Enable Javscript for better performance
மேக்கேதாட்டுக்காக நடைப்பயணம் காங்கிரஸின் ஏமாற்று வேலை: எச்.டி.குமாரசாமி- Dinamani

உடனுக்கு உடன் செய்திகள்

    மேக்கேதாட்டுக்காக நடைப்பயணம் காங்கிரஸின் ஏமாற்று வேலை: எச்.டி.குமாரசாமி

    By DIN  |   Published On : 30th December 2021 12:48 AM  |   Last Updated : 30th December 2021 12:48 AM  |  அ+அ அ-  |  

    மேக்கேதாட்டு நடைப்பயணத்தின் மூலம் மக்களை ஏமாற்ற காங்கிரஸ் முயற்சிக்கிறது என்று மஜத தலைவரும் முன்னாள் முதல்வருமான எச்.டி.குமாரசாமி புதன்கிழமை தெரிவித்தாா்.

    மேக்கேதாட்டுவில் அணை கட்ட மத்திய, மாநில அரசுகளுக்கு அழுத்தம் கொடுக்க ஜன. 9-ஆம் தேதிமுதல் 18-ஆம் தேதி வரை 10 நாள்களுக்கு மேக்கேதாட்டுவில் தொடங்கி பெங்களூரு வரை 170 கி.மீ. தொலைவுக்கு நடைப்பயணம் மேற்கொள்ள காங்கிரஸ் திட்டமிட்டுள்ளது. இதில் பங்கேற்குமாறு அரசியல் கட்சிகள், விவசாய அமைப்புகள், பொதுமக்களுக்கும் அக்கட்சி அழைப்பு விடுத்துள்ளது.

    இந்நிலையில் பெங்களூரில் புதன்கிழமை எச்.டி.குமாரசாமி செய்தியாளா்களிடம் கூறியதாவது:

    கிருஷ்ணா நதியிலிருந்து கா்நாடகத்துக்கு ஒதுக்கப்பட்ட பங்கு நீரைப் பயன்படுத்துவது தொடா்பாக பல ஆண்டுகளுக்கு முன் காங்கிரஸ் நடைப்பயணம் மேற்கொண்டது. அப்போது வட கா்நாடக மக்களை அக்கட்சி ஏமாற்றியது. அதுபோல, இப்போது தென் கா்நாடக மக்களை ஏமாற்ற மேக்கேதாட்டு நடைப்பயணத்தை காங்கிரஸ் மேற்கொள்ளவுள்ளது.

    இந்த நடைப்பயணத்தில் பங்கேற்குமாறு எனக்கு காங்கிரஸ் மாநிலத் தலைவா் டி.கே.சிவகுமாா் கடிதம் அனுப்பியுள்ளாா். இதன்மூலம் என்னையும், தென் கா்நாடகத்தின் 84 வட்டங்களைச் சோ்ந்த மக்களையும் ஏமாற்ற அவா் முயற்சிக்கிறாா்.

    முன்னாள் பிரதமா் எச்.டி.தேவெ கௌடாவின் கனவுத் திட்டம்தான் மேக்கேதாட்டு அணை. மாநிலத்தின் நீா்ப்பாசனத்துக்கு எச்.டி.தேவெ கௌடாவின் பங்களிப்பு மகத்தானது. இதை காங்கிரஸ் மூடி மறைக்க முயற்சிக்கிறது.

    பெங்களூருக்கு குடிநீா் வழங்கும் காவிரி நான்காம் நிலைத் திட்டத்தில் மக்களுக்கு நியாயமாகக் கிடைக்க வேண்டிய 9 டி.எம்.சி. நீரை காங்கிரஸ் தடுத்து நிறுத்தியது. பி.வி.நரசிம்மராவ் பிரதமராக இருந்தபோது தமிழக அரசின் அழுத்தம் காரணமாக காவிரி நதியிலிருந்து மாநிலத்தின் பங்குநீரை பெங்களூருக்குப் பயன்படுத்த அன்றைய காங்கிரஸ் அரசு அனுமதிக்கவில்லை.

    இந்நிலையில் மாநிலத்தைத் காக்கவந்த பாதுகாவலரைப்போல காங்கிரஸ் வேடம் தரித்துள்ளது.

    ஆனால், எச்.டி.தேவெ கௌடா பிரதமராக இருந்தபோது காவிரி நதியிலிருந்து பெங்களூரு குடிநீா்த் திட்டத்துக்கு பங்குநீா் வழங்கப்பட்டது. அதை காங்கிரஸால் தடுக்க முடியவில்லை. காவிரி நதிநீரை பெங்களூருக்கு குடிநீராகக் கொண்டுவரும் திட்டங்களை வகுத்தவரும் அத்திட்டத்தைச் செயல்படுத்தியவரும் எச்.டி.தேவெ கௌடாதான். மேக்கேதாட்டு அணை திட்டத்தைச் செயல்படுத்த மத்திய அரசுக்கு அழுத்தம் கொடுக்க வேண்டியதுதான் முக்கியம். அதைவிடுத்து வெறும் முழக்கங்களால் ஒன்றும் நடந்துவிடாது என்றாா்.

    எச்.டி. தேவெ கெளடா...

    இதுகுறித்து ஹாசன் மாவட்டம், ஹரதனஹள்ளி கிராமத்தில் புதன்கிழமை எச்.டி. தேவெ கௌடா செய்தியாளா்களிடம் கூறியதாவது:

    மேக்கேதாட்டு அணையைக் கட்டும்படி காங்கிரஸ் தலைவா்கள் நடத்தும் நடைப்பயணம் ஒரு அரசியல் நாடகம். கிருஷ்ணா, மகதாயி நதிநீா் பங்கீட்டு பிரச்னைகள் நிலுவையில் இருக்கும்போது மேக்கேதாட்டு அணை விவகாரத்தை மட்டும் எழுப்புவதன் நோக்கம் என்ன? காங்கிரஸ் மாநிலத் தலைவா் டி.கே.சிவகுமாா் முன்னா் நீா்வளத் துறை அமைச்சராக இருந்தபோது மேக்கேதாட்டு அணை திட்டத்தை அலட்சியப்படுத்தியது ஏன்?

    ஒரு குறிப்பிட்ட மதத்தை குறிவைத்து மதமாற்ற தடைச்சட்ட மசோதா கொண்டுவரப்பட்டுள்ளது. இந்தச் சட்ட மசோதா காங்கிரஸ் ஆட்சி காலத்தில் வகுக்கப்பட்டுள்ளது. இந்த சட்ட மசோதாவுக்கு என்ன தேவை வந்தது? 2023-ஆம் ஆண்டு நடைபெற இருக்கும் பேரவைத் தோ்தலுக்கு கட்சித் தொண்டா்களைத் தயாா்ப்படுத்துவதற்காக விரைவில் மாவட்ட அளவில் சுற்றுப்பயணம் மேற்கொள்ள திட்டமிட்டிருக்கிறேன் என்றாா்.

     


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp