சிறையில் நடிகா் தா்ஷனின் அறையை ஆய்வு செய்ய நீதிமன்றம் உத்தரவு

ரேணுகாசாமி கொலை வழக்கில் நடிகா் தா்ஷன் கைதாகி சிறையில் உள்ளாா். அவரது அறையை ஆய்வு செய்யுமாறு நீதிமன்றம் உத்தரவிட்டுள்ளது.

ரேணுகாசாமி கொலை வழக்கில் கைது செய்யப்பட்டுள்ள நடிகா் தா்ஷன், பெங்களூரு, பரப்பன அக்ரஹாராவில் உள்ள மத்திய சிறையில் அடைக்கப்பட்டுள்ளாா். சிறையில் தனக்கு குறைந்தப்பட்ச வசதிகளை அளிக்க உத்தரவிடக் கோரியும், தன்னை அடைத்துவைத்துள்ள சிறைச்சாலையை ஆய்வு செய்ய உத்தரவிட கோரியும் 57ஆவது கூடுதல் மாநகர குடிமையியல் மற்றும் செஷன்ஸ் நீதிமன்றத்தில் நடிகா் தா்ஷன் மனு தாக்கல் செய்திருந்தாா்.

இந்த மனுவை வெள்ளிக்கிழமை விசாரித்த நீதிமன்றம், நடிகா் தா்ஷன் அடைத்துவைக்கப்பட்டுள்ள மத்திய சிறையை ஆய்வு செய்து, அக்.18ஆம் தேதி அறிக்கை தாக்கல் செய்யும்படி பெங்களூரு மாநகர சட்ட சேவைகள் ஆணையத்தின் உறுப்பினா் செயலாளருக்கு உத்தரவிட்டுள்ளது.

சிறைவிதிகளின்படி நடிகா் தா்ஷனுக்கு தரவேண்டிய வசதி வாய்ப்புகள் கிடைக்கின்றனவா என்பதையும் ஆய்வு செய்யுமாறு நீதிமன்றம் அறிவுறுத்தியுள்ளது.

ஜாமீன் மனுவை ரத்து செய்வதற்கு முன்னதாக பெங்களூரு, பரப்பன அக்ரஹாராவில் உள்ள மத்திய சிறையில் நடிகா் தா்ஷனுக்கு சிறப்புச் சலுகைகள் வழங்கப்பட்டதாக குற்றச்சாட்டு எழுந்ததால், அவா் பெல்லாரி சிறைக்கு மாற்றப்பட்டிருந்தாா். அங்கு உடல்நலக் குறைவு ஏற்பட்டதாக தாக்கல் செய்திருந்த மனுவை ஏற்றுக்கொண்ட நீதிமன்றம், சிகிச்சை பெறுவதற்காக ஜாமீன் அளித்திருந்தது.

ஆனால், மருத்துவச் சிகிச்சை எதுவும் பெறாமல் குடும்பத்தோடு தனது இயல்புவாழ்க்கைக்கு நடிகா் தா்ஷன் திரும்பியதையடுத்து அவரது ஜாமீனை உச்சநீதிமன்றம் ரத்து செய்தது. இதைத் தொடா்ந்து, நடிகா் தா்ஷன் கைது செய்யப்பட்டு, சிறையில் அடைக்கப்பட்டாா்.