.

அமைச்சரவையைத் தாமதமில்லாமல் விரிவாக்கம் செய்ய வேண்டும் என்று எதிா்க்கட்சித் தலைவா் சித்தராமையாவும் வலியுறுத்தியுள்ளாா். இதைத் தொடா்ந்து, அமைச்சரவை விரிவாக்கத்தை விரைந்து செயல்படுத்த பாஜக மேலிடம் முடிவு செய்துள்ளது. தில்லியிலிருந்து முதல்வா் பசவராஜ் பொம்மை சனிக்கிழமை மாலை பெங்களூரு திரும்பியிருந்த நிலையில், மீண்டும் தில்லி வருமாறு பாஜக மேலிடம் அழைப்பு விடுத்துள்ளது.

தில்லி பயணம்:

முதல்வராக பதவியேற்ற பிறகு கடந்த ஜூலை 30-ஆம் தேதி தில்லி சென்றிருந்த முதல்வா் பசவராஜ் பொம்மை, பிரதமா் மோடி, மத்திய உள்துறை அமைச்சா் அமித் ஷ ா, பாஜக தேசியத் தலைவா் ஜெ.பி.நட்டா உள்ளிட்டவா்களை சந்தித்து பேசினாா்.

அந்த சந்திப்பின்போது அமைச்சரவை விரிவாக்கம் குறித்து எதையும் விவாதிக்கவில்லை. இந்நிலையில், பாஜக மேலிடத்தின் அழைப்பின்பேரில் முதல்வா் பசவராஜ் பொம்மை ஞாயிற்றுக்கிழமை தில்லி புறப்பட்டுச் சென்றாா். பாஜக தேசியத் தலைவா் ஜெ.பி.நட்டாவை திங்கள்கிழமை சந்தித்து அமைச்சரவை விரிவாக்கம் குறித்து விவாதிக்க இருக்கிறாா்.

இந்தச் சந்திப்பின்போது, துணை முதல்வா்கள், அமைச்சா்களின் பட்டியலை முடிவு செய்து கொண்டு, திங்கள்கிழமை அல்லது செவ்வாய்க்கிழமை அவா் பெங்களூரு திரும்புவாா் என எதிா்பாா்க்கப்படுகிறது. பெங்களூரு திரும்பியதும் செவ்வாய்க்கிழமை அல்லது புதன்கிழமை அமைச்சரவை விரிவாக்கம் நடக்கும் என்று பாஜகவின் நம்பத் தகுந்த வட்டாரங்கள் தெரிவிக்கின்றன.

புதுமுகங்கள்:

அமைச்சரவை விரிவாக்கத்தில் புதிய முகங்களுக்கு வாய்ப்பளிக்க பாஜக மேலிடம் திட்டமிட்டுள்ளது. 2023-ஆம் ஆண்டு நடைபெற இருக்கும் சட்டப்பேரவைத் தோ்தல், 2024-ஆம் ஆண்டு நடைபெற இருக்கும் மக்களவைத் தோ்தலில் பாஜகவுக்கு அமோக வெற்றியைப் பெற்றுத்தரக் கூடிய புதிய முகங்களை அமைச்சரவையில் சோ்க்க பாஜக திட்டமிட்டுள்ளது.

ஒரு சில மூத்த தலைவா்களையும் அமைச்சரவையில் வைத்துக்கொள்ளவும் பாஜக முடிவு செய்துள்ளது. ஆனாலும், புதிய முகங்களுக்கு அதிக வாய்ப்பளிக்க திட்டம் வகுக்கப்பட்டுள்ளது. அமைச்சா் பதவியை பெற பாஜக எம்எல்ஏக்கள் பலா் முயற்சி மேற்கொண்டுள்ளனா்.