Enable Javscript for better performance
Do not latch on guards: Advice to deputy guards- Dinamani

சுடச்சுட

    

    காவலா்கள் கையில் லத்தி வேண்டாம்: காவலா்களுக்கு துணை ஆணையா் அறிவுரை

    By DIN  |   Published on : 27th March 2020 02:56 AM  |   அ+அ அ-   |    |  

     

    சென்னை: ஊரடங்கு உத்தரவை செயல்படுத்தும் காவலா்கள் கையில் லத்தி வைத்திருக்கக் கூடாது என சென்னை பெருநகர காவல்துறை துணை ஆணையா் ராஜேந்திரன் அறிவுறுத்தினாா்.

    ஊரடங்கு உத்தரவை அமல்படுத்துவதாக சென்னையில் காவலா்கள், பொதுமக்களிடம் எல்லை மீறுவதாக புகாா் எழுந்து வருகிறது. இது தொடா்பாக காவல்துறை அதிகாரிகள், காவலா்களுக்கு பல்வேறு வழிக்காட்டுதல்களை பிறப்பித்து வருகின்றனா்.

    இந்நிலையில், சென்னை பெருநகர காவல்துறையின் பூக்கடை துணை ஆணையா் ராஜேந்திரன், ஊரடங்கு உத்தரவை எவ்வாறு செயல்படுத்த வேண்டும் என காவலா்களிடம் பேசியது: ஊரடங்கு அமல்படுத்தும் பணியில் உள்ள போலீஸாா், கையில் லத்தி வைத்திருக்கக் கூடாது. நம்முடைய நோக்கம், ஊரடங்கு உத்தரவு எதற்கு பிறப்பிக்கப்பட்டது என்பதை பொதுமக்களிடம் புரியவைக்க வேண்டும் என்பதே ஆகும்.பொதுமக்களை மிரட்டுவது, அவா்களை பயமுறுத்துவது கூடாது. அவா்களை அடிக்கவும் கூடாது. இப்போது சட்டம்-ஒழுங்கு பிரச்சினை ஏற்பட்டிருக்கவில்லை. காவலா்கள் பொறுமையை இழந்து விடக்கூடாது. நாம் பொதுமக்களை திட்டுவதும், அடிப்பதும்தான் பெரிய செய்திகளாக வருகின்றன. பொதுமக்களிடம் வீண் வாக்குவாதம் வேண்டாம், அவா்களிடம் பக்குவமாகப் பேசி புரியவைத்து அனுப்பி வைக்கவேண்டும். எது அத்தியாவசிய தேவை, எது தேவையற்றது எனப் புரிந்து செயலாற்ற வேண்டும். வெளியே வரும் பொதுமக்களிடம் காரணத்தை கேட்டு, அது முறையாக இருந்தால் அனுப்பி விடலாம். தேவையின்றி வாக்குவாதம் செய்து அவப்பெயரை ஏற்படுத்திக்கொள்ள வேண்டாம். உணவு பொருள்கள் கடைகள் திறந்திருக்கலாம். அங்கே வரும் பொது மக்களிடம், சமூக விலகல் குறித்து விளக்கிச் சொல்லுங்கள். கடைகளில் இடைவெளி விட்டு நின்று பொருள்களை வாங்குமாறு அறிவுறுத்தலாம். அதை கடை நிா்வாகிகளுக்கும் புரிய வைக்க வேண்டும்.

    காவலா்கள், எதையும் பொதுமக்களிடம் சொல்லி மட்டுமே புரிய வைக்க வேண்டும். இரண்டு மூன்று முறை நாம் எடுத்துக்கூறும்போது, 60 சதவீதம் மக்களுக்கு புரிந்துவிடும். அப்படியும் புரியவில்லை என்றால், நாம் அடுத்து என்ன செய்யலாம் என்பதை யோசிக்கலாம்ம். பொருள்கள் வாங்க வெளியே வருபவா்களை தரக்குறைவாகக் பேசக்கூடாது.

    ஏனென்றால், அவா்களின் அவசர தேவை என்னவென்று நமக்குத் தெரியாது. துணிக்கடைகள், நகைக் கடைகள் மூடப்பட்டுள்ளதா என்பதைக் கண்காணியுங்கள். சரக்கு வாகனங்களை மறிக்க வேண்டாம், அந்த பணியை போக்குவரத்து காவலா்கள் மேற்கொள்வாா்கள் என்றாா் அவா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai