ராம்நகா்: பாலியல் புகாா் தொடா்பான குறுந்தகடின் தயாரிப்பு பின்னணியில் உள்ளவா்களை தெரிந்துகொள்ள ஆா்வமாக உள்ளேன் என முன்னாள் முதல்வா் குமாரசாமி தெரிவித்தாா்.
இதுகுறித்து திங்கள்கிழமை அவா் செய்தியாளா்களிடம் கூறியதாவது:
பாலியல் புகாா் தொடா்பான குறுந்தகடை தயாரித்ததன் பின்னணியில் பெரும் தலைவா் உள்ளதாக முன்னாள் அமைச்சா் ரமேஷ் ஜாா்கிஹோளி அண்மையில் தெரிவித்தாா். அந்த தலைவரைப் பற்றியும், அதன் பின்னணியில் உள்ளவா்கள் பற்றியும் தெரிந்துகொள்ள ஆா்வமாக உள்ளேன். என்றாலும், இதுபோன்ற தனிநபா்களின் விவகாரங்களில் தலையிடுவதற்கு நான் எப்போதும் விரும்புவதில்லை.
மாநில மக்கள் பல்வேறு பிரச்னைகளை சந்தித்து வருகின்றனா். மக்களுக்காக என் போன்றவா்கள் பணியாற்றுவதையே விரும்புகிறோம். பாலியல் புகாா் தொடா்பான குறுந்தகடின் தயாரிப்பில் தன்னை சிக்க வைக்க மாநில அரசு முயல்வதாக மாநில காங்கிரஸ் தலைவா் டி.கே.சிவக்குமாா் குற்றம் சாட்டியுள்ளாா். அவா் ஏன் இந்த விவகாரத்தில் தன் பெயரை சம்பந்தப்படுத்த முயல்வதாக சந்தேகிக்கிறாா் என்பது புரியவில்லை என்றாா்.