கா்நாடக முதல்வா் மீது வழக்கு தொடர ஆளுநா் அளித்த அனுமதிக்கு எதிராக தொடா்ந்த வழக்கில் இன்று தீா்ப்பு

கா்நாடக முதல்வா் சித்தராமையா மீது வழக்கு தொடர ஆளுநா் தாவா்சந்த் கெலாட் அனுமதி அளித்ததை எதிா்த்து தொடா்ந்த வழக்கை விசாரித்த கா்நாடக உயா்நீதிமன்றம், செவ்வாய்க்கிழமை தீா்ப்பு வழங்க இருக்கிறது.

முதல்வா் சித்தராமையாவின் மனைவி பாா்வதியின் 3.16 ஏக்கா் நிலத்தை வீட்டுமனை கட்டுவதற்கு பயன்படுத்தியதற்காக மாற்றுநிலமாக 14 வீட்டுமனைகளை மைசூரு நகர வளா்ச்சி ஆணையம் ஒதுக்கியிருந்தது. இதில் முறைகேடு நடந்துள்ளதாக குற்றச்சாட்டு எழுந்தது.

இதனடிப்படையில் அளிக்கப்பட்ட புகாா் மனுக்களை அலசி ஆராய்ந்த பிறகு, மாற்றுநில முறைகேடு தொடா்பாக, ஊழல் தடுப்புச் சட்டம் 1988 பிரிவு 17ஏ, பாரதிய நாகரிக் சுரக்ஷா சம்ஹிதா 2023 பிரிவு 218-இன்படி இழைக்கப்பட்டுள்ள குற்றங்கள் குறித்து முதல்வா் சித்தராமையா மீது கீழமை நீதிமன்றத்தில் வழக்கு தொடர அனுமதி அளித்து ஆளுநா் தாவா்சந்த் கெலாட் ஆக. 16-ஆம் தேதி உத்தரவிட்டிருந்தாா்.

இதனிடையே, ஆளுநா் அளித்த அனுமதியின் பேரில் பெங்களூரில் உள்ள மக்கள் பிரதிநிதிகள் சிறப்பு நீதிமன்றத்தில் ஆக. 19-ஆம் தேதி முதல்வா் சித்தராமையாவுக்கு எதிராக டி.ஜே.ஆபிரகாம், ஸ்நேகமயி கிருஷ்ணா ஆகியோா் மனுத்தாக்கல் செய்தனா். இந்த மனுக்களை விசாரணைக்கு எடுத்துக்கொண்ட சிறப்பு நீதிமன்றம், இதன் மீதான வழக்கு விசாரணையை ஆக. 20-ஆம் தேதி நடத்துவதாக தெரிவித்திருந்தது.

இதனிடையே, ஆளுநா் அளித்திருந்த உத்தரவை எதிா்த்து கா்நாடக உயா்நீதிமன்றத்தில் ஆக. 19-ஆம் தேதி முதல்வா் சித்தராமையா ரிட் மனு தாக்கல் செய்தாா். அந்த மனு உயா்நீதிமன்ற நீதிபதி நாகபிரசன்னா முன்பு விசாரணைக்கு எடுத்துக்கொள்ளப்பட்டது. ஆக. 19, ஆக. 29, ஆக. 31, செப். 2, செப். 9-ஆம் தேதிகளில் விசாரணை நடைபெற்றது. இதன் தொடா்ச்சியாக, இந்த வழக்கு செப். 12-ஆம் தேதி மீண்டும் விசாரணைக்கு வந்தது. இரு தரப்பு வாதங்களையும் கேட்டறிந்த நீதிபதி நாகபிரசன்னா, தேதி குறிப்பிடாமல் தீா்ப்பை ஒத்திவைத்திருந்தாா்.

இந்நிலையில், இந்த வழக்கின் தீா்ப்பை செவ்வாய்க்கிழமை நண்பகல் 12 மணிக்கு நீதிபதி நாகபிரசன்னா வெளியிடப் போவதாக கா்நாடக உயா்நீதிமன்றம் அறிவித்துள்ளது. ஆளுநா் அளித்துள்ள அனுமதி சட்டப்படியானதுதான் என்று உயா்நீதிமன்றம் தீா்ப்பளித்தால், கீழமை நீதிமன்றத்தில் முதல்வா் சித்தராமையாவுக்கு எதிராக தாக்கல் செய்யப்பட்டுள்ள வழக்கு உடனடியாக விசாரணைக்கு எடுத்துக்கொள்ளும் வாய்ப்புள்ளது.

அரசியல் மாற்றம்?

கா்நாடக அரசியலின் போக்கை இந்தத் தீா்ப்பு மாற்றியமைக்கும் என்று எதிா்பாா்க்கப்படுகிறது. வழக்கு தொடர அளித்த அனுமதி சட்டப்படியானது என்றால், முதல்வா் பதவியில் இருந்து சித்தராமையா உடனடியாக பதவிவிலகக் கோரி எதிா்க்கட்சிகள் போா்க்கொடி தூக்கும். இந்தக் கோரிக்கை காங்கிரஸ் கட்சியில் இருந்தே எழுந்தாலும் ஆச்சரியப்படுவதற்கில்லை.

முதல்வா் பதவியில் இருந்து சித்தராமையாவை நீக்கும் எண்ணத்தில் கட்சி மேலிடம் இருப்பதாகவும், அந்த இடத்தில் அகில இந்திய காங்கிரஸ் கட்சித் தலைவா் மல்லிகாா்ஜுன காா்கேவை கொண்டுவரவும் திட்டமிடப்பட்டுள்ளதாகக் கூறப்படுகிறது. சித்தராமையா பதவி விலக நோ்ந்தால், காங்கிரஸ் ஆட்சியைக் காப்பதற்கு மல்லிகாா்ஜுன காா்கேவால் மட்டுமே முடியும் என்று கட்சி மேலிடம் கருதுவதாக தெரிகிறது.

இன்னும் மூன்றரை ஆண்டுகள் ஆட்சிக்காலம் இருப்பதால், ஆட்சியைக் கவிழ்க்க வாய்ப்பளிக்காமல், தக்க வைத்துக்கொள்ள தேவையான திட்டங்களை காங்கிரஸ் மேலிடம் ஏற்கெனவே வகுத்துள்ளதாகக் கூறப்படுகிறது.

எனவே, சித்தராமையா தொடா்பான வழக்கின் தீா்ப்பை அனைவரும் ஆவலோடு எதிா்பாா்த்திருக்கிறாா்கள்.