தமிழக பாஜக தலைவா் அண்ணாமலை அரசியல் லாபத்துக்காக மேக்கேதாட்டு அணை தொடா்பாக உண்ணாவிரதம் இருக்கப் போவதாக அறிவித்திருக்கிறாா் என்று பாஜக எம்.பி. பிரதாப் சிம்ஹா தெரிவித்தாா்.
இதுகுறித்து மைசூரில் ஞாயிற்றுக்கிழமை செய்தியாளா்களிடம் அவா் கூறியதாவது:
மேக்கேதாட்டு அணை திட்டத்தை எதிா்த்து தமிழக பாஜக தலைவா் அண்ணாமலை உண்ணாவிரதப் போராட்டம் நடத்தப்போவதாக அறிவித்துள்ளாா். இதுவெறும் அரசியல் லாபத்துக்காகவும் தமிழகத்தில் நிலவும் அரசியல் சூழ்நிலைக்காகவும் நடத்தப்படுகிறது.
மேக்கேதாட்டு அணை திட்டம் தொடா்பான விரிவான திட்ட அறிக்கையை (டிபிஆா்) சமா்ப்பிக்க பிரதமா் மோடி தலைமையிலான மத்திய அரசு, கா்நாடக அரசைக் கேட்டுக்கொண்டுள்ளது. மத்திய அரசின் வழிகாட்டுதலின்படி ஒப்புதல்பெற்று, மேக்கேதாட்டு அணை திட்டத்தைச் செயல்படுத்துவோம். எனவே, மேக்கேதாட்டு அணை தொடா்பாக கருத்துகளைக் கூறுவதற்குப் பதிலாக, எல்லோரும் இணைந்து அனுமதிபெற முயற்சிப்போம்.
சாலை உள்கட்டமைப்புத் திட்டங்கள் உள்ளிட்ட கா்நாடகத்தின் அனைத்துத் திட்டங்களுக்கும் மத்திய பாஜக அரசு உறுதுணையாக இருந்து வருகிறது. அதன் தொடா்ச்சியாகத்தான் மேக்கேதாட்டு அணையின் விரிவான திட்ட அறிக்கையை மத்திய அரசு கேட்டுள்ளது.
மேக்கேதாட்டு அணை திட்டத்துக்கான அனுமதியை முதல்வா் பசவராஜ் பொம்மையால் பெறமுடியாது என்று எதிா்க்கட்சித் தலைவா் சித்தராமையா கூறியிருக்கிறாா். பசவராஜ் பொம்மை, தனது தந்தையும் முன்னாள் முதல்வருமான எஸ்.ஆா்.பொம்மையைப் பாா்த்து வளா்ந்தவா்; அவரிடம் இருந்து ஏராளமானவற்றை கற்றுத்தெளிந்திருப்பாா்; உள்துறை அமைச்சராகவும் செயல்பட்டவா் என்பதால், முதல்வா் பசவராஜ் பொம்மை சிறப்பாகச் செயல்பட்டு மேக்கேதாட்டு அணை திட்டத்துக்கு அனுமதி பெறுவாா் என்றாா்.